Ngaˬ hui hkʼaˬ htaˆ kaꞈ hkʼaˬ hkʼe te haꞈ daꞈ gʼa tuˬ le?

1-2. (a) Aˬ htoꞈ ma te Pawˇluꞈ “uiˍ jaˇ ve lehˬ haꞈ pehnˇ ve teˇ ceuˬ yoˬ” tehꞈ kʼoˆ ve le? (b) Aˬ htoꞈ ma ve na hkawˇ htaꞈ ngaˬ hui teˇ geh henˇ tuˬ le?

Pawˇluꞈ lehˬ yonˍ ve, dawˇ law ve, leh haꞈ pehnˇ ve htaꞈ kʼoˆ taˍ ve yoˬ. Yawˇ kʼoˆ ve chi ve 3 ceuˬ hkʼaw “uiˍ jaˇ ve lehˬ haꞈ pehnˇ ve teˇ ceuˬ yoˬ.” (1 Kawˇrenˍhtuˆ 13:13) Aˬ htoꞈ ma te Pawˇluꞈ chi hkʼe kʼoˆ ve le? Awˬ lawn kʼo, miˬ guiˬ awˬ suhˉ hkʼaw gaˬ kʼo, Gʼuiˬ sha miˬ guiˬ awˬ suhˉ ve awˬ lawn ka tiꞈ te taˍ laˇ ve htaꞈ ngaˬ hui yonˍ tuˬ maˇ loˍ leh, ka tiꞈ chi ve awˬ tehˬ hpehꞈ la tuˬ yoˬ tehꞈ dawˇ law ve yoˬ. Awˬ lawn kʼo, oˇ ve teˇ yanˇ awˬ ceuˬ chi ve teˇ hpaˍ hpehꞈ la˗oˬ ve yoˬ. Yaꞈ hkʼaˇ, ngaˬ hui Gʼuiˬ sha leh awˬ nu ve chaw htaꞈ leuˉ leh gʼa haꞈ sheˍ ve yoˬ. Awˬ tehˬ kʼo, ngaˬ hui Yaˬhoˉvaˬ leh awˬ viˉ awˬ nyi htaꞈ hkʼaˬ htaˆ kaꞈ gʼa haꞈ ve yoˬ.

² Ngaˬ hui haꞈ pehnˇ ve hkʼaˬ htaˆ kaꞈ te tawˆ la gʼa tuˬ, na hkawˇ 3 maˬ htaꞈ caˉ daꞈ ve ngaˬ hui teˇ geh henˇ tuˬ yoˬ. (1) Aˬ htoꞈ ma te ngaˬ hui gʼa haꞈ daꞈ cawˇ ve le? (2) Ngaˬ hui teˇ gʼaˇ leh teˇ gʼaˇ haꞈ daꞈ ve tehꞈ hkʼaˬ hkʼe te tawˆ la tuˬ le? (3) Ngaˬ hui hkʼaˬ htaˆ kaꞈ hkʼaˬ hkʼe te haꞈ daꞈ gʼa tuˬ le?

Aˬ HTOꞈ MA TE NGAˬ HUI GʼA HAꞈ DAꞈ CAWˇ VE LE?

3. Aˬ htoꞈ ma te ngaˬ hui haꞈ daꞈ cawˇ ve le?

³ Ngaˬ hui haꞈ daꞈ ve aˬ htoꞈ ma te a yeˇ uiˍ jaˇ ve le? Awˬ hkʼaˇ teˇ hkʼaˇ lehˬ, ngaˬ hui haꞈ daꞈ ve kʼo awˬ tehˬ ve Hkriꞈ yaˇ hpehꞈ ve tehꞈ shu shiˍ tuˬ yoˬ. Yeˍsuˆ yawˇ ve tcuh yaˇ hui htaꞈ kʼoˆ piˇ ve, “nawˬ hui teˇ gʼaˇ leh teˇ gʼaˇ haꞈ daꞈ ve kʼo, haꞈ daꞈ ve oˇ ve htaꞈ pa taw nawˬ hui ngaˬ ve awˬ laꞈ gʼawˇ hpehꞈ ve htaꞈ chaw hkʼa peu˗eˬ gʼa shiˍ tuˬ yoˬ.” (Yoˇhanˬ 13:35) Chi hkʼoˆ kaꞈ, haꞈ pehnˇ ve lehˬ ngaˬ hui teˇ moˍ tiˉ hpehꞈ tuˬ ga laˇ ve yoˬ. Pawˇluꞈ kʼoˆ ve, haꞈ pehnˇ ve lehˬ “hkʼa peu˗eˬ biˇ la tuˬ hpeh tsuhꞈ taˍ ve yoˬ.” (Kawˇlawˇsehˇ 3:14) Leh ngaˬ hui gʼa haꞈ daꞈ cawˇ ve a yeˇ uiˍ ve awˬ nu ve teˇ hkʼaˇ cawˬ sheˍ ve yoˬ. Tcuh yaˇ Yoˇhanˬ kʼoˆ ve, “Gʼuiˬ sha htaꞈ haꞈ ve chaw lehˬ, a shu yawˇ ve awˬ viˉ awˬ nyi htaꞈ htawˇ gʼa haꞈ ve yoˬ.” (1 Yoˇhanˬ 4:21) Chi htaꞈ pa taw ngaˬ hui haꞈ daꞈ ve kʼo, Gʼuiˬ sha htaꞈ haꞈ ve tehꞈ hpeuꞈ maw piˇ chehˇ ve yoˬ.

