Yaˬhoˉvaˬ ve Hkriꞈ yaˇ awˬ moˍ hkʼaw teˇ gʼaˇ leh teˇ gʼaˇ htaꞈ yawˆ yan piˇ sheˍ

1. Yaˬhoˉvaˬ yawˇ ve chaw ka tiꞈ yeˬ ve teˇ gʼaˇ le le htaꞈ aˬ htoꞈ ma piˇ ve le?

Yaˬhoˉvaˬ yawˇ ve chaw ka tiꞈ yeˬ ve teˇ gʼaˇ le le yawˇ ve Hkriꞈ yaˇ awˬ moˍ hkʼaw chehˇ tcuh ve yoˬ. Ngaˬ hui awˬ vuiˬ peun daꞈ ve htawˇ, teˇ gʼaˇ le le awˬ hpfuhˇ cawˬ leh teˇ gʼaˇ leh teˇ gʼaˇ gʼa cuˇ daꞈ ve yoˬ. A yeˇ uiˍ jaˇ ve chi ngaˬ hui na gʼa tuˬ tcuh yaˇ Pawˇluꞈ hkʼaˬ hkʼe ga laˇ ve le?

2. Eˇfeˇsuꞈ liꞈ 4:16 hkʼaw kʼoˆ taˍ ve hkʼe, aˬ htoꞈ ma te ngaˬ hui awˬ hpfuhˇ shiˍ leh kanˉ teˇ geh te cawˇ ve le?

² Awˬ lawn chi ve hkʼaw Liꞈ hpu awˬ tawn awˬ lawn lonˉ ma kʼoˆ taˍ ve lehˬ, ngaˬ hui awˬ hkʼaw lo teˇ gʼaˇ kaꞈ Gʼuiˬ sha ve kanˉ te ve awˬ nu ve chaw htaꞈ “ngaˬ nawˬ htaꞈ maˇ loˍ tehꞈ” maˇ gʼa kʼoˆ tuˬ, tcuh yaˇ Pawˇluꞈ hkʼa tawˍ lehˆ hpeuꞈ maw laˇ ve yoˬ. (1 Kawˇrenˍhtuˆ 12:21) Ngaˬ hui Hkriꞈ yaˇ awˬ moˍ hkʼaw dawˇ sha gawˬ lehˍ ve cawˬ tcuh gaˇ ve kʼo, teˇ gʼaˇ leh teˇ gʼaˇ awˬ hpfuhˇ gʼa shiˍ daꞈ leh kanˉ teˇ geh gʼa te ve yoˬ. (Eˇfeˇsuꞈ 4:16 gʼaw sheˍ.) Ngaˬ hui teˇ moˍ tiˉ te leh kanˉ teˇ geh te htaˇ, Hkriꞈ yaˇ awˬ moˍ hkʼaw kaꞈ uiˍ la mvuh la ve yoˬ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Hkriꞈ yaˇ awˬ moˍ hkʼaw ve chaw htaꞈ yawˆ yan tuˬ aˬ htoꞈ ma awˬ hkʼaˇ cawˬ ve le? Nyi haꞈ shaˉ paˍ awˬ nu ve nyi haꞈ shaˉ paˍ htaꞈ hkʼaˬ hkʼe te yawˆ yan piˇ gʼa tuˬ le? Awˬ viˉ awˬ nyi awˬ hpawˇ awˬ miˇ ma maˇ heuˆ ve chaw htaꞈ hkʼaˬ hkʼe te yawˆ yan piˇ gʼa tuˬ le? Leh awˬ viˉ awˬ nyi ngaˬ hui ve chaw ceuˬ tawˇ hkawˇ hkʼa dehꞈ maˇ yaw gʼa ve chaw htaꞈ kaꞈ hkʼaˬ hkʼe te yawˆ yan piˇ tuˬ awˬ lawn chi ve hkʼaw teˇ geh henˇ tuˬ yoˬ.

AWˬ NU VE NYI HAꞈ SHAˉ PAˍ HTAꞈ YAWˆ YAN PIˇ SHEˍ

4. Roˉmaꞈ liꞈ 12:10 hkʼaw Pawˇluꞈ beˆ maˍ laˇ ve htaꞈ nyi haꞈ shaˉ paˍ gʼaꞈ te cawˇ ve aˬ htoꞈ ma cawˬ ve le?

⁴ Hkriꞈ yaˇ awˬ moˍ hkʼaw nyi haꞈ shaˉ paˍ teˇ gʼaˇ le le Yaˬhoˉvaˬ ve awˬ ha hpu leuˆ yuˬ taˍ ve yoˬ. Yaꞈ hkʼaˇ, teˇ gʼaˇ leh teˇ gʼaˇ puiˉ ve hpehꞈ ve maˇ shuˍ daꞈ. (1 Kawˇrenˍhtuˆ 12:17, 18) Teˇ hpaˍ kʼo nyi haꞈ shaˉ paˍ te tuˬ leuˆ yuˬ gehˇ sheˍ ve pa taw, awˬ nu ve nyi haꞈ shaˉ paˍ hkʼe taw awˬ hkʼaˇ hkʼa dehꞈ maˇ shiˍ. Teˇ hpaˍ kʼo a shaꞈ maˇ leh hkʼa dehꞈ maˇ chehˇ sha ve pa taw, awˬ nu ve chaw hkʼe hkʼa dehꞈ te maˇ gʼa. Hkʼaˬ hkʼe hpehꞈ ve htawˇ nyi haꞈ shaˉ paˍ awˬ nu ve nyi haꞈ shaˉ paˍ htaꞈ “ngaˬ nawˬ htaꞈ maˇ loˍ tehꞈ” kʼoˆ maˇ hpehꞈ. Chi hkʼe te ve aꞈ kehˉ nyi haꞈ shaˉ paˍ teˇ gʼaˇ le le Roˉmaꞈ liꞈ 12:10 hkʼaw Pawˇluꞈ beˆ maˍ laˇ ve htaꞈ gʼaꞈ te cawˇ ve yoˬ.—Roˉmaꞈ 12:10 gʼaw sheˍ.

