MUTWI WAKWIIYA 22

Busongo Bweenga Bwatucafwa Mubuumi Bwesu

‘Yehova ulapa busongo.’—TUS. 2:6.

LWIIMBO 89 Amunyumfwile Akucana Shoolwe

NSHESHI TWIIYEa

1. Ino nceebonshi soonse tulayandika busongo buswa kuli Lesa? (Tushimpi 4:7)

SA KWAKALINGAWO ciindi ndyemwakalinga kweelete kusalawo cintu cimwi ciyandika? Cilyeelete mwakapaila akusenga busongo, mukwiinga mwakalinga kucishi ayi butoyandika. (Jemu. 1:5) Mwaami Solomoni wakalemba ayi: “Busongo ncecintu ciindaawo pashintu shoonse.” (Amubelenge Tushimpi 4:7.) Nacibi boobo, Solomoni taakalinga kwaamba pabusongo bwa bantu. Wakalinga kwaamba pabusongo buswa kuli Yehova Lesa. (Tus. 2:6) Ano sa busongo buswa kuli Lesa inga bwatucafwa kulwana mapensho apusenepusene ngotwiindaamo munshiku shino? Kweelana ansheshi twiiye mumutwi uyu inga twaamba ayi ee, inga bwatucafwa.

2. Ino nciinshi comwi ceenga catucafwa kuba abusongo bwancinencine?

² Cintu comwi ceenga catucafwa kuba abusongo bwancinencine, nkwiiya akukonkela makani akalinga kwiisha basankwa bobilo bakalinga basongo beenditeewo. Musankwa wakutaanguna ngweshi tubandikeewo ngu Solomoni. Baibo ilaamba ayi “Lesa wakapa Solomoni busongo, kunyumfwishisha kwa shintu shoonse alushibo luteelekwa.” (1 Baam. 4:29) Wabili ngweshi tubandikeewo ngu Yesu, uyo wakalinga kucite busongo bwiinditeewo pamuntu uli woonse wakekalawo pacishi capanshi. (Mate. 12:42) Kulansha kuli Yesu, bushinshimi bwakaamba ayi: ‘Mushimu wakwe Yehova ulaakumuselukila, ee, mushimu wa busongo akunyumfwishisha.’—Isa. 11:2.

3. Ino tutokwiiya nshi mumutwi uyu?

³ Lesa wakapa Solomoni a Yesu busongo bwiinditeewo, aboobo bakalinga kucikonsha kwaamba makani acafwa pashintu shiyandika abuumbi. Mumutwi uyu tutobandika pashintu shotatwe. Cakutaanguna ngamakani ambotweelete kubona maali, cabili, mbotweelete kubona ncito yakumubili, alimwi catatu, mbotweelete kulibona.

MBOTWEELETE KUBONA MAALI

4. Ino mbupusano nshi bwakalinga pakati kakwe Solomoni a Yesu?

⁴ Solomoni wakalinga mubile abuumbi, alimwi wakalinga kukala muŋanda ibotu abuumbi. (1 Baam. 10:7, 14, 15) Sombi Yesu taakalinga kucite shintu shiinji alimwi taakalinga kuciteewo aŋanda. (Mate. 8:20) Ano mukwiinga Solomoni a Yesu bakalinga kucite busongo buswa kuli Yehova Lesa, bakalinga kubona shintu shakumubili munshila yeelete.

5. Ino Solomoni wakalinga kwaabona buyani maali?

⁵ Solomoni wakaamba ayi ‘maali alafuna.’ (Shiku. 7:12) Maali inga atucafwa kuula shintu nshetuyandika alimwi ashimwi nshetusunibo. Nabi kwaamba ayi wakalinga mubile abuumbi, wakalinga kucishi kwaamba ayi kuli shintu shimwi shiyandika abuumbi kwiinda maali. Kucakubonenaako, wakalemba ayi: “Ncibotu kuba ampuuwo ibotu kwiinda kuba abubile buunji.” (Tus. 22:1) Solomoni alimwi wakaamba ayi liinji bantu basuni maali tababiiwo alusangalalo pashintu nshebacite. (Shiku. 5:10, 12) Alimwi wakatucenjesha ayi tatweelete kunooyeeya ayi maali ncecintu ciyandika abuumbi. Wakaamba boobo ceebo cakwaamba ayi maali inga amana paciindi ciniinibo.—Tus. 23:4, 5.