4-5. Ngaˬ hui Gʼuiˬ sha htaꞈ haꞈ ve leh awˬ viˉ awˬ nyi htaꞈ haꞈ ve hkʼaˬ hkʼe te caˉ daꞈ ve tawˇ pa haˉ kʼoˆ maˍ laˇ sheˍ.

⁴ Ngaˬ hui Gʼuiˬ sha htaꞈ haꞈ ve leh awˬ viˉ awˬ nyi htaꞈ haꞈ ve hkʼaˬ hkʼe te caˉ daꞈ ve le? Tawˇ pa haˉ te kʼo, ngaˬ hui ve awˬ to hkʼaw cawˬ ve nyi ma shiˍ leh awˬ nu ve awˬ hkʼeun teˇ hpaˍ htaꞈ dawˇ nyi sheˍ. Ngaˬ hui naˆ tsuhˇ yehˬ lo kʼai htaˇ, ngaˬ hui ve nyi ma shiˍ hkʼaˬ hkʼe hpehꞈ ve htaꞈ saˍ laꞈ gʼonˍ shiˍ gaˇ ve kʼo, ngaˬ hui ve laꞈ diˆ caˆ diˆ vaiˇ ve laˇ, maˇ heˆ leh diˆ naiˇ ve htaꞈ shiˍ tuˬ laꞈ sheh htaꞈ htawˇ nyi ve yoˬ. Saˍ laꞈ gʼonˍ chi hkʼe te ve lehˬ, ngaˬ hui ve nyi ma shiˍ chehˇ sha ve laˇ, maˇ heˆ leh maˇ chehˇ sha ve htaꞈ shiˍ gʼa ve yoˬ. Awˬ lawn chi ve ngaˬ hui htaꞈ hkʼaˬ hkʼe maˍ laˇ ve le?

⁵ Chi ve hkʼa shuˍ shuˍ, ngaˬ hui ve nyi ma shiˍ hkʼaˬ hkʼe hpehꞈ ve htaꞈ shiˍ tuˬ saˍ laꞈ gʼonˍ laꞈ diˆ caˆ htaꞈ htawˇ nyi ve yoˬ. Ngaˬ hui Yaˬhoˉvaˬ htaꞈ haꞈ chehˇ sheˍ ve laˇ tehꞈ shiˍ tuˬ, ngaˬ hui awˬ viˉ awˬ nyi htaꞈ hkʼaˬ htaˆ kaꞈ haꞈ chehˇ sheˍ ve htaꞈ nyi ve yoˬ. Ngaˬ hui awˬ viˉ awˬ nyi htaꞈ hkʼa dehꞈ maˇ haꞈ ve kʼo, ngaˬ hui Gʼuiˬ sha htaꞈ haꞈ ve hkʼa dehꞈ maˇ cawˬ la ve yoˬ. Yaꞈ hkʼaˇ, ngaˬ hui awˬ viˉ awˬ nyi htaꞈ hkʼaˬ htaˆ kaꞈ haꞈ ve kʼo, ngaˬ hui Yaˬhoˉvaˬ htaꞈ haꞈ leh hkʼaˬ htaˆ kaꞈ meuˆ daꞈ chehˇ sheˍ ve tehꞈ hpeuꞈ maw piˇ ve yoˬ.

6. Aˬ htoꞈ ma te ngaˬ hui awˬ viˉ awˬ nyi htaꞈ hkʼa dehꞈ maˇ haꞈ tuˬ maˇ te laˇ tcuh cawˇ ve le? (1 Yoˇhanˬ 4:7-9, 11)

⁶ Ngaˬ hui awˬ viˉ awˬ nyi htaꞈ hkʼa dehꞈ maˇ haꞈ ve kʼo, leuˉ leh haꞈ tuˬ gʼa tawnˇ taˍ cawˇ ve yoˬ. Aˬ htoꞈ ma pa taw le? Awˬ lawn kʼo, chi ve lehˬ ngaˬ hui Yaˬhoˉvaˬ geh meuˆ daꞈ ve hkʼa dehꞈ maˇ cawˬ ve htaꞈ kʼoˆ gaˇ ve yoˬ. Tcuh yaˇ Yoˇhanˬ ngaˬ hui htaꞈ shaˍ tiꞈ peꞈ laˇ ve, “a shu yawˇ mawˬ chehˇ ve awˬ viˉ awˬ nyi htaꞈ maˇ haꞈ ve chaw teˇ gʼaˇ lehˬ, maˇ mawˬ jaw ve Gʼuiˬ sha htaꞈ yawˇ hkʼaˬ hkʼe te haꞈ hpehꞈ tuˬ le?” (1 Yoˇhanˬ 4:20) Ngaˬ hui henˇ yuˬ tuˬ awˬ pon aˬ htoꞈ ma le? Yaˬhoˉvaˬ ngaˬ hui htaꞈ nyi hkʼaˇ suh tuˬ ngaˬ hui gʼa “haꞈ daꞈ” cawˇ ve yoˬ.—1 Yoˇhanˬ 4:7-9, 11 gʼaw sheˍ.

