“Maˍ piˇ taˍ ve teˇ hpaˍ htaꞈ na yuˬ leh cuˇ yiˍ cawˬ la piˇ˗oˆ”

1. Ngaˬ hui cuˇ yiˍ hkʼaˬ hkʼe te ca gʼa tuˬ le? Chi ve ngaˬ hui htaꞈ hkʼaˬ hkʼe ga laˇ tuˬ le?

Cuˇ yiˍ lehˬ Gʼuiˬ sha geh laˬ leh yawˇ shu htaꞈ pehˬ piˇ ve yoˬ. Yaˍkoˆ liꞈ 1:5 hkʼaw kʼoˆ taˍ ve, “nawˬ hui awˬ hkʼaw lo teˇ gʼaˇ gʼaˇ cuˇ yiˍ maˇ biˇ ve kʼo, Gʼuiˬ sha geh lawˬ˗oꞈ. Gʼuiˬ sha lehˬ, maˇ deˇ leh chaw hkʼa peu˗eˬ htaꞈ maˇ chaweh hkʼe leˇ piˇ” ve yoˬ. Ngaˬ hui Gʼuiˬ sha maˍ laˇ ve htaꞈ haꞈ yuˬ ve kʼo, ngaˬ hui cuˇ yiˍ cawˬ ve yoˬ. Ngaˬ hui maˇ te yaꞈ leh Gʼuiˬ sha geh hkʼaˬ htaˆ kaꞈ meuˆ daꞈ tuˬ, chi ve ngaˬ hui htaꞈ ga laˇ ve yoˬ. (Tawˇ naˉ ve 2:10-12) Ngaˬ hui co co taiˍ taiˍ ve a shaꞈ dawˇ law kuiˬ cawˬ gʼa ve yoˬ.—Yuˇdaꞈ 21.

2. Ngaˬ hui Gʼuiˬ sha maˍ laˇ ve htaꞈ hkʼaˬ hkʼe te haꞈ gʼa tuˬ le?

² Ngaˬ hui maˇ biˇ ve leh awˬ pa awˬ e teˇ gʼaˇ leh teˇ gʼaˇ yaˇ hu ve awˬ hkʼaˇ maˇ shuˍ daꞈ ve pa taw, teˇ pawˆ pawˆ kʼo maˍ laˇ ve htaꞈ haꞈ yuˬ leh daꞈ ve awˬ ceuˬ hpehꞈ ve tehꞈ shawˍ ve maˇ sha. Gʼuiˬ sha maˍ laˇ ve ngaˬ hui awˬ bon gʼa htaˇ, yawˇ ngaˬ hui htaꞈ hkʼaˬ hkʼe taw haꞈ ve shiˍ ve yoˬ. Tawˇ naˉ ve liꞈ 3:11, 12 hkʼaw kʼoˆ ve, “yaˇ paˍ˗oˬ, Gʼuiˬ sha nawˬ htaꞈ deˇ maˍ laˇ ve teˇ yanˇ, nawˬ htaꞈ shaˍ tiꞈ piˇ laˇ ve tawˇ hkʼe shawˍ leh hkʼa dehꞈ na yuˬ˗oꞈ. . . . Gʼuiˬ sha lehˬ yawˇ haꞈ ve chaw hui htaꞈ deˇ maˍ piˇ ve yoˬ.” Yaˬhoˉvaˬ ngaˬ hui htaꞈ daꞈ jaˇ ve awˬ ceuˬ gʼa tcuh gaˇ ve tehꞈ yonˍ gʼa ve yoˬ. (Heˍbrehˇ 12:5-11 gʼaw ve.) Gʼuiˬ sha ngaˬ hui htaꞈ hkʼa dehꞈ shiˍ ve pa taw, ngaˬ hui loˍ ve awˬ ceuˬ yawˇ maˍ laˇ leh cawˇ ve awˬ hkʼaˇ htaꞈ yawˇ yehˇ ve yoˬ. Awˬ lawn chi ve hkʼaw maˍ laˇ ve htaꞈ caˉ daꞈ ve 4 ceuˬ teˇ geh henˇ tuˬ yoˬ. (1) A shu yawˇ awˬ to htaꞈ maˍ laˇ ve (2) awˬ pa awˬ e yaˇ htaꞈ maˍ piˇ cawˇ ve awˬ hkʼaˇ (3) Hkriꞈ yaˇ awˬ moˍ hkʼaw laˬ ve maˍ laˇ ve (4) maˍ laˇ ve geh laˬ ve naˬ ve aꞈ kehˉ nyi ma naˬ jaˇ ve awˬ ceuˬ chi teˇ hpaˍ yoˬ.

Aˬ htoꞈ ma te ngaˬ hui a shu yawˇ awˬ to htaꞈ maˍ piˇ cawˇ ve le?

