Nyi haꞈ shaˉ paˍ˗oˬ, Giˉdonˍ htaꞈ henˇ yuˬ sheˍ

1. 1 Peˍtruˆ liꞈ 5:2 hkʼaw kʼoˆ taˍ ve hkʼe, nyi haꞈ shaˉ paˍ daꞈ ve awˬ vuiˬ aˬ htoꞈ ma cawˬ ve le?

Chi beuꞈ teˇ co˗e ve nyi haꞈ shaˉ paˍ Yaˬhoˉvaˬ ve yawˬ awˬ hpfuhˇ hkʼaˆ jaˇ ve htaꞈ nyi haꞈ shaˉ tuˬ awˬ vuiˬ gʼa ve yoˬ. Ka tiꞈ yeˬ ve nyi haꞈ shaˉ paˍ chi teˇ hpaˍ awˬ viˉ awˬ nyi htaꞈ gʼa ga piˇ ve awˬ hpfuhˇ shiˍ ve yoˬ. ‘Yawˇ hui awˬ viˉ awˬ nyi htaꞈ nyi haꞈ shaˉ tuˬ’ coˇ caˇ jaˇ ve yoˬ. (Yeˍraˍmiˆ 23:4; 1 Peˍtruˆ 5:2 gʼaw sheˍ.) Hkriꞈ yaˇ awˬ moˍ hkʼaw nyi haꞈ shaˉ paˍ chi hkʼe ve cawˬ ve ngaˬ hui ha lehˬ jaˇ.

2. Nyi haꞈ shaˉ paˍ teˇ hpaˍ hpaˍ aˬ htoꞈ ma gʼa hpuˇ ve le?

² Nyi haꞈ shaˉ paˍ yawˇ hui ve awˬ vuiˬ htaꞈ te htaˇ, yawˇ hui haˍ ve awˬ lawn laiˉ ceuˬ gʼa hpuˇ ve yoˬ. Teˇ ceuˬ lehˬ Hkriꞈ yaˇ awˬ moˍ hkʼaw awˬ viˉ awˬ nyi htaꞈ nyi haꞈ shaˉ tuˬ, nyi haꞈ shaˉ paˍ kanˉ te hkeuꞈ jaˇ. Aˍmeˬriˆkaꞈ mvuhˇ miˬ lo chehˇ ve nyi haꞈ shaˉ paˍ Hto˗niˇ yawˇ Hkriꞈ yaˇ awˬ moˍ hkʼaw awˬ vuiˬ te htaˇ, nyi ma gʼa nuˇ nehˬ jaˇ ve yoˬ. Yawˇ kʼoˆ ve, “a naˍ 19 tanˬ cawˬ htaˇ, hpawnˬ daꞈ ve leh hto toˇ tuˬ awˬ pon gu ve ngaˬ kanˉ te hkeuꞈ jaˇ. Ngaˬ hkʼaˬ hkʼe taw te ve htawˇ te tuˬ ve kanˉ cawˬ maˇ jaˇ sheˍ ve yoˬ. Hkʼe te leh, ngaˬ Liꞈ hpu gʼaw ve, a shu yawˇ hkʼaˇ yawˇ Liꞈ hpu henˇ ve, bon lawˬ ve, hkʼa dehꞈ maˇ te gʼa ve yoˬ.” Hkoˬsoˬvoˬ mvuhˇ miˬ lo chehˇ ve nyi haꞈ shaˉ paˍ I˗lenˇ haˍ ve teˇ ceu gʼa hpuˇ ve yoˬ. Maꞈ bawˆ daꞈ ve awˬ ti lo yawˇ chehˇ htaˇ, Gʼuiˬ sha ve kanˉ hkʼaˇ hkʼaw beˆ maˍ laˇ taˍ ve awˬ lawn htaꞈ gʼaꞈ te tuˬ haˍ jaˇ tehꞈ dawˇ ve yoˬ. Yawˇ kʼoˆ ve, “awˬ tcuhˆ puiˍ lo ve nyi haꞈ shaˉ paˍ ngaˬ htaꞈ kawˆ kuiˬ cawˬ kuiˬ lo chehˇ ve awˬ viˉ awˬ nyi htaꞈ ca ga piˇ tuˬ awˬ vuiˬ peꞈ laˇ htaˇ, ngaˬ kawˆ jaˇ ve yoˬ. Chi hkʼe ga piˇ tuˬ ngaˬ awˬ vuiˬ gʼa htaˇ, haꞈ hanˉ ve cawˬ tuˬ haˍ jaˇ. Gʼuiˬ sha ve kanˉ hkʼaˇ hkʼaw beˆ maˍ laˇ ve awˬ hkʼaˇ hkʼa dehꞈ maˇ ca tehꞈ ngaˬ dawˇ ve yoˬ.” Aˍshaˆ miˬ guiˬ lo mvuhˇ miˬ teˇ mvuhˇ miˬ hkʼaw Miˍshenˍnaˍliˍ te chehˇ ve Htin teˇ nyi leh teˇ nyi hkʼaw kanˉ teˇ ceuˬ le le te peuˬ tuˬ haˍ jaˇ tehꞈ dawˇ ve yoˬ. Yawˇ kʼoˆ ve, “teˇ pawˆ pawˆ kʼo ngaˬ awˬ gʼaˇ nuˇ jaˇ ve yoˬ.” Awˬ lawn chi hkʼa shuˍ gʼa hpuˇ ve nyi haꞈ shaˉ paˍ htaꞈ haꞈ yuˬ gʼa tuˬ aˬ htoꞈ ma ga piˇ gʼa ve le?

