Sa Nshomwakataanguna Kwiiya mu Baibo Inga Shamucafwa Apacecino Ciindi?

1. Ino njiisho shakutaanguna shamu Baibo shakamucafwa buyani ndyemwakatalikabo kwiiya cancine?

NJIISHO shakutaanguna shamu Baibo shakatucafwa kwaalula buumi bwesu. Kucakubonenaako, ndyetwakeeya ayi liina lyakwe Lesa ngu Yehova, twakasalawo kuba abushicibusa anguwe. (Isa. 42:8) Ndyetwakeeya cancine pashicitika na muntu wafwa, twakacileka kuloonda bafu. (Shiku. 9:10) Alimwi ndyetwakeeya ayi Lesa alaakwaalula cishi kuba Paladaiso, twakacileka kulisukama pa buumi bwesu mbweshi bukabe kunembo. Twakashoma cakutatoonsha ayi tulaakukala kwamuyayaya, kuteshi kwamyaaka 70 na 80.—Kulu. 37:29; 90:10.

2. Ino lilembo lya 2 Pita 1:​12, 13 lilatondesha buyani ayi Beneklistu bashimpite lwakumushimu abalo inga bafubilaamo munjiisho shakutaanguna shamu Baibo?

² Tulyeelete kutolelela kunokwiibaluka ayi njiisho shakutaanguna shamu Baibo shilayandika abuumbi. Amuyeeye pa Beneklistu abo mutumwi Pita mbaakalembela nkalata yabili. Bakalinga Mbeneklistu bashimpite lwakumushimu. (Amubelenge 2 Pita 1:​12, 13.) Sombi paciindi ici, kwakalinga bantu bamwi babiibi mulibungano abo bakalinga kusuni kukusha Beneklistu mucancine. (2 Pit. 2:​1-3) Pita wakalinga kusuni kucafwa bashominyina kwaamba ayi batashomi njiisho shakubeca bamwi nshobakalinga kwiisha. Aboobo wakabebalusha makani amwi ngobakalinga kucishi kale. Makani ayo akalinga kusa mukubacafwa kutolelela kushomeka kuli Yehova.

3. Ino nceebonshi Beneklistu boonse balyeelete kutolelela kukutumana kuyeeya panjiisho shamu Baibo nshobakataanguna kwiiya? Amwaambe cakubonenaako.

³ Njiisho shakutaanguna shamu Baibo inga shatucafwa nabi twasebensela Yehova kwamyaaka iinji. Amuyeeye pacakubonenaako ici: Mushali mwanakashi ucishi kabotu kuteleka amwanaakwe mwanakashi utokwiiya kuteleka, inga bateleka shakulya shomwi. Sombi ceebo cakwaamba ayi banyina bakatalika kale kale kuteleka shakulya isho, balicishi kabotu bwa kushiteleka alimwi balashiteleka munshila shipusenepusene. Ubu bweenka mbocibete akulindiswe sotwasebensela Yehova kwamyaaka iinji. Inga tweeya shiiyo shipya kuswa ku malembo antu omwi mubupusano abaabo bakatalika conoono kwiiya Baibo. Mpashi bukaalo bwesu anshotucita muncito yakwe Yehova shakaaluka kuswa ciindi ndyetwakabombekwa. Na twayeeya pa nshotwakeeya mu Baibo kale kale, inga twacaana nshila shipya mbweenga twakonkela makani ayo mubukaalo mbotubeteemo. Amuleke tubandike nsheenga Beneklistu bashimpite lwakumushimu beeya kunjiisho shimwi shakutaanguna shamu Baibo shotatwe.

YEHOVA NGOWAKALENGA SHINTU SHOONSE

4. Ino kushiba ayi Yehova ngowakalenga shintu shoonse kwakatucafwa buyani?

⁴ Baibo ilaamba ayi: “Lesa ngomuyaki wa shintu shoonse.” (Ebu. 3:4) Tulicishi ayi Mulengi ucite busongo ankusu shiinditeewo ngowakalenga cishi capanshi ashintu shoonse shiliimo. Aswebo ngowakatulenga alimwi alitwishi kabotu. Alimwi ciinditeewo ncakwaamba ayi, alatubikilako maano. Alicishi kabotu sheenga shatucafwa. Kushibabo ayi Yehova ngowakalenga shintu shoonse, kwakaalula buumi bwesu akutucafwa kushiba ayi kuli ncotwakabetaako pacishi.

