Ha pa 12 maˬ

Ehˇtaˍyoˇpiˆ chaw a maꞈ lonˉ Baˆtiˆsaˬ haꞈ yuˬ tuˬ yawˇ gu hehnˇ˗oˬ ve laˇ? Dawˇ nyi sheˍ. Ehˇtaˍyoˇpiˆ chaw chi teˇ gʼaˇ “Yeˍruˆsaˍlehnˍ venˇ lo oˉ kʼoˍ ca pui kʼawꞈ la ve yoˬ.” (Tcuh 8:27) Yawˇ lehˬ buiˇ shaˆ aˉ naˆ chaw hpehꞈ leh Yuˇdaꞈ chaw ve bon htaꞈ yonˍ la ve yoˬ. Yawˇ Heˍbrehˇ ve Liꞈ hpu hkʼaw Yaˬhoˉvaˬ ve awˬ lawn shiˍ˗oˬ ve yoˬ hehˉ. Yaꞈ hkʼaˇ, yawˇ leuˉ leh kʼawꞈ shiˍ gaˇ ve yoˬ. Hpiˇliˇpuˆ hawˉ hkʼaˆ chi ve teˇ gʼaˇ yaꞈ kʼaw kʼai chehˇ ve htaꞈ gʼa mawˬ htaˇ, yawˇ tcuh kaˍ paˍ Iˉsaˍyaˆ ve liꞈ daw htaꞈ gʼaw chehˇ ve htaꞈ Hpiˇliˇpuˆ gʼa mawˬ ve yoˬ. (Tcuh 8:28) Yawˇ hkʼa dehꞈ shiˍ gaˇ ve yoˬ. Yawˇ Ehˇtaˍyoˇpiˆ lo tawˆ kʼai leh Yeˍruˆsaˍlehnˍ venˇ bon yehˬ lonˉ hkʼaw Yaˬhoˉvaˬ htaꞈ oˉ kʼoˍ ca pui˗e ve yoˬ. Ehˇtaˍyoˇpiˆ chaw chi teˇ gʼaˇ Hpiˇliˇpuˆ geh a yeˇ uiˍ ve laiˉ ceuˬ gʼa henˇ ve yoˬ. Tawˇ pa haˉ te kʼo, Yeˍsuˆ lehˬ Meˍsiˉyaꞈ hpehꞈ ve tehꞈ yawˇ gʼa shiˍ ve yoˬ. (Tcuh 8:34, 35) Yawˇ Yaˬhoˉvaˬ leh Yeˍsuˆ htaꞈ haꞈ jaˇ ve pa taw, Yeˍsuˆ ve awˬ laꞈ gʼawˇ hpehꞈ la tuˬ yawˇ dawˇ cheˆ leh Baˆtiˆsaˬ haꞈ yuˬ ve yoˬ. Leh Hpiˇliˇpuˆ kaꞈ hawˉ hkʼaˆ chi ve teˇ gʼaˇ Baˆtiˆsaˬ haꞈ yuˬ gaˇ ve htaꞈ gʼa mawˬ ve pa taw, Baˆtiˆsaˬ piˇ ve yoˬ. w23.03 8-9 ¶3-6

Ngaˬ hui awˬ tehˬ ve tawˇ maˇ yaw ve kʼo, Yaˬhoˉvaˬ ngaˬ hui htaꞈ nyi hkʼaˇ maˇ suh taˬ. (Tawˇ 6:16, 17) Chi beuꞈ teˇ co˗e ve chaw lehˬ, heˍ ve a hkʼe leˇ ceh hpehꞈ ve tehꞈ dawˇ ve htawˇ, chi hkʼe ve htaꞈ Yaˬhoˉvaˬ maˇ dawˇ cawˇ tehꞈ ngaˬ hui shiˍ leh ngaˬ hui yawˇ dawˇ ve hkʼe gʼa dawˇ ve yoˬ. (Chiˇ 15:1, 2) Ngaˬ hui heˍ ve tawˇ maˇ yaw cawˇ. Yaꞈ hkʼaˇ, chi hkʼe ceh tiˉ maˇ heˆ. Shu nyi ma maˇ sha tuˬ ngaˬ hui tawˇ maˇ yaw piˇ tuˬ dawˇ teh taˍ cawˇ ve yoˬ. Chi hkʼoˆ kaꞈ, ngaˬ hui shu htaꞈ maˇ hkʼaiˉ cawˇ ve yoˬ. (Tawˇ 25:23; 2 Hteˇ 3:11) Nawˬ awˬ nu ve chaw geh tawˇ yaw daꞈ chehˇ ve kʼo, tawˇ yaw daꞈ chehˇ ve awˬ lawn shu htaꞈ hkʼaiˉ ve tehꞈ dawˇ ve kʼo, daꞈ ve hpawˇ tawˇ yaw daꞈ sheˍ. Chi teˇ hkui ngaˬ hui chehˇ ve awˬ yanˇ lehˬ, maˇ daꞈ ve tawˇ tiˉ yaw ve yoˬ. Hkʼe te leh, Yaˬhoˉvaˬ nyi hkʼaˇ suh tuˬ ve tawˇ ngaˬ hui gʼa yaw cawˇ ve yoˬ. Ngaˬ hui Gʼuiˬ sha ve kanˉ te ve, hpawnˬ daꞈ ve, leh shu htaꞈ tawˇ yaw piˇ htaˇ, ngaˬ hui Yaˬhoˉvaˬ nyi hkʼaˇ suh tuˬ tawˇ yaw ve kʼo, yawˇ awˬ bon naꞈ laˇ tuˬ yoˬ. Yaˬhoˉvaˬ lehˬ miˬ guiˬ hkʼoˆ haiˬ ve awˬ ceuˬ htaꞈ te luˬ peuˬ hkʼawꞈ nawˉ, Yaˬhoˉvaˬ htaꞈ chiˇ mvuh tuˬ tawˇ yaw ve sha tuˬ yoˬ.—Yuˇ 15. w22.04 9 ¶18-20

Yaˬhoˉvaˬ leh Yeˍsuˆ ngaˬ hui htaꞈ hkʼaˬ hkʼe taw haꞈ ve tehꞈ dawˇ nyi htaˇ, ngaˬ hui yawˇ huiˉ maˬ htaꞈ haꞈ gaˇ tuˬ te laˇ ve yoˬ. (1 Yoˇ 4:10) Ngaˬ hui teˇ gʼaˇ leh teˇ gʼaˇ awˬ pon Yeˍsuˆ htaiˍ hkʼawꞈ laˇ ve htaꞈ shiˍ htaˇ, ngaˬ hui Yaˬhoˉvaˬ leh Yeˍsuˆ htaꞈ haꞈ gaˇ tuˬ te laˇ ve yoˬ. Awˬ lawn chi ve htaꞈ Pawˇluꞈ kaꞈ shiˍ ve yoˬ. Yawˇ Gaˍlaˍtiˆ venˇ lo awˬ viˉ awˬ nyi htaꞈ liꞈ bvuhꞈ piˇ htaˇ, “ngaˬ htaꞈ haꞈ leh ngaˬ awˬ pon yawˇ awˬ to tanˇ peuˬ ve, Gʼuiˬ sha ve Yaˇ hpu htaꞈ” awˬ bon uiˍ jaˇ tehꞈ kʼoˆ piˇ ve yoˬ. (Gaˍ 2:20) Yeˍsuˆ htaiˍ hkʼawꞈ laˇ ve pa taw, nawˬ Yaˬhoˉvaˬ geh awˬ chawˇ te la tuˬ yawˇ nawˬ htaꞈ gʼawˬ veu laˇ ve yoˬ. (Yoˇ 6:44) Yaˬhoˉvaˬ nawˬ awˬ to htaꞈ daꞈ ve nyi mawˬ leh nawˬ yawˇ geh meuˆ daꞈ la tuˬ awˬ hpfuhˇ hkʼaˆ jaˇ ve awˬ ceuˬ peꞈ laˇ ve htaꞈ nyi ma gawˬ lehˍ cawˬ leh ha lehˬ jaˇ ve maˇ heˆ laˇ? Nawˬ awˬ lawn chi htaꞈ dawˇ nyi ve lehˬ Yaˬhoˉvaˬ leh Yeˍsuˆ htaꞈ haꞈ maˇ la tuˬ te laˇ˗aw laˇ? A shu yawˇ awˬ to htaꞈ na nyi cawˇ ve, ‘yawˇ huiˉ maˬ ngaˬ hui htaꞈ haꞈ laˇ ve aˬ htoꞈ ma te gaˇ tuˬ te laˇ ve le?’ Ngaˬ hui Yaˬhoˉvaˬ leh Yeˍsuˆ htaꞈ haꞈ ve lehˬ awˬ nu ve chaw htaꞈ haꞈ ve tehꞈ hpeuꞈ maw piˇ gaˇ ve yoˬ.—2 Kawˇ 5:14, 15; 6:1, 2. w23.01 28-29 ¶6-7

Yaˬhoˉvaˬ yawˇ ve chaw htaꞈ ga piˇ leh “teˇ geh oˉ kʼoˍ kʼawꞈ pui gʼa tuˬ” Liꞈ hpu lehˬ a yeˇ uiˍ jaˇ ve laꞈ caˉ hpehꞈ ve yoˬ. Liꞈ hpu hkʼaw bvuhꞈ taˍ ve laiˉ ceuˬ nyi ma nuˇ nehˬ ve chaw ceh tiˉ na gʼa ve yoˬ. (Luˉ 10:21) Miˬ guiˬ chi hkʼoˆ lo a shu kaꞈ Liꞈ hpu ca leh gʼaw gʼa ve yoˬ. Yaꞈ hkʼaˇ, nyi ma nuˇ nehˬ ve chaw ceh tiˉ Liꞈ hpu htaꞈ na gʼa leh a shaꞈ teꞈ kuiˬ hkʼaw yuˬ yehˇ ve yoˬ. (2 Kawˇ 3:15, 16) Liꞈ hpu hkʼaw Yaˬhoˉvaˬ ve cuˇ yiˍ htaꞈ shiˍ tuˬ ga laˇ ve yoˬ. Yaˬhoˉvaˬ lehˬ Liꞈ hpu htaꞈ cuˇ leh yawˇ ve chaw hkʼa peu˗eˬ htaꞈ maˍ laˇ ve ceh tiˉ maˇ heˆ. Yaꞈ hkʼaˇ, ngaˬ hui teˇ gʼaˇ leh teˇ gʼaˇ htaꞈ maˍ laˇ leh awˬ gʼaˇ kaꞈ peꞈ laˇ sheˍ ve yoˬ. Ngaˬ hui Liꞈ hpu gʼaw htaˇ Gʼuiˬ sha teˇ gʼaˇ leh teˇ gʼaˇ htaꞈ a yeˇ yuˬ ve tehꞈ gʼa shiˍ ve yoˬ. (Isy 30:21) Nawˬ gʼaw chehˇ ve Liꞈ hpu awˬ tawn nawˬ htaꞈ hawˍ daꞈ ve tehꞈ dawˇ˗aw laˇ? Yaˬhoˉvaˬ lehˬ Liꞈ hpu laiˉ lanˬ gʼaˇ awˬ pon bvuhꞈ piˇ tcuh taˍ ve htawˇ, chi ve hkʼaw beˆ maˍ laˇ taˍ ve teˇ ceuˬ ceuˬ nawˬ htaꞈ hawˍ daꞈ jaˇ ve aˬ htoꞈ ma pa taw le? Chi hkʼe hpehꞈ gʼa ve lehˬ, mvuhˇ naw ma miˬ naˆ ma htaꞈ hpanˍ shehˍ hpaˇ Gʼuiˬ sha lehˬ cuˇ yiˍ cawˬ jaˇ ve pa taw yoˬ.—2 Tiˆ 3:16, 17. w23.02 4-5 ¶8-10