3. Suhˉ jehˬ paˍ Giˉdonˍ ve awˬ lawn ngaˬ hui teˇ gʼaˇ le le aˬ htoꞈ ma henˇ yuˬ gʼa ve le?

³ Suhˉ jehˬ paˍ Giˉdonˍ ve awˬ lawn nyi haꞈ shaˉ paˍ laiˉ ceuˬ henˇ yuˬ gʼa ve yoˬ. (Heˍbrehˇ 6:12; 11:32) Giˉdonˍ Gʼuiˬ sha ve chaw htaꞈ nyi haꞈ shaˉ tuˬ awˬ vuiˬ gʼa ve yoˬ. (Suhˉ jehˬ ve 2:1; 1 Raˍsaˍvanˍ 17:6) Chi beuꞈ teˇ co˗e ve nyi haꞈ shaˉ paˍ kaꞈ Giˉdonˍ htaꞈ shuˍ ve yoˬ. Tuꞈ ve hkanˍ ve awˬ yanˇ chi ve hkʼaw nyi haꞈ shaˉ paˍ Yaˬhoˉvaˬ ve chaw htaꞈ nyi haꞈ shaˉ tuˬ awˬ vuiˬ gʼa ve yoˬ. (Tcuh yaˇ 20:28; 2 Tiˆmoˉseˍ 3:1) Giˉdonˍ nyi ma nuˇ nehˬ ve, nyi ma taˍ nehˬ ve, leh na yuˬ ve, awˬ lawn htaꞈ ngaˬ hui teˇ gʼaˇ le le henˇ yuˬ gʼa ve yoˬ. Chi hkʼoˆ kaꞈ, Giˉdonˍ lehˬ yeunˇ hkanˍ ve awˬ lawn daꞈ jaˇ ve henˇ yuˬ tuˬ hpehꞈ ve yoˬ. Nyi haꞈ shaˉ paˍ hpehꞈ ve, maˇ hpehꞈ ve htawˇ maˇ kʼoˆ, yawˇ hui htaꞈ ngaˬ hui awˬ hpfuhˇ shiˍ ve tehꞈ hpeuꞈ maw piˇ gʼa ve yoˬ. Leh yawˇ hui Hkriꞈ yaˇ awˬ moˍ hkʼaw kanˉ te hkeuꞈ jaˇ ve htaꞈ kaꞈ awˬ hpfuhˇ shiˍ ve tehꞈ hpeuꞈ maw piˇ gʼa ve yoˬ.—Heˍbrehˇ.—13:17

NAWˬ NYI MA NUˇ NEHˬ LEH NYI MA TAˍ NEHˬ VE CHAW HPEHꞈ TUˬ HAˍ JAˇ TEHꞈ DAWˇ HTAˇ

4. Giˉdonˍ nyi ma nuˇ nehˬ leh nyi ma taˍ nehˬ ve hkʼaˬ hkʼe hpeuꞈ maw laˇ ve le?

⁴ Giˉdonˍ lehˬ nyi ma nuˇ nehˬ leh nyi ma taˍ nehˬ ve yoˬ.b Yaˬhoˉvaˬ mvuhˇ naw ma tcuh yaˇ htaꞈ cuˇ leh Giˉdonˍ htaꞈ kʼoˆ piˇ tcuh ve, Iˉsaˍreˍlaˆ chaw lehˬ Meˇdiˍanˍ chaw awˬ gʼaˇ uiˍ ve htaꞈ ponˬ piˇ tuˬ yawˇ htaꞈ leuˆ yuˬ leh ga piˇ tcuh ve yoˬ. Giˉdonˍ nyi ma nuˇ nehˬ ve hkʼaw kʼoˆ ve, “Maˍnaˍseˍ awˬ ceuˬ awˬ hkʼaˇ awˬ hkʼaw lo, ngaˬ ve chaw teˇ hpaˍ lehˬ shu aꞈ kehˉ i jaˇ ve yoˬ. Ngaˬ htawˇ kaꞈ, ngaˬ ve yehˬ hkʼaw lo shu aꞈ kehˉ i jaˇ ve chaw teˇ gʼaˇ hpehꞈ ve yoˬ.” (Suhˉ jehˬ ve 6:15) Giˉdonˍ lehˬ Gʼuiˬ sha yawˇ htaꞈ awˬ vuiˬ te tcuh laˇ taˍ ve htaꞈ maˇ keunˍ tehꞈ dawˇ ve yoˬ. Yaꞈ hkʼaˇ, yawˇ te gʼa ve tehꞈ Gʼuiˬ sha shiˍ ve yoˬ. Leh Yaˬhoˉvaˬ yawˇ htaꞈ ga piˇ ve pa taw yawˇ ve awˬ vuiˬ htaꞈ hkʼa dehꞈ te gʼa ve yoˬ.

5. Nyi haꞈ shaˉ paˍ nyi ma nuˇ nehˬ ve leh nyi ma taˍ nehˬ ve chaw hpehꞈ tuˬ haˍ jaˇ ve aˬ htoꞈ ma te piˇ ve le?

⁵ Nyi haꞈ shaˉ paˍ nyi ma nuˇ nehˬ ve, leh nyi ma taˍ nehˬ tuˬ gʼa coˇ caˇ jaˇ. (Miˆhkaˍ 6:8; Tcuh yaˇ 20:18, 19) Yawˇ hui cheuˬ ve maˇ heˆ leh te gʼa ve htaꞈ maˇ chiˇ mvuh laˇ tcuh gaˇ. Yawˇ hui teˇ ceuˬ ceuˬ te yaꞈ htaˇ, yawˇ hui kanˉ te tawˆ la ve hkʼa dehꞈ maˇ daꞈ ve pa taw, yawˇ hui awˬ to awˬ hpfuhˇ maˇ cawˬ ve tehꞈ maˇ dawˇ. Chi hkʼe hpehꞈ htaˇ, nyi haꞈ shaˉ paˍ nyi ma nuˇ nehˬ ve leh nyi ma taˍ nehˬ tuˬ maˇ sha. Tawˇ pa haˉ te kʼo, yawˇ awˬ vuiˬ gʼa maˇ jaˇ ve yoˬ. Yaꞈ hkʼaˇ, peuˬ hkʼawꞈ nawˉ yawˇ ve awˬ vuiˬ hkʼa peu˗eˬ htaꞈ te peuˬ gʼa tuˬ haˍ jaˇ tehꞈ dawˇ ve yoˬ hehˉ. Maˇ heˆ leh yawˇ htaꞈ shu chiˇ mvuh laˇ ve leh taˍ nehˬ laˇ ve gʼa hpuˇ ve yoˬ hehˉ. Nyi haꞈ shaˉ paˍ chi hkʼe gʼa hpuˇ ve kʼo, yawˇ hui Giˉdonˍ ve awˬ lawn htaꞈ hkʼaˬ hkʼe henˇ yuˬ gʼa tuˬ le?

