Yaˇ nehˬ teˇ hpaˍ˗oˬ, nawˬ hkʼaˬ htaˆ kaꞈ co ha hpawˇ dawˇ nyi chehˇ˗aw laˇ?

1-3. (a) Yaˇ nehˬ awˬ tcuhˉ awˬ yanˇ hkʼaˬ hkʼe ve htaꞈ chehˇ taˍ ve le, leh awˬ lawn chi aˬ htoꞈ ma htaꞈ tehˆ daꞈ gʼa ve le? (Awˬ lawn tanˬ htaˇ ve awˬ han htaꞈ nyi sheˍ.) (b) Hkriꞈ yaˇ yaˇ nehˬ chi hkʼe ve htaꞈ gʼa hpuˇ htaˇ, yawˇ hui htaꞈ aˬ htoꞈ ma ga piˇ gʼa ve le?

Vuiˇ jaˇ ve teˇ kaˬ lo a yeˇ uiˍ ve kanˉ te tuˬ nawˬ dawˇ teh taˍ ve htaꞈ dawˇ nyi sheˍ. Oˇ kaˬ lo kʼai tuˬ chaw gʼawˬ caˇ ve kaˇ htaꞈ nawˬ gʼa ciˇ kʼai ve yoˬ. Kaˇ jehˇ kuiˬ lo gaˬ la htaˇ chaw maˇ jaˇ leh kaˇ laiˉ kaˇ cawˬ ve pa taw, nawˬ htawˇ dawˇ nawˬ dawˇ cawˬ ve yoˬ. Yaꞈ hkʼaˇ, nawˬ hkʼaˬ kaˬ lo kʼai tuˬ leh kaˇ hkʼaˬ ve teˇ kaˇ htaꞈ ciˇ tuˬ shiˍ ve pa taw ha lehˬ ve yoˬ. Awˬ nu ve kaˇ htaꞈ ciˇ ve kʼo, maˇ cawˇ ve yaꞈ kʼaw htaꞈ shiˍ kʼai laˇ ve nawˬ shiˍ ve pa taw maˇ ciˇ.

² Chaw gʼawˬ caˇ ve kaˇ jehˇ kuiˬ lo ve chaw hkʼa shuˍ, chaw haˉ yaˇ miˇ haˉ ve a shaꞈ teꞈ hkʼaˇ lehˬ teˇ kaˬ lo kʼai chehˇ ve htaꞈ shuˍ ve yoˬ. Teˇ pawˆ pawˆ a shaꞈ teꞈ hkʼaˇ hkʼaw leuˆ yuˬ tuˬ ve laiˉ hkʼaˇ cawˬ ve pa taw, nawˬ htawˇ dawˇ nawˬ dawˇ cawˬ ve yoˬ. Nawˬ hkʼaˬ kaˬ lo kʼai gaˇ ve awˬ tehˬ shiˍ ve kʼo, dawˇ cheˆ tuˬ maˇ haˍ. Yaꞈ kʼaw hkʼaˬ ve htaꞈ nawˬ kʼai cawˇ ve le?

³ Na hkawˇ chi awˬ lawn chi ve hkʼaw hkʼawꞈ laˇ tuˬ yoˬ. Chi hkʼoˆ kaꞈ Yaˬhoˉvaˬ nyi hkʼaˇ suh ve htaꞈ nawˬ hkʼaˬ htaˆ kaꞈ dawˇ nyi tuˬ, awˬ lawn chi ve hkʼaw awˬ gʼaˇ peꞈ laˇ tuˬ yoˬ. Chi kʼoˆ gaˇ ve lehˬ a shaꞈ teꞈ ve nawˬ gʼa dawˇ cheˆ ve yoˬ. Tawˇ pa haˉ te kʼo, liꞈ henˇ ve, kanˉ te ve, heuˆ daꞈ ve maˇ heˆ leh yaˇ cawˬ ve, Yaˬhoˉvaˬ beˆ maˍ laˇ ve awˬ hkʼaˇ suh nawˬ gʼaꞈ te ve yoˬ. Chi ve lehˬ co ha hpawˇ dawˇ teh taˍ ve htaꞈ gʼaꞈ te tuˬ nawˬ coˇ caˇ ve yoˬ. Nawˬ Yaˬhoˉvaˬ geh meuˆ daꞈ tuˬ dawˇ teh taˍ ve chi ga laˇ gʼa ve yoˬ. Yaˬhoˉvaˬ ve kanˉ te tuˬ nawˬ hkʼaˬ htaˆ kaꞈ dawˇ nyi ve kʼo, yawˇ awˬ bon naꞈ laˇ leh nawˬ te gʼa tuˬ tehꞈ hkʼa dehꞈ yonˍ gʼa ve yoˬ.—Tawˇ naˉ ve 16:3 gʼaw ve.

Aˬ ma te co ha hpawˇ dawˇ teh taˍ cawˇ ve le?