3. Yaˇ teˇ hpaˍ a shu yawˇ awˬ to htaꞈ hkʼaˬ hkʼe te maˍ gʼa tuˬ le? Tawˇ pa haˉ kʼoˆ maˍ laˇ sheˍ.

³ Ngaˬ hui a shu yawˇ awˬ to htaꞈ maˍ piˇ ve kʼo, ngaˬ hui dawˇ ve te ve htaꞈ yuˬ tiˍ gʼaˇ tuˬ yoˬ. Ngaˬ hui paw laˇ htaˇ kaꞈ chi hkʼe hpehꞈ ve maˇ heˆ ve pa taw, awˬ ceuˬ chi ve gʼa henˇ ve yoˬ. Tawˇ pa haˉ te kʼo, yaˇ ehˉ sho kuˇ gʼaꞈ jawˬ htaˇ, awˬ pa awˬ e sho kuˇ htaꞈ gʼa yuˬ tiˍ piˇ ve yoˬ. Yaꞈ hkʼaˇ, maˇ maw hkʼawꞈ nawˉ yaˇ ehˉ gʼaꞈ ve awˬ hkʼaˇ shiˍ la leh awˬ pa awˬ e kaꞈ teˇ hkui teˇ yanˇ hpehˇ piˇ gʼa ve yoˬ. Awˬ pa awˬ e yaˇ gʼaꞈ gʼa˗oˬ ve tehꞈ shiˍ htaˇ, sho kuˇ htaꞈ maˇ kʼawꞈ yuˬ tiˍ˗o ve yoˬ. Chi hkʼa shuˍ shuˍ, ‘Yaˬhoˉvaˬ maˍ laˇ ve hkʼe’ awˬ pa awˬ e yeunˇ hkanˍ leh yaˇ htaꞈ maˍ piˇ ve kʼo, yaˇ a shu yawˇ awˬ to htaꞈ maˍ gʼa leh cuˇ yiˍ cawˬ tuˬ, awˬ pa awˬ e yaˇ htaꞈ ga piˇ chehˇ ve yoˬ.—Eˇfeˇsuꞈ 6:4.

4, 5. (a) “Dawˇ hkʼaˇ awˬ suhˉ” cawˬ tuˬ, aˬ htoꞈ ma te a shu yawˇ awˬ to htaꞈ maˍ ve a yeˇ uiˍ ve le? (b) Ngaˬ hui te yaꞈ htaˇ, aˬ htoꞈ ma te nyi ma maˇ gʼa nuˇ cawˇ ve le?

⁴ Uiˍ la˗oˬ htaˇ Yaˬhoˉvaˬ htaꞈ shiˍ daꞈ la ve chaw kaꞈ awˬ lawn chi ve htaꞈ henˇ yuˬ gʼa ve yoˬ. Yawˇ a shu yawˇ awˬ to htaꞈ maˍ gʼa ve htawˇ, co ha hpawˇ kʼo yawˇ chaw mawˇ maˇ hpehꞈ sheˍ. Yaꞈ hkʼaˇ, yawˇ “dawˇ hkʼaˇ awˬ suhˉ” tanˬ cawˬ la leh Yeˍsuˆ htaꞈ henˇ yuˬ ve kʼo, yawˇ kaꞈ chaw mawˇ hpehꞈ la gʼa ve yoˬ. (Eˇfeˇsuꞈ 4:23, 24) Ngaˬ hui “Gʼuiˬ sha htaꞈ maˇ yawˆ maˇ yan ve teˇ ceuˬ leh miˬ guiˬ htaꞈ caˉ daꞈ ve sheˉ lai ve teˇ hpaˍ htaꞈ baˬ taˉ tuˬ” leh “chi teˇ caꞈ naꞈ awˬ hkʼaw lo ngaˬ hui lehˬ, nyi ma taˍ puiˉ ve, hteˇ ve cawˇ ve htaꞈ te puiˉ ve leh Gʼuiˬ sha htaꞈ yawˆ yan puiˉ tuˬ,” a shu yawˇ awˬ to htaꞈ maˍ ve ngaˬ hui htaꞈ ga laˇ ve yoˬ.—Tiˇtuˆ 2:12.

⁵ Yaꞈ hkʼaˇ, teˇ gʼaˇ le le venˇ baˆ yaˇ hpehꞈ ve yoˬ. (Cuˇ yiˍ piˇ ve 7:20) Ngaˬ hui te yaꞈ ve kʼo, ngaˬ hui a shu yawˇ awˬ to htaꞈ maˍ ve maˇ lawꞈ ve maˇ heˆ leh maˇ maˍ piˇ˗o ve tehꞈ kʼoˆ gaˇ ve laˇ? Teˇ pawˆ le le maˇ heˆ. Tawˇ naˉ ve liꞈ 24:16 hkʼaw kʼoˆ ve, “hteˇ ve cawˇ ve chaw lehˬ, hkʼaˬ nyiˇ pawˆ paiˍ ve htawˇ kʼawꞈ tu la ve yoˬ.” Ngaˬ hui teˇ pawˆ “kʼawꞈ tu la” tuˬ, aˬ htoꞈ ma ga laˇ gʼa ve le? Ngaˬ hui ve awˬ gʼaˇ awˬ shaˉ maˇ heˆ. Yaꞈ hkʼaˇ, Gʼuiˬ sha ve awˬ ha hpu ga laˇ gʼa ve yoˬ. (Hpiˇliˇpiˆ 4:13 gʼaw ve.) Awˬ ha hpu ve awˬ shiˍ teˇ ceuˬ lehˬ a shu yawˇ awˬ to htaꞈ gʼaˇ puiˉ ve yoˬ. Chi lehˬ a shu yawˇ awˬ to htaꞈ maˍ ve hkʼa shuˍ yoˬ.

