Sa Mulayeeya Mbuli Yehova a Yesu Mbobayeeya?

1-2. (a) Ino kusuna Yehova kuleelikawo nshi? (b) Ino Yesu wakatondesha buyani ayi wakalinga kusuni Yehova amiyeeyo yakwe yoonse?

YESU wakaamba mulawo uyandika abuumbi pamilawo yakwe Lesa ndyakaamba ayi: ‘Suna Yehova Lesa wako amoyo wako woonse, abuumi bwako boonse, amiyeeyo yako yoonse alimwi ankusu shako shoonse.’ (Maako 12:30) Ici cilaamba ayi tulyeelete kusuna Yehova ashintu shoonse nshotucite. Ici cileelikaawo anshotusuna kucita, mbotulinyumfwa ankusu shesu. Alimwi tulyeelete kusuna Yehova amiyeeyo yesu yoonse. Cancine ncakwaamba ayi inga tatucikoonshi kunyumfwishisha miyeeyo yakwe Yehova yoonse. Sombi inga tweeya kunonyumfwishisha kabotu miyeeyo yakwe Lesa kwiinda mukwiiya “miyeeyo yakwe Klistu,” mukwiinga Yesu alayeeya mbuli Baishi alimwi alakonkela kabotu cakubonenaako cabo.—1 Koli. 2:16.

² Yesu wakalinga kusuni Yehova amiyeeyo yakwe yoonse. Yesu wakalinga kucishi Yehova nshaakalinga kusuni ayi acite, alimwi wakalinga kushinishite kucita kuyanda kwa Baishi nabi kwaamba ayi wakalinga kusa mukupenshekwa ceebo cakucita boobo. Ceebo cakwaamba ayi Yesu wakalinga kusunishishi kusangalasha Baishi, taakwe kusuminisha cili coonse kumupa kucileka kubikila maano kukusebensela Yehova.

3. Ino nciinshi mutumwi Pita ncaakeeya kuli Yesu, alimwi ino wakayuminisha Beneklistunyina kucita nshi? (1 Pita 4:1)

³ Pita abatumwi bamwi bakalinga kucite coolwe cibotu cakunooba pomwi a Yesu akwiiya mbwaakalinga kuyeeya. Munkalata yakutaanguna Pita njaakalemba kwiinda mukutanjililwa amushimu usalashi, wakayuminisha Beneklistu kuliyumya akuba amiyeeyo yakalinga kucite Klistu. (Amubelenge 1 Pita 4:1.) Mu ciGiliki, maswi akwaamba ayi “amwebo mulyeelete kuliyumya,” akalinga kusansulula bashilumamba banyamuna shilwanisho shabo kwaamba ayi baye ku nkoondo. Aboobo na Beneklistu beeya kunooyeeya mbuli Yesu, inga bacikonsha kukoma lunkumbwa luli loonse lutabete kabotu akukoma cishi cino citokweendeleshekwa a Satana.—2 Koli. 10:​3-5; Efe. 6:12.

4. Ino tutokwiiya nshi mumutwi uyu?

⁴ Mumutwi uyu, tutokwiiya Yesu mbwayeeya ambweenga twakonkela cakubonenaako cakwe. Cakubonenaako cakwe citootucafwa kushiba mbweenga tweeya (1) kunoyeeya mbuli Yehova mbwayeeya, (2) kuba baliceesha, alimwi (3) kunoyeeya kabotu kwiinda mukunopaila kuli Yehova kwaamba ayi atucaafwe.

MUNOYEEYA MBULI YEHOVA MBWAYEEYA

5. Ino nciinshi Pita ncaakacita paciindi cimwi cakatondesha ayi taakwe kuyeeya mbuli Yehova mbwaakalinga kuyeeya?

⁵ Amuyeeye paciindi cimwi Pita ndyaakaalilwa kuyeeya mbuli Yehova. Yesu wakalwiita batumwi bakwe ayi alaakuya ku Jelusalemu akwaabwa mumaansa abamatanjilili babupailishi, kupenshekwa, lyalo akucaikwa. (Mate. 16:21) Pita wakalinga kucishi ayi Yesu ngo Mesiya wakashomeshekwa uyo weshi akapulushe bantu bakwe Lesa. Aboobo cilyeelete cakamuyumina kushoma ayi Yehova inga wasuminisha Yesu kucaikwa. (Mate. 16:16) Aboobo wakatola Yesu palubasu akumulwiita ayi: ‘Amulinyumfwile nkuumbu Nkambo, ici tacikoonshi kumucitikila napaceyuubo!’ (Mate. 16:22) Paciindi ici, Yesu a Pita tabakwe kuba amuyeeyo womwi ceebo cakwaamba ayi Pita taakwe kuyeeya mbuli Yehova mbwakalinga kuyeeya.

