Makani Akusebensesha amu Kabuku Kamabungano Abuumi Anciito
MARCH 4-10
BUBONI BUCANIKA MUMASWI AKWE LESA | BENE LOMA 12-14
“Mbweenga Twatondesha Lusuno lwa Bwineklistu”
(Bene Loma 12:10) Amusunane cancinencine mbuli bana bankashi. Akunoolibambite kupana bulemu.
it-1-E 55
Kutondesha Lusuno
Soonse mulibungano tulyeelete kutondesha lusuno lwa banabankashi (Muci Giliki liswi lyakwaamba ayi, phi·la·del·phiʹa, lilasansulula, “kusuna mukwanu”) (Loma. 12:10; Ebu. 13:1; amubone a 1 Pita 3:8.) Aboobo soonse mulibungano tulyeelete kunonyumfwana akuba abushicibusa buyumu bweenka mbuli mbotunyumfwana akusunana abeshikamukowa besu. Alimwi nabi kwaamba ayi twakatalika kale kucita boobo mulibungano, tulyeelete kutolelela akuya panembo.—1 Tesa. 4:9, 10.
Liswi lyamuci Giliki lyakwaamba ayi phi·loʹstor·gos, lisansulula “kubikila maano,” lilasebenseshekwa kusansulula muntu unyumfwana abuumbi amuntu umwi. Liswi ili lyakaswa ku liswi lyakwaamba ayi sterʹgo, ilyo liinji lisebenseshekwa kusansulula lusuno lutondeshekwa mumukwashi. Uyo ngomubo mutumwi Paulo ngwakalinga kuyuminisha Beneklistu kubaawo. (Loma. 12:10) Paulo wakatondesha ayi munshiku shakweelaako bantu baanji balaakuba “batacite lusuno” (Muci Giliki., aʹstor·goi) alimwi bantu ba mushobo uyo tabeeleli kuba abuumi.—2 Timo. 3:3; Loma. 1:31, 32.
(Bene Loma 12:17-19) Muntu na wakubishisha, webo tooelete kumubishisha. Amubikile maano kushintu bantu boonse nshobabona ayi nshibotu. 18 Na kacikonsheka mulyeelete kwikala muluumuno abantu boonse. 19 Nobamakwesu bubi tabeelanishi, sombi mwebo amulekelebo Lesa; mukwiinga kulilembetwe ayi: “‘“Amubaleeke ndime mboosha shishole, ndaakubapa milandu abalo,’ Yehova mbwaamba.”
w09-CG 10/15 pe. 8 pala. 3
‘Amukale Muluumuno Abantu Boonse’
3 Amubelenge Bene Loma 12:17. Paulo wakaamba ayi ndyetutopenshekwa, tatweelete kubooshesha cibiibi. Kukonkela maswi aya kulayandika abuumbi bunene bunene kubaabo babete mumikwashi mobapusene nkobapaila. Mwineklistu ubete mumukwashi uli boobo taeelete kubooshesha maswi atabete kabotu na kucita shintu shibiibi kwaamba ayi abooshe cishole. Kuboosha ‘cibiibi pacibiibi’ takucafwiwo. Kucita boobo kulalengeshabo shintu kubicilaako.
w07-CG 7/1 mape. 24-25 mapa. 12-13
“Mutaboosheshi Cibiibi Pacibiibi”
12 Kwaamba pa mbotweelete kucita shintu abakamboni alimwi abaabo bateshi bakamboni, Paulo wakaamba ayi : “Mutaboosheshi cibiibi pacibiibi.” Maswi aya alicatene anshakaamba pakutaanguna ayi: “Amupate bubi.” Mukwiinga muntu inga taambi ayi alipatite bubi na kabooshesha bamwi cibiibi. Kucita boobo kulipusene abuumbi akutondesha lusuno “lwancinencine.” Lyalo Paulo wakaamba ayi: “Amubikile maano kushintu bantu boonse nshobabona ayi nshibotu.” (Bene Loma 12:9, 17) Ino maswi aya inga twaasebensesha buyani?
