Lodhowa wa Filimoni
1 Miyo Paulo, nyaperezo namwasa wa Kristu Yesu, ndili vambo-i na Timoteo bali-u, thitho ndinolembela we Filimoni namalaba fwi-u odhiveliwiwa, 2 vambo-i na rongoli-u Apiya thitho na nyakhondo fwi-u Arkipo na pingo unogumanyeya m’mbamwaa:
3 Riya rima ulukhulu na rendele vyokhumela wa Nlungu Babi-u na Mbwii-u Yesu Kristu, vikale na nyo.
4 Hora dhothene ndinosimba Nlungwanga ndauromolanga mumalobelwanga, 5 ndavwa vya iroromeloyaa na moda munodhiveliwelana we Mbwiye Yesu vambo-i naatu othene ochena. 6 Ndinovepha ira iroromelo ina we vambo-i naatu enango, iukami-e zindiyela yongo iliyothene yapama ina i-yo dhela mwa Kristu. 7 Balanga, udhivelaa utondisangalali-a nondilimbi-a maningi, namwasa oi utolimbi-a thitho mirima yaatu ochena.
8 Ee-no angalive ira dhela mudhina la Kristu nditokaana ufulu ulukhulu oonga, moi ndinooda uwandela vyongo vinofwanela we irana, 9 ndinoona ira pyapama ndiire uvepha mwaudhivela. Miyo Paulo oi nditoulula thitho nyaperezo namwasa wa Kristu Yesu, 10 ndinouvepha vya mwananga Onesimu, oi ndikadhi ninga babee vahora ili miyo perezoni uno. 11 Walelene ali mutu o-okami-a wa we, mbwenye va-eni ngokami-a wa we na miyo. 12 Va-eeni ndinaam’ruma okoka wa we. Liye ndi mutu wavarimani vanga.
13 Ndingadhiveliwile kalave vambo-i na liye ira adhowenave ndilabela malo mwa we, vahora ili miyo perezoni uno namwasa wa milanyu yapama. 14 Mbwenye kandinofuna irana yongo iliyothene wa-anandirumeli-e, ira vyongo vyapama vinaire we kuviire moira kanyi-edhiwa, mbwenye uviire mofunawaa. 15 Venango ngumwasee atookhuma weo wahora yoyeva,* ira adhawela adhakale nawe modhowa nodhowa. 16 Kunokala na liye okoka ninga dhaari, mbwenye unokala bali odhiveliwiwa, oi ndinom’dhiveliwana maningi. Mbwenye unofwanela m’dhiveliwana maningi namwasa oi ndi dhaaraa na balaa mwa Mbwiye. 17 Ee-no akala unondionadi ira ndili fwaa, um’mwachele na mandha menli ninga munawachelele we miyo. 18 Thitho akala atoudawela yongo iliyothene venango akala utokaana mangawa na we, mangawao akale wa miyo. 19 Miyo Paulo, ndinolemba na dhandha langa: Ndhinodha weli-a mangawao. Thitho kandinofwanela uwandela vyevi, voi naweene thitho utokaana mangawa wa miyo a ingumiyaa. 20 Bali ndinaauvepha ira, undikami-e mwa Mbwiye: Ulimbi-e rimanga ninga mutu o-arela Kristu.
21 Ndinoulembela vyevi namwasa oi ndinororomela ira unooda viirana. Nditoidhiwa thitho ira unoirana vyokwaranya viongile miyovi. 22 Thitho uvaeletu kozeela kwartu yoi ndidhafiyedhemo. Ndinororomela ira namwasa wa malobelwinyu, ndinothathuliwa ira ndidhaulabeleni.
23 Epafora, nyaperezo fwanga mwa Kristu Yesu, unaaumwenyulani. 24 Marku, Aristarku, Dema na Luka, oi ndi anamalaba afwanga, anaaumwenyulani thitho.
25 Riya rima ulukhulu wa Mbwiye Yesu Kristu ukale na nyo namwasa wa zimu unothonyi-edha nyo.