Makani Akusebensesha amu Kabuku Kamabungano Abuumi Anciito
AUGUST 5-11
BUBONI BUCANIKA MUMASWI AKWE LESA | 2 TIMOTI 1-4
“Mushimu Lesa Ngwaakatupa Tootulengeshi Kuba Aboowa”
(2 Timoti 1:7) Ceebo mushimu Lesa ngwaakatupa tootulengeshi kuba aboowa, sombi ulatupa nkusu, lusuno akulitibuka.
w09-CG 5/15 pe. 15 pala. 9
Nobacanike—Kuya Panembo Kwanu Akubonekele Kubantu Boonse
9 Kwaamba ayi Paulo acafwe Timoti, wakamwiibalusha ayi: “Ceebo mushimu Lesa ngwaakatupa tootulengeshi kuba aboowa, sombi ulatupa nkusu, lusuno akulitibuka.” (2 Timo. 1:7) “Kulitibuka” kuleelikawo kuyeeya kabotu akusala kabotu shakucita. Kuleelikaawo kubona shintu bweenka mboshibete—kuteshi kweelana ambotusuni. Bacikula bwangu bamwi balatondesha mushimu wa boowa akutakula mumaano kwiinda mukucica bukaalo buyumu muciindi cakuliyumya. Aboobo liinji balasowela ciindi kukoona abuumbi akunokweebelabo TV, kunwa misamu ikola na kunwa bwalwa abuumbi, kunooya kumapaati lyoonse, na kucita bulale. Beneklistu balayuminishikwa “ kukaka bukaalo bwakutaloonda Lesa, alunkumbwa lwa shintu sha pacishi ca panshi akwaamba ayi tulyeelete kukala bukaalo bwakulitibuka, cabululami alimwi cakusebensela Lesa cakulyaaba mubweende bwa shintu buno.”—Taitasi 2:12. nwt
(2 Timoti 1:8) aboobo utanonyumfwa nsoni kuba kamboni wa Mwaami wesu nabi kunyumfwa nsoni ceebo ca ndime nekaili ceebo cakwe Klistu, sombi kolibambila kupengela makani abotu kwiinda mukushoma nkusu shakwe Lesa.
w03-CG 3/1 pe. 9 pala. 7
‘Koyumabo Akutaloonda!’
7 Paulo wakalembela Timoti ayi: “Ceebo mushimu Lesa ngwaakatupa tootulengeshi kuba aboowa sombi ulatupa nkusu . . . Aboobo utanonyumfwa nsoni kuba kamboni wa Mwaami wesu.” (2 Timoti 1:7, 8; Maako 8:38) Pesule lyakubelenga maswi aya, inga twaliipusha ayi: ‘Sa ndanyumfwa nsoni ceebo ca lushomo lwangu, na ndimuntu utaloondi? Sa ndalishibisha kubantu mbonsebensaabo (na mbonjiiyabo), ayi ndi kamboni wakwe Yehova, na ndalisisa? Sa ndanyumfwa nsoni kuba muntu upuseneeko abamwi, na ndanyumfwa kabotu kuba upuseneeko ceebo ca bushicibusa bwangu a Yehova?’ Na kuli uloonda kushimikila makani abotu nabi kunyumfwa nsoni ceebo cakuba upuseneeko abamwi, alyeelete kwiibaluka maswi Yehova ngaakalwita Joshuwa ayi: “Koyumabo akutaloonda.” Mutaluubi kwaamba ayi tulyeelete kubikila maano Yehova a Yesu Klistu mbobatubona kuteshi beshicikolo na abo mbotusebensaabo mbobatuyeeyela.—Bene Galatiya 1:10.
Kulangoola Buboni Bwakumushimu
(2 Timoti 2:3, 4) Mbuli shilumamba mubotu wakwe Klistu, kolibambila kupenga. 4 Muntu usebensa ncito ya bushilumamba taabanimo lubasu mumakwebo abuumi buno, kwaamba ayi akondeleshe mutanjilili wakwe.
