Bwaami bwakwe Lesa ngomakani ayandika abuumbi aambwa mu Baibo. Kwiinda mu Bwaami bwakwe, Yehova alaakukumanisha luyaando lwakwe lwakwaalula cishi capanshi kuba Paladaiso. Ino Bwaami bwakwe Lesa nciinshi? Ino tulishi buyani ayi butokweendelesha pacecino ciindi? Ino nshiinshi nshobwakakumanisha kale? Alimwi ino nshiinshi nsheshi bukakumanishe kunembo? Mulaakucana shikumbulo kumiipusho iyi muciiyo ici alimwi ashiiyo shobilo shitokonkelaawo.

1. Ino Bwaami bwakwe Lesa nciinshi, alimwi ino Mwaami wa Bwaami ubu ngani?

Bwaami ni mfulumeende Yehova Lesa njaakabika. Mwaami wa mfulumeende iyi ngu Yesu Klistu, uyo weendelesha kuswa kwiculu. (Mateyo 4:17; Joni 18:36) Baibo ilaamba pali Yesu ayi: ‘Alaakunookweendelesha mbuli Mwaami . . . kwamuyayaya.’ (Luka 1:32, 33, NWT) Mbuli Mwaami wa Bwaami bwakwe Lesa, Yesu ngweshi akanookweendelesha bantu boonse pacishi capanshi.

2. Ino mbaani beshibakanookweendelesha a Yesu?

Yesu taabete eenka mubweendeleshi. “Bantu kuswa kumishobo yoonse amilaka yoonse amikowa yoonse ashishi shoonse . . . balaakuba baami beshibakanoolela pacishi.” (Ciyubululo 5:9, 10) Ino mbongaye beshibakanookweendelesha a Klistu? Kuswabo ciindi Yesu ndyaakalinga pacishi capanshi, bantu baanji balaba bashikwiiya bakwe. Ano sa boonse balaakunolela anguwe? Sobwe. Bali 144, 000 beenkabo mbeshi bakaye mukulela anguwe kwiculu. (Amubelenge Ciyubululo 14:1-4.) Beneklistu bamwi boonse pacishi capanshi balaakuba balelwa ba Bwaami.—Kulumbaisha 37:29.

3. Ino Bwaami bwakwe Lesa buliinditeewo buyani pa mfulumeende sha bantu?

Nabi kwaamba ayi beendeleshi ba bantu beeleshe buyani kucita shintu shibotu, tabaciteewo nkusu shakukumanisha shintu shoonse nsheenga basuna kucita. Mukuya kwaciindi balakushikwaawo pabweendeleshi. Alimwi abo beenga besaawo inga kabatacitewo luyaando lwakucafwa bantu. Ano Yesu Mweendeleshi wa Bwaami bwakwe Lesa, teshi akakushikweewo pabweendeleshi. Mukwiinga Lesa “ulaakuleta bwaami ubo bweshi bukabule kumana.” (Danyelo 2:44) Yesu alaakunookweendelesha cishi coonse, alimwi teshi akatondesheewo kasalulushi. Mukwiinga ngushilusuno, ulicite nkumbu abululami, alimwi alaakwiisha bantu kutondeshanya nkumbu, lusuno, akutalyatililana.—Amubelenge Isaya 11:9.

4. Mfulumeende icite nkusu njeshi ikanookweendelesha pacishi coonse

Yesu Klistu alicite nkusu shakweendelesha kwiinda mweendeleshi uli woonse wakeendeleshawo kale. Amubelenge Mateyo 28:18, akubandika mwiipusho uyu:

• Ino mbupusano nshi buli pakati ka nkusu shakweendelesha shicite Yesu ashicite beendeleshi ba bantu?

Beendeleshi ba bantu liinji balakushikwaawo, alimwi womwi awomwi aleendeleshabo kumusena womwi. Ano ino mbuyani Bwaami bwakwe Lesa? Amubelenge Danyelo 7:14, akubandika miipusho iyi:

• Ino nceebonshi ncintu cibotu kwaamba ayi Bwaami bwakwe Lesa ‘teshi bukanyonyoolwe’?

• Ino nceebonshi ncintu cibotu kwaamba ayi bulaakweendelesha pacishi coonse?

