Makani Akusebensesha amu Kabuku Kamabungano Abuumi Anciito

MARCH 7-13

BUBONI BUCANIKA MUMASWI AKWE LESA | 1 SAMWELO 12-13

“Kulisumpula Kulaleta Mapensho”

w00-CG 8/1 25 pala. 17

Kulisumpula Kulaleta Mapensho

¹⁷ Pakutaanguna nshaakacita Saulo shakalinga kubonekabo anga shilibo kabotu, mukwiinga bantu bakwe Lesa “bakalinga munkasaalo” alimwi bakalinga kuloonda ceebo cabukaalo mbobakalingaamo. (1 Samwelo 13:6, 7) Ncakwiila, cilibo kabotu kucitawo comwi na bukaalo butoyandika ayi muntu acitewo comwi. Mutaluubi kwaamba ayi Yehova alabona shili mumoyo alimwi alashiba catupa kwaamba ayi tucite shintu shimwi. (1 Samwelo 16:7) Aboobo, cilyeelete kuli nshaakabona mumoyo wakwe Saulo isho shitana kulembwa mu Baibo. Kucakubonenaako, cilyeelete kwaamba ayi Yehova wakabona kwaamba ayi Saulo taakalinga kukalika moyo ceebo cakulisumpula. Mpashi Saulo wakakalala abuumbi ceebo cakwaamba ayi lakwe mbuli mwaami wabene Isilaeli, wakalinga kweelete kulindila muntu ngwaakalinga kubona ayi ngumucembele alimwi mushinshimi wakalinga kuwayawaya! Muli moonse mweenga cabeta, Saulo wakabona ayi Samwelo wakalinga kutakataka, aboobo wakabona ayi alicite nkusu shakucitaawo comwi ico cakapa kwaamba ayi aalilwe kukonkela milawo njaakapekwa. Ino nshiinshi shakaswaamo? Samwelo taakwe kulumbaisha Saulo pashintu nshaakacita. Muciindi cakucita boobo wakakalalila Saulo akumulwiita ayi: “Bweendeleshi bwako teshi butolelele . . . mukwiinga tookwe kukonkela mulawo ngwaakakupa Yehova.” (1 Samwelo 13:13, 14) Aboobo kulisumpula kwakamuletela mapensho.

w07-CG 7/1 27 pala. 8

Kunyumfwila Yehova Kulayandika Abuumbi

⁸ Makani amu Baibo aamba pa Mwaami Saulo alatondesha ayi kunyumfwila kulayandika abuumbi. Pakutaanguna Saulo wakalinga mwaami uliceesha, wakalinga kulibona anga ‘taaku mbwaabete.’ Nacibi boobo, mukuya kwaciindi wakatalika kusala shakucita shitabete kabotu ceebo cakulisumpula. (1 Samwelo 10:21, 22; 15:17) Paciindi cimwi Saulo wakalinga kweelete kuya mukulwana bene Filisiti. Samwelo wakalwiita mwaami Saulo kwaamba ayi amulindile kwaamba ayi ese mukubenga milambu kuli Yehova alimwi akwaamba ayi amupe butanjilishi. Nacibi boobo, Samwelo wakacelwa kushika kweelana ambobakapangana, aboobo bantu bakatalika kupalangana. Saulo ndyaakabona boobo “wakabenga mulambu wakutenta.” Nshaakacita shakakalasha Yehova. Samwelo ndyaakashika, mwaami Saulo wakaamba sheebo shakapa kwaamba ayi atakonkeli mulawo ngwakapekwa. Mwaami Saulo wakaamba ayi ceebo cakwaamba ayi Samwelo wakacelwa kushika, wakakakatishikwa kubenga mulambu wakutenta kwaamba ayi Yehova abanyumfwile nkumbu. Ku Mwaami Saulo kubenga mulambu cakalinga ncintu ciyandika abuumbi kwiinda kunyumfwila mulawo wakwaamba ayi alindile Samwelo ayi ese mukubenga mulambu. Samwelo wakamulwiita ayi: “Wacita cintu cabuluya. Tookwe kukonkela mulawo wakakupa Yehova Lesa wako.” Ceebo cakutanyumfwila Yehova, Saulo wakanyaikwa Bwaami.​—1 Samwelo 10:8; 13:5-13.

Buboni Bwakumushimu

w11-CG 7/15 14 pala. 15

Sa Mulaakukonkela Butanjilishi Bwakwe Yehova?

