Yeˍsuˆ anˇ tuˬ te ve htaꞈ ngaˬ hui aˬ htoꞈ ma henˇ yuˬ gʼa ve le?

1. Yeˍsuˆ anˇ tuˬ te ve awˉ lawˉ teˇ pawˆ ve awˬ lawn kʼoˆ maˍ laˇ sheˍ.

Yeˍsuˆ miˬ guiˬ hkʼoˆ lo Gʼuiˬ sha ve kanˉ tanˬ te ve 29 hkʼawꞈ C.E. htaˇ, oˇ ve teˇ hkʼawꞈ peuˬ la paˇ neˇ htaˇ ve awˬ lawn htaꞈ dawˇ nyi sheˍ. Yeˍsuˆ, yawˇ ve awˬ e Maˍriˆ, leh awˬ laꞈ gʼawˇ teˇ hpaˍ Yeˍsuˆ paw kuiˬ Naˍzaˍrehˆ venˇ awˬ na hpawˇ Kaˍnaˆ hkʼaˆ hkʼaw hkehˉ caˇ kuiˬ lo laˬ tuˬ shu kuˬ piˇ ve yoˬ. Maˍriˆ lehˬ awˬ miˇ ma heuˆ shehˍ hpaˇ leh awˬ hpawˇ heuˆ shehˍ ma ve yehˬ kʼa htaꞈ meuˆ daꞈ leh Maˍriˆ hkehˉ chaw htaꞈ haꞈ yuˬ tuˬ ca ga piˇ˗e ve yoˬ. Yaꞈ hkʼaˇ, hkehˉ caˇ kuiˬ lo hti caˇ hti dawˬ chehˇ htaˇ shoꞈ shaꞈ ve teˇ lawn cawˬ ve yoˬ. Hkehˉ caˇ kuiˬ lo a pehˉ meuˇ gʼuiˬ peuˬ la yoˬb ve pa taw, chi awˬ miˇ ma heuˆ shehˍ hpaˇ, awˬ hpawˇ heuˆ shehˍ ma leh yawˇ hui ve yehˬ kʼa mehˆ hpfuhˇ luˬ tuˬ te piˇ ve yoˬ. Chi hkʼe hpehꞈ ve lehˬ hkehˉ caˇ kuiˬ lo yawˇ hui dawˇ taˍ ve aꞈ kehˉ chaw laˬ maˇ jaˇ ve pa taw yoˬ. “A pehˉ meuˇ gʼuiˬ maˇ cawˬ˗oˬ” tehꞈ Maˍriˆ yawˇ ve Yaˇ paˍ htaꞈ haˆ ca kʼoˆ piˇ ve yoˬ. (Yoˇhanˬ 2:1-3) Leh Yeˍsuˆ hkʼaˬ hkʼe te ve le? Yeˍsuˆ anˇ tuˬ te ve lehˬ iˉ kaˆ htaꞈ “daꞈ ve a pehˉ meuˇ gʼuiˬ” te ve yoˬ.—Yoˇhanˬ 2:9, 10.

2-3. (a) Yeˍsuˆ kanˇ paˆ yehˇ leh aˬ htoꞈ ma awˬ pon anˇ tuˬ te ve le? (b) Awˬ lawn chi ve hkʼaw Yeˍsuˆ anˇ tuˬ te ve htaꞈ ngaˬ hui awˬ bon gʼa tuˬ hkʼaˬ hkʼe gʼa te ve le?

² Yeˍsuˆ miˬ guiˬ hkʼoˆ lo Gʼuiˬ sha ve kanˉ te htaˇ, yawˇ anˇ tuˬ laiˉ ceuˬ te ve yoˬ.c Yeˍsuˆ chaw laiˉ meunˍ gʼaˇ htaꞈ ga piˇ tuˬ yawˇ kanˇ paˆ yehˇ leh anˇ tuˬ te ve yoˬ. Tawˇ pa haˉ te kʼo, chaw awˬ moˍ lonˉ chi teˇ hpaˍ htaꞈ caˍ piˇ tuˬ yawˇ anˇ tuˬ 2 pawˆ te ve yoˬ. Awˉ lawˉ teˇ pawˆ lehˬ, hawˉ hkʼaˆ htaꞈ ceh tiˉ gʼaw ve kaꞈ 5,000 gʼaˇ cawˬ ve yoˬ. Leh 2 pawˆ teˇ pawˆ htawˇ, hawˉ hkʼaˆ htaꞈ ceh tiˉ gʼaw ve kaꞈ 4,000 gʼaˇ cawˬ ve yoˬ. Chi ve 2 pawˆ lehˬ yaˇ miˇ leh yaˇ ehˉ kaꞈ teˇ geh caˇ ve yoˬ. Yeˍsuˆ chaw awˬ moˍ lonˉ 27,000 gʼaˇ htaꞈ caˇ tuˬ caˍ piˇ ve yoˬ. (Maꞈhtehˍ 14:15-21; 15:32-38) Leh anˇ tuˬ te ve chi 2 pawˆ lehˬ Yeˍsuˆ chaw naˬ laiˉ gʼaˇ htaꞈ kaꞈ gu na˗e piˇ ve yoˬ. (Maꞈhtehˍ 14:14; 15:30, 31) Yeˍsuˆ chaw naˬ htaꞈ gu na˗e piˇ leh caˇ tuˬ caˍ piˇ ve, chi chaw awˬ moˍ lonˉ hkʼaˬ hkʼe taw anˇ jaˇ ve htaꞈ dawˇ nyi sheˍ!