5. Nyi haꞈ shaˉ paˍ, awˬ nu ve nyi haꞈ shaˉ paˍ htaꞈ yawˆ yan piˇ ve tehꞈ hkʼaˬ hkʼe te hpeuꞈ maw laˇ ve le? Leh yawˇ hui chi hkʼe te tuˬ aˬ htoꞈ ma te a yeˇ uiˍ jaˇ ve le?

⁵ Nyi haꞈ shaˉ paˍ, awˬ nu ve nyi haꞈ shaˉ paˍ htaꞈ yawˆ yan piˇ ve tehꞈ hpeuꞈ maw piˇ gʼa tuˬ yawˇ hui kʼoˆ ve htaꞈ hkʼa dehꞈ gʼa na taˍ ve yoˬ. Nyi haꞈ shaˉ paˍ a yeˇ uiˍ ve awˬ lawn jehˬ daꞈ htaˇ chi a yeˇ uiˍ jaˇ. Shaw nyi kuiˬ Taꞈ yehˬ Ha pa 10 maˬ 1 nyi 1988 hkʼawꞈ hkʼaw kʼoˆ taˍ ve, “Yeˍsuˆ daꞈ kehˬ ve awˬ ha hpu htaꞈ cuˇ leh nyi haꞈ shaˉ paˍ hkʼaˬ ve teˇ gʼaˇ htaꞈ beˆ maˍ piˇ kaꞈ gʼa ve tehꞈ nyi haꞈ shaˉ paˍ teˇ gʼaˇ le le gʼa haꞈ yuˬ ve yoˬ. Yawˇ hui shoꞈ shaꞈ ve awˬ lawn gu leh a yeˇ uiˍ ve htaꞈ dawˇ cheˆ gʼa tuˬ nyi haꞈ shaˉ paˍ hkʼaˬ ve teˇ gʼaˇ Liꞈ hpu hkʼaw ve awˬ liˇ awˬ hkʼaˇ htaꞈ cuˇ leh beˆ maˍ piˇ gʼa tuˬ yoˬ. (Tcuh yaˇ 15:6-15) Daꞈ kehˬ ve awˬ ha hpu Hkriꞈ yaˇ awˬ moˍ hkʼaw nyi haꞈ shaˉ paˍ teˇ gʼaˇ le le htaꞈ ga piˇ ve yoˬ.”

6. Nyi haꞈ shaˉ paˍ cawˇ daꞈ hawˍ daꞈ ve hkʼaw kanˉ teˇ geh te gʼa tuˬ aˬ htoꞈ ma ga piˇ ve le? Yawˇ hui chi hkʼe te htaˇ Hkriꞈ yaˇ awˬ moˍ hkʼaw ve chaw awˬ bon hkʼaˬ hkʼe gʼa ve le?

⁶ Nyi haꞈ shaˉ paˍ awˬ moˍ hpawnˬ daꞈ htaˇ teˇ gʼaˇ lehˬ, awˬ nu ve nyi haꞈ shaˉ paˍ htaꞈ yawˆ yan piˇ ve kʼo, yawˇ teˇ pawˆ le le awˉ lawˉ tawˇ maˇ yaw leh yawˇ ve dawˇ hkʼaˇ hkʼaˬ htaˆ kaꞈ cawˇ ve tehꞈ maˇ dawˇ. Yawˇ dawˇ ve awˬ ceuˬ nyi ma nuˇ nehˬ ve hkʼaw kʼoˆ piˇ ve yoˬ. Shu ve dawˇ hkʼaˇ kʼoˆ ve htaꞈ kaꞈ hkʼa dehꞈ gʼa na taˍ ve yoˬ. Chi aꞈ kehˉ a yeˇ uiˍ jaˇ ve lehˬ Liꞈ hpu hkʼaw beˆ maˍ laˇ ve htaꞈ gʼa chaˬ nyi leh “ka tiꞈ yeˬ leh cuˇ yiˍ cawˬ ve awˬ ceˬ” beˆ maˍ laˇ ve htaꞈ gʼa gʼaꞈ te ve yoˬ. (Maꞈhtehˍ 24:45-47) Awˬ lawn teˇ hpaˍ jehˬ daꞈ htaˇ, nyi haꞈ shaˉ paˍ teˇ gʼaˇ leh teˇ gʼaˇ haꞈ daꞈ leh yawˆ yan daꞈ ve kʼo, Hkriꞈ yaˇ awˬ moˍ hkʼaw uiˍ la mvuh la tuˬ ve awˬ lawn teˇ hpaˍ htaꞈ dawˇ cheˆ gʼa tuˬ Gʼuiˬ sha ve daꞈ kehˬ ve awˬ ha hpu yawˇ hui geh chehˇ leh yawˇ hui htaꞈ beˆ maˍ piˇ ve yoˬ.—Yaˍkoˆ 3:17, 18.

