The Thing Dem Da John Write
2 On the third day, they wor having one wedding party in Ca′na da in Gal′i·lee, and Jesus ma wor there. 2 They also invite Jesus and his disciple dem to the wedding party.
3 When the wine wor coming finish, Jesus ma tell him say: “They not get wine.” 4 But Jesus tell her say: “Woman, wetin me and you get to do with it?* My time not reach yet.” 5 His ma tell the people who wor serving the wine say: “Anything he tell yor to do, yor mon do it.” 6 They wor having six big-big water jars da they made from rock. It wor sitting there so da people can wash their hands before they eat, because da just what the Law for the Jews say. Each of them wor able to take about 12 to 17 gallons.* 7 Jesus tell them say: “Yor full up the jar dem with water.” So they full up the jar dem with water until it reach to the mouth. 8 Then he tell them say: “Yor take some and carry it to the man who directing the party.” So they carry some to the man. 9 The man who wor directing the party taste the water da Jesus turn to wine. He never knew where it came from (but the people who draw the water knew). When he taste the wine, he call the man who just got marry. 10 He tell him say: “Everybody can bring the good wine first. Then when people get drunk, they can bring the one da not too good. But for you, you been keeping the good wine.” 11 Jesus perform his first miracle in Ca′na da in Gal′i·lee, and he show da he get power. And his disciple dem put faith in him.
12 After da, he went back to Ca·per′na·um with his ma, his brother dem and his disciple dem, but they not stay long there.
13 The time for the Jews to celebrate the Passover wor near, so Jesus went to Jerusalem. 14 When he enter the temple, he saw the people selling cows, sheep and pigeons. And even the people who wor changing money wor sitting down near their tables. 15 So Jesus put some rope dem together and he drive all the people who wor selling sheep and cows from in the temple. He scatter the money changer dem coins and turn their table dem upside down. 16 And he tell the people dem who wor selling the pigeons: “Yor take this thing dem from here! Yor stop making my Father house to be market ground!” 17 Then his disciple dem remember what they read in the Scriptures: “The love* I get for your house will be like fire burning in my heart.”
18 So the Jews dem tell him say: “Show us sign to prove da you get the right to do this thing dem.” 19 Jesus tell them say: “Yor break this temple down, and I will build it back in three days time.” 20 Then the Jews dem say: “It take 46 years to build this temple, and you say you will build it back in three days time?” 21 But when he wor talking about the temple, he wor talking about his body. 22 But when he die and came back to life, his disciple dem remember what he use to say. And they believe the Scriptures and what Jesus say.
23 But when he wor in Jerusalem for the Passover, plenty people put faith in his name when they saw the miracle dem he wor performing. 24 But Jesus not really trust them because he knew all of them. 25 And he not need anybody to tell him about human being, because he know what in their heart.