Yaˬhoˉvaˬ uˉ peunˍ ve hpawˇ chehˇ sheˍ!

1, 2. Ngaˬ hui teˇ gʼaˇ le le a shu yawˇ hkʼaˇ yawˇ aˬ htoꞈ ma htaꞈ gʼa dawˇ nyi cawˇ ve le? (Awˬ lawn tanˬ htaˇ ve awˬ han htaꞈ nyi sheˍ.)

Peuˬ taˉ ve teˇ lawn hkʼaw ngaˬ hui gʼa henˇ ve, Yaˬhoˉvaˬ chaw yaˇ htaꞈ uˉ peunˍ maˇ keunˍ tehꞈ, neˇ haiˬ kʼoˆ ve yoˬ. Yaˬhoˉvaˬ maˇ hteˇ maˇ cawˇ ve hkʼaw uˉ peunˍ leh, chaw yaˇ a shu yawˇ hkʼaˇ yawˇ uˉ peunˍ ve kʼo, ha lehˬ jaˇ tuˬ yoˬ tehꞈ, Saˍtanˍ kʼoˆ ve yoˬ. Yawˇ kʼoˆ ve cawˇ˗aw laˇ? Tawˇ pa haˉ te kʼo, chaw yaˇ lehˬ a shu yawˇ hkʼaˇ yawˇ uˉ peunˍ leh co co taiˍ taiˍ a shaꞈ gʼa ve kʼo, Gʼuiˬ sha uˉ peunˍ ve aꞈ kehˉ yawˇ hui ha lehˬ˗aw laˇ? Nawˬ co co taiˍ taiˍ a shaꞈ teꞈ chehˇ gʼa leh Gʼuiˬ sha nawˬ htaꞈ maˇ caˉ daꞈ la ve kʼo, nawˬ ha lehˬ jaˇ tuˬ hehˉ laˇ?

² Na hkawˇ chi ve ngaˬ hui a shu yawˇ awˬ to yawˇ gʼa hkʼawꞈ ve yoˬ. Shu ngaˬ hui awˬ tan hkʼawꞈ laˇ maˇ gʼa. Ngaˬ hui hkʼa dehꞈ dawˇ nyi ve kʼo, Yaˬhoˉvaˬ uˉ peunˍ ve awˬ hkʼaˇ daꞈ jaˇ leh ngaˬ hui yawˇ uˉ peunˍ ve hpawˇ chehˇ keunˍ ve tehꞈ, ngaˬ hui hkʼa tawˍ lehˆ shiˍ gʼa ve yoˬ. Awˬ lawn chi ve ngaˬ hui Liꞈ hpu gʼaw ve pa taw, hkʼa dehꞈ gʼa shiˍ ve yoˬ. Mvuhˇ naw ma miˬ naˆ ma Yaˬhoˉvaˬ uˉ peunˍ ve a hkaw˗anˬ cawˬ ve tehꞈ, Liꞈ hpu hkʼaw hkʼaˬ hkʼe kʼoˆ maˍ laˇ ve, teˇ geh nyi sheˍ.

Yaˬhoˉvaˬ uˉ peunˍ ve a hkaw˗anˬ cawˬ ve

3. Aˬ htoꞈ ma te Yaˬhoˉvaˬ teˇ gʼaˇ ceh tiˉ uˉ peunˍ ve a hkaw˗anˬ cawˬ ve le?

³ Yaˬhoˉvaˬ uiˍ jaˇ mvuh jaˇ ve Gʼuiˬ sha hpehꞈ leh hpanˍ shehˍ hpaˇ hpehꞈ ve pa taw, yawˇ teˇ gʼaˇ ceh tiˉ mvuhˇ naw ma miˬ naˆ ma htaꞈ uˉ peunˍ ve a hkaw˗anˬ cawˬ ve yoˬ. (1 Raˍsaˍvanˍ 29:11; Tcuh yaˇ 4:24) Mvuhˇ naw ma hkʼoˆ ve awˬ heˆ hkʼaw, Yeˍsuˆ hkriꞈ geh teˇ geh Jawˇmawˇ te ve 144,000 gʼaˇ kʼoˆ ve, “ngaˬ hui ve Jawˇmawˇ Gʼuiˬ sha˗oˬ, nawˬ lehˬ awˬ meꞈ hponˇ teˇ ceuˬ, yawˆ yan ve teˇ ceuˬ leh kanˇ paˆ teˇ ceuˬ htaꞈ gʼa keunˍ ve yoˬ. Awˬ lawn kʼo, awˬ ceuˬ hkʼa peu˗eˬ htaꞈ nawˬ hpanˍ taˍ ceˍ taˍ leh, nawˬ ve a loˍ htaꞈ pa taw awˬ ceuˬ hkʼa peu˗eˬ hpehꞈ la leh nawˬ te hpanˍ taˍ ve deˇ deˇ yoˬ.” (Hpeuꞈ maˍ ve 4:11) Yaˬhoˉvaˬ teˇ ceuˬ le le htaꞈ hpanˍ taˍ ve pa taw miˬ guiˬ hkʼoˆ chehˇ ve maˇ kʼo, mvuhˇ naw ma hkʼoˆ chehˇ ve maˇ kʼo, teˇ gʼaˇ le le htaꞈ uˉ peunˍ tuꞈ ve a hkaw˗anˬ yawˇ cawˬ ve yoˬ.

