Ino Yesu Klistu Ngani?

1. Ino Yesu wakaswa kuli?

Kushiyana abantu bamwi, Yesu wakalinga mungelo kwiculu kaatana kushalwa pa cishi. (Joni 8:23) Ngo wakalinga cilengwa cakutanguna cakwe Lesa, alimwi wakacafwilishako kulenga shintu shimwi shoonse. Lakwebo ngo wakalengwa kuli Yehova mwiine eenka, aboobo uleelela kwiitwa ayi Mwaana “eenkabo” wakwe Lesa. (Joni 1:14) Lesa wakalinga kwaamba a kucita shintu kwiinda muli Yesu, aboobo uleetwa ayi “Liswi.”—Amubelenge Tushimpi 8:22, 23, 30; Bene Kolose 1:15, 16.

2. Ino Yesu wakesa mukucita nshi pa cishi?

Lesa wakatuma Mwanaakwe pa cishi ndyaakalonsha buumi bwakwe kuswa kwiculu kusa mu kushalilwa muli mooye Maliya mu Yuda. Aboobo Lesa ngo ishi Yesu. (Luka 1:30-35) Yesu wakesa pa cishi (1) mu kwiisha lushinisho pali Lesa, (2) mu kututondesha mbwenga twacita kuyanda kwakwe Lesa nabi na katucite mapenshi, a (3) mu kwaaba buumi bwakwe kwaamba ayi “alubule” bantu.—Amubelenge Mateyo 20:28.

3. Ino nceebo nshi tulayandika kulubulwa?

Cilubula ncintu cilipilwa kwaamba ayi mwaangulule muntu ucite mulandu. (Kulonga 21:29, 30) Pakutanguna Lesa taakalinga kusuniwo ayi bantu banofwa a kucembela. Ino tulashiba buyani ayi mbocakalinga? Lesa wakaambila musankwa wakutanguna Adamu ayi na akacite ciitwa mu Baibo ayi “bubi,” ulaakufwa. Aboobo Adamu niinga taana kubisha niinga taafwi. (Matalikilo 2:16, 17; 5:5) Kweelana a Baibo, lufu ‘lwakesa’ mu cishi ceebo ca muntu womwi Adamu. Mbweeke ubo bubi a lufu shakaswa kuli Adamu shakashika ku bantu boonse. Kulubulwa kulayandika kwaamba ayi twaangululwe kuswa ku lufu ndotwakapyana kuswa kuli Adamu.—Amubelenge Bene Loma 5:12; 6:23.

Ino ngani wakalinga kweelete kutulubula? Na twafwa tulalipila cilambu ca bubi bwesu sobene. Ncakwiila taaku muntu wenga walubula bantu bamwi.—Amubelenge Kulumbaisha 49:7-9.

4. Ino Yesu wakafwita nshi?

Yesu taakalinga anga ndiswe, lakwe wakalinga kucite buumi bumaninite. Aboobo Yesu taakalinga kweelete kufwa kwaamba ayi alipile cilambu ca bubi bwakwe mukwiinga takalinga kubisha. Nacibi boobo, Yesu wakafwa kwaamba ayi alubule bantu bamwi ku bubi. Lesa wakasunisha bantu abuumbi ndyaakatuma Mwanaakwe ayi afwe ceebo ca ndiswe. Yesu alakwe wakatondesha lusuno kuli ndiswe kwiinda mu kunyumfwila ba Ishi a kwaaba buumi bwakwe kwaamba ayi atulubule ku bubi.—Amubelenge Joni 3:16; Bene Loma 5:18, 19.

5. Ino Yesu ulacita nshi cino ciindi?

Yesu ndyakalinga pa cishi, wakalinga kushilika balwashi, kubusha bafu, a kupulusha bantu ku shiloondesha. Aboobo wakatondesha nsheshi akacitile bantu bamunyumfwila kunembo. (Mateyo 15:30, 31; Joni 5:28) Yesu ndyakafwa, Lesa wakamubusha akumupa buumi bwa mushimu. (1 Pita 3:18) Mpeeke, Yesu wakaya mu kukala ku lulyo lwakwe Lesa, wakatalika kunolindila kushikila ciindi Yehova ndyakamupa nkusu sha kuba Mwaami ayi eendeleshe bantu pa cishi coonse. (Bene Ebulu 10:12, 13) Cino ciindi Yesu ngu Mwaami utokweendelesha kwiculu, alimwi bamunyumfwila balashimikila makani abotu ayo mu cishi coonse.—Amubelenge Danyelo 7:13, 14; Mateyo 24:14.

Onoono, Yesu ulaakusebensesha nkusu shakwe sha Bwaami kumanisha mapenshi a kunyonyoola bamucita shibi. Abo boonse bashoma muli Yesu a kumunyumfwila balaakuba abuumi mu paladaiso pa cishi.—Amubelenge Kulumbaisha 37:9-11.