Yaˬhoˉvaˬ ve awˬ nyi gaˬ la tuˬ gu hehnˇ taˍ ve

1. Yaˬhoˉvaˬ ve awˬ nyi htaꞈ ngaˬ hui gʼa ponˬ tuˬ hkʼaˬ hkʼe gʼa te cawˇ ve le?

Liꞈ hpu hkʼaw ‘Yaˬhoˉvaˬ ve awˬ nyi’ tehꞈ kʼoˆ ve lehˬ, yawˇ ve canˇ paˍ htaꞈ te luˬ leh yawˇ ve chaw htaꞈ ponˬ piˇ htaˇ ve htaꞈ kʼoˆ gaˇ ve yoˬ. Oˇ htaˇ teˇ co˗e Yaˬhoˉvaˬ ve awˬ nyi hkʼaw chaw teˇ chaw ceuˬ htaꞈ te luˬ piˇ ve yoˬ. (Iˉsaˍyaˆ 13:1, 6; Yeˍsaˍkeˍlaˆ 13:5; Zeˍhpaˍniˆ 1:8) Yaꞈ hkʼaˇ, ngaˬ hui ve awˬ co˗e ‘Yaˬhoˉvaˬ ve awˬ nyi’ lehˬ Uiˍ ve Baˍbuˍlonˍ htaꞈ tanˬ te luˬ piˇ leh Aˍmaˍgeˍdonˍ hkʼaw kaꞈ te luˬ piˇ tuˬ yoˬ. Ngaˬ hui Yaˬhoˉvaˬ ve “awˬ nyi” htaꞈ gʼa ponˬ tuˬ chi teˇ hkui kaꞈ gʼa gu hehnˇ taˍ cawˇ ve yoˬ. “Tuꞈ jaˇ hkanˍ jaˇ ve” awˬ yanˇ htaˇ, “hkʼa dehꞈ gu hehnˇ taˍ˗oꞈ” tehꞈ Yeˍsuˆ ngaˬ hui htaꞈ maˍ laˇ ve yoˬ. Chi ngaˬ hui hkʼaˬ htaˆ kaꞈ gu hehnˇ taˍ cawˇ ve tehꞈ kʼoˆ gaˇ ve yoˬ.—Maꞈhtehˍ 24:21; Luˉkaꞈ 12:40.

2. Aˬ htoꞈ ma te 1 Hteˇsaˍlawˇniˆ liꞈ chi beuꞈ teˇ co˗e ngaˬ hui awˬ pon awˬ bon cawˬ jaˇ ve le?

² Pawˇluꞈ htaꞈ dawˇ pawnˍ piˇ leh Hteˇsaˍlawˇniˆ venˇ lo chehˇ ve awˬ viˉ awˬ nyi htaꞈ liꞈ awˉ lawˉ teˇ kʼoˆ bvuhꞈ piˇ htaˇ, awˬ viˉ awˬ nyi oˇ kaˬ lo chehˇ ve Yaˬhoˉvaˬ ve awˬ nyi gaˬ la tuˬ gu hehnˇ taˍ gʼa tuˬ yawˇ laiˉ ceuˬ htaꞈ tehˆ maˍ piˇ ve yoˬ. Oˇ ve teˇ yanˇ Yaˬhoˉvaˬ ve awˬ nyi maˇ gaˬ la sheˍ ve tehꞈ Pawˇluꞈ shiˍ ve htawˇ, chi shawˉ pawˍ gaˬ la tuˬ ve hkʼa shuˍ, awˬ viˉ awˬ nyi oˇ kaˬ lo chehˇ ve chaw htaꞈ gu hehnˇ taˍ tcuh ve yoˬ. (2 Hteˇsaˍlawˇniˆ 2:1-3) Ngaˬ hui kaꞈ Pawˇluꞈ beˆ maˍ laˇ ve htaꞈ yuˬ yehˇ gʼa ve yoˬ. Awˬ lawn chi ve Pawˇluꞈ hkʼaˬ hkʼe kʼoˆ ve htaꞈ teˇ geh nyi sheˍ. (1) Yaˬhoˉvaˬ ve awˬ nyi hkʼaˬ hkʼe te gaˬ la tuˬ le? (2) Yaˬhoˉvaˬ ve awˬ nyi gaˬ la htaˇ a shu maˇ gʼa ponˬ tuˬ le? (3) Yaˬhoˉvaˬ ve awˬ nyi gaˬ la htaˇ gu hehnˇ taˍ gʼa tuˬ, ngaˬ hui hkʼaˬ hkʼe gʼa te cawˇ ve le?

YAˬHOˉVAˬ VE AWˬ NYI HKʼAˬ HKʼE TE GAˬ LA TUˬ LE?

