“Amusale Sunu Nobeene Uyo Ngweshi Munoosebensela”

1. Ino nciinshi ncotweelete kucita kwaamba ayi tube alusangalalo lwancinencine, alimwi ino nceebonshi? (Isaya 48:​17, 18)

YEHOVA Ishiwesu wakwiculu alitusuni abuumbi, alimwi alisuni kwaamba ayi tube basangalete pacecino ciindi akunembo. (Shiku. 3:​12, 13) Wakatulenga munshila yakwaamba ayi katucikonsha kucita shintu shikankamika, sombi taakwe kutupa nkusu shakulyeendelesha nabi kulisalila cibotu acibiibi. (Shiku. 8:9; Jele. 10:23) Alishi kwaamba ayi tulyeelete kunomusebensela akumunyumfwila kwaamba ayi tube alusangalalo lwancinencine.—Amubelenge Isaya 48:​17, 18.

2. Ino Satana alisuni kwaamba ayi tunoshoma nshi, sombi ino nshiinshi Yehova nshaakacita?

² Satana alisuni kwaamba ayi tunoshoma ayi inga twaba alusangalalo na katulyeendelesha sobeene. Sombi ubo mbubeshi. (Mata. 3:​4, 5) Kwaamba ayi cibonekele patuba ayi Satana nshakaamba nshakubeca, Yehova wakasuminisha bantu kulyeendelesha kwaciindi ciniini. Soonsebo tutoobona ayi bantu baalilwa kulyeendelesha. Nacibi boobo, Baibo ilaamba pabasankwa abanakashi baanji bakalinga kusangalete ceebo cakusebensela Yehova. Pabaabo bakalinga kusebensela Yehova, Yesu Klistu ngowakalinga kwiinditeewo kuba alusangalalo. Aboobo amuleke tutaangune kubandika shakapa kwaamba ayi Yesu asaleewo kusebensela Yehova. Lyalo tutookwiiya sheelete kutupa kunolambila Yehova eenkabo. Mukweelaako, tutobandika pashimwi shitupa kusalaawo kusebensela Yehova.

INO NCEEBONSHI YESU WAKASALAAWO KUSEBENSELA YEHOVA?

3. Ino nciinshi Satana ncaakalwiita Yesu kucita, sombi ino nciinshi Yesu ncaakacita?

³ Yesu ndyaakalinga pacishi, lyoonse wakalinga kusalaawo kusebensela Yehova. Pesule lyakwaamba ayi wabombekwa, Satana wakamulwiita ayi atoomupa maleelo apacishi capanshi oonse na amulambilekobo linkanda lyomwi. Yesu wakakumbula ayi: “Swaawo apa Satana! Ceebo kulilembetwe ayi, ‘Ulyeelete kulambila Yehova Lesa wako alimwi akusebenselabo nguwe.’” (Mate. 4:​8-10) Ino nceebonshi Yesu wakasalaawo kunoosebensela Yehova eenkabo? Amuleke tubandike sheebo shimwi shakapa kwaamba ayi asaleewo kucita boobo.

4-5. Ino nsheebo nshi shimwi shakapa kwaamba ayi Yesu asaleewo kunoosebensela Yehova?

⁴ Cinene cakapa kwaamba ayi Yesu asaleewo kunoosebensela Yehova, nceebo cakwaamba ayi alibasuni abuumbi Baishi. (Joni 14:31) Kwiilikaawo, Yesu alasebensela Yehova ceebo cakwaamba ayi ngwaeelela kulambilwa. (Joni 8:​28, 29; Ciyu. 4:11) Alicishi ayi Yehova ngowakatupa buumi, inga twamushoma alimwi alatupa shintu shiinji shibotu. (Kulu. 33:4; 36:9; Jemu. 1:17) Lyoonse Yehova wakalinga kukumanisha nshaakalinga kushomesha Yesu alimwi ngowakamupa shintu shoonse nshaakalinga kucite. (Joni 1:14) Ano mubupusano a Yehova, Satana ngowakapa kwaamba ayi bantu banoofwa. Ngumubeshi alimwi alilisuni abuumbi. (Joni 8:44) Yesu wakalinga kumushi kabotu Yehova a Satana, sombi taakalinga kusuniiwo kuba mbuli Satana akupondokela Yehova.—Filip. 2:​5-8.

