Kushimikila Kulibetele Kwakutalika Shiiyo sha Baibo mu Mweenshi wa September

Mu mweenshi wa September, tulaakusebensa cankusu kutalika shiiyo sha Baibo kuŋanda aŋanda kusebensesha buloshuwa ya Amusangalale Abuumi Kwamuyayaya! Beshikushimikila inga basalawo kusebensa bupainiya bwakucafwilisha kwa mawoola ali 30. Ino tulaakwisebensa buyani incito yakushimikila kulibetele?

• Pa Lweendo Lwakutaanguna: Amusebenseshe makani ali papeeji yakweelaako kwaamba ayi mucafwe bantu kusuna kunyumfwa shiinji, alimwi amweeleshe kubatondesha ciiyo ca Baibo mbocicitwa. Amwiibaluke baabo bakatondesha lusuno lwa kwiiya shiinji alimwi abaabo mbomweelete kuboolelaako. Nabi kwaamba ayi kale kale bakalinga bakaka kwiiya Baibo, mpashi inga basuna kwiiya kwiinda mukusebensesha nshila shipya nshetusebensesha kwiisha pacecino ciindi alimwi a buloshuwa. Tatweelete kushiya buloshuwa pamaanda patapuwo bantu nabi kushiya buloshuwa pomwi ankalata mu envelopu kubantu bakakaka kwiiya. Bamu Komiti ya Ncito ya Libungano mpashi inga babika bubaambo abumwi bwakubungana kwakuya muncito yakushimikila akumwi mumweenshi uyu.

• Shoolwe Shimwi: Na libungano lyanu lilasebensesha tukoci twakubikawo mabuku, amubikewo buloshuwa ya Amusangalale Abuumi Kwamuyayaya! Amulwiite baabo basuni kwiiya kwaamba ayi na batambula buloshuwa inga baba acoolwe cakwiiya Baibo kwakutalipila. Pesule lyakubandika, amubatondeshe ciiyo ca Baibo mbocicitwa mukufwiimpya, na mpashi inga mwabika bubaambo kwaamba ayi mukabatondeshe ciindi cimwi. Mutanjilili wancito inga wabamba bubaambo bwakwaamba ayi beshikushimikila bacishi kabotu, bakaye kumusena wamakwebo uli kumusena nkobashimikila akutalika shiiyo sha Baibo. Inga mwatalika shiiyo sha Baibo kubantu mbomusebensaabo na kubantu mbomutoshimikila munshila ya kubandikabo.

Yesu wakatupa mulawo wakucafwa “bantu kuba bashikwiiya” alimwi “akubaiisha.” (Mt 28:19, 20) Amuleke kwaamba ayi kushimikila kulibetele uku kutucaafwe kukumanisha luyaando ulu, kwiinda mukusebensesha libuku na buloshuwa ya Amusangalale Abuumi Kwamuyayaya!