5. Mfulumeende sha bantu shilyeelete kukushikwaawo

Ino nceebonshi Bwaami bwakwe Lesa bulyeelete kukushawo mfulumeende sha bantu? Amweebele VIDYO, lyalo akubandika mwiipusho utokonkelaawo.

VIDEO: Lubasu lwa Vidyo ya—Ino Bwaami Bwakwe Lesa Nciinshi? (1:41)

• Ino nshiinshi shaswaamo mubweendeleshi bwa bantu?

Amubelenge Shikushimikila 8:9, akubandika miipusho iyi:

• Sa mutoobona ayi Bwaami bwakwe Lesa bulyeelete kukushawo mfulumeende sha bantu? Ino nceebonshi?

6. Beendeleshi ba Bwaami bwakwe Lesa mbantu batushi kabotu

Mukwiinga Mwaami wesu, Yesu, wakekalawo mbuli muntu, inga wacikonsha “kutunyumfwila nkumbu mukulefuka kwesu.” (Bene Ebulu 4:15) Yehova ngowakasala basankwa abanakashi bashomeka bali 144,000 “kuswa mumishobo yoonse amilaka yoonse amikowa yoonse ashishi shoonse,” abo beshibakanookweendelesha a Yesu.—Ciyubululo 5:9.

• Sa cilamuyuminisha kushiba kwaamba ayi Yesu abaabo beshibakanookweendelesha anguwe mbantu bacishi kabotu mbocibete kuba muntu? Ino nceebonshi?

7. Bwaami bwakwe Lesa bulicite milawo iindite pamilawo ya mfulumeende sha bantu

Mfulumeende shilabika milawo njobayeeya ayi inga yacafwa akushitilisha balelwa. Bwaami bwakwe Lesa abwalo bulicite milawo balelwa njobeelete kukonkela. Amubelenge 1 Bene Kolinto 6:9-11, akubandika miipusho iyi:

• Mutoobona buyani, ino cishi inga caba buyani na bantu boonse kabakonkela milawo yakwe Lesa?a

• Sa mutoobona ayi cilibo kabotu Yehova kulangila balelwa ba Bwaami bwakwe kukonkela milawo njaakabika? Ino nceebonshi?

• Ino nciinshi citondesha kwaamba ayi bantu batakonkeli milawo yakwe Lesa inga baaluka?—Amubone vesi 11.

CITEENTE CINENE

Bwaami bwakwe Lesa ni mfulumeende yancine yakwiculu yeshi ikanookweendelesha pacishi coonse.

Kwiindulukaamo

• Ino mbaani beendelesha mu Bwaami bwakwe Lesa?

• Ino Bwaami bwakwe Lesa buliinditeewo buyani pa mfulumeende sha bantu?

• Ino Yehova alalangila nshi ku balelwa ba Bwaami bwakwe?

AMULANGWETEEWO ASHIMWI

Amubone Yesu nshakaamba pa Bwaami bwakwe Lesa nkobucanika.

“Sa Bwaami Bwakwe Lesa Ncintu Cili Mumoyo Wanu?” (Makani acanika pa jw.org)

Ino nceebonshi Bakamboni Bakwe Yehova balabona ayi kushomeka ku Bwaami bwakwe Lesa kulayandika abuumbi kwiinda kunyumfwila mfulumeende sha bantu?

Bakalyaaba ku Bwaami Bwakwe Lesa (1:43)

Amwiiye Baibo nshoyaamba paba 144,000 abo Yehova mbwaasala kuya mukweendelesha pomwi a Yesu.

“Ino Mbaani Baya Kwiculu?” (Makani acanika pa jw.org)

Ino nciinshi cakapa mwanakashi wakalinga mujeele kushoma ayi Lesa eenkabo ngweenga wamana mapensho pacishi?

“Mbondakesa Mukushiba Cilengesha Bantu Kunoolyatililana” (Sinsimuka!, November 2011)

Bwaami bwakwe Lesa bwakatalika kweendelesha kwiculu mu 1914. Ici nceciindi inshiku shakweelaako ndyeshakatalika. Ino tulishi buyani? Tutoobona Baibo nshoyakaambila limwi, shitoocitika mucishi alimwi amicito ya bantu kuswabo mu 1914.

