Hkriꞈ yaˇ ve a shaꞈ teꞈ hkʼaˇ
Naˆ tsuhˇ yehˬ lo laꞈ tcuhˍ laꞈ haˉ maˇ gʼa kʼai sheˍ htaˇ gu hehnˇ taˍ ve
Aˬ htoꞈ ma pa taw gu hehnˇ taˍ cawˇ ve le? Awˬ lawn kʼo, maˇ dawˇ maˇ gaˇ ve awˬ ceuˬ hpehꞈ la leh naˆ tsuhˇ yehˬ lo laꞈ tcuhˍ laꞈ haˉ gʼa kʼai la ve yoˬ. Chi htaꞈ pa taw, maˇ dawˇ maˇ gaˇ ve awˬ ceuˬ maˇ hpehꞈ la sheˍ htaˇ, chi teˇ hkui kaꞈ gu hehnˇ taˍ ve kʼo, nawˬ haꞈ shaˉ ve daꞈ ve awˬ hkʼaˇ htaꞈ gʼa tuˬ yoˬ. Chi hkʼe te ve lehˬ, a shaꞈ leh Yaˬhoˉvaˬ ve awˬ liˇ tawˇ hkawˇ suhˍ htaꞈ caˉ daꞈ ve nawˬ yawˆ yan piˇ ve tehꞈ hpeuꞈ maw laˇ ve yoˬ.—Tcuh 15:28, 29.
Nawˬ hkʼaˬ hkʼe te gu hehnˇ taˍ gʼa ve le?
Suhˍ maˇ keu ve liꞈ (DPA) hkʼaw maˇ bvuhꞈ keu sheˍ htaˇ, bon lawˬ leh hkʼa dehꞈ dawˇ nyi sheˍ.a Baˆtiˆsaˬ haꞈ yuˬ˗oˬ ve chaw lehˬ, nyi haꞈ shaˉ paˍ geh liꞈ chi lawˬ gʼa ve yoˬ. Leh yaˇ ehˉ cawˬ ve kʼo, yaˇ awˬ pon suhˍ maˇ keu ve liꞈ (ic) kaꞈ lawˬ gʼa ve
Nawˬ yaˇ hu chehˇ ve kʼo, yaˇ hu ma awˬ pon liꞈ (S-401) nyi haꞈ shaˉ paˍ geh lawˬ gʼa ve yoˬ. Liꞈ chi lehˬ nawˬ yaˇ hu leh yaˇ paw htaˇ, suhˍ ve awˬ lawn cawˬ la kʼo, cawˇ ve hkʼaw dawˇ cheˆ gʼa tuˬ ga laˇ ve
Nawˬ naˬ leh haꞈ shaˉ ve awˬ hkʼaˇ suhˍ htaꞈ caˉ daꞈ ve, maˇ heˆ leh naˆ tsuhˇ yehˬ lo gʼa zuhꞈ puiˉ ve kʼo, nyi haꞈ shaˉ paˍ htaꞈ kʼoˆ piˇ sheˍ. Leh saˍ laꞈ gʼonˍ htaꞈ Yaˬhoˉvaˬ ve Shaˉhkiˆhkanˍ ve chaw (nyi haꞈ shaˉ paˍ) guiˇ la tuˬ yoˬ tehꞈ kʼoˆ piˇ sheˍ
Nyi haꞈ shaˉ paˍ hkʼaˬ hkʼe ga laˇ gʼa ve le? Suhˍ maˇ keu ve liꞈ hkʼaw awˬ lawn awˬ tanˇ bvuhꞈ keu tuˬ yawˇ hui ga laˇ gʼa ve yoˬ. Yaꞈ hkʼaˇ, nyi haꞈ shaˉ paˍ lehˬ yawˇ hui ve dawˇ hkʼaˇ nawˬ htaꞈ maˇ kʼoˆ laˇ leh nawˬ awˬ tan dawˇ cheˆ laˇ tuˬ maˇ te. (Roˉ 14:12; Gaˍ 6:5) Nawˬ suhˍ htaꞈ caˉ daꞈ ve awˬ lawn gʼa hpuˇ leh nyi haꞈ shaˉ paˍ htaꞈ kʼoˆ piˇ htaˇ, nyi haꞈ shaˉ paˍ lehˬ, Naˆ tsuhˇ yehˬ lo caˉ daꞈ paˍ nyi haꞈ shaˉ paˍ awˬ moˍ (HLC) htaꞈ laꞈ haˉ kʼoˆ piˇ tuˬ yoˬ.
Naˆ tsuhˇ yehˬ lo caˉ daꞈ paˍ nyi haꞈ shaˉ paˍ awˬ moˍ nawˬ htaꞈ hkʼaˬ hkʼe ga laˇ gʼa ve le? Nyi haꞈ shaˉ paˍ chi teˇ moˍ lehˬ, saˍ laꞈ gʼonˍ leh awˬ liˇ tawˇ hkawˇ hpawˇ kanˉ te ve chaw geh tawˇ yaw daꞈ tuˬ awˬ hkʼaˇ gʼa henˇ ve yoˬ. Nyi haꞈ shaˉ paˍ chi teˇ moˍ ngaˬ hui ve yonˍ hkʼaˇ htaꞈ chaw chi teˇ hpaˍ kʼoˆ maˍ piˇ tuˬ yoˬ. A naˬ gu ve awˬ hkʼaˇ suhˍ htaꞈ caˉ daꞈ ve jaw kʼai tuˬ, yawˇ hui saˍ laꞈ gʼonˍ geh tawˇ yaw daꞈ gʼa ve yoˬ. Loˍ ve kʼo, a naˬ gu ve awˬ hkʼaˇ suhˍ maˇ yehˇ ve saˍ laꞈ gʼonˍ htaꞈ ca mawˬ tuˬ, yawˇ hui ca laˇ gʼa ve yoˬ.
A naˬ gu ve awˬ hkʼaˇ suhˍ htaꞈ caˉ daꞈ ve kʼo nawˬ hkʼaˬ hkʼe te dawˇ cheˆ tuˬ le? VDO nyi leh na hkawˇ chi teˇ hpaˍ htaꞈ hkʼawꞈ laˇ sheˍ:
A naˬ gu ve awˬ hkʼaˇ suhˍ htaꞈ caˉ daꞈ ve nawˬ gu hehnˇ gʼa tuˬ VDO chi hkʼaˬ hkʼe ga laˇ gʼa ve le?
a A naˬ gu ve awˬ hkʼaˇ suhˍ htaꞈ caˉ daꞈ ve nawˬ dawˇ cheˆ gʼa tuˬ Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ awˬ lawn 39 hkʼaw nyi sheˍ.