A shu yawˇ awˬ to htaꞈ gʼaˇ puiˉ ve

1, 2. (a) A shu yawˇ awˬ to htaꞈ maˇ gʼaˇ puiˉ ve kʼo, hkʼaˬ hkʼe hpehꞈ la ve le? (b) Aˬ htoꞈ ma te ngaˬ hui awˬ lawn chi htaꞈ henˇ cawˇ ve le?

Yaˬhoˉvaˬ Gʼuiˬ sha, ngaˬ hui a shu yawˇ awˬ to htaꞈ gʼaˇ puiˉ tuˬ ga laˇ gʼa ve yoˬ. (Gaˍlaˍtiˆ 5:22, 23) Yaˬhoˉvaˬ a shu yawˇ awˬ to htaꞈ hkʼa biˇ gʼaˇ puiˉ ve htawˇ, ngaˬ hui maˇ biˇ ve pa taw te maˇ gʼa. Awˬ tehˬ kʼo, chaw yaˇ a shu yawˇ awˬ to htaꞈ maˇ gʼaˇ puiˉ ve pa taw, chi beuꞈ teˇ co˗e shoꞈ shaꞈ ve awˬ lawn cawˬ maˇ jaˇ ve yoˬ. Awˬ lawn chi htaꞈ pa taw, teˇ hpaˍ hpaˍ a yeˇ uiˍ ve awˬ lawn awˉ lawˉ haˆ maˇ te leh, liꞈ hkʼa dehꞈ maˇ henˇ, kanˉ hkʼa dehꞈ maˇ te ve chaw hpehꞈ la ve yoˬ. Chaw teˇ gʼaˇ a shu yawˇ awˬ to htaꞈ maˇ gʼaˇ puiˉ ve kʼo, shu htaꞈ deˇ ve, tzuhˬ dawˬ bvuhˆ ve, haˍ jaˇ ve, baˬ daꞈ la ve, jehˬ cha ve, laiˉ ceuˬ awˬ yeꞈ caˆ ve, htawnˍ hkʼaw lo gʼa chehˇ ve, dawˇ maˇ ve a naˍ cawˬ ve, pehꞈ ve tzuhˆ ve hpawˇ a naˍ nehˉ ve, maˇ heuˆ gaˇ ve hkʼaw yaˇ hu la gʼa ve yoˬ.—Chiˇ mvuh ve 34:11-14.

² A shu yawˇ awˬ to htaꞈ maˇ gʼaˇ puiˉ ve kʼo, a shu yawˇ awˬ to leh shu htaꞈ awˬ lawn cawˬ la gʼa ve yoˬ. Chi beuꞈ teˇ co˗e, maˇ˗awˍ ve chaw a shu yawˇ awˬ to htaꞈ maˇ gʼaˇ puiˉ˗o ve yoˬ. Chi ve anˇ tuˬ maˇ cawˬ. Awˬ law kʼo, awˬ gʼuˇ suhˍ htaˇ kaꞈ Liꞈ hpu hkʼaw kʼoˆ taˍ peuˬ ve yoˬ. Awˬ leh meuˇ ve awˬ yanˇ a shu yawˇ awˬ to htaꞈ maˇ gʼaˇ puiˉ ve chaw cawˬ maˇ jaˇ ve yoˬ.—2 Tiˆmoˉseˍ 3:1-3.

3. Aˬ htoꞈ ma te ngaˬ hui a shu yawˇ awˬ to htaꞈ gʼaˇ puiˉ cawˇ ve le?

³ Aˬ htoꞈ ma te ngaˬ hui a sha yawˇ awˬ to htaꞈ gʼaˇ puiˉ cawˇ ve le? Awˬ hkʼaˇ nyiˇ hkʼaˇ, cawˬ ve yoˬ. Awˉ lawˉ teˇ hkʼaˇ a shu yawˇ awˬ to leh nyi ma htaꞈ gʼaˇ puiˉ ve kʼo, shoꞈ shaꞈ ve awˬ lawn shu aꞈ kehˉ i ve yoˬ. Yawˇ hui awˬ nu ve chaw geh awˬ chawˇ te daꞈ gʼa leh beuꞈ ve, dawˇ haˍ dawˇ hkiˉ ve, nyi ma luˬ ve, hkʼa dehꞈ maˇ cawˬ ve yoˬ. Nyiˇ hkʼaˇ teˇ hkʼaˇ, ngaˬ hui caˉ leh Gʼuiˬ sha ve awˬ chawˇ te gaˇ ve kʼo, ngaˬ hui maˇ daꞈ ve te hkʼaˇ dawˇ hkʼaˇ htaꞈ gʼa tawˍ daꞈ ve yoˬ. Aˍdanˍ Eˇvaꞈ chi hkʼe te maˇ gʼa. (Awˬ hkuiˉ puiˍ 3:6) Yawˇ hui hkʼa shuˍ, chi beuꞈ teˇ co˗e laiˉ gʼaˇ a shu yawˇ awˬ to htaꞈ maˇ gʼaˇ puiˉ ve pa taw, shoꞈ shaꞈ jaˇ ve awˬ lawn cawˬ ve yoˬ.

