Karta Lilembile Yuda
1 Ndili Yuda, dhaari wa Kristu Yesu na balee Yakobo. Ndinolembela oitaniwa anoadhiveliwana Nlungu Babi-u noabarela ira takale ovwelana na Yesu Kristu:
2 Nlungu auwenjedheleni tangaranga, rendele na udhivelee.
3 Odhiveliwiwa abali, ndanoofunechecha ulembelani vya ivulumucho ina i-yo. Mbwenye nditoona ira ndipama ulembelani vyoulimbi-ani khoma mwakopolo khondo yairoromelo yoi yaveleliwile fendo imbo-i baa-i wa ochenao. 4 Nditoira e-no namwasa oi atu enango atovolowa mo-ooneela vari vinyu. Malemba atoongelatu walelene ira atu enala anodha tongiwa. Aliwa mbaatu o-oova Nlungu, voi ano-indi-edha basa riya rima ulukhulu wa Nlungwi-u kala mwasa oairi-a kalelo lova-a manyadho.* Thitho anothonyi-edha ira mbo-ororomeleya wa Mbwii-u m’mbo-i baa-i Yesu Kristu, oi ngwanigunle.
5 Angalive ira mutomala wale viidhiwa vyevi, ndinofuna ndiuthuucheni ira Yohova* angamadhi vulumucha atwee voakhumi-a muilambo ya Iguputu, vasogolovee atoononga atu oi katana iroromelo. 6 Thitho angelo ta-iidhe urumiwi waava-idhe Nlungu dhulu, na limburo lafwanela aliwa kala, Nlungu atoamanga na makureti oi katinooda padheya noalokota mu isi ilukhulu dedi-edhela ira tadhatongiwe va dambo nlukhulu. 7 Mofwanafwana na vyevi atu amasidadi a Sodoma na Gomora na masidadi orungunuwa, anooira unyambi* maningi thitho gonana mundhila yo-ofwanelela. Atu enala tatoolangiwa monongiwa mwadhowa nodhowa* thitho ndiifwanafwani-o yoniwenjeli-a.
8 Angalive ira vili e-no, atu avolowile mo-ooneelala naaliwene thitho anodhiveliwana thuulela vyongo vyothakala, thakali-a manungo aafwiwa na aatu enango, nyoza utongi thitho tanoongela vyaimburutu atu aava-idhe Nlungu titimi-o. 9 Mbwenye Migeli ndimuwa wa angelo, vya-iyan’ne liye mathuulelo na Namanami-a thitho atookangana na liye vyokhuza tembo wa Mose, kawesedhile navang’onovene m’tonga venango m’nyoza, malomwee aongile ira: “Yohova* ausumulule.” 10 Atu enala tanoonga monyoza vyongo vyoi katinovivwechecha navang’onovene. Thitho vyongo vinovwechecha aliwa mwaibaliwelo, mofwanafwana na vinyama vyoi kavinothuulela, anodhowanave vithakali-a na vyevi.
11 Soka waaliwa namwasa o-arela ndhila ya Kaini, na ndhila yodaweya ya Balamu vofuna wachela yotuva, moi atonongeya namwasa ofuna onga modhimbinuwela atu asogolela vari viwa ninga mwairile Kora. 12 Atwala tadyanga na nyo mapwando anoirecha nyo ira muthonyi-edhane udhivela, tanokala ninga mabwe malukhulu olokoteya mi-injeni. Tali ninga thitho anamakumbiza oi anodhidyi-a okhene mo-oova, na mirambo yo-okaana ma-inje yotukuleya wu na wu na liphevo, thitho tali ninga miri yo-ova-a vyova-a thitho horee yova-a yanga-adhi vang’ono funa mala, youmelatu yoi thitho itomala duliwa. 13 Aliwa thitho tali ninga mabimbi oophi-a avabara, okhumi-a liporu na vyongo vyoava-a manyadho; thitho ninga nyenyedi dhowenda modimela, moi Nlungu utoa-ela muisi ilukhulu mwemo munofuna kala aliwa modhowa nodhowa.
14 Masiki thitho Inoki, mutu wa muziza la 7 khumela va Adamu, atooro-edha vyaaliwa vaongile liye ira: “Kaing’anani! Yohova* atoodha naagelwee mamiliyau na mamiliyau 15 dhatonga atu ira othene o-oova Nlungu tatokaana selu namwasa wa vyongo vyonyoza Nlungu vyairile aliwa, thitho namwasa wa vyongo vyothene vyothakala vyoi atu odawa na o-oova Nlungwala vyamuongele aliwa.”
16 Atu enala anodhiveliwana dungunya, khumbanya vyaingumiiwa, thitho anoirana vyongo vinolavela aliwa noonga modhiulukhuli-a. Anoatitimi-a thitho atu naifunelo yoi taganyali yongo.
17 Mbwenye nyo abali odhiveliwiwa, muthuulele madhu aongile arumiwi a Mbwii-u Yesu Kristu walelene. 18 Voi anouwandelani ira: “Malambo omari-a unodha kala atu onyoza, oi anodha irangana vyongo vyothakala vinolavela aliwa.” 19 Atu enala anoiri-a atu ira ta-avwelanenga, anoira vyongo ninga vinyama moi katinosogoleliwa na zimu wa Nlungu. 20 Mbwenye nyo abali odhiveliwiwa, mulimbi-enga iroromelwinyu yochena maningi thitho mulobelenga movwelana na zimu ochena, 21 ira mudhowenave ira vyongo vinairi-e ira Nlungu adhowenave udhiveliwanani vanodedi-edhela nyo tangaranga dha Mbwii-u Yesu Kristu dhoi ndi dhinofuna dhairi-a ira mudhakaena ingumi yo-omala. 22 Thitho mudhowenave vwela tangaranga atu anokaikela vyongo vinororomela i-yo. 23 Mwaavulumuche voakhumi-a mombaranya va muloni. Mudhowenave thitho vwela tangaranga atu enango, mbwenye mwapolepole. Voavwela tangaranga muidanengana vyowara viwa vithakali-idhe aliwa na makalelo othakala.*
24 Nlungwi-u wa titimi-o unodha ubarelani ira mwa-akwe noukami-ani ira muimele vamethonivee wu musangalalanga maningi. 25 Liye ndi Nlungu m’mbo-i baa-i na Namavulumuchi-u dhela mwa Yesu Kristu Mbwii-u, thitho ngofwanelela titimi-o, umwene, kopolo, na utongi khumela walelene fiyedha va-eeni thitho modhowa nodhowa. Ame.