⁵ Cimwi cakapa kwaamba ayi Yesu asaleewo kunoosebensela Yehova, nkuyeeya pashibotu shakalinga kusa mukuswaamo. (Ebu. 12:2) Wakalinga kucishi ayi na watolelela kushomeka kuli Baishi, alaakusalasha liina lyabo akupa kwaamba ayi mapensho oonse Satana ngaakaleta amane.

INO NCEEBONSHI YEHOVA NGWAEELELA KULAMBILWA?

6-7. Ino nceebonshi bantu baanji munshiku shino tabasebenseli Yehova, sombi ino nceebonshi tulyeelete kumulambila?

⁶ Bantu baanji munshiku shino tabasebenseli Yehova ceebo cakwaamba ayi tabana kushiba mibo yakwe ibotu alimwi tabacishi shintu shoonse shibotu nshakabacitila. Ubu bweenka bantu Paulo mbwakashimikila ku Atenisi mbobakalinga. Abalo tabakalinga kumushiiwo Lesa.—Milimo 17:​19, 20, 30, 34.

⁷ Paulo wakalwiita bantu baku Atenisi ayi Lesa wancine “ngootupa buumi amuuya ngotuyoya alimwi ashintu shimwi shoonse.” Alimwi wakeelikaawo akwaamba ayi: “Kwiinda muli nguwe tulicite buumi, tuleenda alimwi akuba mbuli mbotubete.” Lesa ngu Mulengi weelela kulambilwa mukwiinga ngowakalenga “mishobo yoonse.”—Milimo 17:​25, 26, 28.

8. Ino nciinshi Yehova nceshi akabule kucita, alimwi ino wakatondesha buyani ayi alitusuni abuumbi?

⁸ Ceebo cakwaamba ayi Yehova ngu Mulengi alimwi ngu Mwaami wiinditewo mububumbo boonse, na kaasuni inga wakakatisha muntu uli woonse kwaamba ayi atalike kumusebensela. Nacibi boobo, Yehova teshi akakatishewo muntu nabi womwi. Muciindi cakucita boobo, alatupa bumboni butucafwa kushiba ayi nkwaali alimwi alitusuni abuumbi soonse. Alisuni ayi bantu baanji bakabe beshicibusa bakwe kwamuyayaya. (1 Timo. 2:​3, 4) Nceceeco Yehova wakatwiisha bwakusebensa kabotu muncito ya kulwiitaako bamwi pashintu shibotu nsheshi akacitile bantu kunembo. (Mate. 10:​11-13; 28:​19, 20) Alimwi wakatupa coolwe cakuba mumabungano kwaamba ayi tunoomulambila akucafwikwa kubamanene abo batusuni.—Milimo 20:28.

9. Ino Yehova alatondesha buyani ayi bantu alibasuni?

⁹ Yehova alatondesha lusuno nabi kubantu batashomi ayi nkwaali mukwiinga alabapa shintu shibotu. Amuyeeye paceeci: Kwamyaaka iinji yainda, bantu baanji balasalaawo kucita shintu nshobabona ayi shililuleme na ayi tashiluleme muciindi cakunoonyumfwila Yehova. Nacibi boobo, Yehova alabapa nshebayandika kwaamba ayi batolelele kuba abuumi akuba alusangalalo. (Mate. 5:​44, 45; Milimo 14:​16, 17) Ceebo calusuno ndwabatondesha, balacikonsha kuba abeshicibusa amukwashi ubasuni, kuba abaana, kusebensa, alimwi akusangalala mubuumi. (Kulu. 127:3; Shiku. 2:24) Yehova nshaacita shilatondesha patuba ayi alibasuni abuumbi bantu. (Kulo. 34:6) Amuleke tubandike pasheebo shimwi shitupa kusalaawo kusebensela Yehova ambwaabacafwa abo basalaawo kumusebensela.