1. Ino nshiinshi Baibo nshoyakaambila limwi?

Libuku lyamu Baibo lyakwe Danyelo lilatondesha ayi Bwaami bwakwe Lesa bwakalinga kusa mukutalika kweendelesha kumamanino aciindi ciitwa ayi “mankanda 7.” (Danyelo 4:16, 17) Pesule lya myaaka iinji, ciindi ici Yesu wakaciita ayi “ciindi cibikitwe ca shishi,” alimwi wakaiisha ayi ciindi ici cakalinga kacitana kumana. (Luka 21:24) Kweelana ambweshi twiiye, ciindi ciitwa ayi mankanda 7 cakamana mu 1914.

2. Ino nshiinshi shitoocitika mucishi, alimwi njimibo nshi bantu njobatondesha kuswabo mu 1914?

Bashikwiiya bakwe Yesu bakamwiipusha ayi: “Ino nciinshi ceshi cikabe citondesho cakubaako kwako alimwi acamamanino abweende bwashintu?” (Mateyo 24:3, NWT) Yesu ndyaakalinga kubakumbula wakaamba shintu shiinji shakalinga kusa mukucitika pesule lyakutalika kweendelesha kwiculu mbuli Mwaami wa Bwaami bwakwe Lesa. Wakaamba ayi kulaakuba nkondo, nsala, alimwi ashitentaanshi. (Amubelenge Mateyo 24:7.) Alimwi Baibo yakaambila limwi ayi mibo ya bantu “munshiku shakweelaako” ilaakulengesha kwaamba ayi buumi bube ‘buyumu abuumbi.’ (2 Timoti 3:1-5) Ishi shoonse shakatalika kuboneka bunene mu 1914.

3. Ino nceebonshi shintu shabica abuumbi kuswabo ciindi Bwaami bwakwe Lesa ndyebwakatalika kweendelesha?

Ndipakeendabo ciindi ciniini Yesu ndyaakatalika kweendelesha kwiculu mu Bwaami bwakwe Lesa, wakalwana Satana ashibanda shakwe. Satana wakakomwa. Baibo ilaamba ayi “wakawaalwa panshi pantu pomwi abaanjelo bakwe boonse.” (Ciyubululo 12:9,10, 12) Satana alikalalite abuumbi mukwiinga alicishi kwaamba ayi alaakunyonyoolwa. Nceceeco ncaaletela kucisa alimwi akupenga pacishi. Ici ncocalengesha kwaamba ayi shintu shibice abuumbi pacishi! Ano Bwaami bwakwe Lesa bulaakukushaawo mapensho oonse.

AMWIIYILEWO ASHIMWI

4. Bushinshimi bwamu Baibo bulatondesha ayi Bwaami bwakwe Lesa bwakatalika kweendelesha mu 1914

VIDYO: Bwaami Bwakwe Lesa Bwakatalika Kweendelesha mu 1914 (5:02)

Lesa wakalengesha Mwaami Nebukadinesa waku Babiloni kulota ciloto. Mwaami uyu nshaakalota alimwi a Danyelo mbwakasansulula ciloto ncocakalinga kwaamba, shilatondesha kwaamba ayi ciloto ici cakalinga kwaamba pa bwaami bwakwe Nebukadinesa alimwi a Bwaami bwakwe Lesa.—Amubelenge Danyelo 4:17.a

Amubelenge Danyelo 4:20-26, akusebensesha caati kukumbula miipusho itokonkelaawo:

• (A) Ino Nebukadinesa wakabona nshi muciloto?—Amubone vesi 20 a 21.

• (B) Ino nciinshi cakalinga kusa mukucitika kucisamu?—Amubone vesi 23.

• (C) Ino nciinshi cakalinga kusa mukucitika pesule lya “mankanda 7”?—Amubone vesi 26.

Ciloto Cakwe Nebukadinesa Cakalinga Kwaamba Pacisamu Mbocikumite ku Bwaami Bwakwe Lesa

BUSHINSHIMI (Danyelo 4:20-36)

Bweendeleshi

(A) Cisamu cinene

Kumana kwa bweendeleshi

(B) “Amutimbule cisamu,” mucileeke kushikila ciindi ciitwa ayi “mankanda 7” cikeende

Kutalika alimwi kwa bweendeleshi

(C) ‘Bwaami bulaakubooshekwa mumaansaanu alimwi’

Mukukumanishikwa kwakutaanguna kwa bushinshimi ubu . . .

