Makani Akusebensesha amu Kabuku Kamabungano Abuumi Anciito
MAY 3-9
BUBONI BUCANIKA MUMASWI AKWE LESA | SHAKUBELENGA 27-29
“Amukonkele Cakubonenaako Cakwe Yehova Cakutasalulula”
w13-CG 6/15 pe. 10 pala. 14
Amushibe Mibo Yoonse Yakwe Yehova
14 Baana banakashi bosanwe bakaya kuli Mose akumwiipusha ayi: “Ino nceebonshi liina lya baishiwesu ncelitoolobela pakati kabene Isilaeli ceebo cakutabaawo amwaana musankwa?” Aboobo bakamusenga ayi: “Amutupe musena aswebo kuswa kubamakwababo.” Sa Mose wakabakumbula ayi, ‘Inga tatwaaluli mulawo’? Sobwe, Mose “wakatola litongooshi lyabo kuli Yehova.” (Shakube. 27:2-5) Ino Yehova wakakumbula buyani? Yehova wakalwiita Mose ayi: “Ico bana bakwe Selofeyadi banakashi ncebatoosenga cililuleme. Bape musena uli pakati kabamakwababo baishiwabo. Cipansha ca baishiwabo ciye kuli mbabo.” Yehova wakabika mulawo upya wakwaamba ayi: “Kulilabo na musankwa wafwa kwakutashiyawo mwaana musankwa, mwanaakwe mwanakashi ulyeelete kubwesa buboni bwakwe.” (Shakube. 27:6-8; Joshu. 17:1-6) Kuswabo ciindi cilya, banakashi boonse bene Isilaeli bakalinga kuba a lipenshi ili bakalinga kubapa musena.
w13-CG 6/15 pe. 11 pala. 15
Amushibe Mibo Yoonse Yakwe Yehova
15 Yehova nshaakasala shakatondesha ayi taacite kasalulushi. Yehova wakatondesha bulemu kubanakashi aba batakalinga kucite wakubacafwa, bweenka mbwaakalinga kulemeka bene Isilaeli boonse. (Kulu. 68:5) Ici ncakubonenaakobo comwi pamakani aanji amu Baibo, citondesha ayi Yehova taacitewo kasalulushi kubasebenshi bakwe boonse.—1 Samwe. 16:1-13; Milimo 10:30-35, 44-48.
w13-CG 6/15 pe. 11 pala. 16
Amushibe Mibo Yoonse Yakwe Yehova
16 Ino cakubonenaako cakwe Yehova cakutasalulula inga twacikonkela buyani? Munokwiibaluka kwaamba ayi kutasalulula, kuleelikamo shintu shobilo. Na katutacite kasalulushi ndyeenga twabula kusalulula bamwi. Liinji sobantu tulalibona ayi tatucite kasalulushi. Ncakwiila kwaamba ayi teshi cuubu kulilanga langa sobeene, kwaamba ayi tushibe na tatucite kasalulushi. Ano inga twacita buyani kwaamba ayi tushibe na tatucite kasalulushi? Yesu ndyaakalinga kusuni kushiba bantu nshebakalinga kuyeeya pali nguwe, wakeepusha babye mbaakalinga kushoma ayi: “Ino bantu balaamba ayi Mwanaamuntu ngani?” (Mate. 16:13, 14) Amwebo inga mwaciita bweenka Yesu mbwaakacita. Inga mweepusha shicibusa ngomushoma uyo weenga wabula kumushisa, kwaamba ayi amulwiite na mulicite kasalulushi, nabi sobwe. Ino inga mwacita buyani na wamulwiita ayi mulisuni bunene bantu ba mushobo umwi, bapukite na babile? Mulyeelete kupaila kuli Yehova kuswa panshi lya moyo, kwaamba ayi amucaafwe kwaaluka akunokonkela cakubonenaako cakwe cakutasalulula.—Mate. 7:7; Kolo. 3:10, 11.
Buboni Bwakumushimu
it-2-E 528 pala. 5
Shipo
Shipo sha Shakunwa. Shipo sha shakunwa shakalinga kupekwa pomwi ashipo shimwi, bunene bunene ciindi bene Isilaeli ndyebakenjila mu Cishi Cakashomeshekwa. (Shaku 15:2, 5, 8-10) Shipo ishi wakalinga ngu waini (“waini ukola”) alimwi wakalinga kutilwa pacipaililo. (Shaku 28:7, 14; amweelanye a Kulo 30:9; Shaku 15:10.) Mutumwi Paulo wakalembela Beneklistu baku Filipi ayi: “Na ntobengwa mbuli cipo ca shakunwa citootilwa pa mulambu, akusebensela bantu baanji ceebo calushomo, ndisangalete.” Paulo wakasebensesha cikoshanyo ca cipo ca shakunwa, kusansulula mbwaakalinga kulyaabite kusebensela Beneklistunyina. (Flp 2:17) Ndyekwakacaalabo paniini kwaamba ayi afwe, wakalembela Timoti ayi: “Ndatalika kale kutilwa anga ncipo ca shakunwa, alimwi ciindi cakwaamba ayi ŋangululwe casena.”—2Ti 4:6.