¹⁵ Sa bene Isilaeli bakalinga kuyeeya ayi muntu inga waba mwaami wancine ncine alimwi ngweenga bashoma kwiinda Yehova? Na mboboobo nkokwaamba ayi bakalinga kusuni shintu shitaaku mboshibete! Alimwi kucita boobo kwakalinga kusa mukubapa kukonkela shintu nshaakalinga kusuni Satana. Baami bakalinga kusa mukubalengesha kutalika kulambila shibumbwa bumbwa. Beshikulambila shibumbwa bumbwa balalibeca ayi shintu nsheenga babona akucata mbuli balesa bakupanga kuswa kushisamu na mabwe mbancinencine alimwi balashomeka kwiinda Lesa, Yehova, ngobatakonshi kubona, uyo wakalenga shintu shoonse. Sombi bweenka mbuli mutumwi Paulo mbwakaamba, shibumbwa bumbwa “tashicite ncito.” (1 Koli. 8:4) Tashikonshi kubona, kunyumfwa, kwaamba nabi kucita cintu cili coonse. Inga mwashibona alimwi akushicata sombi na mwatalika kushilambila nkokwaamba ayi mwatalika kusuna shintu shitaaku mboshibete. Kucita boobo inga kwamupa kunjila mumapensho.​—Kulu. 115:4-8.

MARCH 14-20

BUBONI BUCANIKA MUMASWI AKWE LESA | 1 SAMWELO 14-15

“Kunyumfwila Nkubotu Kwiinda Kubenga Mulambu”

w07-CG 7/1 20 pala. 4

Kunyumfwila Yehova Kulayandika Abuumbi

⁴ Mbuli Mulengi, Yehova ngomwiine washintu shoonse nshetucite. Aboobo sa kuli cili coonse nceenga twamupa? Ee, inga twamupa cintu cimwi ciyandika abuumbi. Ino ncinshi? Inga twacana cikumbulo kumaswi akwaamba ayi: “Omwanaangu ba musongo akusangalasha moyo wangu, lyalo ndaakwishiba bwakukumbula wooyo untongoola.” (Tushimpi 27:11) Cintu nceenga twapa Lesa nkumunyumfwila. Nabi kwaamba ayi tulicite bukaalo ankulilo shipusene pusene, na katunyumfwila Lesa soonse inga twatondesha kwaamba ayi maswi ngakaamba Satana akwaamba ayi bantu inga tabatoleleli kushomeka kuli Lesa ndyebatokwiinda mumapensho, ngakubeca. Ici ncoolwe cilibetele abuumbi!

w20 11/15 20 mapa. 4, 5

Amusumine Kululikwa Kuswa mu Maswi Akwe Lesa

⁴ Cakubonenaako ca Mwaami Saulo cilatondesha shicitika na muntu taacitewo mushimu wakuliceesha. Saulo wakaba muntu ulisumpula abuumbi cakwaamba ayi wakakaka kusumina kwaamba ayi wakalinga kuyandika kwaalula mbwaakalinga kuyeeya alimwi ambwaakalinga kucita shintu. (Kulu. 36:1, 2; Abaku. 2:4) Ici cakabonekela patuba Yehova ndyaakamupa butanjilishi bwa nshaakalinga kweelete kucita pesule lyakukoma bene Amaleki. Nacibi boobo, Saulo taakwe kunyumfwila Yehova. Alimwi mushinshimi Samwelo ndyaakamulwiita nshaakacita, Saulo wakakaka kusumina cilubo ncaakacita. Muciindi cakucita boobo, wakatalika kuubya cilubo ncaakacita akupa bamwi mulandu ayi mbobakamukakatisha kucita nshaakacita. (1 Samwe. 15:13-24) Ici tacakalinga ciindi cakutaanguna Saulo kutondesha mushimu uyu. (1 Samwe. 13:10-14) Cakabica abuumbi mukwiinga wakalekela moyo wakwe kulisumpula. Taakwe kwaalula mbwaakalinga kuyeeya, aboobo Yehova wakamululika akumukaka.

⁵ Kwaamba ayi tuleye kukonkela cakubonenaako cakwe Saulo, tulyeelete kuliipusha miipusho iyi: ‘Sa na ndabelenga kululika kuswa mu Maswi akwe Lesa, ndalangoola mwakuleyela? Sa ndayeeya ayi nshentoocita teshi shibiibi abuumbi? Sa ndapa bamwi mulandu pasheesho nshentoocita?’ Na cikumbulo cesu ngu ee kumwiipusho uli woonse pamiipusho iyi, nkokwaamba ayi tulyeelete kwaalula mbotuyeeya ambotubona shintu. Mukwiinga na twaalilwa kucita boobo, moyo wesu ulaakuyuma abuumbi cakwaamba ayi Yehova alaakutukaka kuba beshicibusa bakwe.​—Jemu. 4:6.