3. Yaˬhoˉvaˬ ve awˬ nyi tanˇ hkuinˇ htaˇ chaw hkʼawˇ laˬ ve htaꞈ hkʼaˬ hkʼe shuˍ ve le? (Awˬ han htaꞈ nyi sheˍ.)

³ “Tanˇ hkuinˇ htaˇ chaw hkʼawˇ laˬ ve hkʼe.” (1 Hteˇsaˍlawˇniˆ 5:2) Yaˬhoˉvaˬ ve awˬ nyi gaˬ la tuˬ ve htaꞈ ngaˬ hui shiˍ tuˬ Pawˇluꞈ tehˆ maˍ laˇ taˍ ve 3 ceuˬ hkʼaw ve chi awˉ lawˉ teˇ ceuˬ hpehꞈ ve yoˬ. Chaw hkʼawˇ lehˬ tanˇ hkuinˇ laˬ leh yehˬ shehˍ hpaˇ maˇ shiˍ ve hkʼaw laˬ ve yoˬ. Chaw hkʼawˇ lehˬ aˬ htoꞈ ma hkʼawˇ ve htawˇ haˆ haˆ hkʼawˇ ve yoˬ. Yaˬhoˉvaˬ ve awˬ nyi kaꞈ laꞈ tcuh laꞈ haˉ gaˬ la leh maˇ˗awˍ ve chaw cheˆ˗ehˬ kʼai tuˬ yoˬ. Aˬ htoꞈ ma te awˬ ceuˬ chi teˇ hpaˍ hpehꞈ la vaiˇ jaˇ ve le tehꞈ, awˬ tehˬ ve Hkriꞈ yaˇ kaꞈ cheˆ˗ehˬ kʼai ve yoˬ. Yaꞈ hkʼaˇ, ngaˬ hui haiˬ ve chaw htaꞈ maˇ shuˍ. Ngaˬ hui htaꞈ te luˬ laˇ tuˬ ve maˇ heˆ.

4. Yaˬhoˉvaˬ ve awˬ nyi gaˬ la tuˬ ve lehˬ yaˇ paw tuˬ naˬ jaˇ ve yaˇ miˇ teˇ gʼaˇ htaꞈ hkʼaˬ hkʼe shuˍ ve le?

⁴ “Yaˇ paw tuˬ naˬ ve yaˇ miˇ teˇ gʼaˇ naˬ jaˇ ve htaꞈ gʼa hkanˍ ve hkʼe.” (1 Hteˇsaˍlawˇniˆ 5:3) Maˇ˗awˍ ve kʼo yaˇ hu chehˇ ve yaˇ miˇ lehˬ yaˇ hkʼaˬ htaˆ paw tuˬ awˬ yanˇ maˇ shiˍ ve yoˬ. Yaꞈ hkʼaˇ, yawˇ lehˬ yaˇ paw la tuˬ ve tehꞈ shiˍ ve yoˬ. Awˬ yanˇ gaˬ la htaˇ laꞈ tcuh laꞈ haˉ paw la tuˬ yoˬ. Naˬ jaˇ leh teˇ ceuˬ˗ehˬ kaꞈ maˇ naˬ tuˬ te piˇ maˇ gʼa ve yoˬ. Chi ve hkʼa shuˍ shuˍ, Yaˬhoˉvaˬ ve awˬ nyi hkʼaˬ htaˆ gaˬ la tuˬ ve htaꞈ maˇ shiˍ ve yoˬ. Yaꞈ hkʼaˇ, awˬ nyi oˇ ve gaˬ la tuˬ yoˬ tehꞈ ngaˬ hui shiˍ ve yoˬ. Leh chaw haiˬ htaꞈ maˇ dawˇ maˇ gaˇ ve hkʼaw Gʼuiˬ sha te luˬ piˇ tuˬ yoˬ tehꞈ ngaˬ hui shiˍ ve yoˬ. Chi laꞈ tcuh laꞈ haˉ hpehꞈ la leh teˇ gʼaˇ˗ehˬ ponˬ maˇ gʼa.

5. Tuꞈ jaˇ hkanˍ jaˇ ve awˬ yanˇ htaˇ mvuhˇ shawˉ teˇ naꞈ htaꞈ hkʼaˬ hkʼe shuˍ ve le?

⁵ Mvuhˇ shawˉ teˇ naꞈ htaꞈ shuˍ ve. Pawˇluꞈ tehˆ maˍ laˇ taˍ ve 3 maˬ hkʼaw ve teˇ maˬ lehˬ, tanˇ hkuinˇ chaw hkʼawˇ laˬ ve awˬ lawn htaꞈ tehˆ taˍ ve yoˬ. Yaꞈ hkʼaˇ, chi teˇ hkui Yaˬhoˉvaˬ ve awˬ nyi gaˬ la tuˬ mvuhˇ shawˉ teˇ naꞈ htaꞈ tehˆ taˍ ve yoˬ. (1 Hteˇsaˍlawˇniˆ 5:4) Chaw hkʼawˇ tanˇ hkuinˇ htaˇ laˬ ve lehˬ mawˇ hkʼawˇ tuˬ ve htaꞈ ceh tiˉ a yeˇ yuˬ chehˇ ve pa taw, awˬ yanˇ ponˬ kʼai vaiˇ jaˇ ve htaꞈ maˇ shiˍ ve yoˬ. Peuˬ hkʼawꞈ nawˉ yawˇ shaˍ tiꞈ hkʼa dehꞈ maˇ te htaˇ, mvuhˇ nyi tawˆ la leh yawˇ aˬ htoꞈ ma te chehˇ ve htaꞈ mawˬ ve yoˬ. Chi ve hkʼa shuˍ shuˍ, tuꞈ jaˇ hkanˍ jaˇ ve awˬ yanˇ htaˇ naˆ hoꞈ ve awˬ yanˇ hkʼaw a shu chehˇ taˍ ve htaꞈ mawˬ leh Gʼuiˬ sha maˇ dawˇ cawˇ ve awˬ ceuˬ htaꞈ te chehˇ ve kaꞈ mawˬ ve yoˬ. Yaꞈ hkʼaˇ, ngaˬ hui chaw haiˬ chi teˇ hpaˍ htaꞈ maˇ shuˍ. Ngaˬ hui Yaˬhoˉvaˬ maˇ dawˇ cawˇ ve awˬ ceuˬ htaꞈ maˇ te leh “daꞈ ve hkʼa peu˗eˬ hteˇ ve cawˇ ve hkʼa peu˗eˬ leh, awˬ tehˬ awˬ na ve awˬ ceuˬ hkʼa peu˗eˬ” coˇ caˇ leh hkʼaˬ htaˆ kaꞈ gu hehnˇ taˍ ve yoˬ. (Eˇfeˇsuꞈ 5:8-12) Yaˬhoˉvaˬ ve awˬ nyi gaˬ la htaˇ a shu maˇ gʼa ponˬ tuˬ Pawˇluꞈ kʼoˆ htaˇ yawˇ tehˆ maˍ laˇ taˍ ve 2 ceuˬ teˇ ceuˬ htaꞈ teˇ geh nyi sheˍ.