6. Giˉdonˍ nyi ma taˍ nehˬ ve htaꞈ nyi haꞈ shaˉ paˍ hkʼaˬ hkʼe te henˇ yuˬ gʼa tuˬ le? (Awˬ han htaꞈ nyi sheˍ.)

⁶ Ga laˇ tuˬ lawˬ ve. Nyi ma taˍ nehˬ ve chaw lehˬ a shu yawˇ awˬ to hkʼaˬ hkʼe taw te gʼa ve htaꞈ shiˍ ve yoˬ. Giˉdonˍ kaꞈ chi hkʼe hpehꞈ ve yoˬ. Yawˇ awˬ to htaꞈ taˍ nehˬ ve chaw hpehꞈ ve pa taw, awˬ nu ve chaw ga laˇ tuˬ lawˬ ve yoˬ. (Suhˉ jehˬ ve 6:27, 35; 7:24) Nyi haꞈ shaˉ paˍ kaꞈ chi hkʼe te ve yoˬ. Hto˗niˇ kʼawꞈ kʼoˆ ve, “ngaˬ te maˇ gʼa ve kanˉ awˬ leuˉ kaꞈ haꞈ yuˬ ve yoˬ. Awˬ lawn kʼo, yehˬ kʼa hkʼaw ve chaw ngaˬ kanˉ maˇ maˇ te tuˬ maˍ laˇ ve yoˬ. Hkʼe te leh, yehˬ kʼa hkʼaw oˉ kʼoˍ pui htaˇ, nyi ma taˍ nehˬ ve awˬ lawn yaw daꞈ leh nawˬ dawˇ kʼo, ngaˬ nyi ma taˍ nehˬ ve chaw hpehꞈ aw˗laˇ, ngaˬ miˇ ma htaꞈ nawˬ hkʼaˬ hkʼe dawˇ ve le, tehꞈ na piˇ ve yoˬ. Vehˆsaiˉ jw.org VDO hkʼaw Yeˍsuˆ htaꞈ henˇ yuˬ leh awˬ nu ve chaw htaꞈ maˍ piˇ ve, yonˍ gʼa ve, leh awˬ vuiˬ piˇ ve” hkʼaw nyi sheˍ. Hto˗niˇ yawˇ ve kanˉ awˬ viˉ awˬ nyi gʼa ga laˇ tuˬ lawˬ piˇ ve yoˬ. Awˬ bon hkʼaˬ hkʼe gʼa ve le? Yawˇ kʼoˆ ve, “Hkriꞈ yaˇ awˬ moˍ hkʼaw ve kanˉ awˬ viˉ awˬ nyi te peuˬ gʼa leh ngaˬ kaꞈ ngaˬ ve yonˍ hkʼaˇ yonˍ yeˬ maˇ la tuˬ te ve awˬ yanˇ cawˬ ve yoˬ.”

7. Awˬ nu ve chaw nyi haꞈ shaˉ paˍ htaꞈ deˇ piˇ htaˇ yawˇ hui hkʼaˬ hkʼe te Giˉdonˍ htaꞈ henˇ yuˬ gʼa tuˬ le? (Yaˍkoˆ 3:13)

⁷ Awˬ nu ve chaw deˇ laˇ htaˇ nyi ma taˇ zuhˆ. Nyi haꞈ shaˉ paˍ nyi ma nuˇ nehˬ ve leh nyi ma taˍ nehˬ ve cawˬ gʼa tuˬ haˍ jaˇ ve teˇ ceuˬ lehˬ, yawˇ hui htaꞈ shu deˇ piˇ htaˇ yoˬ. Giˉdonˍ ve awˬ lawn htaꞈ yawˇ hui henˇ yuˬ gʼa ve yoˬ. Giˉdonˍ yawˇ maˇ biˇ ve chaw hpehꞈ leh te yaꞈ ve tehꞈ shiˍ ve yoˬ. Eˇhpaˍrenˍ ve awˬ ceuˬ awˬ hkʼaˇ yawˇ htaꞈ deˇ piˇ htaˇ, yawˇ maˇ beuꞈ. Yawˇ chaw chi ve teˇ hpaˍ htaꞈ tawˇ daꞈ daꞈ yaw piˇ ve yoˬ. (Suhˉ jehˬ ve 8:1-3) Giˉdonˍ nyi ma nuˇ nehˬ ve tehꞈ hpeuꞈ maw piˇ ve lehˬ, chaw chi teˇ hpaˍ aˬ htoꞈ ma ve awˬ lawn htaꞈ beuꞈ ve le naˍ hkʼa dehꞈ na taˍ piˇ ve yoˬ. Eˇhpaˍrenˍ ve awˬ ceu awˬ hkʼaˇ nyi ma gawˬ lehˍ cawˬ la tuˬ, Giˉdonˍ tawˇ yaw piˇ tuˬ awˬ hkʼaˇ shiˍ ve yoˬ. Cuˇ yiˍ cawˬ ve nyi haꞈ shaˉ paˍ Giˉdonˍ htaꞈ henˇ yuˬ gʼa ve yoˬ. Awˬ viˉ awˬ nyi yawˇ hui htaꞈ deˇ piˇ ve htawˇ, yawˇ hui maˇ beuꞈ leh awˬ viˉ awˬ nyi hkʼaˬ hkʼe dawˇ ve htaꞈ yawˇ hui na taˍ piˇ leh tawˇ daꞈ daꞈ yaw piˇ ve yoˬ. (Yaˍkoˆ 3:13 gʼaw sheˍ.) Nyi haꞈ shaˉ paˍ chi hkʼe te ve kʼo, Hkriꞈ yaˇ awˬ moˍ hkʼaw dawˇ sha gawˬ lehˍ ve cawˬ tuˬ yoˬ.