Buboni Bwakumushimu

it-1-E 493

Nkumbu

Na twatondesha nkumbu ceebo cakukakatishikwa mubupusano akuyanda kwakwe Lesa, inga twaliletela mapensho anene abuumbi. Ishi nsheshakacitikila Mwaami Saulo. Ciindi cakalinga cashika cakwaamba ayi banyonyoole bene Amaleki kweelana akuyanda kwakwe Lesa. Bene Amaleki mbobakalinga bantu bakutaanguna kulwana bene Isilaeli ndyebakaswabo mu Ijipiti. Saulo wakalwiitikwa ayi taakalinga kweelete kubatondesha nkumbu. Ceebo cakunyumfwila bashilumamba bakwe, Saulo taakwe kukonkela mulawo wakwe Yehova cakumaninina. Aboobo, Yehova wakakaka Saulo kutolelela kuba mwaami. (1Sa 15:2-24)Na muntu kaatondesha kulumba abuumbi pamilawo yakwe Yehova iluleme, alimwi akubika kushomeka kulinguwe panembo, teshi akacite cilubo mbuli ncaakacita Saulo, ico cakapa kwaamba ayi acileke kutambula shoolwe kuswa kuli Yehova.

MARCH 21-27

BUBONI BUCANIKA MUMASWI AKWE LESA | 1 SAMWELO 16-17

“Nkoondo iyi Njakwe Yehova”

wp16-CG 5 11 mapa. 2-3

“Nkoondo iyi Njakwe Yehova”

Defedi wakaamba mbuli mbwaakacaya nkalamu alimwi abeya ndyaakalinga kushomesha Saulo kwaamba ayi inga wacikonsha kulwana a Golyati. Sa Defedi wakalwiita Saulo shiintu ishi ceebo cakulisumpula? Sobwe. Defedi wakalinga kumushi uyo wakamucafwa kwaamba ayi acaye shinyama ishi. Defedi wakaamba ayi: ‘Yehova uyo wakamfuna kunkalamu abeya, utoomfuna akumwine Filisiti ulya.’ Mukweelaako Saulo wakaamba ayi: “Cabota, koya alimwi Yehova abe andiwe.”​—1 Samwelo 17:37.

Sa inga mwasuna kuba alushomo mbuli ndwaakalinga kucite Defedi? Amubone kwaamba ayi lushomo lwakwe Defedi talwakalinga kwiimfwi pashintu nshaakalinga kuyeeyelabo. Wakalinga kucite lushomo muli Lesa mukwiinga wakalinga kumushi kabotu alimwi wakabona ashintu nshaakamucitila. Wakalinga kucishi ayi Yehova alashitilisha alimwi alakumanisha nshaashomesha. Na tulisuni kuba alushomo mbuli lwakwe Defedi tulyeelete kutolelela kwiiya makani aanji amu Baibo aamba pali Lesa. Na katukonkela nshetwiiya, shintu shilaakunootweendela kabotu alimwi tulaakuyumya lushomo lwesu.​—Bene Ebulu 11:1.

wp16-CG 5 11-12

“Nkoondo iyi Njakwe Yehova”

Nshaakakumbula Defedi shilatondesha ayi wakalinga kucite lushomo abuumbi. Amuyeeyebo mbocakalinga musankwa uyu wacanike ndyaakalinga kwiita Golyati ayi: ‘Webo utoosa mukundwana amupeeni alimwi amasumo. Ono nebo ntookulwana muliina lyakwe Yehova wamakoto abashilumamba, Lesa wa likoto lya bashilumamba lya bene Isilaeli, uyo ngowanyansha.’ Defedi wakalinga kucishi kwaamba ayi nkusu shabantu alimwi ashilwanisho shankondo tashakalinga kuyandika abuumbi. Golyati taakwe kutondesha bulemu kuli Yehova Lesa, aboobo Yehova wakacitaawo comwi. Defedi wakaamba ayi, “Nkondo njakwe Yehova.”​—1 Samwelo 17:45-47.

Defedi wakalinga kubwene kwaamba ayi Golyati wakalinga kupolomene alimwi wakalinga kucite shilwanisho. Sombi shintu ishi tashikwe kupa Defedi kuloonda. Taakwe kucita cilubo Saulo abashilumamba bakwe ncebakacita. Defedi taakwe kulyeelanya kuli Golyati. Sombi wakeelanya Golyati kuli Yehova. Golyati wakalinga kulampa mamita 2.9, aboobo wakalinga mulaamfu kwiinda basankwa bamwi boonse, ano sa inga twamweelanya ku Mwaami wabubumbo boonse? Bweenka mbuli muntu uli woonse, wakalingabo anga nkalongolo, ako Yehova nkaakalinga kusuni kucaya!

wp16-CG 5 12 pala. 4

“Nkoondo iyi Njakwe Yehova”

Munshiku shino basebenshi bakwe Lesa tabaabanimo lubasu munkondo. (Mateyo 26:52) Nacibo boobo, tulyeelete kukonkela cakubonenaako calushomo lwakwe Defedi. Bweenka mbuli Defedi aswebo tulyeelete kubona Yehova ayi ngwancinencine—alimwi ngo Lesa ngotweelete kusebensela akupa bulemu. Cimwi ciindi inga twabona ayi mapensho ngotutokwiindaamo atukomenena abuumbi, sombi mapensho ayo nganiini abuumbi na twaeelanya kunkusu shakwe Yehova shitamaani. Na twasala Yehova kuba Lesa wesu alimwi akumushoma bweenka mbwaakacita Defedi, teshi tukaloonde mapensho ali woonse. Taakuwo lipenshi ndyeenga Yehova waalilwa kumanisha!

