MUTWI WAKWIIYA 19
LWIIMBO 22 Bwaami Butoolela—Abwise!
Ino Nshiinshi Nshotucishi Pali Yehova Mbweshi Akoomboloshe Bantu Conoono?
‘Yehova taasuni muntu nabi womwi kunyonyoolwa.’—2 PIT. 3:9.
CITEENTE CINENE
Inga twashooma ayi Yehova ndyeshi akanokoombolosha bantu conoono, alaakucita boobo cabululami alimwi cakutanyengelela.
1. Ino nceebonshi nceenga twaambila ayi tutookala muciindi cisangalasha abuumbi?
TUTOOKALA muciindi cisangalasha abuumbi! Bushiku abushiku, tutoobona bushinshimi bwamu Baibo mbobutookumanishikwa. Kucakubonenaako, tutoobona “mwaami wakumatwa” a “mwaami wakumalenge” mbobatoshindikana ceebo cakusuna kweendelesha cishi coonse. (Danye. 11:40, NWT) Basebenshi bakwe Lesa batooshimikila makani abotu aamba pa Bwaami bwakwe nsengwe yoonse, alimwi bantu baanji bakasalawo kusebensela Yehova. (Isa. 60:22; Mate. 24:14) Alimwi tutootambula shakulya shakumushimu shiinji “paciindi ceelete.”—Mate. 24:45-47.
2. Ino nciinshi nceenga twashooma, sombi ino nciinshi ncotweelete kushiba?
2 Yehova watolelela kutucafwa kunyumfwishisha kabotu shintu shiyandika sheshi shikacitike conoono. (Tus. 4:18; Danye. 2:28) Inga twashooma ayi kusa mukushika paciindi mapensho anene ndyeshi akatalike, tulaakushiba shoonse nshotuyandika kushiba kwaamba ayi tucikonshe kuliyumya cakushomeka akutolelela kuba bacatene paciindi ici ciyumu. Nacibi boobo, tulyeelete kushiba ayi kuli shintu shimwi nshotutacishiiwo pasheshi shikacitike conoono. Mumutwi uyu, tutotaanguna kubandika cakapa kwaamba ayi twaalule shimwi nshotwakaamba pasheshi shikacitike conoono. Lyalo tutokwiinduluka mushintu shimwi nshotucishi sheshi shikacitike kunembo alimwi a Ishiwesu wakwiculu nsheshi akacite.
NSHOTUTACISHIIWO
3. Ino twakaamba ayi ndilili bantu ndyeshi bakabule coolwe cakushoma muli Yehova, alimwi ino nceebonshi twakayeeya boobo?
3 Kale kale twakaamba ayi na mapensho anene akatalike, bantu teshi bakabewo acoolwe cakushoma muli Yehova akupuluka Amagedoni. Twakaamba boobo mukwiinga twakanyumfwishisha ayi makani aamba pa Muyoba unene akalinga kwiimikaninaako shakalinga kusa mukucitika kunembo. Kucakubonenaako, twakayeeya ayi bweenka bantu mbobatana kucikonsha kunjila mu bwaato Yehova ndyaakacala cisasa, taakuwo bantu beshi bakashome muli nguwe akupulushikwa na mapensho anene akatalike.—Mate. 24:37-39.
4. Ino nceebonshi tatweelete kunoobona ayi shintu shoonse shakacitika muciindi cakwe Nowa shitokumanishikwa munshila iinditewo munshiku shino? Amusansulule.
