Gʼuiˬ sha ve mvuhˇ miˬ Hpawnˬ daꞈ kuiˬ yehˬ lo liꞈ teh kuiˬ bawehˇ ngaˬ hui awˬ pon awˬ bon hkʼaˬ hkʼe cawˬ ve le?

Liꞈ hpu awˬ lawn shiˍ maˇ la tuˬ, nawˬ ca hpfuhˆ nyi gaˇ˗aˬ laˇ? Liꞈ hpu awˬ tawn maˇ heˆ leh Liꞈ hpu hkʼaw kʼoˆ taˍ ve awˬ ti, chaw teˇ gʼaˇ gʼaˇ, leh awˬ nu awˬ lawn htaꞈ nawˬ shiˍ gaˇ˗aˬ laˇ? Gʼuiˬ sha ve tawˇ hkawˇ nawˬ htaꞈ hkʼaˬ hkʼe ga laˇ gʼa tuˬ le tehꞈ nawˬ htawˇ dawˇ nawˬ dawˇ cawˬ˗aw laˇ? Hkʼe kʼo, Gʼuiˬ sha ve mvuhˇ miˬ Hpawnˬ daꞈ kuiˬ yehˬ lo liꞈ teh kuiˬ bawehˇ hkʼaw ca nyi sheˍ.

Ngaˬ hui liꞈ kʼoˆ teˇ hpaˍ ca hpfuhˆ gʼa ve yoˬ. Yaˬhoˉvaˬ ve Shaˉhkiˆhkanˍ ve chaw ve Liꞈ hpu htaꞈ caˉ daꞈ ve liꞈ kʼoˆ nawˬ ve chaw ceuˬ tawˇ hkawˇ hkʼaw nawˬ hkʼa peu˗eˬ maˇ cawˬ ve yoˬ hehˉ. Yaꞈ hkʼaˇ, Gʼuiˬ sha ve mvuhˇ miˬ Hpawnˬ daꞈ kuiˬ yehˬ lo liꞈ teh kuiˬ bawehˇ hkʼaw awˬ suhˉ awˬ suhˉ tawˆ la ve liꞈ kʼoˆ maˇ˗awˍ ve cawˬ ve yoˬ. Liꞈ hpu yuˬ tawˆ ve maˇ shuˍ daꞈ ve laiˉ kʼoˆ, diˆshaˍnaˍliˍ, leh awˬ nu ve liꞈ kʼoˆ awˬ bon cawˬ ve kaꞈ cawˬ ve yoˬ hehˉ. Hpawnˬ daꞈ ve maˇ tanˬ sheˍ htaˇ leh hpawnˬ daꞈ peuˬ hkʼawꞈ nawˉ liꞈ teh kuiˬ bawehˇ chi nawˬ yehˇ gʼa ve yoˬ. Oˇ kaˬ lo hkaw hpi˗u teuˇ cawˬ ve kʼo, Vawˆcheuˬhtao˗veuˇ Liꞈ teh kuiˬ kaꞈ cawˬ ve yoˬ hehˉ. Chi lehˬ hkaw hpi˗u teuˇ hkʼaw keu gʼa leh ngaˬ hui ve liꞈ kʼoˆ cawˬ maˇ jaˇ. Nawˬ awˬ lawn teˇ lawn, tawˇ teˇ hkawˇ, maˇ heˆ leh Liꞈ hpu teˇ tawn ca gaˇ ve kʼo, chi ve htaꞈ yehˇ htaˇ ca hpfuhˆ sha ve yoˬ.

A shaꞈ teꞈ hkʼaˇ leh Gʼuiˬ sha kanˉ te ve hpawnˬ daꞈ ve hkʼaw ngaˬ hui liꞈ henˇ yaˇ te htaˇ yehˇ gʼa ve yoˬ. Nawˬ awˬ vuiˬ gʼa htaˇ, Gʼuiˬ sha ve mvuhˇ miˬ Hpawnˬ daꞈ kuiˬ yehˬ lo liꞈ teh kuiˬ bawehˇ htaꞈ yehˇ leh gu gʼa ve yoˬ. A shaꞈ teꞈ hkʼaˇ leh Gʼuiˬ sha kanˉ te ve nyi haꞈ shaˉ paˍ lehˬ liꞈ teh kuiˬ bawehˇ hkʼaw awˬ suhˉ awˬ suhˉ tawˆ la ve liꞈ cawˬ tuˬ leh ca sha tuˬ, yawˇ nyi haꞈ shaˉ ve awˬ vuiˬ cawˬ ve yoˬ. Nawˬ hkʼaˬ hkʼe te leh shiˍ gaˇ ve ca gʼa tuˬ, yawˇ maˇ heˆ leh nawˬ htaꞈ Liꞈ hpu maˍ laˇ ve chaw maˍ laˇ gʼa tuˬ yoˬ. Yaꞈ hkʼaˇ, liꞈ teh kuiˬ bawehˇ hkʼaw ve liꞈ maˇ yuˬ tawˆ˗e cawˇ. Chi hkʼoˆ kaꞈ, liꞈ kʼoˆ maˇ gʼa tzuhꞈ tuˬ, ngaˬ hui shaˍ tiꞈ gʼa te leh maˇ gʼa hkʼaiˇ keu cawˇ.

Liꞈ hpu hkʼaw kʼoˆ taˍ ve, Gʼuiˬ sha awˬ lawn shiˍ maˇ la tuˬ hpu shi mawˇ jeˬ htaꞈ gʼaˇ hteꞈ ca hpfuhˆ ve hkʼe, ngaˬ hui ha lehˬ ve hkʼaw gʼa ca hpfuhˆ cawˇ ve yoˬ. (Tawˇ naˉ ve 2:1-5) Nawˬ tanˬ ca hpfuhˆ tuˬ, Gʼuiˬ sha ve mvuhˇ miˬ Hpawnˬ daꞈ kuiˬ yehˬ liꞈ teh kuiˬ bawehˇ htaꞈ yehˇ gʼa ve yoˬ.

• Gʼuiˬ sha ve mvuhˇ miˬ Hpawnˬ daꞈ kuiˬ yehˬ liꞈ teh kuiˬ bawehˇ aˬ htoꞈ ma cawˬ ve le?

• Liꞈ teh kuiˬ bawehˇ chi yehˇ leh awˬ bon gʼa tuˬ, nawˬ htaꞈ a shu ga laˇ gʼa ve le?