Buboni Bwakumushimu

w05-CG 6/1 31 pala. 7

Shiteente Shinene

Shitocanika Mulibuku lya 1 Samwelo

16:14​—Ino ngumushimu nshi ubiibi wakapensha Saulo? Mushimu ubiibi wakapa kwaamba ayi Saulo aalilwe kuba aluumuno mumiyeeyo, yakalinga njimiyeeyo yakwe itabete kabotu iyo yakalinga kusuni kumupa kucita shintu shitabete kabotu. Yehova ndyaakakushaawo mushimu wakwe usalashi pali Saulo, Saulo wakatalika kutanjililwa amushimu wakwe ubiibi. Mukwiinga Lesa wakakushaawo mushimu wakwe usalashi, akusuminisha kwaamba ayi mushimu ubiibi unjile muli Saulo, mushimu ubiibi uyu ulaambwa ayi wakalinga ‘mushimu ubiibi kuswa kuli Yehova.’

MARCH 28–APRIL 3

BUBONI BUCANIKA MUMASWI AKWE LESA | 1 SAMWELO 18-19

“Amutolelele Kuliceesha Nabi Ndyemwaswitilila”

w04-CG 4/1 27 pala. 4

Amucinke Manungo Mumushimu Wakwe Lesa Shintu Ndyeshaaluka Mubuumi

⁴ Muciindi ciniinibo mweembeshi uyu wacanike wakalinga kusa mukupuka mucishi ico. Wakeetwa ayi anoosebensela mwaami akumulishila nyimbo. Wakacaya shilumamba Golyati, ndundwaminkulwa uyo bashilumamba babene Isilaeli bakalinga kucishi kabotu kulwana, ngobakalinga kuloonda. Defedi ndyakasalwa kuba mutanjilili wabashilumamba babene Isilaeli wakakoma bene Filisiti munkondo. Bantu bakalinga kumusuni alimwi bakamwiimbila lwiimbo lwa kumulumbaisha. Pakutaanguna musebenshi wa Mwaami Saulo wakaamba pali Defedi ayi ngumuntu “ucishi kulisha kabotu kalumbu” alimwi “ngumusankwa utacite boowa, shilumamba mubotu, ucishi kubandika alimwi uboneka kabotu abuumbi.”​—1 Samwelo 16:18; 17:23, 24, 45-51; 18:5-7.

w18-CG.01 28 mapa. 6-7

Amubone Basebenshi Bakwe Yehova Mbobapusene a Bantu Bakucishi

⁶ Bantu bamwi balalisumpula ceebo cakuboneka kabotu, kushibikwa abuumbi, kucishiba bwakulisha nyimbo, kucishiba bwakusebensa kabotu ncito shimwi na ceebo cakusebensa ncito yapeculu. Defedi wakalinga kushicite shoonse ishi nshetwaambawo sombi wakatolelela kuliceesha mubuumi bwakwe boonse. Pesule lyakwaamba ayi Defedi wacaya Golyati, Mwaami Saulo wakabwesa mwanaakwe mwanakashi akupa Defedi kwaamba ayi abe mukaakwe. Defedi wakaamba ayi: “Anu ndime ni? Anu mukowa wa bata nciinshi kwaamba ayi nebo mbe mukwe wa baami?” (1 Samwe. 18:18) Ino nciinshi cakacafwa Defedi kutolelela kuliceesha? Cakapa kwaamba ayi Defedi abe amibo njaakalinga kucite, lushibo alimwi amikuli, nceebo cakwaamba ayi Lesa wakakotama na kuliceesha akumubikila maano. (Kulu. 113:5-8) Defedi wakalinga kucishi kwaamba ayi Yehova ngowakamupa shintu shoonse nshaakalinga kucite.​—Amweelanye a 1 Bene Kolinto 4:7.

⁷ Bweenka mbuli Defedi, munshiku shino bantu bakwe Yehova baleelesha cankusu kuliceesha. Tulalumba abuumbi kushiba kwaamba ayi Yehova, Muntu wiinditewo abuumbi mububumbo boonse, alatondesha mubo uyu ubotu abuumbi wakuliceesha. (Kulu. 18:35) Tulakonkela maswi akatanjililwa a mushimu akwaamba ayi: “Mulyeelete kuba beshinkumbu, bacita kabotu, baliceesha, balibombya akuba bantu bakalika moyo.” (Kolo. 3:12) Alimwi tulicishi kwaamba ayi lusuno ‘talulilumbaishi, alimwi talulisumpuli.’ (1 Koli. 13:4) Na katuliceesha bantu inga basuna kwiiya pali Yehova bweenka musankwa mbweenga washoma kwiinda mubukaalo bwa mwanakashi kwakubula kwaamba maswi.​—1 Pit. 3:1.