Sa tulaalilwa kubika sha Bwaami panembo mubuumi bwesu ceebo ca mbotubona shintu shakumubili? (Amubone mapalagilafu 6-7)d

6. Ino Yesu wakalinga kushibona buyani shintu shakumubili? (Mateyo 6:31-33)

⁶ Yesu wakalinga kubona shintu shakumubili munshila yeelete. Wakalinga kusangalala ashakulya alimwi ashakunwa. (Luka 19:2, 6, 7) Ndyaakacita caankamiko cakutaanguna, Yesu wakapanga waini ubotu abuumbi. (Joni 2:10, 11) Alimwi pabushiku ndyaakafwa wakalinga kufwete cakufwala ca muulo unene. (Joni 19:23, 24) Nacibi boobo, Yesu taakalinga kubikila maano abuumbi kushintu shakumubili. Wakalwiita bashikwiiya bakwe ayi: “Taaku muntu weenga wasebensela baami bobilo . . . Tamukoonshi kusebensela Lesa abuboni.” (Mate. 6:24) Yesu wakeeisha ayi na citaanshi katubika sha Bwaami panembo mubuumi bwesu, Yehova alaakutupa shintu nshetuyandika.—Amubelenge Mateyo 6:31-33.

7. Ino kubona maali munshila yeelete kwakamucafwa buyani mukwesu umwi?

⁷ Kukonkela kululika kwakwe Yehova kwa busongo pamakani ambotweelete kubona maali, kwacafwa bamakwesu abenankashi baanji. Kucakubonenaako, mukwesu uteebete waliina lya Daniel wakaamba ayi: “Ndyendakalinga mwanike, ndakasalawo kubona shintu shakumushimu kuba shintu shiyandika abuumbi mubuumi bwangu.” Mukwiinga alekala buumi bwakutalila shiinji, mukwesu uyu wacikonsha kusebensa ncito shipusenepusene mulibunga lyakwe Lesa. Wakeelikawo akwaamba ayi: “Inga ndaamba cakuswa panshi lya moyo kwaamba ayi ndalinyumfwa kabotu abuumbi pakusala kwangu. Ncakutatoonsha kwaamba ayi nindakasalawo kubona maali mbuli cintu ciyandika abuumbi, naakwiinga ndakapanga maali aanji. Nacibi boobo, naakwiinga nshikwe kucana beshicibusa bali kabotu abuumbi mbooncite. Naakwiinga ndakasala kubikila maano kukulangoola maali, naakwiinga nshiciteewo lusangalalo ndooncite pacecino ciindi, ulo ndondacana ceebo cakubikila maano kukusebensela Yehova. Taakuwo maali eenga eelanishikwa ku shoolwe Yehova nshaampa.” Aboobo ncakutatoonsha kwaamba ayi kubikila maano kushintu shakumushimu, kulacafwa abuumbi kwiinda kubikila maano kukulangoola maali.

KUBONA NCITO YAKUMUBILI MUNSHILA YEELETE

8. Ino tulishi buyani ayi Solomoni wakalinga kubona ncito yakumubili munshila yeelete? (Shikushimikila 5:18, 19)

⁸ Solomoni wakaamba ayi kusebensa cankusu inga kwapa muntu kuba alusangalalo, alimwi lusangalalo ulo “ncipo kuswa kuli Lesa.” (Amubelenge Shikushimikila 5:18, 19.) Wakalemba ayi: “Kusebensa cankusu nkokuleta mpindu.” (Tus. 14:23) Solomoni wakalinga kucishi ayi maswi aya ngancine. Wakalinga muntu usebensa cankusu! Wakayaka maanda, wakashanga myuunda ya minyansa, alimwi akupanga shishiba sha maanshi akutilila shisamu nshaakashanga. Alimwi wakayaka amandabala. (1 Baam. 9:19; Shiku. 2:4-6) Ncakutatoonsha wakasebensa cankusu, alimwi kucita boobo kwakamupa kuba usangalete. Nacibi boobo, Solomoni wakalinga kucishi kwaamba ayi kuli shiinji shiyandika kwaamba ayi acane lusangalalo lwancinencine. Aboobo wakacita shiinji muncito yakwe Yehova. Kucakubonenaako, wakatanjilila ncito yakuyaka tempele ibotu abuumbi yakulambililaamo Yehova, iyo yakatola myaaka 7 kuyakwa! (1 Baam. 6:38; 9:1) Pesule lyakwaamba ayi Solomoni wacita shintu shiinji shipusenepusene, wakesa mukushiba kwaamba ayi cintu ciyandika abuumbi muntu nceenga wacita, nkusebensela Yehova. Wakalemba ayi: “Ono shoonse shanyumfwika. Anu meelelesho amakani oonse ngaaya: Kolemeka Lesa akukonkela milawo yakwe.”—Shiku. 12:13.