YAˬHOˉVAˬ VE AWˬ NYI GAˬ LA HTAˇ A SHU MAˇ GʼA PONˬ TUˬ LE?

6. Maˇ˗awˍ ve chaw lehˬ zuhꞈ muiˉ kʼa ve chaw htaꞈ hkʼaˬ hkʼe shuˍ ve le? (1 Hteˇsaˍlawˇniˆ 5:6, 7)

⁶ “Zuhꞈ muiˉ kʼa ve chaw.” (1 Hteˇsaˍlawˇniˆ 5:6, 7 gʼaw sheˍ.) Yaˬhoˉvaˬ ve awˬ nyi htaꞈ maˇ gʼa ponˬ ve chaw lehˬ zuhꞈ muiˉ kʼa ve chaw htaꞈ shuˍ ve tehꞈ Pawˇluꞈ tehˆ taˍ ve yoˬ. Zuhꞈ muiˉ kʼa ve chaw lehˬ awˬ paˇ awˬ kui aˬ htoꞈ ma hpehꞈ ve htaꞈ maˇ shiˍ leh awˬ yanˇ ponˬ kʼai ve htaꞈ kaꞈ maˇ shiˍ ve yoˬ. A yeˇ uiˍ ve aˬ htoꞈ ma hpehꞈ la ve htaꞈ yawˇ maˇ shiˍ leh teꞈ chiˉ kaꞈ maˇ gʼaꞈ te ve yoˬ. Chi beuꞈ teˇ co˗e maˇ˗awˍ ve chaw kaꞈ zuhꞈ muiˉ kʼa ve chaw htaꞈ shuˍ ve yoˬ. (Roˉmaꞈ 11:8) Miˬ guiˬ hkʼoˆ lo hpehꞈ la chehˇ ve shaˉ hkiˆ teˇ hpaˍ lehˬ ngaˬ hui awˬ leh meuˇ ve awˬ yanˇ hkʼaw chehˇ taˍ ve tehꞈ yawˇ hui maˇ yonˍ leh, tuꞈ jaˇ hkanˍ jaˇ ve gaˬ la chehˇ ve htaꞈ kaꞈ yawˇ hui maˇ yonˍ ve yoˬ. Miˬ guiˬ hkʼoˆ lo kawˆ tuˬ uiˍ jaˇ ve laiˉ ceuˬ hpehꞈ la ve pa taw, chaw teˇ hpaˍ kʼo, Gʼuiˬ sha ve mvuhˇ miˬ daꞈ ve awˬ lawn sha tanˇ htaꞈ na gaˇ la ve yoˬ. Yaꞈ hkʼaˇ, yawˇ hui hkʼa dehꞈ shaw taˍ cawˇ ve htawˇ, maˇ kʼawꞈ shaw taˍ˗o. Chaw teˇ hpaˍ kʼo, suhˉ jehˬ ve awˬ nyi cawˬ tuˬ yoˬ tehꞈ yonˍ ve htawˇ, chi ve maw jaˇ sheˍ tehꞈ yawˇ dawˇ ve yoˬ. (2 Peˍtruˆ 3:3, 4) Chaw yaˇ hkʼaˬ hkʼe te ve htawˇ, teˇ nyi leh teˇ nyi ponˬ kʼai vuiˇ jaˇ ve pa taw, ngaˬ hui shaˍ tiꞈ gʼa te cawˇ ve yoˬ.