Buboni Bwakumushimu

it-2-E 695-696

Mushinshimi

Nabi kwaamba ayi bashinshimi bakalinga kusalwa amushimu wakwe Yehova, teshi lyoonse ndyebakalinga kwaamba makani kwiinda mukutanjililwa a mushimu usalashi. Sombi cimwi ciindi mushimu wakwe Lesa wakalinga kusa pali mbabo kwaamba ayi ubayubulwite makani ngobeelete kwaamba. (Ese. 11:4, 5; Mika 3:8) Mushimu usalashi wakalinga kubakuma akubapa kutalika kwaamba. (1 Sa 10:10; Jel 20:9; Amo 3:8) Mushimu tawakalinga kubapabo kucita shintu shikankamika, sombi nshobakalinga kwaamba alimwi ambobakalinga kwaamba shakalinga kutondesha patuba ayi bakumwa ankusu shikankamika. Ici mpashi ncecintu comwi bantu ncobakalinga kusansulula na baamba ayi “batoocita anga mbalaluki.” (1Sa 10:6-11; 19:20-24; Jel 29:24-32; amweelanye a Mili 2:4, 12-17; 6:15; 7:55.) Mbobakalinga kucita shintu cakubikila maano alimwi akwaamba cakutaloonda, cakalinga kupa bantu kubona anga batoocita shintu munshila ipuseneeko bweenka mushinshimi mbwaakaboneka kubamanene ba bashilumamba, Jewu ndyaakananikwa. Nacibi boobo, bamanene ba bashilumamba ndyebakashiba kwaamba ayi muntu uyu wakalinga mushinshimi bakasumina makani ngakaamba cakubikila maano. (2Ba 9:1-13; amweelanye a Mili 26:24, 25.) Saulo ndyaakalinga kutandaanya Defedi, wakatalika ‘kucita anga ngumulaluki,’ aboobo wakafuula shakufwala shakwe ‘akoona matakosha malumwi oonse kunungaako amashiku.’ Paciindi ici Defedi kaali waloboka kale. (1Sa 19:18–20:1) Ano ici tacisansululi ayi liinji bashinshimi bakalinga kweenda matakosha, mukwiinga ubo teshi mboyaamba Baibo. Alimwi pashiindi shimwi shobilo shakalembwa mu Baibo, bashinshimi bakeenda matakosha kwaamba ayi batondeshe mbasu shimwi sha bushinshimi mbweshi shikakumanishikwe. (Isa 20:2-4; Mika 1:8-11) Baibo tayaambiwo cakapa kwaamba ayi Saulo oone matakosha—na nkusuna kumutondesha ayi wakalinga muntubo, wakanyaikwa shakufwala sha bwaami, taakalinga kucite nkusu shakupikisha bweendeleshi alimwi ankusu shakwe Yehova, na nceebo ca sheebo shimwi.

APRIL 4-10

BUBONI BUCANIKA MUMASWI AKWE LESA | 1 SAMUELWE 20-22

“Mbweenga Twaba Shicibusa uli Kabotu”

w19.11 7 pala. 18

Amuyumye Bushicibusa Bwanu Mamanino Kaatana Kushika

¹⁸ Munshiku shino, bamakwesu abenankashi baleenda mumapensho apusenepusene. Kucakubonenaako, bamwi balapenga ceebo camapensho alicitikila na ayo aletwa abantu. Na caba boobo, inga cabota na twatambulaako bamwi mumaanda esu. Bamwi inga bacafwilisha kwiinda mukubapako maali. Ano cinene soonse nceenga twacikonsha kucita nkubapaililaako kwaamba ayi Yehova abacaafwe. Mpashi inga twabula bwakucita nabi shakwaamba na twanyumfwa ayi mukwesu na nankashi waboolela mwisule. Nacibi boobo, soonse kuli nceenga twaciita. Kucakubonenaako, inga twaya mukubafwakashila. Inga twakutika na kubandikaabo cakubanyumfwila nkumbu. Kwiilikaawo, inga twabandikaabo malembo ngotusuni ayuminisha. (Isa. 50:4) Cinene ciyandika ncakuba pafwiifwi ciindi shicibusa ndyaatoyandika lucafwo.​—Amubelenge Tushimpi 17:17.