9. Ino Yesu wakacita buyani kwaamba ayi atanoobikilabo maano abuumbi kuncito yakumubili?

⁹ Yesu wakalinga muntu usebensa cankusu. Ndyaakalinga mwanike, wakalinga kusebensa ncito yakubesa. (Maako 6:3) Ncakutatoonsha bashali bakwe balyeelete bakalumba kubacafwa kucana shiyandika sha mukwashi wabo uyo wakalinga unene. Alimwi mukwiinga Yesu wakalinga muntu umaninite, cilyeelete bantu bakalinga kushisuni shintu nshaakalinga kupanga. Nabi kwaamba ayi Yesu wakalinga kusebensa cankusu alimwi cakubikila maano, lyoonse wakalinga kushinisha kuba aciindi cakusebensela Yehova. (Joni 7:15) Mukuya kwaciindi ndyaakatalika ncito yaciindi coonse, wakalwiita baabo bakalinga kumukutika ayi: “Mutanoosebensela cakulya cimana, sombi kamusebensela cakulya cikalilila kushikila kubuumi butamaani.” (Joni 6:27) Mulikani lyapa Kalundu Yesu wakaamba ayi: “Amulibikile bubile bwanu kwiculu.”—Mate. 6:20.

Shikope: 1. John atosebensa mu ofesi yakwe mashiku. 2. Tom amunene umwi batosebensesha Malembo kuyuminisha nankashi umwi ndyebali muŋanda yakwe. — Ino inga twacita buyani kwaamba ayi tunookweelanya kabotu ciindi ncetusebensa ncito yakumubili alimwi akwaabanamo lubasu muncito yakwe Lesa? (Amubone mapalagilafu 10-11)e

10. Ino ndipenshi nshi bamwi ndyeenga bacana kuncito?

¹⁰ Kukonkela kululika kwa busongo bwakwe Yehova kulatucafwa kubona ncito yakumubili munshila yeelete. Mbuli Beneklistu, tulayuminishikwa “kusebensa cankusu . . . , incito ibotu.” (Efe. 4:28) Abo bakatunjisha ncito balabona kwaamba ayi tulashomeka alimwi tulasebensa cankusu. Alimwi cimwi ciindi inga batulumba abuumbi pancito njetusebensa. Ici inga catupa kusebensa mawoola aanji ceebo cakwaamba ayi tulisuni kuba ampuwo ibotu mbuli Bakamboni Bakwe Yehova, kubaabo bakatunjisha ncito. Ano kucita boobo, inga kwapa kwaamba ayi twaalilwe kuba aciindi cakuba pomwi amukwashi wesu na kucita shintu shakumushimu. Aboobo tulyeelete kwaalula shintu kwaamba ayi tunoocita shintu shiyandika abuumbi.

11. Ino mukwesu umwi wakeeya nshi pamakani akubona ncito yakumubili munshila yeelete?

¹¹ Mukwesu wacanike waliina lya William wakeeya kuyandika kwa kubona ncito yakumubili munshila yeelete kuswa kucakubonenaako ca mukwesu umwi ngwakalinga kusebensela. William wakaamba ayi: “Mukwesu ngondakalinga kusebensela, wakalinga cakubonenaako cibotu abuumbi cakubona ncito yakumubili munshila yakweelanya kabotu. Alasebensa cankusu alimwi alanyumfwana amakasitoma bakwe mukwiinga alasebensa kabotu ncito yakwe. Nacibi boobo, na ciindi ca kukotoka cashika alacileka kusebensa, lyalo alasebensesha ciindi alimwi ankusu shakwe kucafwa mukwashi wakwe akucita shintu shakumushimu. Alimwi sa mulishi? Mukwesu uyu ngumuntu womwi usangalete abuumbi pabantu mboonshi!”b