4 Sa tulyeelete kunoobona ayi shoonse shakacitika muciindi ca Muyoba unene shakalinga kusa mukukumanishikwa munshila iinditewo kunembo? Sobwe. Ino nceebonshi? Nceebo cakwaamba ayi Malembo taambi cakululama ayi ubo mbocibete.a Ncakwiila kwaamba ayi Yesu wakakoshanisha “ciindi cakwe Nowa” kuciindi cakubaako kwakwe. Sombi taakwe kwaamba ayi shoonse shakacitika muciindi cakwe Nowa shakalinga kusa mukukumanishikwa munshila iinditewo kunembo, mbuli ciindi Yehova ndyaakacala cisasa caku bwaato. Nacibi boobo, ici tacaambi ayi taakuwo nsheenga tweeya kuswa kumakani aamba pa Muyoba wamu ciindi cakwe Nowa.
5. (a) Ino Nowa wakatondesha buyani ayi alicite lushomo, Muyoba kautana kutalika? (Bene Ebulu 11:7; 1 Pita 3:20) (b) Ino ncito yesu yakushimikila ilikoshenye buyani ayakwe Nowa?
5 Nowa ndyaakanyumfwa makani akucenjesha kuswa kuli Yehova, wakatondesha ayi alicite lushomo kwiinda mukupanga bwaato. (Amubelenge Bene Ebulu 11:7; 1 Pita 3:20.) Bantu banyumfwa makani abotu aamba pa Bwaami bwakwe Lesa abalo balyeelete kutondesha ayi balicite lushomo kwiinda mukukonkela nshobeeya. (Milimo 3:17-20) Pita wakaamba ayi Nowa “wakalinga kushimikila shabululami.” (2 Pit. 2:5) Nacibi boobo, kweelana ambotwakeeya mumutwi wamana, tatucishiiwo na Nowa wakeelesha kushimikila bantu boonse bapacishi Muyoba kautana kutalika. Munshiku shino, aswebo tutokweelesha kushimikila bantu boonse nsengwe yoonse, alimwi tulasebensa cankusu muncito iyi. Sombi nabi tweeleshe buyani, teshi tukacikonsheewo kushimikila bantu boonse mamanino kaatana kusa. Ino nceebonshi?
6-7. Ino nceebonshi inga twaamba ayi teshi tukacikoonshe kushimikila makani abotu kubantu boonse pacishi mamanino kaatana kusa?
6 Amuyeeye Yesu nshaakaamba pakukomena kwa ncito yesu yakushimikila. Wakaambila limwi ayi makani abotu “alaakushimikilwa mucishi coonse kwaamba ayi akabe mbobukamboni kubantu boonse.” (Mate. 24:14) Bushinshimi ubu butokumanishikwa munshiku shino kwiinda ambocakalinga kale kale. Makani a Bwaami atooshimikilwa mumishobo iindilila 1,000. Alimwi ceebo ca webusaiti yesu ya jw.org, bantu baanji munshiku shino inga beeya makani abotu aamba pa Bwaami bwakwe Lesa.
7 Nacibi boobo, Yesu alimwi wakalwiita bashikwiiya bakwe ayi teshi bakamanishe “kushinguluka mandabala oonse,” na kushimikila bantu boonse, kaatana kusa. (Mate. 10:23; 25:31-33) Yesu ndyaakaamba maswi aya wakalinga kusansulula ayi teshi tukacikonshe kushimikila bantu boonse mamanino kaatana kusa. Bantu baanji balekala mumisena motutacite lwaanguluko lwa kubashimikila. Kwiilikaawo, baana baanji abuumbi balashalwa bushiku abushiku. Aboobo teshi tukacikoonshe kushimikila bantu boonse pacishi mamanino kaatana kusa, nabi kwaamba ayi tulacita nsheenga twacikonsha kushimikila bantu ba “mikowa yoonse, milaka yoonse alimwi akumishobo yoonse.”—Ciyu. 14:6.
