Ha lehˬ ve Gʼuiˬ sha geh laˬ ve te hkʼaˇ dawˇ hkʼaˇ

Chaw yaˇ lehˬ ha lehˬ ve cawˬ gaˇ ve yoˬ. Chi teˇ hkui ngaˬ hui awˬ leh meuˇ ve awˬ yanˇ hkʼaw chehˇ taˍ leh, teˇ gʼaˇ le le “haˍ jaˇ ve” shoꞈ shaꞈ ve awˬ lawn gʼa hpuˇ ve yoˬ. (2 Tiˆmoˉseˍ 3:1) Teˇ hpaˍ lehˬ maˇ hteˇ maˇ cawˇ ve gʼa hpuˇ ve, naˬ ve, kanˉ maˇ gʼa te, maˇ heˆ leh yawˇ hui haꞈ ve chaw suh˗e ve pa taw, yawˇ hui ha lehˬ ve mehˉ kʼai ve yoˬ. Teˇ hpaˍ hpaˍ lehˬ awˬ nu ve awˬ lawn gʼa hpuˇ ve pa taw, dawˇ haˍ dawˇ hkiˉ leh nyi ma luˬ ve yoˬ. Yaˬhoˉvaˬ ve kanˉ te ve chaw htawˇ, awˬ gʼaˇ peuˬ leh ha lehˬ ve awˬ meu˗eˇ awˬ meu˗eˇ mehˉ kʼai gʼa ve yoˬ. Awˬ ceuˬ chi nawˬ gʼa hpuˇ ve kʼo, ha lehˬ ve htaꞈ nawˬ hkʼaˬ hkʼe te yuˬ hkʼawꞈ gʼa tuˬ ve le?

Na hkawˇ chi htaꞈ hkʼawꞈ piˇ tuˬ, awˬ tehˬ ha lehˬ ve aˬ htoꞈ ma le leh, tuꞈ ve hkanˍ ve htaꞈ gʼa hpuˇ htaˇ awˬ nu ve chaw ha lehˬ ve htaꞈ hkʼaˬ hkʼe te haꞈ shaˉ gʼa ve le, ngaˬ hui gʼa na gʼa piˇ ve yoˬ. Peuˬ hkʼawꞈ nawˉ, ngaˬ hui ha lehˬ ve htaꞈ hkʼaˬ hkʼe te haꞈ shaˉ leh kʼawꞈ cawˬ maˇ la gʼa ve kaꞈ ngaˬ hui gʼa mawˬ tuˬ yoˬ.

Ha lehˬ ve aˬ htoꞈ ma le?

Ha lehˬ ve chaw lehˬ nyi ma sha jaˇ ve chaw htaꞈ maˇ shuˍ. Awˬ lawn chi htaꞈ dawˇ nyi sheˍ. Tzuhˬ bvuhˆ ve chaw lehˬ gʼuiˬ hkʼeh jaˇ. Yaꞈ hkʼaˇ, yawˇ tzuhˬ bvuhˆ ve na˗oˬ htaˇ, maˇ kʼawꞈ gʼuiˬ˗o leh yawˇ shoꞈ shaꞈ ve awˬ lawn laiˉ ceuˬ cawˬ sheˍ ve yoˬ. Yawˇ ha lehˬ ve oˇ ve teˇ hkui teˇ yanˇ ceh hpehꞈ leh awˬ tehˬ ha lehˬ ve maˇ heˆ.—Tawˇ naˉ ve 14:13.