NGAˬ HUI TEˇ GʼAˇ LEH TEˇ GʼAˇ HAꞈ DAꞈ VE TEHꞈ HKʼAˬ HKʼE TE TAWˆ LA TUˬ LE?

7-8. Ngaˬ hui teˇ gʼaˇ leh teˇ gʼaˇ haꞈ daꞈ ve tehꞈ hkʼaˬ hkʼe te hpeuꞈ maw daꞈ gʼa tuˬ le?

⁷ “Haꞈ daꞈ” tehꞈ Liꞈ hpu hkʼaw laiˉ pawˆ kʼoˆ taˍ ve yoˬ. (Yoˇhanˬ 15:12, 17; Roˉmaꞈ 13:8; 1 Hteˇsaˍlawˇniˆ 4:9; 1 Peˍtruˆ 1:22; 1 Yoˇhanˬ 4:11) Yaꞈ hkʼaˇ, haꞈ ve lehˬ nyi ma hkʼaw cawˬ leh chaw teˇ gʼaˇ kaꞈ maˇ shiˍ gʼa. Chi htaꞈ pa taw, ngaˬ hui awˬ viˉ awˬ nyi htaꞈ haꞈ ve tehꞈ awˬ nu ve chaw htaꞈ hkʼaˬ hkʼe hpeuꞈ maw piˇ gʼa tuˬ le? Ngaˬ hui tawˇ yaw ve leh te ve hkʼaw gʼa te tawˆ la piˇ ve yoˬ.

⁸ Ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ gʼa ve laiˉ hkʼaˇ cawˬ ve yoˬ. Tawˇ pa haˉ te kʼo, “teˇ gʼaˇ leh teˇ gʼaˇ hteˇ ve cawˇ ve tawˇ htaꞈ tiˉ yaw daꞈ˗oꞈ.” (Zaˍhkaˍriˆ 8:16) “Teˇ gʼaˇ leh teˇ gʼaˇ cawˇ daꞈ hui daꞈ cawˬ piˇ˗oˆ.” (Maˍkuˆ 9:50) “A shu yawˇ awˬ to htaꞈ taˇ taˍ uiˍ. Yaꞈ hkʼaˇ shu htaꞈ taˍ uiˍ piˇ˗oˆ.” (Roˉmaꞈ 12:10) “Teˇ gʼaˇ leh teˇ gʼaˇ htaꞈ haꞈ yuˬ˗oꞈ.” (Roˉmaꞈ 15:7) ‘Teˇ gʼaˇ leh teˇ gʼaˇ venˇ baˆ hpehˇ daꞈ˗oꞈ.’ (Kawˇlawˇsehˇ 3:13) “Teˇ gʼaˇ leh teˇ gʼaˇ ve awˬ vuiˬ htaꞈ ga pfuhˇ daꞈ˗oꞈ.” (Gaˍlaˍtiˆ 6:2) “Teˇ gʼaˇ leh teˇ gʼaˇ awˬ gʼaˇ piˇ daꞈ˗oꞈ.” (1 Hteˇsaˍlawˇniˆ 4:18) “Teˇ gʼaˇ leh teˇ gʼaˇ uiˍ la yeˬ la tuˬ te daꞈ˗oꞈ.” (1 Hteˇsaˍlawˇniˆ 5:11) Leh “teˇ gʼaˇ leh teˇ gʼaˇ awˬ pon bon lawˬ˗oꞈ.”—Yaˍkoˆ 5:16.

9. Ngaˬ hui teˇ gʼaˇ leh teˇ gʼaˇ awˬ gʼaˇ piˇ daꞈ ve lehˬ awˬ viˉ awˬ nyi htaꞈ haꞈ ve tehꞈ hkʼaˬ hkʼe hpeuꞈ maw piˇ ve le? (Awˬ han htaꞈ nyi sheˍ.)

⁹ Chi awˬ gʼuˇ suhˍ htaˇ beˆ maˍ laˇ taˍ ve teˇ hkʼaˇ htaꞈ teˇ geh nyi sheˍ. Pawˇluꞈ ngaˬ hui htaꞈ “teˇ gʼaˇ leh teˇ gʼaˇ awˬ gʼaˇ piˇ daꞈ˗oꞈ” tehꞈ kʼoˆ laˇ ve yoˬ. Aˬ htoꞈ ma te teˇ gʼaˇ leh teˇ gʼaˇ awˬ gʼaˇ piˇ daꞈ ve a yeˇ uiˍ jaˇ ve le? Chi ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve yoˬ. Liꞈ hpu htaꞈ caˉ daꞈ ve liꞈ kʼoˆ teˇ kʼoˆ hkʼaw kʼoˆ ve, “awˬ gʼaˇ piˇ daꞈ˗oꞈ.” Choˬ kaˬ lo Pawˇluꞈ kʼoˆ ve, “awˬ gʼaˇ piˇ ve kʼoˆ gaˇ ve lehˬ, shoꞈ shaꞈ ve gʼa hpuˇ jaˇ ve chaw htaꞈ awˬ gʼaˇ piˇ tuˬ awˬ paˇ lo chehˇ taˍ ve yoˬ.” Chi htaꞈ pa taw, awˬ viˉ awˬ nyi tuꞈ ve hkanˍ ve gʼa hpuˇ chehˇ ve chaw htaꞈ ngaˬ hui awˬ gʼaˇ piˇ htaˇ, yawˇ ka tiꞈ yeˬ ve hkʼaw Yaˬhoˉvaˬ ve kanˉ caˉ leh te kʼai tuˬ ngaˬ hui ga piˇ chehˇ ve yoˬ. Ngaˬ hui ga piˇ ve leh awˬ gʼaˇ piˇ ve teˇ pawˆ le le, chi ngaˬ hui yawˇ htaꞈ haꞈ ve tehꞈ hpeuꞈ maw piˇ ve yoˬ.—2 Kawˇrenˍhtuˆ 7:6, 7, 13.

