Kabokosi Kaniini Mbokacafwa Bantu Kutolelela Kuba a Lushomo Luyumu

Munshiku shino, Bakamboni Bakwe Yehova balatambula mabuku aamba shamu Baibo alimwi amavidyo aanji akusebensesha pa makompyuta, matabuleti alimwi a mafooni kwiinda kale kale. Sombi mumisena iinji, bamakwesu tabacikoonshi kucita konekiti ku intaneti. Bamwi balekala mumisena intaneti moitasebensi kabotu na mutaamuwo intaneti.

Nacibi boobo, pacecino ciindi bamakwesu abenankashi baanji inga bacikonsha kucita dauniloodi mabuku nabi kwakubula intaneti! Ino ici cilakonsheka buyani?

Kabokosi ka JW, nkabokosi kaniini katumwa kumabungano intaneti nkoishupa. Tumabokosi twa JW balatuula kumakampani eshi kupanga shisebesensho shakucita konekiti ku intaneti. Alimwi tulapangwa munshila yakwaamba ayi bantu inga bacikonsha kucita konekiti kusebensesha fooni, kompyuta nabi tabuleti kwakubula intaneti. Tulaba a pulogilamu njobabikaamo bamu Dipatimenti yama Kompyuta yaku bethel alimwi amabuku amavidyo apa jw.org. Kabokosi komwi akomwi kaloolwa pafwiifwi amadola aku America ashika ku 75.

Bamakwesu abenankashi balacita konekiti ku kabokosi ka JW kusebensesha mafooni na matabuleti alimwi akucita dauniloodi mabuku amavidyo ndyebali pa Ŋanda ya Bwaami. Nabibo baabo bacite mafooni akale kale na atadulite inga bacikonsha kucita konekiti. Ino balabikaamo buyani mabuku apya mu kabokosi ka JW na libungano lili kumusena kutaakuwo intaneti? Ciindi aciindi baku musampi balatuma ma fulashi ngobabikaamo mabuku alimwi amavidyo apya apa jw.org ayo ngeenga babika mukabokosi ka JW. Fulashi yomwi ayomwi iloolwa madola aku America ashika ku 4.

Ino tubokosi twa JW twabacafwa buyani bamakwesu abenankashi? Mukwesu Nathan Adruandra, mushali musankwa ukala ku Democratic Republic of Congo, wakaamba ayi: “Kwaciindi cilaamfu ndakeelesha kucita dauniloodi vidyo ya ‘O Yehova, . . . Ndashoma Muli Ndiwe’ alimwi aya Amwiibaluke Muka Loti. Sombi nshikwe kucikonsha kucita dauniloodi, aboobo ndakalinyumfwa cibiibi. Pacecino ciindi inga ndacikonsha kucita dauniloodi mavidyo pafooni alimwi ici cilatucafwa mbuli bashali kwiisha kabotu bana besu.”

Mukwesu ucafwilisha mabungano aku Nigeria kubamba kabokosi ka JW kwaamba ayi katalike kusebensa, wakaamba ayi: “Bamakwesu balabona kabokosi ka JW mbuli cipo cilibetele kuswa kuli Yehova. Balisangalete kwaamba ayi inga bacikonsha ano kucita dauniloodi mabuku alimwi amavidyo Ngotusebensesha Ndyetutokwiisha.”

Tubokosi twiindilila 1,700 twakatumwa kubamakwesu mu Africa, Oceania, alimwi aku South America. Alimwi kuli abubaambo bwakwaamba ayi atumwi tukatumwe kumabungano aamwi aanji. Ino maali asebenseshekwa kuula tumabokosi twa JW alaswa kuli? Tulasebensesha maali apekwa kucafwilisha ncito yansengwe yoonse alimwi baanji balapa maali aya kwiinda mukusebensesha donate.jw.org. Tulalumba abuumbi pamaali oonse ngomupa mukuliyandila.