8. Ino ngumwiipusho nshi ngweenga twaliipusha pali Yehova mbweshi akoomboloshe bantu? (Amubone ashikope.)
8 Kweelana anshotwabandika, mpashi inga twaliipusha ayi: Ino cilaakuba buyani kubaabo beshi bakabule coolwe cakunyumfwa makani abotu mapensho anene kaatana kutalika? Ino Yehova a Mwanaakwe uyo ngwakapa nkusu shakoombolosha, balaakoombolosha buyani bantu? (Joni 5:19, 22, 27; Milimo 17:31) Lilembo paswa mutwi uyu lilaamba ayi Yehova “taasuni muntu nabi womwi kunyonyoolwa.” Sombi alisuni kwaamba ayi “boonse basanduke kuswa kushibiibi shabo.” (2 Pit. 3:9; 1 Timo. 2:4) Nabi kwaamba ayi tulicishi makani aya pali Yehova, taana kutulwiita mbweshi akoomboloshe bantu abo beshi bakabule coolwe cakunyumfwa makani abotu. Kwalo, taayandiki kutulwiita shoonse nshaakacita na nsheshi akacite.
Ino Yehova alaakuboombolosha buyani abo beshi bakabule coolwe cakunyumfwa makani abotu mapensho anene kaatana kutalika? (Amubone palagilafu 8)c
9. Ino nshiinshi Yehova nshaakatulwiita mu Baibo?
9 Kwiinda mu Maswi akwe, Yehova wakatulwiita shintu shimwi nsheshi akacite. Kucakubonenaako, Baibo ilatulwiita ayi Yehova alaakubusha bantu “bataluleme” abo batana kuba acoolwe cakunyumfwa makani abotu akwaalula buumi bwabo. (Milimo 24:15; Luka 23:42, 43) Ici inga catupa kuliipusha miipusho aimwi iyandika.
10. Ino njimiipusho nshi imwi njeenga twaliipusha?
10 Sa abo boonse beshi bakafwe ciindi ca mapensho anene balaakufwitabo limwi kwakubula kulangila kubushikwa? Malembo alaamba cakuteenda mweela ayi abo bapikisha Yehova alimwi beshi bakanyonyoolwe kuli nguwe akubaanjelo bakwe pa nkondo ya Amagedoni, teshi bakabushikweewo. (2 Tesa. 1:6-10) Ano ino cilaakuba buyani kubantu bamwi? Kucakubonenaako, bamwi mpashi balaakufwa ciindi camapensho anene ceebo cakuciswa, kucembela, akisidenti na kucaikwa kumuntu umwi. (Shiku. 9:11; Seka. 14:13) Sa bamwi pabaaba beshi bakafwe balaakuba pa “bataluleme” abo beshi bakabushikwe mucishi cipya? Tatucishiiwo.
NSHOTUCISHI
11. Ino bantu balaakoomboloshekwa buyani pa Amagedoni?
11 Kuli shintu shiinji nshotucishi pasheshi shikacitike kunembo. Kucakubonenaako, tulicishi kwaamba ayi pankondo ya Amagedoni, bantu balaakoomboloshekwa kweelana anshobakalinga kucita kubamakwabo Klistu. (Mate. 25:40) Abo beshi bakoomboloshekwe ayi ni mbelele, mbaabo bakalinga kucafwa bamakwabo Klistu bananikitwe. Alimwi tulicishi kwaamba ayi bamakwabo Klistu bamwi balaakunoocili pacishi pesule lyakwaamba ayi mapensho anene atalika, alimwi teshi bakatolwe kwiculu kushikila kukacaalebo paniini kwaamba ayi Amagedoni italike. Kulilabo bamakwabo Klistu bamwi kabacili pacishi, cilaakukonsheka kwaamba ayi bantu basuni kwiiya bakabe kulubasu lwabo akubacafwa muncito yabo. (Mate. 25:31, 32; Ciyu. 12:17) Ino nceebonshi kushiba makani aya kulayandika?
12-13. Ino bamwi mpashi balaakucita buyani pesule lya kubona kunyonyoolwa kwa “Babiloni Munene”? (Amubone ashikope.)