w08-CG 2/15 8 pala. 7

Amube Amibo Mbuli Yakwe Yehova

⁷ Lesa alisuni ayi tube beshicibusa bashomeka. (Tus. 17:17) Jonasani mwanaakwe Mwaami Saulo wakaba shicibusa wakwe Defedi. Ndyaakanyumfwa ayi Defedi wacaya Golyati, “Jonasani wakanyumfwana aDefedi akumusuna bweenka mbwaakalinga kulisuni mwiine.” (1 Sa 18:1, 3) Alimwi Jonasani wakacenjesha Defedi ciindi Saulo ndyaakalinga kusuni kumucaya. Pesule lyakwaamba ayi Defedi waloboka, Jonasani wakaya mukubonanaakwe akupangana cipangano anguwe. Nabi kwaamba ayi Saulo wakalinga kusuni kucaya Jonasani ceebo cakwaamba pali Defedi, beshicibusa aba bobilo bakabonana akuyumya bushicibusa bwabo. (1 Sa 20:24-41) Ciindi cakweelaako ndyebakabonana, Jonasani wakayuminisha Defedi ayi “Lesa ulanoomufuna.”​—1 Sa 23:16-18.

w09-CG 10/15 19 pala. 11

Mbweenga Mwatolelela Kuba Abeshicibusa Mucishi Muno Mutaamu Lusuno

¹¹ Munooshomeka. Solomoni wakalemba ayi, “Shicibusa wancinencine ulasuna mubye ciindi cili coonse alimwi ngumukwanu wakashalilwa kukucafwa mumapensho.” (Tus. 17:17) Solomoni ndyaakalemba maswi aya, alyeelete wakalinga kuyeeya pabushicibusa baishi ba Defedi mbobakalinga kucite a Jonasani. (1 Samwe. 18:1) Mwaami Saulo wakalinga kusuni ayi Jonasani mwanaakwe akamupyane akuba mwaami wa bene Isilaeli. Sombi Jonasani wakasumina cancine cakwaamba ayi Yehova wakasala Defedi kwaamba ayi apekwe coolwe ici. Mubupusano a Saulo, Jonasani taakwe kunyumfwila munyono Defedi. Taakwe kulinyumfwa cibiibi ciindi Defedi ndyaakalinga kulumbaishikwa nabi kusumina makani akubeca Saulo ngaakalinga kwaamba pali Defedi. (1 Samwe. 20:24-34) Sa aswebo tuli anga ngu Jonasani? Na beshicibusa besu bapekwa mikuli, sa aswebo tulasangalala pomwi ambabo? Sa tulabayuminisha akubacafwa ndyebatokwiinda mumapensho? Na bamwi batulwiita makani akubeca pali shicibusa, sa tulafwambaana kwaashoma? Na sa tulemikaninaako shicibusa wesu cakushomeka bweenka mbuli mbwaakacita Jonasani?

Buboni Bwakumushimu

w05-CG 6/1 32 pala. 4

Shiteente Shinene

Shitocanika Mulibuku lya Shakubelenga

1 Samwelo 21:12, 13. Yehova alatulangila kusebensesha miyeeyo yesu alimwi alushibo kwaamba ayi tumane mapensho ngotutokwiindaamo. Wakatupa Maswi akwe akatanjililwa a mushimu ayo atucafwa kuba amaano, lushibo alimwi akuyeeya kabotu. (Tushimpi 1:4) Alimwi tulicite abamanene mulibungano beenga batucafwa.

APRIL 18-24

BUBONI BUCANIKA MUMASWI AKWE LESA | 1 SAMWELO 23-24

“Amulindile Yehova Cakukalika Moyo”

w04-CG 4/1 29 pala. 8

Amucinke Manungo Mumushimu Wakwe Lesa Shintu Ndyeshaaluka Mubuumi

⁸ Defedi wakakaka kucitila cibiibi Saulo. Lushomo Defedi ndwaakalinga kucite alimwi akukalika moyo, shakamucafwa kushoma kwaamba ayi Yehova alaakucitawo comwi. Mwaami Saulo ndyaakaswa mucimfwengo, Defedi wakoolobesha kuli nguwe akumulwiita ayi: “Yehova oomboloshe pakati kanu anebo. Alimwi Yehova aabooshe cishole pashilubo nshemwacita pali ndime, nakubi boobo nebo teshi nkamutyunkeewo nabibo munwe.” (1 Samwelo 24:12) Nabi kwaamba ayi wakalinga kucishi ayi Saulo ngwaakalinga kucite cilubo, Defedi taakwe kumubosheshaawo cibiibi, nabi kwaamba maswi abiibi pali nguwe. Pashiindi shimwi shiinji Defedi wakalikasha kubooshesha cibiibi. Sombi wakashoma ayi Yehova alaakucitawo comwi.​—1 Samwelo 25:32-34; 26:10, 11.

w04 6/1 22-23

Sa Mapensho Ngomwiindaamo Alaalula Mbomucita Shintu Mubuumi Bwanu?