4. Ngaˬ hui a shu yawˇ hkʼaˇ yawˇ dawˇ cheˆ tuˬ ve a hkaw˗anˬ cawˬ ve htawˇ, aˬ htoꞈ ma te ngaˬ hui Gʼuiˬ sha htaꞈ tawˍ daꞈ maˇ gʼa ve le?

⁴ Saˍtanˍ teꞈ chiˉ kaꞈ maˇ te hpanˍ jaw. Hkʼe te leh, yawˇ mvuhˇ naw ma miˬ naˆ ma htaꞈ uˉ peunˍ tuˬ ve a hkaw˗anˬ maˇ cawˬ. Saˍtanˍ leh awˉ lawˉ peuˇ ve chaw teˇ ca Yaˬhoˉvaˬ htaꞈ hpfuhˆ htaˇ, yawˇ hui Yaˬhoˉvaˬ htaꞈ tawˍ daꞈ gaˇ jaˇ ve yoˬ. (Yeˍraˍmiˆ 10:23) Yawˇ hui a shu yawˇ hkʼaˇ yawˇ dawˇ cheˆ gʼa tuˬ a hkaw˗anˬ cawˬ ve pa taw, Yaˬhoˉvaˬ uˉ peunˍ ve htaꞈ maˇ haꞈ yuˬ kaꞈ hpehꞈ˗aw laˇ? Maˇ hpehꞈ. A shu yawˇ hkʼaˇ yawˇ dawˇ cheˆ tuˬ a hkaw˗anˬ cawˬ ve htawˇ, chaw yaˇ yawˇ hui ve hpanˍ shehˍ hpaˇ Yaˬhoˉvaˬ htaꞈ tawˍ daꞈ tuˬ a hkaw˗anˬ maˇ cawˬ. A shu teˇ gʼaˇ Gʼuiˬ sha htaꞈ tawˍ daꞈ ve kʼo, a hkaw˗anˬ chi yawˇ maˇ cawˇ ve hkʼaw yehˇ ve yoˬ. Chaw yaˇ Yaˬhoˉvaˬ uˉ peunˍ leh beˆ maˍ laˇ ve htaꞈ loˍ ve yoˬ.

5. Aˬ htoꞈ ma te Yaˬhoˉvaˬ yawˇ hkʼaˇ yawˇ dawˇ cheˆ ve hkʼaˬ htaˆ kaꞈ hteˇ ve cawˇ ve le?

⁵ Aˬ htoꞈ ma te Yaˬhoˉvaˬ uˉ peunˍ tuˬ ve a hkaw˗anˬ cawˬ ve teˇ lawn htaꞈ kʼawꞈ dawˇ nyi sheˍ. Yawˇ hteˇ jaˇ cawˇ jaˇ ve hkʼaw, uˉ peunˍ ve a hkaw˗anˬ yehˇ ve yoˬ. Yawˇ kʼoˆ ve, “ngaˬ ve haꞈ pehnˇ ve teˇ ceuˬ lehˬ, co co taiˍ taiˍ yeˬ chehˇ leh, ngaˬ lehˬ hteˇ ve cawˇ ve kanˉ htaꞈ ceh tiˉ te ve yoˬ. Chi hkʼe te tuˬ ngaˬ nyi ma cawˇ ve yoˬ.” (Yeˍraˍmiˆ 9:24) Aˬ htoꞈ ma cawˇ maˇ cawˇ ve Yaˬhoˉvaˬ dawˇ cheˆ tuˬ, chaw yaˇ ve awˬ liˇ awˬ hkʼaˇ gu laˇ tuˬ yawˇ maˇ loˍ. Hteˇ ve cawˇ ve awˬ hkʼaˇ Yaˬhoˉvaˬ yawˇ hkʼaˇ yawˇ teh ve yoˬ. Yaˬhoˉvaˬ yawˇ ve hteˇ ve cawˇ ve htaꞈ cuˇ leh, chaw yaˇ htaꞈ awˬ liˇ tawˇ hkawˇ piˇ ve yoˬ. Chiˇ mvuh ve liꞈ bvuhꞈ paˍ kʼoˆ ve, “hteˇ ve cawˇ ve teˇ ceuˬ awˬ hkʼoˆ lo nawˬ ve mvuhˇ miˬ htaꞈ nawˬ teh taˍ ve yoˬ.” Hkʼe te leh, Yaˬhoˉvaˬ geh laˬ ve awˬ liˇ tawˇ hkawˇ, awˬ liˇ awˬ hkʼaˇ, dawˇ cheˆ ve hkʼa peu˗eˬ hteˇ ve cawˇ ve yoˬ. (Chiˇ mvuh ve 89:14; 119:128) Yaˬhoˉvaˬ hteˇ ve cawˇ ve uˉ peunˍ paˍ maˇ heˆ tehꞈ Saˍtanˍ kʼoˆ ve yoˬ. Yaꞈ hkʼaˇ, Saˍtanˍ miˬ guiˬ chi ve hkʼoˆ yawˇ hkʼaˇ yawˇ hteˇ ve cawˇ ve te maˇ gʼa.