w17.07-CG pe. 10 pala. 13
Kulangoola Buboni Bwancinencine
13 Timoti wakalinga kucite lushomo luyumu. Pesule lyakulwiita Timoti ayi ngushilumamba “mubotu wakwe Klistu,” Paulo wakamulwiita ayi: “Muntu usebensa ncito ya bushilumamba taabanimo lubasu mumakwebo abuumi buno, kwaamba ayi akondeleshe mutanjilili wakwe.” (2 Timo. 2:3, 4) Bashikwiiya bakwe Yesu mushiku shino, kwiilikaawo abaabo basebensa ncito yaciindi coonse beendilila 1 miliyoni, balakonkela maswi akaamba Paulo kweelana abukaalo bwabo. Tabakonkeli shintu shaambilisha beshimakwebo mukwiinga baleebaluka maswi akaamba Yesu ayi: “Shikukweleta ngumusha kuwooyo shikukweletesha.” (Tus. 22:7) Satana alisuni kwaamba ayi tusebenseshe ciindi ankusu shesu shoonse mucishi cakwe camakweebo akuba anga mbasha. Shintu shimwi nshetusala inga shalengesha ayi tube ankongole kwa myaaka iinji. Kubwesa nkongole inene kwaamba ayi muule maanda, kulipila maali kushikolo, kuula myotoka idulite, nabibo kucita bwiinga bwa maali aanji inga kwapa muntu kulisukama abuumbi ceebo ca maali. Tulatondesha ayi tulacita shintu munshila ya busongo na katukala buumi bwakutalila shiinji alimwi akutaba ankongole. Kucita boobo kulatucafwa kuba aciindi cakusebensela Lesa muciindi cakuba musha wa bweende bwamakweebo.—1 Timo. 6:10.
(2 Timoti 2:23) Sombi ucileeke kupikishanya kwabuluya alimwi kwakubula lushibo ceebo ulishi ayi kulaletelabo kwaambana.
w14-CG 7/15 pe. 14 pala. 10
Bantu Bakwe Yehova “Balatalamuka Shitaluleme”
10 Munshiku shino, teshi liinji mulibungano lyakwe Yehova ndyetucana bantu beshi kupikisha. Nacibi boobo, na twanyumfwa njiisho shakubeca kuswa kumuntu uli woonse tulyeelete kushikaka peenka apo. Tatweelete kupikishanya abaabo bakapondoka kuswa mucancine akutalika kwiisha shakubeca, kukumbula nshobalemba pa intaneti nabi kubandikaabo munshila imwi ili yoonse. Tatweelete kuyeeya ayi mpashi na twabandikaabo inga twabacafwa, mukwiinga na twacita boobo nkokwaamba ayi tatutookonkela shaamba Malembo. Mbuli bantu bakwe Yehova tulyeelete kuleya cakumaninina bantu bakaswa mucancine.
Kubelenga Baibo: (2 Timoti 1:1-18)
AUGUST 12-18
BUBONI BUCANIKA MUMASWI AKWE LESA | TAITASI 1–FILIMONI
“Kusala Bamanene”
(Taitasi 1:5-9) Ncendakakushiila kuKileti nkwaamba ayi ululike shoonse shakalinga kuyandika kubamba akusala bamanene mumandabala oonse kweelana ambondakakulwiita: 6 Munene ulyeelete kuba muntu utacite kampenda, weebetebo mwanakashi womwi alimwi bana bakwe balyeelete kuba bashomi kuteshi bacite mpuwo yakucita shintu shibiibi nabi kutanyumfwa. 7 Ono ceebo mutanjilili utokweendelesha mulimo wakwe Lesa, ulyeelete kubula kampenda. Taaelete kuba muntu ulyuuma mucaamba, ufwambaana kukalala, cakolwa, mukali nabi usunishi buboni, 8 Ulyeelete kuba muntu utambula beensu alimwi usuni kucita shibotu, ulitibuka, ululeme, usalalite alimwi ulilama, 9 Ulyeelete kucata camaansa obilo kumakani ashomeka kweelana ambwaakeishikwa ayi ayumye yumye bamwi kwiinda mulushinisho alimwi akululika baabo balupikisha
w14-CG 11/15 mape. 28-29
Miipusho Kuswa Kubeshikubelenga
Nabi kwaamba ayi Malembo taambi shoonse shicitika pakusala munene na musebenshi ucafwilisha, kuli bumboni butondesha mbobakalinga kusala muciindi ca batumwi. Baibo ilatulwiita ayi Paulo a Banabasi ndyebakalinga kubooleela pa lweendo lwabo lwakutaanguna lwabumishonali, “bakasala bamatanjilili bamulibungano lyomwi alyomwi, ndibakamana kupaila akulikasha kulya, bakabika mumaansa a Yehova uyo ngobakashoma.” (Milimo 14:23) Ndipakeenda myaaka, Paulo wakalembela Taitasi uyo ngwaakalinga kweendaakwe ayi: “Ncendakakushiila kuKileti nkwaamba ayi ululike shoonse shakalinga kuyandika kubamba akubika bamatanjilili mumandabala oonse kweelana ambondakakulwiita.” (Taitasi 1:5) Citoboneka kwaamba ayi Timoti, uyo wakeenda aPaulo muncito yakwe yabumishonali, alakwe wakapekwa nkusu shakusala bamanene. (1 Timo. 5:22) Cakutatoonsha, abo bakalinga kusala bamanene mbamatanjilili ba lubasu, kuteshi batumwi na bamanene bakalinga ku Jelusalemu.