³ Chi beuꞈ teˇ co˗e ngaˬ hui Yeˍsuˆ anˇ tuˬ te ve laiˉ ceuˬ htaꞈ henˇ yuˬ gʼa ve yoˬ. Yeˍsuˆ anˇ tuˬ te ve ngaˬ hui aˬ htoꞈ ma henˇ yuˬ gʼa ve, awˬ lawn chi ve hkʼaw teˇ geh henˇ tuˬ yoˬ. Yeˍsuˆ anˇ tuˬ te htaˇ, nyi ma nuˇ nehˬ ve leh ha kʼaˉ puiˉ ve tehꞈ hkʼaˬ hkʼe hpeuꞈ maw laˇ ve kaꞈ teˇ geh henˇ tuˬ yoˬ. Leh ngaˬ hui yawˇ htaꞈ hkʼaˬ hkʼe henˇ yuˬ gʼa tuˬ le, kaꞈ teˇ geh henˇ tuˬ yoˬ.

YAˬHOˉVAˬ LEH YEˍSUˆ ANˇ TUˬ TE VE AWˬ LAWN HTAꞈ NGAˬ HUI HENˇ GʼA VE

4. Yeˍsuˆ anˇ tuˬ te ve awˬ lawn a shu htaꞈ caˉ daꞈ ve ngaˬ hui htaꞈ hkʼaˬ hkʼe maˍ laˇ ve le?

⁴ Yeˍsuˆ anˇ tuˬ te ve yawˇ htaꞈ caˉ ve awˬ lawn ceh tiˉ ngaˬ hui htaꞈ maˍ laˇ ve maˇ heˆ. Yaꞈ hkʼaˇ, yawˇ ve Awˬ pa Yaˬhoˉvaˬ htaꞈ caˉ daꞈ ve kaꞈ ngaˬ hui htaꞈ maˍ laˇ ve yoˬ. Aˬ htoꞈ ma pa taw le? Awˬ lawn kʼo, Yaˬhoˉvaˬ lehˬ Yeˍsuˆ anˇ tuˬ te ve kanˇ paˆ piˇ shehˍ hpaˇ hpehꞈ ve yoˬ. Tcuh yaˇ liꞈ 10:38 hkʼaw kʼoˆ ve, “Gʼuiˬ sha lehˬ, daꞈ ve kehˬ ve Awˬ ha hpu maˇ kʼoˆ, kanˇ paˆ maˇ kʼoˆ, [Yeˍsuˆ] htaꞈ ngeuˍ pfuhˍ piˇ ve awˬ lawn leh, Gʼuiˬ sha [Yeˍsuˆ] geh chehˇ ve pa taw, [Yeˍsuˆ] teˇ kaˬ peuˬ teˇ kaˬ lo kʼai chehˇ htaˇ, daꞈ ve htaꞈ te leh, neˇ haiˬ fawˉ mehˍ ve chaw hkʼa peu˗eˬ htaꞈ gu na˗e piˇ ve awˬ lawn yoˬ.” Chi hkʼoˆ kaꞈ, Yeˍsuˆ kʼoˆ ve leh te ve anˇ tuˬ awˬ ceuˬ hkʼa peu˗eˬ Yaˬhoˉvaˬ ve te hkʼaˇ dawˇ hkʼaˇ hkʼaˬ hkʼe cawˬ ve htaꞈ hpeuꞈ maw laˇ ve yoˬ. (Yoˇhanˬ 14:9) Yeˍsuˆ anˇ tuˬ te ve 3 ceuˬ ngaˬ hui henˇ yuˬ gʼa ve htaꞈ teˇ geh nyi sheˍ.

5. Yeˍsuˆ anˇ tuˬ te tuˬ aˬ htoꞈ ma te piˇ ve le? (Maꞈhtehˍ 20:30-34)

⁵ Awˉ lawˉ teˇ ceuˬ lehˬ Yeˍsuˆ leh yawˇ ve Awˬ pa Yaˬhoˉvaˬ ngaˬ hui htaꞈ haꞈ jaˇ ve. Yeˍsuˆ miˬ guiˬ hkʼoˆ chehˇ htaˇ chaw yaˇ tuꞈ ve hkanˍ ve htaꞈ yawˇ anˇ tuˬ te leh ga piˇ ve lehˬ, yawˇ chaw yaˇ htaꞈ hkʼaˬ hkʼe taw haꞈ ve tehꞈ hpeuꞈ maw laˇ ve yoˬ. Teˇ pawˆ htaˇ mehˆ cuˉ ve hawˉ hkʼaˆ 2 gʼaˇ Yeˍsuˆ ga laˇ tuˬ lawˬ ve yoˬ. (Maꞈhtehˍ 20:30-34 gʼaw sheˍ.) Liꞈ hpu hkʼaw kʼoˆ ve, Yeˍsuˆ “ha kʼaˉ” ve pa taw yawˇ hui htaꞈ gu na˗e piˇ ve yoˬ. Ha kʼaˉ ve chi ve lehˬ nyi ma hkʼaw tawˆ la ve awˬ ceuˬ hpehꞈ ve yoˬ. Chi hkʼe ve htaꞈ pa taw Yeˍsuˆ meuꞈ ve kaˆ ve chaw htaꞈ caˍ piˇ leh hkiˬ tuꞈ keuˆ ve hawˉ hkʼaˆ teˇ gʼaˇ htaꞈ kaꞈ yawˇ gu na˗e piˇ ve yoˬ. Chi lehˬ Yeˍsuˆ yawˇ hui htaꞈ haꞈ ve tehꞈ hpeuꞈ maw piˇ ve yoˬ. (Maꞈhtehˍ 15:32; Maˍkuˆ 1:41) Chi ve lehˬ Yaˬhoˉvaˬ ha kʼaˉ puiˉ jaˇ ve Gʼuiˬ sha hpehꞈ ve tehꞈ ngaˬ hui yonˍ gʼa leh ngaˬ hui tuꞈ ve hkanˍ ve gʼa hpuˇ htaˇ, Yeˍsuˆ mawˬ leh yawˇ ngaˬ hui htaꞈ haꞈ leh nyi ma naˬ jaˇ ve yoˬ. (Luˉkaꞈ 1:78; 1 Peˍtruˆ 5:7) Yaˬhoˉvaˬ leh Yeˍsuˆ miˬ guiˬ hkʼoˆ lo tuꞈ ve hkanˍ ve maˇ cawˬ tcuh gaˇ ve yoˬ.