10. Teˇ gʼaˇ leh teˇ gʼaˇ ha kʼaˉ daꞈ ve leh awˬ gʼaˇ piˇ daꞈ ve hkʼaˬ hkʼe te caˉ daꞈ ve le?

¹⁰ Teˇ gʼaˇ leh teˇ gʼaˇ ha kʼaˉ daꞈ ve lehˬ, awˬ gʼaˇ piˇ ve htaꞈ caˉ daꞈ ve yoˬ. Awˬ nu ve chaw htaꞈ ha kʼaˉ puiˉ ve lehˬ, tuꞈ ve hkanˍ ve gʼa hpuˇ chehˇ ve chaw htaꞈ awˬ gʼaˇ piˇ gaˇ ve yoˬ. Chi htaꞈ pa taw, ngaˬ hui yawˇ htaꞈ awˬ gʼaˇ piˇ gʼa tuˬ teˇ gʼaˇ leh teˇ gʼaˇ ha kʼaˉ daꞈ ve awˉ lawˉ gʼa cawˬ cawˇ ve yoˬ. Yaˬhoˉvaˬ ha kʼaˉ puiˉ ve leh, yawˇ shu htaꞈ awˬ gʼaˇ hkʼaˬ hkʼe piˇ puiˉ ve, Pawˇluꞈ hkʼaˬ hkʼe kʼoˆ ve htaꞈ teˇ geh nyi sheˍ. Pawˇluꞈ kʼoˆ ve, Yaˬhoˉvaˬ lehˬ “ha kʼaˉ puiˉ ve Awˬ pa hpehꞈ leh, dawˇ sha gaˇ sha tuˬ hkʼa peu˗eˬ piˇ shehˍ hpaˇ Gʼuiˬ sha hpehꞈ ve yoˬ.” (2 Kawˇrenˍhtuˆ 1:3) Pawˇluꞈ “ha kʼaˉ puiˉ ve” htaꞈ kʼoˆ htaˇ, awˬ nu ve chaw htaꞈ ha kʼaˉ ve tehꞈ te tawˆ la ve yoˬ. Chi ve teˇ tawn hkʼaw Pawˇluꞈ Yaˬhoˉvaˬ htaꞈ ha kʼaˉ puiˉ ve Awˬ pa hpehꞈ ve tehꞈ kʼoˆ ve yoˬ. Chi ve lehˬ ha kʼaˉ ve teˇ ceuˬ Gʼuiˬ sha geh tawˆ la ve tehꞈ hpeuꞈ maw laˇ ve yoˬ. Ha kʼaˉ puiˉ ve chi htaꞈ pa taw, Gʼuiˬ sha lehˬ “ngaˬ hui gʼa tuꞈ gʼa hkanˍ ve hkʼa peu˗eˬ awˬ hkʼaw lo yawˇ ngaˬ hui htaꞈ dawˇ sha la piˇ ve yoˬ.” (2 Kawˇrenˍhtuˆ 1:4) Iˉ kaˆ shiˉ ve chaw hkʼa shuˍ, yawˇ iˉ kaˆ gʼa dawˬ htaˇ nyi ma sha jaˇ ve yoˬ. Tuꞈ ve hkanˍ ve gʼa hpuˇ htaˇ, yawˇ Yaˬhoˉvaˬ geh awˬ gʼaˇ gʼa ve kʼo, nyi ma sha jaˇ ve yoˬ. Hkʼe te leh, ngaˬ hui ha kʼaˉ puiˉ ve leh shu htaꞈ awˬ gʼaˇ piˇ puiˉ ve Gʼuiˬ sha htaꞈ hkʼaˬ hkʼe henˇ yuˬ gʼa tuˬ le? Te gʼa ve awˬ hkʼaˇ teˇ hkʼaˇ lehˬ, ngaˬ hui shu htaꞈ awˬ gʼaˇ piˇ gaˇ tuˬ te laˇ ve te hkʼaˇ dawˇ hkʼaˇ teˇ hpaˍ te jawˬ ve yoˬ. Te hkʼaˇ dawˇ hkʼaˇ chi teˇ hpaˍ aˬ htoꞈ ma cawˬ ve le?