Kwiinda mukukonkela cakubonenaako ici, bamu Likoto Litanjilila lya Bakamboni bakwe Yehova bakaalula nshila yakusalilaamo bamanene a basebenshi bacafwilisha. Kuswabo pa 1 September, 2014, bamanene abasebenshi bacafwilisha balasalwa munshila iyi: Mutanjilili walubasu uli woonse alalanga langa pamakani alemba bamanene atokwaamba sha baabo mbobabona ayi baleelela kupekwa mikuli. Ndyaatofwakashila mabungano, aleelesha kubashiba kabotu bamakwesu aba, kwiinda mukusebensaabo muncito yakushimikila na kacikonsheka. Pesule lya kubandika abamanene pabaabo mbobabona ayi baleelela kupekwa mikuli, mutanjilili walubasu alicite mukuli wakusala bamanene a basebenshi bacafwilisha mumabungano ali kulubasu nkwaasebensela. Bubaambo ubo buleendelana kabotu aBeneklistu bakutaanguna mbobakalinga kucita.
Ino mbaani basebensa ncito shipusenepusene mububaambo ubu? Bweenka mbuli lyoonse, “musebenshi ushomeka alimwi ucite maano” ngoocite mukuli unene wakupa shakulya basebenshi bamuŋanda. (Mate. 24:45-47) Ici cileelikaawo kulangoola makani kuswa mu Malembo kwiinda mukucafwilishikwa a mushimu usalashi, kwaamba ayi bape butanjilishi bwa mbweenga twakonkela njiisho shamu Baibo shaamba pa libunga mbolyeelete kweendeleshekwa. Alimwi musebenshi ushomeka ngoosala bamatanjilili balubasu boonse abaabo bali muKomiti ya Musampi. Lyalo ofesi ya musampi ili yoonse ilacafwa bamumabungano kukonkela butanjilishi buswa kumusebenshi ushomeka. Likoto lya bamanene lili lyoonse lilicite mukuli unene abuumbi wa kulanga langa cakubikila maano kubona na abo mbobabona ayi inga bapekwa mikuli mulibungano batokweelela kweelana ashaamba Malembo. Mutanjilili walubasu womwi awomwi alyeelete kulanga langa cakubikila maano akupaililawo pamakani alemba bamanene atokwaamba sha baabo mbobabona ayi baleelela kupekwa mikuli, lyalo alasala baabo beelela.
Kulangoola Buboni Bwakumushimu
(Taitasi 1:12) Umwi pakati kabo, mushinshimi wabo beene wakaamba ayi: “Lyoonsebo bene Kileti mbabeshi, mbabiibi anga mbanyama, mbalyabi alimwi mbatolo.”
w89-CN 5/15 pe. 31 Pala. 5
Miipusho Kuswa Kubeshikubelenga
Paulo taakalinga kusuminisha matushi na shintu shitabete kabotu shakaambwa pali bene Kileti. Ici ncalushinisho mukwiinga Paulo wakalinga kucishi ayi ku Kileti kwakalinga Beneklistu bashomeka abo Yehova mbwaakasuminisha alimwi mbwaakananika amushimu Wakwe usalashi. (Milimo 2:5, 11, 33) Kwakalinga Beneklistu bashomeka baanji “mumishi yoonse” cakwaamba ayi amabungano akapangika. Nabi kwaamba ayi tabakalinga kusalalite, cakutatoonsha Beneklistu aba tabakalinga babeshi, balyabi nabi batolo; mukwiinga Yehova nakwiinga taakwe kutolelela kubasebensesha. (Bene Filipi 3:18, 19; Ciyubululo 21:8) Nabi kwaamba ayi kwakalinga bantu bakalinga kucita shintu shibiibi, kulyeelete kwakalinga bene Kileti bakalinga kucite myoyo ibotu alimwi bakalinga kulibambite kutambula makani aBwineklistu bweenka mbocibete mushishi shoonse munshiku shino.—Esekelo 9:4; amweelanye a Milimo 13:48.
