Miipusho Kuswa Kubeshikubelenga

Ino “baanjelo basalitwe” baambwa pa 1 Timoti 5:21 mbaanjelo nshi?

Mutumwi Paulo wakalembela Timoti ayi: “Ndakusenga cankusu, pameenso akwe Lesa, Klistu Yesu alimwi abaanjelo basalitwe, kwaamba ayi ukonkele milasho yoonse iyi cakutasalulula alimwi mushintu shoonse nshoocita tooelete kusuula umwi.”—1 Timo. 5:21.

Cakutaanguna, baanjelo aba teshi ba 144,000. Paulo ndyaakalembela Timoti nkalata, Beneklistu bananikitwe kabatana kutalika kubushikwa kuya kwiculu. Aboobo batumwi alimwi a Beneklistu bamwi bananikitwe tabakalinga “baanjelo basalitwe” mukwiinga paciindi ici kabatana kuba shilengwa shamushimu.—1 Koli. 15:​50-54; 1 Tesa. 4:​13-17; 1 Joni 3:2.

Alimwi “baanjelo basalitwe” inga tababi baanjelo abo bakapondokela Lesa, ndyakaleta Muyoba muciindi cakwe Nowa. Baanjelo abo bakaba kulubasu lwakwe Satana akuba shibanda alimwi bakalinga balwani bakwe Yesu. (Mata. 6:2; Luka 8:​30, 31; 2 Pit. 2:4) Kunembo Yesu alakubawaala mucilindi citeeli kwamyaaka 1,000, lyalo pesule balaakunyonyoolwa pomwi a Satana.—Judi 6; Ciyu. 20:​1-3, 10.

Aboobo “baanjelo basalitwe” balyeelete kuba baanjelo bali kwiculu abo basebensela pomwi a ‘Lesa a Klistu Yesu.’

Kwiculu kuli baanjelo baanji bashomeka. (Ebu. 12:​22, 23) Citoboneka ayi Yehova alapa baanjelo incito shipusenepusene. (Ciyu. 14:​17, 18) Kucakubonenaako, Yehova wakatuma munjelo womwibo kunyonyoola bashilumamba bene Asilya bali 185,000. (2 Baam. 19:35) Sombi mpashi mbaanjelo baanji bakapekwa ncito ya ‘kukusha bantu babisha babyaabo abamucita shibiibi boonse, mu Bwaami bwakwe Klistu.’ (Mate. 13:​39-41) Bamwi mpashi bakapekwa ncito ya ‘kubunganya bantu bakwe basalitwe’ kuya kwiculu. (Mate. 24:31) Alimwi baanjelo bamwi ‘balatushitilisha munshila shesu shoonse.’—Kulu. 91:11; Mate. 18:10; amweelanye a Mateyo 4:11; Luka 22:43.

Cilyeelete kwaamba ayi “baanjelo basalitwe” baambwa pa 1 Timoti 5:21 bakalinga bapekwa ncito yakucafwilisha kulama mabungano. Kweelana a makani Paulo ngaakalinga kwaambawo, wakapa butanjilishi kubamanene akulwiita bamu libungano ayi balyeelete kunoobalemeka. Paulo wakaamba ayi bamanene tabeelete kusalulula na kusuula bamwi nabi kusalawo shakucita kabatana kuyeeyawo cakubikila maano. Ceebo ciyandika ceelete kupa bamanene kukonkela maswi Paulo ngakaamba ncakwaamba ayi, balasebensela bashominyinaabo “pameenso akwe Lesa, Klistu Yesu alimwi abaanjelo basalitwe.” Aboobo baanjelo bamwi bakapekwa ncito yakucafwa mabungano mbuli kushitilisha basebenshi bakwe Lesa, kubacafwa muncito yakushimikila akulwiita Yehova nsheenga babona.—Mate. 18:10; Ciyu. 14:6.