4. A shu yawˇ awˬ to htaꞈ gʼaˇ puiˉ tuˬ ngaˬ hui coˇ caˇ chehˇ ve kʼo, ngaˬ hui awˬ gʼaˇ hkʼaˬ hkʼe gʼa tuˬ le?

⁴ Ngaˬ hui maˇ biˇ leh a shu yawˇ awˬ to htaꞈ gʼaˇ puiˉ ve maˇ sha tehꞈ, Yaˬhoˉvaˬ shiˍ ve yoˬ. Yaꞈ hkʼaˇ, maˇ daꞈ ve dawˇ hkʼaˇ htaꞈ gʼaˇ tuˬ ngaˬ hui htaꞈ ga laˇ gʼa ve yoˬ. (1 Jawˇmawˇ 8:46-50) Yawˇ ngaˬ hui ve awˬ chawˇ hpehꞈ leh ha kʼaˉ puiˉ ve hkʼaw ngaˬ hui htaꞈ awˬ gʼaˇ peꞈ laˇ gʼa ve yoˬ. Yaˬhoˉvaˬ a shu yawˇ awˬ to htaꞈ hkʼaˬ hkʼe te gʼaˇ puiˉ ve awˬ lawn chi ve hkʼaw ngaˬ hui henˇ tuˬ yoˬ. Liꞈ hpu hkʼaw daꞈ ve leh maˇ daꞈ ve awˬ lawn beˆ maˍ laˇ hkawˇ kaꞈ henˇ tuˬ yoˬ.

Yaˬhoˉvaˬ daꞈ ve henˇ yuˬ tuˬ hpehꞈ ve

5, 6. Yaˬhoˉvaˬ a shu yawˇ awˬ to htaꞈ gʼaˇ puiˉ ve daꞈ ve henˇ yuˬ tuˬ hkʼaˬ hkʼe hpehꞈ ve le?

⁵ Yaˬhoˉvaˬ biˇ jaˇ ve pa taw, yawˇ awˬ to htaꞈ gʼaˇ puiˉ ve kaꞈ biˇ jaˇ ve yoˬ. (Bon maˍ ve 32:4) Yaꞈ hkʼaˇ, ngaˬ hui maˇ biˇ ve chaw hpehꞈ ve yoˬ. Hkʼe te leh, ngaˬ hui yawˇ htaꞈ henˇ yuˬ tuˬ Yaˬhoˉvaˬ a shu yawˇ awˬ to htaꞈ hkʼaˬ hkʼe gʼaˇ puiˉ ve htaꞈ ngaˬ hui henˇ yuˬ cawˇ ve yoˬ. Ngaˬ hui chi hkʼe te ve kʼo, teˇ ceuˬ ceuˬ ngaˬ hui nyi ma maˇ sha tuˬ te laˇ ve htawˇ, ngaˬ hui cawˇ ve hkʼaw haꞈ yuˬ gʼa ve yoˬ. Yaˬhoˉvaˬ a shu yawˇ awˬ to htaꞈ hkʼaˬ hkʼe te gʼaˇ jaw ve le?

⁶ Yaˬhoˉvaˬ hkʼaˬ hkʼe te ve htaꞈ dawˇ nyi sheˍ. Saˍtanˍ kʼoˆ ve awˬ ceuˬ mvuhˇ naw ma hkʼoˆ, Gʼuiˬ sha htaꞈ ka tiꞈ yeˬ ve teˇ hpaˍ anˇ lawꞈ lawꞈ cheˆ˗ehˬ kʼai leh beuꞈ jaˇ ve yoˬ hehˉ. Saˍtanˍ cawˬ tcuh laˇ ve tuꞈ ve hkanˍ ve htaꞈ nawˬ dawˇ nyi htaˇ, nawˬ kaꞈ hkʼa shuˍ dawˇ gʼa tuˬ yoˬ. Yaꞈ hkʼaˇ, Yaˬhoˉvaˬ a shu yawˇ awˬ to htaꞈ gʼaˇ puiˉ ve yoˬ. Yawˇ cawˇ ve htaꞈ gu tuˬ awˬ hkʼaˇ shiˍ ve yoˬ. Yaˬhoˉvaˬ nyi ma haˆ haˆ maˇ zuhˆ puiˉ leh Saˍtanˍ hpfuhˆ ve htaꞈ yawˇ hteˇ ve cawˇ ve hkʼaw haꞈ yuˬ ve yoˬ. (Tawˆ kʼai ve 34:6; Yawˇbaˆ 2:2-6) Aˬ htoꞈ ma pa taw le? “Chaw hkʼa peu˗eˬ venˇ baˆ htaꞈ dawˇ hpfuhˆ leh teˇ gʼaˇ kaꞈ maˇ gʼa luˬ kʼai tuˬ [Yaˬhoˉvaˬ] heuˆ gaˇ ve pa taw,” yawˇ awˬ yanˇ htaꞈ ponˬ kʼai tcuh ve yoˬ.— 2 Peˍtruˆ 3:9.