HKRIꞈ YAˇ AWˬ HPAWˇ AWˬ MIˇ MA MAˇ HEUˆ VE CHAW HTAꞈ YAWˆ YAN PIˇ SHEˍ

7. Awˬ hpawˇ awˬ miˇ ma maˇ heuˆ ve chaw htaꞈ Yeˍsuˆ hkʼaˬ hkʼe dawˇ ve le?

⁷ Chi beuꞈ teˇ co˗e Hkriꞈ yaˇ awˬ moˍ hkʼaw awˬ viˉ awˬ nyi heuˆ daꞈ˗oˬ ve chaw laiˉ gʼaˇ cawˬ leh teˇ hpaˍ hpaˍ kʼo yaˇ cawˬ ve yoˬ. Yaꞈ hkʼaˇ, awˬ viˉ awˬ nyi hpawˇ awˬ miˇ ma maˇ heuˆ ve chaw kaꞈ laiˉ gʼaˇ cawˬ ve yoˬ. Awˬ viˉ awˬ nyi chi teˇ hpaˍ htaꞈ ngaˬ hui hkʼaˬ hkʼe dawˇ nyi cawˇ ve le? Yeˍsuˆ yawˇ hui htaꞈ dawˇ ve hkʼe ngaˬ hui henˇ yuˬ cawˇ ve yoˬ. Yeˍsuˆ miˬ guiˬ hkʼoˆ chehˇ leh Gʼuiˬ sha ve kanˉ te htaˇ yawˇ awˬ miˇ ma maˇ heuˆ leh Gʼuiˬ sha ve kanˉ hkʼa dehꞈ te gʼa ve yoˬ. Yeˍsuˆ Hkriꞈ yaˇ awˬ hpawˇ awˬ miˇ ma gʼa heuˆ ve maˇ heˆ leh maˇ heuˆ tuˬ kaꞈ maˇ gʼa kʼoˆ maˍ piˇ jaw. Yaꞈ hkʼaˇ, Hkriꞈ yaˇ teˇ hpaˍ hpaˍ awˬ hpawˇ awˬ miˇ ma maˇ heuˆ tuˬ leuˆ yuˬ ve yoˬ tehꞈ yawˇ kʼoˆ ve yoˬ. (Maꞈhtehˍ 19:11, 12) Awˬ hpawˇ awˬ miˇ ma maˇ heuˆ ve chaw htaꞈ Yeˍsuˆ yawˆ yan ve yoˬ. Maˇ heuˆ ve chaw aꞈ kehˉ heuˆ daꞈ˗oˬ ve chaw daꞈ ve tehꞈ yawˇ maˇ dawˇ. Chi hkʼoˆ kaꞈ, maˇ heuˆ ve chaw a shaꞈ teꞈ chehˇ kuiˬ hkʼaw teˇ ceuˬ ceuˬ maˇ lawꞈ ve hkʼe hpehꞈ ve tehꞈ Yeˍsuˆ maˇ dawˇ.

8. 1 Kawˇrenˍhtuˆ liꞈ 7:7-9 hkʼaw kʼoˆ taˍ ve hkʼe, Hkriꞈ yaˇ aˬ htoꞈ ma ve awˬ lawn htaꞈ hkʼa dehꞈ dawˇ nyi tuˬ Pawˇluꞈ shaˍ tiꞈ piˇ ve le?

⁸ Yeˍsuˆ hkʼa shuˍ tcuh yaˇ Pawˇluꞈ kaꞈ awˬ miˇ ma maˇ cawˬ leh Gʼuiˬ sha ve kanˉ te ve yoˬ. Hkriꞈ yaˇ teˇ gʼaˇ heuˆ daꞈ ve yaꞈ ve tehꞈ Pawˇluꞈ maˇ maˍ piˇ jaw. Chi a shu yawˇ ve awˬ lawn hpehꞈ ve tehꞈ yawˇ shiˍ ve yoˬ. Awˬ hpawˇ awˬ miˇ ma maˇ heuˆ leh Yaˬhoˉvaˬ ve kanˉ hkʼa dehꞈ te gʼa˗aw laˇ tehꞈ Hkriꞈ yaˇ hkʼa dehꞈ dawˇ nyi tuˬ Pawˇluꞈ awˬ gʼaˇ piˇ ve yoˬ. (1 Kawˇrenˍhtuˆ 7:7-9 gʼaw sheˍ.) Pawˇluꞈ awˬ hpawˇ awˬ miˇ ma maˇ heuˆ ve chaw htaꞈ maˇ gʼa nyi cha ve tehꞈ hpeuꞈ maw laˇ ve yoˬ. Yaˬhoˉvaˬ ve kanˉ a yeˇ uiˍ jaˇ ve htaꞈ te tuˬ yawˇ yaˇ nehˬ Tiˆmoˉseˍ awˬ miˇ ma maˇ heuˆ ve htaꞈ leuˆ yuˬ ve yoˬ.b (Hpiˇliˇpiˆ 2:19-22) Awˬ viˉ awˬ nyi hawˉ hkʼaˆ teˇ gʼaˇ awˬ vuiˬ gʼa te tuˬ ve awˬ miˇ ma heuˆ˗oˬ ve leh maˇ heuˆ ve chaw htaꞈ cawˬ ve maˇ heˆ tehꞈ ngaˬ hui maˇ dawˇ ve hkʼa tawˍ lehˆ gʼa mawˬ ve yoˬ.—1 Kawˇrenˍhtuˆ 7:32-35, 38.

