CIIYO 17
Ino Yesu Ngumuntu Uli Buyani?
Ndyetutokwiiya pamakani ashintu Yesu nshaakaamba akucita, tulashiba mibo yeenga yatucafwa kuba bushicibusa anguwe alimwi a Yehova, Baishi. Ino njimibo nshi Yesu njaacite? Alimwi ino cakubonenaako cakwe inga twacikonkela buyani?
1. Ino Yesu ali mbuli Baishi munshila nshi?
Yesu kaatana kusa pacishi capanshi, wakekala myaaka iinji abuumbi a Baishi kwiculu, akwiiya kuswa kuli mbabo. Aboobo alayeeya, kulinyumfwa, alimwi akucita shintu bweenka mbuli Baishi. (Amubelenge Joni 5:19.) Yesu alaikonkela kabotu abuumbi mibo ya Baishi. Nceceeco ncaakaambila ayi: “Uyo wabona ndime wabona abaTa.” (Joni 14:9) Kwiiya pamibo yakwe Yesu kulaakumucafwa kumushiba kabotu Yehova. Kucakubonenaako, kutondesha nkumbu kwakwe Yesu kulatondesha Yehova mbwamubikila maano.
2. Ino Yesu wakatondesha buyani ayi alisuni Yehova?
Yesu wakaamba ayi: “Sombi ntoocitabo kweelana ambobakandasha baTa kwaamba ayi bantu ba mucishi beshibe ayi baTa ndibasuni.” (Joni 14:31) Yesu ndyaakalinga pacishi capanshi, wakatondesha ayi wakalinga kubasuni abuumbi Baishi kwiinda mukubanyumfwila nabi ndyecakalinga ciyumu kucita boobo. Alimwi lyoonse wakalinga kusuni kulwiitako bamwi pali Baishi akubacafwa kuba abushicibusa ambabo.—Joni 14:23.
3. Ino Yesu wakatondesha buyani ayi alisuni bantu?
Baibo ilaamba ayi Yesu ‘wakalinga kusangalete ceebo ca bantu.’ (Tushimpi 8:31) Wakatondesha ayi wakalinga kusuni bantu kwiinda mukulyaaba kubayuminisha alimwi akubacafwa. Shaankamiko nshaakacita shakatondesha ayi taakalinga kucitebo nkusu, sombi wakalinga kucite ankuumbu. (Maako 1:40-42) Wakalinga kutondesha nkumbu kubantu boonse alimwi taakalinga kucite kasalulushi. Wakalinga kwaamba makani ayuminisha alimwi akalinga kupa baabo boonse bakalinga kumukutika kuba akulangila. Yesu wakalinga kulyaabite kupenshekwa alimwi akufwa ceebo calusuno ndwakalinga kucite kubantu boonse. Nacibi boobo, bantu mbwaasuni abuumbi mbaabo bakonkela kwiisha kwakwe.—Amubelenge Joni 15:13, 14.
AMWIIYILEWO ASHIMWI
Amwiiye shiinji pamibo yakwe Yesu akubona mbweenga mwakonkela cakubonenaako cakwe cakutondesha lusuno alimwi abwaabi.
4. Yesu alibasuni Baishi
Cakubonenaako cakwe Yesu cilatucafwa kushiba mbweenga twatondesha ayi tulisuni Lesa. Amubelenge Luka 6:12 alimwi a Joni 15:10; 17:26. Pesule lyakubelenga lilembo lyomwi alyomwi, amubandike mwiipusho uyu:
Ino inga twatondesha buyani ayi tulisuni Yehova bweenka mbuli Yesu?
Yesu alibasuni abuumbi Baishi ba kwiculu aboobo wakalinga kubandikaabo lyoonse kwiinda mukupaila
5. Yesu wakalinga kunyumfwila nkumbu bantu batacite shiyandika
Yesu wakalinga kubikila maano abuumbi kushintu shiyandika bamwi. Nabi ndyaakalinga kulemete, wakalinga kusebensesha ciindi ankusu shakwe kwaamba ayi acafwe bamwi. Amubelenge Maako 6:30-44, akubandika miipusho iyi:
Kweelana alilembo ili, ino Yesu wakatondesha buyani ayi wakalinga kubikila maano kubamwi?—Amubone mavesi 31, 34, 41, a 42.
Ino nciinshi cakapa Yesu kucafwa bantu?—Amubone vesi 34.
Mukwiinga Yesu alakonkela mibo yakwe Yehova, ino shintu shoonse nshaakalinga kucita shilatwiisha nshi pali Yehova?
Ino cakubonenaako cakwe Yesu cakubikila maano kubamwi inga twacikonkela buyani?
6. Yesu wakalinga kucite mushimu wa bwaabi
Nabi kwaamba ayi Yesu taakalinga kucite shintu shiinji wakalinga kwaabilako bamwi. Aswebo alatuyuminisha kuba amushimu wa bwaabi. Amubelenge Milimo 20:35, akubandika mwiipusho uyu:
Kweelana a Yesu nshaakaamba, ino nciinshi ceenga catupa kuba alusangalalo?
Amweebele VIDYO, lyalo akubandika mwiipusho utokonkelaawo.
Ino inga twatondesha buyani mushimu wa bwaabi nabi katutacite shintu shiinji?
Sa mulishi?
Baibo ilaiisha ayi tulyeelete kupaila kuli Yehova kwiinda muliina lyakwe Yesu. (Amubelenge Joni 16:23, 24.) Na twapaila munshila iyi, tulatondesha kulumba pasheesho Yesu nshaakacita kwaamba ayi tube beshicibusa bakwe Yehova.
BANTU BAMWI BALAAMBA AYI: “Lesa tatubikiliko maano nabi katupenga.”
Mukwiinga Yesu alakonkela mibo ya Baishi, ino nshaacita shilatondesha buyani ayi Yehova alatubikila maano?
CITEENTE CINENE
Yesu alisuni Yehova abantu. Mukwiinga Yesu uli mbuli Baishi, kwiiya shiinji pali Yesu kulaakumucafwa kumushiba kabotu Yehova.
Kwiindulukaamo
Ino inga twatondesha buyani ayi tulisuni Yehova bweenka mbuli Yesu?
Ino inga twatondesha buyani ayi tulisuni bantu bweenka mbuli Yesu?
Ino njimibo nshi yakwe Yesu njemusuni abuumbi?
AMULANGWETEEWO ASHIMWI
Amubone mibo imwi yakwe Yesu njeenga twakonkela.
Amwiiye ncociyandikila kupaila kwiinda muliina lyakwe Yesu.
Sa Baibo yakaambawo shili shoonse pali Yesu mbwaakalinga kuboneka?
“Ino Yesu Wakalinga Kuboneka Buyani?” (Makani acanika pa jw.org)
Ino nshiinshi nsheenga tweeya kucakubonenaako cakwe Yesu mbwaakalinga kulemeka banakashi?
“Lesa Alabona ayi Banakashi Balayandika” (Njashi Yamulindilishi, September 1, 2012)