Cintu catatu ncetutokwiiyawo ncakwaamba ayi tulyeelete kulindila Yehova muciindi cakusebensesha nshila shiteendelani a malembo kwaamba ayi tumane lipenshi ndyetutokwiindaamo. Shikwiiya Jemusi wakalemba ayi: ‘Kuliyumya kwanu kulyeelete kutolelela kushikila mukabule kampenda nakaceyi mulushomo lwanu.’ (Jemusi 1:4) Tulyeelete kusuminisha kuliyumya kwesu kwaamba ayi kumanishe ncito yankuko kwiinda mukuleya kusebensesha nshila shiteendelani amalembo kwaamba ayi tumane lipenshi ndyetutokwiindaamo cakufwambaana. Kucita boobo kulaakupa kwaamba ayi lushomo lwesu lukeeleshekwe akusalashikwa alimwi lulaakuyuminaako. Uku nkokuliyumya Josefu a Defedi nkobakalinga kucite. Tabakwe kusebensesha nshila sheenga shakalasha Yehova. Sombi bakacita nsheenga bacikonsha mubukaalo mbobakalingaamo. Yehova wakabapa shoolwe ceebo cakulindila ayi acitewo comwi! Alimwi wakabasebensesha boonse bobilo kwaamba ayi bapulushe alimwi akutanjilila bantu bakwe.​—Matalikilo 41:39-41; 45:5; 2 Samwelo 5:4, 5.

Aswebo inga twalicana mubukaalo mweenga tweeleshekwa ayi tucite shintu shiteendelani a malembo. Kucakubonenaako, sa mulalinyumfwa kulefuka ceebo cakwaamba ayi tamukwe kucana muntu weelete wakubaakwe mucikwati? Na mboboobo, amuleye kutakonkela mulawo wakwe Yehova wakwaamba ayi tulyeelete kweebabo ‘mu Mwaami.’ (1 Bene Kolinto 7:39) Sa kuli mapensho ngomutokwiindaamo mucikwati canu? Muciindi cakukonkelabo bantu baanji nshebacita mucishi abo bayuminisha kupansaana alimwi akulekana, amusebensele pomwi kumana mapensho ngomutokwiindaamo. (Malaki 2:16; Bene Efeso 5:21-33) Sa mutokwaalilwa kulama kabotu mukwashi wanu ceebo cakubula maali? Kulindila Yehova kwaamba ayi acitewo comwi cilasansulula kuleya kucita shintu shiteendelani akuyanda kwakwe Yehova kwaamba ayi mucane maali. (Kulumbaisha 37:25; Bene Ebulu 13:18) Ncakwiila, soonse tulyeelete kusebensa cankusu kweelana abukaalo mbotubeteemo kwaamba ayi Yehova atupe shoolwe. Ndyetutocita boobo, tulyeelete kuba bashinishite kulindila Yehova kwaamba atucaafwe kucana nshila ibotu yakumaninaamo lipensho ndyetutokwiindaamo.​—Mika 7:7.

Buboni Bwakumushimu

w17-CG.11 27 pala. 11

Mutasuminishi Cintu Cilicoonse Kumupa Kwaalilwa Kutambula Cilambu

¹¹ Na katucite lusuno ankumbu, teshi cikabe cuubu kuba amunyono. Maswi akwe Lesa alaamba ayi: “Lusuno lulakalika moyo akulengesha nkumbu. Lusuno talucite Munyono.” (1 Koli. 13:4) Kwaamba ayi tuleye kuba amunyono, tulyeelete kweelesha cankusu kunobona shintu bweenka mbuli Lesa mbwashibona. Tulyeelete kunoobona bamakwesu abenankashi kwaamba ayi tuli shipansha sha mubili womwi. Kucita boobo kulaakutucafwa kunooyeeyelaako bamwi kweelana amaswi akatanjililwa amushimu aamba ayi: “Na cipansha comwi calemekwa, shipansha shimwi shoonse shilasekelela pantu pomwi.” (1 Koli. 12:16-18, 26) Aboobo muciindi cakunyumfwa munyono, tulaakunosangalala na bamwi bapekwa mikuli. Amuyeeye pacakubonenaako cakwe Jonasani mwanaakwe Saulo. Taakwe kumunyumfwila munyono Defedi ndyakasalwa kuba mwaami. Sombi wakamuyuminisha. (1 Samwe. 23:16-18) Aswebo tulyeelete kunotondesha nkumbu a lusuno bweenka mbuli Jonasani.