9. Awˬ hpawˇ awˬ miˇ ma heuˆ ve leh maˇ heuˆ ve chaw awˬ lawn ngaˬ hui hkʼaˬ hkʼe dawˇ nyi cawˇ ve le?

⁹ Hkriꞈ yaˇ awˬ hpawˇ awˬ miˇ ma gʼa heuˆ cawˇ ve maˇ heˆ leh maˇ heuˆ cawˇ ve Yeˍsuˆ leh Pawˇluꞈ kaꞈ maˇ gʼa maˍ. Chi htaꞈ pa taw awˬ hpawˇ awˬ miˇ ma heuˆ ve leh maˇ heuˆ ve chaw htaꞈ ngaˬ hui hkʼaˬ hkʼe dawˇ nyi cawˇ ve le? Shaw nyi kuiˬ Taꞈ yehˬ Ha pa 10 maˬ 1 nyi 2012 hkʼawꞈ awˬ lawn chi ve htaꞈ hkʼa tawˍ lehˆ kʼoˆ maˍ laˇ taˍ ve yoˬ. Oˇ kaˬ lo kʼoˆ ve, “awˬ hpawˇ awˬ miˇ ma maˇ heuˆ ve chaw leh heuˆ˗oˬ ve chaw Gʼuiˬ sha peꞈ laˇ ve laꞈ shawnˍ hkʼe hpehꞈ ve yoˬ. . . . Awˬ hpawˇ awˬ miˇ ma maˇ heuˆ ve chaw yaꞈ tawˍ ve leh nyi ma luˬ ve tehꞈ Yaˬhoˉvaˬ maˇ dawˇ.” Chi htaꞈ pa taw, Hkriꞈ yaˇ awˬ moˍ hkʼaw awˬ hpawˇ awˬ miˇ ma maˇ heuˆ ve chaw htaꞈ ngaˬ hui gʼa yawˆ yan piˇ ve yoˬ.

10. Awˬ viˉ awˬ nyi awˬ hpawˇ awˬ miˇ ma maˇ heuˆ ve chaw htaꞈ ngaˬ hui yawˆ yan ve kʼo, aˬ htoꞈ ma maˇ te cawˇ ve le?

¹⁰ Awˬ viˉ awˬ nyi awˬ hpawˇ awˬ miˇ ma maˇ heuˆ ve chaw dawˇ hkʼaˇ htaꞈ ngaˬ hui hkʼaˬ hkʼe yawˆ yan piˇ cawˇ ve le? Awˬ viˉ awˬ nyi teˇ hpaˍ hpaˍ kʼo awˬ hpawˇ awˬ miˇ ma maˇ heuˆ tuˬ dawˇ ve tehꞈ ngaˬ hui tawnˇ taˍ cawˇ ve yoˬ. Leh awˬ viˉ awˬ nyi teˇ hpaˍ kʼo, heuˆ gaˇ ve htawˇ keunˍ daꞈ ve awˬ ca ca maˇ mawˬ sheˍ. Leh awˬ viˉ awˬ nyi teˇ hpaˍ kʼo, yawˇ hui ve awˬ ca suh˗e ve yoˬ. Hkʼaˬ hkʼe hpehꞈ ve htawˇ, Hkriꞈ yaˇ awˬ moˍ hkʼaw ve chaw awˬ viˉ awˬ nyi awˬ hpawˇ awˬ miˇ ma maˇ heuˆ ve chaw htaꞈ aˬ htoꞈ ma te nawˬ maˇ heuˆ ve le, ga laˇ tuˬ loˍ ve laˇ tehꞈ maˇ na piˇ cawˇ. Awˬ tehˬ yoˬ, maˇ heuˆ sheˍ ve teˇ hpaˍ hpaˍ kʼo chi hkʼe ga laˇ tuˬ lawˬ ve yoˬ. Yaꞈ hkʼaˇ, yawˇ hui ga laˇ tuˬ maˇ lawˬ ve htawˇ, ngaˬ hui ga laˇ˗a mehˍ kʼoˆ piˇ ve kʼo, yawˇ hui hkʼaˬ hkʼe dawˇ tuˬ ve htaꞈ dawˇ nyi sheˍ. (1 Hteˇsaˍlawˇniˆ 4:11; 1 Tiˆmoˉseˍ 5:13) Awˬ viˉ awˬ nyi ka tiꞈ yeˬ leh maˇ heuˆ ve chaw teˇ hpaˍ hpaˍ kʼoˆ ve htaꞈ teˇ geh nyi sheˍ.

11-12. Awˬ viˉ awˬ nyi awˬ hpawˇ awˬ miˇ ma maˇ heuˆ ve chaw htaꞈ awˬ gʼaˇ nuˇ tuˬ ngaˬ hui hkʼaˬ hkʼe te piˇ la gʼa ve le?

¹¹ Awˬ viˉ awˬ nyi toˇ nyi shehˍ hpaˇ teˇ gʼaˇ awˬ miˇ ma maˇ heuˆ leh maˇ heuˆ ve lehˬ daꞈ jaˇ tehꞈ yawˇ kʼoˆ ve yoˬ. Awˬ viˉ awˬ nyi “nawˬ aˬ htoꞈ ma te awˬ miˇ ma maˇ heuˆ ve le” na piˇ htaˇ yawˇ nyi ma maˇ sha ve yoˬ. Awˬ viˉ awˬ nyi awˬ miˇ ma maˇ heuˆ ve awˬ tcuhˆ puiˍ lo kanˉ te chehˇ ve teˇ gʼaˇ kʼoˆ ve, “awˬ ca cawˬ ve chaw awˬ ca maˇ cawˬ ve chaw htaꞈ ha kʼaˉ ve tehꞈ ngaˬ chaˬ nyi mawˬ ve yoˬ. Awˬ hpawˇ awˬ miˇ ma maˇ heuˆ ve chaw lehˬ laꞈ shawnˍ hkʼe hpehꞈ cawˇ ve htawˇ, nyi˗a kʼo awˬ vuiˬ hkʼe hpehꞈ ve yoˬ.”