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Co ha hpawˇ dawˇ teh taˍ ve lehˬ daꞈ jaˇ. Aˬ htoꞈ ma pa taw le? 3 tawn htaꞈ teˇ geh chaˬ nyi tuˬ yoˬ. Nawˬ dawˇ teh taˍ ve htaꞈ coˇ caˇ leh te ve kʼo, Yaˬhoˉvaˬ ve daꞈ ve awˬ chawˇ hpehꞈ tuˬ yoˬ. Nawˬ chi htaꞈ na gʼa tuˬ 1 leh 2 tawn hkʼaw ga laˇ tuˬ yoˬ. A shaꞈ i sheˍ ve htawˇ nawˬ dawˇ teh taˍ ve cawˬ tuˬ, chi ve na gʼa tuˬ 3 tawn teˇ tawn hkʼaw ga laˇ tuˬ yoˬ.

5. Ngaˬ hui co ha hpawˇ dawˇ teh taˍ gaˇ ve a yeˇ uiˍ jaˇ ve teˇ ceuˬ aˬ htoꞈ ma le?

⁵ Yaˬhoˉvaˬ ngaˬ hui htaꞈ haꞈ leh te laˇ ve awˬ ceuˬ htaꞈ pa taw, co ha hpawˇ dawˇ teh taˍ gaˇ ve yoˬ. Chi a yeˇ uiˍ jaˇ. Chiˇ mvuh ve liꞈ bvuhꞈ paˍ teˇ gʼaˇ kʼoˆ ve, “[Yaˬhoˉvaˬ] Gʼuiˬ sha˗oˬ, nawˬ ve awˬ meꞈ awˬ hponˇ htaꞈ gʼa chiˇ mvuh ve lehˬ, hkʼaˬ ma daꞈ jaˇ ve le. . . . Nawˬ te taˍ ve kanˉ teˇ hpaˍ lehˬ, ngaˬ htaꞈ ha lehˬ piˇ ve yoˬ. Nawˬ te taˍ ve kanˉ teˇ hpaˍ htaꞈ pa taw, ngaˬ ha lehˬ leh kʼa muiˬ chiˇ mvuh ve yoˬ.” (Chiˇ mvuh ve 92:1, 4) Yaˬhoˉvaˬ peꞈ laˇ ve hkʼa peu˗eˬ htaꞈ dawˇ nyi sheˍ. A shaꞈ, yonˍ ve, Liꞈ hpu, Hkriꞈ yaˇ awˬ moˍ leh Paˍraˍdiˇsuˆ hkʼaw co co taiˍ taiˍ ve a shaꞈ dawˇ law kuiˬ yawˇ peꞈ laˇ ve yoˬ. Nawˬ co ha hpawˇ dawˇ teh taˍ ve cawˬ htaˇ, chi ve teˇ hpaˍ Yaˬhoˉvaˬ htaꞈ awˬ bon uiˍ jaˇ kʼoˆ piˇ gaˇ ve tehꞈ hpeuꞈ maw piˇ ve yoˬ. Nawˬ chi hkʼe te htaˇ yawˇ awˬ paˇ lo meuˆ daꞈ ve yoˬ.

6. (a) Co ha hpawˇ dawˇ teh taˍ ve nawˬ leh Yaˬhoˉvaˬ meuˆ daꞈ ve awˬ bon hkʼaˬ hkʼe cawˬ ve le? (b) Nawˬ yaˇ ehˉ hpehꞈ ve htawˇ, dawˇ teh taˍ gʼa ve aˬ htoꞈ ma cawˬ ve le?

⁶ Ngaˬ hui dawˇ teh taˍ cawˇ ve 2 hkʼaˇ teˇ hkʼaˇ aˬ htoꞈ ma le? Co ha hpawˇ dawˇ teh taˍ ve htaꞈ nawˬ coˇ caˇ leh te ve kʼo, Yaˬhoˉvaˬ awˬ pon daꞈ ve kanˉ htaꞈ te chehˇ ve yoˬ. Chi yawˇ geh meuˆ daꞈ tuˬ te laˇ ve yoˬ. Tcuh yaˇ Pawˇluꞈ ka tiꞈ te taˍ ve, “Gʼuiˬ sha lehˬ maˇ hteˇ maˇ cawˇ ve Gʼuiˬ sha hpehꞈ ve maˇ heˆ. Ponˬ laˬ htaˇ nawˬ hui te taˍ ve kanˉ  . . haꞈ pehnˇ ve chi Gʼuiˬ sha awˬ pon nawˬ hui hpeuꞈ maˍ piˇ ve htaꞈ Gʼuiˬ sha yawˇ leunˇ tuˬ ve maˇ heˆ.” (Heˍbrehˇ 6:10) Co ha hpawˇ dawˇ teh taˍ gʼa tuˬ a shaꞈ i jaˇ ve chaw maˇ cawˬ. Tawˇ pa haˉ te kʼo, Hkiˆsaꞈtinˍ a shaꞈ 10 hkʼawꞈ htaˇ, Shaˉhkiˆhkanˍ ve chaw ka tiꞈ yeˬ ve awˬ lawn hkʼaˬ htaˆ kaꞈ gʼaw tuˬ dawˇ teh taˍ ve yoˬ. Hto˗biˇ a shaꞈ 12 hkʼawꞈ Baˆtiˆsaˬ maˇ haꞈ yuˬ sheˍ htaˇ, Liꞈ hpu hkʼa peu˗eˬ gʼaw tuˬ dawˇ teh taˍ ve yoˬ. Mehˆshinˍ a shaꞈ 11 hkʼaw leh yawˇ ve awˬ nyi ma No˗eˬmiˆ 10 hkʼawꞈ htaˇ, yawˇ hui Baˆtiˆsaˬ haꞈ yuˬ ve yoˬ. Yawˇ hui Beˍteˍlaˆ hkʼaw kanˉ te tuˬ dawˇ teh taˍ ve yoˬ. Dawˇ teh taˍ ve chi htaꞈ hkʼaˬ htaˆ kaꞈ dawˇ nawˇ tuˬ Beˍteˍlaˆ hkʼaw kʼai tuˬ ve liꞈ gʼoꞈ pa htaꞈ nehˉ taˍ ve yoˬ. Hkʼe kʼo nawˬ˗ehˬ? Nawˬ dawˇ teh taˍ ve htaꞈ tawnˇ gʼa tuˬ leh oˇ ve htaꞈ tanˬ te gʼa˗aw laˇ?—Hpiˇliˇpiˆ 1:10, 11 gʼaw ve.