6. Yaˬhoˉvaˬ uˉ peunˍ ve a hkaw˗anˬ cawˬ ve tehꞈ ngaˬ hui gʼa shiˍ tuˬ, aˬ htoꞈ ma teˇ ceuˬ cawˬ sheˍ ve le?

⁶ Mvuhˇ naw ma miˬ naˆ ma htaꞈ nyi haꞈ shaˉ tuˬ Yaˬhoˉvaˬ cuˇ yiˍ cawˬ ve pa taw, yawˇ uˉ peunˍ ve a hkaw˗anˬ cawˬ ve yoˬ. Tawˇ pa haˉ te kʼo, saˍ laꞈ gʼonˍ gu maˇ gʼa ve a naˍ teˇ hpaˍ htawˇ, yawˇ ve yaˇ paˍ gu laˇ tcuh ve yoˬ. (Maꞈhtehˍ 4:23, 24; Maˍkuˆ 5:25-29) Chi ve ngaˬ hui awˬ pon anˇ tuˬ hpehꞈ ve yoˬ. Yaꞈ hkʼaˇ, Yaˬhoˉvaˬ awˬ pon anˇ tuˬ maˇ hpehꞈ. Chaw yaˇ ve awˬ to hkʼaˬ hkʼe hpehꞈ ve yawˇ na gʼa leh, aˬ htoꞈ ma luˬ ve htawˇ yawˇ gu gʼa ve yoˬ. Suh ve chaw htaꞈ kaꞈ yawˇ teˇ pawˆ kʼawꞈ teꞈ tu la piˇ gʼa ve yoˬ. Mvuhˇ yeˬ mvuhˇ haw htaꞈ kaꞈ maˇ kʼawꞈ cawˬ tcuh ve yawˇ te gʼa ve yoˬ.

7. Saˍtanˍ hpawˇ chehˇ ve chaw teˇ gʼaˇ le le aꞈ kehˉ Yaˬhoˉvaˬ cuˇ yiˍ maˍ yiˍ hkʼaˬ hkʼe te cawˬ ve le?

⁷ Teˇ mvuhˇ miˬ hkʼaw maˇ kʼoˆ laiˉ mvuhˇ miˬ hkʼaw maˇ kʼoˆ Saˍtanˍ uˉ peunˍ chehˇ ve miˬ guiˬ dawˇ sha gawˬ lehˍ ve maˇ cawˬ gʼa. Miˬ guiˬ hkʼoˆ dawˇ sha gawˬ lehˍ ve cawˬ gʼa tuˬ Yaˬhoˉvaˬ teˇ gʼaˇ ceh tiˉ cuˇ yiˍ maˍ yiˍ cawˬ ve yoˬ. (Iˉsaˍyaˆ 2:3, 4; 54:13) Ngaˬ hui kaꞈ tcuh yaˇ Pawˇluꞈ hkʼa shuˍ dawˇ ve yoˬ. Yawˇ kʼoˆ ve, “Gʼuiˬ sha ve uiˍ jaˇ maˇ jaˇ ve cuˇ yiˍ maˍ yiˍ leh shiˍ puiˉ ve nyi ma lehˬ, hkʼaˬ ma naˉ jaˇ ve le. Gʼuiˬ sha suhˉ taˆ ve teˇ hpaˍ lehˬ, a shu kaꞈ ca dawˇ maˇ gaˬ. Yawˇ ve yaꞈ kʼaw teˇ hpaˍ htaꞈ a shu kaꞈ ca maˇ mawˬ!”—Roˉmaꞈ 11:33.

Yaˬhoˉvaˬ uˉ peunˍ ve daꞈ jaˇ ve

8. Yaˬhoˉvaˬ uˉ peunˍ ve awˬ hkʼaˇ htaꞈ ngaˬ hui hkʼaˬ hkʼe dawˇ ve le?

⁸ Liꞈ hpu hkʼaw hkʼa tawˍ lehˆ maˍ laˇ ve, Yaˬhoˉvaˬ uˉ peunˍ ve a hkaw˗anˬ cawˬ ve yoˬ. Aˬ htoꞈ ma te yawˇ teˇ gʼaˇ le le aꞈ kehˉ uˉ peunˍ ve daꞈ jaˇ ve kaꞈ kʼoˆ maˍ laˇ taˍ ve yoˬ. Teˇ ceuˬ lehˬ, yawˇ haꞈ pehnˇ ve hkʼaw uˉ peunˍ ve pa taw yoˬ. Yawˇ lehˬ, “ha kʼaˉ puiˉ leh awˬ bon te piˇ puiˉ ve Gʼuiˬ sha hpehꞈ leh, nyi ma dawˇ zuhˬ gaˇ zuhˬ ve Gʼuiˬ sha, haꞈ pehnˇ uiˍ leh ka tiꞈ yeˬ ve Gʼuiˬ sha hpehꞈ ve” pa taw, ngaˬ hui yawˇ geh meuˆ daꞈ gaˇ ve yoˬ. (Tawˆ kʼai ve 34:6) Gʼuiˬ sha ngaˬ hui htaꞈ yawˆ yan ve awˬ hkʼaw lo te laˇ ve yoˬ. Ngaˬ hui awˬ to ngaˬ hui nyi haꞈ shaˉ gʼa ve aꞈ kehˉ yawˇ nyi haꞈ shaˉ laˇ chehˇ ve daꞈ jaˇ ve yoˬ. Neˇ haiˬ kʼoˆ ve, Yaˬhoˉvaˬ yawˇ ve chaw htaꞈ daꞈ ve awˬ ceuˬ maˇ piˇ gaˇ. Yawˇ kʼoˆ ve chi heˍ ve yoˬ. Co co taiˍ taiˍ ve a shaꞈ dawˇ law kuiˬ ngaˬ hui gʼa tuˬ, Gʼuiˬ sha yawˇ ve yaˇ awˬ hpfuhˇ hkʼaˆ jaˇ ve kaꞈ ngaˬ hui htaꞈ peꞈ laˇ ve yoˬ.—Chiˇ mvuh ve 84:11; Roˉmaꞈ 8:32 gʼaw ve.