¹² Beˍteˍlaˆ hkʼaw chehˇ ve awˬ viˉ awˬ nyi yaˇ miˇ awˬ hpawˇ maˇ heuˆ ve kʼoˆ ve, “awˬ viˉ awˬ nyi awˬ hpawˇ awˬ miˇ ma maˇ heuˆ ve chaw teˇ gʼaˇ le le lehˬ awˬ ca gʼa tuˬ htaꞈ ca ve leh teˇ geh hti caˇ hti dawˬ htaˇ awˬ ca gʼa tuˬ yoˬ tehꞈ awˬ viˉ awˬ nyi teˇ hpaˍ dawˇ ve yoˬ. Teˇ pawˆ htaˇ Beˍteˍlaˆ htaꞈ caˉ daꞈ ve kanˉ awˬ nu ve teˇ kaˬ lo ca te ve yoˬ. Ngaˬ oˇ kaˬ lo mvuhˇ hpeuꞈ la htaˇ gaˬ˗e ve pa taw, mvuhˇ hpeuꞈ haˉ hpawnˬ daꞈ ve awˬ nyi htaꞈ cawˇ daꞈ ve yoˬ. Ngaˬ haˉ˗e tuˬ ve awˬ viˉ awˬ nyi yaˇ miˇ yawˇ kʼoˆ ve, a shaꞈ nawˬ hkʼe taw ve hpawnˬ daꞈ kuiˬ hkʼaw awˬ viˉ awˬ nyi hawˉ hkʼaˆ nyiˇ gʼaˇ cawˬ ve yoˬ. Ngaˬ nawˬ htaꞈ awˬ ca ca laˇ tuˬ kʼoˆ laˇ ve maˇ heˆ mehˍ. Ngaˬ hpawnˬ daꞈ kuiˬ hkʼaw loꞈ˗e htaˇ awˬ viˉ awˬ nyi hawˉ hkʼaˆ oˇ ve nyiˇ gʼaˇ htaꞈ mawˬ daꞈ tuˬ shiˍ kʼai laˇ ve yoˬ. Awˬ tehˬ yoˬ, awˬ yanˇ oˇ ve teˇ yanˇ ngaˬ leh awˬ viˉ awˬ nyi oˇ ve nyiˇ gʼaˇ awˬ pon aˇ naˍ leh yaꞈ tawˍ ve yoˬ.”

13. Awˬ viˉ awˬ nyi yaˇ miˇ haˉ teˇ gʼaˇ, a shu ve awˬ lawn yawˇ htaꞈ awˬ gʼaˇ piˇ ve le?

¹³ Beˍteˍlaˆ hkʼaw kanˉ te chehˇ ve awˬ hpawˇ maˇ heuˆ ve yaˇ miˇ teˇ gʼaˇ kʼoˆ ve, “awˬ viˉ awˬ nyi yaˇ miˇ haˉ Gʼuiˬ sha ve kanˉ awˬ yanˇ hkʼa biˇ te chehˇ ve ngaˬ aꞈ kehˉ a shaꞈ maˇ ve htaꞈ ngaˬ shiˍ daꞈ leh keunˍ daꞈ cawˇ daꞈ ve dawˇ hkʼaˇ cawˬ ve, hkʼa dehꞈ dawˇ teh taˍ ve cawˬ ve, shu htaꞈ ga piˇ puiˉ ve, leh ha lehˬ puiˉ ve yoˬ. Yawˇ hui Hkriꞈ yaˇ awˬ moˍ hkʼaw ga piˇ gʼa jaˇ. Yawˇ hui awˬ hpawˇ awˬ miˇ ma maˇ heuˆ ve hpawˇ daꞈ ve dawˇ hkʼaˇ cawˬ ve yoˬ. Yawˇ hui awˬ hpawˇ maˇ heuˆ ve pa taw shu aꞈ kehˉ daꞈ ve tehꞈ maˇ dawˇ leh awˬ hpawˇ maˇ cawˬ ve leh yaˇ maˇ cawˬ ve pa taw ha lehˬ ve maˇ cawˬ gʼa tehꞈ maˇ dawˇ.” Hkriꞈ yaˇ awˬ moˍ hkʼaw chehˇ ve teˇ gʼaˇ le le yawˆ yan ve leh teˇ gʼaˇ leh teˇ gʼaˇ awˬ hpfuhˇ shiˍ ve chi ngaˬ ha lehˬ tuˬ te laˇ ve yoˬ. Awˬ viˉ awˬ nyi nawˬ htaꞈ maˇ ha kʼaˉ laˇ, maˇ hkawehˉ ve, maˇ nyi cha leh nawˬ yawˇ hui aꞈ kehˉ daꞈ ve tehꞈ maˇ dawˇ. Yawˇ hui nawˬ htaꞈ haꞈ ve tehꞈ nawˬ shiˍ ve yoˬ.

14. Awˬ viˉ awˬ nyi awˬ hpawˇ awˬ miˇ ma maˇ heuˆ ve chaw htaꞈ ngaˬ hui yawˆ yan ve tehꞈ hkʼaˬ hkʼe hpeuꞈ maw piˇ gʼa ve le?