7. Yaˬhoˉvaˬ ve daꞈ ve henˇ yuˬ tuˬ ngaˬ hui htaꞈ aˬ htoꞈ ma maˍ laˇ ve le?

⁷ Yaˬhoˉvaˬ ve daꞈ ve henˇ yuˬ tuˬ ngaˬ hui htaꞈ maˍ laˇ ve, maˇ yaw sheˍ htaˇ hkʼa dehꞈ dawˇ nyi leh haˆ haˆ maˇ te cawˇ ve yoˬ. Chi htaꞈ pa taw, a yeˇ uiˍ ve awˬ lawn dawˇ cheˆ htaˇ, awˬ yanˇ yehˇ leh dawˇ nyi sheˍ. Cawˇ ve hkʼaw yaw leh te gʼa tuˬ, cuˇ yiˍ gʼa tuˬ bon lawˬ sheˍ. (Chiˇ mvuh ve 141:3) Ngaˬ hui beuꞈ htaˇ leh nyi ma maˇ sha htaˇ, maˇ te cawˇ ve htaꞈ te la ve yoˬ. Laiˉ gʼaˇ maˇ gʼa dawˇ nyi sheˍ htaˇ, yaw ve leh te ve pa taw peuˬ hkʼawꞈ nawˉ nyi ma luˬ ve yoˬ!—Tawˇ naˉ ve 14:29; 15:28; 19:2.

Gʼuiˬ sha ve chaw daꞈ ve leh maˇ daꞈ ve awˬ lawn

8. (a) A shu yawˇ awˬ to htaꞈ gʼaˇ puiˉ ve daꞈ ve awˬ lawn ngaˬ hui hkʼaˬ kaꞈ lo ca gʼa tuˬ ve le? (b) Pawˇtiˇhpaˍ ve awˬ miˇ ma coˇ caˇ leh Yoˇsehꞈ geh zuhꞈ gaˇ htaˇ Yoˇsehꞈ beˬ ve lawˇ ve chi htaꞈ tawˍ daꞈ gʼaˇ tuˬ aˬ htoꞈ ma yawˇ htaꞈ ga piˇ ve le? (Awˬ lawn tanˬ htaˇ ve awˬ han htaꞈ nyi sheˍ.)

⁸ A shu yawˇ awˬ to htaꞈ gʼaˇ puiˉ ve Liꞈ hpu hkʼaw a shu cawˬ ve le? Teˇ gʼaˇ lehˬ Yaˍkoˆ ve yaˇ Yoˇsehꞈ hpehꞈ ve yoˬ. Hpaˍrawˇ ve a shaꞈ shaw paˍ awˬ hoˉ Pawˇtiˇhpaˍ Yoˇsehꞈ yawˇ ve aˉ hkʼaw lo kanˉ teˇ shehˍ hpaˇ hpehꞈ htaˇ, Yoˇsehꞈ beˬ ve lawˇ ve htaꞈ gʼa tawˍ daꞈ ve yoˬ. “Yoˇsehꞈ lehˬ awˬ hkiˇ awˬ na daꞈ ve pa taw,” Pawˇtiˇhpaˍ ve awˬ miˇ ma yawˇ htaꞈ dawˇ cawˇ leh hkʼawˇ faˍ leh yawˇ geh zuhꞈ gaˇ ve yoˬ. Yawˇ loˍ ve hkʼe Yoˇsehꞈ gʼaꞈ te piˇ ve kʼo, hkʼaˬ hkʼe hpehꞈ la tuˬ ve le? Yawˇ awˬ yanˇ yehˇ leh hkʼa dehꞈ dawˇ nyi ve yoˬ. Chi htaꞈ pa taw, yawˇ ve aˉ poꞈ htaꞈ tcuhˆ tiˍ piˇ htaˇ, yawˇ gʼuiˇ hpaw˗e gʼa ve yoˬ. “Chaꞈ chiˆ jaˇ ve kanˉ chi hkʼe ve htaꞈ te leh, Gʼuiˬ sha htaꞈ te yaꞈ hpehꞈ tuˬ le” tehꞈ, Yoˇsehꞈ kʼoˆ piˇ ve yoˬ.—Awˬ hkuiˉ puiˍ 39:6, 7, 9; Tawˇ naˉ ve 1:10 gʼaw ve.

