CIIYO 12
Sheenga Shamucafwa Kutolelela Kwiiya Baibo
Kutolelela kwiiya Baibo inga kwamucafwa abuumbi. Nacibi boobo, cimwi ciindi teshi cuubu. Mpashi inga mwalisukama na mulaakutolelela kwiiya Baibo. Ino nceebonshi ncociyandikila kutolelela? Ino nciinshi ceenga camucafwa kutolelela kwiiya nabi ndyemwacana mapensho?
1. Ino nceebonshi kwiiya Baibo kulayandika?
“Maswi akwe Lesa ali anga ncintu cuumi alimwi alicite nkusu.” (Bene Ebulu 4:12) Baibo ilayandika mukwiinga ilatulwiita Lesa mbwaabona shintu alimwi ambwaamusuni. Teshi ikamucafwebo kuba alushibo sombi ilaakumucafwa akuba abusongo bwancinencine alimwi akulangila. Ciyandika abuumbi, Baibo inga yamucafwa kuba shicibusa wakwe Yehova. Alimwi kwiiya Baibo akukonkela nshemutokwiiya kulaakumucafwa kuba abuumi bubotu.
2. Ino nceebonshi ncotuyandikila kushiba kuyandika kwa cancine camu Baibo?
Cancine camu Baibo cili anga mbuboni bwa muulo unene abuumbi. Ncoceeco Baibo ncoyaambila ayi ‘amuule cancine sombi kuteelesha kucuulisha.’ (Tushimpi 23:23) Kushiba kuyandika kwa cancine camu Baibo kulaakutucafwa kutolelela kwiiya nabi ndyetwacana mapensho.—Amubelenge Tushimpi 2:4, 5.
3. Ino Yehova inga wamucafwa buyani kutolelela kwiiya?
Mbuli Mulengi shinkusu shoonse alimwi shicibusa wanu, Yehova alisuni kumucafwa kwaamba ayi mwiiye pali nguwe. Inga wamupa ‘kusuna’ kwiiya pali nguwe alimwi a ‘nkusu shakucita’ boobo. (Amubelenge Bene Filipi 2:13, NWT.) Aboobo inga wamucafwa kwaamba ayi mutolelele kwiiya Baibo, na kukonkela nshemutokwiiya. Inga wamupa nkusu kwaamba ayi mucikoonshe kukoma mapensho amwi na kupikishikwa. Amupaile lyoonse akusenga Yehova kwaamba ayi amucaafwe kutolelela kwiiya Baibo.—1 Bene Tesalonika 5:17.
AMWIIYILEWO ASHIMWI
Amwiiye nsheenga mwaciita kwaamba ayi mutolelele kwiiya Baibo nabi ndyemucite shakucita shiinji na ndyemutopikishikwa. Lyalo amubone Yehova mbweenga wamucafwa kutolelela kwiiya.
4. Amushinishe kwaamba ayi kwiiya Baibo kwaba cintu ciyandika mubuumi bwanu
Cimwi ciindi inga twabona anga tulicite shakucita shiinji mubuumi cakwaamba ayi tatucitewo ciindi cakwiiya Baibo. Ino nciinshi ceenga catucafwa? Baibo ilaamba ayi: “Amushinishe shintu shiyandika abuumbi kwaamba ayi mutabi amulandu uli woonse alimwi akufumpula bamwi kushikila kubushiku bwakwe Klistu.” (Bene Filipi 1:10, NWT)
Ino nshintu nshi shimwi nshemubona ayi ‘shilayandika abuumbi’ mubuumi?
Ino inga mwacita buyani kwaamba ayi munoobika panembo kwiiya Baibo?
Na mwataanguna kubika saanti mukabaketi lyalo akweelesha kubikamo mabwe, mabwe inga taakwani
Ano na mwataanguna kubikamo mabwe, musena ulacaalamo wakwaamba ayi inga mwabikamo saanti. Amwebo na mwataanguna kubika panembo “shintu shiyandika abuumbi” mubuumi bwanu, mulaakucikonsha kushikumanisha alimwi akucaala aciindi cakucita shintu shimwi
Kwiiya Baibo kulatucafwa kushiba Lesa alimwi akumulambila. Amubelenge Mateyo 5:3, akubandika mwiipusho uyu:
Ino kubika panembo kwiiya Baibo kulatucafwa buyani?