11. Kawˇlawˇsehˇ liꞈ 3:12 leh 1 Peˍtruˆ liꞈ 3:8 hkʼaw kʼoˆ taˍ ve hkʼe, ngaˬ hui awˬ viˉ awˬ nyi htaꞈ haꞈ leh yawˇ hui htaꞈ awˬ gʼaˇ piˇ gaˇ tuˬ te hkʼaˇ dawˇ hkʼaˇ hkʼaˬ hkʼe ve cawˬ tuˬ ga laˇ ve le?

¹¹ Ngaˬ hui awˬ viˉ awˬ nyi htaꞈ hkʼa dehꞈ haꞈ daꞈ leh “teˇ gʼaˇ leh teˇ gʼaˇ awˬ gʼaˇ piˇ daꞈ” tuˬ hkʼaˬ hkʼe ga laˇ gʼa ve le? Teˇ nyi le le daꞈ ve te hkʼaˇ dawˇ hkʼaˇ teˇ hpaˍ cawˬ tuˬ ngaˬ hui gʼa te jawˬ ve yoˬ. Tawˇ pa haˉ te kʼo, ha kʼaˉ puiˉ ve, awˬ viˉ awˬ nyi haꞈ daꞈ ve hkʼe haꞈ daꞈ ve, leh teˇ gʼaˇ leh teˇ gʼaˇ yawˆ yan daꞈ ve yoˬ. (Kawˇlawˇsehˇ 3:12; 1 Peˍtruˆ 3:8 gʼaw sheˍ.) Te hkʼaˇ dawˇ hkʼaˇ chi ve teˇ hpaˍ ngaˬ hui htaꞈ hkʼaˬ hkʼe ga laˇ gʼa tuˬ le? Ha kʼaˉ puiˉ ve ngaˬ hui cawˬ tuˬ te jawˬ leh, te hkʼaˇ dawˇ hkʼaˇ chi ve teˇ hpaˍ ngaˬ hui hkʼaˬ htaˆ kaꞈ cawˬ tcuh ve kʼo, a shu teˇ gʼaˇ tuꞈ ve hkanˍ ve gʼa hpuˇ chehˇ ve htaꞈ ngaˬ hui mawˬ leh awˬ gʼaˇ piˇ gaˇ ve yoˬ. Yeˍsuˆ kʼoˆ taˍ ve hkʼa shuˍ, “nyi ma awˬ hkʼaw lo hkʼa biˇ cawˬ ve hkʼe, mawꞈ kʼaw yaw tawˆ la ve yoˬ. Daꞈ ve chaw lehˬ, a shu yawˇ daꞈ ve awˬ ceuˬ doˆ taˍ kuiˬ awˬ hkʼaw lo daꞈ ve awˬ ceuˬ htaꞈ yuˬ tawˆ la ve yoˬ.” (Maꞈhtehˍ 12:34, 35) Awˬ viˉ awˬ nyi tuꞈ ve hkanˍ ve gʼa hpuˇ chehˇ ve chaw htaꞈ ngaˬ hui awˬ gʼaˇ piˇ ve lehˬ, yawˇ htaꞈ haꞈ ve tehꞈ hpeuꞈ maw piˇ ve yoˬ.

NGAˬ HUI HKʼAˬ HTAˆ KAꞈ HKʼAˬ HKʼE TE HAꞈ DAꞈ GʼA TUˬ LE?

12. (a) Ngaˬ hui awˬ viˉ awˬ nyi htaꞈ haꞈ ve maˇ gʼa i kʼai tuˬ aˬ htoꞈ ma te shaˍ tiꞈ gʼa te cawˇ ve le? (b) Aˬ htoꞈ ma ve na hkawˇ htaꞈ ngaˬ hui teˇ geh henˇ tuˬ le?

¹² Ngaˬ hui “teˇ gʼaˇ leh teˇ gʼaˇ haꞈ daꞈ” gaˇ ve yoˬ. (1 Yoˇhanˬ 4:7) Yaꞈ hkʼaˇ, ngaˬ hui Yeˍsuˆ shaˍ tiꞈ peꞈ laˇ ve htaꞈ tawnˇ taˍ ve a yeˇ uiˍ jaˇ. Oˇ kaˬ lo kʼoˆ ve, “chaw maˇ maˇ haꞈ pehnˇ ve teˇ ceuˬ i kʼai yawnˇ kʼai tuˬ yoˬ.” (Maꞈhtehˍ 24:12) Yeˍsuˆ yawˇ ve awˬ laꞈ gʼawˇ maˇ˗awˍ ve maˇ haꞈ daꞈ˗o ve htaꞈ kʼoˆ gaˇ ve maˇ heˆ. Yaꞈ hkʼaˇ, chi beuꞈ teˇ co˗e Saˍtanˍ uˉ peunˍ ve awˬ hawˉ lo chehˇ ve chaw maˇ haꞈ daꞈ ve yoˬ. Chi htaꞈ pa taw, chaw chi teˇ hpaˍ hkʼe leˇ ve dawˇ hkʼaˇ ngaˬ hui maˇ cawˬ tuˬ shaˍ tiꞈ gʼa te cawˇ ve yoˬ. Awˬ lawn chi ve htaꞈ ngaˬ hui dawˇ nyi htaˇ, na hkawˇ teˇ maˬ htaꞈ caˉ daꞈ ve ngaˬ hui teˇ geh henˇ tuˬ yoˬ. Chi ve lehˬ, ngaˬ hui hkʼaˬ htaˆ kaꞈ awˬ viˉ awˬ nyi htaꞈ haꞈ chehˇ sheˍ ve laˇ tehꞈ hkʼaˬ hkʼe te shiˍ gʼa tuˬ le?