13 Munkalata njaakalembela bene Kolinto, Paulo wakalemba sha batumwi mbobakapenshekwa. Wakaamba ayi: “Twaba anga ncintu cakweebela kushilengwa shoonse, kubantu, alimwi abaanjelo boonse. . . . Na bantu batushingana, tulasenga Lesa kwaamba ayi abape coolwe; ndyetutopenshekwa tulaliyumya cakukalika moyo; ciindi ndibatubekesha tulabakumbulabo mumaswi abombu.” (1 Bene Kolinto 4:9-13) Ncomwi comwibo amunshiku shino, Beneklistu bancinencine baleebelwa abantu bamucishi cino. Na bantu babona shibotu nshetucita nabi ndyetutoopenshekwa, inga basuna kwiiya makani abotu ngotushimikila.—1 Pita 2:12.
(Bene Loma 12:20, 21) Tamweelete kweelanisha bubi, sombi mulyeelete kucita bwaamba Malembo akwe Lesa ayi, “Na mulwani wako wanyumfwa nsala, mutebete, na wanyumfwa nyotwa mupe cakunwa. Mukwiinga mukucita boobo ulalundika makalangasha amulilo pamutwi wakwe.” 21 Mutaleekeli cibiibi kumukoma, sombi amutolelele kukoma cibiibi kwiinda mukucita shibotu.
w12-CG 11/15 pe. 29 pala. 13
Kamulekelelana Camoyo Woonse
13 Cimwi ciindi muntu uteshi Kamboni inga wamukalasha. Na caba boobo mpashi inga mwamucafwa kushiba Baibo nshoiisha. Mutumwi Paulo wakalemba ayi: “‘Na mulwani wako wanyumfwa nsala, mutebete, na wanyumfwa nyotwa mupe cakunwa; Mukwiinga mukucita boobo ulalundika makalangasha amulilo pamutwi wakwe.’ Mutaleekeli cibiibi kumukoma, sombi amutolelele kukoma cibiibi kwiinda mukucita shibotu.” (Loma. 12:20, 21) Na kamutondesha bulemu nabi muntu ndyamukalasha, inga mwamucafwa alakwe kuba muntu uli kabotu. Na kamutondesha nkumbu akuyeeyelaako muntu wamukalasha, inga mwapa kwaamba ayi muntu uyo atalike kwiiya cancine camu Baibo. Muli moonse mweenga cabeta, bulemu bwanu inga bwacafwa muntu uyo kuyeeya pamibo yanu ibotu.—1 Pita 2:12; 3:16.
Kulangoola Buboni Bwakumushimu
(Bene Loma 12:1) Ono nobamakwesu, ndamusenga kwiinda munkumbu shakwe Lesa, kwaamba ayi amubenge mibili yanu mbuli mulambu uumi kuli Lesa, usalalite alimwi umusangalasha, nkokwaamba ayi incito ilibetele njomusebensa kwiinda mukusebensesha maano.
lvs-CG mape. 76-77 mapa. 5-6
Mbweenga Twasala Shakulikondelesha
5 Cili coonse ncetucita mubuumi bwesu cilakuma kupaila kwesu. Paulo wakasansulula makani aya ndyaakaamba ayi: “Amubenge mibili yanu mbuli mulambu uumi kuli Lesa, usalalite alimwi umusangalasha.” (Bene Loma 12:1) Yesu wakaamba ayi: “ulyeelete kusuna Yehova Lesa wako amoyo wako woonse, abuumi bwako boonse, amiyeeyo yako yoonse alimwi ankusu shako shoonse.” (Maako 12:30) Lyoonse tulisuni kupa Yehova shintu shibotu kwiindaawo. Muciindi ca bene Isilaeli bantu ndyebakalinga kweelete kubenga milambu ya nyama kuli Yehova, bakalinga kweelete kubenga nyama shili kabotu. Na nyama iyo taibete kabotu, Lesa taakalinga kwiitambula. (Lefi 22:18-20) Amunshiku shino shintu shimwi inga shapa kwaamba ayi Yehova akake kupaila kwesu. Munshila nshi?
6 Yehova alatulwiita ayi: “Mulyeelete kuba basalalite, mukwiinga nebo ndisalalite.” (1 Pita 1:14-16; 2 Pita 3:11) Yehova inga watambulabo kupaila kwesu na kakusalalite. (Dutolonomi 15:21) Kupaila kwesu inga takubi kusalalite na katucita shintu Yehova nshaapatite, mbuli kutalilemeka na shintu shikumite shamishimu. (Bene Loma 6:12-14; 8:13) Alimwi inga twamukalasha na katulikondelesha ashintu sha mushobo uyo. Ici inga capa kwaamba ayi kupaila kwesu kube kutasalalite akukalasha Yehova alimwi ici inga canyonyoola bushicibusa bwesu anguwe.