(Filimoni 15, 16) Mpashi Onesimasi wakakushikwa kuli ndiwe ciindi ciniini kwaamba ayi ese ekale awebo lyoonse, 16 Ono bulya taabetebo musha, sombi uleenda pamusha, ngumukwanu usunikwi muli Klistu. Nebo ndimusuni abuumbi, sombi kuli ndiwe ulaakwiindaawo mukwiinga ngumusha wako alimwi ngumukwanu muMwaami Yesu.
w08-CG 10/15 pe. 31 pala. 5
Shiteente Shinene Shitoocanika Mulibuku lya Taitasi, Filimoni, a Bene Ebulu
15, 16—Ino nceebonshi Paulo ncatakwe kulwiitila Filimoni ayi amwaangulule Onesimasi? Paulo wakalinga kusuni kubikila maano kuncito yakwe yakushimikila ‘makani aBwaami bwakwe Lesa akwiisha pa Mwaami Yesu Klistu.’ Nceceeco ncaakasalila kutalibikaamo mumakani amwi mbuli makani abasha.—Milimo 28:31.
Kubelenga Baibo: (Taitasi 3:1-15)
AUGUST 19-25
BUBONI BUCANIKA MUMASWI AKWE LESA | BENE EBULU 1-3
“Amusune Shiluleme Akupata Shitaluleme”
(Bene Ebulu 1:8) Sombi kwalo kumwanaakwe, Lesa wakaamba ayi: “Lesa ncuuna cako cabwaami lyoonse, alimwi nkoli ya Bwaami bwako ninkoli ya bululami.
w14-CG 2/15 pe. 5 pala. 8
Amulumbaishe Klistu, Mwaami Ulemekwa!
8 Yehova wakabika Mwaanaakwe kuba Mwaami wabu Mesiya kwiculu mu 1914. ‘Nkoli ya Bwaami bwakwe ninkoli ya bululami,’ aboobo kulela kwake kunanooli kwa bululami akutasalulula. Kweendelesha kwakwe nkwa mumulawo mukwiinga ‘Lesa ncuuna cakwe cabwaami.’ Nkokwaamba ayi, Yehova ngwaakamupa bwaami ubu. Kwiilikawo, cuuna cabwaami cakwe Yesu cilaakubaako “kwamuyayaya.” Sa tacimusangalashi kusebensela Yehova kwiinda mu Mwaami ngwaakasala?
(Bene Ebulu 1:9) Ulisuni kucita bululeme akupata shitaluleme. Nceceeco Lesa, Lesa wako, ncaakakunanikila mafuta asangalasha kwiinda babyo bamwi.”
w14-CG 2/15 mape. 4-5 pala. 7
Amulumbaishe Klistu, Mwaami Ulemekwa!
7 Amubelenge Kulumbaisha 45:6, 7. Mukwiinga Yesu alisuni bululami abuumbi alimwi alipatite cili coonse ceenga cabisha liina lya Baishi, Yehova wakamunanika kuba Mwaami wa Bwaami bwabu Mesiya. Yesu bakamunanika “mafuta alusangalalo” kwiinda babye bamwi, nkokwaamba ayi baami bamulunyungu lwakwe Defedi abo bakalinga baami mu Juda. Munshila nshi? Cakutanguna, Yesu wakananikwa aYehova mwiine. Cabili, Yehova wakamunanika kwaamba ayi abe Mwaami a Mupailishi Munene. (Kulu. 2:2; Ebulu. 5:5, 6) Kwiilikawo, Yesu wakananikwa amushimu usalashi kuteshi mafuta, alimwi bulelo bwakwe teshi bwapacishi sombi mbwakwiculu.
Kulangoola Buboni Bwakumushimu
(Bene Ebulu 1:3) Muli nguwe mulaboneka kumweka kwa bulemu bwakwe Lesa alimwi ncecikoshanyo ciine ca bube bucite Lesa. Ngoolengesha shintu shoonse mucishi ca panshi kuba bweenka mboshibete kwiinda mumaswi akwe a nkusu. Ndyaakamana kulengesha Lesa kulekelela shibiibi sha bantu, wakaya kwiculu mukwikala kululyo lwakwe Lesa Shinkusu shiindawo.
it-1-E 1185 pala. 1
Cikoshanyo
Sa kuswabo kale akale Yesu alatondesha ayi alikoshenye a Baishi?
