Pesule lyakuswa mumuunda wa Edeni, Adamu a Efa bakaba abaana baanji. Mwanaabo musankwa wakutaanguna Kaini, wakaba mulimi, lyalo wabili Abelo, wakaba mweembeshi.

Bushiku bumwi Kaini a Abelo bakabenga milambu kuli Yehova. Sa mulambu uli ushi? Mulambu ncipo cilibetele. Yehova wakasangalala pacipo cakapa Abelo kuteshi paceeco cakapa Kaini. Ici cakapa Kaini kukalala abuumbi. Yehova wakacenjesha Kaini ayi bukali bwakwe bulaakumupa kucita cintu cibiibi. Sombi Kaini taakwe kunyumfwa.

Kaini wakalwiita Abelo ayi: ‘Tiya mumuunda.’ Kabacili mumuunda, Kaini wakabukila mukwabo akumucaya. Ino Yehova wakacita buyani pasheeshi? Yehova wakaanisha Kaini kwiinda mukumutandila kumusena kulaale akwaalinga mukwashi wakwe. Alimwi taakwe kumusuminisha kuboolela ku mukwashi wakwe.

Ino nciinshi nceenga tweeyawo? Inga twakalala na shintu tashitokweenda kweelana ambotutoyeeya. Na twakalala nabi na bamwi babona ayi tulikalalite, tulyeelete kufwambaana kwaalula mbotutolinyumfwa kwaamba ayi tuleye kucita cintu cibiibi.

Mukwiinga Abelo wakalinga kusuni Yehova alimwi wakalinga kucita shiluleme, Yehova teshi akamulubewo. Lesa alaakumubusha Abelo mu paladaiso.

Mukuya kwaciindi, bantu bakafula abuumbi pacishi. Sombi baanji bakalinga kucita shibiibi. Baanjelo bamwi kwiculu abalo bakatalika kucita shibiibi. Bakaswa kwiculu akusa pacishi capanshi. Sa ulishi ncobakacitila boobo? Bakalinga kusuni kwaaluka akuba bantu kwaamba ayi beebe banakashi.

Baanjelo ndyebakeeba bakaba abaana basankwa. Baana aba bakalinga kucite nkusu abuumbi alimwi bakalinga kupensha bantu. Bakalinga kuuma bantu. Yehova taakwe kulekelela shintu shibiibi ishi kutolelela. Aboobo wakasalawo kuleta muyoba unene wakubanyonyoola.

Sombi kwakalinga musankwa umwi wakalinga kupuseneeko. Musankwa uyu wakalinga kusuni Yehova alimwi liina lyakwe wakalinga Nowa. Nowa wakalinga kweebete alimwi wakalinga kucite abaana basankwa botatwe, Shemu, Hamu, a Jafeti. Bana bakwe aba abalo bakalinga kweebete. Yehova wakalwiita Nowa kupanga bwaato bunene kwaamba ayi lakwe amukwashi wakwe bakapuluke muyoba unene. Bwaato ubu bwakalinga anga ncaanda cinene citoseela pamaanshi. Yehova wakalwiita Nowa ayi akanjishe ashinyama shiinji kwaamba ayi ashalo shikapuluke.

Nowa ndyebakamulwiita kupanga bwaato wakatalikaako peenka apo. Cakatola myaaka mpashi 50 kwaamba ayi lakwe amukwashi wakwe bamanishe kubupanga. Bakapanga bwaato kweelana a Yehova mbwaakabalwiita. Paciindi ici Nowa, wakacenjesha bantu pamakani a muyoba unene. Sombi taakuwo wakamunyumfwila.

Lyalo cakashika ciindi cakunjila mu bwaato. Leka tubone shakacitika.