5. Amutolelele kwiiya Baibo nabi ndyemutopikishikwa
Cimwi ciindi bamwi inga bamuyuminisha ayi mucileeke kwiiya Baibo. Amunyumfwe shakacitika kuli ba Francesco. Amweebele VIDYO, akubandika miipusho itokonkelaawo.
Kweelana anshomweebela muvidyo, ino beshicibusa alimwi abeshikamukowa baba Francesco bakacita buyani ndyebakabalwiita nshobakalinga kwiiya?
Ino nshoolwe nshi nshobakacana ceebo cakutolelela kwiiya?
Amubelenge 2 Timoti 2:24, 25, akubandika miipusho iyi:
Ino mukwashi wanu ababyaanu balaambawo buyani pakwiiya Baibo kwanu?
Kweelana amavesi aya, ino mulyeelete kucita buyani na umwi taakwe kukondwa kwaamba ayi mutokwiiya Baibo? Ino nceebonshi?
6. Amucinke manungo muli Yehova kwaamba ayi amucaafwe
Kuba abushicibusa buyumu a Yehova kulaakutupa kusuna kucita shimusangalasha. Nacibi boobo, inga caba ciyumu kwaalulako shimwi kwaamba ayi tunokonkela kuyanda kwakwe Yehova mubuumi bwesu. Na mwalinyumfwa boobo mutabooleli mwisule, Yehova alaakumucafwa. Amweebele VIDYO, akubandika miipusho itokonkelaawo.
Kweelana anshomweebela muvidyo, ino ba Jim bakacita buyani kwaamba ayi bacite shisangalasha Yehova?
Ino nciinshi camuyuminisha pashintu nshebakacita?
Amubelenge Bene Ebulu 11:6, akubandika miipusho iyi:
Ino Yehova alaakubacitila nshi abo “bamuyandoola”—nkokwaamba ayi abo beelesha cankusu kwaamba ayi bamushiibe akucita shimusangalasha?
Ino makani aya amupa kushiba ayi Yehova alalinyumfwa buyani na wabona mbomutokweelesha cankusu kwaamba ayi mwiiye Baibo?
BAMWI INGA BAMWIIPUSHA AYI: “Ino nciinshi ncomutokwiiyila Baibo a Bakamboni Bakwe Yehova?”
Ino inga mwakumbula buyani?
CITEENTE CINENE
Nabi kwaamba ayi kwiiya Baibo teshi cuubu, inga kwamucafwa kusangalala mubuumi kwamuyayaya. Yehova alaakumupa cilambu na mwatolelela kucinka manungo muli nguwe.
Kwiindulukaamo
Ino nceebonshi cancine camu Baibo cilayandika abuumbi kuli ndimwe?
Ino inga mwacita buyani kwaamba ayi “mushinishe shintu shiyandika abuumbi”?
Ino nceebonshi mulyeelete kusenga Yehova kwaamba ayi amucaafwe kutolelela kwiiya Baibo?
AMULANGWETEEWO ASHIMWI
Amwiiye shintu shili 4 shacafwa baanji kusebensesha kabotu ciindi.
“Mbweenga Mwasebensesha Kabotu Ciindi” (Sinsimuka!, February 2014)
Amubone Yehova mbwaakacafwa mwanakashi umwi wakalinga kweebetwe kumusankwa watakalinga kunyumfwishisha cakapa mukaakwe kwiiya Baibo.
Amubone musankwa umwi mbwakacafwikwa ceebo cakwaamba ayi mukaakwe wakatolelela kwiiya.
Cimwi ciindi Bakamboni Bakwe Yehova balabekeshekwa ayi balapaansaanya mikwashi. Ano sa makani aya ngancine?
“Sa Bakamboni Bakwe Yehova Balapaansaanya Mikwashi?” (Makani acanika pa jw.org)