6. Yaˬhoˉvaˬ lehˬ Yeˍsuˆ htaꞈ aˬ htoꞈ ma te tuˬ kanˇ paˆ piˇ ve le?

⁶ 2 hkʼaˇ teˇ hkʼaˇ lehˬ, Yaˬhoˉvaˬ Yeˍsuˆ htaꞈ kanˇ paˆ piˇ leh chaw yaˇ shoꞈ shaꞈ ve gʼa hpuˇ chehˇ ve hkʼa peu˗eˬ htaꞈ gu tcuh ve. Yeˍsuˆ te ve anˇ tuˬ lehˬ chaw yaˇ gu maˇ gʼa ve shoꞈ shaꞈ ve hkʼa peu˗eˬ htaꞈ kanˇ paˆ yehˇ leh gu laˇ tuˬ yoˬ tehꞈ hpeuꞈ maw laˇ ve yoˬ. Tawˇ pa haˉ te kʼo, chaw yaˇ venˇ baˆ htaꞈ pa taw naˬ ve gawˬ ve leh suh ve gʼa hpuˇ chehˇ ve shoꞈ shaꞈ ve hkʼa peu˗eˬ htaꞈ Yeˍsuˆ kanˇ paˆ yehˇ leh gu laˇ tuˬ yoˬ. (Maꞈhtehˍ 9:1-6; Roˉmaꞈ 5:12, 18, 19) Yeˍsuˆ te ve anˇ tuˬ lehˬ, naˬ ve gawˬ ve teˇ ceuˬ le le htaꞈ yawˇ gu na˗e piˇ leh suh ve htaꞈ kaꞈ kʼawꞈ teꞈ tu la piˇ gʼa ve tehꞈ hpeuꞈ maw laˇ ve yoˬ. (Maꞈhtehˍ 4:23; Yoˇhanˬ 11:43, 44) Chi hkʼoˆ kaꞈ, Yeˍsuˆ lehˬ mvuhˇ yeˬ mvuhˇ haw htaꞈ jehˇ piˇ gʼa leh neˇ htaꞈ kaꞈ gʼaꞈ kʼoˬ piˇ gʼa ve kanˇ paˆ cawˬ ve yoˬ. (Maˍkuˆ 4:37-39; Luˉkaꞈ 8:2) Yaˬhoˉvaˬ Yeˍsuˆ htaꞈ kanˇ paˆ chi hkʼe ve piˇ ve ngaˬ hui ha lehˬ jaˇ ve yoˬ.

7-8. (a) Yeˍsuˆ anˇ tuˬ te ve ngaˬ hui aˬ htoꞈ ma htaꞈ yonˍ gʼa tuˬ te laˇ ve le? (b) Miˬ guiˬ awˬ suhˉ hkʼaw aˬ htoꞈ ma anˇ tuˬ te ve htaꞈ nawˬ mawˬ gaˇ ve le?

⁷ 3 hkʼaˇ teˇ hkʼaˇ lehˬ, Gʼuiˬ sha yawˇ ka tiꞈ te taˍ ve hkʼe, yawˇ ve mvuhˇ miˬ lehˬ daꞈ ve awˬ ceuˬ te laˇ tuˬ yoˬ tehꞈ ngaˬ hui hkʼa dehꞈ yonˍ gʼa ve. Yeˍsuˆ anˇ tuˬ te ve lehˬ yawˇ Jawˇ mawˇ te leh miˬ guiˬ hkʼoˆ lo uˉ peunˍ htaˇ, yawˇ teˇ ceuˬ le le te gʼa ve tehꞈ ngaˬ hui shiˍ tuˬ te laˇ ve yoˬ. Oˇ ve teˇ yanˇ hkʼaˬ hkʼe hpehꞈ tuˬ ve htaꞈ dawˇ nyi sheˍ. Yeˍsuˆ lehˬ naˬ ve gawˬ ve teˇ ceuˬ le le htaꞈ maˇ cawˬ tcuh˗o ve pa taw, ngaˬ hui biˇ ve chaw hpehꞈ leh naˬ ve gawˬ ve kaꞈ maˇ gʼa hpuˇ˗o. Leh chaw teˇ gʼaˇ kaꞈ maˇ kʼawꞈ gʼa suh˗o. (Iˉsaˍyaˆ 33:24; 35:5, 6; Hpeuꞈ maˍ ve 21:3, 4) Ngaˬ hui meuꞈ ve kaˆ ve maˇ cawˬ˗o leh mvuhˇ yeˬ mvuhˇ haw lonˉ kaꞈ maˇ gʼa hpuˇ˗o. (Iˉsaˍyaˆ 25:6; Maˍkuˆ 4:41) Ngaˬ hui haꞈ ve chaw kʼawꞈ teꞈ tu la ve htaꞈ gʼa kʼawꞈ mawˬ daꞈ ve ha lehˬ jaˇ tuˬ yoˬ. Yawˇ hui htaꞈ “tuˍ hpfuh awˬ hkʼaw lo” kuˬ tawˆ piˇ tuˬ yoˬ. (Yoˇhanˬ 5:28, 29) Hkʼe kʼo nawˬ miˬ guiˬ awˬ suhˉ hkʼaw anˇ tuˬ te ve hkʼaˬ ve teˇ ceuˬ htaꞈ mawˬ gaˇ ve le?