SHITUPA KUSALAAWO KUSEBENSELA YEHOVA

10. (a) Ino nciinshi cinene citupa kusebensela Yehova? (Mateyo 22:37) (b) Ino Yehova alatondesha buyani ayi alamukalikila moyo? (Kulumbaisha 103:​13, 14)

¹⁰ Bweenka mbuli Yesu, cinene citupa kusebensela Yehova nceebo cakwaamba ayi tulimusuni abuumbi. (Amubelenge Mateyo 22:37.) Na tweeya pamibo Yehova njaacite, tulasuna kuba abushicibusa anguwe. Kucakubonenaako, amuyeeye Yehova mbwaatukalikila moyo. Nabi kwaamba ayi mankanda aanji bene Isilaeli tabakalinga kumunyumfwila, wakabasenga ayi: ‘Amuleke nshila shanu shibiibi.’ (Jele. 18:11) Yehova aleebaluka ayi tatumaninite. (Amubelenge Kulumbaisha 103:​13, 14.) Na mwayeeya pakufula kwa mankanda Yehova ngaakamulekelela, sa tacimuyuminishi kusuna kumusebensela kwamuyayaya?

11. Ino nshiinshi shimwi shitupa kusalaawo kusebensela Ishiwesu wakwiculu?

¹¹ Cimwi citupa kusalaawo kunoosebensela Yehova nceebo cakwaamba ayi ngwaeelela kulambilwa. (Mate. 4:10) Alimwi tulicishi ayi na twatolelela kushomeka kuli nguwe, kuli shibotu shiinji shiswaamo. Kucakubonenaako, tulapa kwaamba ayi liina lyakwe lisalashikwe, tulatondesha ayi Satana ngumubeshi akusangalasha Ishiwesu wakwiculu. Alimwi na twasalaawo kusebensela Yehova pacecino ciindi, tulaba acoolwe cakulangila kumusebensela kwamuyayaya!—Joni 17:3.

12-13. Ino mweeya nshi kuswa kucakubonenaako caba Jane aba Pam?

¹² Ndyetuli banike inga tweeya kusuna Yehova abuumbi, alimwi lusuno ulo inga kaluya ciyuminaako ndyetutooya cikula. Ishi nshoshakacitikila ba Jane aba Pam benankashi bobilo abo bakashalwa lifumo lyomwi.a Ndyebakatalika kwiiya Baibo, ba Jane bakalinga kucite myaaka 11 lyalo ba Pam bakalinga kucite myaaka 10. Nabi kwaamba ayi bashali babo tabakalinga kusuniiwo kwiiya Baibo, bakabasuminisha kunookwiiya a Bakamboni Bakwe Yehova kulilabo na kabaya akuceeci pomwi amukwashi. Ba Jane bakaamba ayi: “Bakamboni Bakwe Yehova nshobakanjiisha kuswa mu Baibo shakancafwa kuleya kusebensesha misamu ikola akucita bufuule mbuli mbobakalinga kucita beshicikolo baanji pacikolo mpondakalinga kwiiya.”

¹³ Ndyepakeenda myaaka iniini, ba Jane aba Pam bakabombekwa. Mukuya kwaciindi bakatalika bupainiya bwaciindi coonse akunoolama bashali babo bakalinga bacembela. Na bayeeya pashintu shoonse Yehova nshaakabacitila, ba Jane balaamba ayi: “Ndakashiba ayi Yehova alatolelela kulama beshicibusa bakwe. Alimwi kweelana a 2 Timoti 2:19 mboyaamba, ‘Yehova alishi baakwe.’” Ncakutatoonsha kwaamba ayi Yehova alabalama kabotu abo boonse basalaawo kumusebensela ceebo cakwaamba ayi balimusuni!