(Bene Loma 13:1) Muntu uli woonse kalibombya kubeendeleshi, mukwiinga taakuwo bweendeleshi bweenga bwabaako kwakubula kusuminishikwa a Lesa; beendeleshi abo bali mushuuna shipusene pusene bakasuminishikwa a Lesa.
w08-CG 6/15 pe. 31 pala. 4
Shiteente Shinene Kuswa Mulibuku lya Bene Loma
13:1—Ino beendeleshi abo bali mushuuna shipusene pusene “bakasuminishikwa a Lesa” munshila nshi? “Beendeleshi abo bali mushuuna shipusene pusene bakasuminishikwa a Lesa” munshila yakwaamba ayi Lesa wasuminisha kwaamba ayi banokweendelesha, alimwi cimwi ciindi Lesa wakalinga kushibila limwi sha bweendeleshi bwabo. Ici cilatondesha Baibo mboyakaambila limwi sha bamwi bakalinga kusa mukuba beendeleshi.
Kubelenga Baibo: (Bene Loma 13:1-14)
MARCH 11-17
BUBONI BUCANIKA MUMASWI AKWE LESA | BENE LOMA 15-16
“Amushome Yehova Kwaamba ayi Amuyuminishe Akumucafwa Kuliyumya”
(Bene Loma 15:4) Mukwiinga shintu shoonse shakalembwa kale kale shakalembelwa kutwiisha, kwaamba ayi kwiinda mukuliyumya kwesu alimwi akwiinda mukuyuminishikwa kuswa muMalembo tube abulindilishi.
w17-CG.07 pe. 14 pala. 11
“Amulile Abaabo Batoolila”
11 Makani aamba pali Yesu mbwakaba abuumba ciindi Lasalo ndyaakafwa, ngamakani womwi pamakani atuyuminisha abuumbi ngotucana mu Maswi akwe Lesa. Nceceeco Baibo ncoyaambila ayi; “Mukwiinga shintu shoonse shakalembwa kale kale shakalembelwa kutwiisha, kwaamba ayi kwiinda mukuliyumya kwesu alimwi akwiinda mukuyuminishikwa kuswa muMalembo tube abulindilishi.” (Loma. 15:4) Na mwakafwitwa mumukwashi, amwebo inga mwayuminishikwa amalembo atondeshekwa atokonkelaawo:
▪ “Yehova alipafwiifwi abaabo balefukite mumoyo; Abo bapengete mumiyeeyo alabapulusha.”—Kulu. 34:18, 19.
▪ “Kulisukama ndikwakalinga kuncata, mwebo [Yehova] mwakanjumyayumya akunsangalasha.”—Kulu. 94:19.
▪ “Ono Mwaami wesu Yesu Klistu aLesa Ishiwesu, wakatusuna, kutuyumyayumya mumyoyo akutupa kulangila kutamaani kwiinda muluse lwakwe, aayumyeyumye myoyo yanu.”—2 Tesa. 2:16, 17.
(Bene Loma 15:5) Ano Lesa utupa kuliyumya akuyuminisha, noonse amupe kuba amiyeeyo mbuli yakalinga kucite Klistu Yesu,
w16-CG.04 pe. 14 pala. 5
“Amuleke Kuliyumya Kumucaafwe”
5 Amusenge Yehova kwaamba ayi amupe nkusu. Malembo alaamba ayi Yehova “ngootupa nkusu shakuliyumya alimwi alatuyuminisha.” (Loma. 15:5) Lakwebo eenka ngootushi kabotu alimwi ngooshi mapensho ngotwiindaamo ambotulinyumfwa. Alimwi ngooshi kabotu ashintu sheenga shatucafwa kuliyumya. Nceceeco Baibo ncoyaambila ayi “Abo bamulemeka ulabapa shoonse nshebasuni, ulanyumfwa kulila kwabo akubafuna.” (Kulu. 145:19) Ano ino Lesa alaakukumbula buyani mipailo yesu akutupa nkusu shakuliyumya?