7, 8. (a) Dawˇ teh taˍ ve chi hkʼa sha sha˗ehˬ dawˇ cheˆ gʼa tuˬ hkʼaˬ hkʼe ga laˇ gʼa ve le? (b) Aˬ htoꞈ ma te yaˇ nehˬ teˇ gʼaˇ liꞈ chi mvuh mvuh maˇ henˇ ve le?

⁷ Yaˇ ehˉ htaˇ kaꞈ dawˇ teh taˍ ve lehˬ daꞈ ve yoˬ. Ngaˬ hui shiˍ tuˬ ga laˇ ve teˇ ceuˬ aˬ htoꞈ ma le? Nawˬ yaˇ nehˬ hpehꞈ ve pa taw, laiˉ lawn htaꞈ gʼa dawˇ cheˆ ve yoˬ. Liꞈ henˇ ve, kanˉ te ve, leh awˬ nu ve laiˉ ceuˬ kaꞈ nawˬ gʼa dawˇ cheˆ ve yoˬ. Dawˇ cheˆ ve chi teˇ hpaˍ nawˬ yaꞈ kʼaw kʼai chehˇ htaˇ, yaꞈ kʼaw ceh daꞈ kuiˬ htaꞈ gʼa mawˬ ve hkʼa shuˍ yoˬ. Nawˬ hkʼaˬ kaˬ kʼai tuˬ shiˍ htaˇ, yaꞈ kʼaw hkʼaˬ ve teˇ caˆ htaꞈ kʼai tuˬ dawˇ cheˆ ve maˇ haˍ. Chi hkʼa shuˍ shuˍ, nawˬ dawˇ teh taˍ ve aˬ htoꞈ ma htaꞈ nawˬ shiˍ htaˇ, cuˇ yiˍ cawˬ ve hkʼaw dawˇ cheˆ ve maˇ haˍ. Tawˇ naˉ ve liꞈ 21:5 hkʼaw kʼoˆ ve, “nawˬ hkʼa dehꞈ gu taˍ ve hkʼaw kanˉ te ve kʼo, caˇ leuˉ dawˬ leuˉ hkʼa biˇ cawˬ tuˬ yoˬ.” Nawˬ a shaꞈ i htaˇ kaꞈ awˬ hkʼaˇ gu teh leh daꞈ ve dawˇ teh taˍ ve kʼo, dawˇ teh taˍ ve oˇ ve awˬ tehˬ hpehꞈ gʼa ve yoˬ. Chi Daˍmaˍriˆ yaˇ nehˬ htaˇ, gʼa hpuˇ ve a yeˇ uiˍ ve dawˇ cheˆ ve hkʼa shuˍ hpehꞈ ve yoˬ.

⁸ Daˍmaˍriˆ yawˇ liꞈ henˇ cheuˬ jaˇ ve pa taw, yawˇ liꞈ chi mvuh mvuh henˇ leh mvuhˇ miˬ ve awˬ liˇ awˬ hkʼaˇ awˬ lawn henˇ gaˇ ve kʼo, hpu peuˬ tuˬ maˇ loˍ. Yaꞈ hkʼaˇ, yawˇ hpu gʼawˆ teh kuiˬ lo kanˉ te tuˬ dawˇ cheˆ ve yoˬ. Aˬ htoꞈ ma pa taw le? Yawˇ a shaꞈ i sheˍ htaˇ, gʼuˇ suhˍ peuˍ ve chaw te tuˬ dawˇ teh taˍ ve pa taw yoˬ. Yawˇ kʼoˆ ve, “chi kʼoˆ gaˇ ve lehˬ ngaˬ kanˉ awˬ yanˇ hkʼa biˇ maˇ gʼa te. Liꞈ chi mvuh mvuh oˇ hkʼe henˇ ve kʼo, ngaˬ hpu gʼa maˇ jaˇ tuˬ yoˬ. Yaꞈ hkʼaˇ, ngaˬ kanˉ awˬ yanˇ hkʼa biˇ maˇ te ve ca gʼa tuˬ haˍ jaˇ.” Daˍmaˍriˆ gʼuˇ suhˍ peuˍ ve chaw te ve 20 hkʼaw gaˬ˗oˬ. Yawˇ yaˇ nehˬ htaˇ cawˇ ve hkʼaw dawˇ teh taˍ ve leh, cawˇ ve hkʼaw dawˇ cheˆ ve tehꞈ chi hkʼe dawˇ˗aw laˇ? Yoˬ. Yawˇ kanˉ te chehˇ ve hpu gʼawˆ teh kuiˬ hkʼaw mvuhˇ miˬ awˬ liˇ awˬ hkʼaˇ hpawˇ kanˉ te ve chaw laiˉ gʼaˇ htaꞈ gʼa mawˬ daꞈ ve yoˬ. Yawˇ liꞈ chi mvuh mvuh henˇ ve kʼo, yawˇ hui hkʼa shuˍ kanˉ gʼa te ve yoˬ. Yawˇ kʼoˆ ve laiˉ gʼaˇ yawˇ hui ve kanˉ htaꞈ maˇ ha lehˬ. Gʼuˇ suhˍ peuˍ ve laiˉ hkʼawꞈ yawˇ te laˬ peuˬ ve chi yawˇ ha lehˬ tuˬ te laˇ leh nyi ma luˬ tuˬ maˇ loˍ tehꞈ Daˍmaˍriˆ dawˇ ve yoˬ.