9. Beˬ ve lawˇ ve htaꞈ tawˍ daꞈ gʼaˇ tuˬ nawˬ hkʼaˬ hkʼe te gu hehnˇ taˍ gʼa ve le?

⁹ Yoˇsehꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le? Gʼuiˬ sha ve awˬ liˇ awˬ hkʼaˇ htaꞈ maˇ gʼa gʼaꞈ te tuˬ, beˬ ve lawˇ ve gʼa hpuˇ ve kʼo, beˬ ve lawˇ ve chi htaꞈ gʼa tawˍ daꞈ ve yoˬ. Yaˬhoˉvaˬ ve Shaˉhkiˆhkanˍ ve chaw maˇ hpehꞈ sheˍ htaˇ, teˇ hpaˍ hpaˍ caˇ poˬ caˇ leuˉ ve, tzuhˬ dawˬ bvuhˆ ve, shuˉ dawˬ ve, naˆ tsuhˇ awˬ yeꞈ caˆ ve, pehꞈ ve tzuhˆ ve leh awˬ nu ve teˇ hpaˍ htaꞈ te jaw ve yoˬ. Baˆtiˆsaˬ haꞈ yuˬ peuˬ ve htawˇ, teˇ pawˆ pawˆ yawˇ hui beˬ ve lawˇ ve chi hkʼe ve gʼa hpuˇ ve yoˬ. Nawˬ chi hkʼe gʼa hpuˇ ve htaꞈ gʼaˇ tcuh ve kʼo, Yaˬhoˉvaˬ leh ngaˬ hui meuˆ daꞈ ve hkʼaˬ hkʼe kʼai ve htaꞈ dawˇ nyi sheˍ. Beˬ ve lawˇ ve hkʼaˬ kaꞈ lo laˬ ve nawˬ hkʼa dehꞈ dawˇ nyi leh jaw kʼai cawˇ ve yoˬ. (Chiˇ mvuh ve 26:4, 5; Tawˇ naˉ ve 22:3) Nawˬ beˬ ve lawˇ ve gʼa hpuˇ htaˇ, cuˇ yiˍ cawˬ leh a shu yawˇ awˬ to htaꞈ gʼaˇ puiˉ tuˬ Yaˬhoˉvaˬ geh lawˬ sheˍ.

10, 11. (a) Yaˇ nehˬ laiˉ gʼaˇ liꞈ henˇ yehˬ lo aˬ htoꞈ ma gʼa hpuˇ ve le? (b) Yaˇ nehˬ beˬ ve lawˇ ve htaꞈ tawˍ daꞈ gʼaˇ tuˬ aˬ htoꞈ ma ve awˬ lawn yawˇ hui htaꞈ ga piˇ ve le?

¹⁰ Chi beuꞈ teˇ co˗e, awˬ viˉ awˬ nyi yaˇ nehˬ laiˉ gʼaˇ Yoˇsehꞈ hkʼa shuˍ gʼa hpuˇ ve yoˬ. Yaˇ miˇ teˇ gʼaˇ Hkinˍ ve awˬ lawn htaꞈ dawˇ nyi sheˍ. Liꞈ teˇ geh henˇ ve chaw teˇ hpaˍ hkawꞈ nyi shinˉ nyi a shu geh ca zuhꞈ ve yawˇ hui kʼoˆ daꞈ kʼeh ve yoˬ. Yaꞈ hkʼaˇ, Hkinˍ chi hkʼe kʼoˆ tuˬ ve awˬ lawn maˇ cawˬ. Hkinˍ yawˇ awˬ nu ve chaw htaꞈ maˇ shuˍ ve pa taw teˇ pawˆ pawˆ kʼo chehˇ bawˬ leh, Hkinˍ chaw haˉ maˇ cawˬ ve kʼaˍ jaˇ tehꞈ yawˇ hui dawˇ ve yoˬ. Yaꞈ hkʼaˇ, awˬ tehˬ kʼo yawˇ cuˇ yiˍ cawˬ ve yoˬ. Yaˇ nehˬ htaˇ, teˇ geh zuhꞈ ve beˬ ve lawˇ ve hehnˇ jaˇ ve, yawˇ shiˍ ve yoˬ. (2 Tiˆmoˉseˍ 2:22) Liꞈ henˇ yaˇ teˇ hpaˍ hpaˍ hkʼaˬ htaˆ kaꞈ na ve nawˬ shu geh maˇ zuhꞈ jaw sheˍ laˇ? Chi yawˇ ve yonˍ hkʼaˇ yawˇ hui htaꞈ kʼoˆ maˍ piˇ gʼa ve yoˬ. Awˬ viˉ awˬ nyi yaˇ nehˬ pehꞈ ve tzuhˆ ve htaꞈ tawˍ daꞈ gʼaˇ ve ngaˬ hui ha lehˬ jaˇ leh Yaˬhoˉvaˬ kaꞈ nyi hkʼaˇ suh jaˇ ve yoˬ.