Ngaˬ hui Yaˬhoˉvaˬ htaꞈ haꞈ leh yawˇ ha lehˬ tuˬ te piˇ gaˇ ve yoˬ. Hkʼe te leh, ngaˬ hui puiˉ ve hpehꞈ ve hkʼe yawˇ ve kanˉ te piˇ gaˇ ve yoˬ. Leh ngaˬ hui chi hkʼe te gʼa tuˬ dawˇ teh taˍ ve gʼa cawˬ ve yoˬ. Tawˇ pa haˉ te kʼo, Hkriꞈ yaˇ ve te hkʼaˇ dawˇ hkʼaˇ cawˬ maˇ la tuˬ coˇ caˇ leh awˬ bon cawˬ tuˬ henˇ leh awˬ viˉ awˬ nyi htaꞈ ga piˇ tuˬ awˬ hkʼaˇ ca ve yoˬ. Aˬ htoꞈ ma te ngaˬ hui co ha hpawˇ uiˍ la mvuh la leh daꞈ ve Hkriꞈ yaˇ hpehꞈ gaˇ ve le? Awˉ lawˉ teˇ hkʼaˇ lehˬ, ngaˬ hui Yaˬhoˉvaˬ nyi hkʼaˇ suh tuˬ te piˇ gaˇ ve pa taw yoˬ. Ngaˬ hui te puiˉ te hpehꞈ ve htaꞈ hkʼa dehꞈ yehˇ leh yawˇ ve kanˉ te ve htaꞈ mawˬ htaˇ, yawˇ ha lehˬ jaˇ ve yoˬ. Chi hkʼoˆ kaꞈ, ngaˬ hui co ha hpawˇ uiˍ la mvuh la gaˇ ve yoˬ. Awˬ lawn kʼo, ngaˬ hui chi hkʼe te gʼa˗o htaˇ, awˬ viˉ awˬ nyi htaꞈ hkʼa dehꞈ kʼawꞈ ga piˇ gʼa ve yoˬ. (1 Hteˇ 4:9, 10) Ngaˬ hui awˬ tehˬ ve hkʼaw hkʼaˬ hkʼe maw chehˇ˗oˬ ve htawˇ, ngaˬ hui teˇ gʼaˇ le le kaꞈ co ha hpawˇ uiˍ la mvuh la tuˬ te gʼa ve yoˬ. w22.04 22 ¶1-2

Maˇ maw ve awˬ yanˇ mvuhˇ miˬ hkʼoˆ ve kanˇ paˆ lonˉ Uiˍ ve Baˍbuˍlonˍ venˇ htaꞈ te luˬ tuˬ yoˬ. Chi lehˬ miˬ guiˬ hkʼoˆ ve maˇ heˆ heˆ ve bon liˇ hkʼa peu˗eˬ htaꞈ kʼoˆ gaˇ ve yoˬ. Chi lehˬ uiˍ jaˇ ve tuꞈ ve hkanˍ ve tanˬ ve awˬ yanˇ hpehꞈ ve yoˬ. Chi hkʼe hpehꞈ la htaˇ, chaw maˇ maˇ nyi ma pa leh Yaˬhoˉvaˬ ve kanˉ te tuˬ leuˆ yuˬ˗aw laˇ? Maˇ leuˆ yuˬ. Hpeuꞈ maˍ ve liꞈ kaˇ nanˉ uiˍ 6 hkʼaw kʼoˆ ve, Yaˬhoˉvaˬ ve kanˉ maˇ te ve chaw lehˬ, mvuhˇ miˬ hpawˇ ve awˬ moˍ ga laˇ tuˬ htaꞈ ca leh tanˇ kaˬ hpawˇ ve awˬ moˍ ga laˇ tuˬ kaꞈ ca ve yoˬ. Hkʼaw pui lonˉ hkʼa shuˍ yawˇ hui htaꞈ haꞈ shaˉ laˇ tuˬ kaꞈ ca ve yoˬ. Awˬ lawn kʼo, yawˇ hui Yaˬhoˉvaˬ uˉ peunˍ ve hpawˇ awˬ gʼaˇ maˇ piˇ. Yawˇ hui canˇ paˍ hpehꞈ ve tehꞈ Gʼuiˬ sha shawˍ piˇ tuˬ yoˬ. (Luˉ 11:23; Hpeuꞈ 6:15-17) Uiˍ jaˇ ve tuꞈ ve hkanˍ ve awˬ yanˇ htaˇ Yaˬhoˉvaˬ ve chaw awˬ nu ve chaw htaꞈ peun daꞈ tuˬ yoˬ. Yawˇ hui teˇ moˍ ceh tiˉ “haiˬ ve to nuˇ to shaˆ” hpawˇ maˇ chehˇ leh Yaˬhoˉvaˬ ve kanˉ te chehˇ ve yoˬ.—Hpeuꞈ 13:14-17. w22.05 16-17 ¶8-9

Gʼuiˬ sha ve chaw lehˬ yawˇ ve mvuhˇ miˬ daꞈ ve awˬ lawn sha tanˇ ceh tiˉ maˍ ve maˇ heˆ. (Maꞈ 24:14) Hpeuꞈ maˍ ve liꞈ kaˇ nanˉ uiˍ 8 te leh 10 hkʼaw kʼoˆ taˍ ve, mvuhˇ naw ma tcuh yaˇ kanˉ te ve htaꞈ yawˇ hui gʼa ga piˇ ve yoˬ. Gʼuiˬ sha ve mvuhˇ miˬ htaꞈ maˇ haꞈ yuˬ ve chaw lehˬ, mvuhˇ naw ma tcuh yaˇ suhˉ jehˬ ve awˬ lawn hto maˍ piˇ ve yoˬ. Yaˬhoˉvaˬ ve Shaˉhkiˆhkanˍ ve chaw lehˬ, “vaˇ shiˍ leh aˬ miˍ” htaꞈ shuˍ ve hkʼe hto toˇ chehˇ ve yoˬ. Chi lehˬ Saˍtanˍ uˉ peunˍ ve haiˬ jaˇ ve htaꞈ Gʼuiˬ sha te luˬ piˇ tuˬ yoˬ tehꞈ hpeuꞈ maw laˇ ve yoˬ. (Hpeuꞈ 8:7, 13) Gʼuiˬ sha ve awˬ nyi gaˬ la paˇ neˇ jaˇ˗oˬ ve tehꞈ yawˇ hui gʼa shiˍ cawˇ ve yoˬ. Awˬ lawn kʼo, Yaˬhoˉvaˬ ciˍ yanˍ ve awˬ nyi htaꞈ gʼa ponˬ tuˬ yawˇ hui ve te hkʼaˇ dawˇ hkʼaˇ laꞈ haˉ gʼa pa cawˇ ve yoˬ. (Zeˍ 2:2, 3) Teˇ gʼaˇ le le Gʼuiˬ sha suhˉ jehˬ ve awˬ lawn hto toˇ ve htaꞈ maˇ dawˇ cawˇ. Hkʼe te leh, ngaˬ hui hto toˇ ve gʼa haꞈ hanˉ cawˇ ve yoˬ. Uiˍ jaˇ ve tuꞈ ve hkanˍ ve awˬ yanˇ htaˇ, suhˉ jehˬ ve awˬ lawn hto toˇ ve htaꞈ haꞈ yuˬ gʼa tuˬ haˍ jaˇ tuˬ te piˇ ve yoˬ.—Hpeuꞈ 16:21. w22.05 7 ¶18-19

Awˬ pa awˬ e hpehꞈ˗a te ve chaw htaꞈ dawˇ nyi sheˍ. Yaˇ haꞈ shaˉ ve lehˬ a yeˇ uiˍ jaˇ ve awˬ vuiˬ hpehꞈ ve yoˬ. Ponˬ laˬ ve laiˉ hkʼawꞈ htaˇ, yaˇ htaꞈ haꞈ shaˉ tuˬ ve bon maˍ hkawˇ yawˇ hui laiˉ pawˆ gʼa kaˇ jaw ve yoˬ hehˉ. Yaꞈ hkʼaˇ, bon maˍ hkawˇ chi teˇ hpaˍ chi teˇ hkui yawˇ hui awˬ pon awˬ bon cawˬ jaˇ sheˍ. Chaw yaˇ ve a shaꞈ teꞈ kuiˬ hkʼaw laiˉ ceuˬ pa kʼai htaˇ, Liꞈ hpu hkʼaw beˆ maˍ laˇ ve leh awˬ liˇ awˬ hkʼaˇ teˇ hpaˍ awˬ bon cawˬ jaˇ. Chi htaꞈ pa taw, Yaˬhoˉvaˬ yawˇ htaꞈ oˉ kʼoˍ pui ve chaw htaꞈ kʼoˆ piˇ ve, Liꞈ hpu gʼaw leh hkʼa dehꞈ dawˇ nyi sheˍ. Gʼuiˬ sha Iˉsaˍreˍlaˆ chaw ve jawˇ mawˇ htaꞈ kʼoˆ piˇ ve, ‘yawˇ a shaꞈ teꞈ chehˇ ve teˇ co˗e oˇ kaˬ lo bvuhꞈ taˍ ve tawˇ teˇ hpaˍ htaꞈ gʼa gʼaw nyi tcuhˉ taˍ ve yoˬ.’ (Bon 17:19) Awˬ pa awˬ e˗oˬ, Gʼuiˬ sha ve kanˉ te ve chaw teˇ gʼaˇ daꞈ ve awˬ vuiˬ cawˬ ve hkʼe nawˬ kaꞈ cawˬ gʼa ve lehˬ, yaˇ Yaˬhoˉvaˬ htaꞈ haꞈ tuˬ maˍ piˇ ve yoˬ. Yaꞈ hkʼaˇ, Yaˬhoˉvaˬ htaꞈ caˉ daꞈ ve nawˬ ve yaˇ htaꞈ maˍ piˇ ve ceh tiˉ maˇ heˆ. Yaˇ Yaˬhoˉvaˬ htaꞈ haꞈ tuˬ kaꞈ ga piˇ sheˍ. w22.05 26-27 ¶2-3