⁸ Yeˍsuˆ anˇ tuˬ te htaˇ yawˇ ha kʼaˉ puiˉ leh nyi ma nuˇ nehˬ jaˇ ve yoˬ. Chi hkʼe ve te hkʼaˇ dawˇ hkʼaˇ htaꞈ ngaˬ hui teˇ gʼaˇ le le henˇ yuˬ cawˇ ve yoˬ. Yeˍsuˆ anˇ tuˬ te ve 2 pawˆ pawˆ htaꞈ teˇ geh nyi sheˍ. Awˉ lawˉ teˇ pawˆ lehˬ Kaˍmaˆ hkʼaˆ hkehˉ caˇ kuiˬ hkʼaw yoˬ.

NYI MA NUˇ NEHˬ VE AWˬ LAWN HTAꞈ HENˇ VE

9. Hkehˉ caˇ kuiˬ hkʼaw aˬ htoꞈ ma te Yeˍsuˆ anˇ tuˬ te ve le? (Yoˇhanˬ 2:6-10)

⁹ Yoˇhanˬ liꞈ 2:6-10 gʼaw sheˍ. Hkehˉ caˇ kuiˬ hkʼaw a pehˉ meuˇ gʼuiˬ peuˬ la paˇ neˇ ve teˇ yanˇ awˬ lawn chi htaꞈ gu tuˬ Yeˍsuˆ ve awˬ vuiˬ hpehꞈ ve laˇ? Maˇ heˆ. Meˍsiˉyaꞈ lehˬ anˇ tuˬ te leh a pehˉ meuˇ gʼuiˬ gʼa te cawˇ ve tehꞈ, Liꞈ hpu hkʼaw tcuh kaˍ paˍ ve tawˇ hkawˇ maˇ gʼa kʼoˆ laˇ taˬ. Nawˬ ve hkehˉ caˇ kuiˬ lo a pehˉ meuˇ gʼuiˬ maˇ cawˬ˗o htaˇ, hkʼaˬ hkʼe te tuˬ ve htaꞈ dawˇ nyi sheˍ. Awˬ miˇ ma heuˆ shehˍ hpaˇ leh awˬ hpawˇ heuˆ shehˍ ma ve yehˬ kʼa hkʼaˬ hkʼe dawˇ ve htaꞈ Yeˍsuˆ na gʼa ve yoˬ. Awˬ miˇ ma heuˆ shehˍ hpaˇ leh awˬ hpawˇ heuˆ shehˍ ma htaꞈ Yeˍsuˆ ha kʼaˉ ve pa taw, yawˇ hui maˇ gʼa yaꞈ taw tuˬ Yeˍsuˆ ga piˇ gaˇ ve yoˬ. Chi htaꞈ pa taw Yeˍsuˆ anˇ tuˬ te leh iˉ kaˆ 390 leˆ ve htaꞈ daꞈ ve a pehˉ meuˇ gʼuiˬ te ve yoˬ. Yeˍsuˆ a pehˉ meuˇ gʼuiˬ chi hkʼe ma ma te ve lehˬ awˬ gʼuˇ suhˍ hpawˇ awˬ pon kaꞈ hpehꞈ ve yoˬ. Awˬ miˇ ma heuˆ shehˍ hpaˇ leh awˬ hpawˇ heuˆ shehˍ ma hawˇ leh yehˇ tuˬ awˬ pon kaꞈ hpehꞈ ve yoˬ. Yawˇ huiˉ maˬ Yeˍsuˆ anˇ tuˬ te ve htaꞈ gʼa mawˬ htaˇ, yawˇ hui maˇ dawˇ haˍ˗o ve yoˬ hehˉ.

10. Yoˇhanˬ liꞈ kaˇ nanˉ uiˍ 2 hkʼaw nyi ma pfuhˇ lawꞈ lawꞈ ve awˬ lawn aˬ htoꞈ ma gʼa mawˬ ve le? (Awˬ han htaꞈ nyi sheˍ.)