¹¹ Liꞈ hpu hkʼaw pehꞈ ve tzuhˆ ve htaꞈ maˇ tawˍ daꞈ ve chaw awˬ lawn kaꞈ cawˬ ve yoˬ. A shu yawˇ awˬ to htaꞈ maˇ gʼaˇ puiˉ ve kʼo, hkʼaˬ hkʼe gʼa hpuˇ tuˬ Liꞈ hpu hkʼaw kʼoˆ maˍ laˇ taˍ ve yoˬ. Hkinˍ gʼa hpuˇ ve hkʼa shuˍ nawˬ gʼa hpuˇ ve kʼo, Tawˇnaˉ ve liꞈ kaˇ nanˉ uiˍ 7 hkʼaw, kʼaˍ jaˇ ve chaw awˬ lawn kʼoˆ maˍ laˇ taˍ ve htaꞈ dawˇ nyi cawˇ ve yoˬ. Aˍmaˍnonˍ maˇ daꞈ ve awˬ lawn gʼa hpuˇ ve kaꞈ dawˇ nyi cawˇ ve yoˬ. (2 Saˍmo˗eˍlaˆ 13:1, 2, 10-15, 28-32) Yaˇ a shu yawˇ awˬ to htaꞈ gʼaˇ puiˉ leh cuˇ yiˍ cawˬ tuˬ awˬ pa awˬ e yaˇ htaꞈ ga piˇ tuˬ, chaw chi teˇ hpaˍ ve awˬ lawn yawˇ hui yehˬ kʼa hkʼaw oˉ kʼoˍ pui htaˇ henˇ gʼa ve yoˬ.

12. (a) Yoˇsehꞈ awˬ viˉ paˍ hui htaꞈ mawˬ htaˇ, a shu yawˇ awˬ to htaꞈ gʼaˇ puiˉ tuˬ yawˇ hkʼaˬ hkʼe te ve le? (b) Ngaˬ hui hkʼaˬ hkʼe ve gʼa hpuˇ htaˇ, Yoˇsehꞈ htaꞈ henˇ yuˬ gʼa tuˬ le?

¹² Yoˇsehꞈ a shu yawˇ awˬ to htaꞈ gʼaˇ puiˉ ve daꞈ ve henˇ yuˬ tuˬ kaꞈ cawˬ sheˍ ve yoˬ. Chi awˬ viˉ paˍ teˇ hpaˍ Eˇjiˇtuꞈ mvuhˇ miˬ lo caˬ shiˍ ca vuiˬ la htaˇ hpehꞈ ve yoˬ. Yawˇ hui hkʼaˬ hkʼe dawˇ chehˇ ve htaꞈ na gʼa tuˬ Yoˇsehꞈ yawˇ hui ve awˬ nyi paˍ hpehꞈ ve tehꞈ maˇ kʼoˆ piˇ. Yoˇsehꞈ hawˬ gaˇ jaˇ ve htawˇ, teˇ kaˬ lo ca hawˬ ve yoˬ. (Awˬ hkuiˉ puiˍ 43:30, 31; 45:1) Awˬ viˉ awˬ nyi nawˬ nyi ma maˇ sha tuˬ te laˇ htaˇ, Yoˇsehꞈ a shu yawˇ awˬ to htaꞈ gʼaˇ puiˉ ve nawˬ gʼaꞈ te ve kʼo, yaw ve, te ve peuˬ hkʼawꞈ nawˉ, ngaˬ hui nyi ma luˬ tuˬ maˇ te laˇ ve yoˬ. (Tawˇ naˉ ve 16:32; 17:27) Nawˬ ve awˬ viˉ awˬ nyi tawˆ cheˆ aˬ ve cawˬ ve kʼo, nawˬ hui maˇ gʼa caˉ daꞈ tuˬ a shu yawˇ awˬ to htaꞈ gʼa gʼaˇ tcuh ve yoˬ. Chi ve teˇ hpaˍ hpaˍ awˬ pon maˇ sha ve yoˬ. Yaꞈ hkʼaˇ, nawˬ Yaˬhoˉvaˬ htaꞈ henˇ yuˬ leh yawˇ beˆ maˍ laˇ ve htaꞈ gʼaꞈ te ve nawˬ tawnˇ gʼa ve kʼo, nawˬ htaꞈ ga laˇ gʼa ve yoˬ.