6. Liꞈ hpu henˇ ve chaw daꞈ la tuˬ ngaˬ hui hkʼaˬ hkʼe gʼa te ve le? (Awˬ lawn tanˬ htaˇ ve awˬ han htaꞈ nyi sheˍ.)

⁶ Ngaˬ hui a shu yawˇ awˬ to htaꞈ maˍ gʼa tuˬ, bon lawˬ ve, Liꞈ hpu henˇ ve, leh hkʼa dehꞈ dawˇ nyi ve kaꞈ ngaˬ hui htaꞈ ga laˇ gʼa ve yoˬ. Yaꞈ hkʼaˇ, nawˬ awˬ pon Liꞈ hpu henˇ ve lehˬ haˍ jaˇ ve maˇ heˆ leh maˇ dawˇ cawˇ ve kʼo, nawˬ hkʼaˬ hkʼe te tuˬ le? Awˬ gʼaˇ taˇ nuˇ sheˍ. Nawˬ Yaˬhoˉvaˬ ga laˇ tcuh ve kʼo, yawˇ ve tawˇ hkawˇ “sheˉ lai” ve cawˬ tuˬ yoˬ. (1 Peˍtruˆ 2:2) Nawˬ Liꞈ hpu henˇ ve awˬ yanˇ cawˬ maˇ la tuˬ, Yaˬhoˉvaˬ geh bon lawˬ sheˍ. Awˉ lawˉ htaˇ, nawˬ Liꞈ hpu henˇ ve 2-3 miꞈ niꞈ ceh kaꞈ hpehꞈ ve yoˬ. Liꞈ hpu henˇ ve awˬ meu˗eˇ awˬ meu˗eˇ sha la leh nawˬ dawˇ cawˇ la tuˬ yoˬ. Nawˬ awˬ yanˇ yehˇ leh Yaˬhoˉvaˬ awˬ hpfuhˇ hkʼaˆ ve dawˇ hkʼaˇ htaꞈ hkʼa dehꞈ dawˇ nyi ve kʼo, nawˬ dawˇ cawˇ tuˬ yoˬ.—1 Tiˆmoˉseˍ 4:15.

7. Yaˬhoˉvaˬ ve kanˉ te ve hkʼaw ngaˬ hui dawˇ taˍ ve hkʼe te gʼa tuˬ, a shu yawˇ awˬ to htaꞈ maˍ ve hkʼaˬ hkʼe ga laˇ gʼa ve le?

⁷ Yaˬhoˉvaˬ ve kanˉ te ve hkʼaw ngaˬ hui dawˇ taˍ ve hkʼe te gʼa tuˬ, a shu yawˇ awˬ to htaꞈ maˍ ve ga laˇ gʼa ve yoˬ. Tawˇ pa haˉ te kʼo, awˬ pa teˇ gʼaˇ yawˇ Gʼuiˬ sha kanˉ te ve htaꞈ nyi ma hkʼa dehꞈ maˇ pfuhˇ ve tehꞈ shiˍ ve pa taw, yawˇ hkʼaˬ htaˆ kaꞈ gʼuˇ suhˍ peuˍ ve chaw te tuˬ dawˇ taˍ ve yoˬ. A shu yawˇ awˬ to htaꞈ maˍ ve yawˇ htaꞈ hkʼaˬ hkʼe ga piˇ ve le? Ngaˬ hui ve kanˉ hkʼaˇ liꞈ kʼoˆ hkʼaw gʼuˇ suhˍ peuˍ ve awˬ lawn htaꞈ caˉ daꞈ ve yawˇ gʼaw leh bon lawˬ ve yoˬ. Chi hkʼe te htaˇ, yawˇ Yaˬhoˉvaˬ geh meuˆ daꞈ maˇ laˇ gʼa ve yoˬ. Awˬ yanˇ cawˬ htaˇ, yawˇ teˇ tcuhˉ teˇ yanˇ gʼuˇ suhˍ peuˍ ve te ve yoˬ. Dawˇ taˍ ve hkʼe te tuˬ, teˇ ceuˬ kaꞈ maˇ tawˍ taˍ laˇ tcuh. Peuˬ hkʼawꞈ nawˉ, yawˇ hkʼaˬ htaˆ kaꞈ gʼuˇ suhˍ peuˍ ve te ve yoˬ.

Yaˬhoˉvaˬ maˍ laˇ ve hkʼe nawˬ ve yaˇ htaꞈ maˍ piˇ˗oˆ

8-10. Yaˇ hu ve leh yawˇ hui Yaˬhoˉvaˬ ve kanˉ te tuˬ, awˬ pa awˬ e htaꞈ aˬ htoꞈ ma ga piˇ gʼa ve le? Tawˇ pa haˉ kʼoˆ maˍ laˇ sheˍ.