Yaꞈ hkʼaˇ, ha lehˬ ve lehˬ teˇ ceuˬ ceuˬ ngaˬ hui gʼa htaˇ maˇ heˆ leh dawˇ law htaˇ, ngaˬ hui ve nyi ma hkʼaw cawˬ ve dawˇ hkʼaˇ hpehꞈ ve, yoˬ. Ngaˬ hui gʼa hpuˇ chehˇ ve daꞈ maˇ daꞈ ve htawˇ maˇ kʼoˆ, ngaˬ hui kaꞈ ha lehˬ gʼa ve yoˬ. (1 Hteˇsaˍlawˇniˆ 1:6) Awˬ tehˬ kʼo, ngaˬ hui nyi ma maˇ sha ve htawˇ, ngaˬ hui kaꞈ ha lehˬ gʼa ve yoˬ. Tawˇ pa haˉ te kʼo, tcuh yaˇ hui Yeˍsuˆ ve awˬ lawn maˍ piˇ ve pa taw, shu dawˆ leh te luˬ ve htaꞈ yawˇ hui gʼa hpuˇ ve yoˬ. Yaꞈ hkʼaˇ, yawˇ hui “awˬ meh oˇ ve htaꞈ pa taw maˇ shawˍ maˇ caˆ te laˇ ve htaꞈ hkanˍ keunˍ ve yoˬ tehꞈ Gʼuiˬ sha shawˍ taˍ ve pa taw, jehˬ daꞈ shehˍ hpaˇ awˬ moˍ mehˆ gʼuˇ suhˍ yawˇ hui ha lehˬ ha kʼa tawˆ kʼai ve yoˬ.” (Tcuh yaˇ 5:41) Yawˇ hui te luˬ ve htaꞈ gʼa hpuˇ leh ha lehˬ ve maˇ heˆ. Gʼuiˬ sha geh ka tiꞈ yeˬ gʼa ve pa taw, yawˇ hui ha lehˬ ve yoˬ.

Ngaˬ hui paw la htaˇ kaꞈ ha lehˬ ve cawˬ ve maˇ heˆ leh awˬ ceuˬ chi ve yawˇ hkʼaˇ yawˇ hpehꞈ ve taˍ ve maˇ heˆ. Awˬ lawn kʼo, awˬ tehˬ ha lehˬ ve lehˬ Gʼuiˬ sha ve daꞈ kehˬ ve awˬ ha hpu geh la ve pa taw yoˬ. Daꞈ kehˬ ve awˬ ha hpu chi lehˬ “nyi ma awˬ suhˉ” cawˬ tuˬ ga laˇ leh, chi lehˬ ha lehˬ ve htaꞈ kaꞈ caˉ daꞈ ve yoˬ. (Eˇfeˇsuꞈ 4:24; Gaˍlaˍtiˆ 5:22) Ngaˬ hui ha lehˬ ve cawˬ kʼo, shoꞈ shaꞈ ve awˬ lawn leh tuꞈ ve hkanˍ ve gʼa hpuˇ ve htawˇ, haꞈ yuˬ gʼa ve yoˬ.

Ngaˬ hui henˇ yuˬ gaˇ ve awˬ lawn

Yaˬhoˉvaˬ miˬ guiˬ chi hkʼoˆ lo daꞈ ve htaꞈ mawˬ gaˇ ve, chi teˇ hkui ngaˬ hui mawˬ chehˇ ve maˇ daꞈ ve awˬ ceuˬ hkʼe maˇ heˆ. Yawˇ hui haiˬ ve awˬ ceuˬ te ve htawˇ, Yaˬhoˉvaˬ ha lehˬ ve cawˬ sheˍ ve yoˬ. Liꞈ hpu hkʼaw kʼoˆ ve, “yawˇ ve bon yehˬ hkʼaw lo awˬ gʼeuˆ ba leh nyi sha jaˇ ve yoˬ.” (1 Raˍsaˍvanˍ 16:27) Chi hkʼoˆ kaꞈ, Yaˬhoˉvaˬ ve kanˉ te ve chaw daꞈ ve awˬ ceuˬ htaꞈ te htaˇ, yawˇ ha lehˬ ve yoˬ.—Tawˇ naˉ ve 27:11.

