CIIYO 2

Kwiisha Anga Mutobandikabo

2 Bene Kolinto 2:17

CITEENTE CINENE: Amubandike mbomwaamba lyoonse, amutondeshe mbomutolinyumfwa pamakani ngomutokwiisha apa batookutika.

Amupaile akulibambila kabotu. Amupaile kwaamba ayi mubikile maano kumakani ngomutokwiisha. Amushibe kabotu shiteente shinene nshemusuni kwiisha. Amwaambe mumaswi anu kuteshi kubelengabo; na kubooshawobo maswi bweenka mbwalembetwe.

Na mwalibambila kubelenga Baibo na libuku limwi, amwashibe kabotu makani alembetwewo kwaamba ayi mukaabelenge kabotu. Na mutokwaamba maswi akaambwa amuntu umwi, amwaabelenge cabuumi, sombi muteendilishi.
Amwaambe camoyo woonse. Amuyeeye kuyandika kwamakani ngomusuni kubalwiita. Amubikile maano kubatookutika. Njimikanino yanu, mbomutosebensesha maansa, apameenso shilyeelete kutondesha ayi mulibasuni alimwi mulababikila maano.

Kwiisha munshila iyi kuli pusene akuubya nshemutokwaamba. Amwaambe munshila itondesha ayi makani ngomutobandika alicindeme.
Amulange batookutika. Inga mwabalanga abo mbomutokwaambaabo na inga tabakalali. Ndyemutokwaamba likani, amulange muntu womwi womwi mulikoto paciindi comwi, muciindi cakwiinshabo meenso palikoto lyoonse.