⁸ ‘Yaˬhoˉvaˬ maˍ laˇ ve hkʼe’ yaˇ htaꞈ maˍ piˇ tuˬ, Yaˬhoˉvaˬ awˬ pa awˬ e htaꞈ awˬ vuiˬ peꞈ laˇ ve yoˬ. (Eˇfeˇsuꞈ 6:4) Chi beuꞈ teˇ co˗e chi hkʼe te ve haˍ jaˇ. (2 Tiˆmoˉseˍ 3:1-5) Yaˇ paw la htaˇ, yawˇ hui cawˇ ve maˇ cawˇ ve htaꞈ maˇ shiˍ leh dawˇ shiˍ puiˉ ve nyi ma htaꞈ kaꞈ maˇ gʼa te jawˬ sheˍ. Dawˇ shiˍ puiˉ ve nyi ma htaꞈ te jawˬ tuˬ, yawˇ hui maˍ piˇ tuˬ loˍ ve yoˬ. (Roˉmaꞈ 2:14, 15) Liꞈ hpu chaˬ nyi ve teˇ gʼaˇ kʼoˆ ve Heˍlaˍsaˆ tawˇ hkawˇ hkʼaw “maˍ laˇ ve” chi kʼoˆ ve lehˬ “yaˇ uiˍ la ve” maˇ heˆ leh yaˇ daꞈ ve chaw mawˇ hpehꞈ la tuˬ awˬ hkʼaˇ maˍ piˇ ve tehꞈ kʼoˆ gaˇ ve yoˬ.

⁹ Awˬ pa awˬ e yaˇ htaꞈ haꞈ pehnˇ ve hkʼaw maˍ piˇ ve kʼo, yaˇ kawˆ tuˬ maˇ cawˬ. Yawˇ maˇ leunˇ cawˇ ve teˇ hpaˍ cawˬ leh yawˇ te ve teˇ ceuˬ le le heuˆ la kuiˬ cawˬ ve tehꞈ yaˇ na gʼa tuˬ yoˬ. Awˬ pa awˬ e Hkriꞈ yaˇ hpehꞈ ve lehˬ yaˇ htaꞈ hu tuˬ, Yaˬhoˉvaˬ geh laˬ ve cuˇ yiˍ yehˇ tuˬ a yeˇ uiˍ jaˇ. Ngaˬ hui ve chehˇ kuiˬ maˇ shuˍ daꞈ ve kʼo, yaˇ hu ve awˬ hkʼaˇ kaꞈ maˇ shuˍ daꞈ. Yaˇ hu ve awˬ hkʼaˇ kaꞈ pa kʼai chehˇ ve yoˬ. Yaꞈ hkʼaˇ, awˬ pa awˬ e Gʼuiˬ sha hkawˇ na ve kʼo, yawˇ hui hkʼaˬ hkʼe te cawˇ ve hkʼa dehꞈ shiˍ leh chaw yaˇ ve dawˇ hkaˇ leh hpehꞈ la jaw ve awˬ lawn htaꞈ gʼaˇ maˇ va.

¹⁰ Noˉaꞈ ve awˬ lawn htaꞈ ngaˬ hui henˇ gʼa ve yoˬ. Yaˬhoˉvaˬ yawˇ htaꞈ haw loꞈ kʼoˍ te kʼoˆ piˇ htaˇ, hkʼaˬ hkʼe te tuˬ naˍ yawˇ maˇ shiˍ. Yawˇ Yaˬhoˉvaˬ htaꞈ gʼaˇ va leh Gʼuiˬ sha kʼoˆ piˇ taˍ ve hkʼa peu˗eˬ htaꞈ “te ve yoˬ.” (Awˬ hkuiˉ puiˍ 6:22) Hkʼaˬ hkʼe hpehꞈ la ve le? Haw loꞈ kʼoˍ yawˇ leh yawˇ ve yehˬ kʼa htaꞈ ponˬ piˇ ve yoˬ! Noˉaꞈ lehˬ daꞈ ve awˬ pa hpehꞈ ve yoˬ. Aˬ htoꞈ ma pa taw le? Yawˇ Gʼuiˬ sha ve cuˇ yiˍ htaꞈ gʼaˇ va ve pa taw yoˬ. Iˉ kaˆ maˇ htonˍ sheˍ htaˇ, miˬ guiˬ yaˇ haiˬ jaˇ ve pa taw, yaˇ htaꞈ maˍ ve maˇ sha. Yaꞈ hkʼaˇ, Noˉaꞈ yaˇ htaꞈ hkʼa dehꞈ maˍ piˇ leh daꞈ ve henˇ yuˬ tuˬ kaꞈ te maˍ piˇ ve yoˬ.—Awˬ hkuiˉ puiˍ 6:5.