5. Ino nciinshi ceenga catucafwa kuba bantu baliceesha? (Isaya 45:​9-12)

⁵ Kushiba ayi Yehova ngowakalenga shintu shoonse, inga kwatucafwa akuba bantu baliceesha. Kucakubonenaako, paciindi cimwi Jobo wakaamba makani amwi ateshi ancine pali Yehova. Wakalubaako cakalinga kuyandika abuumbi akubikilabo maano pa mpuwo yakwe akutondesha ayi aliluleme. Sombi Yehova wakamucafwa kushiba ayi ngu Mulengi ucite nkusu shoonse. (Jobo 38:​1-4) Ici cakacafwa Jobo kushiba ayi lyoonse Yehova alacita shintu shiluleme. Mushinshimi Isaya alakwe wakaamba pacancine ici ayi: “Sa bulongo inga bwaambila shikubumba ayi: ‘Anu utoobumbanshi?’”—Amubelenge Isaya 45:​9-12.

6. Ino ndilili ndyetweelete kunoyeeya bunene pa busongo ankusu Mulengi wesu nshaacite? (Amubone ashikope.)

⁶ Na muntu wasebensela Yehova kwamyaaka iinji, inga watalika kushoma mu maano akwe muciindi cakunosenga butanjilishi kuli Yehova akubelenga Maswi akwe. (Jobo 37:​23, 24) Aboobo ino kukutumana kuyeeya pali Yehova Mulengi wakwe, alimwi apa busongo ankusu nshaacite inga kwamucafwa buyani? (Isa. 40:22; 55:​8, 9) Kuyeeya pacancine ici inga kwamucafwa kutolelela kuliceesha akunokwiibaluka ayi miyeeyo yakwe Yehova ilinditeewo abuumbi.

7. Ino nciinshi cakacafwa ba Rahela kusumina kwaaluka kumwi kwakacitwa mulibunga lyesu?

⁷ Kuyeeya pacancine cakwaamba ayi Yehova ngowakalenga shintu shoonse, kwakacafwa ba Rahela bakala ku Slovenia, kukonkela butanjilishi mbotwakatambula kuswa ku libunga lyesu. Bakaamba ayi: “Cimwi ciindi cilanjumina kukonkela butanjilishi mbweenga twatambula kuswa ku bamakwesu batanjilila. Kucakubonenaako, nabi pesule lyakwaamba ayi ndeebela vidyo ya Lipooti Namba 8 Yamu 2023 Kuswa ku Likoto Litanjilila, ndakakankamana abuumbi ndyendakabona mukwesu ucite ndesu kaamba likani. Aboobo ndakapaila kuli Yehova kwaamba ayi ancaafwe kusumina kwaaluka uku.” Ba Rahela bakesa mukushiba ayi ceebo cakwaamba ayi Yehova ngowakalenga liculu acishi, alicishi kabotu bwakutanjilila libunga lyakwe. Aboobo na citomuyumina kukonkela butanjilishi bumwi bupya na kwaaluka kwa mbotunyumfwishisha makani amwi amu Baibo, amucane ciindi cakukutumana kuyeeyawo abuumbi pa busongo ankusu Mulengi wanu nshaacite.—Loma. 11:​33-36.

LESA NCAASUMINISHILA MAPENSHO KUCITIKA

8. Ino kushiba Lesa ncaasuminishila mapensho kucitika, kwakatucafwa buyani?

⁸ Ino nceebonshi Lesa ncaasuminishila mapensho kucitika? Bamwi batacishiiwo cikumbulo kumwiipusho uyu, bakamupata Lesa na tabashomiiwo ayi nkwaali! (Tus. 19:3) Sombi mwebo mwakeeya ayi bantu balapenga akufwa ceebo ca bubi akutamaninina nkotwakapyana, kuteshi ayi Yehova ngwalengesha. Alimwi mwakeeya ayi ceebo cakwaamba ayi Yehova alakalika moyo, bantu baanji baba acoolwe cakwiiya palinguwe akushiba mbweshi akamane mapensho oonse ngotwiindaamo. (2 Pit. 3:​9, 15) Ndyemwakashiba cilengesha ayi Lesa anoosuminisha mapensho kucitika, mwakayuminishikwa akuba abushicibusa buyumu anguwe.

