Ho˗dan dawˇ teh taˍ ve htaꞈ te gʼa ve
Peuˬ laˬ ve laiˉ hkʼawꞈ htaˇ, Enˬdoˬneˇshaˇ mvuhˇ miˬ lo ve conˇ Sa˗hki˗be˗sa teˇ kaˬ lo nawˬ ca guiˇ˗e ve kʼo, conˇ chi ve hkʼaw chehˇ ve awˬ viˉ awˬ nyi yaˇ miˇ 3 gʼaˇ htaꞈ laˇ tsuhˇ gʼuiˬ pfuhˍ lo nawˬ gʼa mawˬ tuˬ yoˬ. Yawˇ hui chaw laiˉ gʼaˇ Liꞈ hpu htaꞈ shiˍ tuˬ ga piˇ gʼa ve pa taw, conˇ hkʼaw chehˇ ve chaw yawˇ hui htaꞈ Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ shiˍ ve yoˬ. Yaꞈ hkʼaˇ, yawˇ hui laˇ tsuhˇ gʼuiˬ pfuhˍ lo chehˇ ve htaꞈ nawˬ gʼa mawˬ htaˇ, yawˇ hui teˇ ceuˬ ceuˬ te chehˇ ve yoˬ.
Enˬdoˬneˇshaˇ mvuhˇ miˬ awˬ na hpawˇ lo ve conˇ Sa˗hki˗be˗sa
Yawˇ hui aˬ htoꞈ ma te chehˇ ve le? Yawˇ hui laˇ tsuhˇ gʼuiˬ pfuhˍ jaˇ lo haˉ pui shiˍ gʼawˆ ve yoˬ. Haˉ pui shiˍ teˇ shiˍ shiˍ kʼo bawˉ shiˍ hkʼe hui cawˬ ve yoˬ. Peuˬ hkʼawꞈ nawˉ, yawˇ hui piˉ htawˆ hkʼoˆ lo mui taˍ leh haˉ pui shiˍ gʼaˆ u hkʼe hui˗ehˍ dawˆ yuˬ ve yoˬ. Leh yawˇ hui haˉ pui shiˍ chi teˇ hpaˍ pfuhˇ kʼoˍ hkʼaw keu leh aˉ hkʼaw yuˬ kʼoꞈ˗e ve yoˬ. Aˉ hkʼaw gaˬ htaˇ pfuhˇ kʼoˍ hkʼaw ve haˉ pui shiˍ htuˉ peu ehˉ hkʼaw yuˬ keu ve yoˬ. Haˉ pui shiˍ chi teˇ hpaˍ yaꞈ kʼaw te ve yehˇ tuˬ awˬ pon kaˇ hkʼaw gʼa ga chiˇ keu piˇ ve yoˬ.
Ho˗dan laˇ tsuhˇ gʼuiˬ pfuhˍ lo haˉ pui shiˍ gʼawˆ chehˇ ve
Awˬ viˉ awˬ nyi yaˇ miˇ 3 gʼaˇ hkʼaw ve teˇ gʼaˇ Ho˗dan meh ve yoˬ. Yawˇ kanˉ chi ve htaꞈ awˬ nu ve chaw aꞈ kehˉ te tuˬ awˬ yanˇ cawˬ ve yoˬ. Maˇ˗awˍ ve kʼo, hpu chi ve yawˇ hui ve yehˬ kʼa hkʼaw yehˇ ve yoˬ. Yaꞈ hkʼaˇ, chi teˇ hkui yawˇ teˇ ceuˬ ceuˬ heuˆ gaˇ ve yoˬ. Hpu chi aꞈ kehˉ kʼawꞈ gʼa maˇ tuˬ yawˇ kanˉ awˬ leuˉ kʼawꞈ te ve yoˬ. Yawˇ JW Laiˉbaˍliˍ® ehˆ yehˇ gʼa tuˬ htehˆleꞈ heuˆ gaˇ ve yoˬ. Chi ve hkʼaw VDO leh maˍ laˇ ve awˬ ceuˬ teˇ hpaˍ yawˇ Gʼuiˬ sha ve kanˉ hkʼa dehꞈ te gʼa tuˬ leh yawˇ Liꞈ hpu hkʼaw hkʼa dehꞈ na gʼa tuˬ ga piˇ ve yoˬ.
Ho˗dan teˇ ha pa hpaˆ teˇ shawˉ le le 2 naˍ riˍ kanˉ awˬ leuˉ kʼawꞈ te ve yoˬ. Yawˇ chi hkʼe te ve lehˬ, kaˇ hkʼaw haˉ pui shiˍ hkʼa biˇ gʼawˆ keu gʼa tuˬ awˬ pon yoˬ. Chi hkʼe te htaˇ yawˇ htehˆleꞈ vuiˬ tuˬ hpu cawˬ ve yoˬ.
Ho˗dan leh yawˇ ve htehˆleꞈ
Ho˗dan kʼoˆ ve, “kanˉ chi te htaˇ ngaˬ naˬ tuˬ te laˇ leh heuˬ jaˇ ve htawˇ, ngaˬ htehˆleꞈ gʼa yehˇ˗oˬ htaˇ, naˬ leh heuˬ ve htaꞈ maˇ dawˇ nawˇ˗o. Htehˆleꞈ chi ve ngaˬ hto toˇ ve leh hpawnˬ daꞈ ve htaꞈ gu tuˬ gʼa laˇ gʼa jaˇ.” Ho˗dan kʼawꞈ kʼoˆ ve, a naˍ 19 ve awˬ yanˇ htaˇ, htehˆleꞈ chi ve ngaˬ hpawnˬ daꞈ ve leh awˬ viˉ awˬ nyi geh hto toˇ ve ga laˇ gʼa ve yoˬ. Ho˗dan yawˇ dawˇ taˍ ve htaꞈ te gʼa ve ngaˬ hui ha lehˬ jaˇ.