11. Yaˇ htaꞈ maˍ tuˬ aˬ htoꞈ ma te awˬ pa awˬ e gʼa coˇ caˇ jaˇ ve le?

¹¹ Nawˬ awˬ pa awˬ e hpehꞈ ve kʼo, nawˬ aˬ htoꞈ ma te gʼa ve le? Yaˬhoˉvaˬ hkawˇ na yuˬ sheˍ. Nawˬ ve yaˇ htaꞈ hu tuˬ yawˇ ga laˇ tcuh sheˍ. Yawˇ ve kanˉ hkʼaˇ leh Liꞈ hpu hkʼaw beˆ maˍ laˇ ve htaꞈ gʼaꞈ te sheˍ. Nawˬ chi hkʼe te ve kʼo, awˬ gʼuˇ suhˍ hpawˇ yaˇ nawˬ htaꞈ awˬ bon uiˍ jaˇ tehꞈ kʼoˆ laˇ tuˬ yoˬ. Awˬ viˉ awˬ nyi hawˉ hkʼaˆ teˇ gʼaˇ kʼoˆ ve, “ngaˬ pa ngaˬ e ngaˬ htaꞈ hu ve awˬ hkʼaˇ htaꞈ pa taw, yawˇ hui htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ. Ngaˬ ve nyi ma hkʼaw gaˬ tuˬ, yawˇ hui te gʼa ve teˇ ceuˬ le le te ve yoˬ.” Yawˇ kʼoˆ ve yawˇ Yaˬhoˉvaˬ geh meuˆ daꞈ tuˬ, awˬ pa awˬ e ga laˇ ve yoˬ. Teˇ pawˆ pawˆ kʼo, yaˇ htaꞈ maˍ piˇ tuˬ awˬ pa awˬ e te gʼa ve teˇ ceuˬ le le te ve htawˇ, yaˇ Yaˬhoˉvaˬ htaꞈ baˬ taˉ ve yoˬ. Yaꞈ hkʼaˇ, awˬ pa awˬ e chi hkʼe te ve kʼo, daꞈ ve dawˇ shiˍ puiˉ ve nyi ma cawˬ gʼa leh teˇ nyi kʼo yaˇ Yaˬhoˉvaˬ geh kʼawꞈ kʼawꞈ la tuˬ yoˬ tehꞈ yawˇ hui dawˇ law gʼa ve yoˬ.

12, 13. (a) Yaˇ htaꞈ tawˆ cheˆ˗oˬ htaˇ, awˬ pa awˬ e Yaˬhoˉvaˬ hkawˇ hkʼaˬ hkʼe te na yuˬ tuˬ le? (b) Yaˬhoˉvaˬ hkawˇ na yuˬ htaˇ, yehˬ kʼa teˇ yehˬ kʼa awˬ bon hkʼaˬ hkʼe gʼa ve le?

¹² Hkriꞈ yaˇ awˬ moˍ hkʼaw yaˇ htaꞈ tawˆ cheˆ˗oˬ htaˇ Gʼuiˬ sha hkawˇ na yuˬ tuˬ haˍ jaˇ tehꞈ, awˬ pa awˬ e teˇ hpaˍ hpaˍ dawˇ ve yoˬ. Awˬ viˉ awˬ nyi yaˇ miˇ teˇ gʼaˇ yawˇ ve yaˇ miˇ htaꞈ tawˆ cheˆ˗oˬ leh aˉ hkʼaw lo tawˆ˗e ve yoˬ. Yawˇ kʼoˆ ve, “ngaˬ hui ve kanˉ hkʼaˇ liꞈ gʼaw htaˇ, ngaˬ yaˇ leh awˬ hawehˍ htaꞈ tawˇ yaw tuˬ awˬ hkʼaˇ ca ve yoˬ.” Yaꞈ hkʼaˇ, yawˇ yaˇ htaꞈ nyi haꞈ shaˉ ve awˬ vuiˬ maˇ kʼawꞈ cawˬ leh Yaˬhoˉvaˬ htaꞈ ka tiꞈ gʼa yeˬ ve tehꞈ yawˇ na gʼa tuˬ, awˬ hpawˇ ga piˇ ve yoˬ.

¹³ Peuˬ hkʼawꞈ nawˉ, yawˇ ve yaˇ miˇ Hkriꞈ yaˇ awˬ moˍ hkʼaw kʼawꞈ kʼawꞈ la gʼa ve yoˬ. Awˬ e kʼoˆ ve, “yawˇ ngaˬ geh hkʼaˬ htaˆ kaꞈ awˬ hkʼeun hkʼaw te laˬ leh liꞈ bvuhꞈ feu laˇ ve yoˬ! Ngaˬ leh ngaˬ hpawˇ Gʼuiˬ sha hkawˇ na yuˬ ve yawˇ shiˍ ve pa taw, yawˇ ngaˬ hui htaꞈ yawˆ yan jaˇ. Ngaˬ hui hkʼaˬ htaˆ kaꞈ meuˆ daꞈ chehˇ ve yoˬ.” Nawˬ ve yaˇ htaꞈ tawˆ cheˆ˗oˬ ve kʼo, nawˬ “nyi ma awˬ tawˬ hkʼa gaˬ Gʼuiˬ sha htaꞈ gʼaˇ va” tuˬ laˇ? ‘Nawˬ ve cuˇ yiˍ htaꞈ a ciˉ kaꞈ gʼaˇ maˇ va’ ve tehꞈ nawˬ hpeuꞈ maw piˇ tuˬ laˇ? (Tawˇ naˉ ve 3:5, 6) Yaˬhoˉvaˬ cuˇ yiˍ cawˬ leh ngaˬ hui htaꞈ haꞈ ve yawˇ maˍ laˇ ve awˬ ceuˬ hpeuꞈ maw laˇ ve tehꞈ taˇ leunˇ. Chaw yaˇ teˇ gʼaˇ le le awˬ pon, yawˇ ve yaˇ paˍ peꞈ laˇ ve yoˬ. Chi kʼoˆ gaˇ ve lehˬ nawˬ yaˇ htaꞈ kaꞈ piˇ ve yoˬ. Gʼuiˬ sha teˇ gʼaˇ le le htaꞈ co co taiˍ taiˍ teꞈ chehˇ tcuh gaˇ ve yoˬ. (2 Peˍtruˆ 3:9 gʼaw ve.) Awˬ pa awˬ e teˇ hpaˍ˗oˬ na yuˬ tuˬ haˍ jaˇ ve htawˇ, Yaˬhoˉvaˬ maˍ laˇ leh beˆ maˍ laˇ ve cawˇ ve tehꞈ hkʼaˬ htaˆ kaꞈ yonˍ sheˍ. Gʼuiˬ sha maˍ laˇ ve htaꞈ na leh taˇ tawˍ taˍ tcuh.