MAY 10-16
BUBONI BUCANIKA MUMASWI AKWE LESA | SHAKUBELENGA 30-31
“Amucite Kweelana Anshomwakalumbila”
it-2-E 1162
Kulumbila
Mukuliyandila, Sombi na Washomesha Wakalinga Kweelete Kucita Kweelana Ambwashomesha. Kulumbila kwakalinga kucitwa mukuliyandila. Nacibi boobo, kweelana amulawo wakwe Lesa, na muntu walumbila wakalinga kweelete kucita kweelana ambwaalumbila. (Shaku 30:2; amubone a Lo 1:31, 32.) Aboobo, kulumbila kwakalinga kwiimfwi pa buumi bwa muntu, ceebo na waalilwa kucita kweelana ambwaakalumbila, wakalinga kucaikwa. Mukwiinga muntu wakalinga kucaikwa na waalilwa kucita boobo, nceceeco Malembo alatuyuminisha ayi muntu alyeelete kutaanguna kushiba kabotu shiilikitwe mukulumbila nkwaasuni kucita. Mulawo wakaamba ayi: “Na mwashomesha cakulumbila kuli Yehova . . . Lesa ulaakunolangila. Aboobo na mwabula kucicita, mulaakupekwa mulandu, sombi teshi kubisha na mwabula kushomesha cakulumbila kuli Lesa.”—Du 23:21, 22.
w17-CW.04 pe. 3 pala. 2
Kulumbila
Kweelana a Baibo mboyaamba, kulumbila nkushomesha Lesa ayi mulaakucita cintu cimwi. Muntu inga washomesha kucita shintu shimwi, kupa cipo cimwi, kulyaaba kusebensa ncito imwi, na kucileka kucita shintu shimwi. Muntu mwiine alasalaawo kushomesha cakulumbila, taakuwo umukakatisha. Alimwi na muntu walumbila kucita na kutacita cintu cimwi, alyeelete kucita kweelana ambwaalumbila. (Mata. 14:22, 23; Ebu. 6:16, 17) Ino nshiinshi Baibo nshoyaamba shitondesha ayi kulumbila ngamakani anene?
w04-CG 8/1 pe. 32 pala. 2
Shiteente Shinene Shitocanika Mulibuku lya Shakubelenga
Shakubelenga 30:6-8—Sa Mwineklistu inga wakasha mukaakwe kushomesha cakulumbila? Pacecino ciindi Yehova alapangana cipangano amusebenshi wakwe womwi awomwi. Kucakubonenaako, na muntu walyaaba kuli Yehova, nkokwaamba ayi washomesha cakulumbila. (Bene Galatiya 6:5) Musankwa taacitewo nkusu shakukasha mukaakwe kulumbila kwamushobo uyu. Nacibi boobo, mwanakashi taeelete kulumbila shintu shiteendelani a Baibo nshoyaamba, na shintu nshaeelete kucitila ibaye.
Buboni Bwakumushimu
it-2-E 28 pala. 1
Jefuta
Bantu bakalinga kwaabwa kusebensa ncito mutente yakwe Yehova. Bashali bakalinga kucite nkusu shakucita boobo. Samwelo wakalinga ngumuntu womwi wakaabwa kusebensa muncito shakwe Lesa pa tente kuli banyina ba Aana, ndyebakashomesha cakulumbila kaatana kushalwa. Elikana wakasuminisha kushomesha cakulumbila Aana nkwaakacita. Samwelo ndyaakaleshekwabo, Aana wakamutola ku tente yakwe Lesa. Aana wakabwesa a mucende wakubenga mulambu. (1Sa 1:11, 22-28; 2:11) Samusoni wakalinga ngu mwaana umwi wakabengwa muncito yakwe Lesa, mbuli mu Nasili.—Boo 13:2-5, 11-14; amweelanye ankusu shakalinga shapekwa ku mushali musankwa pa mwaana mwanakashi kweelana amakani ngotucana pa Shaku 30:3-5, 16.
MAY 17-23
BUBONI BUCANIKA MUMASWI AKWE LESA | SHAKUBELENGA 32-33
“Mukatande Bantu Boonse Beekala Mucishi ico”
w10-CW 8/1 pe. 23
Sa Mulicishi?
Ino misena yakulambililaako ‘ya patulundu’ yaambwa bunene mu Malembo aci Ebulu yakalinga njimisena yaanshi?
Bene Isilaeli ndyebakalinga pafwiifwi akunjila mucishi cakashomeshekwa, Yehova wakabalwiita ayi balyeelete kunyonyoola misena yoonse, bene Kenani bakalinga njobakalinga kulambililaamo. Lesa wakabalwiita ayi: “Mukanyonyoole shibumbwabumbwa shabo sha ceela asha mabwe, alimwi amisena yabo njobalambililaawo.” (Shakubelenga 33:52) Misena iyi njobakalinga kulambililawo balesa bakubeca, ilyeelete yakalinga misena yakalinga kuba pamusena ulibo patuba mbuli pakalundu, na misena njebakalinga kuyaka yapeculu, mbuli munshi lya cisamu, na mundabala. (1 Baami 14:23; 2 Baami 17:29; Esekelo 6:3) Pamisena iyi palyeelete pakalinga kuba shipaililo, macinko asalalite, shibumbwabumbwa, pakubika tununkila, alimwi ashintu shimwi nshebakalinga kusebensesha pakulambila.
w08-CW 2/15 pe. 27 mapa. 5-6
Nsheenga Tweeya Kushilubo Bene Isilaeli Nshebakacita
Munshiku shino, tuleenda mumeelesho mbuli bene Isilaeli ngobakalinga kwiindaamo. Pacecino ciindi kuli shintu shiinji shili anga tulesa. Bantu balapaila shintu mbuli maali, bantu bapukite abuumbi mushisekano na mumafilimu, tubunga twamapolitiki, bamatanjilili babupailishi, kwiilikaawo abeshikamukowa. Cintu cilicoonse pasheeshi nshotwambaawo, inga caba anga nkalesa kulindiswe, na ncotubikilaako maano abuumbi. Kuba abushicibusa abantu batapaili Yehova, inga kwanyonyoola bushicibusa bwesu anguwe.