¹⁴ Yawˇ hui ve te hkʼaˇ dawˇ hkʼaˇ daꞈ ve ngaˬ hui yawˇ hui htaꞈ awˬ hpfuhˇ shiˍ htaˇ, yawˇ hui awˬ hpawˇ awˬ miˇ ma maˇ heuˆ leh ngaˬ hui ha kʼaˉ ve tehꞈ maˇ dawˇ ve pa taw, awˬ viˉ awˬ nyi awˬ hpawˇ awˬ miˇ ma maˇ heuˆ ve chaw awˬ bon uiˍ jaˇ tehꞈ dawˇ ve yoˬ. Yawˇ hui htaꞈ ha kʼaˉ ve aꞈ kehˉ yawˇ hui ka tiꞈ yeˬ ve pa taw ngaˬ hui awˬ hpfuhˇ shiˍ cawˇ ve yoˬ. Hkʼe te leh, awˬ viˉ awˬ nyi awˬ hpawˇ awˬ miˇ ma maˇ heuˆ ve lehˬ, ngaˬ hui yawˇ hui htaꞈ “ngaˬ nawˬ htaꞈ maˇ loˍ tehꞈ” kʼoˆ ve htaꞈ yawˇ hui maˇ dawˇ. (1 Kawˇrenˍhtuˆ 12:21) Chi hkʼe hpehꞈ cawˇ ve kaꞈ ngaˬ hui yawˇ hui htaꞈ yawˆ yan ve leh yawˇ hui Hkriꞈ yaˇ awˬ moˍ hkʼaw chehˇ ve ha lehˬ ve tehꞈ shiˍ ve yoˬ.

NAWˬ VE CHAW CEUˬ TAWˇ HKAWˇ HKʼA DEHꞈ MAˇ YAW GʼA VE CHAW HTAꞈ YAWˆ YAN PIˇ SHEˍ

15. Awˬ viˉ awˬ nyi teˇ hpaˍ hpaˍ yawˇ hui Gʼuiˬ sha ve kanˉ hkʼa dehꞈ te gʼa tuˬ aˬ htoꞈ ma yuˬ tanˇ ve le?

¹⁵ Peuˬ laˬ ve hkʼaˬ nyiˇ hkʼawꞈ maˇ gaˬ sheˍ htaˇ, Gʼuiˬ sha ve kanˉ hkʼa dehꞈ te gʼa tuˬ hto toˇ ve chaw, chaw ceuˬ tawˇ hkawˇ awˬ suhˉ henˇ tuˬ dawˇ cheˆ ve yoˬ. Yawˇ hui chi hkʼe te gʼa tuˬ a shaꞈ teꞈ kuiˬ hkʼaw laiˉ ceuˬ gʼa pa ve yoˬ. Awˬ viˉ awˬ nyi chi ve teˇ hpaˍ yawˇ hui ve chaw ceuˬ tawˇ hkawˇ Hkriꞈ yaˇ awˬ moˍ hkʼaw tawˆ la leh awˬ nu ve chaw ceuˬ tawˇ hkawˇ hto toˇ ve loˍ jaˇ kuiˬ ca chehˇ˗e ve yoˬ. (Tcuh yaˇ 16:9) Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve ga gʼa tuˬ yawˇ hui chi hkʼe te ve yoˬ. Shu ve chaw ceuˬ tawˇ hkawˇ yaw gʼa tuˬ awˬ yanˇ laiˉ hkʼawꞈ gʼa yehˇ ve htawˇ, awˬ viˉ awˬ nyi chi ve teˇ hpaˍ Hkriꞈ yaˇ awˬ moˍ hkʼaw laiˉ ceuˬ ga gʼa ve yoˬ. Yawˇ hui ve te hkʼaˇ dawˇ hkʼaˇ daꞈ ve leh hpehꞈ laˬ jaw ve awˬ lawn Hkriꞈ yaˇ awˬ moˍ hkʼaw uiˍ la mvuh la tuˬ ga piˇ ve yoˬ. Awˬ viˉ awˬ nyi chi ve teˇ hpaˍ awˬ yanˇ yuˬ tanˇ ve ngaˬ hui awˬ hpfuhˇ shiˍ jaˇ!

16. Awˬ viˉ awˬ nyi hawˉ hkʼaˆ ga piˇ shehˍ hpaˇ leh nyi haꞈ shaˉ paˍ te tuˬ nyi haꞈ shaˉ paˍ aˬ htoꞈ ma htaꞈ cuˇ cawˇ ve le?

¹⁶ Hkriꞈ yaˇ awˬ moˍ hkʼaw chaw ceuˬ tawˇ hkawˇ hkʼa dehꞈ maˇ yaw gʼa ve pa taw, awˬ viˉ awˬ nyi teˇ gʼaˇ ga piˇ shehˍ hpaˇ leh nyi haꞈ shaˉ paˍ maˇ te keunˍ tehꞈ nyi haꞈ shaˉ paˍ maˇ dawˇ cheˆ cawˇ. Yawˇ hui lehˬ, Liꞈ hpu hkʼaw ve awˬ liˇ awˬ hkʼaˇ htaꞈ cuˇ leh ga piˇ shehˍ hpaˇ leh nyi haꞈ shaˉ paˍ hkʼaˬ hkʼe gʼa hpehꞈ cawˇ ve tehꞈ gʼa chaˬ nyi ve yoˬ. Yawˇ Hkriꞈ yaˇ awˬ moˍ hkʼaw chaw ceuˬ tawˇ hkawˇ hkʼaˬ hkʼe taw yaw gʼa ve htaꞈ maˇ caˉ daꞈ.—1 Tiˆmoˉseˍ 3:1-10, 12, 13; Tiˇtuˆ 1:5-9.