(Bene Loma 15:13) Aboobo Lesa uyo ulengesha ayi munoolangila asushe kusangalala kwancinencine mumyoyo yanu alimwi aluumuno ceebo cakuliyumya kwanu, kwaamba ayi mube abulindilishi bwiinditeewo kwiinda munkusu sha mushimu usalashi.
w14-CG 6/15 pe. 14 pala. 11
“Ulyeelete Kusuna Yehova Lesa Wako”
11 Yehova ‘alatupa bulindilishi butupa lusangalalo lwancinencine aluumuno.’ (Loma. 15:13) Bulindilishi Lesa mbwaatupa bulatucafwa kuliyumya na twacaana meelesho. Bananikitwe beshi ‘bakashomeke kushika akulufu balaakupekwa buumi butamaani kwiculu.’ (Ciyu. 2:10) Bantu bashomeka bacite bulindilishi bwakukala pacishi ca panshi balaakusangalala ashoolwe shitamaani mu Paladaiso. (Luka 23:43) Ano ino tulyeelete kulinyumfwa buyani pamakani abulindilishi ubu? Cakutatoonsha ici cilatupa kusangalala aluumuno, akusuna Lesa Shikupa “shipo shoonse shibotu shitacite kampenda”—Jemu. 1:17.
Kulangoola Buboni Bwakumushimu
(Bene Loma 15:27) Ncakwiila, bakaliyandila beene kucita boobo, alimwi bakalinga kucite cikwelete kubasalalite; mukwiinga na baswamashi bakunsengwe bakaabanamo lubasu mushintu shakumushimu shabasalalite, baswamashi aaba abalo balicite cikweelete cakucafwa basalalite ashintu shakumubili.
w89-CG 12/1 pe. 24 pala. 3
“Kweeleshekwa kwa Lusuno Lwanu”
Cakutatoonsha, bamakwabo bakunsengwe bakalinga kweelete kubacafwa. Mukwiinga bakalinga kucite “cikwelete” cilibetele ku Beneklistu bakalinga kuJelusalemu. Sa teshi kuJelusalemu bantu bakunsengwe nkobakatambwita makani abotu? Paulo wakaamba ayi: “na baswamashi bakunsengwe bakaabanamo lubasu mushintu shakumushimu shabasalalite, baswamashi aaba abalo balicite cikwelete cakucafwa basalalite ashintu shakumubili.”—Bene Loma 15:27, The New English Bible.
(Bene Loma 16:25) Ano kuli Lesa weenga wamuyumya kweelana amakani abotu ngonshimikila aamba pali Yesu Klistu, kweelana akuyubululwa kwa bushishi bwakwe Lesa bwakalinga kushisitwe kwaciindi cilaamfu
it-1-E 858 pala. 5
Nkusu sha Kushibila Limwi, Kubambila Limwi
Mikowa yoonse ya bantu baluleme pacishi ca panshi bakalinga kusa mukucana shoolwe kwiinda muli Mesiya na Klistu uyo wakalinga lunyungu lwakashomeshekwa. (Gala. 3:8, 14) Ciindi cakutaanguna makani alunyungu ndyakaambwawo cakalinga ciindi Adamu a Efa ndyebakapondokela Lesa mumuunda wa Edeni, alimwi paciindi ici bubaambo bwa lunyungu ulo kabuli bwabambwa kale, nacibi boobo ici cakalinga ciindi Abelo kaatana kushalwa. (Mata. 3:15) Ishi shakacitika myaaka 4,000 bushishi bwakwe Lesa kabutana kuyubululwa ubo bwakalinga kwaamba pali Mesiya uyo wakalinga “lunyungu.” Aboobo, ncakwiila kwaamba ayi makani aya, akalinga kushisitwe kwamyaaka iinji abuumbi.”—Loma. 16:25-27; Efe. 1:8-10; 3:4-11.
Kubelenga Baibo: (Bene Loma 15:1-16)
MARCH 18-24
BUBONI BUCANIKA MUMASWI AKWE LESA | 1 BENE KOLINTO 1-3
“Sa Mulatanjililwa Amushimu na Shintu Shakumubili?”
(1 Bene Kolinto 2:14) Ano muntu ukonkela shiyanda moyo wakwe taasuni shintu shiswa kumushimu wakwe Lesa, mukwiinga kuli nguwe taaku mboshibete; alimwi inga tashishibiiwo, mukwiinga shilalangoolwa munshila yakumushimu.
w18-CG.02 pe. 19 mapa. 4-5
Ino Kuba Muntu Utanjililwa Amushimu Wakwe Lesa Cilaambanshi?