Bene Kenani bakalinga kucita bulale ndyebakalinga kulambila Baali. Alimwi ici cakapa kwaamba ayi bene Isilaeli batalike kucita bulale. Alimwi Beneklistu bamwi balacatwa mutoose utu. Kucakubonenaako, muntu inga wanyasha kompyuta akutalika kweebela shintu shileta miyeeyo yakoonana pa Intaneti, isho sheenga shapa kwaamba ayi atabi anjeelacaamba isalalite. Inga cabica abuumbi na Mwineklistu wacenjekwa, akutalika kweebela shintu shileta miyeeyo yakoonana pa Intaneti!
it-1-E 404 pala. 2
Kenani
Joshuwa wakacita shoonse Yehova nshakaambila Mose, pamakani akunyonyoola bene Kenani. (Jos 11:15) Nacibi boobo, bene Isilaeli bakaalilwa kukonkela cakubonenaako cibotu cakwe Joshuwa, cakunyonyoola shintu shoonse sheenga shapilinganya kulambila kwancine. Kuleka bene Kenani kutolelela kukala pomwi abene Isilaeli kwakabaletela mapensho, cakwaamba ayi mukuya kwaciindi bene Isilaeli baanji bakafwa (shimwi shakapa kwaamba ayi bafwe mbukapondo, bulale, alimwi akulambila shibumbwabumbwa) kwiinda bene Kenani bakalinga kusa mukufwa nakwiinga bakakonkela cakushomeka mulawo wakulobya bene Kenani boonse. (Shaku 33:55, 56; Boo 2:1-3, 11-23; Kulu 106:34-43) Yehova wakacenjesha bene Isilaeli ayi, boomboloshi bwakwe bwa bululami tabwakalinga kucite kasalulushi, aboobo na bene Isilaeli batalika kuba abushicibusa abene Kenani, kweebana ambabo, kulambila shibumbwabumbwa, kucita shintu nshebakalinga kucita pakulambila alimwi akukonkela mibo yabo itabete kabotu, nkokwaamba ayi mulawo wakwaamba ayi bene Kenani banyonyoolwe, ngomulawo wakalinga kusa mukusebenseshekwa apa bene Isilaeli, ico cakalinga kusa mukupa kwaamba ayi ‘batandweemo mucishi cakashomeshekwa.’—Kulo 23:32, 33; 34:12-17; Le 18:26-30; Du 7:2-5, 25, 26.
Buboni Bwakumushimu
it-1-E 359 pala. 2
Nyiinsa
Pesule lya kuuma cisolo kwaamba ayi bashibe musena wakalinga kweelete kupekwa ku mukowa womwi awomwi, bakalinga kweelete kushiba kukomena kwa musena uyo. “Mukabaane cishi pakati kamikowa yoonse, alimwi ashipani shoonse kwiinda mukuuma cisolo, akupa musena unene kucipani cinene, akwalo kucipani ciniini, nkupa musena uniini.” (Shaku 33:54) Lubasu lwa musena ndobakalinga kupekwa kwiinda mukuuma cisolo, talwakalinga kwaalulwawo, sombi kukomena kwa musena uyo nkobakalinga kwaalula. Aboobo musena wa bamumukowa wakwe Juda ndyewakacanika ayi ngunene abuumbi, bakauceesha akupako cipansha cimwi kumukowa wabene Simyoni.—Jos 19:9.
MAY 24-30
BUBONI BUCANIKA MUMASWI AKWE LESA | SHAKUBELENGA 34-36
“Amuyube Muli Yehova”
w17-CG.11 pe. 9 pala. 4
Sa Mulayuba Muli Yehova?
4 Ino bene Isilaeli bakalinga kucita buyani na muntu umwi wacaya mubye kuteshi cakashanga? Nabi kwaamba ayi wacaya mubye kuteshi cakashanga, wakalinga kuba amulandu ceebo cakucaya muntu utacite mulandu. (Mata. 9:5) Nacibi boobo, wakalinga kutondeshekwa nkumbu kwiinda mukusuminishikwa kucicila kundabala yomwi pamandabala ali 6 mwakuyuba, kwaamba ayi atacaikwi kuli shikamukowa wa wooyo wakacaikwa. Na washika mundabala iyo wakalinga kushitilishikwa. Uyo wakacaya muntu kuteshi cakashanga, wakalinga kweelete kukala mundabala iyo kushikila mupailishi munene wafwa.—Shakube. 35:15, 28.
w17-CG.11 pe. 9 pala. 6
Sa Mulayuba Muli Yehova?
6 Na muntu umwi wacaya mubye kuteshi cakashanga, wakalinga kweelete kutaanguna “kusansulwita bamanene” mulandu wakwe pamulyaango wamwinjililo wandabala nkwalobokela. Wakalinga kweelete kutambulwa kabotu. (Joshu. 20:4) Paciindi cimwi bakalinga kumuboosha kubamanene bamundabala mwaakacaila muntu, kwaamba ayi boomboloshe mulandu wakwe. (Amubelenge Shakubelenga 35:24, 25.) Pesule lyakucana ayi muntu uyo taakwe kucaya muntu mukashanga, bakalinga kumuboosha mundabala mwakuyuba.
w17-CG.11 pe. 11 pala. 13
Sa Mulayuba Muli Yehova?