13. Jawˇmawˇ Daˍviˆ ve awˬ lawn teˇ hpaˍ ngaˬ hui htaꞈ hkʼaˬ hkʼe maˍ laˇ ve le?

¹³ Ngaˬ hui Daˍviˆ ve awˬ lawn htaꞈ kaꞈ henˇ yuˬ gʼa ve yoˬ. Sawˉluꞈ leh Sheˍmiˆ ve awˬ lawn htaꞈ kaꞈ henˇ yuˬ gʼa ve yoˬ. Daˍviˆ maˇ beuꞈ leh yawˇ ve kanˇ paˆ htaꞈ maˇ yehˇ. (1 Saˍmo˗eˍlaˆ 26:9-11; 2 Saˍmo˗eˍlaˆ 16:5-10) Yaꞈ hkʼaˇ, Daˍviˆ teˇ pawˆ le le a shu yawˇ awˬ to htaꞈ chi hkʼe te gʼaˇ puiˉ ve maˇ heˆ. Tawˇ pa haˉ te kʼo, yawˇ Aˍbiˇgeˍlaˆ geh te yaꞈ ve leh Naˍbaˆ lawˇ hpaꞈ uiˍ htaˇ, Daˍviˆ beuꞈ jaˇ ve yoˬ. (1 Saˍmo˗eˍlaˆ 25:10-13; 2 Saˍmo˗eˍlaˆ 11:2-4) Ngaˬ hui Daˍviˆ htaꞈ henˇ yuˬ gʼa ve yoˬ. Awˉ lawˉ teˇ ceuˬ lehˬ, Gʼuiˬ sha ve chaw htaꞈ nyi haꞈ shaˉ paˍ teˇ hpaˍ a shu yawˇ awˬ to htaꞈ gʼaˇ puiˉ leh yaꞈ ve hpawˇ kanˇ paˆ maˇ yehˇ cawˇ. Nyiˇ ceuˬ teˇ ceuˬ lehˬ teˇ gʼaˇ le le a shu yawˇ awˬ to htaꞈ yonˍ gʼa jaˇ ve leh beˬ ve lawˇ ve teˇ ceuˬ le le htaꞈ gʼaˇ tuˬ tehꞈ taˇ dawˇ.—1 Kawˇrenˍhtuˆ 10:12.

Ngaˬ hui te gʼa ve awˬ ceuˬ

14. Awˬ viˉ awˬ nyi hawˉ hkʼaˆ teˇ gʼaˇ aˬ htoꞈ ma gʼa hpuˇ ve le? Chi ve hkʼe leˇ gʼa hpuˇ htaˇ, aˬ htoꞈ ma te ngaˬ hui ve te hkʼaˇ dawˇ hkʼaˇ a yeˇ uiˍ ve le?