Te yaꞈ ve htaꞈ ceh tiˉ nyi ma luˬ ve maˇ lawꞈ. Te yaꞈ ve chaw lehˬ teˇ ceuˬ ceuˬ gʼa te tawˆ la ve yoˬ. Yaˬhoˉvaˬ lehˬ venˇ baˆ hpehˇ piˇ tuˬ, maˇ hpehˇ piˇ tuˬ dawˇ cheˆ htaˇ chaw oˇ ve teˇ gʼaˇ te hkʼaˇ dawˇ hkʼaˇ awˬ suhˉ pa˗aw laˇ tehꞈ nyi ve yoˬ. Yawˇ yaꞈ ve awˬ ceuˬ htaꞈ maˇ te˗o leh Yaˬhoˉvaˬ kʼoˆ piˇ ve hkʼe yawˇ gʼaꞈ te ve yoˬ. (Isy 55:7) Chi hkʼoˆ kaꞈ, yawˇ ve te hkʼaˇ dawˇ hkʼaˇ pa leh Yaˬhoˉvaˬ dawˇ ve hkʼe gʼa dawˇ ve yoˬ. (Roˉ 12:2; Efs 4:23) Maˇ daꞈ ve awˬ ceuˬ htaꞈ yawˇ maˇ dawˇ leh maˇ kʼawꞈ te tuˬ gʼa coˇ caˇ ve yoˬ. (Kawˇ 3:7-9) Yaˬhoˉvaˬ venˇ baˆ hpehˇ laˇ tuˬ, leh ngaˬ hui ve venˇ baˆ htaꞈ shiˆ baˬ laˇ tuˬ, Yeˍsuˆ htaiˍ hkʼawꞈ laˇ ve htaꞈ ngaˬ hui gʼa yonˍ ve yoˬ. Yaꞈ hkʼaˇ, chi hkʼe ceh tiˉ maˇ heˆ. Ngaˬ hui ve te hkʼaˇ dawˇ hkʼaˇ awˬ tehˬ awˬ na pa ve tehꞈ Yaˬhoˉvaˬ mawˬ tuˬ gʼa te ve yoˬ.—1 Yoˇ 1:7. w22.06 6-7 ¶16-17

Aˍdanˍ leh Eˇvaꞈ Gʼuiˬ sha htaꞈ hpfuhˆ peuˬ hkʼawꞈ nawˉ, chaw yaˇ hkʼaˇ chaw yaˇ te luˬ daꞈ ve yoˬ. (Cuˇ 8:9) Tawˇ pa haˉ te kʼo, chaw yaˇ lehˬ kanˇ paˆ yehˇ leh awˬ nu ve chaw htaꞈ ciˍ yanˍ leh haiˬ ve te piˇ ve yoˬ. Liꞈ henˇ kuiˬ lo ve yaˇ teˇ hpaˍ hpaˍ htawˇ, nyi ma naˬ tuˬ te daꞈ ve yoˬ. Teˇ pawˆ pawˆ kʼo, awˬ to htaꞈ te luˬ tuˬ kaꞈ kawˆ ho piˇ ve yoˬ. Yehˬ kʼa hkʼaw ve chaw htaꞈ kaꞈ haiˬ ve te piˇ ve yoˬ. Hkʼe te leh, ngaˬ hui chaw htaꞈ kaꞈ kawˆ ve yoˬ. Chaw yaˇ htaꞈ kawˆ ve awˬ ceuˬ Saˍtanˍ cuˇ leh ngaˬ hui htaꞈ hkʼaˬ hkʼe te laˇ ve le? Saˍtanˍ lehˬ chaw yaˇ kawˆ ve awˬ ceuˬ htaꞈ cuˇ leh Yaˬhoˉvaˬ maˇ dawˇ cawˇ ve awˬ ceuˬ htaꞈ ngaˬ hui te leh maˇ hto toˇ tuˬ te laˇ ve yoˬ. Saˍtanˍ lehˬ chaw yaˇ uˉ peunˍ ve ngaˬ hui ve kanˉ htaꞈ tawˍ laˇ tcuh leh laiˉ mvuhˇ miˬ lo ve ngaˬ hui ve awˬ viˉ awˬ nyi htaꞈ kaꞈ fawˉ mehˍ piˇ ve yoˬ. (Luˉ 21:12) Laiˉ gʼaˇ Yaˬhoˉvaˬ ve Shaˉhkiˆhkanˍ ve chaw htaꞈ caˉ daꞈ ve maˇ heˆ heˆ ve awˬ lawn kʼoˆ ve yoˬ. Awˬ lawn chi htaꞈ yonˍ ve chaw ngaˬ hui htaꞈ kʼoˆ guiˇ gʼuiˬ guiˇ laˇ leh ngaˬ hui htaꞈ kaꞈ te luˬ laˇ gʼa ve yoˬ. (Maꞈ 10:36) Ngaˬ hui chi hkʼe gʼa hpuˇ htaˇ anˇ˗aw laˇ? Maˇ anˇ. Awˬ lawn kʼo, Saˍtanˍ lehˬ awˉ lawˉ peuˇ ve Hkriꞈ yaˇ htaꞈ kaꞈ chi hkʼe te piˇ ve yoˬ.—Tcuh 5:27, 28, 40. w22.06 16-17 ¶10-11

Leuˆ yuˬ taˍ ve chaw ga piˇ ve laiˉ gʼaˇ hteˇ ve cawˇ ve htaꞈ te tuˬ a shu le? Kʼawꞈ teꞈ tu la ve chaw, Aˍmaˍgeˍdonˍ htaꞈ gʼa ponˬ ve chaw leh miˬ guiˬ awˬ suhˉ hkʼaw paw la ve chaw teˇ hpaˍ kaꞈ yoˬ. 1,000 hkʼawꞈ peuˬ hkʼawꞈ nawˉ miˬ guiˬ hkʼoˆ lo ve chaw teˇ gʼaˇ le le biˇ ve chaw hpehꞈ tuˬ yoˬ. Biˇ ve chaw lehˬ co co taiˍ taiˍ ve a shaꞈ laꞈ tcuh laꞈ haˉ gʼa tuˬ ve maˇ heˆ tehꞈ ngaˬ hui tawnˇ taˍ cawˇ ve yoˬ. Aˍdanˍ leh Eˇvaꞈ htaꞈ dawˇ nyi sheˍ. Yawˇ hui biˇ ve chaw hpehꞈ ve htawˇ, co co taiˍ taiˍ ve a shaꞈ gʼa tuˬ Yaˬhoˉvaˬ ve hkawˇ awˉ lawˉ gʼa na yuˬ cawˇ ve yoˬ. Yawˇ hui maˇ na yuˬ ve nyi ma luˬ jaˇ. (Roˉ 5:12) 1,000 hkʼawꞈ ve awˬ yanˇ peuˬ la yoˬ te htaˇ, teˇ gʼaˇ le le biˇ ve chaw hpehꞈ tuˬ yoˬ. Yaꞈ hkʼaˇ, teˇ gʼaˇ le le Yaˬhoˉvaˬ uˉ peunˍ ve hpawˇ lo hkʼaˬ htaˆ kaꞈ chehˇ˗aw laˇ? Maˇ heˆ leh chaw teˇ hpaˍ Aˍdanˍ leh Eˇvaꞈ hkʼe biˇ ve chaw hpehꞈ ve htawˇ, Yaˬhoˉvaˬ htaꞈ ka tiꞈ maˇ yeˬ ve laˇ? Na hkawˇ chi ve teˇ hpaˍ htaꞈ hkʼawꞈ laˇ tuˬ yoˬ. w22.09 22-23 ¶12-14

Teˇ ceuˬ le le daꞈ la tuˬ tehꞈ nawˬ yonˍ gʼa tuˬ haˍ ve maˇ heˆ laˇ? Chi beuꞈ teˇ co˗e yehˬ kʼa laiˉ yehˬ kʼa hpaˆ daꞈ ve yoˬ. Chaw yaˇ lehˬ hehnˇ ve htaꞈ te ve dawˇ cawˇ ve, a shu yawˇ awˬ pon tiˉ dawˇ nyi ve, leh shaˬ te shaˬ haiˬ ve yoˬ. Teˇ nyi le le laiˉ gʼaˇ mvuhˇ miˬ hkʼoˆ kanˇ paˆ cawˬ ve chaw htaꞈ maˇ yonˍ gʼa. Yaꞈ hkʼaˇ, chi hkʼe hpehꞈ ve htaꞈ pa taw, maˇ maw maw kʼo miˬ guiˬ chi hkʼoˆ daꞈ la tuˬ yoˬ tehꞈ nawˬ yonˍ gʼa tuˬ te laˇ ve yoˬ. Aˬ htoꞈ ma pa taw le? Awˬ lawn kʼo chi beuꞈ teˇ co˗e ve chaw lehˬ, “awˬ leh meuˇ ve awˬ nyi awˬ haˉ” tcuh kaˍ paˍ ve tawˇ hkawˇ kʼoˆ taˍ ve hkʼe hpehꞈ la ve yoˬ. (2 Tiˆ 3:1-5) Chi beuꞈ teˇ co˗e tcuh kaˍ paˍ ve tawˇ hkawˇ chi awˬ tehˬ awˬ na hpehꞈ la chehˇ ve tehꞈ nyi ma daꞈ ve chaw lehˬ, chi hkʼe yonˍ ve yoˬ. Yeˍsuˆ lehˬ Gʼuiˬ sha ve mvuhˇ miˬ hkʼaw Jawˇ mawˇ te chehˇ˗oˬ ve tehꞈ tcuh kaˍ paˍ ve tawˇ hkawˇ chi ngaˬ hui yonˍ gʼa tuˬ te laˇ ve yoˬ. Yaꞈ hkʼaˇ, Gʼuiˬ sha ve mvuhˇ miˬ htaꞈ caˉ daꞈ ve tcuh kaˍ paˍ ve tawˇ hkawˇ chi teˇ tawn ceh tiˉ kʼoˆ taˍ ve maˇ heˆ. Cenˇ shawˍ (jigsaw) teˇ maˬ peuˬ teˇ maˬ gʼawˆ nehˉ daꞈ ve hkʼe, tcuh kaˍ paˍ ve tawˇ hkawˇ chi teˇ hpaˍ teˇ maˬ leh teˇ maˬ hawˍ daꞈ ve yoˬ. Chi ve lehˬ, Gʼuiˬ sha tinˍ taˍ ve awˬ yanˇ hkʼaˬ ve teˇ taw lo chehˇ taˍ ve tehꞈ ngaˬ hui hkʼa dehꞈ shiˍ tuˬ ga laˇ ve yoˬ. w22.07 2-3 ¶1-2

