Ino Lesa Ngani?

Kuswabo kale kale, bantu balapaila balesa bapusenepusene. Nacibi boobo, Baibo ilaamba pali Lesa wiinditewo “balesa bamwi boonse.” (2 Makani 2:5) Ino ngani? Alimwi ino nciinshi cipa kwaamba ayi abe Lesa wiinditewo pabalesa bamwi boonse bantu mbobapaila? Muciiyo ici, mutokwiiya Lesa uyu nshaasuni ayi mushibe pali nguwe.

1. Ino liina lyakwe Lesa ngani, alimwi ino inga twashoma buyani ayi alisuni ayi tulishiibe?

Mu Baibo, alatulwiita liina lyakwe. Alaamba ayi: “Nebo ndime Yehova. Ili ndyeliina lyangu.” (Amubelenge Isaya 42:5, 8.) Muci Ebulu liina lyakwaamba ayi “Yehova” cilyeelete lilasansulula ayi “Alalengesha Shintu Kuba.” Yehova alisuni ayi tushibe liina lyakwe. (Kulonga 3:15) Ino inga twashiba buyani ayi Yehova alisuni ayi tushibe liina lyakwe? Mu Baibo, liina lyakwaamba ayi Yehova lilacanika mankanda eendilila 7,000!a Liina lyakwaamba ayi Yehova, lilasansulula “Lesa wancine kwiculu apacishi capanshi.”—Dutolonomi 4:39.

2. Ino Baibo ilatulwiita nshi pali Yehova?

Baibo ilaamba ayi pabalesa bamwi boonse bantu mbobapaila, Yehova ngo Lesa eenkabo wancine. Ino nceebonshi? Kuli sheebo shiinji. Yehova ngoocite nkusu shakweendelesha kwiculu apacishi capanshi, alimwi lakwe eenkabo ‘ngowiinditewo mucishi coonse capanshi’ (Amubelenge Kulumbaisha 83:18.) Ngo “Shinkusu Shoonse,” nkokwaamba ayi alicite nkusu shakucita cili coonse ncaasala kucita. ‘Ngowakalenga shintu shoonse’—kwiculu ashintu shoonse shicite buumi pacishi capanshi. (Ciyubululo 4:8, 11) Alimwi Yehova eenkabo ngowakalingaako, ngwaaliko alimwi alaakutolelela kubaako kwa muyayaya.—Kulumbaisha 90:2.

3. Lesa aleetwa amaswi abulemu aanji, sombi alicitebo liina lyomwi

Kwaamba ayi mushibe bupusano buli pakati ka maswi abulemu aliina lya muntu, amweebele VIDYO, lyalo akubandika mwiipusho utokonkelaawo.

VIDYO: Maswi Abulemu Aanji, Sombi Liina Lyomwi (0:41)

• Ino liina lilipusene buyani a maswi abulemu mbuli “Mwaami”?

Baibo ilaamba ayi bantu balapaila balesa alimwi abaami bapusenepusene. Amubelenge Kulumbaisha 136:1-3, akubandika mwiipusho uyu:

• Ino “Lesa wabalesa” alimwi “Mwaami wa bamaami” ngani?

4. Yehova alisuni ayi mushibe liina lyakwe akunoolisebensesha

VIDYO: Lubasu lwa Vidyo ya Sa Lesa Alicite Liina? (3:11)

• Mutoobona buyani, sa Lesa alisuni ayi liina lyakwe lishibikwe? Ino nceebonshi?

Yehova alisuni ayi bantu banoosebensesha liina lyakwe. Amubelenge Bene Loma 10:13, akubandika miipusho iyi:

• Ino nceebonshi ncociyandikila kusebensesha liina lyakwe Yehova?

• Ino mulalinyumfwa buyani na muntu weebaluka liina lyanu akunoomwiita liina ilyo?

• Mutoobona buyani, ino Yehova alanyumfwa buyani na katumwiita liina lyakwe?

5. Yehova alisuni ayi mube shicibusa wakwe

VIDYO: Kulangoola Lesa Wancine (8:18)

• Kweelana avidyo, ino kwiiya liina lyakwe Lesa kwakabacafwa buyani ba Soten?

Kamutana kuba bushicibusa amuntu umwi, liinji mulataanguna kushiba liina lyakwe. Amubelenge Jemusi 4:8a, akubandika miipusho iyi:

• Ino Yehova alisuni ayi mucite nshi?

• Ino kushiba akusebensesha liina lyakwe Lesa inga kwamucafwa buyani?

CITEENTE CINENE

Yehova ndyeliina lyakwe Lesa wancine eenkabo. Alisuni ayi tulishiibe akulisebensesha kwaamba ayi tube abushicibusa anguwe.

Kwiindulukaamo

• Ino Yehova alipusene buyani abalesa bamwi bantu mbobapaila?

• Ino nceebonshi tulyeelete kusebensesha liina lyakwe Lesa?

• Ino nciinshi citondesha kwaamba ayi Lesa alisuni ayi mube shicibusa wakwe?

AMULANGWEETEWO ASHIMWI

Amubone shintu shili 5 sheenga shatupa kushoma kwaamba ayi ncakwiila Lesa nkwaali.

“Sa Lesa Nkwaali?” (Makani acanika pa jw.org)

Amubone ncotuyandikila kushoma kwaamba ayi Lesa nkwaali kuswabo kale kale.

“Ino Ngani Wakalenga Lesa?” (Njashi Yamulindilishi, August 1, 2014)

Amwiiye ncotweelete kusebenseshela liina lyakwe Lesa nabi kwaamba ayi tatucishi kabotu mbolyakalinga kwaambwa kale kale.

“Ino Yehova Ngani?” (Makani acanika pa jw.org)

Sa Lesa inga twamwiitabo liina lili lyoonse? Amubone nceenga twaambila ayi alicitebo liina lyomwi.

“Ino Lesa Alicite Meena Ongaye?” (Makani acanika pa jw.org)