9. Aˬ htoꞈ ma te yaˇ nehˬ htaꞈ nyi hkʼaˇ suh ve le?

⁹ Miˬ guiˬ chi hkʼoˆ lo yaˇ nehˬ laiˉ hinˉ gʼaˇ daꞈ ve htaꞈ te leh shu chiˇ mvuh piˇ ve htaꞈ gʼa keunˍ ve yoˬ. Yaˬhoˉvaˬ geh awˬ chawˇ te ve leh co ha hpawˇ dawˇ teh taˍ ve, yawˇ hui ve a shaꞈ teꞈ kuiˬ hkʼaw a yeˇ uiˍ jaˇ. Yaˇ nehˬ chi teˇ hpaˍ yawˇ hui a shaꞈ teꞈ hkʼaˇ hkʼaw ha lehˬ leh, Yaˬhoˉvaˬ beˆ maˍ piˇ ve htaꞈ henˇ yuˬ leh gʼaꞈ te chehˇ ve yoˬ. Chi kʼoˆ gaˇ ve lehˬ liꞈ henˇ ve, kanˉ te ve, leh yehˬ kʼa hkʼaw ve awˬ lawn yoˬ. Sawˉlaꞈmonˍ kʼoˆ ve, “nawˬ ve nyi ma awˬ tawˬ hkʼa gaˬ Gʼuiˬ sha htaꞈ gʼaˇ va˗o. . . . Nawˬ hkʼa te ve kanˉ teˇ ceuˬ le le awˬ hkʼaw lo Gʼuiˬ sha htaꞈ dawˇ nawˇ˗oˆ. Oˇ hkʼe te ve kʼo, yawˇ nawˬ htaꞈ cawˇ ve yaꞈ kʼaw beˆ maˍ laˇ tuˬ yoˬ.” (Tawˇ naˉ ve 3:5, 6) Yaˇ nehˬ teˇ hpaˍ˗oˬ, Yaˬhoˉvaˬ nawˬ hui htaꞈ haꞈ jaˇ! Yawˇ awˬ pon nawˬ awˬ hpfuhˇ hkʼaˆ jaˇ. Yawˇ haꞈ shaˉ laˇ leh, beˆ maˍ laˇ leh awˬ bon naꞈ laˇ tuˬ yoˬ.

Awˬ nu ve chaw htaꞈ Yaˬhoˉvaˬ ve awˬ lawn kʼoˆ piˇ tuˬ hkʼa dehꞈ gu taˍ ve

10. (a) Aˬ htoꞈ ma te nawˬ hto toˇ ve, ngaˬ hui ve a shaꞈ teꞈ chehˇ kuiˬ hkʼaw a yeˇ uiˍ jaˇ ve le? (b) Ngaˬ hui ve yonˍ hkʼaˇ hkʼa dehꞈ kʼoˆ maˍ piˇ gʼa tuˬ hkʼaˬ hkʼe te cawˇ ve le?

¹⁰ Nawˬ Yaˬhoˉvaˬ nyi hkʼaˇ suh tuˬ hkʼaˬ htaˆ kaꞈ te piˇ gaˇ ve tehꞈ dawˇ ve kʼo, yawˇ ve awˬ lawn shu htaꞈ kʼoˆ piˇ gaˇ tuˬ yoˬ. Yeˍsuˆ kʼoˆ ve, “ha lehˬ ve bon hkawˇ . . . awˉ lawˉ gʼa maˍ piˇ tuˬ yoˬ.” (Maˍkuˆ 13:10) Chi htaꞈ pa taw, hto toˇ ve kanˉ a yeˇ uiˍ jaˇ leh ngaˬ hui awˬ pon kaꞈ a yeˇ uiˍ jaˇ. Nawˬ te jaw ve aꞈ kehˉ kʼawꞈ hto toˇ tuˬ dawˇ teh taˍ gʼa˗aw laˇ? Nawˬ gʼuˇ suhˍ peuˍ ve chaw te gʼa˗aw laˇ? Yaꞈ hkʼaˇ, nawˬ hto toˇ ve htaꞈ hkʼa dehꞈ maˇ dawˇ cawˇ ve kʼo hkʼaˬ hkʼe te tuˬ le? Nawˬ ve yonˍ hkʼaˇ shu htaꞈ hkʼaˬ hkʼe te hkʼa dehꞈ kʼoˆ maˍ piˇ gʼa tuˬ le? Nawˬ htaꞈ ga laˇ gʼa ve 2 hkʼaˇ cawˬ ve yoˬ. Hkʼa dehꞈ gu teh taˍ leh te tcuhˉ taˍ˗oꞈ. Yaˬhoˉvaˬ ve awˬ lawn nawˬ shu htaꞈ kʼoˆ piˇ sheˍ. Awˬ ceuˬ chi ve nawˬ hto toˇ ve ha lehˬ tuˬ te laˇ ve htaꞈ mawˬ htaˇ, anˇ tuˬ yoˬ hehˉ.