Dawˇ law ve awˬ ceuˬ maˇ hpehꞈ la ve htawˇ, Yaˬhoˉvaˬ htaꞈ henˇ yuˬ chehˇ ve kʼo, ngaˬ hui kaꞈ ha lehˬ ve cawˬ gʼa sheˍ. Ngaˬ hui maˇ dawˇ haˍ cawˇ. Cawˬ taˍ ve daꞈ ve awˬ ceuˬ ngaˬ hui dawˇ nyi cawˇ leh awˬ gʼuˇ suhˍ hpawˇ daꞈ jaˇ ve awˬ ceuˬ ngaˬ hui yeunˇ hkanˍ leh law taˍ ve yoˬ.a—Awˬ maiˉ htaꞈ nyi sheˍ.

Liꞈ hpu hkʼaw chaw laiˉ gʼaˇ shoꞈ shaꞈ ve awˬ lawn laiˉ lawn cawˬ ve htawˇ, ha lehˬ ve htaꞈ haꞈ shaˉ gʼa ve yoˬ. Awˬ nu ve chaw Aˍbraˍhanˍ ve a shaꞈ htaꞈ kawˆ tuˬ cawˬ ve te piˇ ve htawˇ, leh awˬ nu ve chaw yawˇ htaꞈ shoꞈ shaꞈ ve awˬ lawn cawˬ tuˬ te piˇ ve htawˇ, Aˍbraˍhanˍ ha lehˬ ve htaꞈ haꞈ shaˉ gʼa ve yoˬ. (Awˬ hkuiˉ puiˍ 12:10-20; 14:8-16; 16:4, 5; 20:1-18; 21:8, 9) Hkʼaˬ hkʼe te yawˇ chi hkʼe te gʼa ve le? Yawˇ miˬ guiˬ awˬ suhˉ hkʼaw Meˍsiˉyaꞈ uˉ peunˍ ve awˬ hawˉ lo dawˇ law chehˇ ve yoˬ. (Awˬ hkuiˉ puiˍ 22:15-18; Heˍbrehˇ 11:10) Yeˍsuˆ kʼoˆ ve, “nawˬ hui ve awˬ pa Aˍbraˍhanˍ lehˬ, ngaˬ ve awˬ nyi awˬ haˉ htaꞈ gʼa mawˬ tuˬ ve htaꞈ pa taw ha lehˬ jaˇ ve yoˬ.” (Yoˇhanˬ 8:56) Ha lehˬ ve awˬ gʼuˇ suhˍ hpawˇ ngaˬ hui gʼa tuˬ ve, caˉ leh kʼawꞈ dawˇ nyi ve kʼo, ngaˬ hui kaꞈ Aˍbraˍhanˍ htaꞈ henˇ yuˬ gʼa ve yoˬ.—Roˉmaꞈ 8:21.

Pawˇluꞈ leh Siˍlaˆ kaꞈ tuꞈ ve hkanˍ ve laiˉ ceuˬ gʼa hpuˇ ve yoˬ. Yaꞈ hkʼaˇ, yawˇ hui hkʼa dehꞈ yonˍ gʼa ve leh ha lehˬ ve htaꞈ haꞈ shaˉ gʼa ve yoˬ. Tawˇ pa haˉ te kʼo, yawˇ hui htaꞈ shu maˇ maˇ dawˆ peuˬ hkʼawꞈ nawˉ, yawˇ hui htawnˍ hkʼaw lo gʼa chehˇ ve htawˇ, yawˇ hui “bon lawˬ leh Gʼuiˬ sha htaꞈ kʼa muiˬ chiˇ mvuh chehˇ ve yoˬ.” (Tcuh yaˇ 16:23-25) Awˬ gʼuˇ suhˍ hpawˇ Gʼuiˬ sha ka tiꞈ te taˍ ve htaꞈ hkʼaˬ htaˆ kaꞈ dawˇ nyi chehˇ ve pa taw, yawˇ hui gʼa hpuˇ ve awˬ lawn htaꞈ yeunˇ hkanˍ gʼaˇ ve yoˬ. Chi hkʼoˆ kaꞈ, Yeˍsuˆ awˬ hkʼaˇ suh gʼaꞈ yuˬ ve pa taw, tuꞈ ve hkanˍ ve gʼa hpuˇ ve tehꞈ yawˇ hui shiˍ ve yoˬ. Awˬ ceuˬ chi ve yawˇ hui htaꞈ ha lehˬ tuˬ te piˇ ve yoˬ. Gʼuiˬ sha ve kanˉ ka tiꞈ yeˬ ve hkʼaw te htaˇ, daꞈ ve awˬ ceuˬ gʼa ve tehꞈ ngaˬ hui tawnˇ taˍ ve kʼo, Pawˇluꞈ leh Siˍlaˆ htaꞈ henˇ yuˬ gʼa ve yoˬ.—Hpiˇliˇpiˆ 1:12-14.

