Bamakwesu Bobilo Abo Bakasalwa Kuba Bamu Likoto Litanjilila
PA 5 OCTOBER 2024, pakubungana kwapa mwaaka kwakalinga cakoolobesha cilibetele cakalinga kwaamba ayi Mukwesu Jody Jedele a Mukwesu Jacob Rumph basalwa kusebensa mu Likoto Litanjilila lya Bakamboni Bakwe Yehova. Bamakwesu boonse bobilo aba basebensela Yehova cakushomeka kwamyaaka iinji.
Ba Jody Jedele aba Damaris bakaabo
Mukwesu Jedele wakashalilwa ku Missouri, mu U.S.A. Alimwi wakakomenena mumukwashi wa Bakamboni. Bamumukwashi wakwe bakalinga kukala kumusena kwakalingabo Bakamboni Bakwe Yehova baniini. Aboobo wakashibana abamakwesu abenankashi baanji abo bakalinga kuswa mushishi shipusenepusene kusa mukushimikila kumusena uyo. Wakayuminishikwa ceebo cakubona lusuno alucatano ndobakalinga kutondeshanya. Wakabombekwa pa 15 October mu 1983. Wakalinga kusangalala kwaabanamo lubasu muncito yakushimikila alimwi ndyaakamanisha cikolo, wakatalika bupainiya bwaciindi coonse mu September 1989.
Mukwesu Jedele ndyaakalinga cikula bwangu, bashali bakwe bakalinga kuyaakwe pomwi amwanike wakwe mwanakashi mukufwakasha ku Bethel. Kufwakasha uku kwakayuminisha Mukwesu Jedele amwanike wakwe mwanakashi kusunishisha kuya mukusebensela pa Bethel. Alimwi ubo mbobakacita. Mu September 1990, Mukwesu Jedele bakamwiita kutalika kusebensela pa Bethel ku Wallkill. Ndyaakashika pa Bethel wakatalika kusebensela ku Dipatimenti Ilanga Pamakani Akubotesha, lyalo mukuya kwaciindi wakatalika kusebensela ku Dipatimenti Ilanga Pamakani Ashakucipatela.
Mukuya kwaciindi, mabungano akalinga kusebensesha ciSpanish ayo akalinga pafwiifwi a Bethel akatalika kuya panembo cakwaamba ayi kwakalinga kuyandika bamakwesu bakutanjilila. Aboobo Mukwesu Jedele wakatalika kubungana mulibungano lyomwi pamabungano ayo akutalika kwiiya ciSpanish. Ndyepakeendabo ciindi ciniini, wakatalika kushibana anankashi waliina lya Damaris, uyo wakalinga kusebensa bupainiya. Mukuya kwaciindi bakeebana, alimwi bakatalika kusebensela pomwi pa Bethel mbuli beebene.
Mu 2005, bakacileka kusebensela pa Bethel kwaamba ayi baye mukulama bashali babo. Paciindi ndyebakalinga kulama bashali babo, bakalinga kusebensa bupainiya bwaciindi coonse. Alimwi Mukwesu Jedele wakalinga kucafwilisha kwiisha mu Cikolo ca Bapainiya, kusebensela Mukomiti ipa Lucafwo Pamakani Akucipatela alimwi amu Komiti Ilanga Pashakuyaka Mumisena Ipusenepusene.
Mu 2013 Mukwesu Anankashi Jedele bakabeeta alimwi kuya mukusebensela pa Bethel kwaamba ayi bacafwilishe muncito yakuyaka maofesi esu anene ku Warwick. Lyalo mukuya kwaciindi bakasebenselawo aku Patterson alimwi aku Wallkill. Mukwesu Jedele wakasebenselawo amu Dipatimenti ya Local Design/Construction alimwi aya Hospital Information Services. Mu March 2023, wakasalwa kusebensa mbuli shikucafwilisha Mukomiti ya Ncito. Na wayeeya pa ncito nshaakalinga kupekwa alaamba ayi: “Na wapekwa ncito ipya cimwi ciindi inga waloonda. Sombi ncociindi ndyoweelete kucinka manungo muli Yehova mukwiinga ngoopa kwaamba ayi tucikonshe kucita nsheenga watulwiita kucita.”