8. Nyi haꞈ shaˉ paˍ htaꞈ awˬ viˉ awˬ nyi chiˇ mvuh piˇ ve kʼo yawˇ hui hkʼaˬ hkʼe te cawˇ ve le? Tawˇ pa haˉ kʼoˆ maˍ laˇ sheˍ.

⁸ Yaˬhoˉvaˬ htaꞈ chiˇ mvuh sheˍ. Giˉdonˍ Meˉdiˍanˍ chaw htaꞈ bawˆ gʼaˇ htaˇ, Iˉsaˍreˍlaˆ chaw yawˇ htaꞈ chiˇ mvuh piˇ ve yoˬ. Awˬ nu ve chaw yawˇ htaꞈ maˇ chiˇ mvuh laˇ tcuh gaˇ. Yaꞈ hkʼaˇ, yawˇ kʼoˆ ve, Iˉsaˍreˍlaˆ chaw maꞈ bawˆ gʼaˇ ve lehˬ Yaˬhoˉvaˬ ga laˇ ve yoˬ. (Suhˉ jehˬ ve 8:22, 23) Leh nyi haꞈ shaˉ paˍ hkʼaˬ hkʼe te Giˉdonˍ htaꞈ henˇ yuˬ gʼa tuˬ le? Yawˇ hui Gʼuiˬ sha ve kanˉ hkʼa dehꞈ te gʼa htaˇ, yawˇ hui Yaˬhoˉvaˬ htaꞈ chiˇ mvuh cawˇ ve yoˬ. (1 Kawˇrenˍhtuˆ 4:6, 7) Tawˇ pa haˉ te kʼo, awˬ viˉ awˬ nyi, nyi haꞈ shaˉ paˍ teˇ gʼaˇ htaꞈ maˍ puiˉ leh maˍ cheuˬ jaˇ tehꞈ chiˇ mvuh piˇ htaˇ, yawˇ maˍ ve awˬ lawn Liꞈ hpu hkʼaw cawˬ ve tehꞈ kʼoˆ cawˇ ve yoˬ. Leh Gʼuiˬ sha ve kanˉ hkʼaˇ ngaˬ hui htaꞈ maˍ laˇ ve daꞈ jaˇ tehꞈ kʼoˆ cawˇ ve yoˬ. Teˇ pawˆ pawˆ kʼo, nyi haꞈ shaˉ paˍ dawˇ ve awˬ viˉ awˬ nyi yawˇ maˍ ve awˬ ceuˬ htaꞈ nyi hkʼaˇ suh ve yoˬ hehˉ. Leh awˬ viˉ awˬ nyi Yaˬhoˉvaˬ htaꞈ chiˇ mvuh tuˬ yawˇ te piˇ chehˇ ve laˇ? Nyi haꞈ shaˉ paˍ Tiˆmoˉseˍ meh ve awˬ lawn htaꞈ teˇ geh nyi sheˍ. Yawˇ nyi haꞈ shaˉ paˍ te gehˇ sheˍ htaˇ, yawˇ hkawꞈ nyi shinˉ nyi bon maˍ ve te gaˇ jaˇ. Yawˇ kʼoˆ ve, “awˬ lawn lonˉ ma leh awˬ lawn awˬ tanˇ cawˬ maˇ ve htaꞈ yehˇ ve pa taw awˬ viˉ awˬ nyi laiˉ gʼaˇ dawˇ cawˇ leh yawˇ htaꞈ chiˇ mvuh piˇ ve yoˬ. Chi ve lehˬ awˬ viˉ awˬ nyi ngaˬ htaꞈ a yeˇ yuˬ tuˬ te piˇ ve yoˬ. Liꞈ hpu hkʼaw leh Yaˬhoˉvaˬ htaꞈ a yeˇ yuˬ tuˬ te piˇ ve maˇ heˆ.” Peuˬ hkʼawꞈ nawˉ Tiˆmoˉseˍ awˬ viˉ awˬ nyi yawˇ htaꞈ a yeˇ yuˬ tuˬ maˇ gʼa te piˇ tuˬ, yawˇ maˍ ve awˬ hkʼaˇ gʼa pa ve tehꞈ shiˍ ve yoˬ. (Tawˇ naˉ ve 27:21) Awˬ bon hkʼaˬ hkʼe gʼa ve le? Yawˇ kʼoˆ ve, “awˬ viˉ awˬ nyi laiˉ gʼaˇ ngaˬ ve bon maˍ hkawˇ yawˇ hui shoꞈ shaꞈ ve leh yawˇ hui tuꞈ ve hkanˍ ve htaꞈ yeunˇ hkanˍ gʼaˇ tuˬ te laˇ leh, Yaˬhoˉvaˬ geh meuˆ daꞈ tuˬ ga laˇ ve tehꞈ kʼoˆ ve yoˬ. Chi ve ponˬ laˬ ve laiˉ hkʼawꞈ htaˇ awˬ viˉ awˬ nyi ngaˬ bon maˍ ve htaꞈ chiˇ mvuh laˇ ve aꞈ kehˉ, ngaˬ ha lehˬ tuˬ te laˇ jaˇ.”