Chi beuꞈ teˇ co˗e, awˬ viˉ awˬ nyi laiˉ gʼaˇ shoꞈ shaꞈ ve awˬ lawn gʼa hpuˇ ve htawˇ yawˇ hui ha lehˬ ve htaꞈ haꞈ shaˉ gʼa ve yoˬ. Tawˇ pa haˉ te kʼo, ha pa 11 maˬ 2013 hkʼawꞈ htaˇ, mvuhˇ haw mvuhˇ yeˬ lonˉ Haiˉyanˍ Hpiˇliˇpaiˍ mvuhˇ miˬ lo Shaˉhkiˆhkanˍ ve chaw hui ve yehˬ 1,000 yehˬ te luˬ piˇ ve yoˬ. Awˬ viˉ awˬ nyi teˇ gʼaˇ Cawˆ mehˬ ve Taˆhkawꞈloꞈbanˇ venˇ lo chehˇ ve yawˇ ve yehˬ kaꞈ hkʼa peu˗eˬ luˬ kʼai ve yoˬ. Yawˇ kʼoˆ ve, “awˬ lawn chi hkʼe ve htaꞈ gʼa hpuˇ ve htawˇ, awˬ viˉ awˬ nyi ha lehˬ sheˍ ve yoˬ. Ngaˬ hui cawˬ taˍ ve ha lehˬ ve htaꞈ hkʼa dehꞈ kʼoˆ maˍ laˇ maˇ gʼa.” Yaˬhoˉvaˬ ngaˬ hui htaꞈ te laˇ jaw ve awˬ ceuˬ ngaˬ hui hkʼaˬ htaˆ kaꞈ dawˇ nyi chehˇ ve kʼo, tuꞈ ve hkanˍ ve gʼa hpuˇ maˇ jaˇ ve htawˇ, ngaˬ hui ha lehˬ ve htaꞈ haꞈ shaˉ gʼa ve yoˬ. Ngaˬ hui ha lehˬ ve cawˬ gʼa tuˬ Yaˬhoˉvaˬ ngaˬ hui htaꞈ aˬ htoꞈ ma peꞈ laˇ sheˍ ve le?

Ngaˬ hui htaꞈ ha lehˬ tuˬ te laˇ ve awˬ ceuˬ

Ngaˬ hui Yaˬhoˉvaˬ geh meuˆ daꞈ htaˇ ha lehˬ jaˇ ve yoˬ. Chi lehˬ a yeˇ uiˍ jaˇ ve yoˬ. Mvuhˇ naw ma miˬ naˆ ma ve jawˇ mawˇ htaꞈ ngaˬ hui gʼa shiˍ daꞈ ve yoˬ. Yawˇ lehˬ ngaˬ hui ve awˬ pa, Gʼuiˬ sha, leh awˬ chawˇ hpehꞈ ve yoˬ!—Chiˇ mvuh ve 71:17, 18.