13 Muntu wakacaya muntu kuteshi mukashanga wakalinga kushitilishikwa na washikabo mundabala mwakuyuba. Yehova wakaamba pamandabala mwakuyuba ayi: “Alaakuba mwakuyuba.” (Joshu. 20:2, 3) Yehova taakwe kwaamba ayi muntu uyo wakacaya mubye kuteshi cakashanga bakalinga kumoombolosha alimwi pamulandu weenka ngwaakacita; alimwi shikamukowa wa wooyo wakacaikwa taakalinga kusuminishikwaawo kunjila mundabala mwakuyuba kwaamba ayi acaye muntu uyo. Aboobo uyo wakacaya muntu taakalinga kuloonda ayi alakwe inga wacaikwa. Muntu uyo wakalinga kulinyumfwa kushitilishikwa, akulinyumfwa ayi ali mumaansa akwe Yehova. Ndabala mwakuyuba tayakalinga anga ni jeele. Mundabala umo wakalinga kuba acoolwe cakusebensa, kucafwa bamwi alimwi akusebensela Yehova muluumuno. Aboobo wakalinga kukalabo kabotu alimwi akuba alusangalalo!
Buboni Bwakumushimu
w91-CW 2/15 pe. 13 pala. 13
Cilubula Ceelene Caboonse
13 Adamu a Efa inga tabafubiliimo mucilubula. Mumulawo wakwe Mose mwakalinga njiisho yakwaamba ayi: “Tamweelete kubwesa cilubula kwaamba ayi mulubule mucayi weelete kucaikwa.” (Shakubelenga 35:31) Adamu taakwe kubecekwa, aboobo kubisha kwakwe kwakalinga nkwakashanga. (1 Timoti 2:14) Adamu ncaakacita cakapa kwaamba ayi bana bakwe banoofwa mukwiinga bakapyana kutamaninina kuswa kuli nguwe. Aboobo Adamu wakalinga kweelete kufwa mukwiinga mbuli muntu umaninite, wakalisalila kutakonkela mulawo wakwe Lesa. Yehova naakwiinga wakalubula buumi bwakwe Adamu kwiinda mumulambu wacilubula cakwe Yesu, nakwiinga cakapusana anjiisho shakwe shiluleme. Nacibi boobo, kulipilila cibiibi Adamu ncaakacita kulapa coolwe cakulubula bana bakwe kuswa kulufu! (Bene Loma 5:16) Aboobo inga twaamba ayi nkusu shalufu shisa ceebo cacibiibi cakacita Adamu shilamana. Shikulubula wakalinga kweelete ‘kufwita bantu boonse’ kwaamba ayi bana bakwe Adamu banoolekelelwa shibiibi.—Bene Ebulu 2:9; 2 Bene Kolinto 5:21; 1 Pita 2:24.
MAY 31–JUNE 6
BUBONI BUCANIKA MUMASWI AKWE LESA | DUTOLONOMI 1-2
“Boomboloshi Bwanu Bulaswa Kuli Lesa”
w96-CW 3/15 pe. 23 pala. 1
Yehova—Alisuni Bululami
Bamanene mulibungano balicite mukuli wakoombolosha milandu inene. (1 Bene Kolinto 5:12, 13) Ndyebatoocita boobo balyeelete kwiibaluka kwaamba ayi Lesa alisuni ayi batondeshe nkumbu kweelana abululami bwakwe. Sombi na muntu taana kwaana—inga tabamutondeshi nkumbu. Sombi bamanene tabakushiiwo muntu mulibungano ceebo cakwaamba ayi tabamusuniiwobo. Balicishi kwaamba ayi bubaambo bwa kumukusha mulibungano bulaakumucafwa kusuna kuboolela alimwi. (Amweelanye a Esekelo 18:23.) Kwiinda mukutanjililwa a Klistu, bamanene balasebensa cabululami akuba anga “ncakulishitilishaako muuwo.” (Isaya 32:1, 2) Nacibi boobo, balyeelete kutondesha ayi balayeeyelako bamwi alimwi tabacite kasalulushi.—Dutolonomi 1:16, 17.
w02-CW 8/1 pe. 9 pala. 4
Amulibombye Cakuliceesha Kubweendeleshi Bwakwe Lesa
4 Koombolosha kwakalinga kwiilikaawo shiinji kuteshi kushibabo milawo. Mukwiinga bamanene tabakalinga kumaninite, bakalinga kweelete kuleya mibo mbuli kulisuna alimwi akasalulushi, kwaamba ayi bacikoonshe koombolosha cabululami. Mose wakabalwiita ayi: “Mutabi akasalulushi mukoombolosha kwanu. Bantu boonse, ulemekwa nabi utalemekwi, muboomboloshe mushobo womwi. Mutaloondi muntu nabi womwi ceebo boomboloshi bwamu bulaswa kuli Lesa.” Ncakwiila boomboloshi babene Isilaeli bakalinga kwiimikaninako Lesa ndyebakalinga koombolosha. Ici cakalinga ncoolwe cinene abuumbi!—Dutolonomi 1:16, 17.
Buboni Bwakumushimu
w13-CG 9/15 pe. 9 pala. 9
Inga Twashoma Yehova Nshaatwiibalusha
9 Bene Isilaeli ndyebakanyamuka lweendo lwa myaaka 40 “muluyanga lunene alimwi luloondesha,” Yehova taakwe kubalwiitila limwi mbweshi akabatanjilile, kubashitilisha akubalama. Nacibi boobo, wakatolelela kubatondesha ayi inga bamushoma akushoma butanjilishi bwakwe. Kwiinda mukusebensesha licincilo lya likumbi malumwi alimwi alicincilo lya mulilo mashiku, Yehova wakalinga kwiibalusha bene Isilaeli ayi wakalingaabo ciindi ndyebakalinga kwiinda muluyanga luloondesha. (Duto. 1:19; Kulo. 40:36-38) Alimwi wakalinga kubapa ashoonse shiyandika. Ncakwiila “taakuwo ancebakalinga kulila, shakufwala shabo tashikwe kukwaamookawo, alimwi myeendo yabo taikwe kushimbaawo.”—Neye. 9:19-21.
