CIIYO 10
Ino Mabungano a Bakamboni Bakwe Yehova Inga Amucafwa Buyani?
Sa mwakacanikako kale kumabungano a Bakamboni Bakwe Yehova? Na tamuna kucanikaako kale, mpashi inga mwaloonda kucanikaako kwaciindi cakutaanguna. Mpashi inga mwaliipusha ayi: ‘Ino nshiinshi shicitika kukubungana kweenka uku? Ino nceebonshi kulayandika? Ino nceebonshi ndyeelete kucanikaako?’ Muciiyo ici, mutokwiiya mbweenga kubungana pomwi abantu bamwi kwamucafwa, akuyumya bushicibusa bwanu a Lesa.
1. Ino nceebonshi Bakamboni Bakwe Yehova balabungana pomwi?
Shikulemba Baibo womwi wakaamba kubungana pomwi abamwi mbokuyandika abuumbi ndyaakaamba ayi: ‘Ndalumbaisha Yehova, pakati ka likoto lya bantu bakwe.’ (Kulumbaisha 26:12) Ubu bweenka mbocibete amunshiku shino ku Bakamboni Bakwe Yehova, abalo balasangalala abuumbi kubungana pomwi. Nsengwe yoonse, balabungana nsondo ansondo kwaamba ayi balumbaishe Lesa, kwiimba, alimwi akupaila. Alimwi mankanda aniini pamwaaka balaba akubungana kunene.
2. Ino mulaakwiiya nshi kumabungano esu?
Kumabungano, tuleeya makani kuswa mu Maswi akwe Lesa, tulabelenga malembo ‘akusansulula nshaatokwaamba.’ (Amubelenge Neyemiya 8:8.) Na mukacanikeeko, mulaakwiiya pali Yehova alimwi amibo yakwe ibotu. Kushiba kabotu Yehova mbwaamusuni kulaakumucafwa kuyumya bushicibusa bwanu anguwe. Mulaakwiiya ambweenga wamucafwa kwaamba ayi mube alusangalalo lwancinencine.—Isaya 48:17, 18.
3. Ino kucanika pomwi abamwi ndyemuli kumabungano esu inga kwamucafwa buyani?
Yehova alatulwiita ayi “katubikilana maano kwaamba ayi tuyuminishanye kutondesha lusuno akucita ncito shibotu, tutacileeki kubungana pomwi.” (Bene Ebulu 10:24, 25, NWT) Kumabungano esu mulaakucana bantu babikila maano abuumbi kubamwi, alimwi basuni kwiiya pali Lesa bweenka amwebo mbomusuni kwiiya pali Lesa. Mulaakunyumfwa maswi ayuminisha amu Baibo ngobabandika mabungano kaatana kutalika, ndyaatalika alimwi apesule. (Amubelenge Bene Loma 1:11, 12.) Alimwi mulaakushibana abaabo batabete mucikwati, na bali mucikwati abo bacite lusangalalo nabi kwaamba ayi baleenda mumapensho. Ishi nsheebo shiniinibo pasheebo shimwi shiinji Yehova shaatulwitila ayi tunobungana lyoonse!
AMWIIYILEWO ASHIMWI
Amwiiye kubungana kwa Bakamboni Bakwe Yehova mbokuba, alimwi akucanikaako ncokuyandikila.
4. Mabungano a Bakamboni Bakwe Yehova
Muciindi ca batumwi, Beneklistu bakalinga kubungana pomwi lyoonse kupaila Yehova. (Bene Loma 16:3-5) Amubelenge Bene Kolose 3:16, akubandika mwiipusho uyu:
Ino Beneklistu bamuciindi ca batumwi bakalinga kupaila buyani?
Bakamboni Bakwe Yehova abalo munshiku shino balabungana lyoonse mu Maanda a Bwaami. Na mulisuni kubona kubungana kwabo mbokuba, amweebele VIDYO. Amulangilishe cikope citotondesha mabungano, lyalo akubandika miipusho itokonkelaawo.
Ino nshiinshi nshomwabona shicitika ku Ŋanda ya Bwaami shikoshenye ashaamba lilembo lya Bene Kolose 3:16?