Yaˬhoˉvaˬ ngaˬ hui htaꞈ a shaꞈ peꞈ laˇ leh ngaˬ hui ve a shaꞈ ha lehˬ tuˬ te laˇ gʼa ve pa taw, ngaˬ hui yawˇ htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ. (Cuˇ yiˍ piˇ ve 3:12, 13) Ngaˬ hui yawˇ geh meuˆ daꞈ tuˬ shiˍ veu laˇ ve pa taw, yawˇ ngaˬ hui htaꞈ aˬ htoꞈ ma te tcuh gaˇ ve leh ngaˬ hui ve a shaꞈ teꞈ hkʼaˇ hkʼaˬ hkʼe te cawˇ ve ngaˬ hui na gʼa ve yoˬ. (Kawˇlawˇsehˇ 1:9, 10) Yaꞈ hkʼaˇ, maˇ˗awˍ ve chaw awˬ lawn chi ve htaꞈ maˇ na gʼa. Hkʼe te leh Pawˇluꞈ kʼoˆ ve, “Gʼuiˬ sha htaꞈ haꞈ ve chaw hui awˬ pon yawˇ gu taˍ ve awˬ ceuˬ teˇ hpaˍ htaꞈ mehˆ shiˍ maˇ mawˬ jaw, naˍ paw maˇ kaˇ jaw leh, chaw yaˇ ve nyi ma hkʼaw lo maˇ dawˬ shiˍ jaw ve yoˬ. . . . Yaꞈ hkʼaˇ Gʼuiˬ sha lehˬ, Awˬ ha hpu htaꞈ cuˇ leh awˬ ceuˬ chi teˇ hpaˍ ngaˬ hui htaꞈ hpeuꞈ maˍ laˇ peuˬ.” (1 Kawˇrenˍhtuˆ 2:9, 10) Ngaˬ hui Yaˬhoˉvaˬ ve a loˍ htaꞈ na gʼa ve kʼo, ngaˬ hui na gʼa ve yoˬ.

Chi hkʼoˆ kaꞈ, ngaˬ hui ve venˇ baˆ htaꞈ hpehˇ laˇ tuˬ Yaˬhoˉvaˬ ga laˇ ve yoˬ. (1 Yoˇhanˬ 2:12) Maˇ maw kʼo miˬ guiˬ awˬ suhˉ la tuˬ ve hkʼaw co co taiˍ taiˍ ve a shaꞈ gʼa teꞈ chehˇ tuˬ, yawˇ ngaˬ hui htaꞈ dawˇ law kuiˬ peꞈ laˇ ve yoˬ. (Roˉmaꞈ 12:12) Chi beuꞈ teˇ co˗e htawˇ, Yaˬhoˉvaˬ yawˇ htaꞈ oˉ kʼoˍ teˇ geh pui gʼa tuˬ, yawˇ ngaˬ hui htaꞈ awˬ chawˇ laiˉ gʼaˇ peꞈ laˇ ve yoˬ. (Chiˇ mvuh ve 133:1) Saˍtanˍ leh neˇ teˇ hpaˍ geh yawˇ ngaˬ hui htaꞈ ponˬ laˇ ve yoˬ. (Chiˇ mvuh ve 91:11) Daꞈ ve awˬ ceuˬ Yaˬhoˉvaˬ ngaˬ hui htaꞈ peꞈ laˇ ve ngaˬ hui hkʼaˬ htaˆ kaꞈ dawˇ nyi chehˇ ve kʼo, ngaˬ hui ha lehˬ jaˇ tuˬ yoˬ.—Hpiˇliˇpiˆ 4:4.