4 Atutaangune kubandika pamuntu ukonkela shisuni moyo wakwe. Bantu baanji bamucishi balabikila maano abuumbi kushintu shiyanda myoyo yabo. Paulo wakaamba ayi balatanjililwa ‘amushimu ubiibi uyo weendelesha bantu batanyumfwili Lesa.’ (Efe. 2:2) Mushimu uyu ulayuminisha bantu baanji kukonkela shitoocita bungabwa. Balabikila maano kushintu shiyanda myoyo yabo akucita shintu nshebabona ayi shililuleme kumeenso abo, alimwi tabayeyiwo ashakukonkela milawo yakwe Lesa. Liinji muntu ukonkela shisuni moyo wakwe, alabikilabo maano kukusuna kupuka akubila, na shintu nshaangulukite kucita.
5 Ino nshiinshi shimwi nsheenga twashibilako muntu ukonkela shisuni moyo wakwe? Bantu bacita “milimo ya buntu” nkokwaamba ayi balakonkela shisuni myoyo yabo. (Gala. 5:19-21) Munkalata yakutaanguna Paulo njaakalembela libungano lya bene Kolinto, wakaamba pashintu shicita baabo bakonkela shisuni myoyo yabo. Ishi shileelikaawo: kutanyumfwana, kulibika mumakani atabakumite, kuyuminisha mushimu wakupikishanya, kutolana kumakooti, kutatondesha bulemu kumutwi wa mukwashi, kunwa bwalwa cakwiindilisha. Muntu ukonkela shisuni moyo wakwe alaalilwa kuleya meelesho. (Tus. 7:21, 22) Judi wakaamba pa bantu bakalinga kusuni bunene “kukonkela shibiibi shiyanda mibili yabo.”—Judi 18, 19.
(1 Bene Kolinto. 2:15, 16) Muntu utanjililwa a Mushimu usalashi ulakonsha kwishiba bubi abubotu bwa shintu shoonse alimwi taaku weenga wamukasha. 16 Bweenka bwaamba Malembo akwe Lesa ayi, “Ngani ushi miyeeyo ya Mwaami Lesa alimwi ngani weenga wamulwiita shakucita?” Ono swebo tulicite miyeeyo yakwe Klistu.
w18-CG.02 pe. 19 pala. 6
Ino Kuba Muntu Utanjililwa Amushimu Wakwe Lesa Cilaambanshi?
6 Ano ino muntu “utanjililwa amushimu wakwe Lesa” ngumuntu wa mushobo nshi? Ngumuntu ubikila maano abuumbi kubushicibusa bwakwe aLesa, mubupusano amuntu ukonkela shiyanda moyo wakwe. Muntu utanjililwa amushimu wakwe Lesa aleelesha cankusu ‘kukonkela mibo yakwe Lesa.’ (Efe. 5:1) Nkokwaamba ayi aleelesha cankusu kushiba Yehova mbwaabona shintu akushibona bweenka mbuli mbwaashibona. Alacinka manungo muli Lesa akweelesha cankusu kukonkela njiisho shakwe mushintu shili shoonse nshaatocita. (Kulu. 119:33; 143:10) Muntu utanjililwa amushimu wakwe Lesa alabikila maano kukutondesha “shisepo sha mushimu.” (Gala. 5:22, 23) Kucakubonenaako: muntu ucishi kabotu makwebo aleetwa ayi ngushimakwebo. Ncomwi comwi amuntu ubikila maano abuumbi kushintu shakumushimu na shintu shikuma kupaila kwakwe Lesa. Muntu uyo aleetwa ayi muntu muyumu lwakumushimu
w18-CG.02 pe. 22 pala. 15
Ino Kuba Muntu Utanjililwa Amushimu Wakwe Lesa Cilaambanshi?
15 Ino nshiinshi nshotweelete kucita kwaamba ayi tukonkele Klistu? Baibo pa 1 Bene Kolinto 2:16 ilaamba sha kuba “amiyeeyo yakwe Klistu.” Alimwi Bene Loma 15:5 ilaamba shakuba “amiyeeyo mbuli yakalinga kucite Klistu Yesu.” Aboobo kwaamba ayi tube mbuli Klistu tulyeelete kushiba mbwaakalinga kuyeeya amibo njaakalinga kucite. Lyalo ndyeenga twakonkela mwaakeenda. Yesu wakalinga kubikila maano abuumbi kubushicibusa bwakwe aLesa. Aboobo kukonkela Yesu kulatucafwa kuba mbuli Yehova. Nceceeco ncotweelete kusebensa cankusu kushiba nshotweelete kucita kwaamba ayi tunoobona shintu bweenka mbuli Yesu mbwaashibona.