11, 12. (a) Yaˬhoˉvaˬ ve awˬ lawn nawˬ shu htaꞈ kʼoˆ piˇ gʼa tuˬ hkʼaˬ hkʼe gu teh taˍ gʼa ve le? (b) Yaˬhoˉvaˬ ve awˬ lawn liꞈ henˇ yehˬ lo shu htaꞈ kʼoˆ piˇ gʼa tuˬ yaˇ nehˬ hawˉ hkʼaˆ teˇ gʼaˇ aˬ htoꞈ ma te ve le?

¹¹ Awˉ lawˉ htaˇ, nawˬ awˬ chawˇ na laˇ tuˬ ve htaꞈ hkʼawꞈ piˇ tuˬ gu ve yoˬ hehˉ. Tawˇ pa haˉ te kʼo, “aˬ htoꞈ ma te nawˬ Gʼuiˬ sha htaꞈ yonˍ ve le?” Na hkawˇ chi htaꞈ hkʼawꞈ piˇ tuˬ ngaˬ hui ve vehˆ saiˉ jw.org hkʼaw ga laˇ tuˬ laiˉ lawn cawˬ ve yoˬ. Oˇ kaˬ lo “Aˬ htoꞈ ma te ngaˬ Gʼuiˬ sha htaꞈ yonˍ ve le?” Meh ve liꞈ cawˬ ve yoˬ. Nawˬ hkʼawꞈ piˇ tuˬ gu ve, oˇ ve hkʼaw beˆ maˍ laˇ taˍ ve htaꞈ gʼaꞈ te cawˇ ve yoˬ. Liꞈ hpu awˬ tawn 3 tawn yehˇ gʼa ve htaꞈ nawˬ mawˬ tuˬ yoˬ. Heˍbrehˇ liꞈ 3:4, Roˉmaꞈ liꞈ 1:20, leh Chiˇ mvuh ve liꞈ 139:14 yoˬ. Awˬ nu ve na hkawˇ hkʼawꞈ piˇ tuˬ awˬ nu ve liꞈ hkʼaw kaꞈ cawˬ ve yoˬ.—1 Peˍtruˆ 3:15 gʼaw ve.

¹² Nawˬ ve awˬ chaw htaꞈ jw.org hkʼaw laiˉ ceuˬ nyi gʼa ve tehꞈ kʼoˆ piˇ sheˍ. Luˉkaꞈ chi hkʼe te jaw ve yoˬ. Liꞈ henˇ kuiˬ bawehˇ hkʼaw laiˉ gʼaˇ bon liˇ htaꞈ kʼoˆ daꞈ ve yoˬ. Liꞈ henˇ kuiˬ ve liꞈ kʼoˆ hkʼaw Yaˬhoˉvaˬ ve Shaˉhkiˆhkanˍ ve chaw ve awˬ lawn maˇ cawˇ ve kʼoˆ taˍ ve htaꞈ Luˉkaꞈ gʼa mawˬ ve yoˬ. Liꞈ henˇ kuiˬ lo awˬ chawˇ teˇ hpaˍ htaꞈ kʼoˆ maˍ piˇ tuˬ Luˉkaꞈ nyi ma pfuhˇ jaˇ ve htawˇ, saˍ laꞈ geh a hkaw˗anˬ awˉ lawˉ lawˬ ve yoˬ. Yawˇ aˬ htoꞈ ma htaꞈ yonˍ ve kʼoˆ maˍ piˇ tuˬ saˍ laꞈ a hkaw˗anˬ piˇ leh yawˇ henˇ chehˇ kuiˬ bawehˇ hkʼaw vehˆ saiˉ hpaw maˍ piˇ ve yoˬ. Oˇ teˇ nyi aˉ hkʼaw lo liꞈ yuˬ te tuˬ awˬ pon Awˬ gʼaˇ maˇ yehˇ kaꞈ tawˇ yaw haˍ ve chaw htaꞈ gʼaˇ hpehꞈ ve VDO saˍ laꞈ liꞈ henˇ yaˇ hkʼa peu˗eˬ htaꞈ nyi tcuh ve yoˬ. Luˉkaꞈ awˬ chawˇ htaꞈ Yaˬhoˉvaˬ ve awˬ lawn gʼa yaw daꞈ ve yawˇ hkʼaˬ hkʼe taw ha lehˬ ve nawˬ dawˇ gʼa˗aw laˇ?