¹⁰ Yoˇhanˬ liꞈ kaˇ nanˉ uiˍ 2 hkʼaw bvuhꞈ taˍ ve awˬ lawn htaꞈ teˇ geh nyi sheˍ. Yeˍsuˆ iˉ mvuhˇ kʼoˍ hkʼaw iˉ kaˆ yawˇ hkʼaˇ yawˇ maˇ gʼa hkʼo keu ve htaꞈ nawˬ gʼa mawˬ ve yoˬ. Awˬ nu ve chaw Yeˍsuˆ htaꞈ a yeˇ maˇ gʼa yuˬ jaˇ tuˬ awˬ ceˬ htaꞈ te tcuh ve yoˬ. (kaˇ nanˉ ehˉ 6, 7) Yeˍsuˆ iˉ kaˆ htaꞈ a pehˉ meuˇ gʼuiˬ hpehꞈ la piˇ peuˬ hkʼawꞈ nawˉ, a pehˉ meuˇ gʼuiˬ hkehˉ caˇ ve awˬ hoˉ htaꞈ Yeˍsuˆ maˇ gʼa yuˬ piˇ. Yaꞈ hkʼaˇ, Yeˍsuˆ lehˬ awˬ ceˬ htaꞈ yuˬ piˇ tcuh ve yoˬ. (Kaˇ nanˉ ehˉ 8) Leh Yeˍsuˆ kaꞈ hkehˉ caˇ la ve chaw htaꞈ a pehˉ meuˇ gʼuiˬ maˇ gʼa chiˇ taw piˇ. ‘Ngaˬ te taˍ ve dawˬ nyi sheˍ’ tehꞈ kaꞈ maˇ gʼa kʼoˆ piˇ.

11. Yeˍsuˆ anˇ tuˬ te ve awˬ lawn htaꞈ ngaˬ hui aˬ htoꞈ ma henˇ yuˬ gʼa ve le?

¹¹ Yeˍsuˆ anˇ tuˬ te leh iˉ kaˆ htaꞈ a pehˉ meuˇ gʼuiˬ hpehꞈ la piˇ ve awˬ lawn ngaˬ hui aˬ htoꞈ ma henˇ yuˬ gʼa ve le? Yeˍsuˆ anˇ tuˬ te gʼa ve chi yawˇ cheuˬ ve tehꞈ maˇ gʼa kʼoˆ leh nyi ma nuˇ nehˬ ve htaꞈ ngaˬ hui henˇ yuˬ gʼa ve yoˬ. Yawˇ te gʼa ve awˬ ceuˬ yawˇ cheuˬ ve tehꞈ teˇ pawˆ˗ehˬ kaꞈ maˇ gʼa kʼoˆ jaw. Yawˇ nyi ma nuˇ nehˬ leh hkʼaˬ htaˆ kaꞈ Yaˬhoˉvaˬ htaꞈ chiˇ mvuh ve yoˬ. Yeˍsuˆ yawˇ awˬ ceuˬ chi ve teˇ hpaˍ te gʼa ve lehˬ Gʼuiˬ sha ga laˇ ve tehꞈ kʼoˆ ve yoˬ. (Yoˇhanˬ 5:19, 30; 8:28) Ngaˬ hui Yeˍsuˆ htaꞈ henˇ yuˬ leh hkʼaˬ htaˆ kaꞈ nyi ma nuˇ nehˬ ve kʼo, ngaˬ hui te gʼa ve awˬ ceuˬ htaꞈ cheuˬ ve tehꞈ maˇ kʼoˆ. Ngaˬ hui Gʼuiˬ sha ve kanˉ hkʼaˬ hkʼe hpawˇ te ve maˇ kʼoˆ, ngaˬ hui hkʼaˇ ngaˬ hui awˬ to htaꞈ taˇ chiˇ mvuh. Yaꞈ hkʼaˇ, ngaˬ hui Yaˬhoˉvaˬ ve kanˉ daꞈ jaˇ ve chi hkʼe ve gʼa te ve lehˬ yawˇ htaꞈ chiˇ mvuh cawˇ ve yoˬ. (Yeˍraˍmiˆ 9:23, 24) Ngaˬ hui te gʼa ve awˬ ceuˬ hkʼa peu˗eˬ lehˬ Yaˬhoˉvaˬ maˇ ga laˇ ve kʼo, ngaˬ hui daꞈ ve awˬ ceuˬ htaꞈ te maˇ gʼa taˬ.—1 Kawˇrenˍhtuˆ 1:26-31.

12. Yeˍsuˆ nyi ma nuˇ nehˬ ve htaꞈ ngaˬ hui henˇ yuˬ gʼa ve awˬ nu ve teˇ hkʼaˇ lehˬ aˬ htoꞈ ma le? Tawˇ pa haˉ kʼoˆ maˍ laˇ sheˍ.