NAWˬ NA YUˬ LEH HAꞈ HANˉ VE CAWˬ TUˬ HAˍ JAˇ TEHꞈ DAWˇ HTAˇ

9. Giˉdonˍ na yuˬ ve leh haꞈ hanˉ ve cawˬ tuˬ aˬ htoꞈ ma te maˇ sha ve le? (Awˬ htaꞈ hpawˇ ve awˬ han htaꞈ nyi sheˍ.)

⁹ Giˉdonˍ Iˉsaˍreˍlaˆ chaw htaꞈ sheh kʼai tuˬ suhˉ jehˬ paˍ te tuˬ leuˆ yuˬ piˇ peuˬ hkʼawꞈ nawˉ, yawˇ na yuˬ ve leh haꞈ hanˉ ve gʼa cawˬ ve yoˬ. Giˉdonˍ ve awˬ vuiˬ lehˬ kawˆ tuˬ cawˬ jaˇ. Chi lehˬ yawˇ awˬ pa Baˍlaˆ gʼuiˬ sha htaꞈ tuˉ tanˇ kuiˬ te taˍ ve htaꞈ dawˆ baˬ ve yoˬ. (Suhˉ jehˬ ve 6:25, 26) Chi hkʼoˆ kaꞈ, Giˉdonˍ maꞈ yaˇ shaw hponˆ peuˬ hkʼawꞈ nawˉ, Yaˬhoˉvaˬ Giˉdonˍ htaꞈ maꞈ yaˇ chi ma ma taˇ shiˍ kʼai tehꞈ kʼoˆ piˇ ve yoˬ. (Suhˉ jehˬ ve 7:2-7) Hkʼe te leh, tanˇ hkuinˇ htaˇ yawˇ canˇ paˍ htaꞈ bawˆ tuˬ Yaˬhoˉvaˬ kʼoˆ piˇ ve yoˬ.—Suhˉ jehˬ ve 7:9-11.

10. Nyi haꞈ shaˉ paˍ na yuˬ tuˬ aˬ htoꞈ ma te maˇ sha ve le?

¹⁰ Nyi haꞈ shaˉ paˍ “na yuˬ puiˉ ve” chaw hpehꞈ cawˇ ve yoˬ. (Yaˍkoˆ 3:17) Na yuˬ puiˉ ve nyi haꞈ shaˉ paˍ lehˬ, Liꞈ hpu hkʼaw leh Yaˬhoˉvaˬ ve kanˉ hkʼaˇ beˆ maˍ laˇ ve htaꞈ gʼaꞈ te tuˬ yoˬ. Hkʼe te leh, yawˇ awˬ viˉ awˬ nyi awˬ pon daꞈ ve henˇ yuˬ tuˬ hpehꞈ ve yoˬ. Yaꞈ hkʼaˇ, chi hkʼe te tuˬ teˇ pawˆ pawˆ kʼo, maˇ sha ve yoˬ. Tawˇ pa haˉ te kʼo, Gʼuiˬ sha ve kanˉ hkʼaˇ beˆ maˍ laˇ ve laiˉ ceuˬ cawˬ leh pa vaiˇ jaˇ. Hkʼe te leh, yawˇ gʼaꞈ te gʼa tuˬ haˍ jaˇ tehꞈ dawˇ ve yoˬ. Chi hkʼoˆ kaꞈ, beˆ maˍ laˇ ve teˇ ceuˬ ceuˬ awˬ tehˬ yehˇ gʼa ve laˇ, maˇ heˆ leh beˆ maˍ laˇ ve chi daꞈ jaˇ ve laˇ tehꞈ, yawˇ htawˇ dawˇ nawˬ dawˇ cawˬ ve yoˬ. Leh yawˇ gʼa te ve awˬ vuiˬ shu yawˇ htaꞈ hpeh yuˬ tuˬ te piˇ ve yoˬ hehˉ. Nyi haꞈ shaˉ paˍ chi hkʼe gʼa hpuˇ htaˇ, Giˉdonˍ htaꞈ hkʼaˬ hkʼe te henˇ yuˬ gʼa tuˬ le?

11. Nyi haꞈ shaˉ paˍ yawˇ na yuˬ ve tehꞈ hkʼaˬ hkʼe hpeuꞈ maw piˇ gʼa tuˬ le?

¹¹ Beˆ maˍ laˇ ve htaꞈ na yuˬ leh gʼaꞈ te ve. Giˉdonˍ yawˇ ve awˬ pa tuˉ tanˇ kuiˬ te taˍ ve htaꞈ te luˬ tuˬ awˬ hkʼaˇ Yaˬhoˉvaˬ kʼoˆ piˇ ve yoˬ. Leh Gʼuiˬ sha htaꞈ tuˉ tanˇ kuiˬ hkʼaˬ kaˬ lo te tuˬ, leh to nuˇ to shaˆ aˬ htoꞈ ma tuˉ tanˇ gʼa ve kaꞈ kʼoˆ piˇ ve yoˬ. Giˉdonˍ Yaˬhoˉvaˬ beˆ maˍ piˇ ve htaꞈ htawˇ dawˇ nawˬ dawˇ maˇ cawˬ. Yawˇ laꞈ haˉ gʼaꞈ te ve yoˬ. Awˬ viˉ awˬ nyi teˇ gʼaˇ le le kawˆ ve maˇ cawˬ leh Yaˬhoˉvaˬ geh meuˆ daꞈ tuˬ, chi beuꞈ teˇ co˗e nyi haꞈ shaˉ paˍ Yaˬhoˉvaˬ ve kanˉ hkʼaˇ hkʼaw liꞈ gʼa ve, shiˍ laˇ kaˇ laˇ hkawˇ gʼa ve, laꞈ caˉ teˇ hpaˍ hkʼaw kaꞈ beˆ maˍ laˇ gʼa ve yoˬ. Nyi haꞈ shaˉ paˍ Gʼuiˬ sha ve kanˉ hkʼaˇ ka tiꞈ yeˬ ve hkʼaw gʼaꞈ te ve chaw htaꞈ ngaˬ hui haꞈ ve yoˬ. Yawˇ hui chi hkʼe te htaˇ, Hkriꞈ yaˇ awˬ moˍ hkʼaw ve awˬ viˉ awˬ nyi kaꞈ awˬ bon gʼa ve yoˬ.—Chiˇ mvuh ve 119:112.

12. Gʼuiˬ sha ve kanˉ hkʼaˇ hkʼaw te ve awˬ ceuˬ pa tuˬ awˬ hkʼaˇ beˆ maˍ laˇ htaˇ, nyi haꞈ shaˉ paˍ Heˍbrehˇ liꞈ 13:17 hkʼaw ve hkʼaˬ hkʼe yuˬ yehˇ gʼa ve le?