7. Gʼuiˬ sha te luˬ tuˬ ve chaw lehˬ tzuhˬ dawˬ bvuhˆ ve chaw htaꞈ hkʼaˬ hkʼe te shuˍ ve le?

⁷ “Tzuhˬ dawˬ bvuhˆ ve chaw.” Gʼuiˬ sha te luˬ tuˬ ve chaw lehˬ tzuhˬ dawˬ bvuhˆ ve chaw htaꞈ shuˍ ve tehꞈ tcuh yaˇ Pawˇluꞈ tehˆ taˍ ve yoˬ. Tzuhˬ dawˬ bvuhˆ ve chaw lehˬ awˬ paˇ awˬ kui hpehꞈ chehˇ ve htaꞈ hkʼa dehꞈ maˇ shiˍ ve yoˬ. Yawˇ dawˇ cheˆ ve awˬ lawn hkʼa dehꞈ maˇ daꞈ leh yawˇ aˬ htoꞈ ma te ve htawˇ naiˇ ve yoˬ. Chi ve hkʼa shuˍ shuˍ, Gʼuiˬ sha shaˍ tiꞈ piˇ ve htaꞈ chaw haiˬ gʼa kaˇ htaˇ, yawˇ hui maˇ na yuˬ ve yoˬ. Yawˇ hui htaꞈ te luˬ laˇ tuˬ ve a shaꞈ teꞈ hkʼaˇ htaꞈ leuˆ ve yoˬ. Yaꞈ hkʼaˇ, Hkriꞈ yaˇ lehˬ shaˍ tiꞈ taˍ chehˇ˗oˆ tehꞈ Liꞈ hpu hkʼaw kʼoˆ laˇ ve yoˬ. (1 Hteˇsaˍlawˇniˆ 5:6) Liꞈ hpu hpawˇ chaˬ nyi paˍ teˇ gʼaˇ kʼoˆ ve, “shaˍ tiꞈ taˍ puiˉ ve chaw lehˬ nyi ma gawˬ lehˍ cawˬ ve, yonˍ yeˬ ve cawˬ ve, shaˍ tiꞈ cawˬ ve, yawˇ awˬ lawn teˇ hpaˍ htaꞈ hkʼa dehꞈ dawˇ nyi gʼa ve pa taw, cawˇ ve hkʼaw dawˇ cheˆ gʼa ve yoˬ.” Aˬ htoꞈ ma te ngaˬ hui nyi ma gawˬ lehˍ cawˬ leh yonˍ yeˬ cawˇ ve le? Awˬ lawn kʼo, chi beuꞈ teˇ co˗e mvuhˇ miˬ hpawˇ leh chaw yaˇ awˬ moˍ shoꞈ shaꞈ ve htaꞈ maˇ gʼa caˉ daꞈ ve yoˬ. Yaˬhoˉvaˬ ve awˬ nyi gʼaˇ hteꞈ gaˬ la paˇ neˇ htaˇ, awˬ lawn chi hkʼe ve hkʼaw ngaˬ hui pawnˇ daꞈ˗e tuˬ nyiˉ laˇ jaˇ ve yoˬ. Yaꞈ hkʼaˇ ngaˬ hui hkʼaˬ hkʼe te tuˬ taˇ dawˇ haˍ. Awˬ lawn kʼo, Yaˬhoˉvaˬ ve daꞈ kehˬ ve awˬ ha hpu ngaˬ hui nyi ma gawˬ lehˍ cawˬ leh yonˍ yeˬ ve cawˬ tuˬ ga laˇ ve yoˬ. Leh ngaˬ hui cuˇ yiˍ cawˬ ve hkʼaw dawˇ cheˆ gʼa tuˬ kaꞈ ga laˇ ve yoˬ.—Luˉkaꞈ 12:11, 12.

YAˬHOˉVAˬ VE AWˬ NYI GAˬ LA TUˬ GU HEHNˇ TAˍ TUˬ NGAˬ HUI HKʼAˬ HKʼE GʼA TE CAWˇ VE LE?

8. 1 Hteˇsaˍlawˇniˆ liꞈ 5:8 hkʼaw ngaˬ hui hkʼa dehꞈ shaw taˍ leh shaˍ tiꞈ taˍ chehˇ tuˬ, te hkʼaˇ dawˇ hkʼaˇ htaꞈ caˉ daꞈ ve aˬ htoꞈ ma htaꞈ tehˆ maˍ laˇ taˍ ve le? (Awˬ han htaꞈ nyi sheˍ.)

⁸ ‘Nyi ma pui htaꞈ htanˬ tuˬ hkʼe veuꞈ deh leh sho uˉ tcuhˍ htaꞈ hkʼawˆ taˍ˗a veuˬ.’ Maꞈ yaˇ shaˍ tiꞈ te leh maꞈ bawˆ tuˬ nyi ma pui htaꞈ htanˬ tuˬ veuꞈ deh taˍ ve hkʼe ngaˬ hui chi htaꞈ shuˍ ve tehꞈ Pawˇluꞈ tehˆ taˍ ve yoˬ. (1 Hteˇsaˍlawˇniˆ 5:8 gʼaw sheˍ.) Maꞈ bawˆ ve awˬ yanˇ htaˇ, maꞈ yaˇ canˇ paˍ htaꞈ bawˆ tuˬ gʼa gu hehnˇ taˍ ve yoˬ. Chi ve hkʼa shuˍ shuˍ, Yaˬhoˉvaˬ ve awˬ nyi gaˬ la tuˬ ve htaꞈ ngaˬ hui gʼa gu hehnˇ taˍ cawˇ ve yoˬ. Yonˍ ve leh haꞈ pehnˇ ve teˇ ceuˬ nyi ma pui htaꞈ htanˬ tuˬ hkʼe veuꞈ deh leh dawˇ law ve tehꞈ kʼoˆ ve sho uˉ tcuhˍ htaꞈ hkʼawˆ taˍ˗a veuˬ. Te hkʼaˇ dawˇ hkʼaˇ chi ve teˇ hpaˍ lehˬ ngaˬ hui htaꞈ ga laˇ gʼa jaˇ ve yoˬ.