Mwaanaakwe Lesa wakwiiya, uyo wakesa mukuba Yesu alatondesha Baishi mbobabete. (2 Koli. 4:4) Yesu wakakosha Baishi kuswa ciindi ndyaakalengwa alimwi cakutatoonsha Lesa wakalinga kwaambila nguwe ndyaakaamba ayi, “Atulenge muntu mucikoshanyo cesu.” (Mata. 1:26; Joni 1:1-3; Kolo. 1:15, 16) Ndyaakalinga pa cishi, Yesu wakatondesha mibo ya baishi cakumaninina kweelana amuntu mbweenga wacikonsha, aboobo ncaakaambila maswi akwaamba ayi “Uyo wabona ndime wabona abaTa.” (Joni 14:9; 5:17, 19, 30, 36; 8:28, 38, 42) Cakutatoonsha, Yesu wakeendawo kutondesha mibo ya Baishi, Yehova, ndyaakabushikwa akupekwa “nkusu shoonse kwiculu alimwi apacishi ca panshi.” (1 Pita 3:18; Mate. 28:18) Mukwiinga Lesa wakasumpula Yesu “akumupa cuuna capeculu,” Yesu wakeendawo kutondesha mibo yakwe Lesa kwiinda ciindi katana kusa pacishi ca panshi. (Fili. 2:9; Ebulu. 2:9) Pacecino ciindi, Yesu ‘ncecikoshanyo ciine ca Lesa mbwaabete.’—Ebulu. 1:2-4.
(Bene Ebulu 1:10-12) Alimwi Lesa wakaamba ayi: “Webo, O Mwaami, ndiwe wakalenga cishi ca panshi kumatalikilo, alimwi wakalengesha liculu amaansaako. 11 Shoonse ishi shilaakumana, sombi webo ulaakunoolikobo lyoonse. Shoonse shilakumana ncito bweenka mbuli shakufwala. 12 Ulaakushifungafunga anga ncakufwala ca peculu. Shilaakuba shiimbi, mbuli muntu wafuula akufwala shakufwala shimwi. Sombi webo unanoolibo bweenka mboobete, alimwi buumi bwako tabweeli.”
it-1-E 1063 pala. 7
Liculu
Maswi ali palilembo lya Kulumbaisha 102:25, 26 alaamba pali Yehova Lesa, sombi mutumwi Paulo wakaasebensesha ndyaakalinga kwaamba pali Yesu Klistu. Wakacita boobo mukwiinga Lesa wakasebensesha mwanaakwe, wakashalwabo eenka, kulenga cishi akwiculu. Paulo wakapusanya Mwaana, uyo weshi akanooliiko lyoonse alyoonse, kushintu nshaakalenga Lesa isho Lesa nsheenga ‘wafungafunga anga ncakufwala ca peculu,’ akushibika mweela na wasuna kucita boobo.—Ebulu. 1:1, 2, 8, 10-12; amweelanye a 1 Pita 2:3.
Kubelenga Baibo: (Bene Ebulu 1:1-14)
AUGUST 26–SEPTEMBER 1
BUBONI BUCANIKA MUMASWI AKWE LESA | BENE EBULU 4-6
“Amweeleshe Cankusu Kwaamba ayi Mukenjile Mukookesha Kwakwe Lesa”
(Bene Ebulu 4:1) Aboobo ceebo cakwaamba ayi kushomesha Lesa nkwaakaamba kwakwinjila mukookesha mpokucili, anu atucenjele kwaamba ayi kutabi nabi womwi eshi akaalilwe kwiinjila.
(Bene Ebulu 4:4) MuMalembo akwe Lesa, pamwi palaamba sha bushiku bwasanu ashobilo ayi: “Lesa wakookesha pabushiku bwasanu ashobilo, kucileka milimo yoonse njaakalinga kucita.”
w11-CG 7/15 pe. 24-25 pala. 3-5
Ino Kookesha Kwakwe Lesa Cilaambanshi?
