Lodhowa wa Aebere
6 Ee-no voi nitomala funjedha makhundo oroma okhuza Kristu, dhoweni nidhilimbi-edhe mwathindhi ira nikale owarala mwauzimu. Kaniwelele okoka uvifunji-edho vyoroma, vyoi kuchinyuwa wu mabasa okwa, roromela Nlungu, 2 ifunji-edho yokhuza ubadizo, sameli-a mandha, venyathi-iwa waalimbo wukwa thitho tongiwa modhowa nodhowa. 3 Nlungu arumela, ninodhilimbi-edhadi ira niwarale mwauzimu.
4 Vatokala atu awandeliwile na Nlungu, oi tatooroma wachelavo yotuva yapezi yadhulu na zimu ochena 5 oi thitho tatoovwavo madhu apama a Nlungu na maraeli-o anofuna dhaveleliwa vailambo yavathi inodhiyo. 6 Mbwenye va-eeni atu enala tatovandhuwa thitho pyo-oodeya aweleli-edha okoka ira tachinyuwe, namwasa oi anaathomeya okoka Mwana Nlungu nom’nyoza vakwecha. 7 Mateya anowachela maraeli-o okhumela wa Nlungu arumbweliwanga dhongwe wiliwili. Amala mateya anomeli-a vyomela ira vikami-e alimbo lima. 8 Mbwenye mateya ameli-a vimiri vyaminga anokhondiwa thitho ano-ala vang’ono tembeleliwa. Vakhomonivee anoka-iwa.
9 Mbwenye angalive ira ninoonga e-ni, kaninokaikela ira vamwasa wa vyongo vinodhi-a ivulumucho, nyo odhiveliwiwa muli vapama i-yani-a na avandhuwilale. 10 Namwasa oi Nlungu kai o-olongomana ira adiwale basa linyu na udhivela wathonyi-edhe nyo vadhinalee, volabela ochena thitho munaadhowanave alabela. 11 Mbwenye ninofuna ira mwethene mudhowenave thonyi-edha thindhi ninga lana nyo voroma, ira idedi-edhwinyu ikale yosikimizeleya fiyedha khomoni. 12 Muirena vyevi ira mwa-akale opolola, mbwenye musazi-edhenga atu oi namwasa wairoromelo noleva rima anaawachela vyongo vyalanyedhile Nlungu.
13 Vahora yalanyedha Nlungu Abrahamu, atoolumbela vadhinalee namwasa oi kavali mwinango nlukhulu kwaranya liye oi angaodile m’lumbelela. 14 Liye aongile ira: “Mwaimbarimbari ndinodha uraeli-a noinjivi-a mbumbaa.”* 15 Ee-no Abrahamu angathonyi-edhile leva rima, atoowachela yolanyedha yei. 16 Namwasa oi atu volumbela anoromolecha mutu mwinango wandimuwa kwaranya aliwa, thitho lumbelo liwalo linomali-a kangana uliwethene namwasa oi lumbelolo linosikimizela ira vinoonga aliwavyo pyaimbarimbari. 17 Mofwanafwana na vyevi, Nlungu unofuna asikimizela atu owachela yolanyedhayo ira ifunelwee kinodha chinja. Moi ee-no atoolumbela va vyongo vyalanyedhile liyevyo. 18 Atooirana vyevyo ira va vyongo vinli vyo-ochinjeya vyoi namwasa wa vyevi pyo-oodeya ira Nlungu aname, i-yo oi nitotawela ulimburo lovuneleya nilimbi-iwe nororomela maningi vyongo vinodedi-edha i-yo. 19 Idedi-edhwi-ui ili ninga nangula* wa vingumi vi-u thitho chosimikizeleya na yokaatheya. Idedi-edhoi inonivolocha wari, e-la wa kurtina yofungana 20 oi aromile volowao ndi Yesu ira anidhulele ndhila. Liye ndi ndimuwa wa asembe odhowa nodhowa mofwanafwana na mulimbo velela sembe Melekizedeki.