• (D) Ino cisamu cakalinga kwiimikaninaako baani?—Amubone vesi 22.

• (E) Ino ndilili ndyakacileka kweendelesha?—Amubelenge Danyelo 4:29-33.

• (F) Ino nciinshi cakacitikila Nebukadinesa pesule lya kwaamba ayi ciindi ciitwa ayi “mankanda 7” camana?—Amubelenge Danyelo 4:34-36.

KUKUMANISHIKWA KWAKUTAANGUNA

Bweendeleshi

(D) Nebukadinesa, Mwaami waku Babiloni

Kumana kwa bweendeleshi

(E) Pesule lya mwaaka wa 606 B.C.E., Nebukadinesa wakacinkuka akucileka kweendelesha kwa myaaka 7

Kutalika alimwi kwa bweendeleshi

(F) Nebukadinesa wakaba kabotu akutalika kweendelesha alimwi

Mukukumanishikwa kwabili kwa bushinshimi ubu . . .

• (G) Ino cisamu cakalinga kwiimikaninaako baani?—Amubelenge 1 Makani 29:23.

• (H) Ino ndilili ndyebakacileka kweendelesha? Ino tulishi buyani ayi tabakalinga kweendelesha nabi Yesu ndyaakalinga pacishi capanshi?—Amubelenge Luka 21:24.

• (I) Ino ndilili alimwi nkuli bwaami ubu nkobwakatalika kweendelesha alimwi?

KUKUMANISHIKWA KWABILI

Bweendeleshi

(G) Bamaami ba bene Isilaeli bakalinga kwimikaninaako bweendeleshi bwakwe Lesa

Kumana kwa bweendeleshi

(H) Jelusalemu yanyonyoolwa, aboobo beendeleshi ba bene Isilaeli bacileka kweendelesha kwa myaaka 2,520

Kutalika alimwi kwa bweendeleshi

(I) Yesu watalika kweendelesha kwiculu mbuli Mwaami wa Bwaami bwakwe Lesa

5. Shintu shakaaluka kuswabo mu 1914

Amweebele VIDYO.

VIDYO: Shintu Shakaaluka Kuswabo mu 1914 (1:10)

Yesu wakaambila limwi shakalinga kusa mukucitika pacishi pesule lyakwaamba ayi watalika kweendelesha. Amubelenge Luka 21:9-11, akubandika mwiipusho uyu:

• Ino nshiinshi pasheesho Yesu nshakaamba nshomwakabonaawo na nshomwakanyumfwawo?

Mutumwi Paulo wakaamba pamibo ya bantu mbweshi ikabe munshiku shakweelaako. Amubelenge 2 Timoti 3:1-5, akubandika mwiipusho uyu:

• Ino njimibo ili payeeyi njetwabelenga njomwakabonaawo?

6. Kweendelesha kwa Bwaami bwakwe Lesa kulyeelete kutuyuminisha

Amubelenge Mateyo 24:3, 14, akubandika miipusho iyi:

• Ino nincito nshi iyandika itootondesha ayi Bwaami bwakwe Lesa butokweendelesha?

• Ino inga mwacita buyani kwaamba ayi mwaabanemo lubasu muncito iyi?

Bwaami bwakwe Lesa butokweendelesha, alimwi bushiku ndyeshi bukatalike kweendelesha pacishi buli pafwiifwi. Amubelenge Bene Ebulu 10:24, 25, akubandika mwiipusho uyu:

• Ino nciinshi ncotweelete kucita soonse ‘ndyetutoobona bushiku ubu kabusena pafwiifwi’?

CITEENTE CINENE

Bushinshimi bwamu Baibo, alimwi ashitoocitika mucishi shilatondesha patuba kwaamba ayi Bwaami bwakwe Lesa bwakatalika kweendelesha. Tulatondesha ayi tulashoma cancine ici kwiinda mukushimikila makani abotu aamba pa Bwaami ubu alimwi akucanika kumabungano.