¹⁴ A shu yawˇ awˬ to htaꞈ gʼaˇ puiˉ gaˇ ve kʼo, nawˬ hkʼaˬ hkʼe gʼa te tuˬ le? Luiˬciꞈ ve awˬ lawn htaꞈ teˇ geh dawˇ nyi sheˍ. Yawˇ ve kaˇ hkʼawꞈ nawˉ lo teˇ kaˇ ca guˆ la ve yoˬ. Awˬ nu ve teˇ gʼaˇ yaꞈ ve htawˇ, yawˇ htaꞈ yaꞈ tuˬ awˬ hkʼaˇ ca leh deˇ ve yoˬ. Luiˬciꞈ nyi ma gawˬ lehˍ cawˬ gʼa tuˬ Yaˬhoˉvaˬ geh bon lawˬ ve yoˬ. Yawˇ oˇ ve teˇ gʼaˇ kaꞈ nyi ma gawˬ lehˍ cawˬ tuˬ coˇ caˇ leh te piˇ ve yoˬ. Yaꞈ hkʼaˇ, oˇ ve teˇ gʼaˇ caˉ leh deˇ ve yoˬ. Kaˇ guˆ ve hpawˇ caˉ daꞈ ve liꞈ bvuhꞈ aˉ leh Luiˬciꞈ yawˇ kʼoꞈ˗e ve yoˬ. Yaꞈ hkʼaˇ, hawˉ hkʼaˆ oˇ ve teˇ gʼaˇ deˇ chehˇ sheˍ ve yoˬ. Teˇ shinˉ peuˬ hkʼawꞈ nawˉ, Luiˬciꞈ hto toˇ aˉ ve chaw teˇ yehˬ kʼa geh ca kʼawꞈ guiˇ˗e ve yoˬ. Oˇ ve teˇ gʼaˇ awˬ hpawˇ leh, Luiˬciꞈ ve kaˇ htaꞈ ca guˆ la ve awˬ hpawˇ hpehꞈ ve yoˬ! Yawˇ ca guiˇ˗e ve awˬ hpawˇ yaꞈ taw leh te hkʼaˇ dawˇ hkʼaˇ maˇ daꞈ ve htaꞈ lawˬ hkawˉ laˇ ve yoˬ. Luiˬciꞈ ve kaˇ haˆ haˆ gu laˇ tuˬ yoˬ tehꞈ yawˇ kʼoˆ ve yoˬ. Luiˬciꞈ maˍ piˇ ve yawˇ kaꞈ ca na la leh dawˇ cawˇ ve yoˬ. Chi htaꞈ pa taw, kaˇ guˆ ve htawˇ nyi ma gawˬ lehˍ te leh a shu yawˇ awˬ to htaꞈ gʼaˇ puiˉ ve chi a yeˇ uiˍ jaˇ ve tehꞈ yawˇ shiˍ la ve yoˬ. Yawˇ kʼawꞈ deˇ hkʼawꞈ ve kʼo, maˇ daꞈ ve awˬ ceuˬ cawˬ la ve yoˬ hehˉ.—2 Kawˇrenˍhtuˆ 6:3, 4 gʼaw ve.

15, 16. Nawˬ leh yehˬ kʼa hkʼaw ve chaw a shu yawˇ awˬ to htaꞈ gʼaˇ puiˉ tuˬ, Liꞈ hpu hkʼaw hkʼaˬ hkʼe ga laˇ ve le?

¹⁵ Hkriꞈ yaˇ a shu yawˇ awˬ to htaꞈ gʼaˇ puiˉ tuˬ, Liꞈ hpu hkʼaˬ htaˆ kaꞈ gʼa henˇ leh hkʼa dehꞈ gʼa dawˇ nyi ve yoˬ. Gʼuiˬ sha Yawˇsuˆ htaꞈ kʼoˆ piˇ ve, “nawˬ bon lawˬ ve teˇ yanˇ, awˬ liˇ tawˇ hkawˇ bvuhꞈ taˍ ve liꞈ daw htaꞈ hkʼaˬ htaˆ kaꞈ gʼaw tcuhˉ taˍ˗oꞈ. Oˇ ve htaꞈ nawˬ hui teˇ nyi teˇ haˉ le henˇ yuˬ leh, oˇ kaˬ lo bvuhꞈ taˍ ve hkʼe hkʼa dehꞈ na yuˬ leh, a shaꞈ teꞈ chehˇ˗oˆ. Hkʼe te ve kʼo, nawˬ hui uiˍ la maˇ la leh nawˬ hui hkʼa te ve kanˉ teˇ ceuˬ le le uiˍ la daꞈ la tuˬ yoˬ.” (Yawˇsuˆ 1:8) Ngaˬ hui a shu yawˇ awˬ to htaꞈ gʼaˇ puiˉ tuˬ, Liꞈ hpu henˇ ve hkʼaˬ hkʼe ga laˇ ve le?

¹⁶ Ngaˬ hui a shu yawˇ awˬ to htaꞈ gʼaˇ puiˉ ve kʼo, awˬ bon hkʼaˬ hkʼe cawˬ ve le, a shu yawˇ awˬ to htaꞈ maˇ gʼaˇ puiˉ ve kʼo, hkʼaˬ hkʼe gʼa hpuˇ ve le, Liꞈ hpu hkʼaw kʼoˆ maˍ laˇ taˍ ve yoˬ. Yaˬhoˉvaˬ awˬ lawn chi ve ngaˬ hui htaꞈ bvuhꞈ laˇ gaˇ ve yoˬ. (Roˉmaꞈ 15:4) Liꞈ hpu gʼaw ve, henˇ ve, hkʼa dehꞈ dawˇ nyi ve chi a yeˇ uiˍ jaˇ ve yoˬ. Yaˬhoˉvaˬ ve tawˇ hkawˇ htaꞈ gʼaꞈ te tuˬ, yawˇ ga laˇ tuˬ kaꞈ lawˬ sheˍ. Nawˬ a shu yawˇ awˬ to htaꞈ maˇ gʼaˇ puiˉ ve kʼo, gʼa haꞈ yuˬ ve yoˬ. Peuˬ hkʼawꞈ nawˉ, bon lawˬ leh a shu yawˇ awˬ to htaꞈ daꞈ la tuˬ coˇ caˇ sheˍ. (Yaˍkoˆ 1:5) Ngaˬ hui ve liꞈ kʼoˆ hkʼaw daꞈ ve beˆ maˍ laˇ hkawˇ, aˬ htoꞈ ma cawˬ ve hkʼa dehꞈ ca hpfuhˆ nyi sheˍ.