12 Nabi pesule lyakwaamba ayi mapensho anene atalika, bamwi beshi bakabone kunyonyoolwa kwa “Babiloni Munene,” mpashi balaakwiibaluka ayi kwamyaaka iinji Bakamboni Bakwe Yehova bakalinga kwaamba ayi ishi shilaakucitika. Sa bamwi beshi bakabone kunyonyoolwa kwa “Babiloni Munene” paciindi ca mapensho anene balaakusalawo kushoma muli Yehova?—Ciyu. 17:5; Esek. 33:33.
13 Na ico cikacitike, cilaakukoshanya acakacitika ku Ijipiti muciindi cakwe Mose. Na mutokwiibaluka, “bantu bamwi baanji bateshi bene Isilaeli,” bakaya abene Isilaeli ndyebakalinga kuswa mu Ijipiti. (Kulo. 12:38) Bamwi pabantu abo mpashi bakatalika kushoma muli Yehova ndyebakabona ayi Myaalu ili 10 Mose njaakabacenjesha yacitika. Sa na camushobo uyu cikacitike pesule lya kunyonyoolwa kwa Babiloni Munene, tulaakutalika kuyeeya ayi teshi kucita kabotu kwaamba ayi bantu bamwi baba kulubasu lwesu ndyekwacaalabo paniini kwaamba ayi Amagedoni italike, lyalo akuba acoolwe cakunjila mucishi cipya? Sobwe! Tulisuni kuba mbuli Ishiwesu wakwiculu, uyo ‘uswite nkuumbu alimwi ulekelela, utafwambaani kukalala, uswite lusuno lutamaani alimwi ushomeka.’b—Kulo. 34:6.
Bamwi beshi bakabone kunyonyoolwa kwa “Babiloni Munene,” mpashi balaakwiibaluka ayi kwamyaaka iinji Bakamboni Bakwe Yehova bakalinga kwaamba ayi ishi shilaakucitika (Amubone palagilafu 12 a 13)d
14-15. Sa ciindi muntu ndyaafwa na musena nkwaakala nsheshi shikape kwaamba ayi akabe acoolwe cakukala kwamuyayaya? Amusansulule. (Kulumbaisha 33:4, 5)
14 Cimwi ciindi bamakwesu na benankashi bamwi inga baamba pali shikamukowa wabo utatosebensela Yehova ayi: “Inga cabota na wafwa mapensho anene kaatana kutalika, mukwiinga inga walangila kubushikwa.” Ncakutatoonsha kwaamba ayi kumunyumfwila nkuumbu shikamukowa wabo nkweenga kwabapa kwaamba maswi aya. Sombi ciindi muntu ndyaafwa teshi nceshi cikape kwaamba ayi akabe abuumi butamaani kunembo. Yehova ngu Moomboloshi umaninite. Lyoonse alasalawo kucita shintu shiluleme alimwi cakutanyengelela. (Amubelenge Kulumbaisha 33:4, 5.) Inga twashoma cakutatoonsha ayi “Moomboloshi wa cishi coonse” alaakucita shintu cabululami.—Mata. 18:25.
15 Alimwi inga twaamba ayi musena muntu nkwaakala teshi ngweshi ukape kwaamba ayi akabe acoolwe cakukala kwamuyayaya. Yehova inga taaomboloshi bantu baanji ayi ni “mpongo” ceebobo cakwaamba ayi balekala mumisena mobatana kubaawo acoolwe cakwiiya makani abotu aamba pa Bwaami. (Mate. 25:46) Moomboloshi ululeme wa cishi coonse alababikilako maano abuumbi bantu aba kwiinda ambweenga twababikilako maano. Tatucishiiwo Yehova mbweshi akanoocita shintu paciindi ca mapensho anene. Mpashi bamwi pabantu aba balaakuba acoolwe cakwiiya pali Yehova, kushoma muli nguwe, akuba kulubasu lwakwe na akalisalashe kubantu boonse bekala pacishi.—Esek. 38:16.
