CIIYO 11
Sheenga Shamucafwa Kwinyumfwishisha Kabotu Baibo
Sa mwakeleshawo kale kutalika ncito inene, lyalo akusa mukubona ayi njiyumu inga tamwiikoonshi? Kwaamba ayi mucikoonshe kusebensa ncito iyo, mpashi inga mwayandika kuyaabanya mumbasu shiniini niini. Kubelenga Baibo akwalo mbokubete. Mpashi inga mwaliipusha ayi, ‘Ino ntotalikila pali?’ Muciiyo ici, tutobandika pashintu shuubu nsheenga mwaciita kwaamba ayi munoonyumfwa kabotu kubelenga akwiiya Baibo.
1. Ino nceebonshi tulyeelete kubelenga Baibo lyoonse?
Muntu ubelenga Baibo lyoonse na ‘mulawo wakwe Yehova,’ alaba alusangalalo alimwi akuswitilila. (Amubelenge Kulumbaisha 1:1-3.) Na ndyemutootalikabo, amweeleshe kubelenga Baibo kwa mamineti aniini bushiku abushiku. Mukuya kwaciindi, kushiba kabotu Maswi akwe Lesa kulaakumupa kunyumfwa kabotu kubelenga Baibo.
2. Ino nshiinshi sheenga shamucafwa kufubilaamo mukubelenga Baibo?
Kwaamba ayi tufubileemo ndyetutobelenga Baibo, tulyeelete kunookwiimikanaako paniini akuyeeyawo pasheesho nshotutoobelenga. Tulyeelete kwiibelenga alimwi ‘akukutumana kuyeeyawo.’ (Joshuwa 1:8) Ndyemutobelenga, amuliipushe miipusho mbuli: ‘Ino makani aya atonjiisha nshi pali Yehova Lesa? Ino makani aya inga ndaakonkela buyani mubuumi bwangu? Ino makani aya inga ndaasebensesha buyani kucafwako bamwi?’
3. Ino inga mwacita buyani kwaamba ayi munoocana ciindi ca kubelenga Baibo?
Sa cilamuyumina kucana ciindi ca kubelenga Baibo? Buunji bwandiswe nciyumu. Amweeleshe “kusebensesha kabotu ciindi ncomucite.” (Bene Efeso 5:16, NWT) Inga mwacita boobo kwiinda mukubika ciindi ca kubelenga Baibo bushiku abushiku. Bamwi bakasala kunoobelenga Baibo lyoonse macuunsa cuunsa. Bamwi balacana ciindi malumwi, mpashi paciindi ndyebatokookesha pesule lya cakulya ca malumwi. Bamwi balabelenga Baibo macolesha kabatana kuya mukoona. Ino mwebo nciindi nshi nceenga mwacikonsha?
AMWIIYILEWO ASHIMWI
Amwiiye nsheenga mwaciita kwaamba ayi munoonyumfwa kabotu kubelenga Baibo. Amubone mbweenga mwalibambila kabotu kwaamba ayi munoofubilaamo ndyemutokwiiya Baibo.
Bweenka mbweenga tweeya kunyumfwa kabotu kulya shakulya shipya nshetutana kushibila, inga tweeya kunyumfwa kabotu kubelenga Baibo
4. Amwiiye nsheenga mwaciita kwaamba ayi munoofubilaamo ndyemutobelenga Baibo
Mpashi inga cabako ciyumu kutalika kubelenga Baibo. Nacibi boobo, inga kamunyumfwa kabotu kubelenga Baibo bweenka mbweenga mweeya kunyumfwa kabotu kulya shakulya nshemutana kulyawo kale. Amubelenge 1 Pita 2:2, akubandika mwiipusho uyu:
Mutoobona buyani, sa kubelenga Baibo bushiku abushiku inga caba cintu ceenga kacimusangalasha lyoonse?
Amweebele VIDYO kwaamba ayi mubone bamwi nshobakacita kwaamba ayi batalike kunyumfwa kabotu kubelenga Baibo. Lyalo amubandike miipusho itokonkelaawo.
Kweelana anshomweebela muvidyo, ino ngamapensho nshi bacanike ngobakakoma?
Ino nciinshi cakabacafwa kutolelela kubelenga Baibo lyoonse?
Ino bakacita buyani kwaamba ayi banoosangalala ndyebatobelenga Baibo?