14. Ino inga twacita buyani kwaamba ayi twiimikanineeko Yehova? (Amubone ashikope.)

¹⁴ Tulisuni kwaamba ayi bamwi bashibe cancine pali Yehova. Kucakubonenaako, amuyeeye ayi mulicite shicibusa ulikabotu, ushikwaaba, alimwi ulekelela. Lyalo bushiku bumwi mwanyumfwa muntu umwi kaamba ayi shicibusa wanu uyo tabete kabotu alimwi tashomeki. Ino inga mwacita buyani? Inga mwamwiimikaninaako. Aswebo na twanyumfwa bantu kabaamba makani akubeca pali Yehova, tulamwiimikaninaako kwiinda mukubalwiita cancine pali nguwe. (Kulu. 34:1; Isa. 43:10) Aboobo na Yehova katumwiimikaninaako kwiinda mushintu nshotwaamba anshotucita, tulatondesha ayi tulisuni kumusebensela amoyo wesu woonse.

15. Ino nshiinshi shibotu shakacitikila Paulo pesule lyakwaamba ayi waalula buumi bwakwe? (Bene Filipi 3:​7, 8)

¹⁵ Tulasalaawo kwaalula buumi bwesu kwaamba ayi tusangalashe Yehova na kucita shiinji muncito yakwe. Kucakubonenaako, nabi kwaamba ayi Paulo wakalinga kucite mukuli uyandika mubupailishi bwa baJuda, wakasalaawo kushiya mukuli uyo kwaamba ayi abe shikwiiya wakwe Yesu akusebensela Yehova. (Gala. 1:14) Ceebo cakwaamba ayi wakacita boobo, wakacita shintu shiinji shibotu muncito yakwe Yehova alimwi wakaba acoolwe cakuya mukweendelesha pomwi a Klistu kwiculu. Taakwe kuyeeyawo kale ayi wakabisha kusalaawo kusebensela Yehova. Aswebo mbweshi cikabe na tulasebensela Yehova.—Amubelenge Bene Filipi 3:​7, 8.

16. Ino nshiinshi nshotweeya kuswa kucakubonenaako caba Julia? (Amubone ashikope.)

¹⁶ Na twabikila maano kukusebensela Yehova, alaakutupa shoolwe pacecino ciindi akunembo. Amuyeeye pacakubonenaako caba Julia. Ndyebakalinga banike abuumbi, bakalinga mukwaya ya kuceeci nkobakalinga kupaila. Bakalinga kwiimba kabotu cakwaamba ayi umwi wakatalika kubeeisha kuba shikwiimba ucishi kabotu abuumbi. Kapatana kwiinda aciindi cilaamfu, ba Julia bakapuka cakwaamba ayi bakatalika kunooya bwiimba mumisena ipukite abuumbi. Ndyebakalinga kucikolo cimwi cipukite bantu nkobeeya bwakwiimba, umwi ngobakalinga kwiiyaakwe wakatalika kubashimikilako pali Lesa, akubalwiita ayi liina lyakwe ngu Yehova. Ndyepakeendabo ciindi ciniini kuswawaawo, ba Julia bakatalika kwiiya Baibo mankanda obilo munsondo. Mukuya kwaciindi, bakasalaawo kubikila maano kukusebensela Yehova muciindi cakuba shikwiimba ucishi kabotu. Tacakalinga cuubu kuli mbabo kusalaawo kucita boobo. Ba Julia bakaamba ayi: “Bantu baanji bakalinga kundwiita ayi nshiciteewo maano ceebo cakucileka kwiimba kwaamba ayi nsebensele Yehova. Sombi ndakalinga kusuni kusebensela Yehova peela nkusu shangu.” Ino balalinyumfwa buyani pacecino ciindi pa ncobakasalaawo kucita myaaka 30 yainda? Bakaamba ayi: “Ndisangalete kwaamba ayi ndakasalaawo kusebensela Yehova alimwi ndicishi kwaamba ayi kunembo alaakumpa shoonse nshondila mumoyo.”—Kulu. 145:16.

