Mbweenga Mwatalika Mibandi Kusebensesha Matilakiti

Kuswabo mu January 2018, papeeji yakutaanguna ya Kabuku Kamabungano Abuumi Anciito palaba lubasu lwa nsheenga mwaamba. Twakayuminishikwa kubandika abantu kuteshi kunokwaabilabo mabuku. Kwaamba ayi tucafwe beshikushimikila kwaalula mbobashimikila, mavidyo ali mulubasu lwa nsheenga mwaamba alatondesha mbweenga twatalika mibandi kwiinda mukusebenseshabo Baibo. Ano sa ici citoosansulula ayi taakuwo kwaabila mabuku ndyetutooshimikila kuŋanda aŋanda? Sobwe tabushi! Kucakubonenaako, nshila ibotu abuumbi njeenga twasebensesha kutalika mibandi, nkusebensesha matilakiti. Inga twasebensesha nshila itokonkelaawo kwaabila tilakiti iliyoonse:

1. Amwiipushe mwiipusho ucite shikumbulo uyo ucanika papeeji yakutaanguna.

2. Amutondeshe cikumbulo ca mu Baibo cicanika peculu papeeji yabili. Na ciindi nkocicili, amubelenge akubandikishanya makani amwi atoocanika mukati ka tilakiti.

3. Amwaabile tilakiti ku mwine ŋanda, akumuyuminisha ayi na acane ciindi akabelenge koonse.

4. Ndyemutoomanisha mubandi amumutondeshe mwiipusho ngotucana palubasu lwaamba ayi “Shakuyeyaawo” akupanga bubaambo bwa kuboolelaako kwaamba ayi mukakumbule mwiipusho uyo kuswa mu Baibo.

Ciindi ndyemwaboolelaako amubandikishanye cikumbulo akushiya mwiipusho ngweshi mukabandikeewo na mukabooleleeko. Inga mwasala mwiipusho ucanika pa webusaiti yesu na ucanika mumabuku atondeshekwa papeeji ya kweelaako ya katilakiti. Paciindi ceelete inga mwatalika kwiiya buloshuwa ya Makani Abotu Kuswa Kuli Lesa! na libuku limwi ndyetusebensesha pakwiisha.