APRIL 25–MAY 1

BUBONI BUCANIKA MUMASWI AKWE LESA | 1 SAMWELO 25-26

“Sa Mulacita Shintu Kwakubula Kuyeeyawo?”

ia-CG 78 mapa. 10-12

Wakacita Shintu Cabusongo

¹⁰ Ino bashilumamba aba bakalinga kusebensa cankusu, bakalinga kubalama buyani beembeshi? Nakwiinga cakalinga cuubu kwaamba ayi ciindi aciindi kababwesa mbelele yomwi kuswa mulitanga, sombi ubo teshi mbobakacita. Aboobo bakalinga anga ndubumbu lwakushitilisha matanga a shifubwa shakwe Nabali alimwi abasebenshi bakwe. (Amubelenge 1 Samwelo 25:15, 16.) Kwakalinga mapensho aanji ngobakalinga kwiindaamo beembeshi alimwi ambelele. Kwakalinga shinyama shiinji shikali shamuluundu alimwi manyinsa a kumalenge kwa cishi ca Isilaeli akalinga pafwiifwi abuumbi cakwaamba ayi bapambi alimwi abeepi bakalinga kusa mukwiipa liinji.

¹¹ Cilyeelete tacakalinga cuubu kuli Defedi kucanina bashilumamba bakwe shakulya ndyebakalinga muluyanga. Aboobo bushiku bumwi Defedi wakatuma basankwa bali 10 kuya mukusenga lucafwo kuli Nabali. Defedi wakasala ciindi cili kabotu abuumbi. Cakalinga ciindi cakucesesha mbelele alimwi paciindi bantu ndyebakalinga kusekelela akwaabilako bamwi shakulya. Alimwi Defedi wakasebensesha maswi ali kabotu alimwi abulemu. Defedi alimwi wakaliita ayi “mwanaanu Defedi,” mpashi kutondesha bulemu ceebo cakwaamba ayi Nabali wakalinga munene kumyaaka. Ino Nabali wakakumbula buyani?​—1 Samwe. 25:5-8.

¹² Wakakalala abuumbi! Musankwa ulya ngotwaambawo kumatalikilo wakalwiita Abigelo ayi Nabali “wakabacobola” basankwa Defedi mbwakatuma. Nabali uyo wakalinga muunyu, wakatongooka pameenso abasebenshi bakwe akwaamba ayi inga taapi Defedi shinkwa, maanshi alimwi a nyama njakacaila beshikucesa mbelele. Nabali wakaamba ayi Defedi wakalinga muntu utaakuwo mbwaabete alimwi ayi ali anga ngumusha wacica mwaami wakwe. Nabali alyeelete wakalinga kubona Defedi bweenka Saulo uyo wakalinga kupatite Defedi mbwaakalinga kumubona. Boonse bobilo tabakalinga kumubona mbuli Yehova mbwaakalinga kumubona. Lesa wakalinga kumusuni Defedi alimwi taakalinga kubonawo anga ngumusha wakapondoka sombi ayi ngweshi akabe Mwaami wa bene Isilaeli.​—1 Samwe. 25:10, 11, 14.

ia-CG 80 pala. 18

Wakacita Shintu Cabusongo

¹⁸ Abigelo wakaamba anga ngowacita cilubo alimwi wakasenga Defedi ayi amulekelele. Wakasumina kwaamba ayi ibaye wakalinga muluya bweenka mbuli liina lyakwe mbolyakalinga kusansulula, mpashi akwaamba ayi tacakalinga cabusongo kwaamba ayi Defedi acaye muntu wamushobo uyu. Abigelo wakashoma kwaamba ayi Defedi wakasalwa a Yehova alimwi ayi wakalinga kulwana ‘nkondo shakwe Yehova.’ Alimwi wakatondesha ayi wakalinga kucishi ayi Yehova wakashomesha Defedi ayi alaakuba Mwaami ndyaakaamba ayi: “Yehova . . . ulaakulengesha bwaami kuba pali ndimwe.” Kwiilikaawo wakalwiita Defedi ayi ataciti cilicoonse ceenga capa kwaamba ayi abe amulandu wa bulowa na kumupa kwaamba ayi ‘akoongumane’ kunembo—na ceenga capa kwaamba ayi njeelacaamba ikanoomupensha. (Amubelenge 1 Samwelo 25:24-31.) Maswi about alimwi ayuminisha abuumbi!

Buboni Bwakumushimu

ia-CG 80 pala. 16

Wakacita Shintu Cabusongo

¹⁶ Sa nshaakacita Abigelo shilatondesha ayi taakwe kunyumfwila ibaye mbuli mutwi wamukwashi? Sobwe; mutaluubi kwaamba ayi Nabali wakacita shintu shitabete kabotu kumusebenshi wakwe Yehova wakananikwa. Nshaakacita Nabali naakwiinga shakapa kwaamba ayi bantu baanji bamuŋanda yakwe batakalinga kucite mulandu bacaikwe. Nakwiinga Abigelo wakaalilwa kucitawo comwi, sa naakwiinga wakaba amulandu bweenka mbuli ibaye? Paciindi ici Abigelo wakalinga kweelete kunyumfwila Lesa kwiinda kunyumfwila ibaye.