9. Yonˍ ve ngaˬ hui htaꞈ hkʼaˬ hkʼe te haꞈ shaˉ laˇ gʼa ve le?

⁹ Nyi ma pui htaꞈ htanˬ tuˬ maꞈ yaˇ htaꞈ haꞈ shaˉ piˇ gʼa ve hkʼe, yonˍ ve leh haꞈ pehnˇ ve kaꞈ ngaˬ hui ve nyi ma htaꞈ haꞈ shaˉ laˇ gʼa ve yoˬ. Chi ngaˬ hui Yaˬhoˉvaˬ ve kanˉ leh Yeˍsuˆ awˬ hkʼaˇ suh caˉ leh gʼaꞈ te tuˬ ga laˇ ve yoˬ. Ngaˬ hui nyi ma awˬ tawˬ hkʼa gaˬ Yaˬhoˉvaˬ htaꞈ ca ve kʼo, yawˇ laꞈ shawnˍ peꞈ laˇ tuˬ yoˬ tehꞈ ngaˬ hui yonˍ gʼa tuˬ te laˇ ve yoˬ. (Heˍbrehˇ 11:6) Chi hkʼoˆ kaꞈ, ngaˬ hui tuꞈ ve hkanˍ ve gʼa hpuˇ ve htawˇ, yonˍ ve lehˬ ngaˬ hui htaꞈ sheh kʼai shehˍ hpaˇ Yeˍsuˆ htaꞈ ka tiꞈ yeˬ tuˬ ga laˇ ve yoˬ. Ngaˬ hui yonˍ yeˬ ve cawˬ maˇ ve kʼo, a shaꞈ teꞈ kuiˬ hkʼaw shoꞈ shaꞈ ve teˇ hpaˍ htaꞈ yeunˇ hkanˍ gʼaˇ tuˬ ga laˇ ve yoˬ. Ngaˬ hui htaꞈ fawˉ mehˍ laˇ ve maˇ heˆ leh ca caˇ gʼaꞈ caˇ hpawˇ heuˆ la kuiˬ cawˬ ve htawˇ, chi teˇ hkui awˬ viˉ awˬ nyi ka tiꞈ yeˬ ve htaꞈ dawˇ nyi ve kaꞈ ga laˇ gʼa ve yoˬ. A shaꞈ teꞈ kuiˬ hkʼaw caˇ lawꞈ dawˬ lawꞈ te leh Gʼuiˬ sha ve mvuhˇ miˬ htaꞈ awˉ lawˉ ca ve chaw htaꞈ ngaˬ hui henˇ yuˬ ve kʼo, ngaˬ hui hpu htaꞈ haꞈ ve chaw maˇ gʼa hpehꞈ tuˬ ga laˇ ve yoˬ.b

10. Ngaˬ hui Gʼuiˬ sha leh chaw yaˇ htaꞈ haꞈ ve pa taw yeunˇ hkanˍ gʼaˇ tuˬ hkʼaˬ hkʼe ga laˇ ve le?

¹⁰ Haꞈ pehnˇ ve lehˬ ngaˬ hui hkʼa dehꞈ shaw taˍ leh shaˍ tiꞈ te tuˬ ga laˇ ve yoˬ. (Maꞈhtehˍ 22:37-39) Ngaˬ hui Gʼuiˬ sha htaꞈ haꞈ ve lehˬ yeunˇ hkanˍ gʼaˇ leh caˉ leh hto toˇ tuˬ ga laˇ ve yoˬ. Chi hkʼe te htaˇ ngaˬ hui shoꞈ shaꞈ ve gʼa hpuˇ ve yoˬ hehˉ. (2 Tiˆmoˉseˍ 1:7, 8) Shaˉhkiˆhkanˍ ve maˇ hpehꞈ ve chaw htaꞈ ngaˬ hui haꞈ ve pa taw, ngaˬ hui hto maˍ piˇ ve, Liꞈ hpu maˍ piˇ ve, awˬ hkʼeun hkʼaw kaꞈ hto toˇ leh liꞈ kaꞈ bvuhꞈ feu piˇ ve yoˬ. Teˇ nyi kʼo, ngaˬ hui hto maˍ piˇ ve chaw nyi ma pa leh cawˇ ve awˬ ceuˬ htaꞈ te tuˬ kaꞈ ngaˬ hui dawˇ law gʼa ve yoˬ.—Yeˍsaˍkeˍlaˆ 18:27, 28.