9. Gʼuiˬ sha lehˬ ngaˬ hui teˇ gʼaˇ leh teˇ gʼaˇ htaꞈ dawˇ nyi chehˇ ve, ngaˬ hui hkʼaˬ hkʼe te shiˍ gʼa ve le?

⁹ Yaˬhoˉvaˬ yawˇ ve mvuhˇ miˬ yaˇ awˬ moˍ htaꞈ haꞈ ve yoˬ. Yaꞈ hkʼaˇ, teˇ gʼaˇ leh teˇ gʼaˇ htaꞈ kaꞈ yawˇ dawˇ nyi chehˇ ve yoˬ. Oˇ htaˇ teˇ co˗e yawˇ aˬ htoꞈ ma te ve htaꞈ kaꞈ dawˇ nyi sheˍ. 300 hkʼawꞈ ve awˬ yanˇ htaˇ, yawˇ ve mvuhˇ miˬ yaˇ htaꞈ sheh kʼai leh canˇ paˍ htaꞈ gʼaˇ tuˬ, Yaˬhoˉvaˬ suhˉ jehˬ paˍ teˇ hpaˍ htaꞈ yehˇ ve yoˬ. Yaꞈ hkʼaˇ oˇ ve teˇ yanˇ, Yaˬhoˉvaˬ teˇ gʼaˇ leh teˇ gʼaˇ htaꞈ kaꞈ dawˇ nyi chehˇ ve yoˬ. Tawˇ pa haˉ te kʼo, yawˇ lehˬ yaˇ miˇ Ruˉhtaˆ htaꞈ dawˇ nyi chehˇ ve yoˬ. Yawˇ Iˉsaˍreˍlaˆ chaw maˇ hpehꞈ leh, Yaˬhoˉvaˬ htaꞈ oˉ kʼoˍ pui ve chaw hpehꞈ la tuˬ yawˇ laiˉ ceuˬ gʼa baˬ taˉ ve yoˬ. Yaˬhoˉvaˬ Ruˉhtaˆ htaꞈ awˬ bon naꞈ piˇ tuˬ, awˬ hpawˇ mawˇ leh yaˇ paˍ yawˇ htaꞈ piˇ ve yoˬ. A yeˇ uiˍ jaˇ ve, Meˍsiˉyaꞈ lehˬ Ruˉhtaˆ ve awˬ ceuˬ awˬ hkʼaˇ geh laˬ ve yoˬ. Ruˉhtaˆ ve awˬ lawn Liꞈ hpu hkʼaw Yaˬhoˉvaˬ bvuhꞈ tcuh taˍ leh, liꞈ kʼoˆ oˇ ve yawˇ ve awˬ meh htaꞈ yehˇ ve yoˬ. Ruˉhtaˆ a shaꞈ teˇ pawˆ kʼawꞈ gʼa leh awˬ lawn oˇ ve hkʼa peu˗eˬ yawˇ shiˍ gʼa ve kʼo, yawˇ hkʼaˬ hkʼe dawˇ tuˬ le, dawˇ nyi sheˍ.—Ruˉhtaˆ 4:13; Maꞈhtehˍ 1:5, 16.