3 Kuli shintu shobilo shitupa kushoma kwaamba ayi bushiku bwasanu ashobilo bwakatolelela kushika amuciindi ca Beneklistu bakutaanguna. Cakutaanguna, amubone maswi Yesu ngaakaambila balwani bakwe ndyebakamupa mulandu ayi wakalinga kusebensa pa bushiku bwakookesha ceebo cakushilika muntu pa bushiku ubu. Mwaami wakabalwiita ayi: “Bata bakatolelela kusebensa kushikila asunu, andime ndatolelela kusebensa.” (Joni 5:16, 17) Ino Yesu wakalinga kusansulula nshi? Yesu wakapekwa mulandu wakusebensa pa bushiku bwakookesha. Wakakumbula baabo bakamupa mulandu ayi: “Bata bakatolelela kusebensa.” Munshila imwi, Yesu wakalinga kusansulula ayi: ‘Nebo abaTa tulacita ncito yomwi. Mukwiinga baTa bakatolelela kusebensa kwa ciindi cilaamfu abuumbi, andime ndyeelete kutolelela kusebensa, kwiilikawo apabushiku bwa kookesha.’ Aboobo, Yesu wakalinga kwaamba ayi bushiku bunene Bwakookesha bwakwe Lesa tabuna kumana paciindi ndyaakalinga pacishi.
4 Cabili, makani akaamba Paulo alatondesha ayi bushiku bwakoosha bwakatolelela. Ndyakaamba maswi acanika pa Matalikilo 2:2 aamba pakookesha kwakwe Lesa, Paulo wakalemba ayi: “Swebo sotwatondesha lushomo, tulanjila mukookesha uku.” (Ebu. 4:3, 4, 6, 9) Aboobo bushiku bwakookesha bwakatolelela amuciindi cakwe Paulo. Ino bushiku ubu bwakalinga kweelete kutolelela kushikila lili?
5 Kwaamba ayi tukumbule mwiipusho uyo, tulyeelete kwiibaluka bushiku ubo ncobwakabetaako. Matalikilo 2:3 ilaamba ayi : “Bushiku ubu wakabupa coolwe akubusalasha.” Bushiku bulya bwakasalashikwa a Yehova kwaamba ayi akumanishe kuyanda kwakwe. Kuyanda kwakwe nkwakwaamba ayi bantu bamunyumfwila bekale mucishi akucilama pomwi ashintu shoonse shiliimo. (Mata. 1:28) Ici ncocalengesha kwaamba ayi Yehova Lesa a Yesu Klistu, “Mwaami wa bushiku bwakookesha,” ‘batolelele kusebensa kushikila asunu.’ (Mate. 12:8) Bushiku bwakookesha bwakwe Lesa bulaakutolelela kushikila kuyanda kwakwe kukakumanishikwe kumamanino a myaaka 1000, Yesu ndyeshi akanoolela.
(Bene Ebulu 4:6) Aboobo, kucili bamwi beelete kunjila mukookesha uku, alimwi abo bakataanguna kushimikilwa makani abotu tabakwe kunjila ceebo cakutanyumfwila,
w11-CG 7/15 pe. 25 pala. 6
Ino Kookesha Kwakwe Lesa Cilaambanshi?
6 Lesa wakasansulwita kabotu Adamu a Efa kuyanda kwakwe sombi bakaalilwa kumunyumfwila. Ncakwiila kwaamba ayi Adamu a Efa mbobantu bakutaanguna batakwe kunyumfwila Lesa. Nacibi boobo abamwi baanji abalo bakakaka kunyumfwila Lesa. Kwiilikaawo abantu Lesa mbwaakasala mwiine, bene Isilaeli abalo bakaalilwa kunyumfwila Lesa. Nceceeco Paulo ncaakacenjesha Beneklistu bakutaanguna ayi bamwi pakati kabo abalo inga baalilwa kunyumfwila Lesa bweenka mbuli bene Isilaeli. Wakalemba ayi: “aboobo atweeleshe cankusu kunjila mukookesha uku kwaamba ayi kutabi muntu nabi omwi eshi akaalilwe ceebo cakutanyumfwila.” (Ebulu. 4:11) Amubone kwaamba ayi Paulo waamba pabaabo batanyumfwili ayi inga tabanjili mukookesha kwakwe Lesa. Ino makani aya alaambanshi kuli ndiswe? Na katucita shintu shiteendelani akuyanda kwakwe Lesa, nkokwaamba ayi inga twaalilwa kunjila mukookesha kwakwe Lesa Cakutatoonsha, cikumbulo kumwiipusho uyo cilayandika abuumbi kulindiswe alimwi tutobandikawo shiinji. Pacecino ciindi atubone shimwi nsheenga tweeya pamakani akunjila mukookesha kwakwe Lesa kwiinda mukubandika pashintu shibiibi shakacita bene Isilaeli.