11. Awˬ viˉ awˬ nyi htaꞈ haꞈ ve ngaˬ hui htaꞈ hkʼaˬ hkʼe ga laˇ ve le? (1 Hteˇsaˍlawˇniˆ 5:11)

¹¹ Chi hkʼoˆ kaꞈ, ngaˬ hui ve awˬ viˉ awˬ nyi htaꞈ kaꞈ gʼa haꞈ ve yoˬ. Ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ gʼa ve lehˬ, “teˇ gʼaˇ leh teˇ gʼaˇ awˬ gʼaˇ piˇ daꞈ leh, teˇ gʼaˇ leh teˇ gʼaˇ uiˍ la yeˬ la tuˬ te daꞈ” ve yoˬ. (1 Hteˇsaˍlawˇniˆ 5:11 gʼaw sheˍ.) Chi ve hkʼa shuˍ shuˍ maꞈ yaˇ maꞈ bawˆ htaˇ gʼa ga daꞈ ve hkʼe, ngaˬ hui kaꞈ teˇ gʼaˇ leh teˇ gʼaˇ hkʼaˬ htaˆ kaꞈ awˬ gʼaˇ piˇ daꞈ ve yoˬ. Teˇ pawˆ pawˆ kʼo, maꞈ yaˇ awˬ chawˇ htaꞈ maˇ dawˇ maˇ gaˇ ve hkʼaw naˬ tuˬ te piˇ la gʼa ve yoˬ. Yaꞈ hkʼaˇ, yawˇ hui dawˇ taˍ leh naˬ tuˬ te piˇ ve maˇ heˆ. Chi ve hkʼa shuˍ shuˍ, ngaˬ hui dawˇ taˍ leh awˬ viˉ awˬ nyi naˬ tuˬ te piˇ ve maˇ heˆ. Leh awˬ viˉ awˬ nyi ngaˬ hui htaꞈ naˬ tuˬ te laˇ ve htawˇ, ngaˬ hui maˇ kʼawꞈ te hkʼawꞈ. (1 Hteˇsaˍlawˇniˆ 5:13, 15) Chi hkʼoˆ kaꞈ, Hkriꞈ yaˇ awˬ moˍ hkʼaw sheh kʼai paˍ htaꞈ haꞈ ve tehꞈ hpeuꞈ maw piˇ ve lehˬ, ngaˬ hui yawˇ hui htaꞈ yawˆ yan piˇ ve yoˬ. (1 Hteˇsaˍlawˇniˆ 5:12) Hteˇsaˍlawˇniˆ venˇ lo chehˇ ve awˬ viˉ awˬ nyi htaꞈ Pawˇluꞈ liꞈ bvuhꞈ piˇ htaˇ, oˇ kaˬ lo Hkriꞈ yaˇ awˬ moˍ cawˬ ve hkʼaˬ nyiˇ hkʼawꞈ maˇ gaˬ sheˍ ve yoˬ. Nyi haꞈ shaˉ paˍ kaꞈ awˬ lawn hkʼa dehꞈ maˇ shiˍ leh te yaꞈ puiˉ ve yoˬ. Chi hkʼe hpehꞈ ve htawˇ, yawˇ hui lehˬ awˬ viˉ awˬ nyi yawˆ yan piˇ ve htaꞈ gʼa keunˍ ve yoˬ. Tuꞈ jaˇ hkanˍ jaˇ ve gaˬ la paˇ neˇ htaˇ, nyi haꞈ shaˉ paˍ ngaˬ hui htaꞈ chi teˇ hkui aꞈ kehˉ beˆ maˍ laˇ tuˬ gʼaˇ gʼa va cawˇ ve yoˬ. Oˇ ve teˇ yanˇ hkʼaw awˬ tcuhˆ puiˍ lonˉ maˇ heˆ leh awˬ tcuhˆ puiˍ lo ngaˬ hui caˉ daꞈ maˇ gʼa ve yoˬ. Chi htaꞈ pa taw, chi teˇ hkui kaꞈ ngaˬ hui Hkriꞈ yaˇ awˬ moˍ hkʼaw ve nyi haꞈ shaˉ paˍ htaꞈ haꞈ leh yawˆ yanˍ tuˬ a yeˇ uiˍ jaˇ ve yoˬ. Aˬ htoꞈ ma hpehꞈ la ve htawˇ, ngaˬ hui shaˍ tiꞈ gʼa cawˬ cawˇ ve yoˬ. Yawˇ hui ve yaꞈ kuiˬ htaꞈ ceh tiˉ maˇ nyi ve yoˬ. Yaˬhoˉvaˬ Yeˍsuˆ htaꞈ cuˇ leh yawˇ hui htaꞈ beˆ maˍ piˇ chehˇ ve tehꞈ ngaˬ hui a yeˇ yuˬ cawˇ ve yoˬ.

12. Dawˇ law kuiˬ lehˬ ngaˬ hui ve dawˇ hkʼaˇ htaꞈ hkʼaˬ hkʼe haꞈ shaˉ laˇ gʼa ve le?

¹² Chi ve hkʼa shuˍ shuˍ, sho uˉ tcuhˍ maꞈ yaˇ ve oˉ kʼoˍ htaꞈ haꞈ shaˉ piˇ ve hkʼe, ponˬ ve dawˇ law kuiˬ kaꞈ ngaˬ hui ve dawˇ hkʼaˇ htaꞈ haꞈ shaˉ laˇ gʼa ve yoˬ. Ngaˬ hui ve dawˇ law kuiˬ hkʼa tawˍ lehˆ mawˬ ve kʼo, miˬ guiˬ hkʼoˆ lo cawˬ ve awˬ ceuˬ hkʼa peu˗eˬ lehˬ awˬ bon maˇ cawˬ ve tehꞈ shiˍ ve yoˬ. (Hpiˇliˇpiˆ 3:8) Dawˇ law kuiˬ lehˬ ngaˬ hui nyi ma gawˬ lehˍ cawˬ tuˬ ga laˇ leh yonˍ yeˬ ve cawˬ tuˬ kaꞈ ga laˇ ve yoˬ. Aˍfaˍriˆkaˆ miˬ guiˬ lo Beˍteˍlaˆ hkʼaw kanˉ te chehˇ ve Vaw˗len leh Law˗rin˗da ve awˬ lawn htaꞈ teˇ geh nyi sheˍ. Vaw˗len ve awˬ pa suh˗e leh Law˗rin˗da ve awˬ e kaꞈ suh˗e ve yoˬ. Leh a naˍ 19 cawˬ htaˇ yawˇ hui aˉ hkʼaw kʼoꞈ˗e maˇ gʼa ve yoˬ. Vaw˗len kʼoˆ ve, “kʼawꞈ teꞈ tu la ve dawˇ law kuiˬ lehˬ miˬ guiˬ awˬ suhˉ hkʼaw yawˇ hui kʼawꞈ teꞈ tu la ve htaꞈ ngaˬ dawˇ mawˬ tuˬ te laˇ ve yoˬ. Yawˇ hui suh˗e leh ngaˬ nyi ma luˬ jaˇ tuˬ te laˇ ve htawˇ, dawˇ law kuiˬ chi lehˬ ngaˬ nyi ma gawˬ lehˍ cawˬ tuˬ te laˇ ve yoˬ.”