A naˍ 19 ve awˬ yanˇ hkʼaw hpawnˬ daꞈ ve leh hto toˇ ve htaꞈ caˉ daꞈ ve ngaˬ hui htaꞈ hkʼa tawˍ lehˆ beˆ maˍ laˇ ve yoˬ. Tawˇ pa haˉ te kʼo, Gʼuiˬ sha ve kanˉ hkʼaˇ lehˬ Hkriꞈ yaˇ awˬ moˍ hkʼaw hpawnˬ daꞈ ve, hpawnˬ daꞈ lonˉ 1 nyi, leh hpawnˬ daꞈ lonˉ 3 nyi chi ve htaꞈ caˉ daꞈ ve hkʼa peu˗eˬ in˗teu˗neꞈ hkʼaw te tcuh laˇ ve yoˬ. Leh ngaˬ hui hto toˇ tuˬ awˬ pon, tawˇ yaw tuˬ awˬ hkʼeun yehˇ leh liꞈ kaꞈ bvuhꞈ feu tcuh laˇ ve yoˬ. Yaˬhoˉvaˬ lehˬ kanˉ hkʼaˇ chi ve htaꞈ awˬ bon naꞈ laˇ jaˇ. Awˬ tcuhˆ puiˍ laiˉ kaˬ lo ve kʼoˆ laˇ ve, hto toˇ ve chaw gʼaˇ hteꞈ kʼawꞈ maˇ la ve yoˬ. Leh awˬ yanˇ oˇ ve hkʼaw awˬ viˉ awˬ nyi laiˉ gʼaˇ daꞈ ve awˬ lawn laiˉ ceuˬ gʼa ve yoˬ. Chaw teˇ hpaˍ kʼoˆ ve, a naˍ 19 ve awˬ lawn Gʼuiˬ sha ve kanˉ hkʼaˇ lehˬ dawˇ maˇ jaˇ ve yoˬ. Yaꞈ hkʼaˇ, ponˬ laˬ ve teˇ pawˆ le le Gʼuiˬ sha ve kanˉ hkʼaˇ beˆ maˍ laˇ ve lehˬ cuˇ yiˍ cawˬ jaˇ ve tehꞈ ngaˬ hui htaꞈ hpeuꞈ maw laˇ ve yoˬ. Yaˬhoˉvaˬ haꞈ pehnˇ ve hkʼaw ngaˬ hui htaꞈ beˆ maˍ laˇ ve htaꞈ dawˇ nyi htaˇ, awˬ gʼuˇ suhˍ hpawˇ Yaˬhoˉvaˬ leh Yeˍsuˆ ngaˬ hui geh chehˇ ve tehꞈ yonˍ gʼa ve yoˬ.—Heˍ 13:5, 6. w22.07 13 ¶15-16

Ngaˬ hui bon lawˬ htaˇ Yaˬhoˉvaˬ htaꞈ chiˇ mvuh cawˇ ve awˬ hkʼoˆ kaꞈ awˬ bon uiˍ jaˇ tehꞈ kaꞈ kʼoˆ piˇ cawˇ ve yoˬ. Tawˇ pa haˉ te kʼo, suhˉ veˆ daꞈ jaˇ ve awˬ sheuˉ laiˉ ceuˬ cawˬ ve Yaˬhoˉvaˬ ngaˬ hui htaꞈ peꞈ laˇ ve pa taw, bon lawˬ htaˇ yawˇ htaꞈ awˬ bon uiˍ jaˇ tehꞈ kʼoˆ piˇ cawˇ ve yoˬ. Yawˇ ngaˬ hui htaꞈ mehˬ jaˇ ve caˇ tuˬ laiˉ ceuˬ peꞈ laˇ leh ngaˬ hui haꞈ ve awˬ chawˇ geh kaꞈ gʼa chehˇ ve pa taw, ngaˬ hui Gʼuiˬ sha htaꞈ awˬ bon uiˍ jaˇ tehꞈ kʼoˆ piˇ gʼa ve yoˬ. Yaˬhoˉvaˬ ngaˬ hui htaꞈ ha lehˬ tcuh gaˇ ve pa taw, chi ve teˇ hpaˍ ngaˬ hui htaꞈ peꞈ laˇ leh awˬ nu ve laiˉ ceuˬ kaꞈ peꞈ laˇ sheˍ ve yoˬ. (Chiˇ 104:12-15, 24) Chi aꞈ kehˉ ngaˬ hui Yaˬhoˉvaˬ htaꞈ awˬ bon uiˍ jaˇ kʼoˆ piˇ gaˇ ve lehˬ, yawˇ ngaˬ hui htaꞈ cuˇ yiˍ peꞈ laˇ leh ngaˬ hui ve yonˍ hkʼaˇ yonˍ yeˬ maˇ la tuˬ daꞈ jaˇ ve beˆ maˍ laˇ hkawˇ kaꞈ peꞈ laˇ ve yoˬ. Gʼuiˬ sha lehˬ ngaˬ hui htaꞈ awˬ gʼuˇ suhˍ hpawˇ daꞈ jaˇ ve dawˇ law kuiˬ kaꞈ peꞈ laˇ ve yoˬ. Yaˬhoˉvaˬ ngaˬ hui htaꞈ daꞈ ve awˬ ceuˬ laiˉ ceuˬ peꞈ laˇ ve awˬ pon awˬ bon uiˍ jaˇ tehꞈ kʼoˆ piˇ tuˬ leunˇ˗e la ve yoˬ. Ngaˬ hui chi hkʼe maˇ leunˇ tuˬ aˬ htoꞈ ma ga laˇ gʼa ve le? Ngaˬ hui Yaˬhoˉvaˬ geh bon lawˬ htaˇ aˬ htoꞈ ma ve awˬ lawn lawˬ jaw ve bvuhꞈ nyi sheˍ. Ngaˬ hui ve bon lawˬ hkawˇ htaꞈ Yaˬhoˉvaˬ hkʼaˬ hkʼe hkʼawꞈ laˇ ve maˇ maw maˇ maw kʼo, teˇ pawˆ kʼawꞈ dawˇ nyi sheˍ. Leh peuˬ hkʼawꞈ nawˉ kʼo, ngaˬ hui Yaˬhoˉvaˬ geh bon lawˬ ve hkʼaw awˬ bon uiˍ jaˇ tehꞈ kʼoˆ piˇ sheˍ.—Kawˇ 3:15. w22.07 22-23 ¶8-9

Hteˇ ve cawˇ ve htaꞈ henˇ shiˍ ve ceh tiˉ maˇ lawꞈ tehꞈ ngaˬ hui shiˍ ve yoˬ. Ngaˬ hui ha lehˬ ve cawˬ tuˬ, hteˇ ve cawˇ ve teˇ ceuˬ awˬ hkʼaˇ suh kʼai ve lehˬ ngaˬ hui henˇ taˍ ve awˬ ceuˬ htaꞈ gʼa gʼaꞈ te ve yoˬ. (Yaˍ 1:25) Yaꞈ hkʼaˇ, ngaˬ hui hteˇ ve cawˇ ve teˇ ceuˬ awˬ hkʼaˇ suh kʼai chehˇ ve tehꞈ hkʼaˬ hkʼe te yonˍ gʼa tuˬ le? Awˬ viˉ awˬ nyi hawˉ hkʼaˆ teˇ gʼaˇ beˆ maˍ laˇ ve, ngaˬ hui henˇ taˍ ve awˬ ceuˬ hkʼaˬ ve teˇ ceuˬ htaꞈ gʼaꞈ te chehˇ ve tehꞈ shiˍ tuˬ chaˬ nyi sheˍ. Leh ngaˬ hui daꞈ la tuˬ pa gʼa sheˍ ve yoˬ. Pawˇluꞈ kʼoˆ ve, “ngaˬ hui hkʼa gʼaꞈ mi taˍ ve teˇ hpaˍ htaꞈ vawˆ taˍ leh hteˇ lehˍ kʼai˗a veuˬ.” (Hpi 3:16) Ngaˬ hui “hteˇ ve cawˇ ve teˇ ceuˬ awˬ hkʼaˇ suh” caˉ leh kʼai ve kʼo, ngaˬ hui ve a shaꞈ teꞈ hkʼaˇ daꞈ la tuˬ yoˬ tehꞈ dawˇ nyi sheˍ. Yaꞈ hkʼaˇ, chi hkʼe ceh tiˉ maˇ heˆ. Ngaˬ hui lehˬ Yaˬhoˉvaˬ leh awˬ viˉ awˬ nyi ha lehˬ tuˬ kaꞈ te piˇ ve yoˬ. (Tawˇ 27:11; 3 Yoˇ 4) Awˬ hkʼaˇ chi ve htaꞈ pa taw, ngaˬ hui hteˇ ve cawˇ ve htaꞈ haꞈ leh hteˇ ve cawˇ ve teˇ ceuˬ awˬ hkʼaˇ suh kʼai gaˇ ve yoˬ. w22.08 19 ¶16-18

Nyi haꞈ shaˉ paˍ Yaˬhoˉvaˬ leh Yeˍsuˆ htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa ve le? Nyi haꞈ shaˉ paˍ te cawˇ ve a yeˇ uiˍ jaˇ ve teˇ ceuˬ lehˬ, Yeˍsuˆ ve yawˬ awˬ moˍ htaꞈ nyi haꞈ shaˉ ve yoˬ. (1 Peˍ 5:1, 2) Yeˍsuˆ yawˇ ve tcuh yaˇ Peˍtruˆ geh tawˇ yaw daꞈ htaˇ awˬ lawn chi ve hkʼa tawˍ lehˆ kʼoˆ piˇ ve yoˬ. Peˍtruˆ Yeˍsuˆ htaꞈ 3 pawˆ chiˇ baˬ peuˬ hkʼawꞈ nawˉ, yawˇ Yeˍsuˆ htaꞈ hkʼaˬ hkʼe taw haꞈ ve hpeuꞈ maw piˇ gaˇ ve yoˬ. Yeˍsuˆ kʼawꞈ teꞈ tu la peuˬ hkʼawꞈ nawˉ, yawˇ Peˍtruˆ htaꞈ na nyi piˇ ve, ‘Yoˇhanˬ ve yaˇ Siˉmonˍ˗oˬ, nawˬ ngaˬ htaꞈ haꞈ˗aw laˇ?’ Peˍtruˆ lehˬ yawˇ ve awˬ shehˍ hpaˇ htaꞈ haꞈ ve tehꞈ hpeuꞈ maw piˇ tuˬ teˇ ceuˬ le le te ve htaꞈ ngaˬ hui yonˍ gʼa ve yoˬ. Hkʼe te leh, Yeˍsuˆ Peˍtruˆ htaꞈ kʼoˆ piˇ ve, “ngaˬ ve yawˬ teˇ hpaˍ htaꞈ haꞈ shaˉ˗oˆ.” (Yoˇ 21:15-17) Oˇ ve teˇ yanˇ tanˬ leh Peˍtruˆ yawˇ ve a shaꞈ teꞈ chehˇ ve teˇ co˗e, Yeˍsuˆ htaꞈ haꞈ ve tehꞈ hpeuꞈ maw piˇ tuˬ Yeˍsuˆ ve yawˬ awˬ moˍ htaꞈ nyi haꞈ shaˉ ve yoˬ. Nyi haꞈ shaˉ paˍ hpehꞈ ve chaw˗oˬ, Yeˍsuˆ Peˍtruˆ geh tawˇ yaw daꞈ ve awˬ lawn nawˬ awˬ pon a yeˇ uiˍ jaˇ ve tehꞈ hkʼaˬ hkʼe hpeuꞈ maw piˇ gʼa tuˬ le? Nawˬ Yaˬhoˉvaˬ leh Yeˍsuˆ htaꞈ haꞈ ve tehꞈ hpeuꞈ maw piˇ gʼa ve lehˬ, awˬ viˉ awˬ nyi htaꞈ hkʼaˬ htaˆ kaꞈ awˬ gʼaˇ piˇ leh Gʼuiˬ sha ve kanˉ maˇ te˗o ve chaw htaꞈ kʼawꞈ kʼawꞈ la tuˬ coˇ caˇ leh ga piˇ ve yoˬ.—Ysk 34:11, 12. w23.01 29 ¶10-11

