Ino Yehova Ngu Lesa Uli Buyani?

Na mwayeeya pali Yehova Lesa, ino mulayeeya ayi ngu Lesa uli buyani? Sa mulabona ayi ngumuntu uli kabotu abuumbi, sombi uli kulaale abuumbi bweenka mbuli nyenyeenshi mboshibete kulaale cakwaamba ayi inga tamubi bushicibusa anguwe? Na mpashi mulayeeya ayi alicite nkusu abuumbi bweenka mbuli cilulumo mbocibete, sombi teshi wancinencine? Ino Yehova ngu Lesa uli buyani? Kwiinda mu Maswi akwe Baibo, Yehova alatulwiita mibo yakwe alimwi acancine cakwaamba ayi alatubikila maano.

1. Ino nceebonshi Lesa inga tatumubooni?

“Lesa ngu Mushimu.” (Joni 4:24) Yehova taacite mubili wa buntu. Ngu mushimu alimwi ulekala kwiculu, musena ngweenga tatuboni.

2. Ino njimibo nshi imwi Yehova njaacite?

Nabi kwaamba ayi Yehova taaboneki, alicite mibo ibotu abuumbi ipa kwaamba ayi abo bamushi kabotu bamusuune. Baibo ilaamba ayi: “Yehova alisuni bululami, alimwi taalekeleshi bantu bakwe bashomeka.” (Kulumbaisha 37:28) Alimwi Yehova “ngushinkumbu abuumbi alimwi aluse,” bunene bunene kubantu bali mumapensho. (Jemusi 5:11, NWT) ‘Yehova ulibo muliimfwa kubaabo balefukite alimwi ulafuna baabo batacite cakulangila.’ (Kulumbaisha 34:18) Alimwi sa mulishi ayi nshetucita inga shapa kwaamba ayi asangalale na kukalala? Na muntu wasala kucita shibiibi alakalasha Yehova. (Kulumbaisha 78:40, 41) Ano na muntu kaacita shibotu Yehova alasangalala.—Amubelenge Tushimpi 27:11.

3. Ino Yehova alatondesha buyani ayi alitusuni?

Mubo wiinditewo pamibo yoonse yakwe Yehova ndusuno. Alimwi Baibo ilaamba ayi, “Lesa ndusuno.” (1 Joni 4:8) Teshi Baibo yeenkabo itucafwa kushiba ayi Yehova alitusuni sombi ashintu nshaakalenga. (Amubelenge Milimo 14:17.) Kucakubonenaako, amuyeeye mbwakatulenga. Wakatulenga ankusu shakucikonsha kubona mabala abotu, kukutika nyimbo shibotu, akucikonsha kushiba shakulya shibotu mboshinyumfwika. Alisuni kwaamba ayi tunoosangalala mubuumi.

AMWIIYILEWO ASHIMWI

4. Mushimu usalashi ni nkusu Yehova nshaasebensesha kucita shintu

Bweenka mbotusebensesha maansa kucita shintu, Yehova alasebensesha mushimu wakwe usalashi. Baibo ilatondesha ayi mushimu usalashi teshi Lesa, sombi ninkusu Lesa nshaasebensesha kucita shintu. Amubelenge Luka 11:13 alimwi a Milimo 2:17, akubandika miipusho iyi:

• Lesa ‘alaakutila’ mushimu wakwe usalashi pabaabo bamusenga. Aboobo mutoyeeya buyani, sa mushimu usalashi ngu Lesa na ninkusu Lesa nshaasebensesha kucita shintu? Ino nceebonshi ncemwaambila boobo?

Yehova alasebensesha mushimu wakwe usalashi kucita shintu shikankamika. Amubelenge Kulumbaisha 104:30 a 2 Pita 1:20, 21, akubandika mwiipusho uyu:

• Ino ni nshila nshi shimwi Yehova mbwaakasebensesha mushimu wakwe usalashi?

5. Yehova alicite mibo ibotu abuumbi

Mose wakalinga musebenshi wakwe Lesa ushomeka, sombi wakalinga kusuni kumushiba kabotu Mulengi wakwe. Aboobo Mose wakasenga ayi: ‘Amundwiite nshila shanu, kwaamba ayi mushibe kabotu.’ (Kulonga 33:13) Lyalo Yehova wakakumbula Mose kwiinda mukumulwiita mibo yakwe imwi. Amubelenge Kulonga 34:4-6, akubandika miipusho iyi:

• Ino njimibo nshi Yehova njaacite njaakalwiita Mose?

• Ino njimibo nshi yakwe Yehova njemusuni bunene?

6. Yehova alababikila maano bantu

Bantu bakwe Lesa, bene Ebulu, bakalinga basha mucishi ca Ijipiti. Ino Yehova wakalinyumfwa buyani ndyebakalinga kupenga? Amulishe MASWI AKALEKODWA akukonkelaamo na kubelenga Kulonga 3:1-10, lyalo akubandika miipusho itokonkelaawo.

MASWI AKALEKODWA: Yehova Wakalinga Kubabikila Maano Ndyebakalinga Kupenga (2:45)

• Ino makani aya amucafwa buyani kushiba Yehova mbwaalinyumfwa na bantu kabapenga?—Amubone vesi 7, 8.

• Mutobona buyani, sa ncakwiila Yehova alisuni kucafwa bantu, alimwi sa inga wacikonsha kucita boobo? Ino nceebonshi?

7. Inga tweeya mibo yakwe Yehova na twalangilisha shintu nshaakalenga

Tulabona mibo yakwe Yehova kwiinda mushintu nshaakalenga. Amweebele VIDYO. Lyalo amubelenge Bene Loma 1:20, akubandika mwiipusho utokonkelaawo.

VIDYO: Shilengwa Shilatondesha ayi Yehova Alitusuni—Mibili Yesu Mboyakapangwa (1:57)

• Ino njimibo nshi yakwe Yehova njemubona na mwalangilisha shintu nshaakalenga?

CITEENTE CINENE

Yehova ngu Mushimu utaboneki ucite mibo iinji ibotu abuumbi, alimwi mubo unene pamibo iyo, ndusuno.

Kwiindulukaamo

• Ino nceebonshi Yehova taaboneki?

• Ino mushimu usalashi nciinshi?

• Ino njimibo nshi imwi Yehova njaacite?

AMULANGWETEEWO ASHIMWI

Amwiiye shiinji pamibo inene yakwe Yehova ili 4.

“Ino Lesa Ngani?” (Njashi Yamulindilishi No. 1 2019)

Amubone bumboni butondesha ayi Yehova taabetebo pali poonse.

“Sa Lesa Alibo Pali Poonse?” (Makani acanika pa jw.org)

Amubone Baibo ncoyaambila ayi mushimu usalashi uli anga ndyaansa lyakwe Lesa.

“Ino Mushimu Usalashi Nciinshi?” (Makani acanika pa jw.org)

Cakalinga ciyumu kwaamba ayi musankwa umwi moofu ashome ayi Lesa alamubikila maano. Amwiiye cakamucafwa kwaalula mbwaakalinga kuyeeya.

“Pacecino Ciindi Ndalinyumfwa ayi Inga Ndacafwa Bamwi” (Njashi Yamulindilishi, October 1, 2015)