¹² Pa ve htaꞈ haꞈ yuˬ ve. Yaˬhoˉvaˬ Giˉdonˍ htaꞈ maꞈ yaˇ 99 pun hpaˆ kʼawꞈ kʼoꞈ˗e tcuh tehꞈ kʼoˆ ve awˬ lawn htaꞈ dawˇ nyi sheˍ. (Suhˉ jehˬ ve 7:8) Giˉdonˍ kʼoˆ ve, ‘chi hkʼe taw taw gʼa te cawˇ ve laˇ? Chi awˬ bon cawˬ tuˬ hehˉ laˇ?’ Chi hkʼe hpehꞈ ve htawˇ, yawˇ Yaˬhoˉvaˬ ve hkawˇ na yuˬ ve yoˬ. Chi beuꞈ teˇ co˗e ve nyi haꞈ shaˉ paˍ kaꞈ Giˉdonˍ htaꞈ henˇ yuˬ gʼa ve yoˬ. Gʼuiˬ sha ve kanˉ hkʼaˇ yawˇ hui htaꞈ awˉ lawˉ htaˇ hkʼe maˇ shuˍ daꞈ ve teˇ ceuˬ ceuˬ te tcuh ve htawˇ gʼa na yuˬ ve yoˬ. (Heˍbrehˇ 13:17 gʼaw sheˍ.) Tawˇ pa haˉ te kʼo, 2014 hkʼawꞈ htaˇ Uˉ peunˍ ve Kawˍmiˍtiˍ lehˬ hpawnˬ daꞈ kuiˬ yehˬ leh, hpawnˬ daꞈ kuiˬ yehˬ lonˉ te ve, hpu yehˇ ve awˬ hkʼaˇ pa ve yoˬ. (2 Kawˇrenˍhtuˆ 8:12-14) Oˇ htaˇ kʼo Hkriꞈ yaˇ awˬ moˍ hkʼaˬ ve teˇ kaˬ hpawnˬ daꞈ kuiˬ yehˬ te gaˇ ve kʼo, Gʼuiˬ sha ve kanˉ hkʼaˇ hkʼaw hpu chiˇ leh te peuˬ hkʼawꞈ nawˉ, awˬ meu˗eˇ awˬ meu˗eˇ gʼa hkʼawꞈ piˇ ve yoˬ. Yaꞈ hkʼaˇ, chi teˇ hkui Hkriꞈ yaˇ awˬ moˍ hkʼaˬ ve teˇ kaˬ hpu hkʼa dehꞈ maˇ cawˬ leh hpawnˬ daꞈ kuiˬ yehˬ cawˬ cawˇ ve kʼo, Gʼuiˬ sha ve kanˉ hkʼaˇ lehˬ hpawnˬ daꞈ kuiˬ yehˬ te tcuh ve yoˬ. Chi lehˬ miˬ guiˬ chi hkʼoˆ Hkriꞈ yaˇ awˬ moˍ teˇ kaˬ le le hpu tanˇ tanˇ taˍ ve htaꞈ yehˇ ve yoˬ. Chi htaꞈ caˉ daꞈ ve pa ve Ho˗se gʼa kaˇ htaˇ, awˉ lawˉ htaˇ Gʼuiˬ sha ve kanˉ hkʼaˇ chi hkʼe dawˇ cheˆ ve awˬ bon cawˬ tuˬ hehˉ laˇ tehꞈ, yawˇ htawˇ dawˇ nawˬ dawˇ cawˬ ve yoˬ. Yawˇ kʼoˆ ve, ‘chi hkʼe te ve kʼo hpawnˬ daꞈ kuiˬ yehˬ awˬ suhˉ teˇ yehˬ kaꞈ te maˇ gʼa taˬ. Awˬ lawn kʼo, yawˇ chehˇ ve mvuhˇ miˬ hkʼaw chi hkʼe maˇ te ve yoˬ.’ Yaꞈ hkʼaˇ, awˬ lawn chi htaꞈ caˉ daꞈ ve Gʼuiˬ sha ve kanˉ hkʼaˇ dawˇ cheˆ ve htaꞈ Ho˗se na gʼa tuˬ hkʼaˬ hkʼe ga piˇ ve le? Yawˇ kʼoˆ ve, “Tawˇ naˉ ve liꞈ 3:5, 6 hkʼaw ngaˬ Yaˬhoˉvaˬ htaꞈ gʼaˇ va tuˬ shaˍ tiꞈ peꞈ laˇ leh Gʼuiˬ sha ve kanˉ hkʼaˇ dawˇ cheˆ ve cawˇ jaˇ ve yoˬ. Awˬ lawn kʼo, te tawˆ la ve teˇ ceu le le daꞈ jaˇ. Chi teˇ hkui hpawnˬ daꞈ kuiˬ yehˬ te gʼa maˇ ve ceh tiˉ maˇ heˆ. Yaꞈ hkʼaˇ, Gʼuiˬ sha ve kanˉ hkʼaˇ awˬ suhˉ pa ve lehˬ miˬ guiˬ hkʼoˆ teˇ gʼaˇ le le awˬ bon gʼa ve yoˬ. Awˬ lawn kʼo, Liꞈ hpu hkʼaw kʼoˆ taˍ ve hkʼe ga daꞈ ve yoˬ.”

13. (a) Giˉdonˍ aˬ htoꞈ ma ve awˬ lawn htaꞈ yonˍ gʼa ve le? (b) Nyi haꞈ shaˉ paˍ Giˉdonˍ htaꞈ hkʼaˬ hkʼe te henˇ yuˬ gʼa tuˬ le? (Awˬ han htaꞈ nyi sheˍ.)