Nawˬ gʼa hpuˇ chehˇ ve shoꞈ shaꞈ ve awˬ lawn chaw teˇ gʼaˇ kaꞈ maˇ na gʼa laˇ ve tehꞈ dawˇ htaˇ kawˆ tuˬ cawˬ ve yoˬ. Chi hkʼe ve dawˇ hkʼaˇ lehˬ nawˬ awˬ gʼaˇ nuˇ kuiˬ leh dawˇ law kuiˬ maˇ cawˬ tuˬ kaꞈ te laˇ ve yoˬ. Leh maˇ daꞈ ve awˬ ceuˬ htaꞈ maˇ te tuˬ nawˬ awˬ gʼaˇ maˇ cawˬ ve tehꞈ dawˇ ve yoˬ hehˉ. Liꞈ hpu hkʼaw kʼoˆ ve, “beˬ ve lawˇ ve htaꞈ hpuˇ htaˇ, nawˬ hui hkanˍ hpehꞈ tuˬ, ponˬ ve yaꞈ kʼaw htaꞈ yawˇ gu taˍ tuˬ yoˬ.” Chi htaꞈ pa taw, maˇ daꞈ ve awˬ ceuˬ htaꞈ te gaˇ jaˇ ve nyi ma cawˬ ve htawˇ, chi hkʼe ve htaꞈ nawˬ tawˍ daꞈ gʼaˇ ve yoˬ. Leh Yaˬhoˉvaˬ nawˬ htaꞈ ga laˇ tcuh ve kʼo nawˬ maˇ daꞈ ve awˬ ceuˬ htaꞈ maˇ te tuˬ yoˬ. Ngaˬ hui teˇ gʼaˇ le le maˇ biˇ ve chaw hpehꞈ ve pa taw, maˇ daꞈ ve awˬ ceuˬ htaꞈ maˇ te gaˇ ve nyi ma maˇ cawˬ tuˬ haˍ jaˇ ve tehꞈ hkʼaˬ htaˆ kaꞈ tawnˇ taˍ sheˍ. Yaꞈ hkʼaˇ, maˇ daꞈ ve awˬ ceuˬ htaꞈ te gaˇ ve nyi ma hkʼaˬ hkʼe htaˇ cawˬ la ve kʼo, Yoˇsehꞈ te ve hkʼa shuˍ nawˬ tawˍ daꞈ gʼaˇ tuˬ yoˬ. Yawˇ Pawˇtiˆhpaˍ ve awˬ miˇ ma geh laꞈ haˉ hpaw˗e ve yoˬ. (Awˬ 39:12) Maˇ daꞈ ve awˬ ceuˬ nawˬ te gaˇ ve htaꞈ te tuˬ maˇ loˍ. w23.01 12-13 ¶16-17

Hteˇ ve cawˇ ve lehˬ, Yaˬhoˉvaˬ ve te hkʼaˇ dawˇ hkʼaˇ teˇ ceuˬ hpehꞈ ve yoˬ. (Bon 32:4) Liꞈ hpu hkʼaw maˇ˗awˍ ve kʼo hteˇ ve cawˇ ve chaw lehˬ chaw mehˆ hpfuhˇ htaꞈ maˇ nyi leh Yaˬhoˉvaˬ kaꞈ chi hkʼe hpehꞈ ve yoˬ. (Tcuh 10:34, 35) Yaˬhoˉvaˬ chaw mehˆ hpfuhˇ htaꞈ maˇ nyi ve tehꞈ ngaˬ hui shiˍ la tuˬ te laˇ ve lehˬ, Liꞈ hpu laiˉ chaw ceuˬ tawˇ hkawˇ yehˇ leh bvuhꞈ tcuh ve htaꞈ ngaˬ hui mawˬ gʼa ve yoˬ. Yaˬhoˉvaˬ ka tiꞈ te taˍ ve lehˬ, awˬ leh meuˇ ve awˬ yanˇ htaˇ Liꞈ hpu hkʼaw “awˬ tehˬ ve cuˇ yiˍ maˇ maˇ” cawˬ leh laiˉ gʼaˇ chi ve htaꞈ na gʼa tuˬ yoˬ. (Daˍ 12:4) Liꞈ hpu hkʼaw ve cuˇ yiˍ maˇ maˇ cawˬ tuˬ te laˇ ve awˬ hkʼaˇ lehˬ, Liꞈ hpu leh Liꞈ hpu htaꞈ caˉ daꞈ ve liꞈ kʼoˆ liꞈ yuˬ tawˆ ve, liꞈ yanˍ tawˆ ve, leh maˇ maˇ piˇ ve yoˬ. Chi hkʼoˆ kaꞈ, Yaˬhoˉvaˬ ve kanˉ te ve chaw Liꞈ hpu teˇ kʼoˆ hkʼa peu˗eˬ yuˬ tawˆ leh, teˇ hpaˍ hpaˍ kʼo Liꞈ hpu 240 chaw ceuˬ tawˇ hkawˇ hpaˆ yanˍ tawˆ˗oˬ ve yoˬ. Leh a shu teˇ gʼaˇ Liꞈ hpu heuˆ gaˇ ve kʼo awˬ hpfuhˇ maˇ peuˬ leh ca yuˬ la hpehꞈ ve yoˬ. Chi htaꞈ pa taw, chaw teˇ ceuˬ le le awˬ leh meuˇ ve awˬ yanˇ maˇ gaˬ la sheˍ htaˇ, “Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ” gʼa shiˍ cawˇ ve yoˬ. (Maꞈ 24:14) Hteˇ ve cawˇ ve Gʼuiˬ sha lehˬ chaw yaˇ maˇ maˇ yawˇ htaꞈ shiˍ tcuh gaˇ ve yoˬ. Yawˇ htaꞈ shiˍ gʼa ve awˬ hkʼaˇ lehˬ Liꞈ hpu gʼa gʼaw ve yoˬ. Chi hkʼe te ve lehˬ chaw yaˇ teˇ gʼaˇ le le htaꞈ yawˇ haꞈ jaˇ ve pa taw yoˬ. Liꞈ hpu hkʼaw Yaˬhoˉvaˬ haꞈ pehnˇ ve htaꞈ gʼa mawˬ ve yoˬ. w23.02 5-6 ¶11-12

Nawˬ Yaˬhoˉvaˬ ve awˬ liˇ awˬ hkʼaˇ hteˇ ve cawˇ ve htaꞈ haꞈ˗aw laˇ? Haꞈ ve yoˬ. Yaꞈ hkʼaˇ, ngaˬ hui teˇ gʼaˇ le le maˇ biˇ ve chaw hpehꞈ ve pa taw, miˬ guiˬ hkʼoˆ ve awˬ liˇ awˬ hkʼaˇ teˇ hpaˍ htaꞈ ngaˬ hui shaˍ tiꞈ maˇ te ve kʼo, ngaˬ hui htaꞈ heuˆ la kuiˬ cawˬ ve yoˬ. (Isy 5:20) Yeˍsuˆ miˬ guiˬ hkʼoˆ lo chehˇ htaˇ, bon awˬ hoˉ teˇ hpaˍ lehˬ a shu yawˇ ve awˬ liˇ awˬ hkʼaˇ htaꞈ teh leh yawˇ awˬ to shu aꞈ kehˉ daꞈ ve tehꞈ dawˇ ve yoˬ. Chi hkʼe ve htaꞈ Yeˍsuˆ maˇ dawˇ cawˇ. Yeˍsuˆ yawˇ hui htaꞈ deˇ piˇ ve yoˬ. (Cuˇ 7:16; Luˉ 16:15) Chi beuꞈ teˇ co˗e ve chaw teˇ hpaˍ kaꞈ hkʼa shuˍ, yawˇ hui a shu yawˇ ve awˬ liˇ awˬ hkʼaˇ htaꞈ teh leh shu aꞈ kehˉ yawˇ hui awˬ to daꞈ ve tehꞈ dawˇ ve yoˬ. Yawˇ hui chi hkʼe te ve htaꞈ Yaˬhoˉvaˬ maˇ dawˇ cawˇ. Yaˬhoˉvaˬ cawˇ ve tehꞈ kʼoˆ ve htaꞈ gʼaꞈ te ve chaw lehˬ, shu aꞈ kehˉ yawˇ hui awˬ to daꞈ ve tehꞈ maˇ dawˇ. Hteˇ ve cawˇ ve lehˬ te hkʼaˇ dawˇ hkʼaˇ daꞈ jaˇ ve yoˬ. Chi lehˬ Yaˬhoˉvaˬ cawˇ ve tehꞈ kʼoˆ ve awˬ ceuˬ htaꞈ te ve yoˬ. Liꞈ hpu hkʼaw “hteˇ ve cawˇ ve” kʼoˆ ve lehˬ a shaꞈ teꞈ kuiˬ hkʼaw Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve yoˬ. w22.08 27 ¶3-5

Awˬ laꞈ gʼawˇ hui laiˉ pawˆ te yaꞈ jaw ve htawˇ, Yeˍsuˆ yawˇ hui htaꞈ yonˍ gʼa sheˍ ve yoˬ. (Yoˇ 15:16) Yaˍkoˆ leh Yoˇhanˬ aˉ yaˇ gʼa tuˬ Yeˍsuˆ geh lawˬ ve htawˇ, yawˇ hui Gʼuiˬ sha awˬ pon kanˉ te ve hkʼaˬ hkʼe ve htaꞈ dawˇ law ve htawˇ, Yeˍsuˆ htawˇ dawˇ nawˬ dawˇ maˇ cawˬ. Leh tcuh yaˇ ve awˬ moˍ hkʼaw yawˇ hui htaꞈ maˇ gʼaꞈ tawˆ piˇ. (Mk 10:35-40) Peuˬ leh Yeˍsuˆ htaꞈ ca hpeh la ve teˇ haˉ htaˇ, awˬ laꞈ gʼawˇ teˇ gʼaˇ le le yawˇ htaꞈ baˬ taˉ ve yoˬ. (Maꞈ 26:56) Yaꞈ hkʼaˇ, Yeˍsuˆ yawˇ hui htaꞈ dawˇ law chehˇ sheˍ. Yawˇ hui maˇ biˇ ve chaw hpehꞈ ve tehꞈ Yeˍsuˆ shiˍ leh “awˬ leh hkʼa gaˬ yawˇ hui htaꞈ yawˇ haꞈ ve yoˬ.” (Yoˇ 13:1) Yeˍsuˆ kʼawꞈ teꞈ tu la peuˬ hkʼawꞈ nawˉ, yawˇ ve tcuh yaˇ 11 gʼaˇ htaꞈ a yeˇ uiˍ jaˇ ve awˬ vuiˬ piˇ ve lehˬ, shu awˬ laꞈ gʼawˇ hpehꞈ la tuˬ maˍ piˇ ve, leh yawˇ ve yawˬ awˬ hpfuhˇ hkʼaˆ jaˇ ve htaꞈ nyi haꞈ shaˉ tuˬ sheh kʼai tcuh ve yoˬ. (Maꞈ 28:19, 20; Yoˇ 21:15-17) Yeˍsuˆ lehˬ yawˇ hui htaꞈ yonˍ ve cawˇ jaˇ. Miˬ guiˬ hkʼoˆ lo awˬ laꞈ gʼawˇ teˇ gʼaˇ le le Gʼuiˬ sha ve kanˉ ka tiꞈ yeˬ ve hkʼaw awˬ leh hkʼa gaˬ te ve pa taw yoˬ. Yeˍsuˆ lehˬ, maˇ biˇ ve chaw htaꞈ yonˍ ve daꞈ jaˇ ve henˇ yuˬ tuˬ hpehꞈ ve tehꞈ ngaˬ hui gʼa mawˬ ve yoˬ. w22.09 6 ¶12

