Sa Mutokwiibaluka?

Sa mutokwiibaluka nshotwakeeya kuswa mumitwi ipusenepusene yamu Njashi Yamulindilishi yamu 2024? Amucane shikumbulo kumiipusho itokonkelaawo:

Ino ncakubonenaako nshi Yehova ncaakatutondesha ca mbotweelete kunoobona banakashi?

Taabasalululi nabi kunoobona anga basankwa balayandika kwiinda banakashi. Lesa alabakutika banakashi ndyebatomulwiita mbobalinyumfwa ashibasukamika. Alimwi wakabapa mukuli wakusebensa ncito yakwe.—w24.01, mape. 15-16.

Ino maswi ngotucana pa Bene Efeso 5:7 aamba ayi “mutanokweenda abantu ba mushobo wooyu,” inga twaakonkela buyani?

Mutumwi Paulo wakalinga kutucenjesha kuleya kuba bushicibusa abantu beenga bapa kwaamba ayi citubete ciyumu kutolelela kukonkela njiisho shakwe Lesa. Bantu abo inga baba baabo mbotucanikaabo na abo mbotubandikaabo pa intaneti.—w24.03, mape. 22-23.

Ino ngamakani nshi akubeca ngotweelete kukaka?

Tulyeelete kukaka makani ngeenga twanyumfwa kuswa kubamakwesu abenankashi ayo ngobatana kushinisha na ngancine, makani ngeenga twatambula mu imelo ngotutacishi nkwaaswa alimwi amakani aswa kubaabo bakapondoka kuswa mucancine abo baboneka anga balisuni kubashimikila.—w24.04, pe. 12.

Ino nshiinshi nshotucishi anshotutacishiiwo kulansha kuli Yehova mbweshi akoomboloshe Mwaami Solomoni abaabo bakafwa mu Sodoma a Gomola apaciindi ca Muyoba Unene?

Tatucishiiwo na ncakwiila Yehova wakasalawo ayi teshi bakabushikweewo. Sombi tulicishi ayi alicishi kabotu makani oonse alimwi alicite nkuumbu abuumbi.—w24.05, mape. 3-4.

Ino kushiba ayi Yehova ngu “Mwaandami” kulatupa kushoma nshi? (Duto. 32:4)

Inga twayuba muli Yehova. Inga twamushoma, mukwiinga lyoonse alakumanisha nshaashomesha. Alimwi taaluki, mukwiinga mibo njaacite alimwi akuyanda kwakwe tashaalukiiwo.—w24.06, mape. 26-28.

Ino nshiinshi sheenga shamucafwa kushibila na mwalongela kulibungano lipya?

Amucinke manungo muli Yehova alimwi alaakumucafwa bweenka mbwakacafwawo basebenshi bakwe bakale kale. Amuleye kukoshanisha libungano nkomwakaswa ku libungano momubete. Amusebense cankusu mulibungano lipya, akweelesha kuba abeshicibusa bapya.—w24.07, mape. 26-28.

Ino nshiinshi nsheenga tweeya kuswa ku shikoshanyo shotatwe nshotucana mu Mateyo capita 25?

Cikoshanyo ca mbelele ampongo cilatucafwa kushiba kuyandika kwa kushomeka. Cikoshanyo ca bamyooye bacenjete abaluya cilatwiisha kuba balibambite akubikilako maano. Lyalo cikoshanyo ca matalenti cilatucafwa kushiba kuyandika kwa kusebensa cankusu.—w24.09, mape. 20-24.

Ino cipinda cakwinjililaako cakalinga pa tempele yakwe Solomoni cakalinga cilaamfu buyani kuya mwiculu?

Palilembo lya 2 Makani 3:​4, mabuku amwi akale kale alaamba ayi “tukokola 120,” nkokwaamba ayi mamita ali 53. Sombi mabuku amwi bantu ngobashoma alaamba ayi “tukokola 20,” nkokwaamba ayi mamita ali 9. Mamita ali 9 aleendelana akukomena kwa lubumbu pakalinga kuyakitwe tempele.—w24.10, pe. 31.

Ino Baibo ilasansulula nshi na yaamba ayi basebenshi bacafwilisha balyeelete kuba basankwa “beebete mwanakashi womwi”? (1 Timo. 3:12)

Ilasansulula ayi balyeelete kweebabo mwanakashi womwi alimwi tabeelete kucita bufuule. Kwiilikaawo, tabeelete kunotondesha lusuno lwa mucikwati ku banakashi bamwi.—w24.11, pe. 19.

Ino nceebonshi nceenga twaambila ayi Yesu ndyaakaamba maswi ngotucana pa Joni 6:53 taakalinga kusansulula nshotweelete kunoocita pa Mulalilo wa Mwaami?

Joni 6:53 ilaamba pakuyandika kwa kulya mubili wakwe Yesu akunwa bulowa bwakwe. Yesu wakaamba maswi aya mu 32 C.E. ku Galili, kulwiita baJuda abo bakalinga kuyandika kushoma muli nguwe. Sombi ndipakeenda mwaaka womwi, Yesu ndyaakatalika Mulalilo wa Mwaami ku Jelusalemu. Ndyebakalinga kucita Mulalilo wa Mwaami, Yesu wakalinga kubandika abaabo mbweshi akeendeleshaabo kwiculu.—w24.12, mape. 10-11.