10. Yaˬhoˉvaˬ uˉ peunˍ ve haiˬ jaˇ ve maˇ heˆ tehꞈ ngaˬ hui hkʼaˬ hkʼe te shiˍ gʼa ve le?

¹⁰ Yaˬhoˉvaˬ uˉ peunˍ ve haiˬ jaˇ ve maˇ heˆ. Yawˇ ve hkawˇ na ve chaw nyi ma sha leh ha lehˬ ve yoˬ. (2 Kawˇrenˍhtuˆ 3:17) Daˍviˆ kʼoˆ maˍ laˇ ve, “awˬ meꞈ awˬ hponˇ leh kanˇ paˆ teˇ ceuˬ, yawˇ awˬ paˇ lo hkʼa caw zuhˇ cawˬ taˍ ve yoˬ. Yawˇ ve bon yehˬ hkʼaw lo awˬ gʼeuˆ ba leh nyi sha jaˇ ve yoˬ.” (1 Raˍsaˍvanˍ 16:7, 27) Chiˇ mvuh ve liꞈ bvuhꞈ paˍ Eˇtanˍ yawˇ kʼoˆ ve, “Nawˬ htaꞈ oˉ kʼoˍ pui leh nawˬ ve ha kʼaˉ puiˉ ve awˬ gʼeuˆ awˬ hkʼaw lo gʼa chehˇ ve chaw teˇ hpaˍ gʼa ha lehˬ ve yoˬ. Nawˬ htaꞈ pa taw yawˇ hui teˇ nyi tanˇ vanˇ gʼa ha lehˬ leh, nawˬ ve daꞈ ve kanˉ htaꞈ pa taw, yawˇ hui nawˬ htaꞈ chiˇ mvuh chehˇ ve yoˬ.”—Chiˇ mvuh ve 89:15, 16.

11. Yaˬhoˉvaˬ uˉ peunˍ ve daꞈ jaˇ ve tehꞈ, ngaˬ hui hkʼaˬ hkʼe te hkʼa dehꞈ yonˍ gʼa ve le?

¹¹ Yaˬhoˉvaˬ ve awˬ liˇ awˬ hkʼaˇ daꞈ ve htaꞈ ngaˬ hui hkʼa dehꞈ dawˇ nyi ve kʼo, Yaˬhoˉvaˬ uˉ peunˍ ve daꞈ jaˇ ve ngaˬ hui hkʼa dehꞈ yonˍ gʼa ve yoˬ. Ngaˬ hui chiˇ mvuh ve liꞈ bvuhꞈ paˍ hkʼa shuˍ dawˇ ve yoˬ. Yawˇ Yaˬhoˉvaˬ htaꞈ kʼoˆ piˇ ve, “nawˬ ve bon yehˬ hkʼaw lo teˇ nyi gʼa chehˇ ve lehˬ, awˬ nu ve chehˇ kuiˬ lo teˇ hinˉ nyi gʼa chehˇ ve aꞈ kehˉ daꞈ leuˉ ve yoˬ.” (Chiˇ mvuh ve 84:10) Yaˬhoˉvaˬ ngaˬ hui htaꞈ awˬ hkʼaˇ gu leh hpanˍ laˇ ve pa taw, ngaˬ hui hkʼaˬ hkʼe te ha lehˬ gʼa ve yawˇ hkʼa dehꞈ shiˍ ve yoˬ. Ngaˬ hui loˍ ve aꞈ kehˉ yawˇ peꞈ laˇ maˇ jaˇ ve yoˬ. Yaˬhoˉvaˬ ngaˬ hui htaꞈ te tcuh laˇ ve hkʼa peu˗eˬ ngaˬ hui awˬ pon awˬ bon cawˬ ve yoˬ. Ngaˬ hui teˇ ceuˬ ceuˬ gʼa baˬ taˉ ve htawˇ, Yaˬhoˉvaˬ ve hkawˇ na yuˬ ve kʼo, hkʼaˬ htaˆ kaꞈ ha lehˬ jaˇ ve yoˬ.—Iˉsaˍyaˆ 48:17 gʼaw ve.

12. Aˬ htoꞈ ma te ngaˬ hui Yaˬhoˉvaˬ uˉ peunˍ ve hpawˇ chehˇ gaˇ ve le?

¹² Yeˍsuˆ Hkriꞈ uˉ peunˍ ve teˇ hinˉ hkʼawꞈ peuˬ hkʼawꞈ nawˉ, chaw teˇ hpaˍ hpaˍ Yaˬhoˉvaˬ uˉ peunˍ ve htaꞈ tawˍ daꞈ tuˬ yoˬ tehꞈ, Liꞈ hpu ngaˬ hui htaꞈ maˍ laˇ ve yoˬ. (Hpeuꞈ maˍ ve 20:7, 8) Aˬ htoꞈ ma te yawˇ hui oˇ hkʼe te tuˬ le? Oˇ ve teˇ yanˇ chaw yaˇ a shu yawˇ awˬ pon ceh tiˉ dawˇ nyi ve neˇ haiˬ coˇ caˇ leh te piˇ tuˬ yoˬ. Yawˇ hui Yaˬhoˉvaˬ ve hkawˇ maˇ na yuˬ ve htawˇ, co co taiˍ taiˍ ve a shaꞈ cawˬ gʼa ve tehꞈ chaw yaˇ htaꞈ coˇ caˇ leh dawˇ tcuh ve yoˬ hehˉ. Chi hpehꞈ maˇ gʼa taˍ. Yaꞈ hkʼaˇ ngaˬ hui a shu yawˇ awˬ to htaꞈ na nyi cawˇ ve, “heˍ ve tawˇ hkawˇ chi hkʼe ve htaꞈ ngaˬ hui yonˍ tuˬ laˇ?” Ngaˬ hui Yaˬhoˉvaˬ htaꞈ awˬ tehˬ haꞈ leh, yawˇ ve daꞈ jaˇ ve Mvuhˇ naw ma miˬ naˆ ma htaꞈ uˉ peunˍ ve a hkaw˗anˬ cawˬ ve tehꞈ ngaˬ hui hkʼa dehꞈ yonˍ gʼa ve kʼo, heˍ ve tawˇ hkawˇ chi hkʼe ve ngaˬ hui nyi bawˬ jaˇ ve yoˬ. Ngaˬ hui Yaˬhoˉvaˬ uˉ peunˍ ve awˬ hawˉ lo ceh tiˉ chehˇ gaˇ ve yoˬ. Yawˇ haꞈ pehnˇ ve hkʼaw uˉ peunˍ ve yoˬ.