JUNE 7-13
BUBONI BUCANIKA MUMASWI AKWE LESA | DUTOLONOMI 3-4
“Mumilawo Yakwe Yehova Muli Busongo Alimwi Njabululami”
it-2-E 1140 pala. 5
Kunyumfwishisha
Kwiiya Maswi akwe Lesa cakubikila maano alimwi akukonkela milawo yakwe, inga kwacafwa muntu kunyumfwishisha shintu kwiinda bafundishi bakwe alimwi abacinene. (Kulu 119:99, 100, 130; amweelanye a Lk 2:46, 47.) Cili boobo mukwiinga busongo alimwi akunyumfwishisha shilacanika mu Maswi akwe Lesa alimwi amumilawo yakwe; aboobo naakwiinga bene Isilaeli bakakonkela milawo yakwe Lesa cakushomeka, bantu bakalinga kubashingulukite naakwiinga bakabona ayi “mbasongo alimwi mbantu banyumfwishisha shintu.” (Du 4:5-8; Kulu 111:7, 8, 10; amweelanye a 1 Baam. 2:3.) Muntu unyumfwishisha alashiba kwaamba ayi alyeelete kukonkela shaambwa mumaswi akwe Lesa, aleelesha kukala buumi kweelana a Baibo mboyaamba alimwi alasenga Lesa kwaamba ayi amucaafwe kucita boobo. (Kulu 119:169) Alasuminisha Maswi akwe Lesa kumushika paanshi lya moyo, (Mt 13:19-23), kwalemba mumoyo wakwe (Tu 3:3-6; 7:1-4), alimwi akupata “nshila yoonse ibiibi” (Kulu 119:104). Mwanaakwe Lesa ndyaakalinga pacishi capanshi, wakanyumfwishisha ayi wakalinga kweelete kucaikwa kwaamba ayi akumanisha Malembo. Nceceeco taakwe kweelesha kucita cili coonse kwaamba ayi atacaikwi.—Mt 26:51-54.
w99-CW 11/1 pe. 20 mapa. 6-7
Na Mushimu Wabwaabi Waya Panembo
Ceebo cakukankamana pasheesho nshaakanyumfwa akubona, mwaami mwanakashi wakakumbula ayi: “Balicite coolwe basebenshi banu abo bekala muliimfwa lyanu lyoonse kabanyumfwa kwaamba kwanu kwabusongo!” (1 Baami 10:4-8) Nabi kwaamba ayi ncakwiila ŋanda ya mwaami yakalinga ibotu alimwi mwakalinga bubile, mwaami mwanakashi taakwe kwaamba ayi basebenshi bakwe Solomoni bakalinga kucite coolwe ceebo cakukala mumusena uyu. Sombi wakalinga kusansulula ayi basebenshi bakwe Solomoni bakalinga kucite coolwe, ceebo bakalinga kukutika ku busongo bwakwe Solomoni ubo bwakaswa kuli Lesa. Mwaami mwanakashi waku Shiba ncakubonenaako cibotu kubantu bakwe Yehova munshiku shino, ceebo balicite coolwe cakukutika ku busongo bwa Mulengi wabo a bwakwe Yesu Klistu, Mwanaakwe!
Makani amwi ayandika mwaami mwanakashi ngaakalwiita Solomoni ngakwaamba: “Aalumbaishikwe Yehova Lesa wako.” (1 Baami 10:9) Ncakutatoonsha kwaamba ayi, wakabona ayi Yehova ngowakapa kwaamba ayi Solomoni abe musongo alimwi mubile. Makani aya aleendelana a Yehova nshaakashomesha bene Isilaeli ayi: “Na munookonkela milasho yangu, cilaakutondesha mishobo imwi busongo mbomucite akunyumfwishisha shintu shoonse. Na bakanyumfwe milawo iyi balakwaamba ayi, ‘Mushobo unene uyu ulicite busongo bunene akunyumfwishisha kwashintu shoonse.’”—Dutolonomi 4:5-7.
w07-CG 8/1 pe. 31 pala. 13
Sa Muli “Babile Kuli Lesa”?
13 Na Yehova wapa bantu bakwe shoolwe, alabapa shiinditewo. (Jemusi 1:17) Kucakubonenaako, Yehova ndyaakapa bene Isilaeli cishi mwakukala, cakalinga cishi “mwakalinga kukunka buuci ameleki.” Nabi kwaamba ayi cishi ca Ijipiti acalo mbocakalinga kwiitwa, cishi Yehova ncaakapa bene Isilaeli cakalinga kupuseneeko. Mose wakalwiita bene Isilaeli ayi “ncishi Yehova ncaalama kabotu.” Munshila imwi inga twaamba ayi, bakalinga kusa mukuba babile mukwiinga Yehova wakalinga kusa mukubalama. Yehova wakalinga kusa mukubapa shoolwe abuumbi bene Isilaeli, kulilabo na batolelela kushomeka kuli nguwe. Bakalinga kusa mukukala kabotu cakwaamba ayi abantu mbobakalinga kubambene abo bakalinga kubona ayi mbantu balibetele. Ncakwiila coolwe ciswa kuli Yehova “ncecipa muntu kubila”!—Shakubelenga 16:13; Dutolonomi 4:5-8; 11:8-15.