Yaˬhoˉvaˬ ngaˬ hui htaꞈ haꞈ leh ngaˬ hui geh chehˇ ve tehꞈ yonˍ ve kʼo, Saˍtanˍ ngaˬ hui htaꞈ kawˆ ve awˬ ceuˬ te laˇ ve htaꞈ gʼaˇ ve yoˬ. Chiˇ mvuh ve liꞈ kaˇ nanˉ uiˍ 118 bvuhꞈ paˍ ve awˬ lawn htaꞈ dawˇ nyi sheˍ. Yawˇ kawˆ tuˬ laiˉ ceuˬ htaꞈ gʼa hpuˇ ve yoˬ. Tawˇ pa haˉ te kʼo, yawˇ canˇ paˍ cawˬ maˇ jaˇ leh yawˇ ve canˇ paˍ teˇ hpaˍ hpaˍ kʼo, aˉ yaˇ cawˬ ve yoˬ. (Awˬ tawn 9, 10) Teˇ pawˆ pawˆ kʼo, yawˇ shu nyiˉ piˇ ve laiˉ ceuˬ htaꞈ gʼa hpuˇ ve yoˬ. (Awˬ tawn 13) Leh yawˇ htaꞈ Yaˬhoˉvaˬ kaꞈ maˍ piˇ ve yoˬ. (Awˬ tawn 18) Yaꞈ hkʼaˇ, Chiˇ mvuh ve liꞈ bvuhꞈ paˍ chi teˇ gʼaˇ kʼoˆ ve, “ngaˬ kawˆ tuˬ ve maˇ heˆ.” Yawˇ Yaˬhoˉvaˬ maˍ piˇ ve htaꞈ gʼa ve htawˇ, Yaˬhoˉvaˬ lehˬ yawˇ htaꞈ haꞈ jaˇ ve Awˬ pa hpehꞈ ve tehꞈ yawˇ shiˍ ve yoˬ. Yawˇ aˬ htoꞈ ma gʼa hpuˇ ve htawˇ Yaˬhoˉvaˬ yawˇ htaꞈ ga laˇ tuˬ yoˬ tehꞈ yawˇ yonˍ ve yoˬ. (Chiˇ 118:29) Yaˬhoˉvaˬ nawˬ htaꞈ awˬ tehˬ awˬ na haꞈ ve tehꞈ gʼa yonˍ cawˇ ve yoˬ. Chi hkʼe yonˍ ve lehˬ kawˆ ve 3 ceuˬ htaꞈ gʼaˇ tuˬ ga laˇ ve yoˬ. (1) Yehˬ kʼa htaꞈ hu maˇ gʼa la ve htaꞈ kawˆ ve, (2) chaw htaꞈ kawˆ ve, (3) suh ve htaꞈ kawˆ ve chi ve teˇ hpaˍ yoˬ. w22.06 15 ¶3-4

Ngaˬ hui a shaꞈ teꞈ kuiˬ hkʼaw Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ tehꞈ gʼa shawˍ ve yoˬ. Yaˬhoˉvaˬ lehˬ ngaˬ hui htaꞈ hpanˍ shehˍ hpaˇ hpehꞈ leh yawˇ htaꞈ ceh tiˉ oˉ kʼoˍ pui cawˇ ve yoˬ. (Hpeuꞈ 4:11; 14:6, 7) Hkʼe te leh, ngaˬ hui a shaꞈ teꞈ kuiˬ hkʼaw a yeˇ uiˍ jaˇ ve lehˬ, Gʼuiˬ sha htaꞈ oˉ kʼoˍ pui ve yawˇ haꞈ yuˬ laˇ tuˬ gʼa te ve yoˬ. Chi kʼoˆ gaˇ ve lehˬ, “yawˇ htaꞈ oˉ kʼoˍ pui ve chaw hui lehˬ, nyi ma awˬ hkʼaw leh hteˇ ve cawˇ ve awˬ hkʼaw lo oˉ kʼoˍ gʼa pui ve yoˬ.” (Yoˇ 4:23, 24) Ngaˬ hui oˉ kʼoˉ pui ve htaꞈ daꞈ kehˬ ve awˬ ha hpu beˆ maˍ laˇ tcuh ve kʼo, Liꞈ hpu hkʼaw kʼoˆ taˍ ve hkʼe Gʼuiˬ sha htaꞈ oˉ kʼoˍ pui gʼa tuˬ yoˬ. Ngaˬ hui chehˇ taˍ ve mvuhˇ miˬ hkʼaw Gʼuiˬ sha ve kanˉ te ve htaꞈ tawˍ laˇ leh hkʼa dehꞈ maˇ gʼa te ve htawˇ, ngaˬ hui Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ tehꞈ gʼa shawˍ ve yoˬ. Chi teˇ hkui awˬ viˉ awˬ nyi Yaˬhoˉvaˬ ve Shaˉhkiˆhkanˍ ve chaw hpehꞈ ve pa taw, 100 gʼaˇ hpaˆ htawnˍ hkʼaw gʼa chehˇ ve yoˬ. Chi hkʼe hpehꞈ ve htawˇ yawˇ hui bon lawˬ gʼa ve, a shu yawˇ hkʼaˇ yawˇ Liꞈ hpu henˇ gʼa ve, Yaˬhoˉvaˬ leh yawˇ ve mvuhˇ miˬ awˬ lawn shu htaꞈ kʼoˆ maˍ piˇ ve pa taw, yawˇ hui ha lehˬ gʼa ve yoˬ. Shu ngaˬ hui htaꞈ deˇ laˇ ve maˇ heˆ leh fawˉ mehˍ laˇ htaˇ, Yaˬhoˉvaˬ ngaˬ hui geh chehˇ ve tehꞈ shiˍ ve pa taw ha lehˬ gʼa ve yoˬ. Yawˇ ngaˬ hui htaꞈ awˬ bon naꞈ laˇ leh laꞈ shawnˍ peꞈ laˇ tuˬ yoˬ.—1 Peˍ 4:14. w22.10 9 ¶13

Tawˇ naˉ ve liꞈ teˇ daw hkʼaw beˆ maˍ laˇ hkawˇ cawˬ maˇ jaˇ. Awˬ yanˇ hkʼaˬ hkʼe maw ponˬ kʼai˗oˬ ve htawˇ, beˆ maˍ laˇ hkawˇ chi awˬ bon cawˬ leh ngaˬ hui a shaꞈ teꞈ kuiˬ hkʼaw daꞈ la tuˬ ga laˇ ve yoˬ. Tawˇ naˉ ve liꞈ hkʼaw beˆ maˍ laˇ hkawˇ 2 ceuˬ htaꞈ chaˬ nyi sheˍ. Awˉ lawˉ teˇ ceuˬ lehˬ, Nawˬ cawˬ ve awˬ ceuˬ htaꞈ nyi hkʼaˇ suh sheˍ. Tawˇ naˉ ve liꞈ 23:4, 5 hkʼaw kʼoˆ ve, “paw sha la tuˬ ve htaꞈ uˉ hkeuꞈ tcuhˉ leh taˇ gʼaꞈ ca. Nawˬ ve hpu teˇ hpaˍ lehˬ toˍ laꞈ kʼuˉ nawꞈ leh teˇ hkui tiˉ poˬ hpaw˗e ve aˉ ceˬ hkʼa shuˍ mehˉ kʼai puiˉ ve yoˬ.” Chi beuꞈ teˇ co˗e haˍ gʼawˇ ve chaw leh paw sha ve chaw lehˬ, hpu shi htaꞈ ceh tiˉ gʼaꞈ ca chehˇ ve pa taw, awˬ meh luˬ tuˬ, awˬ chawˇ maˇ cawˬ tuˬ, yehˬ kʼa hpaˆ tuˬ, leh maˇ chehˇ sha tuˬ, chi hkʼe gʼa hpuˇ ve yoˬ hehˉ. (Tawˇ 28:20; 1 Tiˆ 6:9, 10) Nyiˇ ceuˬ teˇ ceuˬ lehˬ, nawˬ tawˇ maˇ yaw sheˍ htaˇ dawˇ nyi sheˍ. Ngaˬ hui tawˇ yaw ve htaꞈ shaˍ tiꞈ maˇ te ve kʼo, shoꞈ shaꞈ ve cawˬ la ve yoˬ. Tawˇ naˉ ve liꞈ 12:18 hkʼaw kʼoˆ ve, “maˇ dawˇ nyi leh yaw ve tawˇ teˇ hpaˍ lehˬ, aˉ htaw hkʼa shuˍ shu htaꞈ naˬ piˇ lawˬ ve yoˬ. Yaꞈ hkʼaˇ, cuˇ yiˍ htaꞈ yehˇ leh yaw ve tawˇ lehˬ, shu htaꞈ kʼawꞈ na˗e la piˇ gʼa ve yoˬ.” Ngaˬ hui shu ve awˬ lawn maˇ kʼoˆ daꞈ ve kʼo, chaw teˇ gʼaˇ geh kaꞈ ngaˬ hui awˬ lawn maˇ cawˬ daꞈ.—Tawˇ 20:19. w22.10 21-23 ¶14, 16-17

Yeˍsaˍkeˍlaˆ lehˬ hto toˇ ve awˬ lawn htaꞈ gʼa na gʼa leh awˬ lawn oˇ ve htaꞈ hkʼa dehꞈ yonˍ gʼa leh yawˇ kʼoˆ gaˇ tuˬ te piˇ ve yoˬ. Yeˍsaˍkeˍlaˆ liꞈ daw chi yawˇ caˇ peuˬ hkʼawꞈ nawˉ anˇ jaˇ ve yoˬ. Awˬ lawn kʼo, liꞈ daw chi lehˬ “pehˇ gʼuiˬ hkʼa shuˍ mehˬ jaˇ ve yoˬ.” (Ysk 3:3) Aˬ htoꞈ ma te Yeˍsaˍkeˍlaˆ mehˬ jaˇ ve le? Awˬ lawn kʼo, yawˇ Yaˬhoˉvaˬ ve awˬ tan gʼa te ve awˬ meꞈ awˬ hponˇ cawˬ jaˇ tehꞈ dawˇ leh Yeˍsaˍkeˍlaˆ Yaˬhoˉvaˬ ve tcuh kaˍ paˍ te tuˬ leuˆ piˇ ve pa taw yawˇ ha lehˬ jaˇ ve yoˬ. (Chiˇ 19:8-11) Chi hkʼoˆ kaꞈ, Yaˬhoˉvaˬ Yeˍsaˍkeˍlaˆ htaꞈ kʼoˆ piˇ ve, “ngaˬ nawˬ htaꞈ kʼoˆ laˇ chehˇ ve tawˇ htaꞈ hkʼa dehꞈ na leh tawnˇ taˍ˗oꞈ.” (Ysk 3:10) Yaˬhoˉvaˬ Yeˍsaˍkeˍlaˆ htaꞈ kʼoˆ piˇ ve, liꞈ daw oˇ ve hkʼaw ve htaꞈ hkʼa dehꞈ tawnˇ taˍ leh dawˇ nyi tcuh ve pa taw yawˇ gʼaꞈ te leh yawˇ ve yonˍ hkʼaˇ uiˍ la mvuh la ve yoˬ. Kanˇ paˆ cawˬ ve tawˇ hkawˇ chi Yeˍsaˍkeˍlaˆ chaw yaˇ htaꞈ gʼa ca kʼoˆ piˇ ve yoˬ. (Ysk 3:11) Yeˍsaˍkeˍlaˆ liꞈ daw hkʼaw ve awˬ lawn hkʼa dehꞈ na gʼa leh suhˉ jehˬ ve awˬ lawn yawˇ ca hto piˇ tuˬ gu hehnˇ˗oˬ ve tehꞈ, hkʼa dehꞈ yonˍ gʼa leh yawˇ htaꞈ piˇ taˍ ve kanˉ hkʼa dehꞈ te peuˬ gʼa ve yoˬ. w22.11 6 ¶12-14