Ka tiꞈ yeˬ ve hkʼaw Gʼuiˬ sha uˉ peunˍ ve hpawˇ chehˇ sheˍ

13. Gʼuiˬ sha uˉ peunˍ ve hpawˇ chehˇ gaˇ ve kʼo, ngaˬ hui hkʼaˬ hkʼe te cawˇ ve le?

¹³ Ngaˬ hui gʼa shiˍ ve, Yaˬhoˉvaˬ uˉ peunˍ ve a hkaw˗anˬ cawˬ ve leh, yawˇ uˉ peunˍ ve daꞈ jaˇ ve yoˬ. Hkʼe te leh, ngaˬ hui yawˇ uˉ peunˍ ve hpawˇ chehˇ cawˇ ve yoˬ. Chi hkʼe te tuˬ, Yaˬhoˉvaˬ htaꞈ ka tiꞈ yeˬ leh yawˇ hkʼaˇ suh gʼaꞈ te cawˇ ve yoˬ. Ngaˬ hui Yaˬhoˉvaˬ uˉ peunˍ ve awˬ hkʼaˇ htaꞈ dawˇ cawˇ jaˇ ve kʼo, coˇ caˇ leh Yaˬhoˉvaˬ hkʼa shuˍ gʼaꞈ te gaˇ ve yoˬ.—Eˇfeˇsuꞈ 5:1, 2 gʼaw ve.

14. Nyi haꞈ shaˉ paˍ leh yehˬ shehˍ hpaˇ Yaˬhoˉvaˬ htaꞈ hkʼaˬ hkʼe te henˇ yuˬ gʼa ve le?

¹⁴ Liꞈ hpu hkʼaw maˍ laˇ ve, Yaˬhoˉvaˬ yawˇ ve kanˇ paˆ haꞈ pehnˇ ve hkʼaw yehˇ ve yoˬ. Yehˬ shehˍ hpaˇ leh Hkriꞈ yaˇ awˬ moˍ hkʼaw nyi haꞈ shaˉ paˍ Yaˬhoˉvaˬ uˉ peunˍ ve htaꞈ dawˇ cawˇ jaˇ ve kʼo, yawˇ hui Yaˬhoˉvaˬ htaꞈ henˇ yuˬ leh yawˇ hui haiˬ ve maˇ te leh nyiˉ te piˇ ve nyi ma maˇ cawˬ. Tcuh yaˇ Pawˇluꞈ coˇ caˇ leh Gʼuiˬ sha leh yawˇ ve yaˇ paˍ htaꞈ hkʼa dehꞈ henˇ yuˬ ve yoˬ. (1 Kawˇrenˍhtuˆ 11:1) Yawˇ awˬ nu ve chaw yaꞈ taw tuˬ maˇ te leh, yawˇ hui htaꞈ nyiˉ leh cawˇ ve hkʼaw maˇ te tcuh. Yawˇ hui cawˇ ve htaꞈ te tuˬ, yawˇ awˬ gʼaˇ piˇ ve yoˬ. (Roˉmaꞈ 12:1; Eˇfeˇsuꞈ 4:1; Hpiˇleˍmonˍ 8-10) Pawˇluꞈ chi hkʼe te htaˇ, yawˇ Yaˬhoˉvaˬ hkʼa shuˍ te chehˇ ve yoˬ. Ngaˬ hui awˬ nu ve chaw htaꞈ haꞈ pehnˇ ve hkʼaw te piˇ ve kʼo, ngaˬ hui Yaˬhoˉvaˬ uˉ peunˍ ve hpawˇ chehˇ ve yoˬ.

15. Kanˇ paˆ cawˬ ve chaw htaꞈ yawˆ yan leh Yaˬhoˉvaˬ uˉ peunˍ ve hpawˇ chehˇ gaˇ ve kʼo, ngaˬ hui hkʼaˬ hkʼe gʼa te ve le?

¹⁵ Yaˬhoˉvaˬ uˉ peunˍ ve hpawˇ ngaˬ hui chehˇ gaˇ ve kʼo, yawˇ kanˇ paˆ piˇ ve chaw hui awˬ hawˉ lo ngaˬ hui yawˆ yan leh na yuˬ cawˇ ve yoˬ. Yawˇ dawˇ cheˆ ve ngaˬ hui maˇ na gʼa leh maˇ cawˇ tehꞈ dawˇ ve htawˇ, ngaˬ hui na yuˬ cawˇ ve yoˬ. Miˬ guiˬ yaˇ chi hkʼe maˇ te. Yaꞈ hkʼaˇ, Yaˬhoˉvaˬ ngaˬ hui ve uˉ peunˍ shehˍ hpaˇ tehꞈ haꞈ yuˬ ve kʼo, ngaˬ hui chi hkʼe te tuˬ yoˬ. (Eˇfeˇsuꞈ 5:22, 23; 6:1-3; Heˍbrehˇ 13:17) Leh Yaˬhoˉvaˬ ngaˬ hui htaꞈ daꞈ jaˇ ve gʼa tcuh gaˇ ve pa taw, nga hui chi hkʼe te ve kʼo ha lehˬ tuˬ yoˬ.