Pesule lyakwaamba ayi mapensho anene atalika, . . . sa bamwi beshi bakabone kunyonyoolwa kwa “Babiloni Munene” balaakusalawo kushoma muli Yehova?
16. Ino kwiiya Baibo kwatucafwa kushiba nshi pali Yehova? (Amubone acikope.)
16 Kwiiya Baibo kwatucafwa kushiba ayi bantu balayandika abuumbi kuli Yehova. Wakatupa Mwanaakwe kwaamba ayi soonse tukabe acoolwe cakukala kwamuyayaya. (Joni 3:16) Soonse tulalinyumfwa ayi Yehova alitusuni. (Isa. 49:15) Alishi liina lya muntu womwi awomwi. Alitwishi kabotu cakwaamba ayi nabi twafwa, inga watubusha mukwiinga aleebaluka shoonse pali ndiswe kwiilikaawo ambotwakalinga kuyeeya! (Mate. 10:29-31) Ncakutatoonsha kwaamba ayi kuli sheebo shibotu sheenga shatupa kushoma ayi Ishiwesu wakwiculu alaakoombolosha kabotu muntu womwi awomwi mukwiinga ngu musongo, aliluleme alimwi alicite nkuumbu.—Jemu. 2:13.
Inga twashoma ayi Ishiwesu wakwiculu alaakoombolosha kabotu muntu womwi awomwi mukwiinga ngu musongo, aliluleme alimwi alicite nkuumbu (Amubone palagilafu 16)
17. Ino tulaakwiiya nshi mumutwi utokonkelaawo?
17 Ano pesule lyakwaamba ayi twanyumfwishisha makani aya munshila ipya, twashiiba kwaamba ayi incito yakushimikila ndyeitoyandika kucitwa cakufwambaana kwiinda ambocalinga. Ino nceebonshi nceenga twaambila boobo? Alimwi ino nciinshi cituyuminisha kutolelela kushimikila? Tulaakwiiya shiinji pashikumbulo kumiipusho iyi mumutwi utokonkelaawo.
LWIIMBO 76 Sa Kuli Mbonyumfwa?
a Kwaamba ayi mushibe cakapa kwaamba ayi twaalule mbotunyumfwishisha makani aya, amubelenge mutwi waamba ayi “Oobu Mbookayanda,” mu Njashi Yamulindilishi yamu Chitonga ya March 15, 2015, mape. 7-11.
b Pesule lyakwaamba ayi Babiloni Munene wanyonyoolwa, basebenshi bakwe Lesa boonse balaakweleshekwa na Gogi waku Magogi akabalwaane. Uli woonse weshi akabe kulubasu lwa bantu bakwe Lesa pesule lyakwaamba ayi Babiloni Munene wanyonyoolwa, alakwe alaakweeleshekwa.
c BUSANSULUSHI BWASHIKOPE: Shikope shotatwe shitotondesha sheenga shapa kwaamba ayi tutacikoonshi kushimikila bantu bamwi: (1) Mwanakashi ukala kumusena kuli bupailishi bweenga bwabika buumi bwa bamwi mumapensho, (2) beebene bekala kumusena kuli bweendeleshi bukasha ncito yesu alimwi kuloondesha kushimikila, alimwi (3) musankwa ukala kulaale abuumbi alimwi nkocibete ciyumu kuyaako.
d BUSANSULUSHI BWASHIKOPE: Mwanakashi wacanike wakacileka kusebensela Yehova weebaluka nshakeeya pa kunyonyoolwa kwa “Babiloni Munene.” Wasalawo kutalika alimwi kusebensela Yehova akuboolela ku bashali bakwe Bakamboni. Na shamushobo uyu shikacitike, tulisuni kuba mbuli Ishiwesu wakwiculu ucite nkuumbu alimwi ulekelela akusangalala kwaamba ayi mucita shibiibi waboolela kuli nguwe.