Buboni Bwakumushimu
w04-CW 9/15 pe. 25 pala. 3
Shiteente Shinene Shitocanika Mulibuku lya Dutolonomi
Dutolonomi 4:15-20, 23, 24—Sa mulawo wakukasha kupanga shibumbwabumbwa wakalinga kusansulula ayi tacibete kabotu kupanga shibumbwabumbwa shamadeko? Sobwe. Mulawo uyu wakalinga kukasha kupanga shibumbwabumbwa shakulambila—nkokwaamba ayi ‘kushifukamina akushisebensela.’ Malembo taakashiwo kupanga shibumbwabumbwa na kupenta cintu cimwi cakusebensesha mbuli madeko.—1 Baami 7:18, 25.
JUNE 14-20
BUBONI BUCANIKA MUMASWI AKWE LESA | DUTOLONOMI 5-6
“Amwiishe Bana Banu Kusuna Yehova”
w05-CG 6/15 pe. 14 pala. 11
Nobashali Amulangweete Mukwashi Wanu Nshoyandika
11 Kwaamba pamakani aya, mpashi taakuwo Lilembo lisebenseshekwa abuumbi kwiinda Lilembo lya Dutolonomi 6:5-7. Twamusenga ayi mucalule ma Baibo anu akubelenga mavesi aya. Cakutaanguna, Baibo yaamba ayi bashali balyeelete kuba bayumu lwakumushimu, kusuna Yehova alimwi akunokonkela shaambwa mu Maswi akwe. Ncakwiila, lyoonse mulyeelete kunookwiiya Maswi akwe Lesa cakubikila maano alimwi akukutumana kuyeeyawo kwaamba ayi munoonyumfwishisha, kusuna nshila shakwe Yehova, njiisho shakwe alimwi amilawo yakwe. Na kamucita boobo mulaakucana makani ancine aanji amu Baibo eshi akamupe kuba alusangalalo, kuloonda alimwi akusuna Yehova. Mulaakuba ashintu shiinji shakwiisha bana banu.—Luka 6:45.
w07-CW 5/15 mape. 15-16
Ino Inga Ndacafwa Buyani Bana Bangu Kwaamba ayi Babe a Lwiiyo Lwancinencine?
Nshomusunishishi kunoocita nobashali, nshomuyeeya alimwi nshomubikilako maano, shilabonekela mushintu nshemwaamba alimwi a nshemucita. (Bene Loma 2:21, 22) Kuswabo kubwanike, baana baleeya kwiinda mukulangilisha bunene bashali nshobacita. Baana balabona shintu bashali nshobabona kuyandika, alimwi shintu isho nshobabona abalo nshoshisa mukuba shiyandika kuli mbabo. Kucakubonenaako, balaakubona ayi kubelenga akwiiya Baibo kulayandika kuli ndimwe. Balaakushiba ayi mulabika shintu sha Bwaami panembo mubuumi bwanu. (Mateyo 6:33) Kutolelela kwanu kucanika kumabungano alimwi akunokwaabanamo lubasu mukushimikila makani a Bwaami, kulaakutondesha ayi kusebensa ncito isalalite yakwe Yehova kulayandika kuli ndimwe.—Mateyo 28:19, 20; Bene Ebulu 10:24, 25.
w05-CG 7/1 pe. 15 pala. 14
Nobashali Amulangweete Mukwashi Wanu Nshoyandika
14 Kweelana a Dutolonomi 6:7 mboyaamba, kuli nshila shiinji mbweenga nobashali mwaiisha bana banu shintu shakumushimu. Inga mwacita boobo ndyemuli palweendo, ndyemutosebensela pomwi nabi ndyemutokookesha. Ano teshi kwaamba ayi ciindi cili coonsebo, nkunookwiisha bana banu cancine camu Baibo. Sombi ndyemutobandika, inga kamwaambaako apamakani akumushimu ayuminisha. Kucakubonenaako, mumagazini ya Sinsimuka!, mulaba mitwi yamakani yaamba pashintu shipusenepusene. Mitwi yamakani iyo inga yamucafwa kubandika pa shinyama Yehova nshaakalenga, misena ibotu yapacishi capanshi, alimwi a mishobo ipusenepusene ya bantu mbobakala. Mibandi yamushobo uyu, inga yayuminisha bacanike kunobelenga bunene mabuku akabambwa a musebenshi ushomeka alimwi ucite maano.—Mateyo 24:45-47.
Buboni Bwakumushimu
w19-CW.02 pe. 22 pala. 11
Yehova Mbwaakatondesha Lusuno Abululami Kubene Isilaeli
11 Nshetutokwiiyawo: Yehova taabonibo muntu mbwaaboneka, sombi alabona a shili mukati kamoyo. (1 Samwe. 16:7) Alashiba nshetuyeeya, mbotulinyumfwa alimwi a nshetucita. Yehova alalangoola shibotu muli ndiswe, alimwi alatuyuminisha ayi tunoocita sheenka isho. Sombi alisuni ayi tushibe, akwaalula miyeeyo yesu itabete kabotu kwaamba ayi tutaciti shibiibi.—2 Maka. 16:9; Mate. 5:27-30.
JUNE 21-27
BUBONI BUCANIKA MUMASWI AKWE LESA | DUTOLONOMI 7-8
“Tamweelete Kweebana Ambabo”
w12-CW 7/1 pe. 29 pala. 2
Ino Nceebonshi Lesa Wakalinga Kusuni ayi Bantu Bakwe Kabeebanabo a Bashominyinaabo?