Kulangoola Buboni Bwakumushimu
(1 Bene Kolinto. 1:20) Ino uli kuli musongo? Ino uli kuli mulembi? Ino uli kuli shikupikishanya wamubweende bwashintu buno? Sa Lesa taakwe kutondesha kale ayi busongo bwa bantu taaku mbobubete?
it-2-E pe. 1193 pala. 1
Busongo
Cishi cakakaka bubaambo bwacilubula cakwe Klistu, Lesa ncaakatupa mukwiinga kuli mbabo taakuwo mbocibete; beendeleshi bancico, “bakacaya mwaami ulemekwa” muciindi cakwaamba ayi boomboloshe kabotu. (1 Koli. 1:18; 2:7, 8) Ano Lesa alakwe watondesha kwaamba ayi busongo bwa mucishi taaku mbobubete, wabalensha nsoni abo babonwa mucishi ayi mbasongo. Lesa wasala ‘shintu nshebabona ayi taaku mboshibete,” alimwi abantu babonwa ayi ‘mbaluya, batacite nkusu, balensha nsoni,’ kukumanisha kuyanda kwakwe kutakomwi. (1 Koli. 1:19-28) Paulo wakalwiita bene Kolinto ayi ‘busongo bwamubweende bwashintu buno [a] busongo bwabaleli bamubweende bwashintu buno’ shilaakuloba; aboobo busongo ubo tabwakalinga lubasu lwa makani akumushimu batumwi ngobakalinga kushimikila. (1 Koli. 2:6, 13) Wakacenjesha Beneklistu baku Kolose kwaamba ayi bakalinga kweelete kucenjela “abusongo bwa bantu [maswi akwaamba ayi busongo bwa bantu, alasansulula, kusuna busongo] abubeshi buswa kutunshiyanshiya.”—Kolo. 2:8; amweelanye amavesi 20-23.
(1 Bene Kolinto. 2:3-5) Ndindakesa shindakalinga kuciteewo nkusu, aboobo ndakalinga kututumabo kuboowa; 4 alimwi ndindakalinga kwaamba nabi kushimikila nshikwe kusebensesha maswi abusongo bwa bantu sombi ndakatondesha nkusu sha mushimu usalashi, 5 ndakacita boobo kwaamba ayi mutashomi ceebo ca busongo bwa bantu, sombi ceebo ca nkusu shakwe Lesa.
w08-CG 7/15 pe. 27 pala. 6
Shiteente Shinene Kuswa Mulibuku lya Bene Kolinto
2:3-5. Paulo ndyaakalinga kushimikila ku Kolinto, ndabala yakalinga kuswite lwiiyo abusongo bwa bene Giliki, mpashi wakalisukama akutoonsha na inga wacikonsha kushimikila munshila yeenga yapa bantu kusuna kwaaluka. Nacibi boobo, taakwe kusuminisha cintu cimwi cili coonse kumupa kwaalilwa kukumanisha ncito Lesa njaakamupa. Aswebo tatweelete kwaalilwa kushimikila makani abotu a Bwaami bwakwe Lesa ceebo ca bukaalo buli boonse buyumu. Bweenka mbuli Paulo aswebo inga twashoma mulucafwo lwakwe Yehova.
Kubelenga Baibo: (1 Bene Kolinto 1:1-17)
MARCH 25-31
BUBONI BUCANIKA MUMASWI AKWE LESA | 1 Bene Kolinto 4-6
“Tumena Tuniini Tulafufumisha Mulwi Wa Fulaulo Woonse?”
(1 Bene Kolinto 5:1, 2) Ono ntoonyumfwa kwaamba ayi kuli cikololo ciyoosha citoocitika pakati kanu ico bakunsengwe ncebatakoonshi kucita—citokwaambwa ayi musankwa utokoona abanyina. 2 Ano sa ico cilamukonda? Sa tamweelete kubicilwa akufwa nsoni, akukusha muntu utoocita cintu ca mushobo uyo pakati kanu?