17. Shu mvuhˇ miˬ lo chehˇ˗e htaˇ awˬ pa awˬ e aˬ htoꞈ ma htaꞈ gʼa dawˇ cheˆ cawˇ ve le?

¹⁷ Mvuhˇ miˬ lo kanˉ gʼa te tuˬ Hkriꞈ yaˇ ve yehˬ kʼa teˇ hpaˍ hpaˍ shoꞈ shaꞈ jaˇ ve htaꞈ pa taw, shu ve mvuhˇ miˬ lo hpaw˗e ve yoˬ. Chi hkʼe hpehꞈ ve htawˇ yawˇ hui ve yaˇ teˇ hpaˍ yawˇ hui ca chehˇ˗e kuiˬ lo ve mvuhˇ miˬ ve liꞈ henˇ yehˬ hkʼaw chaw ceuˬ tawˇ hkawˇ awˬ suhˉ gʼa henˇ ve yoˬ. Awˬ pa awˬ e kaꞈ kanˉ gʼa te tuˬ oˇ kaˬ lo ve chaw ceuˬ tawˇ hkawˇ gʼa henˇ ve yoˬ. Leh Hkriꞈ yaˇ awˬ moˍ hkʼaw awˬ e ve chaw ceuˬ tawˇ hkawˇ cawˬ ve kʼo, yawˇ hui hkʼaˬ hkʼe te tuˬ le? Yawˇ ve yehˬ kʼa Hkriꞈ yaˇ awˬ moˍ hkʼaˬ ve teˇ kaˬ lo hpawnˬ daꞈ˗e tuˬ le? Yawˇ oˇ kaˬ lo ve Hkriꞈ yaˇ awˬ moˍ chaw ceuˬ tawˇ hkawˇ maˇ heˆ leh nawˬ e ve chaw ceuˬ tawˇ hkawˇ Hkriꞈ yaˇ awˬ moˍ hkʼaw hpawnˬ daꞈ˗e tuˬ laˇ?

18. Gaˍlaˍtiˆ liꞈ 6:5 hkʼaw kʼoˆ taˍ ve hkʼe, yehˬ shehˍ hpaˇ dawˇ cheˆ ve htaꞈ ngaˬ hui haꞈ yuˬ ve tehꞈ hkʼaˬ hkʼe te hpeuꞈ maw piˇ gʼa tuˬ le?

¹⁸ Yehˬ shehˍ hpaˇ lehˬ yawˇ ve yehˬ kʼa Hkriꞈ yaˇ awˬ moˍ hkʼaˬ ve teˇ kaˬ hpawnˬ daꞈ˗e tuˬ leh yawˇ ve yehˬ kʼa awˬ pon hkʼaˬ ve teˇ kaˬ daꞈ jaˇ ve gʼa dawˇ cheˆ ve yoˬ. Chi a shu yawˇ hkʼaˇ yawˇ gʼa dawˇ cheˆ ve pa taw, yehˬ shehˍ hpaˇ dawˇ cheˆ ve htaꞈ ngaˬ hui gʼa yawˆ yan ve yoˬ. (Gaˍlaˍtiˆ 6:5 gʼaw sheˍ.) Yawˇ hkʼaˬ hkʼe dawˇ cheˆ ve htawˇ, yawˇ dawˇ cheˆ ve htaꞈ ngaˬ hui gʼa haꞈ yuˬ leh yawˇ ve yehˬ kʼa htaꞈ gʼa haꞈ yuˬ piˇ leh yawˇ hui htaꞈ haꞈ ve tehꞈ gʼa hpeuꞈ maw piˇ ve yoˬ.—Roˉmaꞈ 15:7.

19. Yehˬ shehˍ hpaˇ aˬ htoꞈ ma htaꞈ hkʼa dehꞈ dawˇ nyi leh bon lawˬ cawˇ ve le?

¹⁹ Yehˬ kʼa teˇ hpaˍ hpaˍ kʼo, yawˇ ve awˬ pa awˬ e ve chaw ceuˬ tawˇ hkawˇ Hkriꞈ yaˇ awˬ moˍ hkʼaw Gʼuiˬ sha ve kanˉ te chehˇ ve htawˇ, yaˇ chaw ceuˬ tawˇ hkawˇ oˇ ve hkʼa dehˬ maˇ na gʼa ve yoˬ hehˉ. Hkriꞈ yaˇ awˬ moˍ oˇ ve lehˬ, mvuhˇ miˬ ve chaw ceuˬ tawˇ hkawˇ yaw ve hto toˇ kuiˬ cawˬ ve kʼo, yaˇ teˇ hpaˍ awˬ pa awˬ e ve chaw ceuˬ tawˇ hkawˇ oˇ ve htaꞈ hkʼa dehˬ maˇ na gʼa ve yoˬ hehˉ. Aˬ htoꞈ ma pa taw le? Yaˇ oˇ kaˬ lo ve mvuhˇ miˬ ve chaw ceuˬ tawˇ hkawˇ liꞈ henˇ ve, yawˇ ve awˬ pa awˬ e ve chaw ceuˬ tawˇ hkawˇ liꞈ henˇ ve maˇ heˆ. Chi hkʼe hpehꞈ htaˇ, yehˬ shehˍ hpaˇ hkʼa dehꞈ gʼa dawˇ cheˆ leh yawˇ hui ve yaˇ Yaˬhoˉvaˬ leh Hkriꞈ yaˇ awˬ moˍ hkʼaw meuˆ daꞈ tuˬ cuˇ yiˍ gʼa tuˬ bon gʼa lawˬ ve yoˬ. Awˬ pa awˬ e yaˇ htaꞈ yawˇ hui ve chaw ceuˬ tawˇ hkawˇ yaw gʼa tuˬ hkʼa dehꞈ gʼa maˍ piˇ ve maˇ heˆ leh yaˇ chaw ceuˬ tawˇ hkawˇ hkʼa dehꞈ yaw gʼa ve Hkriꞈ yaˇ awˬ moˍ hkʼaw ca chehˇ˗e cawˇ ve yoˬ. Yehˬ shehˍ hpaˇ hkʼaˬ hkʼe dawˇ cheˆ ve htawˇ maˇ kʼoˆ, yawˇ chehˇ ve Hkriꞈ yaˇ awˬ moˍ awˬ viˉ awˬ nyi yawˇ leh yawˇ ve yehˬ kʼa htaꞈ yawˆ yan leh awˬ hpfuhˇ shiˍ ve tehꞈ te piˇ cawˇ ve yoˬ.