Ha lehˬ jaˇ tuˬ te laˇ ve awˬ hkʼaˇ

Hkriꞈ yaˇ ha lehˬ ve cawˬ˗oˬ ve kʼo, chi teˇ hkui aꞈ kehˉ ha lehˬ gʼa ve laˇ? Yeˍsuˆ kʼoˆ ve, “nawˬ hui awˬ hkʼaw lo ngaˬ ve ha lehˬ ve cawˬ tuˬ leh, nawˬ hui ha lehˬ ve biˇ la tuˬ, tawˇ chi teˇ hpaˍ ngaˬ nawˬ hui htaꞈ hto laˇ ve yoˬ.” (Yoˇhanˬ 15:11) Chi kʼoˆ gaˇ ve lehˬ ngaˬ hui ha lehˬ ve htaꞈ cawˬ maˇ la gʼa ve yoˬ. Ha lehˬ ve lehˬ aˬ miˍ htaꞈ tehˆ daꞈ gʼa ve yoˬ. Aˬ miˍ gʼaˇ hteꞈ toꞈ hehnˇ tcuh gaˇ ve kʼo, suhˆ gʼa kʼawꞈ keu ve yoˬ. Gʼuiˬ sha ve daꞈ kehˬ ve awˬ ha hpu ngaˬ hui ha lehˬ tuˬ ga laˇ ve tehꞈ tawnˇ taˍ sheˍ. Chi htaꞈ pa taw, ngaˬ hui ha lehˬ ve kʼawꞈ cawˬ gaˇ ve kʼo, ngaˬ hui bon gʼa lawˬ cawˇ ve leh caˉ leh Gʼuiˬ sha geh daꞈ kehˬ ve awˬ ha hpu gʼa lawˬ cawˇ ve yoˬ. Chi hkʼoˆ kaꞈ Gʼuiˬ sha ve awˬ ha hpu dawˇ pawnˍ piˇ ve Liꞈ hpu htaꞈ ngaˬ hui gʼaw leh gʼa dawˇ nyi cawˇ ve yoˬ.—Chiˇ mvuh ve 1:1, 2; Luˉkaꞈ 11:13.

Yaˬhoˉvaˬ nyi hkʼaˇ suh tuˬ te piˇ ve kʼo, ngaˬ hui ha lehˬ tuˬ te laˇ gʼa ve yoˬ. (Chiˇ mvuh ve 35:27; 112:1) Aˬ htoꞈ ma pa taw le? Liꞈ hpu hkʼaw kʼoˆ ve, “Gʼuiˬ sha htaꞈ kawˆ leh, yawˇ ve awˬ liˇ tawˇ hkawˇ teˇ hpaˍ htaꞈ na yuˬ˗oꞈ. Chi hkʼe te tuˬ, Gʼuiˬ sha ngaˬ hui htaꞈ te hpanˍ taˍ laˇ ve yoˬ.” (Cuˇ yiˍ piˇ ve 12:13) Gʼuiˬ sha ve a loˍ htaꞈ gʼaꞈ te tuˬ yawˇ ngaˬ hui htaꞈ hpanˍ taˍ laˇ ve yoˬ. Chi htaꞈ pa taw, ngaˬ hui Yaˬhoˉvaˬ ve kanˉ te htaˇ, ngaˬ hui ve a shaꞈ teꞈ kuiˬ hkʼaw awˬ tehˬ ha lehˬ jaˇ.b—Awˬ maiˉ htaꞈ nyi sheˍ.

Ngaˬ hui ha lehˬ ve kʼo, aˬ htoꞈ ma awˬ bon gʼa ve le?

