CIIYO 28
Amutondeshe Kulumba Pashintu Yehova Alimwi a Yesu Nshobakamucitila
Ino mulalinyumfwa buyani na mubyaanu wamupa cipo cibotu? Ncakutatoonsha mulakondwa alimwi inga mwasuna kutondesha mubyaanu uyo kwaamba ayi mwalumba pacipo ico. Yehova a Yesu bakatupa cipo ciinditeewo abuumbi. Ino ncipo nshi, alimwi ino inga twatondesha buyani ayi tulalumba?
1. Ino nshiinshi nsheenga twaciita kwaamba ayi tutondeshe ayi tulalumba pacipo Lesa a Klistu ncobakatupa?
Baibo ilaamba ayi ‘uyo woonse ushoma [Yesu]’ inga waba abuumi butamaani. (Joni 3:16) Ino inga twatondesha buyani ayi tulashoma muli Yesu? Inga twacita boobo kwiinda mushintu nshetusala alimwi anshetucita. (Jemusi 2:17) Na katutondesha lushomo lwesu kwiinda mushintu nshetwaamba anshetucita, tulayumya bushicibusa bwesu a Yesu alimwi a Yehova.—Amubelenge Joni 14:21.
2. Ino ncakucitika cilibetele cili citupa coolwe cakutondesha kulumba kwesu pacintu cakatucitila Yehova a Yesu?
Macolesha Yesu kaatana kufwa, wakalwiita bashikwiiya bakwe nshila imwi mbweenga batondesha kulumba pa mulambu wakwe. Wakabalwiita kubungana pomwi kukubungana kulibetele Baibo nkoyaamba ayi “Mulalilo wa Mwaami,” na Ciibalusho ca lufu lwakwe Klistu. (1 Bene Kolinto 11:20) Yesu wakalinga kusuni kwaamba ayi batumwi bakwe—alimwi a Beneklistu bancine boonse banookwiibaluka kwaamba ayi wakaaba buumi bwakwe ceebo ca ndiswe. Aboobo Yesu wakaamba ayi: “Kamucita ceeci mukunjibaluka.” (Luka 22:19) Na mwacanikaako ku Ciibalusho, mulatondesha ayi mulalumba palusuno lwiinditeewo Yehova alimwi a Yesu ndobakatutondesha.
AMWIIYILEWO ASHIMWI
Amwiiye nshila shimwi mbweenga mwatondesha kulumba palusuno lwiinditeewo lwakatondesha Yehova a Yesu. Amubone Ciibalusho ca lufu lwakwe Klistu mbociyandika.
3. Kulumba kulatupa kucitawo comwi
Amuyeeye kwaamba ayi muntu wamupulusha ndyemwalinga kusuni kunwita pamaanshi. Sa muntu uyo inga mwamulubakobo paceeco ncaamucitila? Nabi sa inga mwasuna kucana nshila mbweenga mwatondesha ayi mulalumba pacintu ico ncaamucitila?
Yehova ngowakatupa buumi. Amubelenge 1 Joni 4:8-10, akubandika miipusho iyi:
Ino nceebonshi mulambu wakwe Yesu ncipo cilibetele?
Ino mulalinyumfwa buyani pacintu cakamucitila Yehova a Yesu?
Ino inga twatondesha buyani ayi tulalumba pacintu cakatucitila Yehova a Yesu? Amubelenge 2 Bene Kolinto 5:15 alimwi a 1 Joni 4:11; 5:3. Pesule lyakubelenga lilembo lyomwi alyomwi, amubandike mwiipusho uyu:
Kweelana alilembo ili, ino inga twacita buyani kwaamba ayi tutondeshe kulumba?
4. Amukonkele cakubonenaako cakwe Yesu
Nshila imwi mbweenga twatondesha kulumba nkwiinda mukukonkela cakubonenaako cakwe Yesu. Amubelenge 1 Pita 2:21, akubandika mwiipusho uyu:
Ino inga mwacita buyani kwaamba ayi mukonkele Yesu mwaakeenda?
Yesu wakalinga kwaasuni Maswi akwe Lesa, wakalinga kushimikila makani abotu, alimwi akucafwa bamwi
5. Amucanikeeko ku Ciibalusho ca lufu lwakwe Klistu
Kwaamba ayi mushibe shakacitika pa Mulalilo wa Mwaami wakutaanguna, amubelenge Luka 22:14, 19, 20. Lyalo amubandike miipusho iyi:
Ino nshiinshi shakacitika pa Mulalilo wa Mwaami?
Ino shinkwa awaini shileemikaninaako nshi?—Amubone mavesi 19 a 20.
Yesu wakalinga kusuni ayi bashikwiiya bakwe banoocita Mulalilo wa Mwaami linkanda lyomwi pamwaaka pabushiku ndyaakafwa. Aboobo, Bakamboni Bakwe Yehova balabungana pomwi mwaaka amwaaka kwiibaluka lufu lwakwe Klistu kweelana amulawo ngwakapa. Kwaamba ayi mushibe shiinji pakubungana uku, amweebele VIDYO. Lyalo amubandike mwiipusho utokonkelaawo.
Ino nciinshi cicitika pa Ciibalusho?
Shinkwa uleemikaninaako mubili umaninite wakwe Yesu, ngwaakaaba ceebo ca ndiswe. Waini uleemikaninaako bulowa bwakwe
BANTU BAMWI BALAAMBA AYI: “Ciyandika kwaamba ayi muntu apuluke nkushomabo muli Yesu.”
Ino lilembo lya Joni 3:16 alimwi a Jemusi 2:17 inga mwalisebensesha buyani kwaamba ayi mucafwe muntu kushiba ayi kuli shiinji shiilikitwe mukushoma muli Yesu?
CITEENTE CINENE
Tulatondesha kulumba pacintu Yesu ncaakatucitila kwiinda mukushoma muli nguwe alimwi akucanika ku Ciibalusho ca lufu lwakwe.
Kwiindulukaamo
Ino kushoma muli Yesu cilaamba nshi?
Ino inga mwatondesha buyani ayi mulalumba pacintu cakamucitila Yehova alimwi a Yesu?
Ino nceebonshi kucanika ku Ciibalusho ca lufu lwakwe Klistu kulayandika abuumbi?
AMULANGWETEEWO ASHIMWI
Ino lufu lwakwe Klistu lulatuyuminisha kucita nshi?
Amwiiye shiinji pamakani alushomo ansheenga mwaciita kwaamba ayi mutondeshe lushomo.
“Amutondeshe ayi Mulashoma Shishomesho Shakwe Yehova” (Njashi Yamulindilishi, October 2016)
Amubone mwanakashi umwi mbwaakaya panembo pesule lyakwiiya pamakani amulambu wakwe Klistu ndyemutobelenga makani acite mutwi utokwaamba ayi “Ndalinyumfwa Kuba Usalalite, Muumi, alimwi Wakabumbulu.”
“Baibo Ilaalula Buumi bwa Muntu” (Njashi Yamulindilishi, August 1, 2011)
Amwiiye pabaabo balyaako shinkwa akunwako waini pabushiku bwa Ciibalusho ncobabetele baniini.