Gʼuiˬ sha ve kanˉ hkʼaˇ hkʼaw pa ve awˬ ceuˬ cawˬ htaˇ, nawˬ htaꞈ heuˆ la kuiˬ cawˬ ve kʼo, nawˬ hkʼaˬ hkʼe te tuˬ le? Gʼuiˬ sha ve kanˉ hkʼaˇ hkʼaw pa ve awˬ ceuˬ cawˬ htaˇ gʼa haꞈ yuˬ ve yoˬ. Iˉsaˍreˍlaˆ chaw hui heh puiˉ hkʼaw lo te toˇ chehˇ ve awˬ yanˇ htaˇ, Kawˇhaˆ ve awˬ ceuˬ awˬ hkʼaˇ teˇ hpaˍ hpaˍ Iˉsaˍreˍlaˆ chaw hui mehˆ gʼuˇ suhˍ lo Yaˬhoˉvaˬ ve ka tiꞈ shaˉ caˆ ta kʼoˍ gʼa taˆ kʼai ve yoˬ. Chi lehˬ daꞈ jaˇ ve awˬ vuiˬ hpehꞈ ve yoˬ. (Heh 3:29, 31; 10:33; Ys 3:2-4) Yaꞈ hkʼaˇ, Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ hkʼaw chehˇ˗oˬ htaˇ, ka tiꞈ shaˉ caˆ ta kʼoˍ teˇ hkui teˇ hkui taˆ kʼai tuˬ maˇ loˍ˗o. Chi htaꞈ pa taw, Kawˇhaˆ ve awˬ ceuˬ awˬ hkʼaˇ awˬ hkʼaw lo chaw teˇ hpaˍ lehˬ, awˬ nu ve awˬ vuiˬ teˇ ceuˬ ceuˬ htaꞈ gʼa te ve yoˬ. (1 Raˍ 6:31-33; 26:1, 24) Chi aꞈ kehˉ awˬ meꞈ awˬ hponˇ cawˬ ve kanˉ te tcuh laˇ cawˇ ve tehꞈ yawˇ hui kʼoˆ ve Liꞈ hpu hkʼaw maˇ mawˬ. Awˬ lawn kʼo, yawˇ hui ve awˬ ceuˬ awˬ hkʼaˇ lehˬ a yeˇ uiˍ ve awˬ vuiˬ htaꞈ gʼa te jaw ve yoˬ. Ngaˬ hui awˬ pon henˇ yuˬ tuˬ aˬ htoꞈ ma le? Gʼuiˬ sha ve kanˉ hkʼaˇ aˬ htoꞈ ma pa ve htawˇ, pa ve chi nawˬ htaꞈ hteˇ˗ehꞈ heuˆ la kuiˬ cawˬ ve kʼo, haꞈ yuˬ leh gʼaꞈ te cawˇ ve yoˬ. Ngaˬ hui gʼa ve awˬ vuiˬ aˬ htoꞈ ma ve kanˉ hpehꞈ ve htawˇ maˇ kʼoˆ, kanˉ chi ve htaꞈ ha lehˬ chehˇ˗oˆ. Nawˬ gʼa ve awˬ vuiˬ lehˬ nawˬ awˬ pon awˬ bon maˇ cawˬ ve tehꞈ kʼoˆ gaˇ ve maˇ heˆ ve htaꞈ tawnˇ taˍ sheˍ. Nawˬ ve awˬ vuiˬ aꞈ kehˉ nawˬ na yuˬ ve lehˬ Yaˬhoˉvaˬ awˬ pon awˬ hpfuhˆ hkʼaˆ jaˇ. w22.11 23-24 ¶10-11

Awˇneˍsiˉhpawˍ lehˬ tcuh yaˇ Pawˇluꞈ htaꞈ mawˬ htaˇ hkʼa gaˬ ca hpfuhˆ ve yoˬ. Awˇneˍsiˉhpawˍ lehˬ yawˇ ve a shaꞈ gʼa shonˇ ve htawˇ, yawˇ coˇ caˇ leh Pawˇluꞈ loˍ ve awˬ ceuˬ htaꞈ ga piˇ ve yoˬ. Ngaˬ hui henˇ yuˬ tuˬ awˬ pon aˬ htoꞈ ma le? Awˬ viˉ awˬ nyi fawˉ mehˍ ve gʼa hpuˇ chehˇ ve htaꞈ ngaˬ hui shu htaꞈ kawˆ leh maˇ ga piˇ ve taˇ te. Chi hkʼe te ve aꞈ kehˉ yawˇ hui htaꞈ nyi haꞈ shaˉ piˇ leh hkʼa dehꞈ ga piˇ sheˍ. (Tawˇ 17:17) Yawˇ hui lehˬ ngaˬ hui haꞈ laˇ tuˬ leh ga laˇ tuˬ htaꞈ loˍ ve yoˬ. Ruˇsaˆ mvuhˇ miˬ lo ve awˬ viˉ awˬ nyi ve awˬ lawn daꞈ jaˇ ve henˇ yuˬ tuˬ hpehꞈ ve yoˬ. Yawˇ hui lehˬ awˬ viˉ awˬ nyi htawnˍ hkʼaw lo chehˇ ve chaw htaꞈ coˇ caˇ leh laiˉ ceuˬ ga piˇ ve yoˬ. Awˬ viˉ awˬ nyi htaꞈ suhˉ jehˬ piˇ htaˇ, yawˇ hui kʼai leh awˬ gʼaˇ ca piˇ˗e ve yoˬ. Ngaˬ hui henˇ yuˬ tuˬ awˬ pon aˬ htoꞈ ma le? Hkriꞈ yaˇ awˬ moˍ hkʼaw leh Gʼuiˬ sha ve kanˉ hkʼaˇ hkʼaw sheh kʼai paˍ htaꞈ shu she pfuhˍ piˇ ve, fawˉ mehˍ piˇ ve, leh shu hpeh yuˬ piˇ ve htawˇ, ngaˬ hui taˇ kawˆ. Yawˇ hui awˬ pon bon lawˬ piˇ leh yawˇ hui htaꞈ ga piˇ tuˬ awˬ hkʼaˇ ca sheˍ. Chi hkʼoˆ kaꞈ, yawˇ hui ve yehˬ kʼa hkʼaw ve chaw htaꞈ kaꞈ nyi haꞈ shaˉ piˇ sheˍ.—Tcuh 12:5; 2 Kawˇ 1:10, 11. w22.11 17 ¶11-12

Nyi haꞈ shaˉ paˍ lehˬ awˬ viˉ awˬ nyi htaꞈ awˬ gʼaˇ gʼa piˇ cawˇ ve yoˬ. Yawˇ hui awˬ viˉ awˬ nyi htaꞈ awˬ gʼaˇ piˇ tuˬ Liꞈ hpu htaꞈ cuˇ leh awˬ viˉ awˬ nyi dawˇ haˍ ve htaꞈ yeunˇ hkanˍ gʼaˇ tuˬ ga piˇ ve yoˬ. (1 Peˍ 5:2) Mvuhˇ yeˬ mvuhˇ haw lonˉ gʼa hpuˇ htaˇ, awˬ viˉ awˬ nyi teˇ gʼaˇ le le kawˆ tuˬ maˇ cawˬ ve, caˇ tuˬ cawˬ ve, aˉ poꞈ veuꞈ kʼaˇ leh haˉ kuiˬ cawˬ ve, tehꞈ nyi haꞈ shaˉ paˍ gʼa ga piˇ cawˇ ve yoˬ. Yaꞈ hkʼaˇ, laiˉ ha pa peuˬ hkʼawꞈ nawˉ, awˬ viˉ awˬ nyi lehˬ Liꞈ hpu hkʼaw ve awˬ gʼaˇ peꞈ laˇ tuˬ loˍ leh yawˇ hui dawˇ haˍ ve htaꞈ yeunˇ hkanˍ gʼaˇ tuˬ ga laˇ tuˬ kaꞈ loˍ ve yoˬ. (Yoˇ 21:15) Awˬ tcuhˆ puiˍ lo ve kawˍmiˍtiˍ hkʼaw kanˉ te chehˇ ve Heh˗lo lehˬ awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ chehˇ ve chaw htaꞈ ga piˇ tuˬ kʼai ve yoˬ. Yawˇ kʼoˆ ve, “chi awˬ yanˇ gʼa yehˇ ve yoˬ. Yawˇ hui ve a shaꞈ teꞈ hkʼaˇ hkʼaw awˉ lawˉ htaˇ hkʼe leˇ awˬ meu˗eˇ awˬ meu˗eˇ hpehꞈ la˗oˬ ve htawˇ, yawˇ hui haꞈ ve chaw suh˗e ve, mawˇ jeˬ luˬ kʼai ve, leh yawˇ hui gʼa hpuˇ ve awˬ ceuˬ htaꞈ maˇ leunˇ gʼa sheˍ ve tehꞈ kʼoˆ ve yoˬ. Maˇ maw maˇ maw kʼo yawˇ hui dawˇ haˍ ve leh nyi ma luˬ ve cawˬ sheˍ ve yoˬ. Yaꞈ hkʼaˇ, yawˇ hui yonˍ hkʼaˇ maˇ yonˍ yeˬ ve tehꞈ kʼoˆ gaˇ ve maˇ heˆ.” Liꞈ hpu hkʼaw “hawˬ ve chaw hui geh teˇ geh hawˬ˗oꞈ” tehꞈ kʼoˆ ve htaꞈ nyi haꞈ shaˉ paˍ yuˬ yehˇ ve yoˬ.—Roˉ 12:15. w22.12 22 ¶1; 24-25 ¶10-11