MBOTWEELETE KULIBONA

12. Ino Solomoni wakatondesha buyani ayi wakalinga kulibona munshila yeelete, ano ino mukuya kwaciindi wakacita buyani?

¹² Solomoni ndyaakalinga kusebensela Yehova cakushomeka, wakalinga kulibona munshila yeelete. Ndyaakalinga mwanike, Solomoni wakaliceesha akusumina kwaamba ayi taakalinga kucishi shiinji, aboobo wakalinga kuyandika butanjilishi bwakwe Yehova. (1 Baam. 3:7-9) Ndyaakatalikabo kweendelesha, Solomoni wakalinga kucishi kabotu mapensho esa ceebo cakulisumpula. Aboobo wakalemba ayi: “Kulisumpula kulatola mukunyonyoolwa, kulyuuma mucaamba kulalengesha muntu kuwa.” (Tus. 16:18) Nacibi boobo, mukuya kwaciindi Solomoni wakaalilwa kukonkela makani ngakaamba mwiine. Paciindi cimwi ndyaakalinga kweendelesha, wakalisumpula akwaalilwa kunyumfwila Yehova. Kucakubonenaako, mulawo womwi Yehova ngwakapa bantu bakwe wakalinga kwaamba ayi mwaami wa bene Ebulu ‘teelete kweeba banakashi baanji mukwiinga inga bamulengesha kuswa kuli Yehova.’ (Duto. 17:17) Solomoni wakapwaya mulawo uyu akuya mukweeba banakashi bali 700 abakasuwa bali 300, alimwi baanji tabakalinga kulambila Yehova! (1 Baam. 11:1-3) Mpashi Solomoni wakalinga kuyeeya ayi ishi inga tashimuleteli mapensho. Nacibi boobo, mukuya kwaciindi Solomoni wakacana mapensho ceebo cakutanyumfwila Yehova.—1 Baam. 11:9-13.

13. Ino kukutumana kuyeeya pa cakubonenaako cakwe Yesu cakuliceesha inga kwatucafwa buyani?

¹³ Yesu wakatolelela kuliceesha alimwi akulibona munshila yeelete. Kaatana kusa pacishi capanshi, Yesu wakacita shintu shiinji shibotu abuumbi muncito yakwe Yehova. Kwiinda muli Yesu, “Lesa wakalenga shintu shoonse, sha kwiculu alimwi asha mucishi capanshi.” (Kolo. 1:16) Ndyaakalinga kubombekwa, cilyeelete Yesu wakeebaluka shintu nshaakakumanisha ndyaakalinga abaIshi. (Mate. 3:16; Joni 17:5) Nacibi boobo, Yesu taakwe kulisumpula. Alimwi taakalinga kulibona ayi aliindite bamwi. Wakalwiita bashikwiiya bakwe ayi ‘taakwe kusa mukusebenselwa, sombi mukusebensela bamwi alimwi akwaaba buumi bwakwe kwaamba ayi alubule bantu baanji.’ (Mate. 20:28) Alimwi wakaamba ayi taakalinga kulicitilabo shintu mwiine palwaakwe. (Joni 5:19) Yesu wakalinga muntu uliceesha abuumbi! Aboobo wakatondesha cakubonenaako cibotu abuumbi ncotweelete kukonkela.

14. Ino maswi Yesu ngakaamba alatwiisha nshi pamakani ambotweelete kulibona?

¹⁴ Yesu wakaiisha bashikwiiya bakwe kulibona munshila yeelete. Paciindi cimwi, Yesu wakabayuminisha ayi: “Amisusu ya mumitwi yanu yoonse ilibelengetwe.” (Mate. 10:30) Maswi aya alatuyuminisha abuumbi bunene bunene na liinji tulalibona anga taakuwo mbotubete. Alatucafwa kushiba kwaamba ayi Ishiwesu wakwiculu alatubikilako maano abuumbi alimwi alatubona ayi tulayandika. Na Yehova alatusuminisha kumulambila alimwi alatubona ayi tuleelela kukala buumi butamaani mucishi cakwe cipya, tatweelete kuyeeya ayi kuyeeya kwakwe takubete kabotu.

Shikope: 1. John atoolikopa ndyaali pafwiifwi a motoka yakwe. 2. Tom atoolikopa pomwi abeshicibusa bakwe ndyebatocafwilisha mukubamba Musena Mpotucitila Kubungana Kunene. — Ino nciinshi ceenga cacitika na katulibona munshila itabete kabotu? (Amubone palagilafu 15)f

15. (a) Ino ngamakani nshi akaambwa mu Njashi Yamulindilishi pa mbotweelete kulibona? (b) Kweelana ashikope shili papeeji 24, ino nshoolwe nshi nsheshi tukeendwe na katubikila maano abuumbi kumbotulibona?