16. Ngaˬ hui Gʼuiˬ sha uˉ peunˍ ve hpawˇ chehˇ gaˇ ve kʼo, ngaˬ hui dawˇ cheˆ htaˇ, hkʼaˬ hkʼe gʼa dawˇ nyi cawˇ ve le?

¹⁶ Gʼuiˬ sha uˉ peunˍ ve hpawˇ ngaˬ hui chehˇ gaˇ ve kʼo, dawˇ cheˆ tuˬ ve awˬ hkʼaˇ kaꞈ a yeˇ uiˍ jaˇ. A shaꞈ teꞈ chehˇ kuiˬ hkʼaw teˇ ceuˬ le le htaꞈ hkʼaˬ hkʼe te tuˬ, Yaˬhoˉvaˬ hkʼa dehꞈ maˇ beˆ maˍ laˇ. Yaꞈ hkʼaˇ, yawˇ hkʼaˬ hkʼe dawˇ ve ngaˬ hui htaꞈ maˍ laˇ ve yoˬ. Ngaˬ hui hkʼaˬ hkʼe te cawˇ ve htaꞈ dawˇ gʼa tuˬ, chi ngaˬ hui htaꞈ ga laˇ ve yoˬ. Tawˇ pa haˉ te kʼo, veuꞈ kʼaˇ chi veuꞈ hpehꞈ, maˇ hpehꞈ ve, Yaˬhoˉvaˬ maˇ gʼa bvuhꞈ laˇ. Yaꞈ hkʼaˇ, ngaˬ hui yawˇ ve Shaˉhkiˆhkanˍ ve chaw hpehꞈ ve pa taw, nyi ma nuˇ nehˬ ve hkʼaw, keunˍ daꞈ cawˇ daꞈ ve veuꞈ kʼaˇ veuꞈ deh cawˇ ve tehꞈ, yawˇ ngaˬ hui htaꞈ maˍ laˇ ve yoˬ. (1 Tiˆmoˉseˍ 2:9, 10) Ngaˬ hui dawˇ cheˆ ve awˬ nu ve chaw htaꞈ hkʼaˬ hkʼe te heuˆ la kuiˬ cawˬ ve, yawˇ ngaˬ hui htaꞈ dawˇ nyi tcuh gaˇ ve yoˬ. (1 Kawˇrenˍhtuˆ 10:31-33) Ngaˬ hui Yaˬhoˉvaˬ uˉ peunˍ ve awˬ hkʼaˇ htaꞈ dawˇ cawˇ jaˇ ve kʼo, Yaˬhoˉvaˬ dawˇ ve hkʼe ngaˬ hui dawˇ cheˆ gaˇ ve yoˬ.

17, 18. Awˬ hpawˇ awˬ miˇ ma hkʼaˬ hkʼe te Yaˬhoˉvaˬ uˉ peunˍ ve hpawˇ chehˇ gʼa tuˬ le?

¹⁷ Hkriꞈ yaˇ awˬ hpawˇ awˬ miˇ ma Yaˬhoˉvaˬ uˉ peunˍ ve hpawˇ hkʼaˬ hkʼe te chehˇ gʼa tuˬ, teˇ geh dawˇ nyi sheˍ. Heuˆ daꞈ ve chi, yawˇ hui dawˇ taˍ ve hkʼe maˇ hpehꞈ ve yoˬ hehˉ. Teˇ hpaˍ hpaˍ yawˇ hui ve yehˬ kʼa hkʼaw awˬ lawn uiˍ ve cawˬ ve yoˬ. Chi hkʼe hpehꞈ ve kʼo, Yaˬhoˉvaˬ Iˉsaˍreˍlaˆ chaw htaꞈ hkʼaˬ hkʼe te piˇ ve dawˇ nyi gʼa ve yoˬ. Yaˬhoˉvaˬ lehˬ yawˇ ve chaw ve awˬ hpawˇ hkʼe hpehꞈ ve tehꞈ kʼoˆ maˍ piˇ ve yoˬ. (Iˉsaˍyaˆ 54:5; 62:4) Iˉsaˍreˍlaˆ chaw Yaˬhoˉvaˬ nyi ma luˬ tuˬ laiˉ pawˆ te piˇ ve pa taw, awˬ hpawˇ awˬ miˇ ma awˬ lawn cawˬ daꞈ ve hkʼe hpehꞈ ve yoˬ. Yaꞈ hkʼaˇ, Yaˬhoˉvaˬ Iˉsaˍreˍlaˆ chaw htaꞈ laꞈ haˉ maˇ chiˇ baˬ piˇ. Yawˇ yawˇ hui htaꞈ venˇ baˆ laiˉ pawˆ hpehˇ piˇ leh, ka tiꞈ te piˇ taˍ ve htaꞈ haꞈ shaˉ ve yoˬ.—Chiˇ mvuh ve 106:43-45 gʼaw ve.