9. Ino mbukaalo nshi ndyeenga twayandika kuyeeya pa shilengesha ayi Yehova anoosuminisha mapensho kucitika?

⁹ Tulyeelete kukalika moyo ndyetutolindila ayi Yehova amane mapensho oonse ngotutokwiindaamo. Sombi na shikamukowa nabi shicibusa wesu wafwa, nabi na tweenda mubukaalo buyumu na kucitilwa shintu shitabete kabotu, inga twalinyumfwa cibiibi akutalika kubona anga Yehova atoocelwa kumana mapensho pacishi. Alimwi ubu bweenka mbweenga twalinyumfwa na ngu shikamukowa wesu utoopenga. (Abaku. 1:​2, 3) Na twalinyumfwa boobo, inga cabota kuyeeya pa shilengesha ayi Yehova anoosuminisha mapensho kucitika.a (Kulu. 34:19) Alimwi inga twayeeya apa cishomesho cakwe cakwaamba ayi kunembo alaakumana mapensho oonse kwamuyayaya.

10. Ino nciinshi cicafwa ba Anne kuba aluumuno lwa mumiyeeyo akuyuminishikwa na balinyumfwa cibiibi ceebo ca kufwitwa banyinawabo?

¹⁰ Kushiba cilengesha ayi Lesa anoosuminisha mapensho kucitika, inga kwatucafwa kuliyumya ndyetutokwiinda mubukaalo buyumu. Ba Anne bakala pansumbu ya Mayotte ili pa Lweenge lwa Indian bakaamba ayi: “Ndakalinyumfwa cibiibi abuumbi bama ndyebakafwa, myaaka iniini yainda. Nacibi boobo, liinji ndaliibalusha ayi Yehova teshi ngwalengesha ayi tunoopenga. Alisunishishi kumana mapensho oonse ngotwiindaamo akubusha beshikamukowa a beshicibusa besu bakafwa. Kukutumana kuyeeya pamakani aya kulancafwa kuba aluumuno lwa mumiyeeyo alimwi ndayuminishikwa abuumbi.”

11. Ino kushiba cilengesha ayi Lesa anoosuminisha mapensho kucitika, inga kwatucafwa buyani kutolelela kusebensa cankusu muncito yakushimikila?

¹¹ Kwiilikaawo, kushiba cilengesha ayi Lesa anoosuminisha mapensho kucitika, inga kwatucafwa kutolelela kusebensa cankusu muncito yakushimikila. Pesule lyakulemba ayi Yehova alatukalikila moyo mukwiinga alisuni ayi bantu baane kuswa kushibiibi kwaamba ayi bakapuluke, mutumwi Pita wakaamba ayi: ‘Mulyeelete kuba bantu basalalite alimwi basebensela Lesa cakulyaaba.’ (2 Pit. 3:11) Incito imwi njotusebensela Lesa cakulyaaba, nkushimikila. Aswebo bantu tulibasuni bweenka Ishiwesu mbwaabasuni. Tulisuni kwaamba ayi bakekale mucishi cipya cakwe Lesa umo mweshi mukabe bululami. Yehova atokalika moyo mukwiinga alisuni ayi bantu bakumusena nkomukala babe acoolwe cakutalika kumulambila. Mulicite coolwe cinene abuumbi cakusebensela pomwi a Lesa kwaamba ayi mucafwe bantu baanji kwiiya pali nguwe mamanino kaatana kusa!—1 Koli. 3:9.