Kwiindulukaamo

• lno nciinshi cakacitika pesule lyakwaamba ayi ciindi ciitwa ayi mankanda 7 caambwa mulibuku lyakwe Danyelo camana?

• Ino nciinshi cimupa kushoma cakutatoonsha kwaamba ayi ncakwiila Bwaami bwakwe Lesa bwakatalika kweendelesha mu 1914?

• Ino inga mwatondesha buyani ayi mulashoma ayi Bwaami bwakwe Lesa bwakatalika kweendelesha?

AMULANGWETEEWO ASHIMWI

Amubone beshikulemba makani akale kale alimwi abantu bamwi nshobaamba pa kwaaluka kwashintu mucishi kuswabo mu 1914.

“Ciindi Mibo ya Bantu Ndyeyakatalika Kubica Abuumbi” (Sinsimuka!, April 2007)

Amubelenge pa musankwa umwi mbwakaalula buumi bwakwe pesule lyakubelenga bushinshimi mbotucana pa Mateyo 24:14.

“Ndakalinga Kusuni Kusekana Boola Abuumbi!” (Njashi Yamulindilishi No. 3 2017)

Ino tulishi buyani ayi bushinshimi bwaambwa mulilembo lyakwe Danyelo capita 4 bulaamba pa Bwaami bwakwe Lesa?

“Ino Bwaami Bwakwe Lesa Bwakatalika Lili Kweendelesha? (Lubasu 1)” (Njashi Yamulindilishi, October 1, 2014)

Ino nciinshi citondesha ayi ciindi ciitwa ayi “mankanda 7” caambwa mulibuku lyakwe Danyelo capita 4 cakamana mu 1914?

“Ino Bwaami Bwakwe Lesa Bwakatalika Lili Kweendelesha? (Lubasu 2)” (Njashi Yamulindilishi, November 1, 2014)

Bwaami bwakwe Lesa bwakatalika kale kweendelesha. Conoonobo bulakwaalula shintu pacishi capanshi. Amuleke tubandike pashintu shibotu Bwaami nsheshi bukacite na bukatalike kweendelesha pacishi coonse.

1. Ino Bwaami bwakwe Lesa bulaakuleta buyani luumuno abululami pacishi capanshi?

Yesu, Mwaami wa Bwaami bwakwe Lesa, alaakunyonyoola bantu boonse bacita shibiibi alimwi amfulumeende sha bantu pankondo ya Amagedoni. (Ciyubululo 16:14, 16) Paciindi ico, cishomesho camu Baibo caamba ayi: ‘Kwacaalabo kaciindi kaniini, bamucita shibi balaakushimingana’ cilaakukumanishikwa. (Kulumbaisha 37:10) Kwiinda mu Bwaami, Yesu alaakushinisha kwaamba ayi pacishi coonse capanshi paba luumuno abululami.—Amubelenge Isaya 11:4.

2. Ino shintu shilaakuba buyani na Lesa akakumanishe kuyanda kwakwe pacishi capanshi?

Mubweendeleshi bwa Bwaami bwakwe Lesa, ‘baluleme balaakupyana cishi, alimwi balaakunookalaamo kwamuyayaya.’ (Kulumbaisha 37:29) Amuyeeyebo mbweshi cikabe kukala mucishi muswitebo bantu baluleme, basuni Yehova alimwi basunene! Teshi kukabeewo kuciswa alimwi bantu boonse balaakukala kwamuyayaya.

3. Ino nshiinshi Bwaami bwakwe Lesa nsheshi bukacite pesule lyakunyonyoola bantu bacita shibiibi?

Pesule lyakunyonyoola bantu bacita shibiibi, Yesu alaakweendelesha mbuli Mwaami kwa myaaka 1,000. Paciindi ici, Yesu pomwi aba 144,000 balaakucafwa bantu pacishi kwaamba ayi babe bamaninite. Kumamanino amyaaka iyi, cishi capanshi cilaakuba paladaiso alimwi bantu boonse balaakunosangalala ceebo cakunyumfwila milawo yakwe Yehova. Lyalo Yesu alaakuboosha Bwaami kuli Yehova, Baishi. Liina lyakwe Yehova lilaakwiindaawo ‘kusalashikwa.’ (Mateyo 6:9, 10) Paciindi ici, bantu boonse balaakushiba kwaamba ayi Yehova ngu Mweendeleshi uli kabotu alimwi alabikila maano kubalelwa. Yehova alaakunyonyoola Satana ashibanda shakwe abaabo boonse beshi bakapondokele buleelo Bwakwe. (Ciyubululo 20:7-10) Shintu shibotu Bwaami nsheshi bukacite shilaakutolelela kubaako kwamuyayaya.