17. Yaˇ a shu yawˇ awˬ to htaꞈ gʼaˇ puiˉ ve awˬ pa awˬ e hkʼaˬ hkʼe te ga piˇ gʼa tuˬ le?

¹⁷ Yaˇ a shu yawˇ awˬ to htaꞈ gʼaˇ puiˉ ve nawˬ hkʼaˬ hkʼe ga piˇ gʼa tuˬ le? Yaˇ tanˬ paw la htaˇ, a shu yawˇ awˬ to htaꞈ maˇ gʼaˇ puiˉ ve awˬ pa awˬ e shiˍ ve yoˬ. Hkʼe te leh, yaˇ htaꞈ maˍ gʼa tuˬ awˬ pa awˬ e daꞈ ve gʼa te maˍ piˇ ve yoˬ. (Eˇfeˇsuꞈ 6:4) Yaˇ a shu yawˇ awˬ to htaꞈ hkʼa dehꞈ maˇ gʼaˇ puiˉ ve kʼo, awˬ pa aw e daꞈ ve henˇ yuˬ tuˬ hpehꞈ chehˇ ve laˇ, awˉ lawˉ chaˬ nyi cawˇ ve yoˬ. Chi hkʼe te gʼa tuˬ, hto toˇ˗e ve, hpawnˬ daꞈ˗e ve, yehˬ kʼa hkʼaw oˉ kʼoˍ pui ve hkʼaˬ htaˆ kaꞈ te cawˇ ve yoˬ. Yaˇ te gaˇ ve teˇ ceuˬ ceuˬ ngaˬ hui maˇ te tcuh cawˇ ve yoˬ. Yaˬhoˉvaˬ kaꞈ Aˍdanˍ Eˇvaꞈ htaꞈ oˇ ve hkʼa shuˍ te piˇ ve yoˬ. Ngaˬ hui teˇ ceuˬ ceuˬ maˇ te tcuh htaˇ, Yaˬhoˉvaˬ ve kanˇ paˆ htaꞈ yaˇ henˇ gʼa ve yoˬ. Awˬ pa awˬ e yaˇ htaꞈ jawꞈ maˍ piˇ leh daꞈ ve henˇ yuˬ tuˬ te htaˇ, yaˇ a shu yawˇ awˬ to htaꞈ gʼaˇ puiˉ ve henˇ gʼa tuˬ yoˬ. Gʼuiˬ sha ve kanˇ paˆ htaꞈ haꞈ leh yawˇ ve awˬ liˇ awˬ hkʼaˇ htaꞈ yawˆ yan ve chi yaˇ awˬ pon a yeˇ uiˍ jaˇ ve yoˬ.—Tawˇ naˉ ve 1:5, 7, 8 gʼaw ve.

18. Aˬ htoꞈ ma pa taw, ngaˬ hui daꞈ ve awˬ chawˇ hkʼa dehꞈ gʼa leuˆ yuˬ cawˇ ve le?

¹⁸ Teˇ gʼaˇ le le awˬ chawˇ hkʼa dehꞈ gʼa leuˆ ve yoˬ. Yawˇ hui Yaˬhoˉvaˬ htaꞈ haꞈ ve kʼo, ngaˬ hui dawˇ teh taˍ ve htaꞈ te leh shoꞈ shaꞈ ve awˬ lawn htaꞈ jaw kʼai tuˬ, ga laˇ gʼa tuˬ yoˬ. (Tawˇ naˉ ve 13:20) Yawˇ hui a shu yawˇ awˬ to htaꞈ gʼaˇ puiˉ ve ngaˬ hui kaꞈ henˇ yuˬ gʼa tuˬ yoˬ. Ngaˬ hui ve te hkʼaˇ dawˇ hkʼaˇ daꞈ ve yawˇ hui htaꞈ awˬ gʼaˇ piˇ gʼa ve yoˬ. Ngaˬ hui a shu yawˇ awˬ to htaꞈ gʼaˇ puiˉ ve kʼo, Gʼuiˬ sha nyi hkʼaˇ suh tuˬ yoˬ. Ngaˬ hui haꞈ ve chaw geh daꞈ ve a shaꞈ cawˬ tuˬ yoˬ.