Hkriꞈ yaˇ awˬ moˍ hkʼaw

14. Gʼuiˬ sha geh laˬ ve beˆ maˍ laˇ hkawˇ ‘ka tiꞈ yeˬ ve awˬ ceˬ’ peꞈ laˇ ve awˬ bon hkʼaˬ hkʼe cawˬ ve le?

¹⁴ Hkriꞈ yaˇ awˬ moˍ hkʼaw nyi haꞈ shaˉ leh maˍ piˇ tuˬ, Yaˬhoˉvaˬ ka tiꞈ te taˍ ve yoˬ. Yawˇ awˬ hkʼaˇ laiˉ hkʼaˇ yehˇ ve yoˬ. Tawˇ pa haˉ te kʼo, ngaˬ hui ka tiꞈ yeˬ gʼa tuˬ Yeˍsuˆ ‘ka tiꞈ yeˬ ve awˬ ceˬ’ htaꞈ leuˆ yuˬ leh co ha hpawˇ ve caˇ tuˬ pehˬ piˇ tcuh ve yoˬ. (Luˉkaꞈ 12:42) “Awˬ ceˬ” ngaˬ hui htaꞈ maˍ laˇ leh awˬ hpfuhˇ hkʼaˆ ve beˆ maˍ laˇ hkawˇ peꞈ laˇ ve yoˬ. Bon maˍ hkawˇ maˇ heˆ leh ngaˬ hui ve liꞈ kʼoˆ nawˬ ve te hkʼaˇ dawˇ hkʼaˇ pa tuˬ ga laˇ jaw˗aw laˇ? Nawˬ awˬ to htaꞈ pa ve kʼo, ha lehˬ gʼa ve yoˬ. Awˬ lawn kʼo, nawˬ htaꞈ Yaˬhoˉvaˬ maˍ laˇ tcuh ve yoˬ.—Tawˇ naˉ ve 2:1-5.

15, 16. (a) Nyi haꞈ shaˉ paˍ te ve kanˉ htaꞈ pa taw, ngaˬ hui aˬ htoꞈ ma awˬ bon gʼa ve le? (b) Yawˇ hui ve kanˉ te sha tuˬ, ngaˬ hui aˬ htoꞈ ma te gʼa ve le?

¹⁵ Hkriꞈ yaˇ awˬ moˍ hkʼaw haꞈ pehnˇ ve hkʼaw nyi haꞈ shaˉ tuˬ, Yeˍsuˆ nyi haꞈ shaˉ paˍ peꞈ laˇ ve yoˬ. Liꞈ hpu hkʼaw kʼoˆ ve awˬ viˉ awˬ nyi chi teˇ hpaˍ “laꞈ shawnˍ” htaꞈ shuˍ ve yoˬ. (Eˇfeˇsuꞈ 4:8, 11-13) Ngaˬ hui aˬ htoꞈ ma awˬ bon gʼa ve le? Yawˇ hui yonˍ ve leh daꞈ ve henˇ yuˬ tuˬ htaꞈ henˇ yuˬ gʼa ve yoˬ. Yawˇ hui Liꞈ hpu htaꞈ cuˇ leh maˍ laˇ htaˇ, ngaˬ hui gʼaꞈ te gʼa ve yoˬ. (Heˍbrehˇ 13:7, 17 gʼaw ve.) Nyi haꞈ shaˉ paˍ ngaˬ hui htaꞈ haꞈ leh Gʼuiˬ sha geh meuˆ daꞈ tcuh gaˇ ve yoˬ. Ngaˬ hui hpawnˬ daꞈ kuiˬ lo hkʼa dehꞈ maˇ kʼai leh Gʼuiˬ sha kanˉ te tuˬ nyi ma maˇ pfuhˇ ve tehꞈ yawˇ hui mawˬ ve kʼo, yawˇ hui ngaˬ hui htaꞈ haˆ ga laˇ tuˬ yoˬ. Yawˇ hui ngaˬ hui yaw ve hkawˇ na leh Liꞈ hpu hkʼaw ve cuˇ yiˍ beˆ maˍ laˇ leh awˬ gʼaˇ peꞈ laˇ tuˬ yoˬ. Yawˇ hui ga laˇ tuˬ ve lehˬ Yaˬhoˉvaˬ haꞈ pehnˇ ve shaˉ hkiˆ hpehꞈ ve tehꞈ nawˬ shawˍ ve laˇ?