Ceebo cinene ncakwaamba ayi, Yehova wakalinga kucishi ayi Satana wakalinga kusuni kupilinganya bantu bakwe kwiinda mukubalengesha kulambila balesa bakubeca. Lesa wakacenjesha bene Isilaeli ayi ‘bantu batashomi balaakulengesha bana banu kucileka kunkonkela, akutalika kulambila balesa bamwi.’ Naakwiinga bene Isilaeli bakatalika kulambila balesa bamwi, naakwiinga shintu shakabica. Lesa naakwiinga wakacileka kubapa shoolwe akubashitilisha kuswa kubalwani babo. Aboobo naakwiinga tacina kukonsheka kwaamba ayi Mesiya ese ashalilwe mumushobo uyu. Nceceeco Satana wakalinga kusunishi kuyunga bene Isilaeli kweebana abantu batakalinga kulambila Yehova.
w15-CG 3/15 mape. 30-31
Sa Mulawo wa ‘Kweebanabo a Bashominyineesu’ Ucisebensa?
Nacibi boobo, Yehova wakatupa mulawo mu Maswi akwe ayi tulyeelete kweebanabo a bashominyineesu. Ino nceebonshi ncaakatupeta mulawo uyu? Mukwiinga ulishi shintu sheenga shacafwa bantu bakwe. Taasunibo kushitilisha basebenshi bakwe kumapensho ngeenga bacana ceebo cakutasala kabotu, sombi alisuni ayi kabasangalala. Muciindi cakwe Neyemiya, ba Juda ndyebakalinga kweeba bantu batakalinga kulambila Yehova, Neyemiya wakaamba pashibiibi shakacitikila Solomoni. Nabi kwaamba ayi Solomoni “wakalinga kusunikwi kuli Lesa wakwe, . . . wakabisha ceebo ca banakashi baswamashi.” (Neye. 13:23-26) Aboobo, kwaamba ayi shintu shinootubotela, Yehova wakalwiita basebenshi bakwe ayi banokweebanabo abashominyinaabo. (Kulu. 19:7-10; Isa. 48:17, 18) Beneklistu bancine balalumba ceebo calusuno lwakwe Lesa, alimwi balacinka manungo mubutanjilishi bwakwe. Kwiinda mukucita boobo, balatondesha ayi Yehova Ngomweendeleshi wabubumbo boonse.—Tus. 1:5.
w15-CG 8/15 pe. 26 pala. 12
Munosala Kabotu Beshicibusa Munshiku Shino Shakweelaako
12 Kusala kabotu beshicibusa kulayandika abuumbi, bunene bunene ku Beneklistu abo basuni kuba mucikwati. Maswi akwe Lesa alatucenjeesha ayi: “Mutacatani pantu pomwi abakunsengwe. Ino bubotu abubi inga shacatana buyani? Munshila nshi mweenga mumuni a munshinshe shabeta pantu pomwi?” (2 Koli. 6:14) Baibo ilacenjesha ayi abo boonse batolangoola wakubaakwe mucikwati, balyeelete kweeba na kweebwabo ‘kumushominyinaabo,’ nkokwaamba ayi musebenshi wakwe Yehova wakalyaaba akubombekwa, alimwi ukonkela njiisho shamu Baibo. (1 Koli. 7:39) Na beebana amushominyinaabo, balaba a shicibusa wakalyaaba kuli Yehova uyo weenga wabacafwa kutolelela kushomeka kuli nguwe.
Buboni Bwakumushimu
w04-CG 2/1 pe. 13 pala. 4
Lyoonse Yehova Alatupa Nshetuyandika
4 Mupailo washakulya shabushiku abushiku, ulyeelete kutwiibalusha kuyandika kwa shakulya shakumushimu. Nabi kwaamba ayi wakekala nsala kwaciindi cilaamfu, Yesu wakakaka bweelesho bwakwe Satana bwakwaalula mabwe kuba shakulya. Wakaamba ayi: “Cililembetwe ayi, ‘Muntu taabi abuumi mukulyabo kweenka, sombi ulaba abuumi a kumaswi oonse aswa kuli Yehova.’” (Mateyo 4:4) Paciindi ici Yesu wakaamba maswi Mose ngaakalwiita bene Isilaeli ayi: ‘[Yehova] wakamukolesha nsala, sombi wakamupa mana, cakulya ico mwebo abamashali banu bakulukulu ncemutana kulyawo kale. Ici wakacicita kwaamba ayi amwiishe ayi, cakulya ceenka teshi nceenga capa buumi muntu, sombi amaswi oonse Yehova ngaamba.’ (Dutolonomi 8:3) Yehova mbwaakalinga kupa mana bene Isilaeli, tacina kubacafwabo kuba ashakulya shakumubili, sombi cakabacafwa akwiiya shakumushimu. Cakutaanguna ncobakeeya ncakwaamba ayi, ‘bantu boonse bakalinga kweelete kuya mukubwesa shakulya nsheenga bakumana pabushiku ubo.’ Na babwesa shiinji shakwaamba ayi shacaalako pabushiku ubo, mwakalinga kunokwendabo mapila alimwi akununka abuumbi. (Kulonga 16:4, 20) Nacibi boobo, ishi tashakalinga kucitika ku shakulya nshobakalinga kubwesa pabushiku bwa namba 6, kwaamba ayi shimwi bakalye pabushiku bwa Sabata. (Kulonga 16:5, 23, 24) Aboobo mana yakalinga kubeebalusha ayi bakalinga kweelete kuba bantu banyumfwila, alimwi akwaamba ayi buumi bwabo tabwakalinga kwiimfwibo pa shakulya sheenka ‘sombi amaswi Yehova ngaamba.’