¹⁸ Hkriꞈ yaˇ awˬ hpawˇ awˬ miˇ ma Yaˬhoˉvaˬ htaꞈ haꞈ ve kʼo, yawˇ hui yawˇ htaꞈ henˇ yuˬ tuˬ yoˬ. Yawˇ hui yehˬ kʼa hkʼaw awˬ lawn cawˬ ve htawˇ, Liꞈ hpu hkʼaw maˇ yaꞈ ve kʼo, yawˇ hui maˇ baˬ daꞈ gaˇ. Heuˆ daꞈ htaˇ hkanˍ taˍ ve chi lehˬ a yeˇ uiˍ jaˇ tehꞈ Yaˬhoˉvaˬ shawˍ leh, yawˇ awˬ hpawˇ awˬ miˇ ma htaꞈ “caˉ daꞈ” piˇ taˍ ve yoˬ. Liꞈ hpu hkʼaw kʼoˆ ve, haˉ chawˇ haˉ paˆ te ve ceh tiˉ baˬ daꞈ gʼa leh awˬ suhˉ kʼawꞈ heuˆ hpehꞈ ve yoˬ. (Maꞈhtehˍ 19:5, 6, 9) Liꞈ hpu hkʼaw kʼoˆ taˍ ve hkʼe Hkriꞈ yaˇ coˇ caˇ leh yehˬ kʼa hkʼaw dawˇ taˍ ve hkʼe hpehꞈ la tcuh htaˇ, yawˇ hui Yaˬhoˉvaˬ uˉ peunˍ ve hpawˇ chehˇ ve yoˬ.

19. Ngaˬ hui te yaꞈ htaˇ hkʼaˬ hkʼe te tuˬ le?

¹⁹ Ngaˬ hui teˇ gʼaˇ le le maˇ biˇ leh, teˇ pawˆ pawˆ kʼo Yaˬhoˉvaˬ nyi ma luˬ tuˬ te piˇ ve yoˬ. Awˬ lawn chi ve yawˇ shiˍ ve pa taw, Yeˍsuˆ Hkriꞈ ngaˬ hui awˬ pon htaiˍ hkʼawꞈ laˇ tcuh ve yoˬ. Hkʼe te leh ngaˬ hui te yaꞈ htaˇ, Yaˬhoˉvaˬ ngaˬ hui htaꞈ venˇ baˆ hpehˇ laˇ tuˬ ngaˬ hui lawˬ cawˇ ve yoˬ. (1 Yoˇhanˬ 2:1, 2) Ngaˬ hui te yaꞈ ve htaꞈ ngaˬ hui nyi ma luˬ ve ceh tiˉ maˇ te cawˇ. Awˬ lawn chi ve ngaˬ hui htaꞈ aˬ htoꞈ ma maˍ laˇ ve kaꞈ ngaˬ hui gʼa dawˇ nyi cawˇ ve yoˬ. Ngaˬ hui Yaˬhoˉvaˬ awˬ paˇ lo chehˇ gaˇ ve yoˬ. Yawˇ ngaˬ hui htaꞈ venˇ baˆ hpehˇ laˇ leh, na˗e leh yawˇ htaꞈ caˉ leh oˉ kʼoˍ kʼawꞈ pui tuˬ, ga laˇ ve yoˬ.—Chiˇ mvuh ve 103:3.

20. Aˬ htoꞈ ma te ngaˬ hui Yaˬhoˉvaˬ uˉ peunˍ ve hpawˇ chi teˇ hkui kaꞈ chehˇ cawˇ ve le?

²⁰ Miˬ guiˬ awˬ suhˉ hkʼaw Yaˬhoˉvaˬ teˇ gʼaˇ le le htaꞈ uˉ peunˍ tuˬ yoˬ. Yawˇ ve hteˇ ve cawˇ ve htaꞈ yawˇ hui henˇ yuˬ tuˬ yoˬ. (Iˉsaˍyaˆ 11:9) Yaꞈ hkʼaˇ, chi teˇ hkui htaꞈ tanˬ leh, yawˇ hkʼaˬ hkʼe dawˇ ve, ngaˬ hui htaꞈ hkʼaˬ hkʼe te tcuh gaˇ ve henˇ yuˬ gʼa ve yoˬ. Maˇ maw ve awˬ yanˇ, Gʼuiˬ sha uˉ peunˍ ve a hkaw˗anˬ cawˬ ve tehꞈ teˇ gʼaˇ˗e kaꞈ maˇ haꞈ yuˬ ve maˇ cawˬ. Hkʼe te leh Yaˬhoˉvaˬ uˉ peunˍ ve hpawˇ chehˇ tuˬ, ngaˬ hui yawˇ hkawˇ na yuˬ leh, ka tiꞈ yeˬ ve hkʼaw yawˇ htaꞈ oˉ kʼoˍ pui leh te ve teˇ ceuˬ le le yawˇ hkʼaˇ suh henˇ yuˬ sheˍ.