¹⁶ Nyi haꞈ shaˉ paˍ ngaˬ hui htaꞈ maˍ laˇ htaˇ maˇ sha ve tehꞈ taˇ leunˇ. Jawˇmawˇ Daˍviˆ venˇ baˆ uiˍ jaˇ ve htaꞈ te leh shu maˇ gʼa shiˍ tuˬ faˉ taˍ ve yoˬ. Tcuh kaˍ paˍ Naˍtanˍ yawˇ htaꞈ tawˇ ca yaw daꞈ˗e htaˇ, nawˬ dawˇ kʼo yawˇ hkʼaˬ hkʼe dawˇ ve le? (2 Saˍmo˗eˍlaˆ 12:1-14) Tcuh yaˇ Peˍtruˆ Yuˇdaꞈ chaw maˇ hpehꞈ ve Hkriꞈ yaˇ aꞈ kehˉ Yuˇdaꞈ chaw hpehꞈ ve Hkriꞈ yaˇ htaꞈ daꞈ ve te piˇ jaw ve yoˬ. Tcuh yaˇ Pawˇluꞈ yawˇ htaꞈ beˆ maˍ piˇ htaˇ, nawˬ dawˇ kʼo yawˇ hkʼaˬ hkʼe dawˇ ve le? Pawˇluꞈ haꞈ hanˉ ve gʼa cawˬ ve yoˬ. (Gaˍlaˍtiˆ 2:11-14) Nyi haꞈ shaˉ paˍ maˍ laˇ sha tuˬ, ngaˬ hui aˬ htoꞈ ma te gʼa ve le? Nyi ma nuˇ nehˬ leh yawˇ hui ga laˇ tuˬ awˬ bon cawˬ ve tehꞈ shawˍ leh tawˇ yaw daꞈ sha ve chaw hpehꞈ sheˍ. Yawˇ hui ga laˇ tuˬ ve lehˬ Yaˬhoˉvaˬ haꞈ pehnˇ ve shaˉ hkiˆ hpehꞈ ve tehꞈ shawˍ sheˍ. Nawˬ awˬ bon gʼa leh nyi haꞈ shaˉ paˍ kaꞈ ha lehˬ ve yoˬ.

17. Nyi haꞈ shaˉ paˍ awˬ viˉ awˬ nyi yaˇ miˇ teˇ gʼaˇ htaꞈ hkʼaˬ hkʼe ga piˇ ve le?

¹⁷ Awˬ viˉ awˬ nyi yaˇ miˇ teˇ gʼaˇ kʼoˆ ve, yawˇ gʼa hpuˇ jaw ve htaꞈ pa taw, Yaˬhoˉvaˬ htaꞈ haꞈ tuˬ haˍ jaˇ. Yawˇ nyi ma luˬ jaˇ. Yawˇ kʼoˆ ve, “ngaˬ nyi haꞈ shaˉ paˍ geh tawˇ ca yaw daꞈ˗e cawˇ ve ngaˬ shiˍ ve yoˬ. Yawˇ hui ngaˬ htaꞈ maˇ deˇ leh maˇ dawˇ cheˆ. Yaꞈ hkʼaˇ, ngaˬ htaꞈ awˬ gʼaˇ peꞈ laˇ ve yoˬ. Hpawnˬ daꞈ ve teˇ pawˆ le le peuˬ hkʼawꞈ nawˉ, yawˇ hui kanˉ cawˬ maˇ jaˇ ve htawˇ, teˇ gʼaˇ laˬ leh ngaˬ hkʼaˬ hkʼe kʼai le tehꞈ na nyi laˇ ve yoˬ. Ngaˬ gʼa hpuˇ jaw ve htaꞈ pa taw, Gʼuiˬ sha haꞈ pehnˇ ve ngaˬ maˇ gʼa keunˍ tehꞈ dawˇ ve yoˬ. Yaꞈ hkʼaˇ, Yaˬhoˉvaˬ ngaˬ htaꞈ haꞈ ve tehꞈ kʼoˆ laˇ tuˬ, yawˇ Hkriꞈ yaˇ awˬ moˍ leh nyi haꞈ shaˉ paˍ htaꞈ cuˇ ve yoˬ. Ngaˬ yawˇ htaꞈ maˇ chiˇ baˬ tehꞈ bon lawˬ ve yoˬ.”

Maˍ laˇ ve geh laˬ ve naˬ ve aꞈ kehˉ nyi ma naˬ jaˇ ve

18, 19. Maˍ laˇ ve geh laˬ ve naˬ ve aꞈ kehˉ nyi ma naˬ jaˇ ve aˬ htoꞈ ma le? Tawˇ pa haˉ kʼoˆ maˍ laˇ sheˍ.