¹² Chi hkʼoˆ kaꞈ Yeˍsuˆ nyi ma nuˇ nehˬ ve htaꞈ ngaˬ hui henˇ yuˬ gʼa ve teˇ hkʼaˇ cawˬ sheˍ ve yoˬ. Awˬ lawn chi ve htaꞈ dawˇ nyi sheˍ. Ga piˇ shehˍ hpaˇ yaˇ nehˬ hkawꞈ nyi shinˉ nyi htaˇ bon maˍ ve awˉ lawˉ teˇ pawˆ hpehꞈ ve pa taw, gu tuˬ nyi haꞈ shaˉ paˍ ga piˇ ve awˬ yanˇ gʼa yehˇ maw jaˇ ve yoˬ. Hkʼe te leh, awˬ viˉ awˬ nyi yaˇ nehˬ chi teˇ gʼaˇ bon maˍ cheuˬ jaˇ ve pa taw, Hkriꞈ yaˇ awˬ moˍ hkʼaw awˬ viˉ awˬ nyi teˇ gʼaˇ le le kaꞈ dawˇ cawˇ ve yoˬ. Hpawnˬ daꞈ peuˬ hkʼawꞈ nawˉ awˬ viˉ awˬ nyi laiˉ gʼaˇ nyi haꞈ shaˉ paˍ geh laˬ leh awˬ viˉ awˬ nyi yaˇ nehˬ chi teˇ gʼaˇ bon maˍ ve daꞈ jaˇ tehꞈ kʼoˆ ve yoˬ. Nyi haꞈ shaˉ paˍ ‘ngaˬ ga piˇ ve pa taw’ yawˇ chi hkʼe te gʼa ve tehꞈ kʼoˆ˗aw laˇ? Maˇ heˆ leh yawˇ nyi ma nuˇ nehˬ ve hkʼaw ‘yoˬ, yawˇ bon maˍ ve daꞈ jaˇ’ tehꞈ kʼoˆ˗aw laˇ? Ngaˬ hui nyi ma nuˇ nehˬ ve kʼo, awˬ nu ve chaw daꞈ ve htaꞈ te gʼa ve lehˬ ngaˬ hui htaꞈ pa taw yoˬ tehꞈ maˇ kʼoˆ. Yaꞈ hkʼaˇ, ngaˬ hui te ve awˬ ceuˬ htaꞈ Yaˬhoˉvaˬ mawˬ leh awˬ hpfuhˇ shiˍ ve tehꞈ ngaˬ hui shiˍ ve yoˬ. (Maꞈhtehˍ 6:2-4; Heˍbrehˇ 13:16 htaꞈ tehˆ daꞈ sheˍ.) Nyi ma nuˇ nehˬ ve awˬ lawn ngaˬ hui Yeˍsuˆ htaꞈ henˇ yuˬ ve kʼo, Yaˬhoˉvaˬ ngaˬ hui htaꞈ nyi hkʼaˇ suh jaˇ tuˬ yoˬ.—1 Peˍtruˆ 5:6.

SHU HTAꞈ HA KʼAˉ LEH NA GʼA PIˇ VE AWˬ LAWN HENˇ VE

13. Naˍiˉnaˆ hkʼaˆ lo Yeˍsuˆ gaˬ la paˇ neˇ htaˇ, aˬ htoꞈ ma htaꞈ mawˬ ve le? Leh yawˇ aˬ htoꞈ ma te ve le? (Luˉkaꞈ 7:11-15)

¹³ Luˉkaꞈ liꞈ 7:11-15 gʼaw sheˍ. Yeˍsuˆ Gʼuiˬ sha ve kanˉ te ve teˇ hkʼawꞈ hpaˆ gaˬ˗oˬ htaˇ, oˇ ve teˇ yanˇ ve awˬ lawn htaꞈ dawˇ nyi sheˍ. Gaˍliˍlehˇ mvuhˇ miˬ Suˇnenˍ venˇ maˇ vuiˇ maˇ neˇ kuiˬ lo Naˍiˉnaˆ hkʼaˆ lo Yeˍsuˆ kʼai chehˇ ve yoˬ. Chi awˬ gʼuˇ suhˍ aˬ laˬ hkʼe 900 hkʼawꞈ htaˇ tcuh kaˍ paˍ Eˇliˇshehˇ yaˇ miˇ teˇ gʼaˇ ve yaˇ paˍ htaꞈ kʼawꞈ teꞈ tu la piˇ kuiˬ awˬ ti hpehꞈ ve yoˬ. (2 Jawˇmawˇ 4:32-37) Yeˍsuˆ Naˍiˉnaˆ hkʼaˆ taꞈ meꞈ hpeꞈ lo gaˬ la paˇ neˇ htaˇ, suh taˍ ve chaw ca tuˍ˗e tuˬ shu taˆ laˬ chehˇ ve yoˬ. Suh taˍ ve chaw oˇ ve lehˬ mehˇ chawˇ ma ve yaˇ paˍ teˇ gʼaˇ tiˉ hpehꞈ ve pa taw, nyi ma luˬ jaˇ ve yoˬ. Oˇ kaˬ lo ve chaw maˇ maˇ mehˇ chawˇ ma nyi ma luˬ jaˇ ve geh teˇ geh juˇ tawˆ la chehˇ ve yoˬ. Yeˍsuˆ chaw oˇ ve teˇ moˍ geh kʼai leh mehˇ chawˇ ma nyi ma luˬ jaˇ ve awˬ pon anˇ tuˬ te piˇ ve yoˬ. Yeˍsuˆ lehˬ yawˇ ve yaˇ paˍ htaꞈ kʼawꞈ teꞈ tu la piˇ ve yoˬ. Ha lehˬ ve bon hkawˇ liꞈ hkʼaw bvuhꞈ taˍ ve 3 pawˆ hkʼaw chi ve teˇ pawˆ lehˬ kʼawꞈ teꞈ tu la piˇ ve awˉ lawˉ teˇ pawˆ hpehꞈ ve yoˬ.

14. Luˉkaꞈ liꞈ kaˇ nanˉ uiˍ 7 hkʼaw ngaˬ hui nyi ma pfuhˇ lawꞈ lawꞈ ve awˬ lawn aˬ htoꞈ ma htaꞈ mawˬ ve le? (Awˬ han htaꞈ nyi sheˍ.)