¹³ Yaˬhoˉvaˬ loˍ ve awˬ ceuˬ htaꞈ gʼaꞈ te tuˬ haꞈ hanˉ sheˍ. Giˉdonˍ lehˬ kawˆ tuˬ cawˬ ve htawˇ, Yaˬhoˉvaˬ hkawˇ na yuˬ ve yoˬ. (Suhˉ jehˬ ve 9:17) Yaˬhoˉvaˬ lehˬ Giˉdonˍ yonˍ gʼa tuˬ te piˇ peuˬ hkʼawꞈ nawˉ, Giˉdonˍ Gʼuiˬ sha ve chaw htaꞈ haꞈ shaˉ gʼa tuˬ yawˇ ga laˇ tuˬ yoˬ tehꞈ shiˍ ve yoˬ. Ngaˬ hui ve kanˉ maˇ te tcuh laˇ kuiˬ mvuhˇ miˬ hkʼaw chehˇ ve nyi haꞈ shaˉ paˍ htawˇ, Giˉdonˍ htaꞈ henˇ yuˬ gʼa ve yoˬ. Shu hpeh yuˬ tuˬ kawˆ ho piˇ ve, tawˇ cehꞈ na piˇ ve, kanˉ maˇ gʼa te˗o ve, maˇ heˆ leh awˬ to htaꞈ naˬ tuˬ te piˇ ve gʼa hpuˇ ve htawˇ, yawˇ hui hto toˇ ve leh hpawnˬ daꞈ ve, haꞈ hanˉ ve hkʼaw sheh kʼai ve yoˬ.c Tuꞈ jaˇ hkanˍ jaˇ ve awˬ yanˇ htaˇ, nyi haꞈ shaˉ paˍ kawˆ tuˬ cawˬ ve htawˇ, na yuˬ tuˬ chi aꞈ kehˉ gʼa haꞈ hanˉ cawˇ sheˍ ve yoˬ. Beˆ maˍ laˇ ve chi lehˬ vaˇ shiˍ lonˉ hkʼe hpehꞈ leh hto toˇ ve htaꞈ caˉ daꞈ ve yoˬ. Gawˇgaˆ Maˍ gawˇgaˆ Gʼuiˬ sha ve chaw htaꞈ ca bawˆ la htaˇ, beˆ maˍ laˇ hkawˇ chi ngaˬ hui ponˬ tuˬ ga laˇ ve yoˬ.—Yeˍsaˍkeˍlaˆ 38:18; Hpeuꞈ maˍ ve 16:21.

NAWˬ YEUNˇ HKANˍ GʼAˇ TUˬ HAˍ JAˇ TEHꞈ DAWˇ HTAˇ

14. Giˉdonˍ yeunˇ hkanˍ gʼaˇ tuˬ aˬ htoꞈ ma te maˇ sha ve le?

¹⁴ Giˉdonˍ suhˉ jehˬ paˍ hpehꞈ ve pa taw yawˇ kanˉ te hkeuꞈ jaˇ. Giˉdonˍ tanˇ hkuinˇ htaˇ Meˉdiˍanˍ chaw htaꞈ ca bawˆ˗e htaˇ, yawˇ hui hpaw˗e ve yoˬ. Giˉdonˍ kaꞈ yawˇ hui htaꞈ Zeˍreˍraˍ lawˬ hkʼoꞈ te leh Yawˇdanˍ gʼuiˬ ma hkʼa gaˬ gʼaꞈ yuˬ kʼai ve yoˬ. Yawˇ hui kʼai chehˇ htaˇ suhˆ cehˬ leh aˉ chuˇ cawˬ maˇ jaˇ. (Suhˉ jehˬ ve 7:22) Yawˇdanˍ iˉ kaˆ lawˬ lo gaˬ htaˇ, Giˉdonˍ maˇ kʼawꞈ kʼai˗o ve laˇ? Maˇ heˆ. Yawˇ leh maꞈ yaˇ 300 gʼaˇ heuˬ jaˇ ve htawˇ, Yawˇdanˍ iˉ kaˆ lawˬ htaꞈ hpanˍ tawˆ˗e leh gʼaꞈ yuˬ kʼai sheˍ ve yoˬ. Awˬ leh meuˇ htaˇ yawˇ hui Meˉdiˍanˍ chaw htaꞈ gʼaꞈ yuˬ mi leh bawˆ gʼaˇ ve yoˬ.—Suhˉ jehˬ ve 8:4-12.

15. Nyi haꞈ shaˉ paˍ yeunˇ hkanˍ ve cawˬ tuˬ aˬ htoꞈ ma te maˇ sha ve le?

¹⁵ Teˇ pawˆ pawˆ nyi haꞈ shaˉ paˍ awˬ gʼaˇ nuˇ ve yoˬ. Hkʼe te leh, Hkriꞈ yaˇ awˬ moˍ hkʼaw leh yawˇ hui ve yehˬ kʼa htaꞈ nyi haꞈ shaˉ ve heuˬ jaˇ ve yoˬ. Chi hkʼe hpehꞈ ve kʼo, nyi haꞈ shaˉ paˍ Giˉdonˍ htaꞈ hkʼaˬ hkʼe te henˇ yuˬ gʼa tuˬ le?

16-17. Giˉdonˍ yeunˇ hkanˍ gʼaˇ tuˬ aˬ htoꞈ ma ga piˇ ve le? Leh nyi haꞈ shaˉ paˍ aˬ htoꞈ ma awˬ lawn htaꞈ yonˍ gʼa ve le? (Iˉsaˍyaˆ 40:28-31) (Awˬ han htaꞈ nyi sheˍ.)