13. Ngaˬ hui shoꞈ shaꞈ ve awˬ lawn cawˬ htaˇ aˬ htoꞈ ma te, te tcuhˉ taˍ cawˇ ve le?

¹³ Nawˬ shoꞈ shaꞈ ve awˬ lawn cawˬ htaˇ awˬ gʼaˇ taˇ nuˇ. Yaꞈ hkʼaˇ, dawˇ teh taˍ ve htaꞈ te gʼa tuˬ hkʼaˬ htaˆ kaꞈ coˇ caˇ sheˍ. (2 Tiˆmoˉseˍ 4:2) Hkeh˗hta˗riˉnaˍ chi hkʼe te ve yoˬ. Yawˇ a shaꞈ 17 hkʼawꞈ htaˇ, kanˉ teˇ geh te chehˇ ve awˬ chawˇ htaꞈ hto maˍ piˇ tuˬ dawˇ teh taˍ ve yoˬ. Kanˉ te kuiˬ awˬ chawˇ teˇ gʼaˇ yawˇ htaꞈ laiˉ pawˆ nyi cha ve yoˬ. Yaꞈ hkʼaˇ, yawˇ dawˇ teh taˍ ve htaꞈ maˇ leunˇ. Yawˇ daꞈ ve htaꞈ te ve awˬ chawˇ teˇ gʼaˇ dawˇ cawˇ ve yoˬ. Awˬ chawˇ chi ve teˇ gʼaˇ Hanˍ meh ve yoˬ. Yawˇ ngaˬ hui liꞈ kʼoˆ tanˬ gʼaw leh, Liꞈ hpu henˇ leh Baˆtiˆsaˬ haꞈ yuˬ ve yoˬ. Hkeh˗hta˗riˉnaˍ teˇ kaˬ lo ca chehˇ˗e ve pa taw maˇ shiˍ ve yoˬ. Chi htaꞈ pa taw 13 hkʼawꞈ peuˬ hkʼawꞈ nawˉ, yawˇ ve yehˬ kʼa geh teˇ geh hpawnˬ daꞈ˗e htaˇ bon maˍ laˇ paˍ oˇ ve lehˬ Hanˍ hpehꞈ ve yawˇ anˇ jaˇ! Kanˉ te kuiˬ hkʼaw awˬ chawˇ htaꞈ hto maˍ piˇ tuˬ yawˇ te tcuhˉ taˍ ve yoˬ. Awˬ ceuˬ chi ve yawˇ ha lehˬ tuˬ te piˇ ve yoˬ.

Nawˬ dawˇ teh taˍ ve htaꞈ taˇ leunˇ

14, 15. (a) Nawˬ yawˇ hui hkʼa shuˍ te tuˬ nyiˉ laˇ ve kʼo, aˬ htoꞈ ma htaꞈ tawnˇ taˍ cawˇ ve le? (b) Nyiˉ laˇ ve htaꞈ gʼa hpuˇ htaˇ, hkʼaˬ htaˆ kaꞈ awˬ gʼaˇ hehnˇ tuˬ nawˬ hkʼaˬ hkʼe gʼa te cawˇ ve le?

¹⁴ Nawˬ dawˇ cheˆ leh hkʼaˬ htaˆ kaꞈ Yaˬhoˉvaˬ nyi hkʼaˇ suh tuˬ dawˇ nyi ve kʼo, co ha hpawˇ dawˇ teh taˍ ve chi nawˬ htaꞈ awˬ gʼaˇ peꞈ laˇ tuˬ yoˬ. Yaꞈ hkʼaˇ yaˇ nehˬ laiˉ gʼaˇ a shaꞈ nawˬ hkʼe taw ve, a shaꞈ teꞈ hkʼaˇ htaꞈ ha lehˬ gaˇ ve yoˬ. Yawˇ hui hkʼe te tuˬ nawˬ htaꞈ jehˬ laˇ ve yoˬ hehˉ. Yaꞈ hkʼaˇ, maˇ maw nawˬ dawˇ teh taˍ ve a yeˇ uiˍ jaˇ ve yawˇ hui htaꞈ gʼa hpeuꞈ maw piˇ ve yoˬ. Shu nawˬ dawˇ teh taˍ ve htaꞈ leunˇ tuˬ taˇ te laˇ tcuh. Awˉ lawˉ htaˇ kʼoˆ peuˬ ve hkʼa shuˍ nawˬ chaw gʼawˬ caˇ ve kaˇ jehˇ kuiˬ lo kʼai htaˇ, kaˇ hkʼaw lo ciˇ taˍ ve chaw nyi˗a kʼo ha lehˬ ve htaꞈ shuˍ ve pa taw, nawˬ kaˇ hkʼaˬ ve teˇ kaˇ htaꞈ ciˇ kaꞈ gʼa ve maˇ heˆ laˇ? Awˬ tehˬ awˬ na oˇ hkʼe maˇ heˆ!

