Ilembile Marku

15 Bebeinimwee undhe uchanga, andimuwa a sembe na andimuwa andimuwa vambo-i na alembi, thapulela Tribunale lothene Nlukhulu la Ayuda, tatoogumanyeya vambo-ive ira tavwelane vyafuna aliwa m’mwirana Yesu. Adhamale tatoom’manga nom’dhowanee wa Pilato. 2 Ee-no Pilato atoom’fuka ira: “N’nga we uli Mwene wa Ayuda?” Yesu awakhunle ira: “Vili e-no ninga muongele nyo.” 3 Mbwenye andimuwa a sembe tanoom’nukhedha vyongo vinjinji. 4 Moi e-no Pilato atoom’fuka okoka ira: “N’nga kunowakhulai? Kaing’ana injiva wa miselu inounukhedha atwila.” 5 Mbwenye Yesu kawakhunle iliyothene, moi Pilato atoodabwa maningi.

6 Va pwando nlilothene, Pilato anoathathulela atu nyaperezo m’mbo-i wavepha aliwa ira akhumi-iwe. 7 Vahora yeniyo mutu m’mbo-i dhinalee Baraba ali perezo vambo-i naatu odhimbinuwela guverno. Aliwa tatoopha mutu vahora yadhimbinuwela aliwa guverno. 8 Ee-no mwinji waatu watoofiya noroma vepha movwelanana vyongo vyaairelecha Pilato hora dhothene. 9 Liye atoafuka ira: “N’nga munofuna ira ndoothathuleleni Mwene wa Ayuda?” 10 Namwasa oi Pilato anooidhiwa ira andimuwa a sembe tatoom’velela Yesu namwasa wa bivu. 11 Mbwenye andimuwa asembe tatoalimbi-a atu vepha ira taathathulele Baraba. 12 Vowakhula Pilato atoonga ira: “N’nga ula unom’monga nyo ira ndi Mwene wa Ayuda ndim’mwirena a-vi?” 13 Aliwa tatookhuwa okoka ira: “Athomeiwe wenuo!”* 14 Mbwenye Pilato atoodhowanave afuka ira: “Mwasiwa ngwan’ni? N’nga liye udawilen’ni?” Mbwenye atwao tatoodhowanave khuwa mwakopolo ira: “Wenuo athomeiwe baa-i!”* 15 Adhamale vofuna kwakwaneli-edha vyafuna atwao, Pilato atoathathulela Baraba. Mbwenye atootonga ira Yesu akwapuliwe, adhamale atoom’velela ira amaphiwe vothomeiwa vaimuri yonelavo nyarwa.

16 Anyakhondo tatoom’tukula Yesu nom’dhowanee vaindharoni ya nyumba ya namatonga, adhamale tatoogumanyi-a mwinji wethene waanyakhondo. 17 Moi e-no tatoom’mwari-a yowara yofilela thitho tatoolua ichapowa ya umwene ya minga nom’mwari-a. 18 Moi e-no tatooroma m’khuwela ira: “Kacheliwani nyo Mwene wa Ayuda!” 19 Thitho tanoom’khoma muruni na rere, m’thurela mare, thitho tanookokora nom’moramela. 20 Tangamadhi m’singilila, tatoom’mungula nguwo yofilela ile nom’mwari-a vyowara vyeevile thitho tatoom’dhowanee ira tamam’khomele vaimurini yoonelavo nyarwa.* 21 Thitho aliwa tatoom’kanyi-edha mutu mwinango oi aira vira dhinalee Simoni wau Kirene ira atukule imuri yoonelavo nyarwa* yafuna aliwa mam’khomelavo Yesu. Liye akhumela tatamo lamamidhi thitho ali babiwa Alexandri na Rufu.

