Miipusho Kuswa Kubeshikubelenga

Pa 2 Bene Tesalonika 3:14 palaamba ayi tulyeelete ‘kubalabilila’ bantu bamwi. Sa bamanene mbobeelete kubalabilila na mbeshikushimikila mulibungano?

Mutumwi Paulo wakalembela Beneklistu baku Tesalonika ayi: “Na umwi akake kucita mbotwaamba munkalata njetwatuma iyi, mumulabilile.” (2 Tesa. 3:14) Kale kale, twakaamba ayi bamanene mbobakalinga kweelete kukonkela butanjilishi ubu. Alimwi bamanene bakalinga kwaamba likani lyakucenjesha, na kuli umwi mulibungano watolelela kutakonkela kululika kwa mu Maswi akwe Lesa. Lyalo beshikushimikila bakalinga kucileka kucitila pomwi anguwe shintu.

Nacibi boobo, tutoyandika kwaalula mbotunyumfwishisha lilembo ili. Pacecino ciindi, tutonyumfwishisha ayi kululika Paulo nkwakaamba, wakalinga kwaamba pa nceenga beshikushimikila basalawo kucita mubukaalo bumwi. Aboobo bamanene tabayandiki kwaamba likani lyakucenjesha. Ino nceebonshi twaalula mbotwakalinga kunyumfwishisha lilembo lya 2 Bene Tesalonika 3:14? Amuyeeye pamakani Paulo ngaakalinga kwaambawo ndyaakaamba maswi aya.

Paulo wakabona ayi bamwi mulibungano lyaku Tesalonika bakalinga ‘kweenda cakupilingana.’ Bakalinga kukaka kukonkela shaamba Maswi akwe Lesa. Lweendo lwamana ndyaakalinga wabafwakashila, wakabalwiita ayi: “Na muntu wakaka kusebensa, akulya mutamusuminishi.” Sombi bamwi bakatolelela kukaka kusebensa kwaamba ayi banocana shiyandika, nabi kwaamba ayi bakalinga kucite nkusu shakucita boobo. Alimwi bakalinga kulinjisha mumakani atabakumite. Ino nshiinshi Beneklistu nshobakalinga kweelete kucita kubantu bamushobo uyo?—2 Tesa. 3:​6, 10-12.

Paulo wakabalwiita ayi “mumulabilile.” Liswi lyakasansululwa ayi “mumulabilile,” lisansulula kushiba muntu wa mushobo uyo lyalo akucenjela kwaamba ayi bamwi batayungwi kuli nguwe. Paulo ndyakaamba maswi aya wakalinga kulwiita bamu libungano boonse, kuteshi bamanene beenkabo. (2 Tesa. 1:1; 3:6) Aboobo beshikushimikila mpashi beenga babona mushominyinaabo kaatakonkeli shaamba Maswi akwe Lesa, bakalinga kusalawo “kumusoonoka.”

Ano sa ici citosansulula ayi bakalinga kubona muntu uyo anga wakakushikwa mulibungano? Sobwe. Paulo wakeelikaawo akwaamba ayi: ‘Amutolelele kumucenjesha mbuli mushominyinaanu.’ Aboobo beshikushimikila bakalinga kubandikaakwe kumabungano akusebensaakwe muncito yakushimikila, sombi tabakalinga kuba pomwi anguwe ndyebatoocita shakulikondelesha. Ino nceebonshi? Paulo wakaamba ayi: “Kwaamba ayi akanyumfwe nsoni.” Aboobo na twacileka kucitila pomwi amushominyineesu shintu ishi, inga wanyumfwa nsoni pashintu nshaacita lyalo akwaaluka.—2 Tesa. 3:​14, 15.

Ino Beneklistu balashiba buyani ayi balyeelete kumulabilila muntu umwi? Cakutaanguna, balashinisha kwaamba ayi cintu muntu uyo ncaatocita, ‘cilipilingene.’ Paulo taakalinga kwaamba pa bantu beenga bacita shintu shimwi nsheenga njeelacaamba taitusuminishi, sombi sheendelana anjiisho na milawo yamu Baibo. Alimwi taakalinga kwaamba pabantu basalawo kucita shintu nshobasuni, sombi shilibo kabotu. Kwiilikaawo, taakalinga kwaamba pa baabo beenga batukalasha. Paulo wakalinga kwaamba pa baabo beenga balulikwa kusebensesha Maswi akwe Lesa, sombi basalawo kutolelela kucita shintu shitabete kabotu.

Munshiku shino, na twaboona ayi mukwesu nabi nankashi watolelela kutakonkela shaamba Maswi akwe Lesa,a sobeene palweesu inga twasalawo kutanocitila pomwi anguwe shintu shimwi, nabibo kucita shakulikondelesha. Ceebo cakwaamba ayi ici ncintu ncotweelete kulisalila sobeene palweesu, inga twalwiitakobo bamumukwashi wesu Bakamboni abo mbotukalaabo. Alimwi inga twatolelela kubandika amuntu uyo kumabungano akusebensaakwe muncito yakushimikila. Lyalo na waalula nshaacita, inga twatalika alimwi kucitila pomwi anguwe shintu shoonse.