¹⁵ Myaaka 15 yaiinda, Njashi Yamulindilishi yakayuminisha makani ambotweelete kunoolibona munshila yeelete. Yakaamba ayi: “Tatweelete kunoolibona munshila yeenga yapa kwaamba ayi tutalike kulisumpula. Alimwi tatweelete kunoolibona munshila yeenga yatulengesha kunolinyumfwa anga taakuwo mbotubete. Sombi tulyeelete kunoolibona munshila yakweelanya kabotu, nkokwaamba ayi tulyeelete kwiibaluka kwaamba ayi kuli shintu shimwi nshetucita kabotu anshetwaalilwa kucita kabotu. Nankashi umwi wakaamba ayi: ‘Nshibete muntu mubiibi abuumbi, alimwi nshibete muntu uli kabotu kwiindaawo. Kuli shimwi nsheencita kabotu ashimwi nshentaciti kabotu, bweenka mbuli muntu uli woonse.’”c Aboobo twaboona kulibona munshila ili kabotu ncocibetele cibotu.

16. Ino nceebonshi Yehova alatupa butanjilishi bwa busongo?

¹⁶ Yehova alatupa butanjilishi bwa busongo kwiinda mu Maswi akwe. Alitusuni alimwi alisuni kwaamba ayi tunooba basangalete. (Isa. 48:17, 18) Cintu cibotu nceenga twasala kucita alimwi ceenga catupa kuba basangalete, nkutolelela kucita shintu shisangalasha Yehova. Kucita boobo kulaakutucafwa kuleya mapensho aanji acana baabo babikila bunene maano kukulangoola maali, kuncito yakumubili, na ku mbobalibona. Soonse atube bashinishite kucita shintu shitondesha ayi tuli basongo, lyalo akulengesha moyo wakwe Yehova kusangalala!—Tus. 23:15.

LWIIMBO 94 Tulalumba Ceebo ca Maswi Akwe Lesa

a Solomoni a Yesu bakalinga kucite busongo abuumbi. Yehova ngowakabapa busongo mbobakalinga kucite. Mumutwi uyu, tutobandika nsheenga tweeya kuswa kukululika kwakatanjililwa amushimu kwakwe Solomoni alimwi a Yesu. Tutokwiiya nshobakaamba pamakani ambotweelete kubona maali, incito yakumubili, alimwi ambotweelete kulibona. Alimwi tutokwiiya akukonkela busongo bwamu Baibo mbokwacafwa bamakwesu abenankashi.

b Amubone Njashi Yamulindilishi yamu Chitonga ya February 1, 2015 pamutwi utokwaamba ayi “Mbweenga Mwasangalala Kusebensa Ncito Iyumu.”

c Amubone Njashi Yamulindilishi yamu Chitonga ya August 1, 2005, pamutwi utokwaamba ayi “Baibo Inga Yamucafwa Kuba Basangalete.”

d BUSANSULUSHI BWASHIKOPE: Joni a Tom mbamakwesu bobilo bacanike bali mulibungano lyomwi. Joni liinji alabikila maano kukulama motoka yakwe. Tom alasebensesha motoka yakwe kucafwa bamwi kuya muncito yakushimikila alimwi akumabungano.

e BUSANSULUSHI BWASHIKOPE: Joni atosebensa ovataimu kuncito. Taasuniiwo kukalasha bakamunjisha ncito. Aboobo na lyoonse bamupa ncito ciindi ncaeelete kukotoka, alasumina. Macolesha eenka ayo, Tom utoosebensa mbuli musebenshi ucafwilisha, waya amunene umwi kukufwakasha kwa bweembeshi. Paciindi cimwi, Tom wakalwiita bakamunjisha ncito ayi liinji macolesha nceciindi ncaasebensesha muncito yakwe Yehova. Aboobo inga taasuminiiwo kusebensa paciindi ico.

f BUSANSULUSHI BWASHIKOPE: Joni atoobikilabo maano palwaakwe mwiine. Tom atoobikila maano abuumbi kushintu shakumushimu, aboobo ndyaatoocafwilisha muncito ya kubamba cipya Musena Mpotucitila Kubungana Kunene wacana beshicibusa baanji bapya.