JUNE 28–JULY 4
BUBONI BUCANIKA MUMASWI AKWE LESA | DUTOLONOMI 9-10
“Ino Nshiinshi Yehova Lesa Wanu Nshasuni ayi Munoocita?”
w09-CW 10/1 pe. 10 mapa. 3-4
Ino Nciinshi Yehova Ncaasuni ayi Tunoocita?
Ino nciinshi ceenga catuyuminisha kunoonyumfwila Yehova kuswa panshi lya moyo? Mose wakaamba cintu comwi ceenga catucafwa. Wakaamba ayi: ‘Amuloonde Yehova Lesa wanu.’ (Duto. 10:12) Uku teshi kuloonda kwakwaamba ayi inga watwaanisha na twakaaka kumunyumfwila, sombi nkuloonda kwakumupa bulemu alimwi akusuna kucita nshaatulwiita. Na katuloonda Lesa kuswa panshi lya moyo, tulaakuleya kucita sheenga shamukalasha.
Aboobo ino nciinshi ceelete kutuyuminisha kunoonyumfwila Lesa? Mose wakaamba ayi: ‘Amusune Yehova . . . mumusebensele amyoyo yanu yoonse abuumi bwanu boonse.’ (Duto. 10:12) Kusuna Lesa kuleelikawo shiinji kuteshibo mbotulinyumfwa. Libuku limwi lilaamba ayi: “Maswi amuci Ebulu asansulula muntu mbwaalinyumfwa, cimwi ciindi alasansulula muntu nshaacita pesule lyakulinyumfwa boobo.” Libuku ili lyeenka lilaamba ayi, kusuna Lesa cilaamba “kucitawo comwi” citondesha kwaamba ayi tulimusuni. Ici cilaamba ayi na tulimusuni kuswa panshi lya moyo, tulaakunoocita shintu shimusangalasha.—Tushimpi 27:11.
w09-CW 10/1 pe. 10 pala. 6
Ino Nciinshi Yehova Ncaasuni ayi Tunoocita?
Na katunyumfwila Lesa amoyo woonse tulaakupekwa shoolwe. Mose wakaamba ayi: “Amukonkele milawo amilasho yoonse njeentomupa sunu . . . kwaamba ayi shintu shinomweendela kabotu.” (Duto. 10:13) Ncakwiila milawo yoonse yakwe Yehova—na cili coonse ncaatulwiita kucita—cilatucafwa. Lesa nshaatulwiita kucita inga tashipi kwaamba ayi shintu shitubicile nabi paniini. Baibo ilaamba ayi “Lesa ndusuno.” (1 Joni 4:8) Nceceeco ncaakatupeta milawo kwaamba ayi tube abuumi bubotu pacecino ciindi alimwi akwamuyayaya. (Isaya 48:17) Kucita shintu shoonse Yehova nshaasuni, kulatucafwa kuleya mapensho aanji pacecino ciindi alimwi kulaakutucafwa kwaamba ayi tukacane shoolwe shiinji mu Bwaami bwakwe Lesa.
cl-CG pe. 16 pala. 2
Sa Inga Mwaba Shicibusa Wakwe Lesa?
2 Abulaamu ngumuntu womwi wakalinga kucite bushicibusa buyumu a Lesa. Yehova wakeeta Abulaamu ayi ‘mubyaanji.’ (Isaya 41:8) Ncakwiila Yehova wakalinga kubona Abulaamu ayi ngumubye wancine. Wakalinga kucite bushicibusa buyumu a Lesa, ceebo ca ‘lushomo ndwaakalinga kucite muli Yehova.’ (Jemusi 2:23) Amunshiku shino, Yehova alaba abushicibusa abaabo bamusebensela ceebo cakwaamba ayi balimusuni. (Dutolonomi 10:15) Maswi akwe alatuyuminisha ayi: “Amusene pafwiifwi a Lesa, alakwe alaakusena pafwiifwi andimwe.” (Jemusi 4:8) Mumaswi aya muli bwiite alimwi a cishomesho.
Buboni Bwakumushimu
it-1-E 103
Bene Anakimu
Uyu ngumushobo wa bantu bapolomene bakalinga kukala kumusena watulundu mucishi ca Kenani, alimwi akumusena wakalinga kufwiifwi a lweenge, bunene bunene kulubasu lwa Kumalenge. Paciindi cimwi, basankwa botatwe bamulunyungu lwa bene Anakimu bakalinga kushibikitwe abuumbi, Ayimani, Sheshayi, alimwi a Talimayi, bakalinga kukala mu Ebuloni. (Shaku 13:22) Nkumusena weenka uyu bene Ebulu beshikusensa bali 12 nkobakabona bene Anakimu, alimwi ici ncecakapa kwaamba ayi beshikusensa bali 10 batole lipooti iloondesha yakwaamba ayi basankwa aba bakalinga bamulunyungu lwa bene Nefilimu, mukwiinga na balyeelanya kuli mbabo, bene Ebulu bakalinga kulibona anga “mbateete.” (Shaku 13:28-33; Du 1:28) Ceebo cakulaampa alimwi a nkusu nshebakalinga kucite, basankwa boonse bene Emimu alimwi a bene Lefaimu bakalinga kubeelenya kubasankwa aba. Alimwi ceebo ca nkusu nshebakalinga kucite, bantu bakalinga kwaamba ayi: “Anu ngani weenga walwana a bamulunyungu lwakwe Anaki?”—Du 2:10, 11, 20, 21; 9:1-3.