(1 Bene Kolinto 5:5-8) mukamwaabe kuli Satana musankwa uyo kwaamba ayi mubili ukanyonyoolwe, sombi mushimu ukapuluke pabushiku bwakwisa Mwaami. 6 Kulisumpula kwanu taaku mbokubete. Sa tamucishi kwaamba ayi tumena tuniini tulafufumisha mulwi wa fulaulo woonse? 7 Amukushe cimena ca kale kale ca shibiibi kwaamba ayi mube mulwi upya, mbomubete batacite cimena cimupa kufwufwumuka. Ceebo Klistu mwanaambelele wesu wa Pasika, wakacaikwa kale. 8 Aboobo tulyeelete kusekelela bushiku ubu, kuteshi acimena cakale kale na cimena ciimikaninaako shibiibi abubi, sombi ashinkwa utacite cimena uyo wiimikaninaako kushomeka alushinisho.
(1 Bene Kolinto 5:13) lyalo Lesa ndyatokoombolosha baabo bali kunsengwe? “Amumukushe muntu uyo mubiibi pakati kanu.”
it-2-E 230
Cimena
Mutumwi Paulo wakasebensesha cakwiimikaninaako comwi ndyaakapa mulawo bamu libungano lyaku Kolinto kwaamba ayi bakushe musankwa uyo wakalinga kucita bufuule, wakaamba ayi: “Sa tamucishi kwaamba ayi tumena tuniini tulafufumisha mulwi wa fulaulo woonse? Amukushe cimena ca kale kale ca shibiibi kwaamba ayi mube mulwi upya, mbomubete batacite cimena cimupa kufwufwumuka. Ceebo Klistu mwanaambelele wesu wa Pasika, wakacaikwa kale.” Lyalo wakaamba ncaakasebenseshela maswi akwaamba ayi “cimena”: “Aboobo tulyeelete kusekelela bushiku ubu, kuteshi acimena cakale kale na cimena ciimikaninaako shibiibi abubi, sombi ashinkwa utacite cimena uyo wiimikaninaako kushomeka alushinisho.” (1 Koli. 5:6-8) Paulo wakalinga kwaamba sha Bushiku Bwakusekelela Shinkwa Utacite Cimena, ubo bwakalinga kukonkana akusekelela Pasika. Bweenka mbuli tumena tuniinibo mbweenga twafufumisha mulwi wa fulaulo woonse, libungano lyoonse inga lyaba litasalalite kuli Yehova na tabakwe kukusha muntu wacita bufuule. Libungano lilyeelete kucitawo comwi akukusha “cimena” ico pakati kabo, bweenka mbuli bene Isilaeli mbobakalinga kukusha cimena mumaandabo ciindi cakusekelela.
it-2-E 869-870
Satana
Ino‘kwaaba kuli Satana musankwa uyo kwaamba ayi mubili ukanyonyoolwe’ cilaambanshi?
Paulo ndyaakalinga kulwiita libungano lyaku Kolinto nshobakalinga kweelete kucita kumusankwa mufuule uyo wakalinga kweenda abanyina bakamucanaamo, wakalemba ayi: “mukamwaabe kuli Satana musankwa uyo kwaamba ayi mubili ukanyonyoolwe.” (1 Koli. 5:5) Wakalinga kubalwiita ayi balyeelete kumukusha mulibungano musankwa uyo, akucileka kucitaakwe cintu cimwi cili coonse. (1 Koli. 5:13) Kumwaaba kuli Satana cakalinga kwaamba ayi alaakuba kunsengwe lya libungano akuba lubasu lwa cishi ico citokweendeleshekwa a Satana. Bweenka mbuli “tumena tuniini” tweenga twafufumusha “mulwi woonse” wa fulaulo, musankwa uyo wakalinga “mubili,” na lubasu lwa libungano; aboobo kwiinda mukumukusha musankwa uyo mufuule, abo bakalinga kubikila maano kushintu shakumushimu mulibungano, bakanyonyoola “mubili” uyo wakalinga pakati kabo. (1 Koli. 5:6, 7) Paulo alakwe wakaaba Aimeneyusi aAlekisanda kuli Satana, ceebo cakwaamba ayi bakasowa lushomo lwabo anjeelacaamba ibotu.—1 Timo. 1:20.