Kweelana avidyo na cikope, ino nciinshi ncemwabona cicitika kumabungano camusangalasha?
Amubelenge 2 Bene Kolinto 9:7, akubandika mwiipusho uyu:
Ino nceebonshi Bakamboni Bakwe Yehova tabasengi maali kumabungano abo?
Amwiindulukeemo pomwi abatomwiisha mumakani eshi akabandikwe kumabungano ansondo ino.
Ino ndubasu nshi lwamabungano esu ndomutoobona ayi inga lwamucafwa?
Sa mulishi?
Inga mwaya pa jw.org, akucana misena aciindi mabungano esu ndyaabaako mumisena ipusenepusene nsengwe yoonse.
Kumabungano esu kulaba makani, shitondesho, alimwi amavidyo. Mabungano esu alatalika alimwi akumana alwiimbo amupailo
Cimwi ciindi pakubungana kwesu kulaba mbasu nsheenga bali mulikoto baabanamo lubasu kwiinda mukukumbulawo
Uli woonse inga wacanikaako—mukwashi, batabete mucikwati, bacinene, alimwi abaana
Taakuwo kulipila kumabungano esu. Bakamboni Bakwe Yehova tabeenshimo mbale yakusenga maali kumabungano
5. Kucanika kumabungano kulayandika kulyaaba
Amuyeeye shakalinga kucita mukwashi wakwe Yesu. Kwaamba ayi bacanike kukubungana kwakalinga kubaako mwaaka amwaaka, bakalinga kweenda mushinso wanshiku shotatwe kwiinda munshila ya tulundu kuswa ku Nasaleti kuya ku Jelusalemu. Amubelenge Luka 2:39-42, akubandika miipusho iyi:
Mutoyeeya buyani, sa mutobona ayi cakalinga cuubu kweenda mushinso wakuya ku Jelusalemu?
Ino nceebonshi cimwi ciindi inga mwayandika kulyaaba kwaamba ayi mucanikeeko kumabungano?
Mutobona buyani, sa kuya kumabungano kulayandika nabi kwaamba ayi cimwi ciindi inga camuyumina kucita boobo? Ino nceebonshi?
Baibo ilaamba ayi kubungana pomwi kwaamba ayi tupaile Yehova kulayandika abuumbi. Amubelenge Bene Ebulu 10:24, 25, akubandika mwiipusho uyu:
Ino nceebonshi tulyeelete kunoocanika kumabungano lyoonse?
BANTU BAMWI BALAAMBA AYI: “Tamweelete kuya mukubungana abamwi. Kubelengabo Baibo nweenka paŋanda kulikwene.”
Ino ndilembo nshi na makani amu Baibo atondesha Yehova nshaasuni?
CITEENTE CINENE
Kucanika kumabungano kulaakumucafwa kwiiya shiinji pali Yehova, kuyumya bushicibusa bwanu anguwe, alimwi akumupaila pomwi abamwi.
Kwiindulukaamo
Ino nceebonshi Yehova alatuyuminisha kubungana pomwi?
Ino nshiinshi nsheshi mukeeye kumabungano a Bakamboni Bakwe Yehova?
Mutoyeeya buyani, sa kuli nshila shimwi mbweenga mabungano amucafwa?
AMULANGWEETEWO ASHIMWI
Ino mbuyani na mutoolonda kusa kumabungano? Amubone musankwa wakalinga kuloonda kusa kumabungano mbwakatalika kusuna mabungano.
Amubone musankwa wacanike mbwakakondwa kucanika kumabungano alimwi anshaakacita kwaamba ayi atolelele kubungana.
Amwiiye bamwi mbobalinyumfwa pamakani akucanika kumabungano.
“Ino Nceebonshi Mulyeelete Kucanika Kumabungano ku Ŋanda ya Bwaami?” (Makani acanika pa jw.org)
Amwiiye musankwa umwi wakalinga mulikoto lya bakapondo mbwakaalula buumi bwakwe pesule lyakucanika kumabungano a Bakamboni Bakwe Yehova.
“Lyoonse Ndakalinga Kweenda Amfuti Yangu” (Njashi Yamulindilishi, July 1, 2014)