Shakacitika Ceebo Cakumweta Mweta!

Ba Helen baliimfwi pafwiifwi akakooci kamabuku kabamweta mweta. Banakashi bobilo batokwiinda.

BANAKASHI bobilo bacanike ku Philippines ndyebakalinga kwiinda mutauni inene iitwa ayi Baguio, bakabona kakoci kesu kamabuku, sombi bakeendililabo. Nankashi waliina lya Helen, uyo wakalinga kwiimfwi pakakoci, wakabalangilisha cabuneshi akumweta mweta ndyebakalinga kwiinda. Nabi kwaamba ayi banakashi bobilo balya bakeendilila, bakanyumfwa kabotu nankashi mbwaakabalangilisha cabuneshi akumweta mweta.

Banakashi balya ndyebakalinga kuboolela kuŋanda, kabali mubaasi, bakabona Ŋanda ya Bwaami pakalinga kulembetwe ayi jw.org mushilembo shinene. Lyalo bakesa mukwiibaluka ayi nsheshilembo nshobalinga babona pakakoci kamabuku ndyebalinga mutauni. Bakaseluka mubaasi akuya mukubona pamulongo wa nshiku aciindi camabungano apusenepusene wakalinga kulembetwe pageti ya Ŋanda ya Bwaami.

Banakashi beenka balya bobilo batomweta mweta ndyebabona ba Helen mu Ŋanda ya Bwaami.

Banakashi bobilo aba bakesa kumabungano. Alimwi bakankamana ndyebakabona nankashi Helen ndyebakenjilabo mu Ŋanda ya Bwaami! Lyalo peenkapo bakamushiba ayi ngulya wakabalangilisha cabuneshi akumweta mweta. Nankashi Helen wakaamba ayi: “Ndyebakanduluma ndakalisukama paniini, akuyeeya ayi mpashi kuli cimwi ncendabisha.” Sombi bakamulwiita ayi bakamubona ndyaakalinga pakakoci kamabuku.

Banakashi bacanike bobilo aba bakasangalala kucanika kumabungano akubandika abamakwesu abenankashi alimwi bakalinyumfwa ayi bakatambulwa kabotu. Ndyebakabona bamwi kababotesha pesule lyakubungana, bakasenga na abalo inga baboteshaako. Mwanakashi womwi wakaya kucishi cimwi, ano uyu umwi wakatalika kucanika kumabungano alimwi akwiiya Baibo. Ishi shoonse shakacitika ceebo cakwaamba ayi nankashi wakabalangilisha cabuneshi akumweta mweta!