Ngaˬ hui cawˇ ve awˬ ceuˬ htaꞈ te gʼa tuˬ Yaˬhoˉvaˬ daꞈ kehˬ ve awˬ ha hpu ngaˬ hui htaꞈ peꞈ laˇ ve yoˬ. Ngaˬ hui Liꞈ hpu gʼaw htaˇ Gʼuiˬ sha geh daꞈ kehˬ ve awˬ ha hpu gʼa ve yoˬ. Ngaˬ hui hpawnˬ daꞈ˗e htaˇ kaꞈ daꞈ kehˬ ve awˬ ha hpu gʼa ve yoˬ. Ngaˬ hui hkʼa shuˍ cawˇ ve awˬ ceuˬ htaꞈ te ve awˬ viˉ awˬ nyi geh ngaˬ hui gʼa chehˇ ve yoˬ. Chi ngaˬ hui awˬ gʼaˇ cawˬ tuˬ te laˇ ve yoˬ. (Heˍ 10:24, 25; 13:7) Chi hkʼoˆ kaꞈ, ngaˬ hui awˬ gʼaˇ nuˇ kuiˬ teˇ ceuˬ ceuˬ htaꞈ tawˍ daꞈ gʼaˇ tuˬ Yaˬhoˉvaˬ geh bon lawˬ htaˇ, ngaˬ hui awˬ gʼaˇ cawˬ leh tawˍ daꞈ gʼaˇ tuˬ yawˇ daꞈ kehˬ ve awˬ ha hpu ngaˬ hui htaꞈ peꞈ laˇ tuˬ yoˬ. Teˇ pawˆ pawˆ maˇ daꞈ ve awˬ ceuˬ htaꞈ te gaˇ tuˬ nyi ma cawˬ la ve htawˇ, Hkriꞈ yaˇ ve awˬ vuiˬ teˇ hpaˍ htaꞈ te ve lehˬ, maˇ daꞈ ve awˬ ceuˬ ngaˬ hui te gaˇ ve htaꞈ maˇ te tuˬ ga laˇ ve yoˬ. Hkriꞈ yaˇ ve awˬ vuiˬ htaꞈ hkʼaˬ htaˆ kaꞈ te leh cawˇ ve awˬ ceuˬ htaꞈ caˉ leh te tuˬ a yeˇ uiˍ jaˇ ve awˬ vuiˬ hpehꞈ ve yoˬ. w23.01 11 ¶13-14

Liꞈ hpu lehˬ chehˇ sha cawˬ sha hpawˇ maˇ heˆ leh caˇ tuˬ dawˬ tuˬ hpawˇ beˆ maˍ laˇ ve liꞈ kʼoˆ maˇ hpehꞈ ve htawˇ, awˬ lawn chi ve htaꞈ Yaˬhoˉvaˬ hkʼaˬ hkʼe dawˇ ve ngaˬ hui shiˍ ve yoˬ. Tawˇ pa haˉ te kʼo, yawˇ kʼoˆ ve, ‘nawˬ htaꞈ naˬ tuˬ te laˇ chehˇ ve awˬ ceuˬ teˇ hpaˍ htaꞈ yuˬ baˬ˗oꞈ.’ (Cuˇ 11:10) Chi hkʼoˆ kaꞈ, Liꞈ hpu hkʼaw ngaˬ hui htaꞈ kʼoˆ laˇ ve, caˇ ponˬ caˇ leuˉ ve maˇ heˆ leh tzuhˬ dawˬ bvuhˆ ve maˇ te cawˇ. Chi ve lehˬ ngaˬ hui awˬ to chehˇ sha cawˬ sha hpawˇ kawˆ tuˬ cawˬ leh ngaˬ hui suh tuˬ te laˇ gʼa ve yoˬ. (Tawˇ 23:20) Yaˬhoˉvaˬ lehˬ ngaˬ hui htaꞈ caˇ ve dawˬ ve hpawˇ shaˍ tiꞈ te tcuh gaˇ ve yoˬ. (1 Kawˇ 9:25) Ngaˬ hui a shaꞈ htaꞈ awˬ hpfuhˇ shiˍ ve tehꞈ hpeuꞈ maw piˇ gʼa tuˬ, chehˇ sha cawˬ sha hpawˇ cuˇ yiˍ cawˬ ve hkʼaw gʼa dawˇ cheˆ ve yoˬ. (Chiˇ 119:99, 100; Tawˇ 2:11) Tawˇ pa haˉ te kʼo, aˬ htoꞈ ma caˇ tuˬ ngaˬ hui hkʼa dehꞈ gʼa dawˇ nyi ve yoˬ. Ngaˬ hui dawˇ cawˇ ve caˇ tuˬ teˇ ceuˬ ceuˬ awˬ to hpawˇ awˬ bon maˇ cawˬ ve tehꞈ shiˍ htaˇ ngaˬ hui maˇ caˇ tuˬ yoˬ. Chi hkʼoˆ kaꞈ, hkʼa dehꞈ zuhꞈ bvuhˆ ve, awˬ yanˇ cawˇ cawˇ awˬ gʼaˇ cawˬ ve, hkʼaˬ htaˆ kaꞈ awˬ to htaꞈ nyi haꞈ shaˉ ve, leh yehˬ daꞈ kehˬ tuˬ te ve, chi ve teˇ hpaˍ htaꞈ ngaˬ hui te chehˇ ve tehꞈ hpeuꞈ maw piˇ ve yoˬ. w23.02 21 ¶6-7

Nawˬ Liꞈ hpu gʼaw htaˇ Liꞈ hpu hkʼaw awˬ hpfuhˇ hkʼaˆ ve cuˇ yiˍ htaꞈ hkʼaˬ hkʼe te ca gʼa tuˬ le? 2 Tiˆmoˉseˍ liꞈ 3:16, 17 chaˬ nyi sheˍ. Liꞈ hpu awˬ tawn chi ve hkʼaw kʼoˆ ve, Liꞈ hpu hkʼa peu˗eˬ lehˬ (1) maˍ piˇ tuˬ, (2) venˇ baˆ hpeuꞈ maˍ piˇ tuˬ, (3) kʼawꞈ daꞈ la piˇ tuˬ, leh (4) hteˇ ve cawˇ ve htaꞈ te tuˬ maˍ piˇ tuˬ, “awˬ bon cawˬ ve yoˬ.” Liꞈ hpu hkʼaw ve liꞈ daw teˇ daw daw htaꞈ nawˬ hkʼa dehꞈ maˇ gʼaw ve htawˇ, Liꞈ hpu hkʼaw chi ve 4 ceuˬ nawˬ awˬ pon awˬ bon gʼa tuˬ yoˬ. Nawˬ gʼaw ve awˬ lawn Yaˬhoˉvaˬ htaꞈ caˉ daꞈ ve, yawˇ ve a loˍ htaꞈ caˉ daꞈ ve, leh Liꞈ hpu hkʼaw ve awˬ liˇ awˬ hkʼaˇ htaꞈ caˉ daꞈ ve aˬ htoꞈ ma maˍ laˇ ve dawˇ nyi sheˍ. Liꞈ hpu hkʼaw awˬ tawn oˇ ve leh awˬ lawn oˇ ve venˇ baˆ hkʼaˬ hkʼe hpeuꞈ maˍ laˇ ve htaꞈ dawˇ nyi sheˍ. Chi hkʼe te htaˇ nawˬ ve te hkʼaˇ dawˇ hkʼaˇ maˇ daꞈ ve aˬ htoꞈ ma cawˬ ve htaꞈ mawˬ tuˬ ga laˇ ve yoˬ. Leh nawˬ Yaˬhoˉvaˬ geh hkʼaˬ htaˆ kaꞈ ka tiꞈ yeˬ tuˬ kaꞈ ga laˇ ve yoˬ. Chi hkʼoˆ kaꞈ, awˬ lawn oˇ ve nawˬ htaꞈ kʼawꞈ daꞈ la piˇ tuˬ hkʼaˬ hkʼe ga laˇ ve htaꞈ dawˇ nyi sheˍ. Tawˇ pa haˉ te kʼo, nawˬ hto toˇ kuiˬ lo shu maˇ na gaˇ ve, maˇ heˆ leh maˍ yaꞈ ve awˬ ceuˬ htaꞈ nawˬ hkʼawꞈ piˇ gʼa tuˬ kaꞈ ga laˇ ve yoˬ. Awˬ tawn oˇ ve teˇ hpaˍ nawˬ hteˇ ve cawˇ ve htaꞈ te tuˬ hkʼaˬ hkʼe maˍ laˇ ve leh nawˬ Yaˬhoˉvaˬ dawˇ ve hkʼe dawˇ tuˬ hkʼaˬ hkʼe ga laˇ ve htaꞈ kaꞈ nyi sheˍ. Nawˬ awˬ bon gʼa ve chi ve 4 ceuˬ htaꞈ hkʼa dehꞈ tawnˇ taˍ sheˍ. Nawˬ Liꞈ hpu gʼaw htaˇ awˬ hpfuhˇ hkʼaˆ jaˇ ve cuˇ yiˍ htaꞈ nawˬ gʼa tuˬ yoˬ. w23.02 11 ¶11

“7 hkʼawꞈ” tehꞈ kʼoˆ ve awˬ leh meuˇ lo gaˬ htaˇ, Yeˍsuˆ Jawˇ mawˇ te tuˬ yoˬ tehꞈ, Daˍyeˍlaˆ liꞈ hkʼaw tcuh kaˍ paˍ ve tawˇ hkawˇ ngaˬ hui shiˍ tuˬ te laˇ ve yoˬ. Yaꞈ hkʼaˇ, awˬ lawn chi hkʼaˬ hkʼe htaˇ hpehꞈ la tuˬ ngaˬ hui hkʼaˬ hkʼe te shiˍ gʼa ve le? (Daˍ 4:10-17) 7 hkʼawꞈ ve awˬ yanˇ lehˬ 2,520 hkʼawꞈ htaꞈ kʼoˆ gaˇ ve yoˬ. Awˬ yanˇ chi lehˬ 607 hkʼawꞈ B C E htaˇ, Baˍbuˍlonˍ chaw Yeˍruˆsaˍlehnˍ venˇ lo Yaˬhoˉvaˬ ve kʼaw jaw ve jawˇ mawˇ awˬ leh meuˇ teˇ gʼaˇ htaꞈ te tuˬ piˇ htaˇ tanˬ ve yoˬ. Yaˬhoˉvaˬ lehˬ Yeˍsuˆ htaꞈ yawˇ ve mvuhˇ miˬ hkʼaw “leuˆ yuˬ taˍ ve” Jawˇ mawˇ te tcuh htaˇ, 1914 hkʼawꞈ awˬ yanˇ chi peuˬ ve yoˬ. (Ysk 21:25-27) Tcuh kaˍ paˍ ve tawˇ hkawˇ chi teˇ hpaˍ ngaˬ hui awˬ pon awˬ bon hkʼaˬ hkʼe cawˬ ve le? Tcuh kaˍ paˍ ve tawˇ hkawˇ 7 hkʼawꞈ ve htaꞈ caˉ daꞈ ve awˬ lawn na gʼa tuˬ, Yaˬhoˉvaˬ yawˇ ka tiꞈ te taˍ ve awˬ yanˇ cawˇ ve hkʼaw awˬ tehˬ awˬ na biˇ la tcuh tuˬ yoˬ tehꞈ ngaˬ hui yonˍ gʼa ve yoˬ. Yaˬhoˉvaˬ ve mvuhˇ miˬ hkʼaˬ htaˆ cawˬ la tuˬ ve yawˇ awˬ yanˇ tinˍ taˍ ve hkʼa shuˍ, awˬ nu ve tcuh kaˍ paˍ ve tawˇ hkawˇ awˬ yanˇ tinˍ taˍ ve hkʼaw awˬ tehˬ hpehꞈ la ve yoˬ. Yaˬhoˉvaˬ ve awˬ nyi lehˬ ‘haˆ haˆ gaˬ la tuˬ yoˬ!’—Haˍ 2:3. w22.07 3 ¶3-5