Yaˍkoˆ awˬ shinˉ awˬ ka gʼa ve

Iˉcaˆ a shaꞈ 40 hkʼawꞈ htaˇ Reˍbehˆkaꞈ htaꞈ heuˆ ve yoˬ. Iˉcaˆ Reˍbehˆkaꞈ htaꞈ haꞈ jaˇ. Yawˇ huiˉ maˬ yaˇ cehˬ kʼa cawˬ ve yoˬ.

Awˬ viˉ paˍ Iˉsawˇ meh leh awˬ nyi paˍ Yaˍkoˆ meh ve yoˬ. Iˉsawˇ lehˬ cheuˬ jaˇ ve shaˍ bawˆ paˍ hpehꞈ ve yoˬ. Yawˇ shaˍ tiˉ ca bawˆ˗e ve yoˬ. Yaˍkoˆ lehˬ aˉ hkʼaw lo tiˉ chehˇ ve yoˬ.

Oˇ htaˇ teˇ co˗e awˬ pa suh ve kʼo, yaˇ uiˍ miˬ guiˬ leh hpu shu aꞈ kehˉ gʼa maˇ ve yoˬ. Chi lehˬ Iˉcaˆ ve yehˬ kʼa awˬ pon awˬ shinˉ awˬ ka hpehꞈ ve yoˬ. Awˬ shinˉ awˬ ka chi ve Yaˬhoˉvaˬ Aˍbraˍhanˍ htaꞈ ka tiꞈ te piˇ taˍ ve yoˬ. Awˬ lawn chi htaꞈ Iˉsawˇ a yeˇ maˇ te. Yaꞈ hkʼaˇ, ka tiꞈ oˇ ve a yeˇ uiˍ jaˇ tehꞈ Yaˍkoˆ shiˍ ve yoˬ.

Teˇ nyi htaˇ Iˉsawˇ mvuhˇ hkʼa hpeuꞈ shaˍ ca bawˆ kʼawꞈ la leh heuˬ jaˇ ve yoˬ. Yaˍkoˆ awˍ chiˇ te chehˇ ve awˬ peꞈ hawˉ jaˇ leh ‘ngaˬ awˍ meuꞈ jaˇ. Nawˬ te chehˇ ve awˍ chiˇ gʼuiˬ nyiˉ˗ehˍ ve oˇ ve ngaˬ htaꞈ a ciˉ taw laˇ˗oˆ tehꞈ kʼoˆ piˇ ve yoˬ.’ Yaˍkoˆ kʼoˆ ve, ‘hpehꞈ˗aw. Yaꞈ hkʼaˇ, nawˬ ve awˬ shinˉ awˬ ka ngaˬ htaꞈ peꞈ laˇ tuˬ ka tiꞈ awˉ lawˉ te laˇ sheˍ.’ Iˉsawˇ kʼoˆ ve, ‘ngaˬ awˍ meuꞈ jaˇ. Ngaˬ ve awˬ shinˉ awˬ ka ngaˬ maˇ heuˆ gaˇ. Nawˬ heuˆ gaˇ kʼo yuˬ kʼai˗o.’ Iˉsawˇ te ve cawˇ˗aw laˇ? Maˇ cawˇ. Awˬ lawn kʼo, a yeˇ uiˍ ve awˬ ceuˬ awˍ chiˇ guiˬ teˇ hkehˇ pa caˇ ve yoˬ.

Iˉcaˆ mawˇ jaˇ˗oˬ htaˇ, yawˇ ve yaˇ paˍ uiˍ htaꞈ kuˬ laˬ leh awˬ bon naꞈ piˇ ve yoˬ. Yaꞈ hkʼaˇ, awˬ viˉ paˍ ve awˬ shinˉ awˬ ka awˬ nyi paˍ gʼa tuˬ Reˍbehˆkaꞈ ga piˇ ve yoˬ. Iˉsawˇ shiˍ ve teˇ yanˇ, yawˇ nyi ma zuhˆ jaˇ leh awˬ nyi paˍ htaꞈ tiˇ pehˍ tuˬ awˬ hkʼaˇ ca ve yoˬ. Iˉcaˆ leh Reˍbehˆkaꞈ Yaˍkoˆ htaꞈ ponˬ piˇ gaˇ leh Yaˍkoˆ htaꞈ kʼoˆ piˇ ve, ‘chi beuꞈ tu leh ngaˬ nyi paˍ Laˍbanˍ chehˇ kuiˬ Haˍranˍ venˇ lo hpaw˗e loˬ. Nawˬ viˉ paˍ nyi ma zuhˆ ve mehˉ kʼai htaˇ hkʼa gaˬ oˇ kaˬ lo chehˇ taˍ˗oꞈ.’ Yaˍkoˆ awˬ pa awˬ e kʼoˆ piˇ ve hkʼe hpaw˗e ve yoˬ.