13. Ngaˬ hui Yaˬhoˉvaˬ geh daꞈ kehˬ ve awˬ ha hpu gʼa tuˬ aˬ htoꞈ ma gʼa te ve le?

¹³ “Awˬ ha hpu ve aˬ miˍ htaꞈ taˇ tiˇ pehˍ.” (1 Hteˇsaˍlawˇniˆ 5:19) Daꞈ kehˬ ve awˬ ha hpu lehˬ ngaˬ hui awˬ to hkʼaw aˬ miˍ toꞈ chehˇ ve hkʼe hpehꞈ ve tehꞈ Pawˇluꞈ tehˆ taˍ ve yoˬ. Ngaˬ hui Gʼuiˬ sha ve daꞈ kehˬ ve awˬ ha hpu gʼa ve kʼo, ngaˬ hui cawˇ ve awˬ ceuˬ htaꞈ te tuˬ nyi ma pfuhˇ jaˇ leh Gʼuiˬ sha ve kanˉ kaiˬ ve hkʼaw te ve yoˬ. (Roˉmaꞈ 12:11) Ngaˬ hui daꞈ kehˬ ve awˬ ha hpu gʼa tuˬ hkʼaˬ hkʼe gʼa te ve le? Ngaˬ hui Yaˬhoˉvaˬ geh daꞈ kehˬ ve awˬ ha hpu gʼa tuˬ Liꞈ hpu gʼaw leh hkʼa dehꞈ hpfuhˆ nyi ve, daꞈ kehˬ ve awˬ ha hpu beˆ maˍ piˇ ve Gʼuiˬ sha ve kanˉ hkʼaˇ htaꞈ meuˆ daꞈ tuˬ ngaˬ hui gʼa lawˬ cawˇ ve yoˬ. Chi hkʼe te htaˇ, “awˬ ha hpu ve awˬ shiˍ nawꞈ la” tuˬ ga laˇ tuˬ yoˬ.—Gaˍlaˍtiˆ 5:22, 23.

14. Ngaˬ hui Gʼuiˬ sha ve daꞈ kehˬ ve awˬ ha hpu caˉ leh gʼa tuˬ, aˬ htoꞈ ma maˇ te tuˬ shaˍ tiꞈ gʼa te cawˇ ve le? (Awˬ han htaꞈ nyi sheˍ.)

¹⁴ Yaˬhoˉvaˬ ngaˬ hui htaꞈ daꞈ kehˬ ve awˬ ha hpu peꞈ laˇ˗oˬ htaˇ, ‘ngaˬ hui awˬ hkʼaw lo Gʼuiˬ sha ve awˬ ha hpu ve aˬ miˍ maˇ gʼa suh tuˬ gʼa te cawˇ ve yoˬ.’ Yaˬhoˉvaˬ yawˇ mehˆ gʼuˇ suhˍ dawˇ ve leh daꞈ ve awˬ ceuˬ htaꞈ te ve chaw ceh tiˉ yawˇ ve daꞈ kehˬ ve awˬ ha hpu piˇ ve yoˬ. Chi htaꞈ pa taw, ngaˬ hui dawˇ ve leh maˇ daꞈ ve awˬ ceuˬ htaꞈ caˉ leh te ve kʼo, yawˇ ngaˬ hui htaꞈ daꞈ kehˬ ve awˬ ha hpu maˇ peꞈ laˇ ve yoˬ. (1 Hteˇsaˍlawˇniˆ 4:7, 8) Chi hkʼoˆ kaꞈ, ngaˬ hui daꞈ kehˬ ve awˬ ha hpu caˉ leh gʼa tuˬ, ‘Gʼuiˬ sha ve tawˇ hkawˇ htaꞈ maˇ shawnˍ maˇ caˉ maˇ gʼa te.’ (1 Hteˇsaˍlawˇniˆ 5:20) Liꞈ hpu hkʼaw “Gʼuiˬ sha ve tawˇ hkawˇ” tehꞈ kʼoˆ ve lehˬ, Gʼuiˬ sha ve awˬ ha hpu dawˇ pawnˍ piˇ ve awˬ lawn htaꞈ kʼoˆ gaˇ ve yoˬ. Chi lehˬ Yaˬhoˉvaˬ ve awˬ nyi gaˬ la tuˬ ve leh, ngaˬ hui ve awˬ co˗e lehˬ awˬ leh meuˇ ve awˬ yanˇ hkʼaw chehˇ taˍ ve tehꞈ kʼoˆ gaˇ ve yoˬ. Chi htaꞈ pa taw, Yaˬhoˉvaˬ ve awˬ nyi gaˬ la tuˬ maw jaˇ sheˍ tehꞈ maˇ gʼa dawˇ leh Aˍmaˍgeˍdonˍ ngaˬ hui ve awˬ co˗e htaˇ maˇ gaˬ la sheˍ tehꞈ maˇ gʼa dawˇ nyi cawˇ ve yoˬ. Chi hkʼe dawˇ ve aꞈ kehˉ ngaˬ hui Yaˬhoˉvaˬ ve awˬ nyi gaˬ la tuˬ yoˬ tehꞈ hkʼaˬ htaˆ kaꞈ dawˇ nyi leh awˬ nyi chi gaˬ la paˇ neˇ jaˇ˗oˬ tehꞈ dawˇ nyi cawˇ ve yoˬ. Chi htaꞈ pa taw, ngaˬ hui Yaˬhoˉvaˬ ve a loˍ htaꞈ te leh teˇ nyi le le ‘ngaˬ hui Gʼuiˬ sha htaꞈ yawˆ yan ve chaw hpehꞈ cawˇ ve yoˬ.’—2 Peˍtruˆ 3:11, 12.