13. Ngaˬ hui awˬ viˉ awˬ nyi htaꞈ hkʼaˬ htaˆ kaꞈ haꞈ chehˇ ve laˇ tehꞈ hkʼaˬ hkʼe te shiˍ gʼa tuˬ le?

¹³ Ngaˬ hui awˬ viˉ awˬ nyi htaꞈ hkʼaˬ htaˆ kaꞈ haꞈ chehˇ sheˍ ve laˇ tehꞈ shiˍ tuˬ awˬ hkʼaˇ teˇ hkʼaˇ lehˬ, maˇ dawˇ maˇ gaˇ ve teˇ ceuˬ ceuˬ hpehꞈ la htaˇ ngaˬ hui hkʼaˬ hkʼe te tuˬ le? (2 Kawˇrenˍhtuˆ 8:8) Peˍtruˆ kʼoˆ ve, “teˇ gʼaˇ leh teˇ gʼaˇ, gʼaˇ hteꞈ haꞈ daꞈ˗oꞈ. Tawˇ chi lehˬ, uiˍ jaˇ ve tawˇ teˇ hkawˇ hpehꞈ ve yoˬ. Awˬ lawn kʼo, haꞈ pehnˇ ve teˇ ceuˬ lehˬ, maˇ jaˇ ve venˇ baˆ teˇ hpaˍ htaꞈ beh taˍ ve yoˬ.” (1 Peˍtruˆ 4:8) Chi htaꞈ pa taw, awˬ viˉ awˬ nyi te hkʼaˇ dawˇ hkʼaˇ teˇ ceuˬ ceuˬ maˇ daꞈ ve htaꞈ ngaˬ hui mawˬ ve, maˇ heˆ leh awˬ viˉ awˬ nyi ngaˬ hui nyi ma naˬ tuˬ te laˇ ve kʼo, hkʼaˬ hkʼe te tuˬ ve le? Ngaˬ hui te ve awˬ ceuˬ lehˬ, awˬ viˉ awˬ nyi htaꞈ hkʼaˬ htaˆ kaꞈ haꞈ chehˇ sheˍ ve laˇ tehꞈ hpeuꞈ maw piˇ gʼa ve yoˬ.

14. 1 Peˍtruˆ liꞈ 4:8 hkʼaw kʼoˆ taˍ ve hkʼe, ngaˬ hui awˬ viˉ awˬ nyi htaꞈ hkʼaˬ hkʼe gʼa haꞈ cawˇ ve le? Tawˇ pa haˉ kʼoˆ maˍ laˇ sheˍ.

¹⁴ Peˍtruˆ ve tawˇ hkawˇ htaꞈ teˇ geh kʼawꞈ nyi sheˍ. Kaˇ nanˉ ehˉ 8 hkʼaw awˉ lawˉ teˇ tawn ngaˬ hui awˬ viˉ awˬ nyi htaꞈ gʼa haꞈ cawˇ ve kʼoˆ taˍ ve yoˬ. Chi ve lehˬ, “teˇ gʼaˇ leh teˇ gʼaˇ, gʼaˇ hteꞈ haꞈ daꞈ˗oꞈ.” Leh “Gʼaˇ hteꞈ” kʼoˆ ve tawˇ hkawˇ chi ve teˇ tawn hkʼaw Peˍtruˆ kʼoˆ ve lehˬ, Heˍlaˍsaˆ hkawˇ kʼo, “laꞈ sheh che tawˆ ve” htaꞈ kʼoˆ gaˇ ve yoˬ. Chi ve teˇ tawn hkʼaw awˬ leh meuˇ lo Peˍtruˆ kʼoˆ ve, ngaˬ hui awˬ viˉ awˬ nyi htaꞈ leuˉ leh haꞈ ve kʼo, ngaˬ hui ve haꞈ pehnˇ ve lehˬ yawˇ hui ve venˇ baˆ htaꞈ beh taˍ ve yoˬ. Hpui lawˇ teˇ maˬ awˬ kuiˉ cawˬ ve, maˇ heˆ leh laiˉ kaˬ lo awˬ haiˉ cawˬ ve htaꞈ dawˇ nyi sheˍ. Ngaˬ hui hpa teˇ maˬ yuˬ laˬ leh hpui lawˇ hkʼoˆ lo a yehˉ yehˉ gʼawˬ beh ve kʼo, hpui lawˇ hkʼoˆ lo ve awˬ kuiˉ leh awˬ haiˉ htaꞈ beh hoˆ gʼa ve yoˬ. Teˇ kaˬ leh nyiˇ kaˬ ceh tiˉ beh hoˆ gʼa ve maˇ heˆ. Yaꞈ hkʼaˇ, hkʼa peu˗eˬ htaꞈ beh hoˆ gʼa ve yoˬ. Chi ve hkʼa shuˍ shuˍ, ngaˬ hui awˬ viˉ awˬ nyi htaꞈ leuˉ leh haꞈ ve kʼo, ngaˬ hui awˬ viˉ awˬ nyi ve venˇ baˆ htaꞈ pa taw awˬ gʼaˇ nuˇ ve leh maˇ biˇ ve awˬ ceuˬ teˇ ceuˬ leh nyiˇ ceuˬ htaꞈ ceh tiˉ beh hoˆ taˍ piˇ gʼa ve maˇ heˆ. Yaꞈ hkʼaˇ, “maˇ jaˇ ve venˇ baˆ teˇ hpaˍ htaꞈ beh taˍ ve yoˬ.”