(Bene Ebulu 4:9-11) Aboobo, kucili bushiku bwakookesha kubantu bakwe Lesa. 10 Mukwiinga muntu unjila mukookesha kwakwe Lesa alookesha kuncito shakwe mwiine bweenka mbuli Lesa mbwaakookesha kuncito shakwe. 11 Aboobo atweeleshe cankusu kunjila mukookesha uku kwaamba ayi kutabi muntu nabi omwi eshi akaalilwe ceebo cakutanyumfwila.
w11-CG 7/15 pe. 28 mapa. 16-17
Ino Kookesha Kwakwe Lesa Cilaambanshi?
16 Munshiku shino, Beneklistu bakakatila kukonkela Mulawo wakwe Mose kwaamba ayi bakapulushikwe mbaniini. Paulo wakaamba kabotu ndyaakalembela Bene Efeso ayi: “mwakapulushikwa aluse lwakwe Lesa kwiinda mulushomo. Teshi munkusu shanu nobeene, sombi ncipo kuswa kuli Lesa. Teshi mumilimo yanu, aboobo muntu uli woonse atalilumbaishi.” (Efe. 2:8, 9) Ono, Ino Beneklistu balanjila buyani mukookesha kwakwe Lesa? Yehova wakasala bushiku bwasanu ashobilo kuba bushiku bwakwe bwakookesha kwaamba ayi akakumanishe kabotu kuyanda kwakwe kwa cishi. Inga twanjila mukookesha kwakwe Yehova kwiinda mukucita kuyanda kwakwe akunyumfwila nshaatulwiita kwiinda mulibunga lyakwe.
17 Na twaalilwa kukonkela kululikwa kuswa mu Baibo nkotutambula kwiinda mumusebenshi ushomeka alimwi ucite maano akukonkela nshetusuni sobeene, nkokwaamba ayi tutoocita shintu shiteendelani akuyanda kwakwe Lesa. Ici inga canyonyoola bushicibua bwesu a Yehova. Mumutwi utokonkelaawo, tulaakwiiya bukaalo bweenga bwakuma bantu bakwe Lesa akubandika kusala kwesu, mbweenga kwatondesha ayi tulanyumfwila Lesa na sobwe alimwi ambweenga kucita boobo kwatondesha ayi ncakwiila twakenjila mukookesha kwakwe Lesa.
Kulangoola Buboni Bwakumushimu
(Bene Ebulu 4:12) Mukwiinga maswi akwe Lesa ali anga ncitu cuumi alimwi alicite nkusu. Alikolete kwiinda mupeeni ukolete koonse kobilo. Alatimbula pakati kushikila apali moyo amuuya alimwi apali shifuwa amoomo. Maswi akwe Lesa alayubulula sheesho bantu nshebayeeya alimwi anshebasuni.
w16.09-CG pe. 13
Miipusho Kuswa Kubeshikubelenga
Ino “maswi akwe Lesa” akaambwa pa Bene Ebulu 4:12 ayi “ali anga ncintu cuumi alimwi alicite nkusu” nciinshi?
▪ Makani atokwaambwawo mulilembo ili alatondesha ayi Paulo wakalinga kwaamba pa kuyanda kwakwe Lesa kucanika mu Baibo.
Liinji mumabuku esu, tulaamba palilembo lya Bene Ebulu 4:12 kutondesha kwaamba ayi Baibo ilicite nkusu shakwaalula buumi bwa bantu, alimwi cileelela kwaamba boobo. Nacibi boobo inga cabota kwiiyawo ashimwi palilembo lya Bene Ebulu 4:12. Paulo wakalinga kuyuminisha Beneklistu baku Ebulu kucita shintu kweelana akuyanda kwakwe Lesa kulembetwe mumalembo. Paulo wakaamba pa bene Isilaeli abo Lesa mbwaakapulusha kuswa mu Ijipiti. Bakalinga kucite coolwe cakunjila mucishi cakalinga kucite “bubile abulongo bubotu,” akukala muluumuno.—Kulo. 3:8; Duto. 12:9, 10.