TUTOKALA “MUNSHIKU SHAKWEELAAKO”

12. Ino kushiba ayi tutokala “munshiku shakweelaako” kulatucafwa buyani?

¹² Baibo yakaamba cakuteenda mweela bantu mbobabete ‘munshiku shino shakweelaako.’ (2 Timo. 3:​1-5) Na twaboona shintu bantu baanji nshobatoocita munshiku shino, tulashoma ayi Baibo nshoyakaamba nshancine. Bantu batooya cibicilaakobo mucishi. Alimwi ici cilatupa kushoma cakutatoonsha ayi shilembetwe mu Maswi akwe Lesa nshancine.—2 Timo. 3:​13-15.

13. Kweelana a cikoshanyo Yesu ncakaamba pa Luka 12:​15-21, ino njimiipusho nshi njotweelete kunoliipusha?

¹³ Kwiilikaawo, kushiba ayi tutokala munshiku shakweelaako kulatucafwa kusebensesha kabotu ciindi. Cikoshanyo Yesu ncaakaamba pa Luka 12:​15-21, inga catucafwa kushiba kuyandika kwa kusebensesha kabotu ciindi. (Amubelenge.) Ino nceebonshi musankwa wacanike bakamulwiita ayi “webo omuluya”? Teshi ceebo cakwaamba ayi wakalinga mubile, sombi nceebo cakwaamba ayi wakalinga kubikila maano kushintu shatakalinga kuyandika abuumbi. ‘Wakalibunjikila buboni, sombi kaatabiliteewo kuli Lesa.’ Ino nceebonshi musankwa uyu wakalinga kweelete kusebensesha kabotu ciindi ncaakalinga kucite? Lesa wakamwaambila ayi: “Sunu lyeenka mashiku utoofwa.” Ino cikoshanyo ici inga catucafwa buyani? Kwacaalabo paniini kwaamba ayi mamanino acishi cino ashike. Aboobo ncibotu kunooliipusha ayi: ‘Sa nshonsuni kucita shilatondesha ayi ndasebensesha kabotu ciindi cacaalaako? Ino nshiinshi nshonsuni kwaamba ayi bana bangu bakacite? Sa ndasebensesha nkusu shangu, ciindi alimwi amaali kulibunjikila buboni pano pacishi na kulibikila buboni kwiculu?’

14. Ino kunokwiibaluka ayi tutokala munshiku shakweelaako inga kwatucafwa buyani? Amwaambe cakubonenaako.

¹⁴ Kukutumana kuyeeyawo abuumbi pacancine cakwaamba ayi tutokala munshiku shakweelaako, inga kwatucafwa kusalawo kucita shintu shiyandika abuumbi. Ishi nshoshakacitika kuli Nankashi waliina lya Miki. Wakaamba ayi: “Ndyendakamanisha cikolo caku sekondali, ndakalinga kusunishishi kunosebensa ncito yeenga yancafwa kwiiya shiinji pashinyama. Sombi ndakalinga kusuni akusebensa bupainiya bwaciindi coonse akuya mukusebensela kumusena ubulishite. Beshicibusa bashimpite lwakumushimu bakancafwa kuyeeyawo abuumbi na inga cakonsheka kunosebensa ncito njondakalinga kusuni, akukumanisha nshondakalinga kusuni kucita lwakumushimu. Bakanjibalusha ayi cishi cino cilaakumana conoonobo, sombi mucishi cipya, ndaakuba acoolwe cakwiiya pashinyama shoonse kwamuyayaya. Aboobo ndakasalawo kwiiyako lwiiyo lumwi lutatoli ciindi cilaamfu, kwaamba ayi njiiye bwakusebensako ncito shimwi. Ici cakancafwa kucana ncito yakancafwa kunooba amaali akwene kuula shiyandika, akumpa ciindi cakusebensa bupainiya bwaciindi coonse. Lyalo mukuya kwaciindi, ndakalongela ku Ecuador mukusebensela kumusena ubulishite.” Pacecino ciindi, ba Miki abeebaabo balasebensa ncito yakufwakashila mabungano mucishi ici.

15. Ino cakubonenaako cakwe Jemusi inga catucafwa buyani kutacileka kushimikila bantu abo batasuniiwo kukutika kumakani abotu pacecino ciindi? (Amubone ashikope.)