Ngaˬ hui ha lehˬ ve cawˬ maˇ ve kʼo, awˬ nu ve awˬ bon gʼa sheˍ ve yoˬ. Tawˇ pa haˉ te kʼo, ngaˬ hui shoꞈ shaꞈ ve awˬ lawn cawˬ ve htawˇ, Yaˬhoˉvaˬ ve kanˉ ha lehˬ ve hkʼaw kʼawꞈ te ve kʼo, Yaˬhoˉvaˬ nyi hkʼaˇ suh jaˇ tuˬ yoˬ. (Bon maˍ ve 16:15; 1 Hteˇsaˍlawˇniˆ 5:16-18) Chi hkʼoˆ kaꞈ ngaˬ hui awˬ tehˬ ha lehˬ ve cawˬ ve pa taw, hpu shi mawˇ jeˬ ngaˬ hui awˬ pon a yeˇ uiˍ jaˇ ve tehꞈ ngaˬ hui maˇ dawˇ. Yaꞈ hkʼaˇ, Gʼuiˬ sha ve mvuhˇ miˬ awˬ pon yuˬ tanˇ leh te tuˬ, ngaˬ hui coˇ caˇ leh gʼaˇ hteꞈ te tuˬ yoˬ. (Maꞈhtehˍ 13:44) Yaˬhoˉvaˬ awˬ pon te ve pa taw, daꞈ ve awˬ bon teˇ hpaˍ htaꞈ gʼa leh ngaˬ hui ha lehˬ jaˇ ve yoˬ. Ngaˬ hui a shu yawˇ awˬ to leh awˬ nu ve chaw kaꞈ ha lehˬ tuˬ te piˇ gʼa ve yoˬ.—Tcuh yaˇ 20:35; Hpiˇliˇpiˆ 1:3-5.

Chi hkʼoˆ kaꞈ ngaˬ ha lehˬ ve cawˬ maˇ ve kʼo, ngaˬ hui kaꞈ chehˇ sha cawˬ sha gʼa ve yoˬ. Liꞈ hpu hkʼaw kʼoˆ ve, “ha lehˬ puiˉ ve chaw lehˬ, chehˇ sha puiˉ ve yoˬ.” (Tawˇ naˉ ve 17:22) Aˍmeˬriˆkaꞈ mvuhˇ miˬ hkʼaw liꞈ henˇ yehˬ lonˉ teˇ kaˬ lo chaˬ nyi tehˆ nyi paˍ teˇ gʼaˇ chehˇ sha cawˬ sha ve henˇ gʼa ve awˬ lawn lehˬ Liꞈ hpu hkʼaw hawˍ daꞈve yoˬ. Yawˇ kʼoˆ ve, “chi teˇ hkui nawˬ ha lehˬ leh a shaꞈ htaꞈ nyi hkʼaˇ suh ve kʼo, awˬ gʼuˇ suhˍ htaˇ chehˇ sha cawˬ sha jaˇ tuˬ yoˬ.”

Awˬ leh meuˇ ve haˍ jaˇ ve awˬ yanˇ hkʼaw a shaꞈ gʼa teꞈ chehˇ ve htawˇ, Gʼuiˬ sha ve daꞈ kehˬ ve awˬ ha hpu gʼa tuˬ, ngaˬ hui bon lawˬ leh Liꞈ hpu htaꞈ henˇ leh hkʼa dehꞈ dawˇ nyi htaˇ, ngaˬ hui ha lehˬ tuˬ yoˬ. Chi teˇ hkui Yaˬhoˉvaˬ ngaˬ hui htaꞈ peꞈ laˇ ve daꞈ ve awˬ ceuˬ teˇ hpaˍ htaꞈ dawˇ nyi htaˇ, awˬ nu ve chaw yonˍ hkʼaˇ htaꞈ henˇ yuˬ htaˇ, leh Gʼuiˬ sha ve a loˍ htaꞈ coˇ caˇ leh gʼaꞈ te htaˇ, ngaˬ hui kaꞈ ha lehˬ gʼa ve yoˬ. Ngaˬ hui chi hkʼe te ve kʼo, Chiˇ mvuh ve liꞈ 64:10 hkʼaw kʼoˆ ve hkʼa shuˍ gʼa hpuˇ ve yoˬ. “Gʼuiˬ sha te taˍ ve kanˉ teˇ hpaˍ htaꞈ pa taw, hteˇ ve cawˇ ve chaw hkʼa peu˗eˬ gʼa ha lehˬ tuˬ yoˬ.”