22 E-no tatoom’fiyanee valimburo loitaniwa Gologota. Madhu enala anothapulela ira, “Limburo Vanotatileliwa Magaragadu a Miru.” 23 Weo aliwa tatoom’va-a vinyu othangani-a na rombwe waitaniwa mule, mbwenye liye atookhonda. 24 Thitho tatoom’khomela vaimurini yoonelavo nyarwa nogawana nguwee yaundhe voira lotela, ira taone vakada mutu inofuna liye tukula. 25 Moi e-no hora ingali 9 hora, aliwa tatoom’khomela vaimurini yoonelavo nyarwa. 26 Madhu othonyi-edha landu wam’phele aliwa tatoalemba ira: “Mwene wa Ayuda.” 27 Thitho aliwa tatoothomeya vaimurini mambavwa menli vambo-i na Yesu. M’mbo-i tam’thomeile wu dhandalee lodyana thitho mwinango tam’thomeile wu dhandalee lazwele. 28* —— 29 Atu tavira duzi na vevo tanoonga madhu onyoza Yesu thitho tanoosukusa mirwiwa noonganga ira: “We waongecha ira ndinodha gwi-a kachisi noumanga wa malambo mararu, 30 dhivulumuche thitho uthithe vaimurini yoonelavo nyarwayo!”* 31 Saasawa thitho andimuwa a sembe vambo-i naalembi, naaliwene tanoom’nyoza. Aliwa taonga ira: “Liye atooda vulumucha atu enango, mbwenye kanooda dhivulumucha ekhene! 32 Kristu Mwene wa Israeli uthithe chineneeva vaimurini yoonelavo nyarwayo* ira i-yo nione nororomela.” Naaliwene thitho mambavwa menli athomeiwile vambo-i na liye ale tanoom’nyoza.

33 Hora ingakwakwan’ne 12 nathana, ilambo yothene yeyo watookala isi fiyedha 15 hora namaulo. 34 15 horamo, Yesu atookhuwa mwakopolo ira: “Eʹli, Eʹli, laʹma sa·bach·thaʹni?” Madhu enala anothapulela ira: “Nlungwanga, Nlungwanga, mwasiwa ngwan’ni mutondi-iya?” 35 Atu enango taimenle duzi na vevo tangavwide vyevi tatooroma onga ira: “Kavuruwanani! Unoitana Eliya.” 36 Adhamale mutu mwinango atootamanga mabwini-a tonje mu vinyu owawa thitho atooli-ela rereni nom’va-a ira amwe. Moi atoonga ira: “Kam’iyeni, nione akala Eliya unodha dham’thithi-avo.” 37 Mbwenye Yesu atookhuwa okoka mogweli-a madhu, adhamale atoomari-eya. 38 Moi e-no kurtina yali wari mwa nyumba yopambuleya latookauwa vari romela dhulu fiya vathi. 39 Moi e-no, namasogolela wa anyakhondo aimenle duzi na Yesu angaoni vyaireyavyo vahora yamari-eya liye, atoonga ira: “Mwaimbarimbari mutula ali Mwana Nlungu.”

40 Vatookala a-iyana taona vyaireyavyo tangali undendai vang’ono. Enango mwaaliwa ali Mariya Madalena, Mariya m’mee Yakobo wang’ono na Yose thitho vatookala Salome, 41 oi tawendecha na Yesu vambo-i nom’labelanga vahora yali liye wu Galileya. Vatookala thitho a-iyana anjinji adhidhe na liye khumela wu Yerusalemu.

42 Voi ali namaulo maningi thitho ali dambo Lokozeela, venango ira dambo loi bebeinimwee ndi Sabudu, 43 watoodha Yosefi wau Arimateya mutu oidhiweya wa Tribunale Nlukhulu la Ayuda oi anodedi-edha Umwene wa Nlungu. Liye atoodhowa molimba rima wa Pilato mavepha tembo wa Yesu. 44 Mbwenye Pilato anookaikela akala Yesu atookwadi. Ee-no atooitani-a namasogolela wa anyakhondo nom’fuka akala ira Yesu ali angakwide wale. 45 Pilato angasikimizele khumela wa namasogolela wa anyakhonduwo, atoorumeli-a ira Yosefi amatukule tembuo. 46 Moi e-no Yosefi atoogula nguwo yapama maningi nothithi-a manungo a Yesu thitho atoapota na guwiyo noa-ela masiyeni athimbile liye valiphandheni. Adhamale atoopingiricha libwe nlukhulu nofunga suwo wa masiyao. 47 Mbwenye Mariya Madalena na Mariya m’mee Yose tatoodhowanave ing’anechecha valokotiwile Yesuvo.