AMWIIYILEWO ASHIMWI

4. Bwaami bwakwe Lesa bulaakukushaawo mfulumeende sha bantu

“Muntu aleendelesha muntunyina munshila imuletela mapensho.” (Shikushimikila 8:9, NWT) Kwiinda mu Bwaami bwakwe, Yehova alaakumana mapensho esa ceebo cakulyatililana uku.

Amubelenge Danyelo 2:44 alimwi a 2 Bene Tesalonika 1:6-8, akubandika miipusho iyi:

• Ino nshiinshi Yehova a Yesu nsheshi bakacite kumfulumeende sha bantu abaabo bali kulubasu lwa nshisho?

• Ino nshomweeya pali Yehova alimwi a Yesu shamucafwa buyani kushoma kwaamba ayi balaakutondesha bululami mushintu shoonse nsheshi bakacite?

5. Yesu ngu Mwaami weelela

Mbuli Mwaami wa Bwaami bwakwe Lesa, Yesu alaakucafwa bantu pacishi capanshi munshila shiinji. Amweebele VIDEO kwaamba ayi mubone Yesu mbwakatondesha ayi alisuni kucafwa bantu alimwi akwaamba ayi Lesa wakamupa nkusu shakucita boobo.

VIDEO: Yesu Wakatondesha Bwaami Nsheshi Bukacite (1:13)

Yesu ndyaakalinga pacishi capanshi, wakatondesha shintu Bwaami nsheshi bukacite. Ino nshoolwe nshi pasheeshi shatondeshekwa nshemutolangila bunene? Amubelenge malembo atokonkelaawo atotucafwa kwiiya shiinji pashoolwe isho.

6. Bwaami bwakwe Lesa bulaakulengesha shintu kubota

VIDEO: Shoolwe sha Bwaami Shili Kunembo (4:38)

Amubelenge Kulumbaisha 145:16, akubandika mwiipusho uyu:

• Ino kushiba kwaamba ayi Yehova ‘alaakusanina kabotu shoonse nshaakalenga’ kulamupa kulinyumfwa buyani?

CITEENTE CINENE

Bwaami bwakwe Lesa bulaakucita shintu Lesa nshaasuni kukumanisha. Bulakwaalula cishi capanshi coonse kuba paladaiso umo mweshi mukasule bantu bacita shibotu alimwi beshi bakanoopaila Yehova kwamuyayaya.

Kwiindulukaamo

• Ino Bwaami bwakwe Lesa bulaakulengesha buyani liina lyakwe Yehova kusalashikwa?

• Ino nceebonshi nceenga twashomena ayi Bwaami bwakwe Lesa bulaakukumanisha shishomesho shaambwa mu Baibo?

• Ino ncoolwe nshi ncomusunishi kubona pasheesho Bwaami nsheshi bukakumanishe?

AMULANGWETEEWO ASHIMWI

Amwiiye liswi lyakwaamba ayi Amagedoni ncolisansulula.

“Ino Inkondo ya Amagedoni Nciinshi?” (Makani acanika pa jw.org)

Amwiiye pashintu sheshi shikacitike muciindi ca ‘mapensho anene.’—Mateyo 24:21.

“Ino Mapensho Anene Nciinshi?” (Makani acanika pa jw.org)

Amubone mikwashi mbweenga yacita kwaamba ayi banooyeeya pashoolwe sha Bwaami shili kunembo.

Amuyeeye ayi Muli mu Paladaiso (1:50)

Amwiiye shimapolitiki umwi mbwakacana shikumbulo kumiipusho njaakalinga kucite mumutwi utokwaamba ayi, “Ndakalinga Kucite Miipusho Iinji Yakalinga Kumpensha.”

“Baibo Ilaalula Buumi bwa Muntu” (Njashi Yamulindilishi, January 1, 2012)