¹⁵ Chi htaꞈ pa taw, yawˇ hui hkʼe te tuˬ nyiˉ laˇ ve htawˇ, nawˬ hkʼaˬ htaˆ kaꞈ awˬ gʼaˇ hehnˇ tuˬ aˬ htoꞈ ma gʼa te cawˇ ve le? Beˬ ve lawˇ ve htaꞈ tawˍ daꞈ gʼaˇ tuˬ nawˬ gʼa jaw hpaw˗e ve yoˬ. (Tawˇ naˉ ve 22:3) Te yaꞈ htaˇ heuˆ la kuiˬ htaꞈ dawˇ nyi sheˍ. (Gaˍlaˍtiˆ 6:7) Nawˬ daꞈ ve beˆ maˍ laˇ hkawˇ htaꞈ loˍ ve tehꞈ nyi ma nuˇ nehˬ ve hkʼaw haꞈ yuˬ sheˍ. Awˬ pa awˬ e leh Hkriꞈ yaˇ awˬ moˍ hkʼaw ve awˬ viˉ awˬ nyi hpehꞈ laˬ jaw ve awˬ lawn cawˬ ve chaw beˆ maˍ laˇ ve htaꞈ na yuˬ sheˍ.—1 Peˍtruˆ 5:5, 6 gʼaw ve.

16. Nyi ma nuˇ nehˬ ve a yeˇ uiˍ ve tehꞈ Hkiˉsuˍtawˆ ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹⁶ Nyi ma nuˇ nehˬ ve lehˬ Hkiˉsuˍtawˆ daꞈ ve beˆ maˍ laˇ hkawˇ htaꞈ haꞈ yuˬ gʼa tuˬ ga piˇ ve yoˬ. Baˆtiˆsaˬ haꞈ yuˬ peuˬ hkʼawꞈ nawˉ maˇ maw, yawˇ hkʼaˬ htaˆ kaꞈ awˬ gʼaˇ caw kuiˬ lo kʼai leh awˬ gʼaˇ tanˬ caw ve yoˬ. Yaˇ nehˬ laiˉ gʼaˇ enˍ daꞈ kuiˬ awˬ moˍ hkʼaw chehˇ la tuˬ yawˇ htaꞈ jehˬ piˇ ve yoˬ. Awˬ lawn chi ve yawˇ nyi haꞈ shaˉ paˍ teˇ gʼaˇ geh yaw daꞈ leh nyi haꞈ shaˉ paˍ yawˇ htaꞈ kawˆ tuˬ cawˬ ve heuˆ la kuiˬ dawˇ nyi tcuh ve yoˬ hehˉ. Tawˇ pa haˉ te kʼo, enˍ daꞈ ve htaꞈ dawˇ cawˇ ve chaw hpehꞈ la tuˬ yoˬ. Yaꞈ hkʼaˇ, Hkiˉsuˍtawˆ enˍ daꞈ ve awˬ moˍ hkʼaw loꞈ˗e ve yoˬ. Maˇ maw hkʼawꞈ nawˉ, enˍ daꞈ ve chi hehnˇ leh kawˆ tuˬ cawˬ ve htaꞈ yawˇ gʼa mawˬ ve yoˬ. Yawˇ nyi haꞈ shaˉ paˍ geh teˇ pawˆ kʼawꞈ yaw daꞈ˗e leh yawˇ hui Hkiˉsuˍtawˆ htaꞈ Liꞈ hpu hkʼaw beˆ maˍ piˇ ve yoˬ. Hkiˉsuˍtawˆ kʼoˆ ve, “daꞈ ve htaꞈ beˆ maˍ laˇ tuˬ laiˉ gʼaˇ Yaˬhoˉvaˬ ngaˬ geh peu laˇ ve yoˬ. Yaꞈ hkʼaˇ, awˬ yanˇ teˇ yanˇ ngaˬ yawˇ ve hkawˇ maˇ na yuˬ ve htawˇ, ngaˬ kʼawꞈ na yuˬ ve yoˬ.” Nawˬ nyi ma nuˇ nehˬ leh daꞈ ve beˆ maˍ laˇ hkawˇ htaꞈ haꞈ yuˬ˗aw laˇ?

17, 18. (a) Chi beuꞈ teˇ co˗e chaw haˉ yaˇ miˇ haˉ htaꞈ Yaˬhoˉvaˬ aˬ htoꞈ ma te tcuh gaˇ ve le? (b) Chaw mawˇ hpehꞈ la htaˇ nawˬ nyi ma maˇ gʼa luˬ ve aˬ htoꞈ ma te cawˇ ve le? Tawˇ pa haˉ kʼoˆ maˍ laˇ sheˍ.

¹⁷ Liꞈ hpu hkʼaw kʼoˆ ve, “yaˇ nehˬ teˇ hpaˍ˗oˬ, yaˇ nehˬ gʼa hpehꞈ ve awˬ yanˇ lehˬ daꞈ jaˇ ve yoˬ. Ha lehˬ ha kʼa te chehˇ˗oˆ.” (Cuˇ yiˍ piˇ ve 11:9) Nawˬ a shaꞈ i sheˍ htaˇ Yaˬhoˉvaˬ nawˬ htaꞈ ha lehˬ tcuh gaˇ ve yoˬ. Nawˬ ha lehˬ tuˬ te laˇ ve awˬ hkʼaˇ teˇ hkʼaˇ lehˬ, nawˬ co ha hpawˇ dawˇ teh taˍ ve htaꞈ hkʼaˬ htaˆ kaꞈ dawˇ nyi chehˇ leh, nawˬ awˬ hkʼaˇ gu teh leh aˬ htoꞈ ma dawˇ cheˆ ve htawˇ, Yaˬhoˉvaˬ beˆ maˍ laˇ ve htaꞈ gʼaꞈ te sheˍ. Awˬ lawn chi ve hkʼaw nawˬ gʼa henˇ tuˬ yoˬ. Nawˬ a shaꞈ i sheˍ ve htawˇ dawˇ teh taˍ ve kʼo, Yaˬhoˉvaˬ beˆ maˍ laˇ ve awˬ hkʼaˇ htaꞈ mawˬ leh haꞈ shaˉ laˇ leh awˬ bon naꞈ laˇ tuˬ yoˬ. Yawˇ nawˬ htaꞈ Liꞈ hpu hkʼaw daꞈ ve beˆ maˍ laˇ hkawˇ htaꞈ dawˇ nyi sheˍ. Beˆ maˍ laˇ hkawˇ yuˬ yehˇ tuˬ, “nawˬ yaˇ nehˬ hpehꞈ chehˇ htaˇ, nawˬ htaꞈ te hpanˍ shehˍ hpaˇ htaꞈ dawˇ nawˇ˗oˆ.”—Cuˇ yiˍ piˇ ve 12:1.