¹⁶ Yaˬhoˉvaˬ nawˬ htaꞈ awˬ gʼaˇ peꞈ laˇ tuˬ yoˬ tehꞈ yonˍ sheˍ. Giˉdonˍ lehˬ Yaˬhoˉvaˬ yawˇ htaꞈ awˬ gʼaˇ peꞈ laˇ leh awˬ gʼaˇ uiˍ la tcuh laˇ tuˬ yoˬ tehꞈ yonˍ ve yoˬ. (Suhˉ jehˬ ve 6:14, 34) Teˇ pawˆ htaˇ, Giˉdonˍ leh maꞈ yaˇ Meˉdiˍanˍ chaw ve jawˇ mawˇ 2 gʼaˇ kaˍ laˍ oˆ ciˇ hpaw˗e ve htaꞈ gʼaꞈ yuˬ kʼai ve yoˬ. (Suhˉ jehˬ ve 8:12, 21) Yawˇ hui jawˇ mawˇ oˇ ve 2 gʼaˇ htaꞈ gʼaꞈ yuˬ mi leh maꞈ bawˆ ve gʼaˇ tuˬ Yaˬhoˉvaˬ ga piˇ ve yoˬ. “[Yaˬhoˉvaˬ] teˇ pawˆ kaꞈ gʼaˇ maˇ nuˇ leh maˇ heuˬ” ve pa taw, nyi haꞈ shaˉ paˍ kaꞈ Giˉdonˍ hkʼa shuˍ Yaˬhoˉvaˬ htaꞈ gʼaˇ va gʼa ve yoˬ. Nyi haꞈ shaˉ paˍ yawˇ hui ve awˬ vuiˬ htaꞈ caˉ leh te kʼai gʼa tuˬ Yaˬhoˉvaˬ yawˇ hui htaꞈ awˬ gʼaˇ piˇ tuˬ yoˬ.—Iˉsaˍyaˆ 40:28-31 gʼaw sheˍ.

¹⁷ Nyi haꞈ shaˉ paˍ naˆ tsuhˇ yehˬ lo caˉ daꞈ ve awˬ moˍ hkʼaw ve teˇ gʼaˇ Maꞈhtehˍ ve awˬ lawn htaꞈ teˇ geh nyi sheˍ. Yawˇ yeunˇ hkanˍ gʼaˇ tuˬ aˬ htoꞈ ma ga piˇ ve le? Maꞈhtehˍ kʼoˆ ve, “Hpiˇliˇpiˆ liꞈ 4:13 hkʼawꞈ kʼoˆ taˍ ve hkʼa shuˍ ngaˬ awˬ gʼaˇ awˬ shaˉ cawˬ leh teˇ ceuˬ le le htaꞈ yeunˇ hkanˍ gʼaˇ ve yoˬ. Laiˉ pawˆ ngaˬ awˬ gʼaˇ nuˇ jaˇ leh kʼawꞈ caˉ te kʼai maˇ gʼa˗o tehꞈ dawˇ ve yoˬ. Ngaˬ awˬ viˉ awˬ nyi htaꞈ caˉ leh ga piˇ tuˬ Yaˬhoˉvaˬ geh bon lawˬ leh awˬ gʼaˇ kʼawꞈ cawˬ la ve yoˬ. Ngaˬ bon lawˬ peuˬ hkʼawꞈ nawˉ teˇ pawˆ le le Yaˬhoˉvaˬ ngaˬ htaꞈ awˬ gʼaˇ peꞈ laˇ ve tehꞈ shiˍ ve yoˬ. Ngaˬ awˬ gʼaˇ kʼawꞈ cawˬ leh yeunˇ hkanˍ gʼaˇ tuˬ te laˇ ve yoˬ.” Nyi haꞈ shaˉ paˍ yawˇ ve awˬ vuiˬ te maˇ jaˇ ve kaꞈ Giˉdonˍ htaꞈ shuˍ ve yoˬ. Yawˇ hui Gʼuiˬ sha ve yawˬ htaꞈ nyi haꞈ shaˉ tuˬ awˬ yanˇ yuˬ tanˇ htaˇ shoꞈ shaꞈ ve laiˉ ceuˬ gʼa hpuˇ ve yoˬ. Yawˇ hui nyi ma gʼa taˍ nehˬ leh yawˇ hui te maˇ gʼa ve awˬ leuˉ maˇ te. Yaꞈ hkʼaˇ, yawˇ hui ve bon lawˬ hkawˇ htaꞈ Yaˬhoˉvaˬ na laˇ tuˬ yoˬ tehꞈ yonˍ ve yoˬ. Yawˇ hui yeunˇ hkanˍ gʼaˇ tuˬ Yaˬhoˉvaˬ awˬ gʼaˇ piˇ ve yoˬ.—Chiˇ mvuh ve 116:1; Hpiˇliˇpiˆ 2:13.

18. Nyi haꞈ shaˉ paˍ Giˉdonˍ htaꞈ hkʼaˬ hkʼe henˇ yuˬ gʼa ve le?

¹⁸ Giˉdonˍ ve awˬ lawn nyi haꞈ shaˉ paˍ teˇ gʼaˇ le le awˬ pon yuˬ yehˇ gʼa ve yoˬ. Nyi haꞈ shaˉ paˍ awˬ vuiˬ gʼa ve, shu chiˇ mvuh piˇ ve, maˇ heˆ leh deˇ piˇ htaˇ nyi ma nuˇ nehˬ ve leh nyi ma taˍ nehˬ ve tehꞈ gʼa hpeuꞈ maw piˇ ve yoˬ. Awˬ leh meuˇ ve awˬ yanˇ gaˬ la paˇ neˇ jaˇ htaˇ, yawˇ hui gʼa na yuˬ ve leh gʼa haꞈ hanˉ cawˇ ve yoˬ. Chi hkʼoˆ kaꞈ, yawˇ hui aˬ htoꞈ ma gʼa hpuˇ ve htawˇ Yaˬhoˉvaˬ yawˇ hui htaꞈ awˬ gʼaˇ peꞈ laˇ leh awˬ gʼaˇ uiˍ la mvuh la tcuh laˇ tuˬ yoˬ tehꞈ yonˍ gʼa ve yoˬ. Nyi haꞈ shaˉ paˍ kanˉ te hkeuꞈ ve htaꞈ ngaˬ hui awˬ hpfuhˇ shiˍ leh ‘yawˇ hui htaꞈ haꞈ leh yawˆ yan ve yoˬ.’—Hpiˇliˇpiˆ 2:29.