¹⁴ Luˉkaꞈ liꞈ kaˇ nanˉ uiˍ 7 hkʼaw ve htaꞈ caˉ daꞈ ve, nyi ma pfuhˇ lawꞈ lawꞈ ve awˬ lawn htaꞈ teˇ geh nyi sheˍ. Mehˇ chawˇ ma chi teˇ gʼaˇ nyi ma luˬ jaˇ ve htaꞈ Yeˍsuˆ gʼa mawˬ ve pa taw, yawˇ ha kʼaˉ ve yoˬ. (kaˇ nanˉ ehˉ 13) Yawˇ ve yaˇ paˍ taˆ laˬ chehˇ ve gʼuˇ suhˍ lo yawˇ hawˬ laˬ chehˇ ve htaꞈ Yeˍsuˆ gʼa mawˬ ve yoˬ. Hkʼe te leh, Yeˍsuˆ yawˇ htaꞈ ha kʼaˉ jaˇ ve yoˬ. Yaꞈ hkʼaˇ, Yeˍsuˆ ha kʼaˉ ve ceh tiˉ maˇ heˆ. Yawˇ hkʼaˬ hkʼe dawˇ ve htaꞈ kaꞈ Yeˍsuˆ na gʼa ve yoˬ. Yeˍsuˆ nyi ma nuˇ nehˬ ve hkʼaw yawˇ htaꞈ tawˇ yaw piˇ ve, “taˇ hawˬ” tehꞈ kʼoˆ piˇ ve yoˬ. Leh Yeˍsuˆ kaꞈ mehˇ chawˇ ma chi teˇ gʼaˇ htaꞈ ga piˇ ve yoˬ. Yeˍsuˆ lehˬ yawˇ ve yaˇ paˍ htaꞈ kʼawꞈ teꞈ tu la piˇ leh “awˬ e ve laꞈ hkʼaw lo yawˇ htaꞈ aꞈ piˇ ve yoˬ.”—Kaˇ nanˉ ehˉ 14, 15.

15. Yeˍsuˆ anˇ tuˬ te ve awˬ lawn ngaˬ hui aˬ htoꞈ ma henˇ yuˬ gʼa ve le?

¹⁵ Yeˍsuˆ mehˇ chawˇ ma ve yaˇ paˍ htaꞈ kʼawꞈ teꞈ tu la piˇ ve awˬ lawn ngaˬ hui aˬ htoꞈ ma henˇ yuˬ gʼa ve le? Nyi ma luˬ chehˇ ve chaw htaꞈ ngaˬ hui ha kʼaˉ leh na gʼa piˇ cawˇ ve tehꞈ hpeuꞈ maw laˇ ve yoˬ. Yeˍsuˆ chaw htaꞈ kʼawꞈ teꞈ tu la piˇ ve hkʼe ngaˬ hui te maˇ gʼa ve htawˇ, Yeˍsuˆ shu htaꞈ chaˬ nyi puiˉ ve htaꞈ ngaˬ hui henˇ yuˬ gʼa ve yoˬ. Chi hkʼoˆ kaꞈ, nyi ma luˬ chehˇ ve chaw htaꞈ ngaˬ hui awˉ lawˉ tawˇ yaw piˇ ve, maˇ heˆ leh teˇ ceuˬ ceuˬ ga piˇ tuˬ te ve leh awˬ gʼaˇ piˇ ve yoˬ.d (Tawˇ naˉ ve 17:17; 2 Kawˇrenˍhtuˆ 1:3, 4; 1 Peˍtruˆ 3:8) Hkʼa sha sha˗ehˬ ve tawˇ yaw piˇ ve, maˇ heˆ leh teˇ ceuˬ ceuˬ te piˇ ve kaꞈ yawˇ hui awˬ gʼaˇ gʼa jaˇ tuˬ te piˇ ve yoˬ hehˉ.

16. Awˬ han hkʼaw mawˬ ve hkʼe, awˬ viˉ awˬ nyi yaˇ miˇ yawˇ ve yaˇ miˇ suh˗e gehˇ sheˍ ve awˬ lawn nawˬ htaꞈ aˬ htoꞈ ma maˍ laˇ ve le?

¹⁶ Awˬ lawn teˇ lawn htaꞈ teˇ geh nyi sheˍ. Ponˬ laˬ ve laiˉ hkʼawꞈ htaˇ Hkriꞈ yaˇ awˬ moˍ hpawnˬ daꞈ kuiˬ hkʼaw kʼa muiˬ hkawˇ kʼa chehˇ htaˇ, awˬ viˉ awˬ nyi yaˇ miˇ teˇ gʼaˇ yawˇ ve yaˇ miˇ suh˗e gehˇ sheˍ ve pa taw, yawˇ hawˬ chehˇ ve htaꞈ teˇ geh mui ve awˬ nu ve yaˇ miˇ teˇ gʼaˇ gʼa mawˬ ve yoˬ. Leh kʼa muiˬ hkawˇ oˇ ve lehˬ kʼawꞈ teꞈ tu la ve htaꞈ caˉ daꞈ ve yoˬ. Awˬ viˉ awˬ nyi yaˇ miˇ chi teˇ gʼaˇ yawˇ awˬ paˇ lo ca huˉ˗e leh yawˇ ve laꞈ sheh hawˬ chehˇ ve yaˇ miˇ ve laꞈ kʼaˉ htaꞈ kʼuˉ leh liꞈ hkawˇ teˇ geh kʼa ve yoˬ. Awˬ viˉ awˬ nyi yaˇ miˇ nyi ma luˬ chehˇ ve kʼawꞈ kʼoˆ ve, “awˬ viˉ awˬ nyi hawˉ hkʼaˆ yaˇ miˇ ngaˬ htaꞈ haꞈ laˇ ve, ngaˬ dawˇ cawˇ jaˇ.” Oˇ ve teˇ pawˆ yawˇ hpawnˬ daꞈ˗e ve ha lehˬ jaˇ. Yawˇ kʼawꞈ kʼoˆ ve, “ngaˬ hui htaꞈ gʼa laˇ gʼa ve lehˬ hpawnˬ daꞈ kuiˬ yehˬ hkʼaw cawˬ ve yoˬ.” Ngaˬ hui te ve teˇ ceuˬ le le Yaˬhoˉvaˬ mawˬ gʼa ve tehꞈ yonˍ gʼa ve yoˬ. “Nyi ma luˬ chehˇ ve chaw hui” htaꞈ ngaˬ hui ha kʼaˉ ve tehꞈ hpeuꞈ maw piˇ ve kʼo, Yaˬhoˉvaˬ awˬ hpfuhˇ shiˍ ve yoˬ.—Chiˇ mvuh ve 34:18.