AMUTOLELELE KUSEBENSELA YEHOVA

17. (a) Ino batana kutalika kusebensela Yehova balyeelete kucita nshi alimwi ino nceebonshi? (b) Ino nciinshi ncobacishi abo bakatalika kale kusebensela Lesa?

¹⁷ Kwacaalabo paniini kwaamba ayi mamanino acishi cino ashike. Mutumwi Paulo wakalemba ayi: ‘Kwacaalabo ciindi ciniini kwaamba ayi uyo weelete kusa ashike, alimwi teshi akacelweewo sobwe.’ (Ebu. 10:37) Ino maswi aya alasansulula nshi? Ciindi cacalaako kwaamba ayi bantu basaleewo kusebensela Yehova caceya, aboobo balyeelete kucitawo comwi cakufwambaana. (1 Koli. 7:29) Alimwi na twakatalika kale kusebensela Lesa, tulicishi ayi tulakwiinda mumapensho, sombi nkwaciindi ciniinibo.

18. Ino Yesu a Yehova balisuni ayi tunoocita nshi?

¹⁸ Yesu wakayuminisha bantu ayi na baba bashikwiiya bakwe, balyeelete kutolelela kumukonkela. (Mate. 16:24) Aboobo na twakatalika kale kale kusebensela Yehova, atube bashinishite kutolelela kumusebensela. Tulyeelete kusebensa cankusu kwaamba ayi tutolelele kumusebensela kweelana ambotwakamushomesha. Nabi kwaamba ayi kucita boobo inga tacibi cuubu, inga twaba alusangalalo akutambula shoolwe shiinji nabibo pacecino ciindi!—Kulu. 35:27.

19. Ino nshiinshi nshotweeya kuswa kuli Gene?

¹⁹ Bamwi balalinyumfwa ayi kusebensela Lesa kulayandika kulyaaba abuumbi. Na muli wacanike, sa mulalinyumfwa ayi inga mweendwa shintu shimwi na mwasalaawo kusebensela Yehova? Mukwesu wacanike waliina lya Gene wakaamba ayi: “Ndakalinga kulinyumfwa ayi kuba Kamboni wakwe Yehova kwakalinga kumpa kutaba alwaanguluko lwakucita shintu shiinji nsheenga kaansuni. Bacanike baanji babusela andime bakalinga kuya kumapaati, kucita bufuule, na kusekana magemu ashankoondo pa kompyuta, sombi nebo ciindi cinene ndakalinga kuba kumabungano amuncito yakushimikila.” Ino nshiinshi Gene nshaakacita ceebo cakulinyumfwa boobo? Wakaamba ayi: “Ndakatalika kucita shintu Yehova nshaatasuni alimwi ndakalinga kusangalete kwakaciindi. Sombi ndakatalika kuyeeya pa shibotu shiswaamo na kankonkela Baibo nshoyaamba. Lyalo ndakasalawo kusebensela Yehova camoyo woonse. Kuswabo paciindi ico, ndabona ayi Yehova alakumbula mipailo yangu lyoonse.”

20. Ino nciinshi ncotweelete kuba bashinishite kucita?

²⁰ Shikulumbaisha wakeembila Yehova ayi: ‘Alisangalete muntu uyo ngomwakasala akumuleta kwaamba ayi akale mumusena wanu usalalite.’ (Kulu. 65:4) Atube bashinishite kutolelela kusebensela Yehova bweenka mbuli Joshuwa uyo wakaamba ayi: ‘Sombi nebo abamuŋanda yangu, tunanoosebenselabo Yehova.’—Joshu. 24:15.