(1 Bene Kolinto 5:9-11) Munkalata njendakamulembela ndakamulwiita ayi mutaciti shibusa abantu beshishikololo, 10 ono nshindakalinga kwaamba bantu bakunsengwe abo beshishikololo, balyabi, beepi nabi beshikulambila shibumbwabumbwa. Necalinga boobo, naakwiinga mwakaswaamo kale mucishi ca panshi. 11 sombi ndakalinga kwaamba ayi tamweelete kupanga cibusa amuntu uliita ayi ngumuKlistu, sombi kaali shicikololo, mulyabi, shikulambila shibumbwabumbwa, shikwaamba shibiibi kubabye, cakolwa nabi mwiipi. Tamweelete kulya amuntu wa mushobo uyo.
lvs-CG 241, makani aamwi
Kukusha Muntu Mulibungano
Na muntu wacita cibiibi cinene taakwe kwaana, alimwi watolelela kutakonkela njiisho shakwe Yehova, inga tatoleleli kuba lubasu lwa libungano. Alyeelete kukushikwa. Na muntu wakushikwa, taakuwo kunyumfwanaakwe nabibo kumwaambosha. (1 Bene Kolinto. 5:11; 2 Joni. 9-11) Bubaambo ubu bulashitilisha liina lyakwe Yehova alibungano lyakwe. (1 Bene Kolinto. 5:6) Kukusha muntu mulibungano nkululika kweenga kwacafwa muntu kwaana akumucafwa kwaamba ayi aboolele kuli Yehova.—Luka 15:17.
▸ Mutwi 3, pala. 19
Kulangoola Buboni Bwakumushimu
(1 Bene Kolinto 4:9) Ceebo ndabona kwaamba ayi swebo sobatumwi Lesa wakatubika kwisule kwiine anga mbantu bapingulwa kucaikwa. Twaba anga ncintu cakweebela kushilengwa shoonse, kuteshibo kubantu, sombi abaanjelo boonse.
w09-CG 5/15 pe. 24 pala. 16
Baanjelo—“Mishimu Isebensela Bantu”
16 Beneklistu ndyebatokweeleshekwa balaba ‘anga ncintu cakweebela kubaanjelo.’ (1 Koli. 4:9) Baanjelo balakondwa abuumbi na kababona kushomeka kwesu alimwi balasangalala na muntu wakalinga kucita shibiibi waana. (Luka 15:10) Baanjelo balabona amibo ibotu ya Beneklistu banakashi. Baibo ilatondesha ayi “mwanakashi alyeelete kuba acitondesho cakulibombya kumutwi wakwe ceebo ca baanjelo.” (1 Koli. 11:3, 10) Ncakwiila baanjelo balasangalala kubona Beneklistu banakashi abasebenshi bakwe Lesa boonse na kabacita shintu kweelana alibunga lyakwe alimwi abubaambo bwa mutwi wamukwashi. Kucita boobo kulacafwa bana bakwe Lesa bakwiculu kwiibaluka kwaamba ayi abalo balyeelete kushomeka.
(1 Bene Kolinto. 6:3) Sa tamwishi kwaamba ayi tulaakoombolosha abaanjelo? Ono inga ceela kuli pa makani apanshi pano?
it-2-E 211
Mulawo
Milawo Baanjelo Njobakonkela. Nabi kwaamba ayi baanjelo nshilengwa shinditeewo pabantu, abalo balakonkela milawo yakwe Lesa. (Ebu. 1:7, 14; Kulu. 104:4) Yehova wakapa mulawo akukasha mulwani wakwe Satana. (Jobo 1:12; 2:6) Munene wabaanjelo Mikaeli alishi kwaamba ayi Yehova ngomoomboloshi Munene, aboobo wakatondesha bulemu Lesa ndyaakalwiita Satana ayi: “Yehova akukalalile.” (Judi 9; amweelanye a Seka. 3:2.) Yehova Lesa wakapa shibulemu Yesu Klistu nkusu shakweendelesha baanjelo boonse. (Ebu. 1:6; 1 Pita 3:22; Mate. 13:41; 25:31; Fili. 2:9-11) Aboobo Yesu wakatuma munjelo kwaamba ayi atole nkombe kuli Joni. (Ciyu. 1:1) Nacibi boobo, pa 1 Bene Kolinto 6:3 mutumwi Paulo wakaamba ayi bamakwaabo Klistu lwakumushimu bakasalwa kuba boomboloshi ba baanjelo, mpashi ceebo cakwaamba ayi abalo balaakwabanamo lubasu mukoombolosha baanjelo babiibi abo bakapondoka.
Kubelenga Baibo: (1 Bene Kolinto 6:1-14)