20. Awˬ viˉ awˬ nyi chaw ceuˬ tawˇ hkawˇ awˬ suhˉ henˇ chehˇ ve htaꞈ ngaˬ hui yawˆ yan ve tehꞈ hkʼaˬ hkʼe te hpeuꞈ maw piˇ gʼa tuˬ le?

²⁰ Ngaˬ hui gʼa chaˬ nyi ve awˬ hkʼaˇ teˇ hpaˍ lehˬ, Hkriꞈ yaˇ awˬ moˍ laiˉ kaˬ lo chaw ceuˬ tawˇ hkawˇ awˬ suhˉ henˇ tuˬ awˬ viˉ awˬ nyi laiˉ gʼaˇ coˇ caˇ leh te chehˇ ve cawˬ maˇ jaˇ ve tehꞈ hpeuꞈ maw laˇ ve yoˬ. Yawˇ hui dawˇ ve awˬ ceuˬ kʼoˆ tuˬ haˍ ve yoˬ hehˉ. Hkʼaˬ hkʼe hpehꞈ ve htawˇ, yawˇ chaw ceuˬ tawˇ hkawˇ awˬ suhˉ henˇ ve cheuˬ˗aˬ laˇ ceh ngaˬ hui maˇ dawˇ nyi cawˇ. Yawˇ Yaˬhoˉvaˬ htaꞈ haꞈ ve leh yawˇ ve kanˉ te ve htaꞈ ngaˬ hui nyi cawˇ ve yoˬ. Te hkʼaˇ dawˇ hkʼaˇ daꞈ jaˇ ve chi htaꞈ ngaˬ hui nyi ve kʼo, awˬ viˉ awˬ nyi chi ve teˇ hpaˍ htaꞈ awˬ hpfuhˇ shiˍ leh yawˆ yan tuˬ yoˬ. Yawˇ chaw ceuˬ tawˇ hkawˇ hkʼa dehꞈ maˇ yaw puiˉ ve pa taw, “ngaˬ nawˬ htaꞈ maˇ loˍ tehꞈ” ngaˬ hui maˇ kʼoˆ.

NGAˬ HUI YAˬHOˉVAˬ AWˬ PON AWˬ HPFUHˇ HKʼAˆ JAˇ

21-22. Aˬ htoꞈ ma pa taw ngaˬ hui Yaˬhoˉvaˬ htaꞈ awˬ bon uiˍ jaˇ kʼoˆ piˇ cawˇ ve le?

²¹ Yaˬhoˉvaˬ lehˬ ngaˬ hui yawˇ ve Hkriꞈ yaˇ awˬ moˍ hkʼaw teˇ gʼaˇ leh teˇ gʼaˇ htaꞈ awˬ hpfuhˇ hkʼaˆ jaˇ ve kanˉ te tcuh laˇ ve pa taw, awˬ bon uiˍ jaˇ kʼoˆ piˇ gaˇ ve yoˬ. Hawˉ hkʼaˆ leh yaˇ miˇ maˇ kʼoˆ, chaw haˉ yaˇ miˇ haˉ leh awˬ hpawˇ awˬ miˇ ma cawˬ ve maˇ kʼoˆ, a shaꞈ maˇ leh a shaꞈ i ve maˇ kʼoˆ, awˬ nu ve chaw ceuˬ tawˇ hkawˇ yaw cheuˬ ve leh a ciˉ ceh tiˉ yaw gʼa ve maˇ kʼoˆ, ngaˬ hui teˇ gʼaˇ le le Yaˬhoˉvaˬ awˬ pon leh awˬ viˉ awˬ nyi awˬ pon awˬ hpfuhˇ hkʼaˆ jaˇ.—Roˉmaꞈ 12:4, 5; Kawˇlawˇsehˇ 3:10, 11.

²² Pawˇluꞈ tehˆ maˍ laˇ ve chaw yaˇ ve awˬ to hkʼaw ve awˬ hkʼeun ngaˬ hui gʼa henˇ kʼai peuˬ ve laiˉ ceuˬ htaꞈ yuˬ yehˇ gʼa ve yoˬ. Ngaˬ hui awˬ viˉ awˬ nyi htaꞈ awˬ gʼaˇ piˇ gʼa tuˬ, dawˇ nyi sheˍ. Yawˇ hui htaꞈ haꞈ leh hkʼaˬ htaˆ kaꞈ yawˆ yan piˇ sheˍ.