15. Ngaˬ hui awˬ viˉ awˬ nyi htaꞈ hkʼa dehꞈ haꞈ ve kʼo, aˬ htoꞈ ma te gʼa tuˬ le? (Kawˇlawˇsehˇ 3:13)

¹⁵ Ngaˬ hui awˬ viˉ awˬ nyi htaꞈ hkʼa dehꞈ haꞈ ve kʼo, yawˇ hui maˇ biˇ ve awˬ ceuˬ htaꞈ ngaˬ hui venˇ baˆ hpehˇ piˇ gʼa tuˬ ga laˇ gʼa ve yoˬ. Yaꞈ hkʼaˇ, teˇ pawˆ pawˆ kʼo te gʼa tuˬ haˍ jaˇ. (Kawˇlawˇsehˇ 3:13 gʼaw sheˍ.) Ngaˬ hui awˬ viˉ awˬ nyi htaꞈ venˇ baˆ hpehˇ piˇ htaˇ, yawˇ hui htaꞈ haꞈ leh, ngaˬ hui Yaˬhoˉvaˬ nyi hkʼaˇ suh tuˬ te piˇ gaˇ ve tehꞈ hpeuꞈ maw piˇ ve yoˬ. Ngaˬ hui awˬ viˉ awˬ nyi htaꞈ venˇ baˆ hpehˇ piˇ tuˬ ga laˇ gʼa ve aˬ htoꞈ ma cawˬ sheˍ ve le, leh ngaˬ hui nyi ma maˇ sha tuˬ te laˇ ve yawˇ hui ve te hkʼaˇ dawˇ hkʼaˇ teˇ hpaˍ hpaˍ htaꞈ maˇ nyi cawˇ ve yoˬ.

16-17. Awˬ viˉ awˬ nyi te hkʼaˇ dawˇ hkʼaˇ maˇ daꞈ ve awˬ ceuˬ htaꞈ ngaˬ hui maˇ nyi tuˬ aˬ htoꞈ ma ga laˇ ve le? Tawˇ pa haˉ kʼoˆ maˍ laˇ sheˍ. (Awˬ han htaꞈ nyi sheˍ.)

¹⁶ Awˬ viˉ awˬ nyi ve maˇ daꞈ ve teˇ hkʼaˇ dawˇ hkʼaˇ htaꞈ nyi ve aꞈ kehˉ, daꞈ ve awˬ ceuˬ htaꞈ ngaˬ hui nyi cawˇ ve yoˬ. Tawˇ pa haˉ teˇ maˬ htaꞈ teˇ geh nyi sheˍ. Awˬ viˉ awˬ nyi teˇ moˍ geh nawˬ awˍ ca caˇ˗e ve yoˬ. Oˇ ve teˇ yanˇ nawˬ hui ha lehˬ jaˇ leh awˍ teˇ geh caˇ peuˬ hkʼawꞈ nawˉ awˬ han teˇ geh htawˍ ve yoˬ. Maˇ˗awˍ ve kʼo, nawˬ awˬ han teˇ kuˉ ceh tiˉ maˇ htawˍ taˬ. Awˬ han hkʼa dehꞈ maˇ htawˍ gʼa la ve htaꞈ nawˬ dawˇ haˍ ve pa taw nyiˇ kuˉ shehˆ kuˉ htawˍ ve yoˬ. Yaꞈ hkʼaˇ, awˬ han kuˉ shehˆ kuˉ ve hkʼaw teˇ kuˉ awˬ viˉ awˬ nyi teˇ gʼaˇ kʼehˉ˗ehˬ maˇ te ve yoˬ. Awˬ han kuˉ oˇ ve htaꞈ nawˬ hkʼaˬ hkʼe te tuˬ le? Awˬ viˉ awˬ nyi kʼehˉ˗ehˬ te˗aˬ ve nyiˇ kuˉ cawˬ sheˍ ve pa taw oˇ ve teˇ kuˉ htaꞈ shiˆ baˬ ve yoˬ.