6. Ino Yesu wakatondesha buyani ayi wakalinga kuyeeya mbuli Baishi?

⁶ Yesu lakwe wakalinga kuyeeya mbuli Baishi. Aboobo wakalwiita Pita ayi: “Koya kulaale webo Satana! Webo uli mfumpu kuli ndime ceebo miyeeyo yako iyo taiswi kuli Lesa sombi njabuntu.” (Mate. 16:23) Yesu wakalinga kucishi ayi alyeelete kupenshekwa akucaikwa, kwaamba ayi akumanishe kuyanda kwakwe Yehova. Aboobo wakakaka kukonkela Pita nshaakamulwiita, nabi kwaamba ayi Pita wakalinga kweelesha kumucafwa. Yesu ndyaakakaka, Pita wakashiba ayi wakalinga kweelete kwiiya kunoyeeya mbuli Yehova mbwayeeya. Ici nciiyo ciyandika aswebo ncotweelete kwiiya.

7. Ino Pita wakatondesha buyani ayi wakalinga kusuni kunoyeeya mbuli Yehova mbwayeeya? (Amubone cikope cili papeeji yakutaanguna.)

⁷ Mukuya kwaciindi, Pita wakatondesha ayi wakalinga kusuni kwiiya kunoyeeya mbuli Yehova mbwayeeya. Yehova wakalinga kusuni ayi baswamashi abalo babe kulubasu lwa bantu bakwe. Wakalwiita Pita kuya mukushimikila Konelyasi, uyo wakaba muswamashi wakutaanguna kuba Mwineklistu. BaJuda tabakalinga kunyumfwana bunene abaswamashi, aboobo Pita wakalinga kuyandika kwaalula mbwaakalinga kuyeeya kwaamba ayi acikoonshe kushimikila baswamashi. Pita ndyaakashiba Yehova mbwaakalinga kubona baswamashi, wakaalula mbwaakalinga kuyeeya. Aboobo Pita ndyebakamwiita kuli Konelyasi, taakwe kukaka kuya kumishaabo Konelyasi. (Milimo 10:​28, 29) Wakashimikila Konelyasi abamumukwashi wakwe, lyalo bakabombekwa.—Milimo 10:​21-23, 34, 35, 44-48.

8. Ino inga twatondesha buyani ayi tulayeeya mbuli Yehova mbwayeeya? (1 Pita 3:8)

⁸ Ndyepakeenda myaaka iinji, Pita wakayuminisha Beneklistunyina kuba “amuyeeyo womwi.” (Amubelenge 1 Pita 3:​8, NWT.) Ndyetutobelenga Baibo, tulashiba Yehova mbwayeeya. Aboobo inga twaba amuyeeyo womwi abamakwesu abenankashi na katuyeeya mbuli Yehova mbwayeeya. Kucakubonenaako, Yesu wakayuminisha bashikwiiya bakwe kubika sha Bwaami panembo mubuumi bwabo. (Mate. 6:33) Aboobo beshikushimikila bamwi mulibungano momubete, inga basalawo kutalika bupainiya na kusebensela Yehova muncito imwi yaciindi coonse. Tulyeelete kunokwaamba shibotu pa nsheenga basalawo kucita alimwi akunoobacafwa, muciindi cakubalwiita ayi inga bacitako shimwi mubuumi.

AMUBE BALICEESHA

9-10. Ino Yesu wakatondesha buyani ayi wakalinga kuliceesha abuumbi?

⁹ Yesu ndyaakalinga abatumwi bakwe mashiku kakucaalitebo paniini kwaamba ayi acaikwe, wakaiisha Pita abatumwi bamwi ciiyo ciyandika pamakani akuliceesha. Lisuba kalitana kupila, wakalinga watuma Pita a Joni kuya mukubamba cakulya cakweelaako ncaakalinga kusa mukulya pomwi ambabo kaatana kufwa. Cilyeelete kwaamba ayi bakabamba amaanshi akusamba kumaansa akumyeendo alimwi acisani cakulipukutisha kwaamba ayi basambe kushimpanta kabatana kulya. Ano ino ngani wakalinga kusa mukuliceesha akusansha bamwi kushimpanta?