Sheenga shamucafwa kutalika kubelenga Baibo:
Amusale Baibo yakasansululwa kabotu alimwi yuubu kunyumfwisha. Inga mweelesha kusebensesha Baibo ya New World Translation na nkoili mumushobo wanu na mumushobo umwi ngomunyumfwishisha.
Inga mwatalika alubasu lucite makani ngomunyumfwa kabotu kubelenga. Kwaamba ayi mushibe nsheenga mwaciita, amubone caati itokwaamba ayi “Amutalike Kubelenga Baibo.”
Amuconge lubasu ndomwamanisha kubelenga. Amusebenseshe caati ili mulibuku ili itokwaamba ayi “Amushibe Mbomutoobelenga Baibo.”
Amusebenseshe JW Library® app. Mu JW Library inga mwabelenga na kukutika maswi amu Baibo akalekodwa, kuli koonse nkweenga mwaba kusebensesha fooni, kompyuta na tabuleti.
Amusebenseshe lubasu lwa Makani Aayungizyidwe lucanika mu Baibo ya New World Translation. Lubasu ulu lulatondesha mamaapu, macaati alimwi lulicite alubasu lwa Bupanduluzi Bwamabala Aamu Bbaibbele, lweenga lwamucafwa kunyumfwa kabotu kubelenga Baibo.
5. Amulibambile kamutana kutalika kwiiya Baibo
Amubelenge Kulumbaisha 119:34, akubandika mwiipusho uyu:
Ino nceebonshi kupaila kulayandika kamutana kutalika kubelenga Baibo na kulibambila ciiyo ca Baibo?
Ino inga mwacita buyani kwaamba ayi munoofubilaamo abuumbi mukwiiya Baibo? Ndyemutoolibambila ciiyo mulibuku ili, amweeleshe kucita shitokonkelaawo:
Amubelenge mapalagilafu akutaanguna ali muciiyo.
Amubelenge malembo aliimo, akweelesha kunyumfwishisha mbwaatokweendelana amakani ali muciiyo.
Amuconge maswi atootondesha cikumbulo kumwiipusho womwi awomwi; kucita boobo kulaakumucafwa ndyeshi mukanoobandika ciiyo abatomwiisha.
Sa mulishi?
Bakamboni Bakwe Yehova balasebensesha ma Baibo apusenepusene. Nacibi boobo, tulasebensesha bunene Baibo ya New World Translation of the Holy Scriptures mukwiinga yakasansululwa kabotu, njuubu kunyumfwisha, alimwi mulacanika aliina lyakwe Lesa.—Amubone makani acanika pa jw.org palubasu lucite mutwi utokwaamba ayi “Sa Bakamboni Bakwe Yehova Balicite Baibo Yabo Beenka?”
BANTU BAMWI BALAAMBA AYI: “Kubelenga Baibo akwiiya ncintu ciyumu abuumbi. Nshiciteewo ciindi alimwi ankusu shakucita boobo.”
Ino mwebo mulabona buyani?
CITEENTE CINENE
Kwaamba ayi mufubileemo mukubelenga Baibo, amubike ciindi ca kubelenga, amupaile kwaamba ayi munyumfwishishe nshemutoobelenga, alimwi amulibambile kamutana kutalika kwiiya Baibo.
Kwiindulukaamo
Ino nshiinshi sheenga shamucafwa kufubilaamo ndyemutobelenga Baibo?
Ino nciindi nshi nceenga mwacikonsha kunobelenga akwiiya Baibo?
Ino nceebonshi ncociyandikila kulibambila kamutana kutalika kwiiya Baibo?
AMULANGWETEEWO ASHIMWI
Amubone makani aamwi eenga amucafwa kufubilaamo abuumbi ndyemutobelenga Baibo.
“Sheenga Shamucafwa Kufubilaamo Mukubelenga Baibo” (Njashi Yamulindilishi No. 1 2017)
Amwiiye nshila shotatwe mbweenga mwabelenga Baibo.
“Ino Baibo Inga Yancafwa Buyani?—Lubasu 1: Kushiba Shili mu Baibo” (Makani acanika pa jw.org)
Amwiiye sheenga shamupa kunyumfwa kabotu kubelenga Baibo.
Amunyumfwe shakaamba baabo babelenga Baibo kwa myaaka iinji.