¹⁷ Awˬ han kuˉ chi ve hkʼaw ve tawˇ pa haˉ hkʼe, ngaˬ hui ve te hkʼaˇ dawˇ hkʼaˇ daꞈ daꞈ ve cawˬ tcuh gaˇ ve yoˬ. Maˇ˗awˍ ve kʼo ngaˬ hui awˬ viˉ awˬ nyi geh chehˇ ve awˬ yanˇ daꞈ jaˇ leh ha lehˬ ve yoˬ. Yaꞈ hkʼaˇ, teˇ pawˆ pawˆ kʼo awˬ viˉ awˬ nyi kʼoˆ ve leh te ve teˇ ceuˬ ceuˬ htaꞈ ngaˬ hui maˇ dawˇ cawˇ ve yoˬ. Chi hkʼe hpehꞈ ve kʼo, ngaˬ hui hkʼaˬ hkʼe te tuˬ le? Awˬ han kuˉ ngaˬ hui maˇ dawˇ cawˇ ve htaꞈ shiˆ baˬ ve hkʼe aˬ htoꞈ ma te maˇ shiˆ baˬ ve le? (Tawˇ naˉ ve 19:11; Eˇfeˇsuꞈ 4:32) Awˬ viˉ awˬ nyi te yaꞈ kuiˬ a ciˉ ceh tiˉ ve htaꞈ ngaˬ hui maˇ tawnˇ taˍ cawˇ. Yaꞈ hkʼaˇ, yawˇ hui te ve daꞈ ve awˬ ceuˬ htaꞈ tawnˇ taˍ cawˇ ve yoˬ. Chi hkʼe ve ngaˬ hui hkʼaˬ htaˆ kaꞈ cawˬ tcuh gaˇ ve yoˬ.

Aˬ HTOꞈ MA TE CHI TEˇ HKUI NGAˬ HUI HKʼA DEHꞈ HAꞈ DAꞈ CAWˇ VE LE?

18. Awˬ lawn chi ve hkʼaw haꞈ pehnˇ ve htaꞈ caˉ daꞈ ve a yeˇ uiˍ ve awˬ lawn ngaˬ hui aˬ htoꞈ ma gʼa henˇ˗oˬ ve le?

¹⁸ Aˬ htoꞈ ma te ngaˬ hui hkʼaˬ htaˆ kaꞈ haꞈ daꞈ cawˇ ve le? Ngaˬ hui gʼa henˇ˗oˬ ve hkʼa shuˍ, ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve kʼo, ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ ve htaꞈ shuˍ ve yoˬ. Ngaˬ hui awˬ viˉ awˬ nyi htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa tuˬ le? Awˬ hkʼaˇ teˇ hkʼaˇ lehˬ, awˬ gʼaˇ piˇ daꞈ ve yoˬ. Ngaˬ hui ha kʼaˉ daꞈ ve kʼo, “teˇ gʼaˇ leh teˇ gʼaˇ awˬ gʼaˇ piˇ daꞈ ve yoˬ.” Leh ngaˬ hui hkʼaˬ htaˆ kaꞈ hkʼaˬ hkʼe te haꞈ daꞈ gʼa tuˬ le? Chi hkʼe te gʼa tuˬ ngaˬ hui venˇ baˆ hpehˇ daꞈ ve yoˬ.

19. Aˬ htoꞈ ma te chi teˇ hkui ngaˬ hui leuˉ leh haꞈ daꞈ cawˇ ve le?

¹⁹ Aˬ htoꞈ ma te ngaˬ hui chi teˇ hkui leuˉ leh haꞈ daꞈ cawˇ ve le? Peˍtruˆ kʼoˆ ve, ‘awˬ ceuˬ hkʼa peu˗eˬ ve lehˬ, awˬ leh meuˇ gaˬ la paˇ neˇ ve yoˬ. Teˇ gʼaˇ leh teˇ gʼaˇ, gʼaˇ hteꞈ haꞈ daꞈ˗oꞈ.’ (1 Peˍtruˆ 4:7, 8) Awˬ leh meuˇ ve awˬ yanˇ gʼaˇ hteꞈ gaˬ la paˇ neˇ ve pa taw, Yeˍsuˆ kʼoˆ taˍ ve awˬ ceuˬ awˬ tehˬ hpehꞈ la tuˬ yoˬ tehꞈ ngaˬ hui shiˍ ve yoˬ. Chi ve lehˬ, “ngaˬ ve awˬ meh htaꞈ pa taw chaw ceuˬ hkʼa peu˗eˬ nawˬ hui htaꞈ canˇ tuˬ yoˬ.” (Maꞈhtehˍ 24:9) Chi ve htaꞈ ngaˬ hui yeunˇ hkanˍ gʼaˇ tuˬ teˇ moˍ tiˉ gʼa hpehꞈ ve yoˬ. Ngaˬ hui chi hkʼe te ve kʼo, Saˍtanˍ ngaˬ hui htaꞈ hpaˆ daꞈ tuˬ te laˇ maˇ gʼa. Ngaˬ hui teˇ gʼaˇ leh teˇ gʼaˇ haꞈ daꞈ ve pa taw, haꞈ pehnˇ ve lehˬ “hkʼa peu˗eˬ biˇ la tuˬ hpeh tsuhꞈ taˍ ve yoˬ.”—Kawˇlawˇsehˇ 3:14; Hpiˇliˇpiˆ 2:1, 2.