¹⁸ Maˍ laˇ ve lehˬ nyi ma naˬ tuˬ te laˇ ve yoˬ. Yaꞈ hkʼaˇ, Gʼuiˬ sha maˍ laˇ ve htaꞈ maˇ ha yuˬ ve kʼo, kʼawꞈ naˬ jaˇ tuˬ yoˬ. (Heˍbrehˇ 12:11) Kaˍiˉnaˆ leh jawˇ mawˇ Zeˍdaˍkiˆ maˇ daꞈ ve henˇ yuˬ tuˬ lehˬ ngaˬ hui htaꞈ ga laˇ ve yoˬ. Kaˍiˉnaˆ awˬ nyi paˍ htaꞈ nyi bawˬ leh tiˇ pehˍ gaˇ ve tehꞈ Gʼuiˬ sha shiˍ htaˇ, yawˇ Kaˍiˉnaˆ htaꞈ shaˍ tiꞈ piˇ ve, “aˬ htoꞈ ma pa taw nawˬ nyi ma zuhˆ chehˇ ve le? Nawˬ cawˇ ve daꞈ ve kanˉ htaꞈ te ve kʼo, nawˬ htawˇ gʼa ha lehˬ tuˬ yoˬ. Nawˬ chaꞈ chiˆ ve kanˉ htaꞈ te ve pa taw, venˇ baˆ lehˬ nawˬ htaꞈ te luˬ tuˬ nawˬ ve yehˬ miˉ hpeꞈ lo gaˬ la peuˬ. Yaꞈ hkʼaˇ, yawˇ nawˬ htaꞈ taˇ gʼaˇ piˇ lawˬ.” (Awˬ hkuiˉ puiˍ 4:6, 7) Kaˍiˉnaˆ Yaˬhoˉvaˬ maˍ piˇ ve htaꞈ maˇ haꞈ yuˬ. Yawˇ awˬ nyi paˍ htaꞈ tiˇ pehˍ leh yawˇ teꞈ chehˇ ve teˇ co˗e heuˆ la kuiˬ cawˬ ve htaꞈ gʼa hkanˍ ve yoˬ. (Awˬ hkuiˉ puiˍ 4:11, 12) Kaˍiˉnaˆ Gʼuiˬ sha hkawˇ na yuˬ ve kʼo, yawˇ nyi ma chi taw taw naˬ tuˬ maˇ loˍ.

¹⁹ Jawˇmawˇ Zeˍdaˍkiˆ haiˬ jaˇ leh haꞈ hanˉ ve maˇ cawˬ. Yawˇ uˉ peunˍ ve Yeˍruˆsaˍlehnˍ venˇ lo chehˇ ve chaw teꞈ chehˇ ve haˍ jaˇ. Yawˇ gʼa pa cawˇ ve tehꞈ tcuh kaˍ paˍ Yeˍraˍmiˆ laiˉ pawˆ yawˇ htaꞈ shaˍ tiꞈ piˇ ve yoˬ. Yaꞈ hkʼaˇ, jawˇ mawˇ chi teˇ gʼaˇ Yaˬhoˉvaˬ maˍ piˇ ve htaꞈ maˇ haꞈ yuˬ ve pa taw, naˬ jaˇ ve htaꞈ gʼa hkanˍ ve yoˬ. (Yeˍraˍmiˆ 52:8-11) Maˇ loˍ ve awˬ ceuˬ naˬ ve chi hkʼe ve htaꞈ Yaˬhoˉvaˬ ngaˬ hui htaꞈ maˇ hpuˇ tcuh gaˇ!—Iˉsaˍyaˆ 48:17, 18 gʼaw ve.

20. Gʼuiˬ sha maˍ laˇ ve htaꞈ haꞈ yuˬ ve chaw leh maˇ haꞈ yuˬ ve chaw hkʼaˬ hkʼe hpehꞈ ve le?

²⁰ Chi beuꞈ teˇ co˗e, miˬ guiˬ chi hkʼoˆ lo maˇ˗awˍ ve chaw Gʼuiˬ sha maˍ laˇ ve htaꞈ kʼoˆ guiˇ gʼuiˬ guiˇ leh a yeˇ maˇ te. Maˇ maw kʼo, Gʼuiˬ sha maˍ laˇ ve htaꞈ maˇ haꞈ yuˬ ve chaw teˇ gʼaˇ le le nyi ma luˬ lawꞈ lawꞈ ve heuˆ la kuiˬ htaꞈ gʼa hkanˍ tuˬ yoˬ. (Tawˇ naˉ ve 1:24-31) Ngaˬ hui “maˍ piˇ taˍ ve teˇ hpaˍ htaꞈ na yuˬ leh cuˇ yiˍ cawˬ la” cawˇ ve yoˬ. Tawˇ naˉ ve liꞈ 4:13 hkʼaw kʼoˆ taˍ ve hkʼa shuˍ, “nawˬ hkʼa henˇ gʼa taˍ peuˬ ve teˇ hpaˍ htaꞈ hkʼaˬ htaˆ kaꞈ dawˇ nawˇ taˍ˗oꞈ. Nawˬ ve cuˇ yiˍ lehˬ, nawˬ ve a shaꞈ hpehꞈ ve yoˬ. Oˇ ve htaꞈ hkʼa dehꞈ haꞈ shaˉ taˍ˗oꞈ.”