¹⁰ Yesu taakwe kuwayawaya kusebensa ncito iyi. Wakatondesha ayi wakalinga kuliceesha abuumbi. Batumwi balyeelete bakakankamana kubona Yesu kaasebensa ncito liinji yakalinga kucitwa abasebenshi. Yesu wakafuula cakufwala cakwe capeculu, walyaanga cisani cakulipukutisha mubukome, wabika maanshi mwaakusambila akutalika kusansha bashikwiiya bakwe kushimpanta. (Joni 13:​4, 5) Cilyeelete pakeendako ciindi kwaamba ayi amanishe kusansha batumwi bakwe boonse bali 12 kwiilikaawo a Judasi uyo wakalinga kusa mukumwaaba. Nacibi boobo, cakuliceesha Yesu wakasebensa ncito iyi kushikila wamanisha. Lyalo cakukalika moyo, wakalwiita batumwi bakwe ayi: ‘Sa mwacinyumfwisha ncondaswa mukumucitila? Mwebo ndyemunjita ayi, ‘Mufundishi,’ nabi ayi ‘Nkambo,’ mulalulika mukwiinga mbombete ubo. Ono nebo ne Mwaami alimwi ne Mufundishi wanu, ndamusansha kushimpanta. Anu amwebo mulyeelete kunosanshanya kushimpanta.’—Joni 13:​12-14.

11. Ino Pita wakatondesha buyani ayi wakeeya kuliceesha? (1 Pita 5:5) (Amubone acikope.)

¹¹ Pita wakeeya kuliceesha kuswa kucakubonenaako cakwe Yesu. Pesule lyakwaamba ayi Yesu waboolela kwiculu, Pita wakacita caankamiko cakushilika musankwa wakalinga mulema kuswabo kukushalwa kwakwe. (Milimo 1:​8, 9; 3:​2, 6-8) Bantu baanji bakabona caankamiko Pita ncaakacita, aboobo bakabungana akumushinguluka. (Milimo 3:11) Sombi Pita taakalinga kusuniwo ayi bantu batalike kumulumbaisha, nabi kwaamba ayi paciindi cilya bantu bakalinga kubikila bunene maano ku kupuka. Wakaliceesha akulwiita bantu ayi balumbaishe Yehova a Yesu ndyaakabalwiita ayi: ‘Musankwa uyu ngomubwene alimwi ngomwishi, wayuma kwiinda muliina lyakwe Yesu akwiinda mulushomo ndotucite muliina lyakwe.’ (Milimo 3:​12-16) Ndyepakeenda ciindi, Pita wakalembela Beneklistu pamakani akuyandika kwa kuliceesha. Maswi amu ciGiliki ngaakasebensesha alasansulula kufwala kuliceesha anga ncakufwala. Maswi ayo inga atwiibalusha Yesu ncaakacita, ndyakalyaanga cisani cakulipukutisha akusansha batumwi bakwe kushimpanta.—Amubelenge 1 Pita 5:5.

12. Ino inga twacita buyani kwaamba ayi tukonkele cakubonenaako cakwe Pita akutolelela kweelesha kuba baliceesha?

¹² Aswebo inga twakonkela cakubonenaako cakwe Pita akutolelela kwiiya kuliceesha. Inga twatondesha ayi tulaliceesha kuteshibo kwiinda mushintu nshotwaamba. Maswi Pita ngaakasebensesha akasansululwa ayi “kuliceesha,” alatondesha ayi kuliceesha kuleelikaawo ambotulibona ambotubona bamwi. Tulasebensela bamwi ceebo cakwaamba ayi tulisuni Yehova abantu, kuteshi ayi bantu banotulumbaisha. Tulatondesha ayi tulaliceesha abuumbi na katusebensela Yehova abashominyineesu calusangalalo, nabi kwaamba ayi bamwi inga tabashibi nshotucita.—Mate. 6:​1-4.

AMUBE BANTU BAYEEYA KABOTU

13. Ino kuba muntu “uyeeya kabotu” cilaamba nshi?

¹³ Ino kuba muntu “uyeeya kabotu” cilaamba nshi? (1 Pit. 4:​7, NWT) Mwineklistu uyeeya kabotu alacita nsheenga wacikonsha kwaamba ayi anoosala shakucita shili kabotu sheendelana akuyeeya kwakwe Yehova. Mwineklistu wa mushobo uyo alashiba ayi cintu ciyandika abuumbi mubuumi, mbushicibusa bwakwe a Yehova. Alimwi alaleya kunoolibona anga aleendawo bamwi akunokwiibaluka ayi teshi shoonse nshacishi. Kwiilikaawo, alacinka manungo muli Yehova kwiinda mukunopaila lyoonse kuli nguwe kusenga butanjilishi.