YONˍ HKʼAˇ YONˍ YEˬ LA TUˬ HENˇ LEH HPFUHˆ NYI VE

17. Awˬ lawn chi ve hkʼaw ngaˬ hui aˬ htoꞈ ma htaꞈ gʼa henˇ˗oˬ ve le?

¹⁷ Yeˍsuˆ anˇ tuˬ te htaˇ ve awˬ lawn htaꞈ ngaˬ hui henˇ leh hpfuhˆ nyi ve kʼo, ngaˬ hui awˬ gʼaˇ gʼa jaˇ leh yonˍ hkʼaˇ kaꞈ yonˍ yeˬ gʼa tuˬ te laˇ ve yoˬ. Awˬ lawn chi ve teˇ hpaˍ lehˬ Yaˬhoˉvaˬ leh Yeˍsuˆ ngaˬ hui htaꞈ haꞈ jaˇ ve tehꞈ maˍ laˇ ve yoˬ. Chaw yaˇ shoꞈ shaꞈ ve teˇ ceuˬ le le htaꞈ Yeˍsuˆ kanˇ paˆ cawˬ leh gu laˇ gʼa ve tehꞈ maˍ laˇ ve yoˬ. Maˇ maw ve awˬ yanˇ hkʼaw Gʼuiˬ sha ve mvuhˇ miˬ lehˬ daꞈ ve awˬ ceuˬ te laˇ gʼa ve tehꞈ ngaˬ hui yonˍ gʼa tuˬ kaꞈ maˍ laˇ sheˍ ve yoˬ. Chi hkʼoˆ kaꞈ, ngaˬ hui awˬ lawn oˇ ve teˇ hpaˍ gʼaw nyi htaˇ Yeˍsuˆ ve te hkʼaˇ dawˇ hkʼaˇ htaꞈ ngaˬ hui hkʼaˬ hkʼe henˇ yuˬ gʼa ve kaꞈ dawˇ nyi cawˇ ve yoˬ. A shu yawˇ hkʼaˇ yawˇ Liꞈ hpu henˇ htaˇ, maˇ heˆ leh yehˬ kʼa hkʼaw oˉ kʼoˍ pui htaˇ Yeˍsuˆ anˇ tuˬ te ve awˬ lawn henˇ leh hpfuhˆ nyi cawˇ ve maˇ heˆ laˇ? Chi nawˬ htaꞈ aˬ htoꞈ ma maˍ laˇ ve le, dawˇ nyi sheˍ. Peuˬ hkʼawꞈ nawˉ awˬ nu ve chaw htaꞈ kʼawꞈ kʼoˆ maˍ piˇ sheˍ. Nawˬ chi hkʼe te ve kʼo, teˇ gʼaˇ le le awˬ bon gʼa leh awˬ gʼaˇ gʼa jaˇ tuˬ yoˬ!—Roˉmaꞈ 1:11, 12.

18. Gʼuˇ suhˍ teˇ lawn hkʼaw ngaˬ hui aˬ htoꞈ ma awˬ lawn htaꞈ henˇ tuˬ le?

¹⁸ Miˬ guiˬ hkʼoˆ lo Yeˍsuˆ Gʼuiˬ sha ve kanˉ te ve awˬ leh meuˇ ve awˬ yanˇ htaˇ, suh taˍ ve chaw htaꞈ yawˇ teˇ pawˆ kʼawꞈ teꞈ tu la piˇ ve yoˬ. Chi lehˬ 3 pawˆ teˇ pawˆ hpehꞈ leh Yeˍsuˆ te ve awˬ leh meuˇ teˇ pawˆ hpehꞈ ve yoˬ. Chi lehˬ Liꞈ hpu hkʼaw bvuhꞈ taˍ ve yoˬ. Yawˇ haꞈ ve awˬ chawˇ suh˗oˬ ve 4 nyi gaˬ˗oˬ ve htaꞈ kʼawꞈ teꞈ tu la piˇ ve pa taw, awˬ nu ve kʼawꞈ teꞈ tuˬ la piˇ ve htaꞈ peun daꞈ ve yoˬ. Yeˍsuˆ anˇ tuˬ te ve chi teˇ pawˆ ngaˬ hui htaꞈ aˬ htoꞈ ma maˍ laˇ ve le? Kʼawꞈ teꞈ tu la ve dawˇ law kuiˬ htaꞈ ngaˬ hui hkʼaˬ hkʼe taw yonˍ gʼa ve le? Gʼuˇ suhˍ teˇ lawn hkʼaw teˇ geh henˇ tuˬ yoˬ.