¹⁵ Tatweelete kulefuka na pakutaanguna bantu bakaka kukutika ku makani abotu, mukwiinga inga baaluka. Amuyeeye pacakubonenaako cakwe Jemusi mukwabo Yesu wakucanaamo. Wakabonaako Yesu ndyaakalinga kukomena, ndyaakaba Mesiya ambwaakalinga kwiisha munshila inditeewo. Nacibi boobo, pakeenda myaaka iinji Jemusi kaatana kuba shikwiiya wakwe Yesu. Jemusi wakesa mukuba shikwiiya wakwe Yesu pesule lyakwaamba ayi Yesu wabushikwa. Alimwi wakaba shikwiiya usebensa cankusu!b (Joni 7:5; Gala. 2:9) Aboobo tamweelete kucileka kushimikila beshikamukowa banu abo batasuniiwo kwiiya Baibo pacecino ciindi, na bantu abo batakalinga kusuniiwo kubashimikila ndyemwakeelesha kucita boobo. Munokwiibaluka ayi tutokala munshiku shakweelaako, aboobo incito yakushimikila itoyandika kucitwa cakufwambaana. Kunembo bantu inga beebaluka nshemubalwiita akushikonkela, mpashi nabibo pesule lyakwaamba ayi mapensho anene atalika.c

AMUTOLELELE KULUMBA PANJIISHO SHAKUTAANGUNA SHAMU BAIBO

16. Ino njiisho shakutaanguna shamu Baibo shilamucafwa buyani? (Amubone akabokosi kacite mutwi utokwaamba ayi “Amusebenseshe Njiisho Shakutaanguna Shamu Baibo Kucafwako Bamwi.”)

¹⁶ Shakulya shakumushimu shimwi nshotutambula, shilabambilwa bantu batacishi shiinji pamakani amu Baibo. Kucakubonenaako, likani lya Baibo libaako nsondo ansondo, makani amwi alimwi amavidyo abikwa pa jw.org alimwi amamagazini akwaabila, alabambilwa bunene bantu bateshi Bakamboni. Nacibi boobo, aswebo tulafubilaamo mushakulya shakumushimu ishi. Shilatucafwa kusuna Yehova abuumbi, kuyumya lushomo lwesu mu Maswi akwe, akucishiba kabotu bwakusansulwiita bantu njiisho shakutaanguna, ndyetutoobaiisha cancine.—Kulu. 19:7.

17. Ino mbukaalo nshi ndyeenga twayandika kuyeeya panjiisho shakutaanguna shamu Baibo?

¹⁷ Sotwasebensela Yehova kwamyaaka iinji, tulasangalala abuumbi na kwaba kwaaluka kwa mbotunyumfwishisha makani amwi amu Baibo. Sombi tulalumba abuumbi a pakwiiya njiisho shakutaanguna shamu Baibo isho shakatucafwa kutalika kuba abushicibusa a Yehova. Kweelana ambotweeya, nshotwakeeya pakutaanguna inga shatucafwa nabibo pacecino ciindi. Na twatambula butanjilishi kuswa kulibunga lyesu sombi kacitubeta ciyumu kubukonkela ceebo cakubona anga tabubete kabotu, tulaliceesha akunookwiibaluka ayi Yehova Mulengi wesu uyo ucite busongo ankusu shiinditeewo, ngwaatotanjilila libunga lyakwe. Na tutokwiinda mubukaalo buyumu nabi na ngu shikamukowa na shicibusa wesu utoopenga, tulyeelete kukalika moyo akuyeeya pa shilengesha ayi Yehova anoosuminisha mapensho kucitika. Alimwi ndyetutosalawo bwakusebensesha ciindi ashintu shesu, tulyeelete kunokwiibaluka ayi tutokala munshiku shakweelaako alimwi kwacaalabo paniini kwaamba ayi mamanino ashike. Amuleke kwaamba ayi njiisho shakutaanguna shamu Baibo, shitolelele kutucafwa kuba basongo akutucafwa kutolelela kusebensela Yehova cakushomeka.