¹⁸ Yaˇ ehˉ yaˇ nehˬ uiˍ la vaiˇ leh chaw mawˇ hkʼe hpehꞈ la ve yoˬ. Laiˉ gʼaˇ yawˇ hui a shaꞈ i htaˇ maˇ gʼa dawˇ teh taˍ ve maˇ heˆ leh dawˇ teh taˍ ve yaꞈ ve pa taw, nyi ma luˬ ve yoˬ. Yaꞈ hkʼaˇ, nawˬ dawˇ teh taˍ ve htaꞈ hkʼaˬ htaˆ kaꞈ dawˇ nyi ve kʼo, nawˬ chaw mawˇ hpehꞈ la htaˇ oˇ hkʼe dawˇ cheˆ ve htaꞈ ha lehˬ ve yoˬ. Miˍriˍyaˇnaˍ chi hkʼe dawˇ ve yoˬ. Yawˇ yaˇ nehˬ htaˇ enˍ daꞈ ve cheuˬ jaˇ. Mvuhˇ kaˆ yanˇ htaˇ ve Oˍlinˍpiꞈ (Olympic Games) hkʼaw enˍ daꞈ˗e tuˬ a hkaw˗anˬ yawˇ kaꞈ gʼa ve yoˬ. Yaꞈ hkʼaˇ, yawˇ Yaˬhoˉvaˬ ve kanˉ awˬ yanˇ hkʼa biˇ te tuˬ leuˆ yuˬ ve yoˬ. Awˬ yanˇ hkʼa biˇ ve kanˉ 30 hkʼawꞈ hpaˆ te˗oˬ ve htawˇ, yawˇ ve awˬ hpawˇ geh teˇ geh te chehˇ sheˍ ve yoˬ. Yawˇ kʼoˆ ve awˬ meh daꞈ ve htaꞈ heuˆ gaˇ ve chaw, awˬ meꞈ awˬ hponˇ, kanˇ paˆ, leh hpu shi mawˇ jeˬ awˬ tehˬ ha lehˬ tuˬ maˇ cawˬ jaw. Yawˇ kʼawꞈ kʼoˆ ve dawˇ teh taˍ ve daꞈ jaˇ ve lehˬ Gʼuiˬ sha ve kanˉ te leh shu Gʼuiˬ sha htaꞈ shiˍ la tuˬ ga piˇ ve yoˬ.

19. Nawˬ a shaꞈ i sheˍ ve htawˇ, aˬ htoꞈ ma te co ha hpawˇ dawˇ teh taˍ ve htaꞈ hkʼaˬ htaˆ kaꞈ dawˇ nyi ve daꞈ ve awˬ lawn hpehꞈ ve le?

¹⁹ Nawˬ hui yaˇ nehˬ hpehꞈ ve pa taw, chiˇ mvuh ve htaꞈ gʼa keunˍ ve yoˬ. Nawˬ hui tuꞈ ve hkanˍ ve gʼa hpuˇ ve htawˇ, Yaˬhoˉvaˬ ve kanˉ htaꞈ hkʼaˬ htaˆ kaꞈ dawˇ nyi ve yoˬ. Nawˬ co ha hpawˇ dawˇ teh taˍ ve leh hto toˇ ve kanˉ nawˬ ve a shaꞈ teꞈ chehˇ kuiˬ hkʼaw a yeˇ uiˍ ve tehꞈ shawˍ ve yoˬ. Chi hkʼoˆ kaꞈ nawˬ dawˇ teh taˍ ve teˇ hpaˍ htaꞈ leunˇ tuˬ taˇ te laˇ tcuh. Nawˬ coˇ caˇ leh te chehˇ ve awˬ ceuˬ htaꞈ awˬ bon gʼa tuˬ ve tehꞈ hkʼa dehꞈ yonˍ gʼa yoˬ. Haꞈ ve awˬ viˉ awˬ nyi hawˉ hkʼaˆ yaˇ miˇ nawˬ htaꞈ ga laˇ gʼa ve cawˬ ve yoˬ. Chi htaꞈ pa taw, “nawˬ aˬ htoꞈ ma te ve htawˇ maˇ kʼoˆ, awˬ lawn oˇ ve Yaˬhoˉvaˬ htaꞈ kʼoˆ piˇ˗oˆ. oˇ hkʼe te ve kʼo, nawˬ dawˇ teh taˍ ve biˇ la tuˬ yoˬ.”