Lesa mbwaakalinga kusuni ayi shintu shibe. Ono mukuya kwaciindi, bene Isilaeli bakayumya myoyo yabo alimwi tabakwe kutondesha lushomo aboobo baanji bakaalilwa kunjila mukookesha kwakwe Lesa. (Shakube. 14:30; Joshu. 14:6-10) Nacibi boobo, Paulo wakaamba ayi “kushomesha Lesa nkwaakaamba kwakunjila mukookesha nkokucili.” (Ebulu. 3:16-19; 4:1) Cakutatoonsha “cishomesho” ici ndubasu lwakuyanda kwakwe Lesa. Bweenka mbuli mbobakacita Beneklistu baci Ebulu, inga twabelenga sha kuyanda kwakwe Lesa akucita shintu kweelana ankuko. Paulo wakaamba pamaswi ali pa Matalikilo 2:2 a Kulumbaisha 95:11, kwaamba ayi atondeshe ayi cishomesho ici cakaswa mumalembo.
Makani akwaamba ayi “kushomesha Lesa nkwaakaamba kwakunjila mukookesha nkokucili,” alyeelete kutusangalasha. Tulishomete cakutatoonsha kwaamba ayi cishomesho camu Baibo cakunjila mukookesha uku cilaakukumanishikwa alimwi twatalika kale kucita nsheenga twacikonsha kwaamba ayi tukenjileemo. Tatuna kucita boobo kwiinda mukukonkela Mulawo wakwe Mose na kucita shintu shibotu kwaamba ayi Yehova atusuune. Sombi tulacita shintu kweelana akuyanda kwakwe Lesa calusangalalo alimwi kwiinda mulushomo ndotucite. Kwiilikawo, bweenka mbuli mbotwaamba, bantu baanji nsengwe yoonse bakatalika kwiiya Baibo akwiiya kuyanda kwakwe Lesa. Baanji balasala kwaalula buumi bwabo, kutondesha lushomo akubombekwa. Kwaalula buumi kwabantu pesule lyakwiiya cancine, ncitondesho cakwaamba ayi “maswi akwe Lesa ali anga ncitu cuumi alimwi alicite nkusu.” Kuyanda kwakwe Lesa kucanika muBaibo kwakaalula kale buumi bwesu alimwi kulaakutolelela kucita boobo.
(Bene Ebulu 6:17, 18) Lesa wakayanda kubonesha baabo beshi bakatambule sheesho nshaakashomesha ayi ulaakucita kweelana akubamba kwakwe. Nceceeco ncaakalumbilila akukonkomesha mukushomesha kwakwe, 18 Ano shintu shobilo ishi, kushomesha alimwi akulumbila, shilaakucitika cancinencine alimwi Lesa inga tabeciwo pali nshisho. Aboobo Lesa wakalinga kutuyumya yumya ncotwakacicila kulinguwe ayi tuyuminine mukulangila nkwaakatupa.
it-1-E 1139 pala. 2
Kulangila
Kulangila kuba abuumi butamaani amibili itanyonyooki kubaabo ‘bakeetwa kuli Lesa kwaamba ayi babe abuumi bwa kwiculu’ (Ebu. 3:1) nkwancine alimwi kulaakucitika. Balicishi ayi kwiinda mukushomesha akulumbila kwakwe Lesa, shilaakucitika cancinencine alimwi Lesa inga taabeciwo. Alimwi kulangila uku kuli muli Klistu, ucite buumi butafwi. Aboobo, Baibo ilaamba ayi kulangila uku kuli “anga nceela cakwiimikisha bwaato mubuumi bwesu. Nkokwaamba ayi kulalengesha ayi tubule boowa alimwi tube bashinishite. Kulaakutushisha kwiculu kuŋanda yakwe Lesa kwiinda mucisani cishitilisha kwiinjila mumusena usalalite wamukati [bweenka mbuli mupailishi munene mbwaakalinga kunjila muMusena Usalalite Wiindaawo pa bushiku bwa Kusekelela kulekelelwa kwa Shibiibi]. Ceebo ca ndiswe, Yesu wakatutanjilila kwiinjila mumusena usalalite akuba mupailishi munene wamuyayaya, bupailishi buli mbuli bwakwe Melekisedeki.”—Ebulu. 6:17-20.
Kubelenga Baibo: (Bene Ebulu 5:1-14)