Ba Jacob Rumph aba Inga bakaabo
Mukwesu Rumph wakashalilwa ku California, mu U.S.A. Paciindi ndyakalinga mwanike banyina bakalinga baboolela pesule lwakumushimu. Nacibi boobo, bakalinga kweelesha cankusu kumwiisha cancine camu Baibo. Alimwi mwaaka amwaaka wakalinga kufwakashila bankambiyakwe banakashi abo bakalinga kushimpite lwakumushimu. Bakamucafwa kusunisha kwiiya Baibo, lyalo ndyaakakwanisha myaaka 13 wakasalawo kutalika kwiiya Baibo. Pa 27 September, 1992 wakabombekwa. Cisangalasha ncakwaamba ayi banyina bakatalika alimwi kucita kabotu lwakumushimu. Alimwi mwanike wakwe musankwa amwanakashi pomwi abaishiwabo, bakatalika kuya panembo lwakumushimu akubombekwa.
Kaacili cikula bwangu, Mukwesu Rumph lyoonse wakalinga kubona bapainiya mbobakalinga kusangalete. Aboobo ndyaakamanisha cikolo wakatalika kusebensa bupainiya bwaciindi coonse mu September 1995. Mu 2000 wakaya mukusebensela kumusena ubulishite ku Ecuador. Ndyakalinga kusebensela kucishi ici wakatalika kushibana anankashi painiya waliina lya Inga, uyo wakaswa ku Canada. Lyalo mukuya kwaciindi bakeebana. Pesule lyakweebana, bakatalika kusebensela mutauni imwi mu Ecuador umo mwakalinga kakoto kakalinga kucite beshikushimikila baniini. Pacecino ciindi, kakaba libungano alimwi muli beshikushimikila baanji.
Mukuya kwaciindi, Mukwesu Anankashi Rumph bakasalwa kusebensa mbuli bapainiya balibetele. Ndyepakeenda ciindi bakatalika kusebensa ncito yakufwakashila mabungano. Lyalo mu 2011 bakabeeta kuya mukucanika ku Cikolo ca Gilyadi ca namba 132. Pesule lyakumanisha cikolo, bakasebensela mushishi shipusenepusene alimwi bakasangalala kusebenselako pa Bethel, kusebensako bumishonali amuncito ya kufwakashila mabungano. Alimwi Mukwesu Rumph wakabaako acoolwe cakwiishako mu Cikolo ca Bashimikila sha Bwaami.
Bulwashi bwa COVID-19 ndyebwakatalika, Mukwesu Anankashi Rumph bakaboolela ku United States. Bakabeeta kuya mukusebensela ku Bethel yaku Wallkill, lyalo Mukwesu Rumph bakatalika kumwiisha bwakusebensa ncito shicitwa mu Dipatimenti ya Ncito. Mukuya kwaciindi, bakabatuma alimwi kuya mukusebensela kumusampi waku Ecuador, lyalo Mukwesu Rumph wakatalika kusebensela Mukomiti Yamusampi. Mu 2023 bakabatuma kuya mukusebensela ku Warwick. Mu January 2024, Mukwesu Rumph wakasalwa kusebensa mbuli shikucafwilisha Mukomiti ya Ncito. Na wayeeya pancito nshaakasebensa alaamba ayi, “Cipa kwaamba ayi incito ibe ilibetele teshi musena nkoobete, sombi mbantu mbweenga koosebensela.”
Tulalumba pa kusebensa cankusu kwa bamakwesu aba, alimwi ‘bantu bamushobo wooyu tulabalemeka.’—Filip. 2:29.