14. Ino nciinshi Pita ncaakacita paciindi cimwi cakatondesha ayi taakwe kucinka manungo muli Yehova?

¹⁴ Mashiku Yesu kaatana kufwa, wakacenjesha bashikwiiya bakwe ayi: ‘Sunu lyeenka mashiku mwebo noonse mutonkaka akunshiya neenka.’ Pita wakakumbula cakutaloonda ayi: ‘Nabi boonse bakamukaake akumushiya, nebo teshi nkamushiyeewo!’ Lyalo mashiku eenka ayo Yesu wakalwiita bashikwiiya bakwe bamwi ayi: ‘Amwikale kamulibambite, akutolelela kupaila.’ (Mate. 26:​31, 33, 41) Pita taakwe kukonkela maswi aya Yesu ngaakaamba mukwiinga naakwiinga wakacita boobo, ni taakwe kuloonda kusumina ayi ngu shikwiiya wakwe Yesu. Sombi Pita wakakaka Yesu alimwi ndyaakacita boobo wakalinyumfwa cibiibi abuumbi.—Mate. 26:​69-75.

15. Ino Yesu wakatondesha buyani ayi wakalinga kuyeeya kabotu ndyekwakacaalabo bushiku bomwi kwaamba ayi afwe?

¹⁵ Yesu wakalinga kucinka manungo muli Yehova cakumaninina. Nabi kwaamba ayi Yesu wakalinga kumaninite, wakapaila mankanda aanji ndyekwakalinga kucaalitebo paniini kwaamba ayi afwe. Kucita boobo kwakamucafwa kutaloonda kucita kuyanda kwakwe Yehova. (Mate. 26:​39, 42, 44; Joni 18:​4, 5) Ncakutatoonsha kwaamba ayi Pita wakatolelela kwiibaluka ayi Yesu wakapaila mankanda aanji pabushiku bwakweelaako kaatana kufwa.

16. Ino Pita wakatondesha buyani ayi wakeeya kunoyeeya kabotu? (1 Pita 4:7)

¹⁶ Mukuya kwaciindi, Pita wakeeya kunoocinka manungo abuumbi muli Yehova kwiinda mukunopaila kuli nguwe. Yesu ndyaakabushikwa, wakalwiita Pita abatumwi bamwi ayi alaakubapa mushimu usalashi kwaamba ayi ukabacaafwe kukumanisha ncito yakushimikila makani abotu. Wakabalwiita ayi babe mu Jelusalemu akunoolindila kutambula mushimu usalashi. (Luka 24:49; Milimo 1:​4, 5) Ino nciinshi Pita ncakalinga kucita ndyaakalinga kulindila? Pita a Beneklistunyina ‘bakatolelela kupaila.’ (Milimo 1:​13, 14) Lyalo munkalata yakutaanguna Pita njaakalemba, wakayuminisha Beneklistunyina kuba bantu bayeeya kabotu akunoocinka manungo muli Yehova kwiinda mukupaila kuli nguwe. Wakaamba ayi: ‘Ono mamanino a shintu shoonse ali pafwiifwi. Paceebo ceeco, munooyeeya kabotu alimwi mucenjele, akutolelela kupaila.’ (1 Pita 4:​7, NWT) Pita wakeeya kucinka manungo muli Yehova alimwi wakalinga kucafwa akuyuminisha bashominyina.—Gala. 2:9.

17. Ino nciinshi ncotweelete kutolelela kucita? (Amubone acikope.)

¹⁷ Tulyeelete kunoopaila kuli Yehova lyoonse, kwaamba ayi tube bantu bayeeya kabotu. Tulyeelete kunoocita boobo kwaamba ayi atucaafwe nabi cilatubeta cuubu kucita shintu shimwi. Aboobo tulyeelete kunoosenga butanjilishi kuli Yehova, bunene bunene ndyetutosalawo shakucita shiyandika akushoma ayi alicishi kabotu sheenga shatucafwa.

18. Ino nciinshi ncomushinishite kucita?

¹⁸ Tulamulumba abuumbi Yehova ceebo cakwaamba ayi wakatulenga munshila yakwaamba ayi tunoocikonsha kutondesha mibo njaacite. (Mata. 1:26) Kwalo, inga tatucikonshi kukonkela cakubonenaako cakwe cakumaninina. (Isa. 55:9) Sombi bweenka mbuli Pita, atutolelele kwiiya kunoyeeya mbuli Yehova mbwayeeya, kuba baliceesha akuba bantu bayeeya kabotu.