Loroma Lilembile Juwau
2 A-imanga odhiveliwiwa, ndinoulembelani vyongo vyevi ira mwa-aire yodawa. Mbwenye akala mutu mwinango utodawa, nitokaana namakami-a olongomana, Yesu Kristu, oi uli vambo-i na Baba. 2 Liye atookala sembe yokhunela vyodawa vi-u.* A-kala vi-u baa-i mbwenye thitho ya vailambo yothene yavathi. 3 Ninothonyi-edha ira ndinom’mwidhiwa nadhowanave vwela malamulwee. 4 Mutu unoonga ira, “Miyo nditom’mwidhiwa,” mbwenye imwanangana vwela malamulwee ngonama thitho rimanimwee kamuli imbarimbari. 5 Mbwenye mutu uliwethene unovwela madhu a Kristu, unothonyi-edha ira unodhiveliwanadi Nlungu. Namwasa wa vyevi ninoidhiwa ira nili ovwelana na liye. 6 Mutu unoonga ira uli ovwelana na liye, unofwanela dhowanave wenda ninga mwawendela liye.
7 Odhiveliwiwa abali, kaiira ndinaaulembelani lamulo lipya. Mbwenye ndinoulembelani lamulo lawale likanlena nyo romela vamaromelo. Lamulolee ndi madhu avwide nyo. 8 Mbwenye, ndinoulembelani lamulo lipya la-arelecha Yesu, loi nyo thitho munoli-arela, namwasa oi isi inaamala thitho njeza ya imbarimbari itoroma moneela wale.
9 Mutu unoonga ira uli munjeza mbwenye unoidanana balee, kuongela ira uli isini. 10 Mutu unom’dhiveliwana balee, kuongela ira uli munjeza thitho kavali yongo inairi-e ira agwegweduwe. 11 Mbwenye mutu unoidanana balee uli isini thitho unowenda isinimo moi kanoidhiwa unaa liye namwasa oi isiyo itofunga methwee.
12 Ndinolembela nyo a-imanga odhiveliwiwa, voi vyodawa vinyu vitoleveleliwa namwasa wa dhinalee. 13 Ndinolembela nyo ababa, namwasa oi munom’mwidhiwa ukanlevo romela vamaromelo. Ndinolembela thitho nyo azombwe namwasa oi mutom’gonji-a othakaluo. Ndinolembela nyo a-ima odhiveliwiwa namwasa oi munom’mwidhiwa Baba. 14 Ndinolembela nyo a baba, namwasa oi munom’mwidhiwa ukanlevo romela vamaromelo. Ndinolembela nyo azombwe namwasa oi muli olimba thitho munororomela madhu a Nlungu moi mutom’gonji-a othakaluo.
15 Kamudhiveliwengana ilambo venango vyongo vya muilambo. Akala mutu mwinango unodhiveliwana ilambo, kuongela ira kanodhiveliwana Baba. 16 Namwasa oi yongo iliyothene ya muilamboi, ninga vinolavela manungo, vinolavela metho, nodhioneeli-edha na vyongo vina mutu vaingumiyee,* kavinokhumela wa Baba mbwenye muilamboi. 17 Wenjedhela veva, ilamboi inaadhowa thitho yongo iliyothene ya muilamboi inolavela atu inodhowa vambo-i naaliwa. Mbwenye oirana vinofuna Nlungu unodha kalao modhowa nodhowa.
18 A-imanyo, yen’na ndi hora yakhomoni mwatoovwa ira amwidani a kristu anaaudha thitho va-eni amwidani a kristu anjinji atooneela. Namwasa wa vyevi ninoidhiwa ira yen’na ndi hora ya khomoni. 19 Enao takhumele vari vi-u, mbwenye katali a mugulu li-u, namwasa oi aakale ira tali a mugulu li-u, tangadhowilenave kala vambo-i na i-yo. Mbwenye tatookhumamo naifunelo yoi viidhiweye ira kai othene ali mugulu li-u. 20 Nyo mwatoozoziwa na zimu wa Nlungu wenuo uli ochena, thitho mwethene munoidhiwa imbarimbari. 21 Nditoulembelani vyevi, a-kala namwasa oi kamunoidhiwa imbarimbari mbwenye namwasa oi mutoidhiwa imbarimbari thitho namwasa oi kavali yonama iliyothene inokhumela mu imbarimbari.
22 N’nga mbaani unofuna kala onama kwaranya wenuo unoruni-a ira Yesu ndi Kristu? Wen’na ndi mwidani wa kristu oi unokhonda Baba na Mwana. 23 Mutu uliwethene unokhonda Mwana kanaode kala vauxamwali na Baba. Mbwenye unom’rumela Mwana unokala thitho va uxamwali na Baba. 24 Mbwenye vyongo vyavide nyo voroma vikaleve mirimani mwinyu. Vyavwide nyoovyo vyadhowanave kala mirimani mwinyu, munodhowanave thitho kala ovwelana na Mwana vambo-i na Baba. 25 Thitho liye atoonilanyedha ingumi yo-omala.
26 Nditoulembelani vyongo vyevi vyokhuza atu anofuna udimeli-ani. 27 Mbwenye nyo, Nlungu atouzozani na zimwee thitho zimweuo ulive mwa nyo, moi kavanofuneela mutu uliwethene oi aufunji-engani. Mbwenye zoziwao unaaufunji-ani vyongo vyothene thitho kwaimbarimbari a-kala onama. Ninga mwemo zoziwao mwaufunji-edheleni aliwa, mudhowenave kala ovwelana na liye. 28 Va-eni nyo a-imanga odhiveliwiwa mukaleve ovwelana na liye ira adhaoneela, nidhakaena ufulu oonga. Thitho ira na-adhakhume vamethonivee mwamanyadho vahora yokalavo* wee. 29 Akala mutoidhiwa ira liye ngolongomana, kuongela ira mutoidhiwa thitho ira mutu uliwethene oira vyongo vyapama abaliwile khumela wa Nlungu.