“AWˬ CEUˬ HKʼA PEU˗Eˬ HTAꞈ LAWˇ NYI˗O”

15. Neˇ teˇ hpaˍ geh laˬ ve maˇ heˆ heˆ ve awˬ lawn htaꞈ ngaˬ hui maˇ gʼa yonˍ tuˬ hkʼaˬ hkʼe gʼa te cawˇ ve le? (1 Hteˇsaˍlawˇniˆ 5:21)

¹⁵ Maˇ maw maw kʼo Yaˬhoˉvaˬ htaꞈ tawˍ ve chaw ‘mvuhˇ miˬ gawˬ la peuˬ leh dawˇ haˍ tuˬ maˇ cawˬ˗o’ tehꞈ kʼoˆ ve yoˬ. (1 Hteˇsaˍlawˇniˆ 5:3) Oˇ ve teˇ yanˇ neˇ teˇ hpaˍ geh laˬ ve awˬ lawn maˇ heˆ heˆ ve miˬ guiˬ hkʼoˆ lo cawˬ maˇ jaˇ tuˬ yoˬ. Leh maˇ˗awˍ ve chaw chi htaꞈ yonˍ tuˬ yoˬ. (Hpeuꞈ maˍ ve 16:13, 14) Yaꞈ hkʼaˇ, ngaˬ hui awˬ pon “awˬ ceuˬ hkʼa peu˗eˬ htaꞈ lawˇ nyi” chehˇ ve kʼo ngaˬ hui htaꞈ heˍ laˇ maˇ gʼa. (1 Hteˇsaˍlawˇniˆ 5:21 gʼaw sheˍ.) Heˍlaˍsaˆ hkawˇ “awˬ ceuˬ hkʼa peu˗eˬ htaꞈ lawˇ nyi˗o” tehꞈ kʼoˆ ve lehˬ, shi, maˇ heˆ leh hpu awˬ tehˬ hpehꞈ ve laˇ tehꞈ chaˬ nyi tuˬ ve awˬ hkʼaˇ htaꞈ kʼoˆ gaˇ ve yoˬ. Chi htaꞈ pa taw, ngaˬ hui gʼa kaˇ ve leh gʼa gʼaw ve awˬ lawn awˬ tehˬ hpehꞈ ve laˇ tehꞈ gʼa chaˬ nyi cawˇ ve yoˬ. Chi ve lehˬ Hteˇsaˍlawˇniˆ venˇ lo chehˇ ve awˬ viˉ awˬ nyi awˬ pon a yeˇ uiˍ jaˇ ve yoˬ. Tuꞈ jaˇ hkanˍ jaˇ ve gaˬ la paˇ neˇ jaˇ˗oˬ ve pa taw, yawˇ hui aꞈ kehˉ chi beuꞈ teˇ co˗e ngaˬ hui awˬ pon a yeˇ uiˍ jaˇ ve yoˬ. Awˬ nu ve chaw kʼoˆ ve teˇ ceuˬ le le htaꞈ ngaˬ hui yonˍ ve aꞈ kehˉ, ngaˬ hui gʼaw leh gʼa kaˇ ve awˬ ceuˬ Liꞈ hpu hkʼaw leh Gʼuiˬ sha ve kanˉ hkʼaˇ hkʼaw gʼa henˇ taˍ ve htaꞈ tehˆ daꞈ leh hkʼa dehꞈ dawˇ nyi cawˇ ve yoˬ. Ngaˬ hui chi hkʼe te ve kʼo, neˇ teˇ hpaˍ geh laˬ ve aˬ htoꞈ ma ve awˬ lawn htawˇ maˇ kʼoˆ ngaˬ hui maˇ yonˍ.—Tawˇ naˉ ve 14:15; 1 Tiˆmoˉseˍ 4:1.

16. Ngaˬ hui aˬ htoꞈ ma ve awˬ lawn htaꞈ hkʼa dehꞈ dawˇ law gʼa ve le? Leh chi ngaˬ hui aˬ htoꞈ ma te gaˇ tuˬ te laˇ ve le?

¹⁶ Yaˬhoˉvaˬ ve kanˉ te ve chaw tuꞈ jaˇ hkanˍ ve htaꞈ ponˬ kʼai gʼa tuˬ yoˬ. Yaꞈ hkʼaˇ, teˇ gʼaˇ leh teˇ gʼaˇ awˬ pon shawˉ pawˍ hkʼaˬ hkʼe hpehꞈ la tuˬ ve htaꞈ maˇ shiˍ. (Yaˍkoˆ 4:14) Ngaˬ hui tuꞈ jaˇ hkanˍ ve htaꞈ gʼa ponˬ ve, maˇ heˆ leh tuꞈ jaˇ hkanˍ jaˇ ve maˇ gaˬ sheˍ htaˇ suh˗e ve htawˇ, ngaˬ hui Yaˬhoˉvaˬ htaꞈ hkʼaˬ htaˆ kaꞈ ka tiꞈ yeˬ ve kʼo, ngaˬ hui laꞈ shawnˍ gʼa tuˬ ve lehˬ, co co taiˍ taiˍ ve a shaꞈ hpehꞈ ve yoˬ. Leuˆ yuˬ taˍ ve chaw lehˬ mvuhˇ naw ma hkʼoˆ lo Yeˍsuˆ geh gʼa chehˇ leh awˬ kaˍ awˬ nu ve yawˬ miˬ guiˬ hkʼoˆ lo Paˍraˍdiˇsuˆ hkʼaw gʼa chehˇ tuˬ yoˬ. Ngaˬ hui teˇ gʼaˇ le le dawˇ law kuiˬ daꞈ jaˇ ve htaꞈ a yeˇ yuˬ leh Yaˬhoˉvaˬ ve awˬ nyi gaˬ la tuˬ ve htaꞈ hkʼaˬ htaˆ kaꞈ gu hehnˇ taˍ cawˇ ve yoˬ.