Munootondesha ayi tamuyumininibo pacintu comwi kwiinda mushintu nshemucita. Amuliipushe ayi: ‘Sa bantu balambona ayi ndimuntu utayumininibo pacintu comwi alimwi ulibambite kwaaluka? Na sa balambona ayi ndimuntu uyumininabo pacintu comwi alimwi utaaluki? Sa ndakutika kushaamba bamwi akukonkela nshobasalawo kucita na kaceelela?’ Kutayuminina pashintu inga kwatondesha na tulakonkela cakubonenaako cakwe Yehova a Yesu nabi sobwe. Tatweelete kuyumininabo pacintu comwi na shintu shaaluka mubuumi bwesu. Na shintu shaaluka mubuumi bwesu inga twatalika kwiinda mumapensho ngotwatalinga kuyeeyela. Kucakubonenaako, mpashi inga twaciswa cakutengashila. Na mpashi cakutengashila inga twalicana mulipensho lyakubula maali, na mpashi shintu inga shatuyumina mubuumi bwesu ceebo cakwaaluka kwa mfulumeende. (Shiku. 9:11) Alimwi inga catuyumina na libunga lyatupa incito imwi na kutulwiita kuya mukusebensela kumusena kumwi. Inga twacikonsha kushibila bukaalo bupya na twaciita shintu shili 4 shitokonkelaawo: (1) amusumine kwaaluka kwa shintu, (2) munooyeeya nsheshi munoocita kuteshi nshomwakalinga kucita, (3) amubikile maano kushintu shibotu, alimwi (4) amucafweko bamwi. w23.07 mape. 21-22 mapa. 7-8

Mushinshimi Danyelo wakalinga musankwa wacanike paciindi ndyaakatolwa mubusha ku Babiloni, musena wakalinga kulaale abuumbi aku Jelusalemu kumishaabo. Nabi kwaamba ayi Danyelo wakalinga wacanike, bacinenenene ba bene Babiloni bakalinga kumusuni. Bakabona ayi wakalinga kuboneka kabotu alimwi ayi wakashalilwa mumukwashi wa baami. (1 Samwe. 16:7) Aboobo bene Babiloni bakamwiisha kwaamba ayi inga watalika kusebensela muŋanda ya mwaami. (Danye. 1:​3, 4, 6) Yehova wakalinga kumusuni Danyelo ceebo ca nshaakasalawo kucita mubuumi. Cancine ncakwaamba ayi, Yehova ndyakaamba ayi Danyelo wakalinga kushomeka bweenka mbuli Nowa a Jobo, mpashi Danyelo wakalinga kucitebo myaaka pafwiifwi a 20. Aboobo Yehova wakalinga kubona ayi Danyelo musankwa wacanike, wakalinga kululeme bweenka mbuli Nowa a Jobo, abo bakamusebensela cakushomeka kwamyaaka iinji. (Mata. 5:32; 6:​9, 10; Jobo 42:​16, 17; Esek. 14:14) Alimwi Danyelo wakalinga muntu usunikwi kuli Yehova, mubuumi bwakwe boonse.—Danye. 10:​11, 19. w23.08 pe. 2 mapa. 1-2

Na mulisuni kuula ŋanda, inga mwasuna kushiba kabotu ŋanda njomusuni kuula mboibete. Ishi nsheenga twaciita ndyetutobelenga akwiiya Baibo. Na kamubelenga Baibo calubilo, inga mweeyabo ‘shiiyo shitaanshi shamu maswi asalalite akwe Lesa.’ (Ebu. 5:12) Sombi bweenka mbweenga mwasuna kushiba kabotu ŋanda njomusuni kuula, mulayandika kwiiya Maswi akwe Lesa cakubikila maano kwaamba ayi mwaanyumfwishishe kabotu. Nshila ibotu mbweenga mweeya Maswi akwe Lesa, nkubona makani ngomutobelenga mbwatokweendelana amakani ngomushi kale. Amweeleshe kunyumfwishisha makani ngomushoma, acimupa kushoma makani ayo. Kwaamba ayi tunyumfwishishe kabotu makani ali mu Baibo, kuli makani amwi ngotweelete kwiiya cakubikila maano. Mutumwi Paulo wakayuminisha bashominyina kwiiya Maswi akwe Lesa cakubikila maano kwaamba ayi bacikoonshe “kunyumfwishisha bufwiifwi, bulaamfu, kuya mwiculu alimwi akuya panshi kwa cancine.” Kucita boobo kwakalinga kusa mukubacafwa ‘kushimpa miyanda’ mulushomo. (Efe. 3:​14-19) Aswebo mbotweelete kunocita. w23.10 pe. 18 mapa. 1-3